هووي يا معاوية المدير.. تعال افرز ناسك ديل (وجه شرّاني)

مرة عندنا حبوبتنا في واحدة من الإجازات البتتملي فيها البلد (الجزيرة مقرات) بي ناس البندر والصعيد
لقت ليك الشفع كتار ودايره تسوق أولاد بتها وما عرفتم، بقوا ليها كلهم متشابهين، طبعا أولاد المدن جابوا معاهم اللبس الما خمج
وكسوا ليك أولاد البلد بعد ما قلّعوهم العراريق الشربانه من موية الدميره. صاحت:
هووي يا نسوان تعالن افرزن جَنّونكن ديل سوقنَهُن، وخلّنلي جنياتي

دحين يا ود المدير امشي على البوست المعنون
أولاد مدني ... أبو بكر عباس نشازاً
http://www.sudaneseonline.com/board/470/msg/1404406499.html
و افرز ناسك ديل وخلي لي ناسي

تأمل:

Quote: ود المدير يا حبيب كل سنة وانت طيب ورمضان كريم ياخ والله ود عباس ده احلي زول وديل من اولاد بانت في دولة مدني احلي ناس abas

Quote: يا معاوية المدير ما تشكر لي الراكوبة في الخريف يا اخي مين أبو بكر عباس دا؟ بله الفاضل

Quote: يا بكور يا شفيف عاوز ودالمدير ده يعمل ليك شنو أكتر من إنه يتيح فرصه تكتب فيها عن نفسك من خلال علاقتك المميزة بمدني وإرتباطك الروحي بيها . الاهلي مدني وصديق سرحان كانوا فى قمة مجدهم الكروي والفني فى التمانينات . فى الفترة دى إنت كنت فى ياتو مرحلة دراسيه :) ودالمدير ده بوست الموسم أمسك قوي .

بدر الدين الطائف

يا أخوان البوست دا للمزاح والناس ديل من أحبّ أحبائي وأنا قبلان هفواتهم
وتصوموا وتفطروا على خير

الناس بتتباري في محبتكم بس يا ( المعاويات ) ...

الريدة دي من الله.. الناس تعمل شنو ؟
____________________________
قال ليك في الصعيد الجواني حق مصر يا معاوية ...

اولاد العائلة كلهم اسماءهم يا محمد يا محمدين ...

جا عمهم كبير كده من حلة بعيده و جابو ليهو الوليدات صف يسلموا عليهوا ...

و بالدور ... محمد وِلْدْ عوضين ...

محمدين وِلْدْ حسنين

محمد وِلْدْ محمدين ...

لغاية ما جا ولد و سلم و قال صلاح وِلْدْ حسين !!!

عمك سلم عليهو مستغرب و عاين علي يمينو وقال ... ( ده مسيحي ده ؟ ) ...

هههههه حلوة يا قباني
غايتو الزبير قطع شك مسلم، لكن مدير دا آآبعرفو
المودة لك وله ولهم

عارف آآآآ ود الزبير عندي كلمة واقفة لى في حلقي في حق صاحبي يحيى قباني دا لىها زمن داير أقولها ومتردد
لكن المرّة دي على بالحلال ما أفوتها

Quote: الصعيد الجواني

يحيى يا خوي أنا ما زمااااان شاكي لكن هسع بلحيل متأكد
آآآزول إنت أمدرماني ومتربي في نمرة 2 لكن هنا وهناك أظنك ( تايوان )
إنت يا زول من ( إندنا ) عديييييييييل

أيوا عارفك
سمح سماحة أولاد أمدرمان
ومهندم هندامهم
وعاااااارف ( الأسرة ) الكبيرة وتركيبتها
وأىىىىىىىى حاجة

لكن على بالحلال و ( شراط ) عدييييل كدا
أمشي جيب لىك ألف واحد من أصحابك أولاد أمدرمان وألف واحد من أصحابك أولاد نمرة 2 ونسألهم عن ( الصعيد الجواني ) دي ؟؟؟
لوخمسة من الألفين ديل عرفوها قول عاطف كضاب ......


يازول كدا في البوست اللذيذ دا ورينا

من أنت ....... ؟؟

هههههههههههههههههه،

يا ود الزبير رمضان كريم.

عادي يا اخ، عادي.

زمان أُمي الله يرحما كانت لمان تدور تنادي وآحد فينا
تنده اسامي الولآد والبنات كووووولهم حتي الدايراهو
يعمل معاها كِلِك في نهاية اللِستة.
حالا دا بتكون فاطرة.

هسّع أنا افرو مِنو واخلي مِنو ؟...

أسمع،
إنت البيقولوا معاوية بس،
ديل قاصدين ياتُو فينا ؟؟؟.

نرحب بأبو بكر،
ونقول ليهو رمضان كريم...

هوي معاوية الزبير ده ود كوستي ,,,, كوستي الجمب مدني

هوي معاوية الزبير ده ود كوستي ,,,, كوستي الجمب مدني

حلوة حكاية الوالدة دي، الله يرحمها ويجعل مثواها الجنة

Quote: أسمع، إنت البيقولوا معاوية بس، ديل قاصدين ياتُو فينا ؟؟؟.

شكيت محنك ما عارف والله
صاحبنا مامون العجيمي امس القريبة دي يعني الجمعة رسل لي صاحبو سيف الدولة معانا في الدوحة رسالة قال ليهو:
- وييين صاحبك معاوية بن الزبير
- صاحبي ولّ صاحب الرسول
- صاحبكم الاتنين.

لكن زمان في مصر في طالب اسمه معاوية الوكيل زول فنااان وبيغني ومشهور جدا، بكونوا قاصدنو

Quote: Quote: الصعيد الجواني يحيى يا خوي أنا ما زمااااان شاكي لكن هسع بلحيل متأكد آآآزول إنت أمدرماني ومتربي في نمرة 2 لكن هنا وهناك أظنك ( تايوان ) إنت يا زول من ( إندنا ) عديييييييييل أيوا عارفك سمح سماحة أولاد أمدرمان ومهندم هندامهم وعاااااارف ( الأسرة ) الكبيرة وتركيبتها وأىىىىىىىى حاجة لكن على بالحلال و ( شراط ) عدييييل كدا أمشي جيب لىك ألف واحد من أصحابك أولاد أمدرمان وألف واحد من أصحابك أولاد نمرة 2 ونسألهم عن ( الصعيد الجواني ) دي ؟؟؟ لوخمسة من الألفين ديل عرفوها قول عاطف كضاب ...... @ يازول كدا في البوست اللذيذ دا ورينا من أنت ....... ؟؟

انا بن جلا و طلاع الثنايا
والبال طويل طول القنايا

يا كافي البلا مسلسلات ما بتشوف؟

Quote: هوي معاوية الزبير ده ود كوستي ,,,, كوستي الجمب مدني

زمان مشيت قضيت ايام مع صاحبي في كنانة.
أها، قمت مشيت مع مُهندس من الشغالين في المصنع. نسيت إسمو
من اولآد كوستي، مشيت معاهو كوستي لزيارة أهلنا ناس حسين
بابكر الله يرحمو. بعد رجعت اتبرا أُختي قالت، جيبو معاوية نصفي
بيهو الحلومُر من شِدة ما البعوضة فدغتني.

في اشياء مشتركة بين مدني واتبرا ؟.
علي سبيل المثال، اللتنين في عصر الكورة الذهبي
كانن بيمدن هلآل مريخ باللعيبة...

رمضان كريم اخونا معاوية الربير

الاتنين واشهد الله بنحبكم ونحترمكم

Quote: أُختي قالت، جيبو معاوية نصفي بيهو الحلومُر من شِدة ما البعوضة فدغتني.

كنت قايلك ح تقول عشان الحلو مر يطلع شربوت جاهز من شدة ما (اتشبّعت) في كوستي

ود الزبير يا جميل :)
رمضان كريم ياخ.
عارف المقام ما مقام إعتذارات وإكيد إنت مستوعب سبب الخلط لتشابة الاسماء وكده .
وبالتاكيد أنت ووالمدير أعزاء وقريبين الى القلب .
بس ما بوعدك إنو الخطاء ده ما يتكرر لانه الحكاية دى قاعده تعلق معاي :).

سليمان القرشي
ربنا يطيّب خاطرك الطيب ياخ ولي قدام
-----------------

يا بدر "اغلطوا انتو يا أحباب نجيكم نحن بالأعذار"
يا رجل والله كلو مزاح، والليلة عندي مزااااج طيب للكتابة عشان كدا افترعت البوست دا،
والبوست الأصلي عايزين نفضيهو لي صاحبك
دمت ودامت الصحبة

Quote: انا بن جلا و طلاع الثنايا والبال طويل طول القنايا يا كافي البلا مسلسلات ما بتشوف؟

يابن جلا يا حبيبنا
رمضانكم دخل في العضم بالسرعة دي ؟؟؟
بالجد لقد أبهرتني ( الصبغة الشعبية ) أمثالاً وقصصاً وحكاوي وغوصاً في الموروث الغنائي الشعبي
لا أقول ( إستكترتها ) بل أقول ( إستغربتها ) عند شخص ( ممعن ) في المدينة والمدنية
ربما في الخاطر ذكريات داخلية عطبرة ( أ ) وذلك الجو الممعن في ( العصرنة )
فجاء الإستغراب أن كيف لمن نشأ في ( أمدن ) وجه المدينة أن يحذق الوجه الشعبي على ذاك القدر الذي يحس من يقرؤه أن صاحبه لم يغادر ( القرية ) قيد أنملة

بالجد كلمنا



__________________

وبالجد

لا أتابع عادة المسلسلات

والله لي عظيم الشرف أن يحصل هذا اللبس من إخوة أحباب
جمعتني بهم هذه الدار الرحبة بين إسمي وإسم شخص حبيب
للقلب معاوية ليس المدير إنما الزبير الذي هو مدير في الزوق
والأدب الجم. أنا سعيد جداً أن يحصل هذا الخلط والمزج والتمازج
بين إسمي وإسم من شهدت له حروفه في هذا المحفل بالزوق
والسماحة.
أكتب أخي معاوية، أكتب حتي اراك، فوالله نحن نتعرف بعضنا
البعض في هذا المكان من خلال الكتابة فالعضو هنا تشهد له
أحرفه، وتبرز شخصيته كتاباته، فإما قلب مُشرع مفتوح علي
مصراعية وإما دعاء وتضرع لله سبحانه وتعالى أن يجود بفتح
بصيرة قد أُغلقت. اسأل الله أن لا ابغض أحد لكنني اتعرف
الناس من خلال كتاباتهم فالكتابة هنا ليست ككتابة الصحف،
لكنها أخذ وعطاء ومجاذبة لأطراف الحديث تفتح المجال لنا
أن نتقارب ونتالف حتي نصبح قاب قوسين أو ادنى ونحن تفصل
بيننا المحيطات والفيافي وكلّ التضاريس التي علي وجه الأرض.
الذي استشفه عنك أخي معاوية من خلال كتاباتك ومشاركاتك في
هذا المكان يلزمني باقي عمري، ويقصر حتي لو طال دون بلوغه،
لكن يقولون التشبه بالرجال فلآح، فما اسعدني بهذا الخلط، وللجميع
محبتي ومودتي، وكتّر خيركم وإن شاء الله ربي يجعلني عند حسن
ظنكم بشخصي الضعيف...

Quote: قرحطب فور برنقا · طب الفاشر رمضان كريم معاوية الزبير ،، سلامات يا دكتور بله وكل عام وانت وعيالك بخير

وإنت بخير يا دكتور قرحطب.

لكن دكتور بلة دا منو ؟.
يا اخي رمضان بصراحة سخّن لكن ما للدرجة دي.
والله صحي...

Quote: بالجد لقد أبهرتني ( الصبغة الشعبية ) أمثالاً وقصصاً وحكاوي وغوصاً في الموروث الغنائي الشعبي لا أقول ( إستكترتها ) بل أقول ( إستغربتها ) عند شخص ( ممعن ) في المدينة والمدنية ربما في الخاطر ذكريات داخلية عطبرة ( أ ) وذلك الجو الممعن في ( العصرنة ) فجاء الإستغراب أن كيف لمن نشأ في ( أمدن ) وجه المدينة أن يحذق الوجه الشعبي على ذاك القدر الذي يحس من يقرؤه أن صاحبه لم يغادر ( القرية ) قيد أنملة بالجد كلمنا

عاطف يا جميل ...

هي هبة وهبني اياها رب العالمين ...

وانا صادق بعيداً عن الهزر ...

تلك الهبة هي من ابسط ما يكون ... حينما احب شخصاً و اصادقه ... اعيش معه كل ما يحب ...

امدرمانيتي و عصرية الخرطوم بداخلي ... ولكن بطبعي اعشق الجمال ...

و الجمال يا عاطف في خارج العاصمة انقي منه داخلها ... وهي حقيقة ...

لا تنسي اني ولدت و نشأت صغيرا في بورتسودان ...

و درست بداية مراحل ( الكتاب ) في ود مدني في المدرسة الشرقية ...

وكان مدخل حبي للطرب و الريزم الموسيقي بدون مبالغة يا عاطف

هم ( دقاقات البهارات ) في سوق البصل جوار المدرسة و خلف منزلنا تماماً ...

لهم ايقاعات مرتبة ... تطرب لها الاذن ....

فعشقت ود مدني ... من بركاتها و مرنجانها الي غابة السنط و دردق ...

و تعلمت اكل ( الدُقة ) ... و التبش بالشطة ... وانا ابن الست سنوات ...

كنت اشق سوق البصل في طريقي الي المدرسة و علي كتفي ( خُرتايتي ) ... و منتعلاً شدتي و جلابية مطرحة ...

كانت عصرياتنا لعب الكورة و ان نتسلل الي بيت الحاكم العسكري ( المحافط وقتها ) الاستاذ سليمان وقيع الله ...

و نقطف التمربونا و نعيس فسادا في العنكوليب فائق العدد في مزرعة بيته ...

تعلمت التشريك بالقلوبية في مدني ... و اقتنيت اول نبلة هناك ايضاً ...

وكان لي ( جبادة ) لا تضاهي ... في سحبتها تأتي بنصف التمرهندي الاحمر اللون ...

تعلمت السباحة في مدني و انا ابن السادسة ... بعد ان تعرضت للغرق و انقذني صديق اخوتي الكابتن شرف محمود خليفة رحمه الله ...

و عدت الي مدني كثيراً ... حينما انتقل صديقي محمد محمود رمضان الي مدرسة الهوارة ..بانتقال والده رحمه الله مع بنك النيلين ...

و عدت اكثر في ايام الجامعة مع صديق العمر عاطف الزبير شاني ...

و لعبت ( الحريق ) في نادي الجزيرة مع اباطرة لعب الكونكان و علي رأسهم الجميل ميرغني وداعة ...

كل تلك الزيارات ... كانت تمتد احياناً الي اسابيع ... نعيش فيها كل الوان الحياة ...

ثم اتيت لامدرمان لمنزل الاسرة و عشت الصبا هناك ...

و الحديث عنها ... لا تكفيه صفحات هذا المنبر ...

و انتقلنا الي الخرطوم ... وهناك تزاملت و تصادقت مع الكثيرين

و كنت كثير التجوال بين مدني و سنار و كوستي و الدويم و ربك ...

اوشكت يا عاطف ان اشتري دقاقة عيش اعمل بها في المقينص مع العم احمد الكنزي والد صديق العمر ابراهيم الكنزي

و خذلتني الامدادات المادية حيث كنت وقتها طالبا في الجامعة ...

كنت حينما اذهب الي اي مدينة او قرية ...

اعيش عيشتها تماماً ... ان ناموا علي الارض نمنا ...

و ان شربوا من الخيران شربنا ....

و ان شربوا ماء او بغواً شربنا ايضا...

و ان اكلوا كولاً او مرساً اكلنا ايضاً ...

لا اخفي عليك ... الانصهار في بوتقة جامعة الخرطوم كان له الاثر الكبير ...

و كنا لا نفرق بين خرطوم او مسيد او كتم ...

نحب بعضنا البعض ... نغني من كل بقاع الوطن ...

لا لون لا جهة و لا قبيلة ....

سودانيين فقط ...

من اجمل ايام حياتي يا عاطف ... كانت في جهة السقاي ...

حينما ذهبنا الي رحلة لمدة يوم مع طلبة الكلية ...

ثم تخلفنا منهم انا و عاطف الزبير ( مدني ) و ابراهيم الكنزي ( كوستي ) و معتصم الهكر ( طيبة الشيخ عبد الباقي )

و مبارك الباجوري ( الهجرة امدرمان ) و العبد لله و معنا ابن المنطقة عزالدين ( أبيق ) ... وعود موزن و بقية ( مياه غازية ) ...

عشنا مع اهل المنطقة ثلاثة ايام ... فطورنا بصل ... وغدانا بصل ... و عشانا قاورمه ...

و سعادتنا بالونسة و الحُجا مع اهل عزالدين ليست لها ثمن ...

ايضاً يا عاطف انضمامي ( بالصدفة ) للاتحاد العام لكرة القدم في التمانينات في عهد المرحوم فيصل محمود مرسي سكرتير الاتحاد و قتها

ورئيسه العميد عبد المنعم النذير ... لعب ذلك دورا كبيرا في اختلاطي باهل المستديرة و التي تأخذك الي كل دور الرياضة بالسودان ...

اما كوستي يا عاطف ... فما ادراك ما كوستي ....

لي حديث ذو شجون ... ارجو ان لا تجرفني تلك الشجون للوقوع في الممنوع ...

عاطف هذا بالمختصر المفيد ... انا ابن السودان كله ...

لو اردت ان اكتب بالتفصيل ... ساترك اعمالي و اشغالي و اتفرغ ...

هاهاهاهاهاهاهاها


عارف يا الحبيب انا اكتشفت الغلطه في لحظتها وانت رديت قلت خلاص ما جاب ليها خبر


تارينك عاوز تفتح بيها بوست


المهم كلكم حبايب البي

اكان ود الزبير ولا ود المدير

معاوية الزبير الطيب .. واحد من ظرفاء البلد
ناس ود نفاش و كمال سينا و الهادي الضلالي ، فايتنو بالشهرة بس
وكمان مفكر و كتاب و طليعي

تحياتي لمعاوية المدير
واشتياقاتي للفنان الرائع معاوية الوكيل
ومحبة دائمة للعزيز معاوية الزبير

ولكل المتداخلين هنا و أخص عاطف و قباني و ود أبسن

تعرف يا ودالمدير الظاهر عليك ما مشيت الدويم , مشيت مرة ومرقت المغرب ,, اسمع صوت زي صوت ازيز الطيارة , اعاين ألقي ليك الباعوضة قدامنا دخان بس , آي والله دخان اسود ,
ابوساندرا وينك ليك وحشة والله

فرح أبو روضة
إن شاء الله رمضان ما مغلّت عليكم
ونرجو أن يكون شهر عافية وعفو عن الجميع
يمين تقول آمين

Quote: ولكل المتداخلين هنا و أخص عاطف و قباني و ود أبسن

تسلم بركوتة

ياخ دا بوست الزول يجيب ليهو عنقريب هبابي زى عنقريب قباني ويرقد على صفحتو وعندما يغلبو الضحك يواجه السماء
جاب سماحة ناس !!!

هسع عليك الله يا قبة الزول يقتبس شنو من كلامك دا ويخلي شنو ؟؟؟
ياخ دي سياحة مبالغة
قطعة أدبية إجتماعية تاريخية مترابطة

بعطيك العافية

لا يزال في النفس شئ من حتى

لكن سوف ( أنكشك ) به ذات بوست آخر بحول الله نستخرج منك درراً كهذي

أحبابنا
معاوية ( الزبير + المدير ) ما يقوموا يطردونا
إستلمنا بوستيهم أكتر منهم

Quote: Ali Bob · الأكثر تعليقا هههههه غايتو دي بداية رمضان بعد شوية كده يعملو لك صلعة زي بتاعت المدير

قِر قِر قِر، بالله دي حالة دي يا بوب!
يعني في العشرة الأواخر عادي ممكن يقولوا لي يا وضاحة

Quote: قرحطب فور برنقا · طب الفاشر رمضان كريم معاوية الزبير ،، سلامات يا دكتور بله وكل عام وانت وعيالك بخير

الله أكرم يا قرحطب وتصوم وتفطر على خير
ود المدير عايز يضهبك قال ليك دكتور بله دا منو، كأنو ما قرأ البوست يعني
مودتي

Quote: عارف يا الحبيب انا اكتشفت الغلطه في لحظتها وانت رديت قلت خلاص ما جاب ليها خبر تارينك عاوز تفتح بيها بوست

عبس يا جبـان، قلت لي عملت نايم، هاهاهاها
لكن والله أنا ما قاصد بالبوست دا أي سوء
تعرف المرحوم ماركيز في واحدة من تعابيره القاطعها من راسو ديك
قال الحلاق لما يطقطق المقص في الهواء أثناء الحلاقة بكون بفرّغ فائض مهارة
أها أنا أمبارح كان عندي فائض كتابة. بَس
(ولّ) مشتاقيييين، زي ما غنى عثمان مصطفى

Quote: Salma Salama · الأكثر تعليقا · Cedar Crest College معاوية الزبير بالطريقة دى حتكتلنى عديل ، يعنى محل ما اهبش الاقى اصحابك اصحابى ، هسى مامون عجيمى دا لميت فيهو وين ؟ مامون دا عرفنى عليهو عبدالعزيز العميرى زمان لمن كنا طلبة هو فى جامعة القاهرة وكنت يومها فى معهد الموسيقى والمسرح اجمل كائن فى الكون سلام كبير لمامون ودحيم النو ولك مثله يا صاحب اصحابى

يا سلمى مامون المابعرفو مفروض يتحسس مخزن عِرفَتو
يقولوا فيهو شنو هسه عشان يوصفوهو، ياخ دا إفلاطون زاتو لو عرفو بحطم مدينتو دي ويقول ليهو خليناها ليك تعال ابني مدينتك
لكن (من) أجمل ما فيه سخريته اللذيذة
أمبارح (مساء السبت) ضرب لي تلفون اتونسنا كدا قام قال لي أها وعامل شنو، قلت ايهو والله في سجمي ورمادي داك
قال لي آي الحكاية تربية ما بتتغير.

مرة في الشارقة طالعين بي عربيتو ماشين نستلم نتيجة فحص الايدز عشان أجدد إقامتي، نتونس في الطريق أنا أتكلم وهو يرد باقتضاب وأحيانا بصمت
لغاية ما وصلنا محل نتائج الفحص، بعد وقف العربية ونزلنا قلت ليهو انت مالك ساكت مما طلعنا من البيت؟ سكت كدااا وسألني بجدية:
معاوية انت قاعد تحلق شعرك في البيت ولّ بتمشي الحلاق، قلت ليهو بمشي الحلاق
قال لي: "طيب قووول ما بتمشي فنادق دبي ولا بتهبّش في قهاوي عجمان دي ... أها ما بتخاف الحلاق دا يكون جرحك بي موس ملوثة..
ماشي بي برود كدا وتضحك تقول داير تستلم حوالة قروش، ياخ نحن ماشين نستلم نتيجتك انت وخايف يطلع عندي ايدز أنا دا".

يا أبو ساندرا يا حبيب
لا تضيّق واسعا، وخلّي لينا مساحة للغلط ياخ
بعدين أوصافك الفوقنا دي ياها كتابة العرضحالجي لي صاحبك الجايي يشتكي في المحكمة
وقام يبكي لم قروا ليهو مظلوميتو، فــ .... ما تبكينا ياخ
أنا في سودانيز دا غلطت على ناس والأرشيف موجود
عارفك بتكتب من مودة (متبادلة) لكن كمان ما قدر دا
أما ناس الدوحة فـ حيقولوا يا ربي بركات دا قاصد معاوية ياتو ؟

Quote: تحياتي لمعاوية المدير واشتياقاتي للفنان الرائع معاوية الوكيل ومحبة دائمة للعزيز معاوية الزبير

بمناسبة رمضان، رتّب لينا موعد مع صلاح عبد الله نمشي نفطر مع عمر عباس في المزرعة العجيبة ديك
وربنا يديم المحبة

Quote: كنت قايلك ح تقول عشان الحلو مر يطلع شربوت جاهز من شدة ما (اتشبّعت) في كوستي

ههههههههههههههههه،

في الكمبو في ربك لقيناليك جماعة بغنو حقيبة صح.
عندهم رِق النوع القديم بتاع جلد السمكة دآك، وبيعزفو
بالمثلث والحاجات البلبسوهن في اللصابعين، الزي
بتاعات الرآصة المصرية.

تنبيه،
الكلآم دا كان في ثمانيات القرن المنصرم...

Quote: هههههه حلوة يا قباني غايتو الزبير قطع شك مسلم، لكن مدير دا آآبعرفو المودة لك وله ولهم

ههههههههههههه،

صاحبي ثابت حبشي،
من نقادة شندي.
لمّ فيهو عربي في موقف المواصلآت النوع البجيك شايل ورقة
ويقوليك عايزين نبني جامع داك. ثابت قدر ما حاول يصرفو،
العربي يمشي ويجيهو، يا ابن الأَم كرامة دايرين نبني جامِ.
قام ثابت قاليهو، يا زول انا زاتي مسيحي.
العربي قاليهو، أأوزِبِ بالله كافر !!!...

Quote: تحياتي لمعاوية المدير واشتياقاتي للفنان الرائع معاوية الوكيل

حياك الله يا ابو ساندرا،
ورمضان كريم.
معاوية الوكيل دي كان ماسكا لي أخونا النصري امين،
ياااااااا الله حتي المدير دي وقعتلو. مرّة في مناسبة في
كالقري شال المكرفون وإتنفش وقال، الآن نقدم لكم
معاوية الوكيل، تصدق.
الدبجة دا عندنا في البلد هناك، زول كان بتاع طشمي.
قالوا ليهو قدّم الفنان، مسك المكرفون وإتحنفش وقال،
الآن نقدم لكم الفنان المُرعب جعفر أحمد. جعفر أحمد
قال ليهو، الله يصرفك يا الدبجة، أنا أسد.

لك عاطر التحايا يا ابو ساندرا،
ولأسرتك الكريمة...

Quote: والله لي عظيم الشرف

إلى آخر الكلام الجميل دا
من الذي يكتب باسمك يا مدير! قول قول ما فوكّا حاجة، عايزين نسجلو في جماعة أدباء المهجر.
الله يديك العافية يا معاوية . قبال كدا أنا كتبت عن الخلط دا، وقلت نحن لاقين
فـ ربنا يديم المودة
إلا النسعلك: في كندا العريضة دي وبما انك من أتبره ما عترلك فوق قريبا لي اسمه عز الدين طيفور
مغروض فوقو شديييد
ونواصل

Quote: إلا النسعلك: في كندا العريضة دي وبما انك من أتبره ما عترلك فوق قريبا لي اسمه عز الدين طيفور مغروض فوقو شديييد ونواصل

عارف قريبك دا، كان ساكن مع ناس أُختي في كالقري، ووكتها أنا
كنت في منطقة حقول بترول إسمها (فورت ماكميري). أها عز الدين
دا قدّم لشركة في فوت ماك واخدوهو. ناس أُختي إتصلوا علي قالوا
لي، عز الدين جاييك هناك ولآزم تقابلوا. عز الدين طبعاً في كامبات
الشركة في الخلا. أها، في أوّل إجازة ضرب قال لي، أنا جاي عليك.
جا. قتلو، كدي يا عز الدين أرح ناكلنا لُقمة. قال لي، يا زول اللكل
دا أعفاني مِنو، أنا ما باكل اللحوم!!!. قُتلو، سمح بيتزا. قال لي،
فيها الرغيف. قُتلو، يا عز الدين شغلك دا شُغُل فسالة. قال لي، والله
ما فسالة، لكن ارح نشرب قهوة.
شربنا القهوة، وكت جات مواعيد البص قال لي، أها، بعد كدي أنا
بمشي. قُتلو، خلآس، لكن وكتك التدور تجي المرّة الجاية عليك الله
كلمني قبل إسبوعين. قال لي، ليه! في شنو !!!؟.
قتلو، لا مافي حاجة، بس عشان احضرلك كليقة اللت قش .

الظاهر إنت آخر مرّة شفتو فيها كان سمين، لكن هسّع قريبك دا كان
كابستو تنيقة إلا يكابسلو شُدرة واللآ حيطة، من عدم أكل اللحم.

اديني فرقة بس،
بلمك فيهو تب إن شاء الله...

Quote: شربنا القهوة، وكت جات مواعيد البص قال لي، أها، بعد كدي أنا بمشي. قُتلو، خلآس، لكن وكتك التدور تجي المرّة الجاية عليك الله كلمني قبل إسبوعين. قال لي، ليه! في شنو !!!؟. قتلو، لا مافي حاجة، بس عشان احضرلك كليقة اللت قش .

ههههه
طبعا طيفور نباتي، جاني السنة الفاتت هنا وأدبني أدب، شبكتو ليك جرجير وعجور والتحلية بي طماطم
بعدها لاقيتو في السودان نهاية السنة ثم انقطعت أخباره

Quote: سلآمات يا معاوية المدير، معاك معاوية الزبير. هههههههههه. كيف أحوالكم والمعاكم؟. أمس كنت فاطر في كالقري، وسألت عن الأخ عز الدين، وعرفت انه غادر كالقري للسويد. إن شاء الله لو لقيت ليهو تلفون في السويد أرسلو ليك، أو لو رجع كالقري اديك خبرو. تحياتي لك وللجميع طرفك...

حاولت ارسلك الرسالة دي بالخاص حلفت ما تتحرك
من محلها!!!. باقليك بكري دا بيكون عامل لي عمل !؟...

Quote: باقليك بكري دا بيكون عامل لي عمل

والله ياخ ما تستبعد، طيفور دا ممكن تتوقع منو أي حاجة
وهو زي ما كان صاحب دراسة في الزقازيق اسمو عشري بقول :"الزول دا فيهو شئ كتيييير" وحاجاتو بي تبين.
قلت لي مرق في السويد، دحين ما عندنا بورداب هناك!
لا عليك يا رفيق، أشكرك على الاهتمام، و.. ابقى عافية