Post: #1
Title: عنقريب في كندا قال ليك ... حليل حبوبتي !!!
Author: يحي قباني
Date: 07-05-2014, 03:45 AM
شغل العقارات بخليك تشوف العجب العُجاب في الدنيا دي ...
تدخل بيوت و تطلع من بيوت ... ومجبورين نحفظ اسرارها ...
لكن الشفتو الليله دي ... غلبني اكتمه ... و كلمت ست البيت قلت ليها معيش أغفري لي ...
عنقريبك ده الليله انا عندي معاهو موضوع ...
ده العنقريب ... لكن دي ما المشكلة بس وجوده هنا في كندا ...!!!
|
Post: #2
Title: Re: عنقريب في كندا قال ليك ... حليل حبوبتي !!!
Author: يحي قباني
Date: 07-05-2014, 03:54 AM
Parent: #1
اتذكرت اويضة الجالوص حقة حبوبتي في ود ارو ...
كانت الله يرحمها في رمضان ... تخت عنقريبها في ضل الجالوص في زقاق ممحوق في حوش ( الحريم ) ...
و الزقاق اصلاً خنقه ... و الشمس حاره طول اليوم ... الا العصر لامن ترخي شويه ... الضل بجي ...
لكن سموم الارض الحجرية ديك يطلع بوخ من الواطه ...
و حبوبة الله يرحمها ... توبها مبلول تغتي بيهو وشها ... لغاية ما تقوم لي تحضير الفطور ...
اتذكرتها لامن شفته العنقريب ده قاعد في بلكونة حدادى مدادى ...
و جنب البيت حديقة ... والهمبريب ما يديك الدرب ...
قلت كان الله كان مد في عمرها ... ما كان جات اخدت ليها شبال في الطراوة دي ...
|
Post: #3
Title: Re: عنقريب في كندا قال ليك ... حليل حبوبتي !!!
Author: Elmosley
Date: 07-05-2014, 04:00 AM
Parent: #1
اها كده حبوبة صلاح غريبه حتزعل
|
Post: #4
Title: Re: عنقريب في كندا قال ليك ... حليل حبوبتي !!!
Author: يحي قباني
Date: 07-05-2014, 04:01 AM
Parent: #3
| Quote: اها كده حبوبة صلاح غريبه حتزعل |
بالله يا موسيقار ما بغرته من العنقريب الهبابي ده ...
|
Post: #5
Title: Re: عنقريب في كندا قال ليك ... حليل حبوبتي !!!
Author: عبدالعزيز عثمان
Date: 07-05-2014, 04:36 AM
Parent: #4
والله يا ود قباني العنقريب ده قدر ما عاينت في اشوفك سويتو ات...
والله امكن ود المدير ،،قال بسويهن،،،انا القدامك ده،،كنت اصنعهن في افريقيا اشكال وانواع...
علا النسعلك ،،حبوبتك صقتت يوم واحده هنا الا تقول ليك اهلي..
|
Post: #7
Title: Re: عنقريب في كندا قال ليك ... حليل حبوبتي !!!
Author: يحي قباني
Date: 07-05-2014, 05:08 AM
Parent: #5
Quote: والله يا ود قباني العنقريب ده قدر ما عاينت في اشوفك سويتو ات...
والله امكن ود المدير ،،قال بسويهن،،،انا القدامك ده،،كنت اصنعهن في افريقيا اشكال وانواع...
علا النسعلك ،،حبوبتك صقتت يوم واحده هنا الا تقول ليك اهلي.. |
الله يرحمن جميع يا عبد العزيز ...
و الله كان مش شردت ...
انا بتذكر الحاجة امي الله يرحمها قعدت معانا فترة لكن غلبها شتانا ده مرة واحده ...
بس و الله اشتهيت ليهم لمه في طراوة صيفنا ده ... يشموا الهوا النضيف بدل العجاجة الحمرا ديك ...
|
Post: #6
Title: Re: عنقريب في كندا قال ليك ... حليل حبوبتي !!!
Author: رشا سالم
Date: 07-05-2014, 04:37 AM
Parent: #4
رمضان كريم يا قباني..
اها، ست العنقريب دا خواجية؟
غايتو بالغت معانا
|
Post: #8
Title: Re: عنقريب في كندا قال ليك ... حليل حبوبتي !!!
Author: يحي قباني
Date: 07-05-2014, 05:11 AM
Parent: #6
Quote: رمضان كريم يا قباني..
اها، ست العنقريب دا خواجية؟
غايتو بالغت معانا |
و الله البالغتي انتي دي ...
تلفون مافي ؟
ابدا و الله ست البيت هندية او من الجهات ديك ...
بالله ما عنقريب داير ليهو ( حِنّه ) يا دكتوره ...
|
Post: #9
Title: Re: عنقريب في كندا قال ليك ... حليل حبوبتي !!!
Author: هاشم أحمد خلف الله
Date: 07-05-2014, 06:15 AM
Parent: #8
الله عليك يا ود قباني يا جميل
دائما تصحي الفرح الـ في الدواخل وتبهج الروح بي التواصل
ياخي مالك بتهبش الحاجات دي ؟ وتعمل لينا حكة في القلب
رمضان مبارك عليك وعلى ضيوفك الكرام
تصوموا وتفطروا على خير
|
Post: #11
Title: Re: عنقريب في كندا قال ليك ... حليل حبوبتي !!!
Author: يحي قباني
Date: 07-05-2014, 08:43 AM
Parent: #9
Quote: الله عليك يا ود قباني يا جميل
دائما تصحي الفرح الـ في الدواخل وتبهج الروح بي التواصل
ياخي مالك بتهبش الحاجات دي ؟ وتعمل لينا حكة في القلب
رمضان مبارك عليك وعلى ضيوفك الكرام
تصوموا وتفطروا على خير |
هاشم خلف الله الرجل الذي احبه و احترمه ...
الله اكرم يا فنان ...
حكة القلب اصلها حاصلة ... بس بنكابر ساي يا حبيب ...
|
Post: #13
Title: Re: عنقريب في كندا قال ليك ... حليل حبوبتي !!!
Author: Elmosley
Date: 07-05-2014, 10:02 AM
Parent: #4
| Quote: بالله يا موسيقار ما بغرته من العنقريب الهبابي ده ... |
بغرت ساكت بس ؛ان دلير ليهم راكوبه
|
Post: #10
Title: Re: عنقريب في كندا قال ليك ... حليل حبوبتي !!!
Author: عاطف عمر
Date: 07-05-2014, 07:28 AM
Parent: #1
قبة يا حبيبنا
رمضان كريم وتقبل الله تعالى صيامك وقيامك وصالح الأعمال
النصيحة ليك يا الله
أصصصلو ما إتخيلتك بتعرف حاجة إسمها عنقريب ...... و........ هبابي كمان
من وجهة نظر ( نقدية ) ... لاحظت أن ( كراب ) العنقريب Relatively طويل
يعني أنا حسبت طول العنقريب حسب البلاطات وبافتراض أنو عرض البلاطة ( 10 ) سم فطول السرير حوالي 220 سم وطول الكراب حوالي ( 60 - 70 ) سم
الكراب عندنا ما بيزيد على ( 30 ) سم
لفت الكراب نظري لأنو عندي معاهو مشكلة من زمن كنت صغير ......
مرة للتعترني .. وكنت فاضي ... مسكت عناقريب بيتنا كوولهم وقعدت أشد في الكراب.....
جاءت إحدي صديقات أمي ووجدتني في حالتي تلك ..... ما صدقت .....
" أريتك ود السرور ..... عليك الله بعد ما تخلص تعالى شد لى كراب عنقريبي "
...... ذهبت لها .... والعنقريب طلعوا عشرة .....
الحاجة ما حمدت ربها وسكتت ، كلمت أخواتها وجاراتها
وكل جارة كلمت جاراتها....
كنت أصحى كل يوم الصباح بطلب شد كراب عنقريب لإحدى الجارات لأكتشف أن المطلوب شد ( كراريب ) عناقريب كوووول البيت
|
Post: #12
Title: Re: عنقريب في كندا قال ليك ... حليل حبوبتي !!!
Author: يحي قباني
Date: 07-05-2014, 08:47 AM
Parent: #10
Quote: قبة يا حبيبنا
رمضان كريم وتقبل الله تعالى صيامك وقيامك وصالح الأعمال
النصيحة ليك يا الله
أصصصلو ما إتخيلتك بتعرف حاجة إسمها عنقريب ...... و........ هبابي كمان |
قايلني بَلَبٍكْسْ ؟
و الله توفيق عيسي مكي ما خاتي كان كده !!! هههههه
و الله يا عاطف العناقريب الانا ( عتلتها ) في حياتي تكون قدر كراريبك دى زي 10 مرات ...
غايتو ... مسجلات البركس و بوب مارلي عملوا لينا سمعة ...ههههه
|
Post: #14
Title: Re: عنقريب في كندا قال ليك ... حليل حبوبتي !!!
Author: محمد المرتضى حامد
Date: 07-05-2014, 10:05 AM
Parent: #12
سلامات يا باش وأنت وضيفك تصوموا وتفطروا على خير..
كنا نسمع عن أنواع ومسميات مختلفة للعناقريب ك (الجرتق) و( الكادر) ويبدو
أن الذي أوردته في الصوره يسمى Mississauga Nap . الغريبه إنو في واحد كتب
أن هناك عنقريب يسمى الخرطوم بالليل رغم أن (الخرطوم بالليل) أطلق على قماش لاشك
أنك تذكره جيدا لأن حسناوات العاصمة كن يفصِّلنه ك (ماكس) للحفلات عندما كان للعاصمة
ليال بهيجة غدت في الزمن الغيهب كوالح مسهدات..
لكن (الكرَّاب) في الراكوبه ام همبريب أو قطيه مع سرَّايه خريف نومتو ما بتتلحق ، غيبوبه بس،
شخيرك ينسمع بره الصريف تقول حبالو مجدوله بالديازيبام فاليوم..
-
قلت لي عاطف عمر فاكر المسألة جيمي كليف و GMH وقصقصة بالتسعه في ال Whist ؟ 
|
Post: #15
Title: Re: عنقريب في كندا قال ليك ... حليل حبوبتي !!!
Author: يحي قباني
Date: 07-05-2014, 03:52 PM
Parent: #14
Quote: سلامات يا باش وأنت وضيفك تصوموا وتفطروا على خير..
كنا نسمع عن أنواع ومسميات مختلفة للعناقريب ك (الجرتق) و( الكادر) ويبدو
أن الذي أوردته في الصوره يسمى Mississauga Nap . الغريبه إنو في واحد كتب
أن هناك عنقريب يسمى الخرطوم بالليل رغم أن (الخرطوم بالليل) أطلق على قماش لاشك
أنك تذكره جيدا لأن حسناوات العاصمة كن يفصِّلنه ك (ماكس) للحفلات عندما كان للعاصمة
ليال بهيجة غدت في الزمن الغيهب كوالح مسهدات..
لكن (الكرَّاب) في الراكوبه ام همبريب أو قطيه مع سرَّايه خريف نومتو ما بتتلحق ، غيبوبه بس،
شخيرك ينسمع بره الصريف تقول حبالو مجدوله بالديازيبام فاليوم..
-
|
سعادة المستشار ... مشتاقين يا جميل ...
و الله الليل اسماء الحاجات الارتبطت بيهو كتيرة ...
الخرطوم بالليل ... كِربشين نص الليل ...
ايام يا مرتضي ... نتحتفظ بي مجاهدة في دواخلنا باجملها ... رغم هذا الزمن ... وملامحه المعكره ...
| Quote: قلت لي عاطف عمر فاكر المسألة جيمي كليف و GMH وقصقصة بالتسعه في ال Whist ؟ |
توفي ده خليهو ساكت ... الظاهر فهمنا غلط ... نعمل شنو ...الرجل كان ( Semi مولانا ) زى ما كان بقول الكبتن صاحبي ...
مع انو كان جانا و عرف البينا و العلينا .... كان بقي علي بصيره حسي ...ههههه
|
Post: #16
Title: Re: عنقريب في كندا قال ليك ... حليل حبوبتي !!!
Author: يحي قباني
Date: 07-06-2014, 04:55 AM
Parent: #15
| Quote: بغرت ساكت بس ؛ان دلير ليهم راكوبه |
راكوبة بي همبريب جاي بعد مطرة تقيله ...
و تكون ماكل ليك ( حبحب ) ساااقط لامن دايش من حلاتو ...
|
Post: #17
Title: Re: عنقريب في كندا قال ليك ... حليل حبوبتي !!!
Author: Mohamed Yassin Khalifa
Date: 07-06-2014, 06:42 AM
Parent: #16
حليل الـ..... الـ..... العناقريب يا قباني!
|
Post: #18
Title: Re: عنقريب في كندا قال ليك ... حليل حبوبتي !!!
Author: يحي قباني
Date: 07-06-2014, 07:07 AM
Parent: #17
| Quote: حليل الـ..... الـ..... العناقريب يا قباني! |
بالله خلاص القصة باظت !!! ههههه
|
Post: #19
Title: Re: عنقريب في كندا قال ليك ... حليل حبوبتي !!!
Author: ياسر السر
Date: 07-06-2014, 10:56 AM
Parent: #18
الحبيب الشفيف يحيى قباني رمضان كريم عليك وعلى كل من يمر من هنا ,,,
المحيرني العنقريب ده وصل بلدكم دييييييييييييييك كيف ؟؟؟ لكن غايتو ده يخليك تنوم لو ما نعسان خاصة مع جوكم الجميل ده وكمان لو عندك رادي خاتيه في الشباااااك تكون مبااالغة لكن ويييين اذاعة ام درمان ؟؟ غايتو بي عنقريبك ده قلبت علينا المواجع بس ..
يكون ده العنقريب القال فيهو عمنا ود الرضي الله يرحمه ( عايز اشوف حبيبي اليوم داك شفتو محنن بالقنيلا ويحنو كانو واااجع .. اعاين فيهو واضحك وامشي واجيهو راجع ) لانو ود الرضي شاف المحبوب في عنقريب متل عنقريبك ده .. غايتو الدنيا رمضان والكلام في البوست على مسؤلية صاحبه ... ولا شنو
تحياتي : ياسر العيلفون
|
Post: #20
Title: Re: عنقريب في كندا قال ليك ... حليل حبوبتي !!!
Author: محمد أبوالعزائم أبوالريش
Date: 07-06-2014, 12:34 PM
Parent: #19
| Quote: ابدا و الله ست البيت هندية او من الجهات ديك ... |
يعني ما سودانية؟ كده المسألة عايزة بحث.
حبيت أعمل ملاحظة على طول الكرّاب ..... لقيت صاحبك عاطف قام بالمطلوب.
أنا غايتو لاحظت طول الكراب بدون ما يكون عندي تاريخ مع شد كراريب الجيران.
______
محمد المرتضى تتذكر مسميات كل العناقريب وتنسى (عنقريب العدّة)؟
|
Post: #24
Title: Re: عنقريب في كندا قال ليك ... حليل حبوبتي !!!
Author: يحي قباني
Date: 07-07-2014, 05:27 AM
Parent: #20
Quote: يعني ما سودانية؟ كده المسألة عايزة بحث.
حبيت أعمل ملاحظة على طول الكرّاب ..... لقيت صاحبك عاطف قام بالمطلوب.
أنا غايتو لاحظت طول الكراب بدون ما يكون عندي تاريخ مع شد كراريب الجيران.
______
محمد المرتضى تتذكر مسميات كل العناقريب وتنسى (عنقريب العدّة)؟ |
و الله ما سودانية ...
وكان باعت البيت انا بحنسها تديني العنقريب ده ...
عندي حوش فوقو شجر زى لبخ شارع النيل داك ...
الشمس بالرقراق بس ...
اقوم اختوا ليك هناك .... لغاية نهاية الصيف ده ...
________________________________
ود المرتضي برضو نسي عنقريب الحِرِبْ ... ههههه
|
Post: #23
Title: Re: عنقريب في كندا قال ليك ... حليل حبوبتي !!!
Author: يحي قباني
Date: 07-07-2014, 04:34 AM
Parent: #19
Quote: الحبيب الشفيف يحيى قباني رمضان كريم عليك وعلى كل من يمر من هنا ,,,
المحيرني العنقريب ده وصل بلدكم دييييييييييييييك كيف ؟؟؟ لكن غايتو ده يخليك تنوم لو ما نعسان خاصة مع جوكم الجميل ده وكمان لو عندك رادي خاتيه في الشباااااك تكون مبااالغة لكن ويييين اذاعة ام درمان ؟؟ غايتو بي عنقريبك ده قلبت علينا المواجع بس ..
يكون ده العنقريب القال فيهو عمنا ود الرضي الله يرحمه ( عايز اشوف حبيبي اليوم داك شفتو محنن بالقنيلا ويحنو كانو واااجع .. اعاين فيهو واضحك وامشي واجيهو راجع ) لانو ود الرضي شاف المحبوب في عنقريب متل عنقريبك ده .. غايتو الدنيا رمضان والكلام في البوست على مسؤلية صاحبه ... ولا شنو |
بلدنا دي يا ياسر وصلتها حاجات عجيبة ...
الليلة في الفطور قدامي ملاحين و عصيدة ...
نعيمية و شرموط ...
ولدي قال لي اخوه اكل من ده فيهو جيركي ...
قاصد beef jerky
قلت ليهو يعني بقي اسمو ملاح beef jerky
قمت اتذكرت ليك ايام الشرموط المعلق في الحبال و المشرور في البروش
و الكلاب تتحاوم دايره عضه ... و الضبان ينوني ...
وانحنا نتسحب سغار نخمش و نقوم جاريين ...
حليلو السودان الهِمِل يا ياسر ...
|
Post: #21
Title: Re: عنقريب في كندا قال ليك ... حليل حبوبتي !!!
Author: عاطف عمر
Date: 07-06-2014, 02:13 PM
Parent: #1
| Quote: قلت لي عاطف عمر فاكر المسألة جيمي كليف و GMH وقصقصة بالتسعه في ال Whist ؟ |
ومولانا سعادة المستشار محمد المرتضى ذات نفسو في يوم العناقريب ( العالمي ) ؟؟؟؟
يا ألف نهار أبيض
ياخ ناس يحيى ديل كنا شايفنهم سمحين وبيض يطلعوا عارفين ( تفاصيلنا ) دي كووولها ؟؟
طيب لو عاوزين ( نسطّح ) بيهم نقول شنو يعني ؟؟
الباقي كووولو هم عارفنو زينا وأكيد أحسن ....
إنا لله
___________
Quote: حبيت أعمل ملاحظة على طول الكرّاب ..... لقيت صاحبك عاطف قام بالمطلوب.
أنا غايتو لاحظت طول الكراب بدون ما يكون عندي تاريخ مع شد كراريب الجيران. |
هىىىىىىىىىىىىى يا أخوانا
نقول قباني يطلع لينا أبو الريش
ياخ طول الكراب أنا عرفتو بعد إيدي ما إتورمن من الشد
تجي إنت تنقشو سااااى كدا
غايتو يا أولاد البنادر عليكم جنس شدة...
ثم
رمضان كريم أحبابنا محمد المرتضى وأبو الريش ومضيفنا يحيى قباني
تقبل الله تعالى صيامكم وقيامكم وصالح الأعمال
|
Post: #22
Title: Re: عنقريب في كندا قال ليك ... حليل حبوبتي !!!
Author: وضاحة
Date: 07-06-2014, 06:31 PM
Parent: #21
يحي
كل عام وانت بخير
والله مبالغة ودا وصل كندا كيف ههههههه
زكرتنى جدتى يا حليلة لما تجينا زيارة تقول لي ماما والله سرايركم ديل غير يعسمونى ما بسوا لي شي والمكيفات بتاعاتكم الشغالة 24 ساعة دى جابت لى الرطوبة
والله احسن من عنقريبي الهبابي في السودان البختوا تحت الشجرة فى ضل الضحى مافى احسن منوا
ومهية من زير احسن من ثلاجاتكم المالين بيها البيت دى هههههههه
يا حليلن هم الاصل والطهارة والنقاء والزمن الجميل
|
Post: #25
Title: Re: عنقريب في كندا قال ليك ... حليل حبوبتي !!!
Author: Abureesh
Date: 07-07-2014, 06:59 AM
Parent: #22
سلام يا يحيى
وزى ما قالوا عاطف وابوالريش، الكراب طويل، ومع ذلك عدد لفاته قليلة جدا مما ترك فراغات كبيرة بينها.
ما متمنى اكتر من عنقريب حبل تمبوليـة (من تمبول).. مرقو ملولو زى الأصلـة.. تشيلو فى اباطك وتتحول بيه من ضل لضل.. بدون لحاف، مخدة بس..
تخت عمتك فوق واحد من طواقى رجلينو وتعلق الجلابية فوق، وتكوع فيه بالعراريق وفى إيدك التانية فنجان الجبنـة.
بلا واى فاى بلا أنولاين...
.
|
|
