Post: #1
Title: ريحة ليل الحِله
Author: أبوذر بابكر
Date: 06-24-2014, 03:58 PM
محمد المكى إبراهيم
كتب "عبير الأضرحة" فى شأن ضوءالأبيض، ساكن القبة البهية
سيخنا إسماعيل الولى
قال وهو فى مكان قاصى وبعيد من الأبيض
فجأة شم ريحة العبير والعبق الكان بشمه من ضريح إسماعيل الولى
وكتب عبير الأضرحة
وأمس والله صدقت كلام ود المكى
وأنا قاعد ومتوهط فى نص منقد جمر النوستالجيا العاصية
فجأة شميت ريحة المغربية
نفس الريحة الكانت زمان
تجيك فى مزيج وخليط عجيب من ريحة البحر والجروف والناس
توليفة عجيبة وسمحة
نفس الريحة والله
مع انه لا حداى بحر لا جروف ولا حتى ناس
اتحالفت الروائح دى كلها وغزت مكامن الشوق وموائل الوجع
وفى شنو تانى عاد غير ما يتاورك الحنين ؟
|
Post: #2
Title: Re: ريحة ليل الحِله
Author: أبوذر بابكر
Date: 06-24-2014, 04:05 PM
Parent: #1
ليل الحله الغطى جبال الهم
نضمى الناس بشويش
ضحك القمر القاعد فوق
وتعب الريد الما بنجم
يشهق يقطع نفس النم
يرصف درب الغربة
الفتر حيل الشوق
وقبل الليل
قبال ما جوطة الحله تروق
بتمرق ريحة الونسه النديه
زى التقول
صندل فرح مرشوش
فوق الأرض مبهول
يغطى نداوة العصريه
ويتمد ضل
جوه القلب مفروش
طعم الفرح
شاى مغربيه
لبنا طمح
فار وادفق فوق النار
طفى الجمرات
وسقى الرماد
ريحة القونانه العبكت
وملت الدار
فى بيت السعادة
البى السماح معروش
والإلفة زاد
والمحنه ملاية مكرفسه
مجدوعه فوق لى عناقريب الرقاد
بيت السعادة البى الجمال منقوش
لا انسد بابه على العباد
لا شافلو شينة ولا انجرح
متاكيه ضلفة معزة عاليه
وضلفة فاتحه على الوداد
ليل الحله الغطى جبال الهم
الصلوات
ودرب الخلوه دليل
الحجوات
سهم الريدة الفى المنديل
الضحكات
اللامن دمعك يسيل
الغنوات
يا ريت ووين وحليل
اللعبات
كرعيت وشليل
ليل الحله الغطى جبال الهم
نضمى الناس بشويش
الناس بى هناك
شرابن من الجنه
موية نيل
كسرة عيش
وطبع نبيل
مزروع فى الروح الكاتمه الغم
طيبة الناس
الصافيه النيه
عطية الناس
الفاتحه قلوبها سبيل
سخيه رضيه
هدمه بتستر شينن
ولقمه هنيه
الناس بى هناك سمحين بالحيل
مدحه سنيه
تجبد نفس الدرويش
وغنوة بهيه
تلون وش الليل
بنوت الحله
معانى ورقة نديه
صبيان الحله
جمال الشيل
همة قويه
تعدل الميل
|
Post: #4
Title: Re: ريحة ليل الحِله
Author: أبوذر بابكر
Date: 08-08-2014, 02:48 PM
Parent: #2
رايتُها
ترتاحُ فى شغفِ التفاصيلِ الحميمةِ
مثل إبتهالاتِ البذورِ السمرِ
فى رحمِ الثمارِ
والآن أغنيتى
أبنوسةُ الضوءِ العتيقِ
أيقونةٌ فى جيدِ قصتنا القديمة
الآن أغنيتى
عصفورة ٌ
دمُها من ريقِ نهرنا الصديقِ
لحنها
معلقٌ على وجه الصباحِ
فوق شرفةِ البريقِ
|
Post: #3
Title: Re: ريحة ليل الحِله
Author: أبوذر بابكر
Date: 06-26-2014, 07:17 AM
Parent: #1
|
Post: #5
Title: Re: ريحة ليل الحِله
Author: Osman Musa
Date: 08-08-2014, 03:41 PM
Parent: #3
عزيزنا الشاعر أب ذر
سلامات
من صباح الرحمن أنا بتكرف في ريحة ليل الحله دي .
أحلف ليك حليفة .. أصلو ما قادر أشبع من شمان عطر ديك الأضرحة .
جر النم يا زول
تحياتي
|
Post: #6
Title: Re: ريحة ليل الحِله
Author: أبوذر بابكر
Date: 08-09-2014, 10:37 AM
Parent: #5
عثمان يا عزيزنا
تعرف
الأماكن عندها رائحة
وكل رائحة بتختلف عن التانية، وتظل قاعده وساكنه جواك لآخر نفس
واله يا عثمان أنا يمكن عشت فى حوالى 13 مدينة فى هذا الكوكب الجميل ولفترات مختلفة
ولغاية اللحظة لما اغمض عيون الشوف وعيون الروح
بقدر اتذوق واشتم الروائح دى
لأنه فى احيان كتيرة جدا
الأماكن هى البتستوطنك
|
Post: #7
Title: Re: ريحة ليل الحِله
Author: عبدالعزيز عثمان
Date: 08-09-2014, 10:49 AM
Parent: #6
عجبني الكلام ،،،
جيت اصبح اتفقد حالكم بعد مطرة البارح.
|
Post: #8
Title: Re: ريحة ليل الحِله
Author: أبوذر بابكر
Date: 08-09-2014, 11:16 AM
Parent: #7
ازيك يا عزيز
يعجبوك وليداتك ان شاء الله
عارف
الكلام ده ليه حوالى اربعطاشر سنة وحول
وبقى زى الحفرة كل ما ليه بزيد زيادة
من يوم مرقتنا الكعبة ديك
بقينا نتكرف ريحة الحاجات ساى ونتشهى
والنوستالجيا الفتاكة ما تزال تمارس "المتاورة" اللئيمة
يا زول الله كريم
و
تتبارك إن شاء الله
قول آمين
|
|
