شكرا فرقة ساورا وعثمان بشري

يا تومة من وجعي العنيد
هل ازهرت شدرة حديد
هل غابت الشمس الحبيبة
ومال غصن ضلك وحيد
انا اصلو خان عشقي الوعي
و كتل ملامح طلعتك
كتر النعي
كتلوك و جايين ماتمك
عرسك اظن ما ماتمك
لم افهم الحاصل
علي وجه الخصوص
فقط اعترف
اني معاك زول
وافر بصحة و خير و حال
و اقدر اقول و اقول بصمت
انك حبيبتى و ست شقاي
بالحيل بتشبعي رغبتك
بالحيل بتسندى جوعتك
حتى بتمدى اابيفضل من فتات
للجإرة قبل تشحدك
ما بصمت عشان كده
قدام رجال لابسين كده
و فترنا من بكرة المدسدس
في جيوب الحوش
و بيبان القبيلة
كتلوك و جايين ماتمك
عرسك اظن ما ماتمك
لم افهم الحاصل على
وجه الخصوص

هههههه
طلعت متأخر خلاس
قالو زماااااان وقفت
محزن لكن

حفيظ..حبابك يا صديقي

دي شنو الوقفت: ساورا ولا الحال؟..

تحية ليهم و لعثمان البشرى...
ساورا من عناوين الروح يا عم..

هنا بعض م ظهورهم في السنة الفاتتة... تقريبا..



ودمت..

كبر

مرحبا يا صاحب
تعرف يا كبر بعرف عثمان بشري ود كوستي والجزيرة ابا ,, وبعرف شعرو
شاعر ذو مفردة ولغة تخصه وحده ,, ولها قدرة فذة علي ابهاري
اها
سمعت توما صدفة من ابن اخي وافتكرهم عقد الجلاد ,
للأسف قالوا الفرقة توقفت
ارجو ان لا يكون ذلك صحيحا

حفيظ يا صاحب

مساء الخير

مجموعة ساورا الغنائية فعلا توقفت لزمن طويل

اعتقد أعاد الأخوة ربيع عبدالماجد والهادي جمعة جابر تفعيل الفرقة بمجموعة جديدة.

ولا اعلم حجم نشاط الفرقة. والمجموعة في الفيديو أعلاه تحتاج لجهد كبير من الأخوة ربيع والهادي لكي تكون المجموعة في مستوى المجموعة التي شكلت تاريخ فرقة ساروا.

مودتي

مرحبا يا صاحب
لا انكر اني سمعتها متحيزا , سمعتها من اجل عثمان بشري ,, هذا الشاعر الانسان الرقيق
وطربت لها