Post: #1
Title: أبحث عن زوجة ثانية
Author: الشفيع وراق عبد الرحمن
Date: 06-02-2014, 05:35 AM
مقيمة في الرياض
تقبل بالتنازل عن جزء من حقوقها
في حدود 30 سنة
افضل السودانية ثم الجنسيات العربية والاسلامية
متوسطة الطول ولابد نحيييفة
ده اعلان نزلتو في احد المواقع
|
Post: #2
Title: Re: أبحث عن زوجة ثانية
Author: الشفيع وراق عبد الرحمن
Date: 06-02-2014, 05:37 AM
Parent: #1
مصعب داخل الجامعة السنة دي
وسبقه علاء واحمد
فاضل عبد الله
المدام قالت عيالها اولى
تدارسنا الموضوع لايام وليالي
ولم نجد حل سوى انتقالها للسودان
وبقت مشكلتي انا
|
Post: #3
Title: Re: أبحث عن زوجة ثانية
Author: الشفيع وراق عبد الرحمن
Date: 06-02-2014, 05:38 AM
Parent: #2
دي مشكلة انا متأكد قابلت ناس كتااار
وبالذات من لديهم بنات
حلها شنو؟
ما جاهزين للمغادرة النهاية
|
Post: #4
Title: Re: أبحث عن زوجة ثانية
Author: الشفيع وراق عبد الرحمن
Date: 06-02-2014, 05:45 AM
Parent: #3
انا لا اعرف اعيش براي
ممكن يومين اسبوع
اكتر من كده مستحيل
كنت وما زلت ضد تكوين زوجة تانية
وبشوفوا حرام عدييييل
واقرب للزنا
وفي مثل الظروف دي بقول
كما هي ضحت وصبرت المفروض برضو انا اضحي واصبر
بس غلبني
الحل شنو يا ناس التجارب
|
Post: #6
Title: Re: أبحث عن زوجة ثانية
Author: الشفيع وراق عبد الرحمن
Date: 06-02-2014, 05:52 AM
Parent: #4
أول مرة اعرف انو التلاجة عندها صوت منتظم
البيت في هدووووء عجيب
بصحى قبل الفجر
اصلي في المسجد
وامشي ساحة المشي اعمل لي كم لفة واجي ااتجهز للشغل
7 انا في المكتب
طخ طخ طخ
تجي 3
امشي البيت
اغشى المطعم
لقمتين بدون نفس
اصل البيت اتخمد انوم
اصحى قبل المغرب
اخلص باقي الشغل
اصلي العشاء
واجي ساحة الرياضة تاااني
7 لي 10 لفات
استحم واقعد اذاكر شوية
انعس انوم
واصحى قبل الفجر
.................
............
|
Post: #5
Title: Re: أبحث عن زوجة ثانية
Author: عبدالعزيز عثمان
Date: 06-02-2014, 05:48 AM
Parent: #3
يا ابن عمي العزيز...
نصيحة لوجه الله...
لملم بعضك وابقي مارق..
يمين تدبل...
لا تلقي الاولي
ولا التانية
ولا الاولاد
ولا رقبتك
ان بقت بلغت الحلقوم
اتوكل حاحي مع وليداتك
وبتدبر بي موية بي قروض..
ترا راي عاد.
|
Post: #7
Title: Re: أبحث عن زوجة ثانية
Author: الشفيع وراق عبد الرحمن
Date: 06-02-2014, 05:55 AM
Parent: #5
حبيبنا الشاعر المرهف
المزازاة هي الاقتراح
ويا جماعة الاعلان ده ما حقيقي
المروق صعب هسه
الشغل بسيط وساهل
الراتب مغري جدا
المصاريف البي هناك متلتلة
والخيارات هناك منعدمة
|
Post: #8
Title: Re: أبحث عن زوجة ثانية
Author: الشفيع وراق عبد الرحمن
Date: 06-02-2014, 06:02 AM
Parent: #7
الزوجة التانية مهما كان، اجحاف وظلم وعدم تقدير
حتى ولو تفهمت المدام، القرار غير عادل
وانا مقتنع 100% انو عودتها ضرورية جدا
الاولاد قاعدين في الشقة براهم
وفي العمر ده بيحتاجوا لي متابعة وعناية
|
Post: #10
Title: Re: أبحث عن زوجة ثانية
Author: عبد الله شم
Date: 06-02-2014, 06:17 AM
Parent: #8
Quote: نصيحة لوجه الله...
لملم بعضك وابقي مارق..
يمين تدبل...
لا تلقي الاولي
ولا التانية
ولا الاولاد
ولا رقبتك
ان بقت بلغت الحلقوم
اتوكل حاحي مع وليداتك
وبتدبر بي موية بي قروض..
ترا راي عاد. |
حبيبنا وراق
تحياتنا يا ملك
ياخي كلام عبدالعزيز دا ابقى عليهو عشرة
بعدين الغربة جربناها واسواء اغتراب في الخليج هو في السعودية
وفي السعودية بالتحديد الرياض
شوف ليك محجان رزق في بلدك وابقى داب وليداتك
الجفلن خلهن اقراع الواقفات
|
Post: #9
Title: Re: أبحث عن زوجة ثانية
Author: Tragie Mustafa
Date: 06-02-2014, 06:14 AM
Parent: #7
عالم جررررررسه بشكل
المزازه دي نحن فيها لينا 14 ما اتجرسنا……هههههههه متجرس في يومين؟! شهرين؟!
شوف يا الشفيع يا اخوي
كلام اخوك عبد العزيز ده امسك فيه قوي
المصريات قالوا….(البدل مخدته بدل محبته يختي)……!!
وبالتالي
المدام الاولي ذاته بتبدل لو اتزوجته الثانيه
وعيالك بتيغروا تجاهك
وتبقي في اثبات انهم اولويه لديك
غير انه الزوجه الجديده بتجيك بكج كامله
اي مجاملات نسابه و عالج ابوي و شغل اخوي ومسافره لناس امي
ويلاك ناس عمي في ينبع
وناس خالي في نجران
وتبقي في مساسقه بين المدن غير الاجازه السنويه لا تعرف راسك من رجليك!
تعالي اتفشي هنا…..واهرينا البتقع من السماء يتحملها منبر بكري ابوبكر هههههههههه
وتم الباقي فيس بوك…..والرياضه ممتازه
زيد اللافات ل 15 اصلا بعد الاربعين امراض القلب و اشرايين راقده
ثانيا:
ما تعتمد علي اكل المطاعم……ركز في انك كيف تاكل صحي
فواكه و خضروات…..وما تنسي ترمي باوقايها اول باول لانها بتعمل لك…..ذباب في البيت و لو تركت فضالتها بالداخل في سلة الزباله.
وابقي عشره و اتحزم
لكن اياك ان تتزوج لمثل هذه الاسباب
واسال اخوك (……….) راجل صنديد وخاض تجربة ارسال اوالده للسودان …...لا شكي ولا بكي الا للحنين لام عياله و قلقه علي صغاره.
كثار مروا بهذه التجربه
واخرين سجمانين غد يجيوا يباروكوا مشروعك الما شادي حيله ده.
ربنا يحفظك.
|
Post: #11
Title: Re: أبحث عن زوجة ثانية
Author: الشفيع وراق عبد الرحمن
Date: 06-02-2014, 06:22 AM
Parent: #9
تسلمي ام حازم على النصائح الغالية
والله الجرسة حااااصلة
وربنا يقدرنا على الصبر
الزواج ما وارد نهائي بحول الله
المدام لولا الاضطرار ما كان فكتنا عكس الهوا
| Quote: تعالي اتفشي هنا…..واهرينا البتقع من السماء يتحملها منبر بكري ابوبكر هههههههههه |
اوسكارين :)
البوست ده زااااتو جزو من الهري
|
Post: #19
Title: Re: أبحث عن زوجة ثانية
Author: Fathi Ali Mohammed
Date: 06-02-2014, 06:35 AM
Parent: #11
الشفيع الكويز
كلامك دا قلت و انت في كامل وعيك؟
Quote: كنت وما زلت ضد تكوين زوجة تانية
وبشوفوا حرام عدييييل
واقرب للزنا
|
|
Post: #13
Title: Re: أبحث عن زوجة ثانية
Author: دينا خالد
Date: 06-02-2014, 06:24 AM
Parent: #9
ههههههههههها يالشفيع
او لووووووووب ...
قالوا فى الاثر السواى ما حداث ...
الجديدة ذاتها ح تمشى مع اولادها وانت برضو ح تكون ما جاهز للمغادرة !
لما تصل للرايعة قول عووووك ...
ــــــــــــــــــــــــــتتت
ياخ ما تشم الهواء شوية بلا صوت التلاجة بلا ملاوزات معاك ...
انت النوع اللما كان صغير ما بمشى فى الضلمة ...؟
وبرسلوا الدكان يقول ال###### ؟
هسه كان جاتك واحده قالت ليك انا جاهزة تمشى وييين ؟
اسحب اسحب الخيط دا قبل ما يخيطوا ليك عيونك يا صاحب .... لووووووب
|
Post: #14
Title: Re: أبحث عن زوجة ثانية
Author: الشفيع وراق عبد الرحمن
Date: 06-02-2014, 06:28 AM
Parent: #13
| Quote: هسه كان جاتك واحده قالت ليك انا جاهزة تمشى وييين ؟ |
دينا صاحبتي
يا زولة كان عندك ترشيحات لزيها والعن ابو الينط :)
غايتو جنس شماتة
|
Post: #18
Title: Re: أبحث عن زوجة ثانية
Author: زياد جعفر عبدالله
Date: 06-02-2014, 06:34 AM
Parent: #9
يا باشمهندس الشفيع
أمسك حبل الصبر...عارف إحساسك دا :)
أنا قبل ما أتزوج أجبرتني ظروف العمل ان اسكن بمدينة نيوكاسل شمال سيدني لمدة عامين
غايتو نجضتا الجيمنازيوم و الكورة و البحر نجاض...لمن عملت لي عضلات زي بتاعين المصارعة :)
بس برضو كانت غربة ووحدة حاااارة برغم مصادقة بعض الخواجات هناك...في رمضلن كنت بفطر بي سندوتش و قزازة عصير...برااااااي زي أبو ذر :)
...
شوف ليك شلة كشتينة و للا ضمنة ... صدقني بفرقوا و بقضوا زمن...
عرس تاني لااااااااااااا...حذاري :)
|
Post: #12
Title: Re: أبحث عن زوجة ثانية
Author: عاطف عمر
Date: 06-02-2014, 06:23 AM
Parent: #1
Quote: المدام قالت عيالها اولى
تدارسنا الموضوع لايام وليالي
ولم نجد حل سوى انتقالها للسودان
وبقت مشكلتي انا |
Quote: دي مشكلة انا متأكد قابلت ناس كتااار
وبالذات من لديهم بنات
حلها شنو؟ |
Quote: انا لا اعرف اعيش براي
ممكن يومين اسبوع
اكتر من كده مستحيل |
هههههههههههههههههههههههههههههههههههههههههههههههههههههههههه
كان غيرك أشطر يا حبيب
أركز..
إستعد لـ ( فاتورة تذاكر الطيران )
المشكلة كوووووولها في الإسبوع الأول بعد داك مافيش مستحيل ( مع تايد للغسيل )
ثلاثة سنوات ياعمك
تعلمنا فيها الطبيخ بما في ذلك ( المفروكة )... وكل لوازم البيت
ربنا يخلي الإسكايب .... جلسة ساعتين تلاتة يومياً من بعد صلاة العشاء حتى مواعيد النوم ... وتفاصيل التفاصيل مع كل فرد
نعم نحن آباء البنات... من قولة تيت ( أخدناها من قصيرها ) وتوكلت المدام على الحي الذي لايموت ... وتحزمت وتلزمت مع بناتها
تأتينا كل من تخلص من سيمستر ...
نتجمع في إجازتي السنوية في السودان
أونتجمع في عطلة الأعياد هنا في دبى
إختلاف حالتي عن حالتك بأن ظل معي الولد لاعتبارات تدارسناها ورأينا صحتها
فكانت رفقته متعة.. أدامها الله تعالى وزادها
يترك لي فراغاً كبيراً عندما يسافر في إجازات الفترة لكن أهو ( ترانا عايشين )
|
Post: #15
Title: Re: أبحث عن زوجة ثانية
Author: الشفيع وراق عبد الرحمن
Date: 06-02-2014, 06:30 AM
Parent: #12
حبيبنا عاطف
سلامات ياخي
| Quote: كان غيرك أشطر يا حبيب |
والله غلبتنا عدييييل
وراسنا اتقطع
ومافي دبارة
تراجي قالت 15 لفة
نجرب اليوم ونشوف
|
Post: #16
Title: Re: أبحث عن زوجة ثانية
Author: الشفيع وراق عبد الرحمن
Date: 06-02-2014, 06:31 AM
Parent: #15
دقت ساعة العمل
نعود المساء وما ادراك ما المساء
امكن نلقى ترشيحات تحلنا :)
|
Post: #41
Title: Re: أبحث عن زوجة ثانية
Author: كمال الطيب الجميعابي
Date: 06-02-2014, 03:02 PM
Parent: #16
الأخ الكريم الشفيع وراق
بعد التحية
تجربتي الشخصية بإختصار: أغتربت فترة في الرياض ولميت لي قرشين عملت بيهم مشروع في السودان ، المشروع عجب بعض الناس بنو مشروع مطابق له وجنبو وبسبب أني ماعندى غطا بلهجة ناس السوق كنت لقمة سائقة لناس القبانة والضرائب والزكاة ، تكلفة الإنتاج إرتفعت عندى بشكل لايمكنني المنافسة أدخلت بض الناس التفتيحة من أهلنا شركاء شالو الجمل بما حمل. كنت عامل خط رجعة إقامة في بريطانيا. سافرت لوحدى للعمل في بريطانيا ورجعت لغسيل العدة والطبخ مرة أخرى ضاقت بي الدنيا وفكرت جديا أنو اتزوج واحدة من الخواجيات المسلمات جداد ديل ماسكات في دينن عديل والمهر حقهن خمسين يور (255 ريال). لكن ولله الحمد والمنة صبرنا حتي جاءت بت العم هنا قبل سنة وبقينا نلمم في الشفع زى المراره. فيا خوى الصابرات روابح وإن رجعن قماح.
موضوع الزواج مرة أخرى له عواقب إجتماعية ليست سهله وانت ماشاء الله ربنا يديك طولت العمر نقزت فوق الخمسين وإذا كنت تعمل في الهاتف السعودى الوضع غالبا مش ولابد وككل مغترب سوداني عليك حمل الأسرة الصغيرة والأسرة الممتدة وسفر وقومه وقعده وضرائب وزكاه وتجديد جواز وترعة كنانة زى ماعارف.
أرجو أن يكون في قصتي بعض التخفيف ونسأل الله أن يخفف عنا جميعا.
لك وللجميع تحياتي .. الجميعابي
|
Post: #17
Title: Re: أبحث عن زوجة ثانية
Author: الصادق اسماعيل
Date: 06-02-2014, 06:31 AM
Parent: #12
يا زول ترجع السودان
تشتغل مع الموتمر الوطني
تعمل ليك هبرة ممتازة
تعمل تحلل بعشرة في المية من الهبرة
تشتري بالباقي مزرعة تعيشك انت واولادك في امانة الله
لكن ابعد من التانية
|
Post: #20
Title: Re: أبحث عن زوجة ثانية
Author: محمد عبد الله الحسين
Date: 06-02-2014, 06:37 AM
Parent: #17
الأخ الشفيع
شنو الإقتراحات الإنهزامية دي؟ ما في واحد و لا واحدة يشجعك؟
رأي لابد من شوية مغامرة و لا بد من التجربة و إن طال الزمن.
خلي شعارك دائماً:
العمر واحد و الله واحد لكن الزواج ما واحد.
حأكان حتسمع لبنات حواء أصله ما حيشجعوك في الدخول هكذا مشروع.
مع احترامي و تحياتي للاستاذة تراجي و الاستاذة دينا
|
Post: #21
Title: Re: أبحث عن زوجة ثانية
Author: مازن فيصل هلال
Date: 06-02-2014, 08:38 AM
Parent: #20
سلام باشمهندس :
((حتى ولو تفهمت المدام))
------------------------
صدقني لو اجتزن البند الهام الفوق دا ... الباقي كلو سااااهل
|
Post: #23
Title: Re: أبحث عن زوجة ثانية
Author: نجم الدين سعدابى
Date: 06-02-2014, 08:43 AM
Parent: #21
الخال الشفيع
أبرد ياااخ
أنحنا بنفتش فى الأولى
تحياتى
|
Post: #25
Title: Re: أبحث عن زوجة ثانية
Author: Haytham Ghaly
Date: 06-02-2014, 08:51 AM
Parent: #21
سلام للجميع
انا رايي يا الشفيع دي فرصة كبيرة
جدا .. عشان تراجع فيها نفسك وتشوف
هل انت على حق .
هل ظلمت ، شتمت ، اذيت ، ايدت دونما ضمير
فرصة عشان تراجع كووول دا
صدقني حا تصل لي شي مفيد
بس كن صادق مع نفسك ومع الله
كن بعافية
|
Post: #22
Title: Re: أبحث عن زوجة ثانية
Author: عادل سهل
Date: 06-02-2014, 08:41 AM
Parent: #20
أخوى الشفيع
قاعدة الزواج من الثانية خلافاً لكل المعطيات هي :
" إذا وجدت من تستفزك للزواج منها "
ويبقي حاول فك شفرات " تستفزك" دي.
أقعد عافية...
|
Post: #24
Title: Re: أبحث عن زوجة ثانية
Author: Osama Mohammed
Date: 06-02-2014, 08:51 AM
Parent: #22
الاخ الشفيع
( اركز)
لا اري اي داعي للزوجة التانية ما دام الاولى موجودة .
الحالات الوحيدة التي اؤييد فيها الزواج التاني ( الطلاق والوفاة لا قدر الله ) غير كدة ( اكل في حنانك ) .
اقرأ كتب كتيرة ( لو لسه عندك باقي عيون ) صدقني حا تستمع . زمان كنت بقول لي اصحابي ( لمن كنت في صحراء التعوسية دي ) : بالجد لمن الواحد يقرأ كتاب بحس انو ما براهو .
مودتي
( تضامنو مع الشفيع ) الوش الاخدر ابا يجي .
|
Post: #26
Title: Re: أبحث عن زوجة ثانية
Author: خضر صيام
Date: 06-02-2014, 09:22 AM
Parent: #24
في الاول التحول من حياة العوائل الي العزابة صعبة شديد
لكن شهر شهرين كدا بتكون عادي وبتقول الوحدة احسن
وهذا مصير معظم المقييمين في السعودية ... ظروف جامعات في السودان لازم تكون متابعة لهم في السودان
وتنجبر ترسل القروش كل 15 يوم لانو بكونوا دايريين يعيشوا نفس العيشة الهنا
|
Post: #27
Title: Re: أبحث عن زوجة ثانية
Author: خالد المبارك
Date: 06-02-2014, 09:23 AM
Parent: #24
الاخ الشفيع
بعد السلام
انا غايتو اصلا من رافضي فكرة الزواج خارج السودان لو الاولى او التانية
و الله اكتر خبر بستغرب ليهو لما اسمع زول يقول ليك اولادو دخلو الجامعات و هو لسه عندو نفس يجلس في بلد الاغتراب !!!
طيب السودان ده الناس دي حتجيهو متين و ياتو وقت ؟؟؟
زول اكتر من عشرين سنة ما ظبط امورو و جهز لي نفسو في بلدو ؟؟؟؟؟
تأسيس نفسك و و خلق فرصة عمل في السودان اهم من الزوجة و الابناء عندي ، يعني لو ما بنيت البيت و اشتريت العربية و استثمرت لي شوية قريشات نقاطة زي مابيقولو حرم ما كنت اتزوج لو بقت لي بي امر قبض من المحكمة الدولية
امك ثم ابوك ثم نفسك ثم اخوتك ثم الزوجة و الاولاد هذا هو الترتيب العادل ، لكن في ناس اول ما يشمو ليهم ريحة قريشات في يدهم طوالي يبقو مارقين و مفتشين عن زواج
استغل هذه الفرصة و ظبط امورك و ضع في حساباتك انك مغادر نهائي و شوف في فترة و جيزة كم ستحقق من معجزات ؟؟!!!
.....
|
Post: #28
Title: Re: أبحث عن زوجة ثانية
Author: ولياب
Date: 06-02-2014, 09:31 AM
Parent: #24
يا الشفيع أخوي أمسك في أم العيال كويس وبلاش زوجة ثانية وثالثة ، يا خي زوجة تضحى من أجل أبناءك وابناءها لتوفر لهم الاستقرار العائلي من أجل الحصول على العلم ، تكافؤها بضرة ، يا الشفيع دعك من هذا الأمر ، وتحمل مشاق البعد عنها ما دام هي متحملة ، وصدقني بعد فترة تتعود ويصبح الوضع طبيعي وعند أول لقاء في إجازتك أو حضورها بعد نهاية الدراسة سيكون هناك طعم لقاء خاص .
تحمل يا رجل تحمل وأترك هذه السيرة .
|
Post: #29
Title: Re: أبحث عن زوجة ثانية
Author: ahmedona
Date: 06-02-2014, 09:37 AM
Parent: #24
سلام يا باشمهندس ....
صلي إستخارة وأعمل ما يرتاح له قلبك ....
الزوجه الثانية -- ليست عيب ولا كلها مساؤي
منها تحصن نفسك ... وتحصن بنت ناس ... وتعف المجتمع ....
ممكن ترزق بذرية صالحه مباركة ....
الأرزاق بيد الله ...
ولا يدرى الإنسان أين يكمن الخير ...
|
Post: #30
Title: Re: أبحث عن زوجة ثانية
Author: مني عمسيب
Date: 06-02-2014, 09:48 AM
Parent: #29
التحية لك اخي الشفيع ولضيوفك الكرام ..
Quote: كنت وما زلت ضد تكوين زوجة تانية
وبشوفوا حرام عدييييل
واقرب للزنا
|
قلت لي اقرب للزنا
ههههههههههههههههههههههههههههههههههههههههههههههههه
تصدق يا شفيع نفس رائي في تعدد الزوجات حاجة متخلفة ومقرفة جدآ .
ونصيحتي ليك انت انسان موالي للنظام يعني ما عندك مشكلة احسن امشي
لي اولادك بذات في ظروف السودان البقت ما مفهومة دي . المهم مجرد رأي
وربنا يهون عليك .
بهمس :
اشمعنا 30 سنة !؟ اصغر ما ممكن ؟ هههههههههههههه
ولي قدام ..
|
Post: #31
Title: Re: أبحث عن زوجة ثانية
Author: Mohd Ibrahim
Date: 06-02-2014, 10:07 AM
Parent: #30
الحل في البورد ذاتو... عاين فوووووووق كلو اعلانات مسيار !!!!!!!!!!!!!!!!!! مقيمة تبعد عنك 12 كيلو !!!!!
|
Post: #32
Title: Re: أبحث عن زوجة ثانية
Author: سيف النصر محي الدين
Date: 06-02-2014, 11:28 AM
Parent: #31
المفروض العيال يقعدوا براهم و يعتمدوا على نفسهم.
|
Post: #33
Title: Re: أبحث عن زوجة ثانية
Author: محمد على طه الملك
Date: 06-02-2014, 11:56 AM
Parent: #32
| Quote: استحم واقعد اذاكر شوية |
مع ناس سودانيز ؟
هسه دي مكنتك يا الشفيع عايز فتوى من ناس المنبر ؟
غايتو الكيزان ديل أصلو ما بسيبو شغل التلاتة ورقات علينا ^ - ^
|
Post: #34
Title: Re: أبحث عن زوجة ثانية
Author: باسط المكي
Date: 06-02-2014, 12:31 PM
Parent: #33
يازول انت غااوي مشاكل
ماتتعذب اخر عمرك مع واحدة جديدة
كن قانع راض بحياتك وربنا يوفقك
|
Post: #35
Title: Re: أبحث عن زوجة ثانية
Author: معاوية المدير
Date: 06-02-2014, 12:39 PM
Parent: #34
عاين لي جاي يا الشفيع،
أمسك في رياضتك دي قوي،
ووقف أكل الضريسا،
وأكثر من الصوم الحبة ما بتجيك...
|
Post: #36
Title: Re: أبحث عن زوجة ثانية
Author: عمر عثمان عبد الوهاب
Date: 06-02-2014, 12:55 PM
Parent: #35
Quote:
منها تحصن نفسك ... وتحصن بنت ناس ... وتعف المجتمع ....
ممكن ترزق بذرية صالحه مباركة ....
الأرزاق بيد الله ...
ولا يدرى الإنسان أين يكمن الخير ... |
|
Post: #37
Title: Re: أبحث عن زوجة ثانية
Author: محمد نور عودو
Date: 06-02-2014, 01:08 PM
Parent: #36
| Quote: أبحث عن زوجة ثانية |
سلام يا الشفيع
والمدام أم العيال شافت البوست دا ولا لسه؟
إعتقد رأيها مهم
|
Post: #38
Title: Re: أبحث عن زوجة ثانية
Author: عبد الله شم
Date: 06-02-2014, 01:17 PM
Parent: #37
| Quote: شمعنا 30 سنة !؟ اصغر ما ممكن ؟ هههههههههههههه |
ممكن ونص وزيادة
هي وينا :)
|
Post: #39
Title: Re: أبحث عن زوجة ثانية
Author: ismeil abbas
Date: 06-02-2014, 01:27 PM
Parent: #35
ألأخ/ الشفيع السلام عليكم..
الواحد كان ماخد شوية منك بسبب ردودك القاسيىة فى الفترة ألأخيرة لكن وجدنا ليك العذر ألأن وبسببك..
Quote: دي مشكلة انا متأكد قابلت ناس كتااار
وبالذات من لديهم بنات
حلها شنو؟
ما جاهزين للمغادرة النهاية |
فعلاً أنا أحد من هولاء...لكن ولو مجرد فكرة ما فكرت أتزوج...وأعتقد أن بوستك ده للونسة ولكن خلينا نضع فيهو تجاربنا علها تفيدك وتفيد ناس أخرين...
سنين من العشرة بحلاوتها ومراراتها مع شخص يتفاكر معك ويتشاور ويؤسس لحياة جميلة ووردية وفجاْة تضع فى حياته شريك أخر من غير سيب مقنع هذا منتهى ألأجحاف وألأنانية...
فى بداية ألأمر كل شىء يكون صعباً ما تمر ألأيام وتتأقلم على وضعك وتعتبر كل هذه الهواجس من طرف الشيطان.
ما أنجزناه بحمد الله بعد ذهاب زوجتى مع ألأولاد إلى السودان لو كنا هنا لما كنا أنجزناه..صمدت...وضحت وكافحت وتابعات رغم أنى لا أترك المسافىة بينى وبينهم فى أللقاءات أكثر من 3 شهور
وفعلاً عانيت ما عانيت لأننا لم نفترق طيلة ال17 سنة ألأولى ولكن بحمدالله كلما أرى صبرها أتصبر من أجل مستقبل أولادنا..ربنا يحفظها ويبارك فيها ويطرح البركة فى ذريتنا وجميع المسلمين.
ده جزاء السمنار ذاته يكون......تقديرى وإحترامى للجميع...
|
Post: #40
Title: Re: أبحث عن زوجة ثانية
Author: د.محمد حسن
Date: 06-02-2014, 02:05 PM
Parent: #39
| Quote: ما جاهزين للمغادرة النهاية |
طبعا يا الشفيع انا عندي قرية تانية
كونك ماجاهز للمغادرة النهائية بعد رجوعك من السودان معناها الوضع اسوأ ممكا كنت تتصورة
ولما كانو الناس بيتكلمو عن سوء الوضع في السودان كانو في نظرك معارضة مأجورة وعميلة
لو كنتو ختيتو يدكم مع الجميع ونهينا حاجة اسمها حكومة الفساد
ما كانت بتكون العودة النهائية صعبة
بل كنا كلنا رجعنا واستمتعنا بي بلدنا
القصة ما قصة زوجة تانية
القصة قصة حكومة تانية
|
Post: #42
Title: Re: أبحث عن زوجة ثانية
Author: MOHAMMED ELSHEIKH
Date: 06-02-2014, 03:14 PM
Parent: #40
الشفيع صديقي الكضيضيييييب
قال 30 سنة يعني بعد شوية انت تخرف وهي تضحي من اجلك؟
ياخ الاعمار بيد الخالق. لكن عندنا عشرة خمستاشر سنة خلينا بي حبوب بي رياضة مشى نتمها.
انا امر بظروفك وظرفي المادي طبعا يقارب ظرفك
البرنامج كالاتي:
الشباب مع امهم في الخرطوم
نسافر العيد السغير في الخرتوم
العيد الكبير في فتوار. طبعا كل واحد عشرة يوم
بعد داك اجازة اربعين يوم بي مزاج في توقيت متوازن
ثم يجوك العيال لمدة شهرين في موسم مختلف
اها الفضل شنو؟
وقديا قالو:" الشفيع وراق ولا الآداب"
دمخلصكم ود الشيخ
سي سي هشام المجمر وشلته
|
Post: #43
Title: Re: أبحث عن زوجة ثانية
Author: الشفيع وراق عبد الرحمن
Date: 06-02-2014, 04:07 PM
Parent: #42
حباب الاحباب
والله قريت مداخلاتكم كلمة كلمة
وبعضها اكتر من مرة
|
Post: #44
Title: Re: أبحث عن زوجة ثانية
Author: garjah
Date: 06-02-2014, 04:45 PM
Parent: #43
Quote: كلام اخوك عبد العزيز ده امسك فيه قوي
المصريات قالوا….(البدل مخدته بدل محبته يختي)……!!
وبالتالي
المدام الاولي ذاته بتبدل لو اتزوجته الثانيه
وعيالك بتيغروا تجاهك
وتبقي في اثبات انهم اولويه لديك
غير انه الزوجه الجديده بتجيك بكج كامله
اي مجاملات نسابه و عالج ابوي و شغل اخوي ومسافره لناس امي
ويلاك ناس عمي في ينبع
وناس خالي في نجران
وتبقي في مساسقه بين المدن غير الاجازه السنويه لا تعرف راسك من رجليك!
تعالي اتفشي هنا…..واهرينا البتقع من السماء يتحملها منبر بكري ابوبكر هههههههههه
وتم الباقي فيس بوك…..والرياضه ممتازه
زيد اللافات ل 15 اصلا بعد الاربعين امراض القلب و اشرايين راقده
ثانيا:
ما تعتمد علي اكل المطاعم……ركز في انك كيف تاكل صحي
فواكه و خضروات…..وما تنسي ترمي باوقايها اول باول لانها بتعمل لك…..ذباب في البيت و لو تركت فضالتها بالداخل في سلة الزباله.
وابقي عشره و اتحزم
لكن اياك ان تتزوج لمثل هذه الاسباب
واسال اخوك (……….) راجل صنديد وخاض تجربة ارسال اوالده للسودان …...لا شكي ولا بكي الا للحنين لام عياله و قلقه علي صغاره.
كثار مروا بهذه التجربه
واخرين سجمانين غد يجيوا يباروكوا مشروعك الما شادي حيله ده.
ربنا يحفظك. |
الشفيع اخوي امسك في كلام تراجي ده
عن تجربة هههههههههههههههههه
|
Post: #45
Title: Re: أبحث عن زوجة ثانية
Author: Barakat Alsharif
Date: 06-02-2014, 05:07 PM
Parent: #44
|
Post: #47
Title: Re: أبحث عن زوجة ثانية
Author: ود الباوقة
Date: 06-02-2014, 05:48 PM
Parent: #45
الشفيع
عليك بأكل الرطب
وشرب الزنجبيل الدافيء
|
Post: #51
Title: Re: أبحث عن زوجة ثانية
Author: Gaafar Ismail
Date: 06-03-2014, 03:48 AM
Parent: #45
الحبيب الشفيع
| Quote: يا الشفيع أخوي أمسك في أم العيال كويس وبلاش زوجة ثانية وثالثة |
هذه نصيحة قيمة جدا ارجو أن تعمل بها
تقديرا لأم العيال التي قبلت أن تضحي وتبقى مع الأولاد في السودان لترعاهم ، أرجو أن لا تعاقبها بالزواج الثاني فهي لن ترضى مهما كانت مبرراتك .
أصبر وصوم الاثنين والخميس وستجد الأمور سالكة بإذن الله ، وستجد أن النتيجة جيدة وتذوق حلاوة الصبر .
تحياتي ووافر احترامي
|
Post: #46
Title: Re: أبحث عن زوجة ثانية
Author: ودقاسم
Date: 06-02-2014, 05:10 PM
Parent: #44
الشفيع
في رابطة رياضية في الرياض اسمها الصالحية
امشي ليهم والله ينسوك عيالك
بس هم معارضة
|
Post: #48
Title: Re: أبحث عن زوجة ثانية
Author: ود الباوقة
Date: 06-02-2014, 05:52 PM
Parent: #46
مع التقليل
من اكل
الترمس
والبيدنجان المشوي
|
Post: #49
Title: Re: أبحث عن زوجة ثانية
Author: ود الباوقة
Date: 06-02-2014, 05:52 PM
Parent: #48
ولو طريت لك عرس تاني لومني
|
Post: #50
Title: Re: أبحث عن زوجة ثانية
Author: الشفيع وراق عبد الرحمن
Date: 06-03-2014, 03:38 AM
Parent: #49
ود الباوقة
مالها وصفاتك مقلبنة
ورينا السفرجل بي وين بس
عبد الله شم
كيفك ياخي
توصيات عزو تحت الدراسة
حبابك اخونا فتحي علي
وشاكر تضامنك
حبيبنا زياد جعفر
ماني من ناس الكتشينة
لو تعرف ليك شلة شطرنج بي جاي دلني عليها
حبابك اخونا كمال الجميعابي
شاكر مرورك وتسليتك
نحنا ما عندنا خطوط رجعة، سيييدا
رينا يهون القواسي
حبابك اخونا الصادق اسماعين
مانا مابين الرجعة
بس العين بصيرة والايد قصيرة
باقي لينا لسه فيها طريقة "هبرة"؟
|
Post: #52
Title: Re: أبحث عن زوجة ثانية
Author: Yassir Tayfour
Date: 06-03-2014, 03:54 AM
Parent: #50
المرة التانية داير بيها شنو؟
دايره تطبخ وتنضف وتغسل؟ جيب ليك شغالة وأدفع ليها أجرها قبل أن يجف عرقها ;)
وكان دايرها "للسُنة"، بتظلمها ساكت، أحسن تشوف ليها صبي زيها في التلاتين والأربعين :)
___
قال نحيفة وفي التلاتين قال
أها ما دايرها غنيانة ويتيمة؟
|
Post: #53
Title: Re: أبحث عن زوجة ثانية
Author: alsngaq
Date: 06-03-2014, 07:47 AM
Parent: #52
Quote:
Quote: نصيحة لوجه الله...
لملم بعضك وابقي مارق..
يمين تدبل...
لا تلقي الاولي
ولا التانية
ولا الاولاد
ولا رقبتك
ان بقت بلغت الحلقوم
اتوكل حاحي مع وليداتك
وبتدبر بي موية بي قروض..
ترا راي عاد.
حبيبنا وراق
تحياتنا يا ملك
ياخي كلام عبدالعزيز دا ابقى عليهو عشرة
بعدين الغربة جربناها واسواء اغتراب في الخليج هو في السعودية
وفي السعودية بالتحديد الرياض
شوف ليك محجان رزق في بلدك وابقى داب وليداتك
الجفلن خلهن اقراع الواقفات |
|
Post: #54
Title: Re: أبحث عن زوجة ثانية
Author: محمود سيد أحمد
Date: 06-03-2014, 12:35 PM
Parent: #53
السلام عليكم الشفيع والجميع نهدي لكم هذا المقال الذي وجدته اليوم صدفة
Quote: أوفى زوج في الظهران
عبدالله المغلوث
كان البروفيسور، عبد الله عابد شيخ، عضو هيئة التدريس في جامعة الملك فهد للبترول والمعادن في الظهران، يعيش وزوجته الطبيبة حياة مثالية تماما. رزقهما الله ابنة وابنا، وقبل ذلك وظفيتين كانا يخططان لهما طوال العمر. جمعهما منزل واحد وأحلام مشتركة يتطلعان لاستكمالها معا، لكن أصابها مرض عضال لم يمهلها طويلا. تركته زوجته وحيدًا يلاحق الأحلام التي شيداها معا حلما حلما. فهكذا هو دأب الأيام الجميلة تمر سريعا، فما تلبث أن تستيقظ حتى تغفو ولا تكاد تشتعل حتى تخبو.
مر البروفيسورعبد الله بلحظات صعبة بعد وفاة شريكة حياته. استيقظ من غيبوبة حزنه متخذا قرارا مصيريا بأن لا يقترن بأخرى بعد وفاتها وفاء لها وحرصا على أن يكرس حياته لابنيه بعد أن أصبحت المهمة أصعب بعد رحيلها.
لم يستقدم البروفيسور عبد الله خادمة أو سائقا. كان يطهو ويغسل وينظف ويكوي بنفسه. تولى مسؤولية اصطحابهما إلى ومن المدرسة يوميا. لم يرغب في أن يشعرا بفقدها أو حاجتهما إلى أحد سواه.
لم تعد لديه حياة اجتماعية. سخر حياته للمنزل والجامعة. رغم تفانيه أستاذا ونشره في أهم الدوريات العلمية في تخصص الهندسة الكيميائية، إلا أنه رفض كل الفرص التي أتيحت أمامه ليتولى منصبا إدرايا في الجامعة. كان يدرك أن أي منصب كان سيسرق منه ساعات أحق بها ابنته نادين، وابنه هشام. حاول أشقاؤه وأقاربه أن يقنعوه بالزواج، لكنه ظل متمسكا بقراره، ولا سيما أنه يشاهد ابنيه يكبران ويتفوقان ويقتربان من الوصول إليه في طولهما وفكرهما. عوضته صداقته بهما عن كل ملذات الحياة الأخرى. ابتسامتاهما كانتا الضوء الذي ينير أعماقه ويهديه إلى مزيد من العمل من أجلهما. مرت أكثر من 16 سنة على غياب زوجته دون أن يشعر بحاجته إلى امرأة أخرى تشغل حياته. كيف يفكر بأخرى وهي زرعت في حياته طفلين كبرا اليوم وأصبحا في الجامعة والثانوية. باتا صديقين حميمين يستشيرهما ويحلم بهما ومعهما.
نقرأ دائما عن وفاء الأزواج في الغرب ونكاد نجزم أنه لا يوجد شيء يشبهه في الشرق. لكن الأيام تثبت لنا دوما أن الوفاء ليس له جنسية. فهذا هو البروفيسور عبد الله، الأكاديمي السعودي، الشرقي، يؤكد أن لدينا تجارب لا تقل وفاء ودهشة.
تحية تقدير نوجهها لبروفيسورنا عبد الله، الذي جسد أسمى معاني الوفاء والإيثار والتضحية.
الوفاء هو النور، الذي يقودنا إلى مجتمعات أكثر إنسانية ونبلا. |
|
Post: #56
Title: Re: أبحث عن زوجة ثانية
Author: الشفيع وراق عبد الرحمن
Date: 06-03-2014, 05:24 PM
Parent: #54
حياك الله اخونا محمود
وشكرا كتير على المقال الرائع لي زول رائع وفي، في زمن قل او انعدم الوفاء
بالتأكيد ح استصحب معاي السيرة الرايعة دي وبالتاكيد ح تكون خير عونن
حبابك السنجك وحياك الله
ود طيفور
مالك داير تنط لي زي العليل خدر الطيب، شفاه الله وعافاه، البيفتكر انو الزوجة اداة جنس
طبعا انت عريس جديد
بس، صدقني ح تكتشف حاجات اهم منو بكتيييير، ولو لا غنى عنه :)
|
Post: #55
Title: Re: أبحث عن زوجة ثانية
Author: عبد الحميد فخر الدين
Date: 06-03-2014, 05:22 PM
Parent: #50
Quote: قال نحيفة وفي التلاتين قال
أها ما دايرها غنيانة ويتيمة؟ |
الاخ الشفيع بعد التحية...
عليك بالصبر...
|
Post: #57
Title: Re: أبحث عن زوجة ثانية
Author: Elsanosi Badr
Date: 06-03-2014, 11:51 PM
Parent: #55
اتا يالشفيع اخوي وكت ممكون كده ما تبقي معارضة ههههههه
وبعدين تعال هنا اااود عمي شروطك تعبانه شديد ... مره ضعيفة وتتنازل عن بعض حقوقها!!!
يا قريبي ياخي انا كت قايلك من اصلب العناصر...
يا زول هوي مره شنو وضعيفة بتاعة الساعة كم في الحر بتاع الرياض ده وكمان مع الجداد بتاع ساديا هههههه!!!
ازول تجربتك دي بالكربون مع واحد صاحبنا دكتور هنا ... كل يومين تلاتة بستف العربية غداء وبمشي ليهو نتونس وناكل ونتشاكل وبجي راجع اخليهو ... لكن عمرو ما قايل داير ليهو مره ضعيفة والكلام بتاع الجرسة ده...
اااود عمي انكرب وخلي المقابضة.... والله تزوج تاني صوف راسك اتحت ...
|
Post: #58
Title: Re: أبحث عن زوجة ثانية
Author: عماد حسين
Date: 06-04-2014, 00:31 AM
Parent: #57
أخونا الشفيع
خيط الاستشارة ده بيعمل ليك ملاوزة 
يا زول ألزم الاستخارة.. الاستخارة.. الاستخارة..
واسأل ربنا كتير
أنا عندي 3 أصدقاء.. أي واحد فيهم معدد اتنين اتنين،
عايشين في أمن وأمان، وكمان مغتربين، وأحوالهم المادية عادية
بل لدي أكثر من 5 أصدقاء في السودان كلهم معددين، وجميعهم في أمان الله
وفيهم واحد متزوج 4.. وأحواله المادية عادية، وليس معدوداً من الأغنياء
اتوكل على الله.. وبالتوفيق
__________________________
أخوك عماد وهابي، ظلامي... من أنصار تعددية الزواج، وضد التعددية الديمقراطية والحزبية
|
Post: #59
Title: Re: أبحث عن زوجة ثانية
Author: معاوية المدير
Date: 06-04-2014, 01:07 AM
Parent: #58
Quote: أخوك عماد وهابي، ظلامي... من أنصار تعددية الزواج،
وضد التعددية الديمقراطية والحزبية |
أها، يا الشفيع اللوصيك، واهلنا قالو،
الوصية بالمهلة، نوع دا اوّعك تاخد بكلآموا،
بيغتس حجرك...
|
Post: #60
Title: Re: أبحث عن زوجة ثانية
Author: عماد حسين
Date: 06-04-2014, 02:46 AM
Parent: #59
Quote: أها، يا الشفيع اللوصيك، واهلنا قالو،
الوصية بالمهلة، نوع دا اوّعك تاخد بكلآموا،
بيغتس حجرك... |
يا الشفيع... أعمل حسابك،
ديل الجماعة بتاعين مقولة "المابخاف من مرتو، ما راجل" 
|
Post: #61
Title: Re: أبحث عن زوجة ثانية
Author: الشفيع وراق عبد الرحمن
Date: 06-04-2014, 10:11 PM
Parent: #60
حباب الاحباب الكرام
حبيبنا محمد وود الحسين
يا زول في العمر ده ما فينا حيل لي مغامرة مجهولة النتائج
يا مازن
التفهم زاااتو درجات
ممكن تكون جرجرة ساي عشان تفك اخرك
السعدابي
ربنا يتمم ليك ويسعدك ياخي
فاتك كتيييير
الحق
هيثم الغالي
يديك العافية للنصائح
ينظر ويفاد
اخونا عادل سهل
شفراتك ابت تتفك
حبيبنا اسامة محمد
والله غلبنا الركزان من قلة الخبرة والتعويدة
فطام االكبر ما هين
يديك العافية
اخونا خضر صيام
نحنا في المرحلة الانتقالية
ربنا ييسر الانتقال
استاذنا ود المبارك
تشكراتنا على النصائح الغالية
وننصح بها من كان في بداية الطريق
حبيبنا الغالي ولياب
ما قلت الا الحق
ربنا يصبرنا ويقدرنا على جزاها
احمدونا
برضو راي ولو كان ضد مبادئنا
تحياتي يا غالي
اختنا العزيزة بت عمسيب
صاحبنا سبقنا
والا كنا رشحناك :)، ما محبة الا بعد عداوة
ربنا يسعدكم ويهنيكم
دي دعوة من القلب والله
اخونا محمد ابراهيم
يديك العافية
ديل اجارمة ونصابين ساي
د. سيف
| Quote: المفروض العيال يقعدوا براهم و يعتمدوا على نفسهم. |
راي سديد
الف تحية وشوق حبيبنا محمد الملك
يديك الف عافية اخونا باسط المكي
ود المدير حبابك ياخي
بجيك
شايفك اقش اخونا العمدة
حبابك اخونا عمر هثمان
عودو
شافتو والله
لسه ما علقت
حبيبنا سمعة
| Quote: ده جزاء السمنار ذاته يكون |
ما قلت الا الحق
وانا ياني انا
لم اتغير او اتبدل
بس حسب المواقف
Quote: القصة ما قصة زوجة تانية
القصة قصة حكومة تانية |
برضو راي يا دكتور محمد ود حسن
| Quote: " الشفيع وراق ولا الآداب" |
حبابك ود الشيخ
الحال من بعضو
قنا في اخر عمرنا نغامر شوية
ربك يعين يا صاحب
|
Post: #62
Title: Re: أبحث عن زوجة ثانية
Author: محمد جلال عبدالله
Date: 06-05-2014, 07:17 AM
Parent: #61
الأخ الشفيع وراق .. السلام عليكم
أول شي اسمح لي أعترض على كلامك ده
Quote: كنت وما زلت ضد تكوين زوجة تانية
وبشوفوا حرام عدييييل
واقرب للزنا
|
ولا يخفى عليك أن هذا الكلام مناقض لصريح القرآن الكريم
وقوله تعالى: (...فَانْكِحُوا مَا طَابَ لَكُمْ مِنَ النِّسَاءِ مَثْنَى وَثُلاثَ وَرُبَاعَ فَإِنْ خِفْتُمْ أَلَّا تَعْدِلُوا فَوَاحِدَةً أَوْ مَا مَلَكَتْ أَيْمَانُكُمْ ذَلِكَ أَدْنَى أَلَّا تَعُولُوا) (النساء:3)
فشيء أباحه الله سبحانه وتعالى لا يحق لك ولا أي أحد أن يحرمه أو يصفه بمثل هذا الوصف ..
لأنو ده بدخلنا في حتات تانية زي: هل كان أكابر الصحابة يرتكبون شيئا حراما أو أقرب للزنا؟
وطبعا ما داير أقول زول تاني غير الصحابة .. لأن المثل في هذا المقام ممتنع أصلا!
فيا الشفيع ياخوي بني علمان ديل وناس الجندرة والقنقرة ما تشتغل بيهم ولا تخت ليك مراقة منهم
ديل ما بنفع معاهم غير الكاكي زي ما بتقول انت دايما
|
Post: #63
Title: Re: أبحث عن زوجة ثانية
Author: محمد جلال عبدالله
Date: 06-05-2014, 07:23 AM
Parent: #62
ثمّ ثانيا:
أنا فرحت شديد بي بوستيك ده .. وقلت الشفيع داير ينضم معانا للنادي بتاع المعددين
وكنت في سبيل ذلك داير أكشف ليك المانفستو السري وأديك الخطة (أ) والخطة (ب) و (ج) ذاتو لو تطلب الأمر
لاكين لقيتك رجافة شديد يا صاحبي ونادي المعددين ده أهم بند فيهو: الرجفة ممنوعة .. تكون دباب استشهادي عديل كده
|
Post: #64
Title: Re: أبحث عن زوجة ثانية
Author: Yousif A Abusinina
Date: 06-05-2014, 11:55 AM
Parent: #63
الشفيع انسى وصايا ود الباوقة بتغتس حجرك
عليك بالصوم وتقسيم الاجازات
اوع تتورط
|
Post: #65
Title: Re: أبحث عن زوجة ثانية
Author: الشفيع وراق عبد الرحمن
Date: 06-06-2014, 05:47 AM
Parent: #64
صباحاتكم بيض
وجمعة مباركة طيبة
اسوأ حاجة الويكاند
زمان نرجاهو بي فارغ الصبر
هسه بقينا نحب الاحد الكريه
وصلت للمدام بركات الشريف يا واعي
وتحياتي اخونا قرجة
حبيبنا جعفر اسماعين
وصيتك على العين والراس
تشكرات المدام
الصالحية بعييدة يا ود قاسم
يديك الف عافية
برضو نشووف
ما بتقصر
الله يدينا الصبر يا عبد الحميد فخر الدين
الويكاند طويييييييل
| Quote: اااود عمي انكرب وخلي المقابضة.... والله تزوج تاني صوف راسك اتحت |
الف شكر قريبي ود بدر
Quote: أنا عندي 3 أصدقاء.. أي واحد فيهم معدد اتنين اتنين،
عايشين في أمن وأمان، وكمان مغتربين، وأحوالهم المادية عادية
بل لدي أكثر من 5 أصدقاء في السودان كلهم معددين، وجميعهم في أمان الله
وفيهم واحد متزوج 4.. وأحواله المادية عادية، وليس معدوداً من الأغنياء
|
يا عمدة
كدي جرب ات وادينا رايك
يديك العافية
شيخنا محمد جلال
اعتراضك مقبول
ده رايي الشخصي
ما بنقلد بني علمان يا شيخنا
بنهتدي بي حسن الخلق، والدين معاملة
رفضي للتعدد من منطلق ديني وليس علماني
الدين لا يمكن يحض او يوافق على نشر الكراهية والبغضاء
ويساهم في تحطيم وتدمير حياة انسان برييء ما عندو ذنب
تشبيهي ما جاء من فراغ
الزنا بمن تحل بمقابل مادي نصف زواج، ويدرأ الحد
والزواج بالتانية للمتعة نصف زنا
وكلهم يدور بين الحل والحرم
ده رايي الشخصي ولا يلزم غيري
تحياتي يا غالي
|
Post: #66
Title: Re: أبحث عن زوجة ثانية
Author: فرح الطاهر ابو روضة
Date: 06-26-2014, 06:15 PM
Parent: #65
والله انا افتكرتك خليت الكوزنة
يا الشفيع
وبقيت بتاع زواج ساكت
لكن حقيقة الكوزنة ما بتتخلـــــــــــــــــــــــى
اها
لقيت الزولة التانية ولا لسه الشغلانة جايطة ليك في راسك
ههههههه
|
|