***** الكراكتير ينتهك قوانين المنبر *****

Quote: 3- لا يجوز سبّ الأديان وكريم المعتقدات، أو إساءة الأنبياء والرسل، وذلك دون الإخلال بحرية الاعتقاد والرأي ودون مصادرة لحرية البحث العلمي وحق الاجتهاد......

وين سب الكاريكاتير الاديان او كريم المعتقدات ..أو اساء للانبياء..

Quote: وين سب الكاريكاتير الاديان او كريم المعتقدات ..أو اساء للانبياء..

انت امي و ل شنو يا الطريفي .... العصر الحجري دي كلها ما شفتها ...؟؟؟؟

شفتها يا ابو حسين.. الاساءة فيها وين؟
ما محتاج تنبهني ليها والناس كلها بتشوف الكاريكاتير وبتقرأ .. زول قال فيهو اساءة للاديان او للانبياء او كريم المعتقد مافي الا انت ..
يبقي انت التشرح الاساءة الشافيها في تعبير العصر الحجري في السودان..



عموما قرب جنبك كباية موية

Quote: عموما قرب جنبك كباية موية

انا هين انت شيل اللابتوب و عضي عراقيك في خشمك و جري على الكورنيش....
و ما تنسى علبة الماكنتوش ..... :)

العصر الحجري و اللبس دليل التخلف
و اللوحات اللي شايلنها فيها شعارات اسلامية ....

اشرح لسه .....؟؟؟؟؟؟؟

Quote: و اللوحات اللي شايلنها فيها شعارات اسلامية ....

الشعارات دي من تأليف منو؟؟
هل في آية بهذا المعنى او حديث..
إذا لا وهي " شعارات " صاغها فرد او مجموعة يبقى القول عليها انها شعارات اسلامية ضلال تستوجب التوبة منك والاعتذار | للاسلام :)

إذا نعم .. يبقي أشرح لسه..

ــــــــــ

Quote: 357 - الحديث الثالث : عن عائشة رضي الله عنها { أن قريشا أهمهم شأن المخزومية التي سرقت ، فقالوا : من يكلم فيها رسول الله صلى الله عليه وسلم ؟ فقالوا : ومن يجترئ عليه إلا أسامة بن زيد حب رسول الله صلى الله عليه وسلم فكلمه أسامة ، فقال : أتشفع في حد من حدود الله ؟ ثم قام فاختطب ، فقال : إنما أهلك الذين من قبلكم أنهم كانوا إذا سرق فيهم الشريف تركوه ، وإذا سرق فيهم الضعيف أقاموا عليه الحد ، وايم الله : لو أن فاطمة بنت محمد سرقت لقطعت يدها } . وفي لفظ { كانت امرأة تستعير المتاع وتجحده ، فأمر النبي صلى الله عليه وسلم بقطع يدها } .

Quote: هل في آية بهذا المعنى او حديث..

خضر الطيب.. في ناس بيفتشو فيك انت زغت وين :)





ـــــــــــــــــــــ..\
بالمناسبة عدلت المداخلة لشئ في نفس يعقوب. :)

اذا كان المقصد واظنه كذلك وصف عهد تطبيق حد الردة في عهد الاسلام الاول والمرتبط وقتها باسباب سياسية تتعلق بالامن القومي للدولة الاسلامية فان ذلك قطعا ينتهك قوانين المنبر

ونطالب ادارة المنبر بسحبه فورا وتطبيق العقوبة على صاحبه

التحية لك الخال ابو حسين

Quote: اذا كان المقصد واظنه كذلك وصف عهد تطبيق حد الردة في عهد الاسلام الاول والمرتبط وقتها باسباب سياسية تتعلق بالامن القومي للدولة الاسلامية فان ذلك قطعا ينتهك قوانين المنبر ونطالب ادارة المنبر بسحبه فورا وتطبيق العقوبة على صاحبه

اهلا عمر
المقصود الاسلام الان في السودان
و ايا كان بالمسلمين كيزان او صوفية او شيعة لا يمكن قبول تشبيههم بانسان العصر الحجري
لانهم فقط يحملون هذه الشعارات


تحياتي و احترامي

عصر حجري واسوأ من العصر الحجري واذا اي واحد بيفتكر البعملوا فيهو الكيزان ده اسلام احسن يراجع نفسو.....نفس قذارة طالبان وداعش والكيزان ده ما إسلامنا البنعرفوا.....انا اشيد بالأخ عمر ويجب ان يزيد الجرعة شوية حتي يوضح سماحة الاسلام وقذارة الكيزان المسماة زورا وبهتانا بالاسلام والاسلام منهم براء

\

Quote: عصر حجري واسوأ من العصر الحجري واذا اي واحد بيفتكر البعملوا فيهو الكيزان ده اسلام احسن يراجع نفسو.....نفس قذارة طالبان وداعش والكيزان ده ما إسلامنا البنعرفوا.....انا اشيد بالأخ عمر ويجب ان يزيد الجرعة شوية حتي يوضح سماحة الاسلام وقذارة الكيزان المسماة زورا وبهتانا بالاسلام والاسلام منهم براء

نحن ما بنتكلم عن إسلام الكيزان أو إسلام البطيخ
نحن بنتكلم عن الإسلام اللي نزل على المصطفى صلى الله عليه و سلم ...

هذا الموقع مكانه أمريكا وليس دول العصور الحجرية الطالبانية.

Quote: هذا الموقع مكانه أمريكا وليس دول العصور الحجرية الطالبانية.

دا فهمك يا ماسورة ...؟؟؟؟؟

يعني عشان الموقع في أمريكا ليه الحق يعمل أي شي و ل كيف ...؟؟؟

كدي أمشي إتخارج من الورطة بتاعتك و تعال ......

سؤالين .....نظام تشتيت الكورة ووكدا

هل ناس العصر الحجري كانو متخلفين؟


وهل حد الردة وقطع يد السارق والرجم...ظهرو في الإسلام ولا قبلو؟


ونكتة في صياغ البوست

إنتو ما سمعتو بي عمك الحاج القاعد ورا الشباب في الحافلة
فواحد قال : يا اخوانا والله البلد دي ماشة لي ورا
رد الحاج...يا اولادي انا جاي من ورا ....والله ورا كانت احسن من كدا بي كتير

استغرب جدا ان يقف شخص مسلم مع قتله ولصوص يشوهون ديننا......الا اذا كان يعيش في دنيا اخري انا اسب دين الانقاذ لانه ليس اسلام بل مسخ وتشويه.....دين الرحمة والمغفرة والسلام حولوة الي دين اخر هم يعرفونه ولانعرفه.....دين قتل واغتصاب علي رأسه صعلوك يقول ان الغرباوية اذا اغتصبها جعلي ده اغتصاب والا شرف ليها بماذا يوصف هذا القول بغير الصعلكة.....اعوذ بالله من غضب الله.......يااخونا عمر دفع الله قل ما تشاء وارسم ماتشاء فهو اقل القليل مما ارتكبه هؤلاء الابالسة.....

Quote: استغرب جدا ان يقف شخص مسلم مع قتله ولصوص يشوهون ديننا..

دا منو دا الخلاك تستغرب دا ....... ؟؟؟؟؟؟؟؟

Quote: سؤالين .....نظام تشتيت الكورة ووكدا هل ناس العصر الحجري كانو متخلفين؟ وهل حد الردة وقطع يد السارق والرجم...ظهرو في الإسلام ولا قبلو؟

اهلا اخونا عبدو

اجابة السؤال الاول نعم حسب ما عرفنا من التاريخ
السؤال التاني يحول الى اخونا حيدر الزين الخبير الاستراتيجي في التاريخ الاسلامي

ابو الحسين

تحياتي
يا زول اشرب وابلع

الكركتير دا ما فيه اي اساءة للدين الاسلامي، فيه اساءة واضحة لدين الكيزان، ولو داير نطبق لواءح المنبر دا حنقول للناس ما تجيبوا اي اية قرانية فيهجا ذكر للمسيحية بهانةها محرفة وان المسيحيين مشركين، وحنقول للسلفين انتوا بتسيءوا للصوفية وللشيعة وللشيعة انكم بتسيءوا للسنة وللمتاسلمين نقول ليهم انكم بتسيءوا للعلمانيين

وبعدين البيضر الاسلام ولا المسيحية شنو انه يوصوفوهم بالعصر الحجري والهمجية يعني دا خلاص حيخلي الناس تلحد

حرية التعبير اليوم متاحة في اي مكان في العالم والسايبر دا مفتوح وما حتقدر تمنع احد من اساءة الاديان، وهسع بقى ما في زول شغال بالقصة الا المسلمين وما جايبة همها ذاتو

الاديان زيها زي كل الافكار الانسانية في يومنا دا ما حتقدر تقيف ضد حرية التعبير لانه حرية التعبير دي هي الفطرة ذاتها، الانسان حر في تفكيره وحيقول اي شيء وما في قوة حتمنعه من التعبير عن رايه حتى في الاديان وفي الاله ذات نفسه، اصبح الامر الان بيد الحوار وطالما الفنان او الكاتب او المغني لم يستعمل القوة فعليك الرد عليه بنفس ادواته

نفس القصة بتاعة الاساءة للرسول(ص)، المسلمين هاجوا وماجوا مع انه يوميا بتتم الاساءة للرسول عيسي عليه السلام وما شفنا مسلم واحد احتج، امشى قوقل اسم المسيح عيسى وشوف كمية الرسومات الخليعة البيرسموها ليه، احضر الافلام الكوميدية عن المسيح وعن موسى ونوح عليهم السلام، اقرا مارك توين (رساءل من الارض)

لكن العالم تجاوز المساءلة دي لصالح حرية التعبير، لانه قصاد اي اساءة متذرعة بحرية التعبير هناك الاف الابداعات التي تبقى

هسع عليك الله لمن رسم ما يكل انجلو لوحة الله وادم بكمية الابداع الفيها دا في زول احل دمه لانه رسم الله

الموقف الفوق بتاع عمر دفع الله دا موقف محترم جدا ضد البيحصل في السودان ولا يهم ما هو الدين الذي لبد خلفه هولاء الرعاع ليحكموا على هذه البنت بالردة

اي دين يحكم اليوم بالردة في ظل الحرية التى انتزعها الانسان بنضاله هو دين من العصر الحجري ويجب ان يعود هناك ولا مكان له في عالم اليوم الذي وصل المرحلة المتقدمة هذه من حفظ الحقوق لبني البشر

عمر دفع الله يسجل موقفا هنا في قضية حاصلة اليوم وليس للموضوع علاقة بالدين، الموضوع له علاقة مباشرة بعصابة تريد ان تعود بنا للعصر الحجري، وواجب محاربتها هو شرط عين لكل مسلم او ملحد او مسيحي سوداني
والوقوف ضد هذا القانون وغيره من القوانين المسماة اسلامية والتى تم اختراعها من خلال الفقه الاسلامي لهو واجب من ينتمي للاسلام اليوم

انا شخصيا لا اعرف اي حد للردة في الاسلام ولا تصلح ايات الحدود لهذا الزمان هذا ما يقوله الاسلام الذي اعرفه ومستعد لمناظرة اجعص فقيه في ذلك وقد فعلتها مرارا وتكرارا

العالم اليوم وصل لمرحلة ان يتم الحكم من خلال عقد اجتماعي يتيح للكل حرية التعبد وحرية العقيدة وحرية الفكر ما دام يستعمل لسانه فقط لطرح افكاره ولا يلجا للقوة وتوافق غالبية البشرية على الميثاق العالميلحقوق الانسان هو المدماك الاول في سبيل هذه الحرية وهو الدستور الذي يجب ان تقاسعليه كل الحقوق

الرجوع للعصر الحجري وارد جدا اذا كنا نريد ان نحجر على فنان تضامنه مع انسانة مارست حرية الاعتقاد بحجة اساءة دين ما

ودين لا يعطي الناس حرية الاعتقاد جدير بالمحاربة والقضاء عليه ومحوه من الارض، ودين لا يحترم حرية العقيدة كيف يريد للناس ان يدخلوا فيه من الاساس اذا كان لا يومن بحرية العقيدة

حرية العقيدة هي الاساس لهذا الكون منذ حادثة التفاحة الشهيرة وهي الامانة التى حملها الانسان وتولى بها خلافة الارض مالكم كيف تحكمون

من شاء ان يومن ومن شاء ان يكفر

أهلاً و سهلاً أخونا الصادق الصادق

Quote: يا زول اشرب وابلع

البلع بكون قبل الشراب يعني الواحد ببلع و بعدين بشرب مش العكس ...

Quote: الكركتير دا ما فيه اي اساءة للدين الاسلامي، فيه اساءة واضحة لدين الكيزان،

يعني الكيزان عندهم دين ...؟؟؟؟

باقي مداخلتك الطويلة دي بجيها بي رواقة
و هاك شوف دي لغاية ما أجيك راجع :-

Quote: اجابة السؤال الاول نعم حسب ما عرفنا من التاريخ

متخلفين بياتو مقياس ؟ وبياتو تاريخ دا الدرستو ؟
هل متخلفين في عقلهم وتعاطيهم بالحياة والا متخلفين عشان ما عندهم تلفزيون وسودانيزانلاين ؟؟

جيب مقياس تخلفهم القست عليهو يا حاج نظرية وتعال راجع والا اسمع الكلام واشرب مويتك

Quote: اهلا اخونا عبدو اجابة السؤال الاول نعم حسب ما عرفنا من التاريخ السؤال التاني يحول الى اخونا حيدر الزين الخبير الاستراتيجي في التاريخ الاسلامي

HAIDER ALZAIN

Quote: متخلفين بياتو مقياس ؟ وبياتو تاريخ دا الدرستو ؟ هل متخلفين في عقلهم وتعاطيهم بالحياة والا متخلفين عشان ما عندهم تلفزيون وسودانيزانلاين ؟؟

حيدر الزين ات جابوك تجاوب السؤال التاني
تجهجه الأول
...........
الأخ أبو حسين
إنت جاوبت لي علي السؤال الأول بالرجوع للتاريخ
وخليت السؤال التاني ....مش برضو تبع التاريخ ....وإن كان ما تخصصك تاريخ اسلامي
بس انا ما سألت من التاريخ الإسلامي انا سألت ما قبل الإسلام
...واضف ما كتبه حيدر الزين
..
ولكما التحية دايما

أنا مسلم ولا أرى أي غساءة في هذا الكاراكاتير للإسلام !

أبو حسين الموية كان جنبك أشرب ولا شوف ليك آيسكريم

حيدر الزين أدينا حصة حصتين تاني أو أعمل لينا إسببوتنق عشان نجاوب على السؤال الجاي

التحية والتقدير...للمبدع بحق الفنان عمر دفع الله…

عبرت عني تماما ومن غير صوت…

والتحيه لبكري العلق الكراكتير المعبر…

وشكرا الصادق اسماعيل...فقد قلت كل ما اريد ان اقول فكفيت ووفيت….

وسيحفظ رب العزة دين الحق بجنودة المخلصين المزودين بالعقل والمنطق….وحسن اللسان….

سلام ابوحسين

في احد رسومات هذا العمر دفع الله
اشار الي ان النميري تبول علي الشعب
بموته ودفن جثمانه في السودان

مصدق نفسو انه رسام كاراكتير

أنا ايضا اطالب بكري ابوبكر بسحب هذا الكراكتير
حد الردة حد من حدود الاسلام وليس حدا من العصر الحجري
و كون الانقاذ الان تاجر به او لا فهذا موضوع ممكن أن نتفق عليه

اخونا الصادق إسماعيل
عليك الله حاول قسم لي مداخلتك دي على عدة مداخلات الكتابة بالمتر دي بتهد حيلي ...
يا الصادق الكتابة في المنابر غير الكتابة في بقية الميديا لأنو هنا العالم ضيق شوية و الكتابة تفاعلية
و هنا الناس قريبة من بعض أكتر و بالتالي الخلافات بتكون أكثر حدة و بالتالي لا بد من وضع قوانين تحد من الخلافات في أشياء معينة
قد تؤدي لي مشاكل أكتر و أكبر ...
لذلك حرية التعبير لايمكن تطبيقها كاملة كما في بقية الميديا و لابد من وضع حد لها حتى يكون هناك فاصل بين الإختلاف و الإحتراب
عمر دفع يمكنه أن يسجل رأيه في أي قضية و لكن دون التعرض للإسلام كمعتقد و يمكنه أن يحصر تعبيره في الكيزان أو الإنقاذ دون التعرض
للإسلام ككل فالإسلام ديانة لكل المسلمين و ليست فقط للكيزان و الكيزان لا يمثلون في الإسلام 1% فقط من تعداد المسلمين
لو كان عمر دفع الله تعرض للردة فقط في الكراكتير لقلنا نعم هو عبر عن رأية في قضية فيها خلاف و لكن الشعارات التي يحملها رجال العصر الحجري
فيها أشياء غير الردة....



تحياتي و إحترامي

Quote: متخلفين بياتو مقياس ؟ وبياتو تاريخ دا الدرستو ؟ هل متخلفين في عقلهم وتعاطيهم بالحياة والا متخلفين عشان ما عندهم تلفزيون وسودانيزانلاين ؟؟

بي مقياس ريختر يا الطريفي ......
غايتو يا الطريفي عندك مداخلات ما عارف تعمل بيها شنو قلت بس تحرق بيها دم أبو حسين المسكين دا..
الغريبة السطر التاني من مداخلتك فيه الإجابة على سؤالك في السطر الأول...
عشان كدا شيل الإجابة و قوم لف و ما تملاني فقر.......

Quote: جيب مقياس تخلفهم القست عليهو يا حاج نظرية وتعال راجع والا اسمع الكلام واشرب مويتك

أشرب مويتي قبل ما أبلع ....؟؟؟؟

غايتو قعدتو لي إنت و الصادق دايرين تبلعوني غصباً عني ....

قوم لف تاني

Quote: الأخ أبو حسين إنت جاوبت لي علي السؤال الأول بالرجوع للتاريخ وخليت السؤال التاني ....مش برضو تبع التاريخ ....وإن كان ما تخصصك تاريخ اسلامي بس انا ما سألت من التاريخ الإسلامي انا سألت ما قبل الإسلام ...واضف ما كتبه حيدر الزين .. ولكما التحية دايما

الأخ عبدو
أنا جاوبت السؤال الأول و التاني قدمتو هدية للعربي الشين دا لكن العربي عايز يغلغلني صاح هو شين(العربي) لكن راسو الماكن دا ما هين مليان....
و هو خبير في التاريخ الإسلامي و تاريخ ما قبل الإسلام


تحياتي و إحترامي

Quote: أنا مسلم ولا أرى أي غساءة في هذا الكاراكاتير للإسلام !

لو لا إختلاف الأراء لبارت السلع
إذاً
أنا أرى فيه إساءة
و أنت لا ترى فيه غساءة

Quote: سلام ابوحسين في احد رسومات هذا العمر دفع الله اشار الي ان النميري تبول علي الشعب بموته ودفن جثمانه في السودان مصدق نفسو انه رسام كاراكتير

و عليكم السلام أخونا عمر عثمان

إختلفت كثيراً مع عمر دفع الله و إتفقت معه قليلاً
و المرة دي أنا مختلف معاه و من حقي أن أكتب رأي مثل ما هو له الحق في أن يرسم حسب ما يراه صحيحاً



تحياتي و إحترامي

Quote: أنا ايضا اطالب بكري ابوبكر بسحب هذا الكراكتير حد الردة حد من حدود الاسلام وليس حدا من العصر الحجري و كون الانقاذ الان تاجر به او لا فهذا موضوع ممكن أن نتفق عليه

اخونا محمد درار
المشكلة مافي حد الردة لأنو موضوع الساعة و هنا في المنبر الناس مختلفة فيه
و لكن الكراكتير تضمن حد السرقة اللي المجتمع في حوجة ماسه له هذه الأيام


تحياتي و إحترامي

ناس الفيس
Sudan Rebel دا خضر الطيب كان معانا هنا و بي سبب وســاخـــتو بقى يكتب من الفيس
و لم يرجع هنا(إذا رجع تاني) حا يلقى كل وســـاخـتـو قدامو و طبعاً لم يجي هنا ببقى زي الكديسة الداقاها المطرة

تحياتي و إحترامي

أنا الأن منفذ علي حكم بالحظر الجزئي بسبب الرد على عضو تناول الصحابة بالانتقاص والتعريض
وقال في حق صحابي أنه فاسق بسبب حديث انزله انزال حرفي على ذلك الصحابي ...
رغم أني من أكثر الناس بغضاً للتنطع والتطرف الديني ..ولكن يبدو أن السقف فيما يتعلق بالأديان مفتوحاً
وأنا صرت اتردد قبل كتابة أي رد لأن كل ما لدي من فرص للرد لا تتجاوز الثلاث أو أربعة ردود على الأكثر
أما الأخ الزميل عمر دفع الله بهذه الطريقة يدعم الأخطاء والخطايا التي ترتكب باسم الدين
لأنه لم يبريء منها الدين بل أكد بهذا الكاركتير على نسبتها للدين حينما أرجعها للوراء بسنسبتها للعصر الحجري مبالغة
لأن في ذلك شبهة أنه يقصد المبالغة وليس قصده العصر الحجري
ما ذنب العصر الحجري وما ذنب عصور الاسلام وما علاقتهما بذنوب وخطايا عصرنا ؟!..
الامام الشافعي يرى أن التوبة تسقط حد الزنا معتمداً على قول النبي صلى الله عليه وسلم
في قصة ماعز بن مالك رضي الله عنه:( لو تركتموه يتوب فيتوب الله عليه)
أي أن يترك الزاني دون أن يرجم أو يجلد لعله يتوب فيتوب الله عليه هذا إذا جزع وكره أن يقام عليه الحد وقال الروب وتووووبة
...أي أنه لو تاب يترك.
وما هو متفق عليه أن لا تنتهك السترة وأن لا يتجسس وأن لا يحكم إلا على من أظهر وجاهر
وكذلك أن عند الإمام الشافعي أيضاً أن المرأة لا ينفذ عليها حد الردة بل تحبس فقط حتى ترجع وتتوب.
وفي السودان لا يتقيدون بالمذهب المالكي دائماً في الأمور القضائية بل قد يخرجون عن المذاهب الأربعة جملة ويأخذون بأراء ابن تيمية
في مسائل الزواج والطلاق لمرونتها ....فإن كانت المرونة في أراء بن تيمية في مسائل الزواج والطلاق للحفاظ على التماسك الأسري هي التي دفعتهم
للأخذ بها.
نقول أليست الدماء وأرواح الناس وعدم تعريضهم للأذى البدني واظهار سماحة الدين في هذا الزمن الذي يترصد للدين المترصدون... كل هذه المصالح أليست
أولى بأن تدفعهم للأخذوا بآراء الأمام الشافعي في هذه المسائل وهو أعظم من ابن تيمية مقاماً وما ذكرنا من حفظ للدماء والصورة السمحة المتسامحة للدين أولي وأخطر وأجدر
من دواعي الحفاظ على علاقة زوجين تم بينهم طلاق تلاتة بلفظ واحد أو نحو ذلك من المسائل؟!
...فالذي دفعهم بأن يأخذوا بآراء بن تيمية المرنة في قضايا الطلاق والزواج فهناك الحاجة أدعى أن يأخذوا أيضاً بمذهب الأمام الشافعي في قضية ردة المرأة وقضية حد الزنا
بإعفاء التائب عن الحد .وهذه أمور تحتاج إلى تفاصيل يضعها القانونيون .
إلا حد المقتصب فذاك جرم متعدي ليس لأحد الحق ولو كان حاكماً أن يعفو فيه ...مثل حد القاتل غيلة وهو من يقتل من أجل المال لا عفو له
والدليل على أن فقه الإمام الشافعي أصوب في العفو عن التائب من الزنا عن الحد فضلاً على الحديث ( لو تركتموه يتوب فيتوب الله عليه )
أيضاً القياس وهو لو كان القاتل عمداً بغير غيلة يترك إذا عفا عنه ولي الدم فكذلك الزاني لو تاب يترك لعل الله عفا عنه .
والقتل جريمة أكبر من الزنا.
والإمام الشافعي لا نفضله على الإمام مالك ولكن للإمام الشافعي اجتهادات موفقة جداً ..
وأكثر أئمة الحديث وأكثر كبار علماء الأمة كانوا من المذهب الشافعي ...كالنووي والذهبي وابن حجر العسقلاني وابن حجر الهيتمي والإمام الحرمين الجويني والغزالي والعز بن عبد السلام
والسيوطي كل والسبكي كل هؤلاء وغيرهم كانوا أتباع المذهب الشافعي.
مع أنه الأن أقل المذاهب تبعية المذهب الشافعي وكذلك الحنبلي ...وهذا يرجع لأمور لا علاقة لها بالرجحان والأفضلية بل لأمور جغرافية وتاريخية وسكانية ونحو ذلك .
ويا أخونا عمر دفع الله قد تحاملت وظلمت الماضي بتحميلة آثام أهل هذا الحاضر .

شنو يا علي بوب .. وقت بتعرف تفرز الألفاظ الشينة و بتضايقك وبتنتقدها كمان, مالك عميان من سفالات خضر الواطي الكاتبها تحتك دي؟ فا شنو حقّو تبطّل الحركات النيّة دي
وبعدين عملت لينا شنو في موضوع الجيّة فوق و الكتابة بوجهك الحقيقي زي الناس

Quote: لا يجوز سبّ الأديان وكريم المعتقدات، أو إساءة الأنبياء والرسل، وذلك دون الإخلال بحرية الاعتقاد والرأي ودون مصادرة لحرية البحث العلمي وحق الاجتهاد......

ود الحسين

كيفك

الزول دا كتب في الكاركتير قطع اليد لمن خان العهد، الموضوع دا ما فيه أي إساءة للإسلام وهو من باب حرية الرأي

أنا شايف إنه قطع اليد دا مفروض يتلغي من أي قانون في السودان بصرف النظر لو هو نازل في القرآن أو نازل في التوراة، أها دا رأي عدييييل، وضد حد الردة اطلاقاً، الإساءة هنا وين

لأنه بكرة لو أنا جبتا الآية دي:

{وَإِنَّ مِنْهُمْ لَفَرِيقاً يَلْوُونَ أَلْسِنَتَهُم بِالْكِتَابِ لِتَحْسَبُوهُ مِنَ الْكِتَابِ وَمَا هُوَ مِنَ الْكِتَابِ وَيَقُولُونَ هُوَ مِنْ عِندِ اللّهِ وَمَا هُوَ مِنْ عِندِ اللّهِ وَيَقُولُونَ عَلَى اللّهِ الْكَذِبَ وَهُمْ يَعْلَمُونَ }آل عمران78

ممكن يجي زكريا ولا دينق ناطي لي جوز ويقول لي دا كلام غلط وما صاح، لسبب بسيط أنه يؤمن أن كتابه هذا صحيح، وأن القرآن يفتري عليهم كذباً

أها حيجي اليوم الما حنقد\ر نكتب فيه كلمة، لأنه كلمة إساءة دي فضفاضة جداً، وكونك تقول (أنا مسلم) أو أنا مسيحي) معناها أن الدين الآخر ليس بصحيح ولا هو من عند الله.

ببساطة كونك تعلن عن اسلامك أو مسيحيتك معناه اساءة للدين الآخر، لو أنا كنت مسلم وزول جا كتب إنه مسيحي ممكن أتهمه بسهولة بالإساءة للدين الإسلامي بناءاً على الحيثيات التالية:

إدعاء هذا الشخص بأنه مسيحي يضمر إساءة بالغة للإسلام، وتمسكه بمسيحيته وعدم إسلامه هو إدعاء ضمني بأن الإسلام ليس ديناً خاتماً ولا مصدقاً لما بين يدي هذا المسيحي من الإنجيل.


عشان كدا عبالرة دون الإخلال بحرية التعبير دي هي المقياس.

هسع إنت مسلم وأنا مسلم

إنت وغيرك شايفين الكاركتير دا مسئ للإسلام

وأنا وغيري من المسلمين شايفين إنه ما فيه إساءة

هل نحن ننتمي لنفس الدين مثلاً؟ ولا المشكلة وين؟

قصة حرية التعبير دي تمرين قاسي وقبول الرأي الآخر مهما كان حاداً أفضل كتير من الإرتكان لدعاوى الإساءة للأدين والتى يمكن أن يدخل منها الكثير من الإرهاب وتكبيل الأفواه والقمع. على الأقل التاريخ بقول لينا الكلام دا بوضوح شديد لا لبس فيه.

العقلية الطالبانية لن نسمح لها بأن تسيطر على هذا الموقع.

هذا الموقع يخضع الى القوانين الأمريكية وليس القوانين التي ترهبون بها الناس.

لو ما عاجبك يا ابو حسين قشة ما بتعتر لك.

Quote: الزول دا كتب في الكاركتير قطع اليد لمن خان العهد، الموضوع دا ما فيه أي إساءة للإسلام وهو من باب حرية الرأي

أخونا الصادق أهلا بيك
انا ما بتكلم عن أن الشعار مسئ للإسلام و إنما هذه الشعارات مرتبطة بالإسلام و بالتالي هي تشير إلى الإسلام
و لكن ربط هذه الشعارت بالتخلف الذي يمثله في الكراكتير بإنسان العصر الحجري هو المشكلة
أي أنه يقصد بأن بأن هذه الأفكار متخلفة و هنا تكمن المشكلة ....


تحياتي و إحترامي

Quote: العقلية الطالبانية لن نسمح لها بأن تسيطر على هذا الموقع.

إنتو منو .........؟؟؟؟؟

Quote: هذا الموقع يخضع الى القوانين الأمريكية وليس القوانين التي ترهبون بها الناس.

هذا الموقع له قوانين تحكمه سواء كان في أمريكا أو تورا بورا و هذه هي القوانين التي أنا أتحدث عنها ...

Quote: لو ما عاجبك يا ابو حسين قشة ما بتعتر لك.

قاعد عشان الكذابين و المنافقين ما ياخدوا راحتهم و يبتذوا خلق الله ....
و العايز أقولو بقولو رضيتم أم أبيتم .......

Quote: نحن ما بنتكلم عن إسلام الكيزان أو إسلام البطيخ

كيف ما بتتكلم عن إسلام الكيزان يا أبو حسين؟
مش إنت قلت:

Quote: المقصود الاسلام الان في السودان

ليه يا علي بوب اسهل ليك تكتب من تحت؟ هل الكتابة بإسمك الحقيقي في الضوء قدّام الناس و تحمّل مسؤولية ما تكتبه قاسية للدرجة دي!! سمح الجابرك شنو ؟ ما تندمس تقرأ من سكات وقت ما قدر المسؤولية بدل مدخّل قدّومك في البخصّك و الما بخصّك لا وكمان عامل بتطوّل لسانك و تقل في أدبك

وبعدين يعني عامل ما شفت السفالة دي

Quote: Sudan Rebel · الأكثر تعليقا · ‏275‏ من المشتركين ريللي يو ميد ماي داي يا (.........) :) قلت لي ينتهك !!! يا ابو العفين انت انتهكوك بسوط عنج احتميت بالحركة النسوية .. جاي هسي تنتقد ؟ والبشير واعوانو انتهكو كرامة شعب كامل ما سمعنا ليك حس ولا حسك دا بنسمع في لحظة بنغلاديشية ولحظة جلدة بوشية .. قوم لف بلا قرف معاك .. انت والمعتوه حيضر الزين

يا رااااجل :)

كتبت ليك رد يا علي ومسحته, قلت مافي داعي
زول بشوف شتيمة الواطي خضر للناس بـ (كلــــجة) وغيرها ممّا ينضح من إنائه ويشي بتربيته ما فيها حاجة وأمر عادي, زول بالمستوى دا لا يستحق إضاعة الوقت في الرد عليه
فياخوي عفيناك, أرعى رعيك بي تحت و اتحشّر في الليك و الماليك بي راحتك

Quote: Quote: نحن ما بنتكلم عن إسلام الكيزان أو إسلام البطيخ كيف ما بتتكلم عن إسلام الكيزان يا أبو حسين؟ مش إنت قلت: Quote: المقصود الاسلام الان في السودان

اخونا محمد ابو العزائم الكوت التاني كان رد على كلام عمر فضل المولى
و لم تاخذه دون كلام عمر اكيد حا يكون اشتر

Quote: Sudan Rebel يا ابو العفين لما تكون انت في عضمك دا منتهك ..يبقى فاقد الشئ لا يعطيه .. وبعدين حاول ابعد من حتة الدين دي لانك انت ما جدير بالمسألة دي وشايف عمر فضل المولى كـــلـــب سيدو بقول ليك يا خال :) .. سيدو في السجن وخالو (.........) :)..... الولد دا منكوب محتاج اسعاف عاجل .. قبل كده مريم الصادق مسحت بيهو الارض في الفيس .. لكن يظل التابع تابع الى يوم الدين ‏2 يونيو‏ في ‏01:35 صباحاً‏ Sudan Rebel ريللي يو ميد ماي داي يا (.........) :) قلت لي ينتهك !!! يا ابو العفين انت انتهكوك بسوط عنج احتميت بالحركة النسوية .. جاي هسي تنتقد ؟ والبشير واعوانو انتهكو كرامة شعب كامل ما سمعنا ليك حس ولا حسك دا بنسمع في لحظة بنغلاديشية ولحظة جلدة بوشية .. قوم لف بلا قرف معاك .. انت والمعتوه حيضر الزين ‏2 يونيو‏ في ‏01:28 صباحاً‏ Sudan Rebel ريللي يو ميد ماي داي يا (.........) :) قلت لي ينتهك !!! يا ابو العفين انت انتهكوك بسوط عنج احتميت بالحركة النسوية .. جاي هسي تنتقد ؟ والبشير واعوانو انتهكو كرامة شعب كامل ما سمعنا ليك حس ولا حسك دا بنسمع في لحظة بنغلاديشية ولحظة جلدة بوشية .. قوم لف بلا قرف معاك .. انت والمعتوه حيضر الزين . ‏2 يونيو‏ في ‏01:36 صباحاً‏

دي من ابداعات خضر الطيب

هههههههههههههههههههههههه

الرد جاك من سيد المنبــر.. خلى الكاريكاتير كاطول مدة يقعد فيها كاريكاتير فوق.. من يوم 1 وحتى الآن .. ويستمر الانتهاك

Quote: هههههههههههههههههههههههه الرد جاك من سيد المنبــر.. خلى الكاريكاتير كاطول مدة يقعد فيها كاريكاتير فوق.. من يوم 1 وحتى الآن .. ويستمر الانتهاك

شفته الغتاتة دي كيف ....؟؟؟؟؟
بلاقي في زقاق مضلم و بطقطقوا ليك زي الترتيب ....