أمثال شعبية ودهاريب وناس عوووك وناس قالو...

الصابرات روابح وإن رجعن قماح

بليلة مبشر ولا زبيحة مكشر

الخلا ولا الرفيق الفسل

غايتو كان دائر توثق جد امش سوق الويكة فى تمبول. فى واحد اسمو احمد مشهور بى زعيتير. تقرف لامن تعرف

رزق المساكين فى المجانين

مجبور خادم الفكى على الصلاة

الما بستحى من ركوبك لا تستحى من تنكيسه

اخى الجميعابى تحياتى .... عندى ثلاثه امثال تنطبق عليك انت شخصيا . ارجو ان تتقبلها بروح رياضيه :
المثل الاول : الساعدوه فى قبر ابوه جبد محافيره ووقف : هذا لانك فتحت البوست ونحن نساعدك على رفع البوست فتركته لنا وذهبت .
المثل الثانى : تركنى حلوف وكلابه : اى تركتنىا نحن والبوست كانه لايهمك امره لا من بعيد ولا من قريب .
المثل الثالث : كن دا حلوفى اطلقوه : كانك تقول لنا لو هذا البوست امره يهمنى انا فقط فاتركوه

البسوم ابوه ببيعوه له

الأخ رحمة .. سلام
يا زول إتا ولد عمي تب .. أمثالك عندنا في دار أولاد حميد أبو جبيهة 100%

قناتي في اليوتيوب
http://www.youtube.com/user/KabbashiSudan
تحياتي


كبـّاشي الصافي

(العوج راي والعديل راي)

Quote: الأخ رحمة .. سلام يا زول إتا ولد عمي تب .. أمثالك عندنا في دار أولاد حميد أبو جبيهة 100%

الاخ كباشى .... تحياتى
انا ولد عمك لزم يااخوى لانى من دينقا ام الديار

Rahma,
you should find execuse for your brother before you start calling names
I can't write in Arabic on here for some reason.
Ihtramati

Quote: Rahma, you should find execuse for your brother before you start calling names I can't write in Arabic on here for some reason. Ihtramati

ولا يهمك اخى الجميعابى بركة الصلى وشحد الله كمبيوترك يكتب ويقرا عربى ... والما عجن بايده ما شبع ..

السحاره سحرها ببين في عيالها

سيد الزامله ابدا بالركوب

التسوي كريت في القرض تلقاهو في جلدا

الما عنده قديم ما عنده جديد

حقار الرجال مويت

الصائل دمه سائل

الجواد بسبق خيل بدوه ما بسبق خيل عدوه

سماح الطبق في النبق في الطبق
.....
قرقاجه لمتهم بوطه
......
ابو سنينه بضحك على ابو سنينتين

ام ال###### بعشوم

1. سيد الزاملة أولى بركوبها
2. خادم الفكي مجبورة علي الصلاة
3. الزول بونسو غرضه
4. مدقوقة الراس قمقامة
5. الفوقو بخور بنشم
6. الغني بماله والكريم بأم عياله
7. الخريف الليّن من بشايره بيّن
8. القُحة ولا صمة الخشم
9. الفي ضهرو عويش ما بطفي نار
10. النيّة زاملة سيدها
11. شدرة دي كان بهوزز ولا ساي يا عبلانج يا هبوباي
12. الجري قبل الشوف قدلة
13. السترة والفضيحة متباريات
14. أخوك كان رميتو قوم منّو
.15 البشوفوه نهار ما بضووا ليه نار
16. جاها يتفولح جاب ضقلها يتلولح
17. الصندل في بلده ما فوّاح
18. عبلانج بي رقبتو بربطو من صلبه مالو!
19. الجديد في الكَرُو سَمِح
20. خير الكلام ما قلّ ودلّ!

البلده الشر بقوقيه

البلده الشر بقوقيه

الأخ الكريم رحمه والإخوان الكرام : لكم الشكر على مواصلة البوست ، غايتو اللابتوب أظنه إصلح شويا

الزول كان أبَاك من غير سبب ما تسْكُو
أمسح إسمو من خَارْطة ضميرك حُكُو

21. البَلدي المِحن يلولي جنياتها
22. البلدي ليه دبيب بطويه في صلبه
23. الشقي يلقى العضم في الكَرشة!
24. الرجال دناقر ما كُبر عناقر
25. جفّالة وسوولها كركاب
26. عايرة وأدوها صوت
27. رقيّق وزادوه ألمي
28. خسارة أكل الفكي للمرارة!
29. الدم ما ببقى موية
30. الخلاء ولا الرفيق الفسِل

الأخ الكريم رحمه
لم أفهم هذا المثل قرقاجة لمتهم بوطة
أرجو البيان
لك الشكر

Quote: الأخ الكريم رحمه لم أفهم هذا المثل قرقاجة لمتهم بوطة أرجو البيان لك الشكر

اخى الجميعابى الحمدلله على السلامه .... اما بالنسبه لسؤالك عن هذا المثل اقدر اقول كل مفرداته بقاريه خالصه وكلمة قرقاجه جمع قرقاجى ومعناها صياد والقرقوج هو الخروج للصيد . البوطه هى الرهد او البركه او المنهل ولمتهم بمعنى جمعتهم وهذا المثل يضرب للذين تجمع بينهم مصالح .

Quote: قرقاجة لمتهم بوطة

الأخ ول أبا رجب فضل المولي بعد السلام
مثل من صميم البيئة ولكن الكلمات غير معروفة للكثيرين وتحتاج لتشكيل عشان يقروها صاح. خاصة كلمة (لمّتهُم). يكون الكثيرون قرأوا اللام كحرف جر وكلمة متّهم بتشديد التاء بدلاً عن تشديد الميم مما غير المعنى وذهب لكلمة مختلفة خالص عن الكلمة المقصودة.
كلمتي قرقاجة و بوطة لا يعرفهما إلا من هو من البيئة.


قناتي في اليوتيوب
http://www.youtube.com/user/KabbashiSudan
تحياتي


كبـّاشي الصافي

(العوج راي والعديل راي)
قناتي في اليوتيوب
http://www.youtube.com/user/KabbashiSudan

Quote: مثل من صميم البيئة ولكن الكلمات غير معروفة للكثيرين وتحتاج لتشكيل عشان يقروها صاح. خاصة كلمة (لمّتهُم). يكون الكثيرون قرأوا اللام كحرف جر وكلمة متّهم بتشديد التاء بدلاً عن تشديد الميم مما غير المعنى وذهب لكلمة مختلفة خالص عن الكلمة المقصودة. كلمتي قرقاجة و بوطة لا يعرفهما إلا من هو من البيئة.

الاخ كباشى الصافى.... تحياتى ..... انا ممنونك على التصحيح تدخلك كان فى الوقت المناسب اشكرك على ذلك .

الشكر موصول للإخوان رحمه وكباشي على الإيضاحات

الحَلّفك كَتَلك والشّكَاك عَاداك

بلد ما بلدك ارنبها بياكل ولدك

إستمعت لندوة تلفزيونية قديمة للدكتور الفحل أنقلها من الذاكره: المثل الذى دار حوله النقاش هو ( سراره اللعوت تتلاقا فى الموت ) والصحيح ( سراره اللعوت تتلاقا فى الحرق والموت ) . وإضافه الحرق تأكيد . وفى حاله الحرق فى الغابات تلتقى أغصان اللعوت . حتى بدون موت .
اللعوت لا ساق له عباره عن أغصان فى شكل أقرب للدائرى تبدأ من داخل التربه وتتسع الدائره كلما إرتفعت الشجيره . هنالك المثل الذى يقول ( جنيه فى لعوته ) . إشاره للشخص الذى يصعب الإمساك به . فالأرانب والغزلان الصغيره تتجه الى اللعوت حتى تتفادى مطارده الإنسان والسفروك , وهو العصى المعكوفه التى تطلق على عكوله أم تشر أو الأرنب البرى .
أمثالنا السودانيه تغيرت بسبب الأخطاء فعندما نقول " ال###### بيريد خناقو" نقصد في العاده أن ال###### يحب من يضربه أو يهينه ولكن أصل المثل حب الشيء اللذيذ الممتع وإن كان يسبب الضرر فال###### يحب العظام ويحاول إبتلاعها ويخنقه العظم ويناضل كي يخلص نفسه إلا أنه يحاول مرة أخرى بلعه لحبه للعظام. ونقول "سيد الرايحه فتح خشم البقره" ونقصد بأن الإنسان عندما يفقد شيء مهم يبحث بعدم معقوليه ويحاول أن يجده حتى في فم البقره والحقيقه أن معنى المثل إن صاحب البهيمه الضائعه(الرايحه) من المفروض أن يتصرف بمعقوليه و يفتح فم أحد الأبقار لكي يرى أي نوع من العشب أو القش يمضغه البقر. وهنالك الحنطوت والديس والنال ولسان الطير والسعده والتمليكه والموليته وخلافه عندما يكون طريا تأكله الأبقار والضريسه والحسكنيت عندما يكون طريا تأكله البهائم. ويمكن للراعي أن يحدد مكان بهيمته الضائعه بمعقوليه بالنظر لداخل فم أحد البهايم الأخري ليعرف مكان المرعي.
ونخطأ كذلك عندما نحث شخص على الإختشاء عندما نقول "اللي اختشو ماتو" ويخطئ حتى الأخوان المصريون الذين هم مصدر المثل . فعندما شب حريق في القاهره في حمام عام للنساء خرجن بعضهن عاريات للشارع وعندما تعرض لهم بعض المشايخ طالبين منهم أن يختشوا فقالت إحداهن" اللي اختشوا ماتوا" لأن من إختشوا ماتوا حرقا.
ونقول في السودان "الله يشغلك بي قده" و يفهم الأغلبيه بأن القده هي الخشبه التي يعمل بها البناء ولكن المقصود به هو السوط وتقول أغنية السيره "أخوات البنات القده عطشانه وبتدور الرجال البحملوا بطانه"
و نقول "شّدة كرياكو" والحقيقة هي شدة حمار كرياكو لأن كرياكواليوناني كان سكيرا وكان حماره يرجعه للبيت مهما إختلفت الطرق.
و نقول "العين بي حسين" و الحقيقه هي العين بي اليغلب حسين. ود. حسين أحمد حسين كان أول أخصائي في طب العيون وتبعه في نفس المجال الدكتور علي أرباب والدكتور الباقر وآخرين. وشقيق الدكتور حسين كان من أوائل مديري البوليس في السودان . ودكتور حسين إشتهر بأنه مرجع في طب العيون .
نحن نقول قلبى على جناى وقلب جناى على حجر . والصاح قلبى على جناى وقلب جناى علّى ( أنا ) حجر . بتشديد اللام والضمير مستتر .
لله ما أروعك يا د. الأرباب.

الشرك كن قبض كثرة البتبات عيب

اقتل نجس عشان نجيس يخاف

الحاضر ابوه بعرف كلام جده

اليتيم ما بوصوه على البكى

الحماره وِلْدَت استراحت

Quote: الحماره وِلْدَت استراحت[/QUO تحياتى.... اخى الجميعابى ... هذا المثل اقرب للألغاز من الامثال هل تشرحه لنا قليلا ؟

---

Post: #40 Title: Re: أمثال شعبية ودهاريب وناس عوووك وناس قالو... Author: كمال الطيب الجميعابي Date: 06-07-2014, 08:50 PM Parent: #39 الأخ رحمه حبابك ... المثل كنت أسمعه من الوالده رحمة الله عليها عندما تطب من أخواتي أن يقومِن يعوسِن فيتكالِسن تقوم تقولهن الحمارة ولدت استراحت أى حتي الحمارة اذا ولدت دحش أو دحيشة ستقوم بمساعدتها في حمل الاشياء.. لك تحياتي..

---

Post: #41 Title: ناس قالو... Author: كمال الطيب الجميعابي Date: 06-07-2014, 08:59 PM Parent: #40 هنالك مثل مصرى معروف وهو "دا احنا دافننو سوا" وسأروى قصة هذا المثل من منظور جبهجي سوداني: قالوا في إتنين جبهجية قفلت منهم الحكومة الماسورة وفلسوا تفليسه جد ، فكروا في أنه يقلتوا ###### ويدفنوه وويسو عليه بيان يسموه الشيخ كليب. دفنوا ال###### وسو دعاية وطبعا جو الناس من أصقاع البلاد زى بير القضارف. الجبهجيان لمو القروش من الحيران والزوار وفتحو مطاعم ومقاهي وأجّرو العنقريب بي ألف جنيه والمرتبة براها بي ألف جنيه والمرتبة أم ملاية بألفين جنيه والمخده بي ألفين والناموسية وكافة مستلزمات الحياة اليومية بتسعيره ميسره. المهم القروش كترت عندهم بلحيل ، قام واحد قال للتاني أنه ماشي الحج عشان يتحلل وأوصاه على العقاب وأودعه الذى لاتضيع ودائعه. بس الزول ركب الطياره من هنا ، التاني إشتغل ليك في القروش تحويل لماليزيا وفلل وعرّس لي بتو جاب ليها شيله من دبي وقدل فوق عوجته. الجبهجي جا من الحج وبعدما ضربو باب الحوش جير وعملو الكرامة والذى منه وتفرق المباركين، سأل صاحبه بلهفه "أها أخبار مشروعنا شنو؟". صاحبه رد عليه هي آزوووول مشروع شنو؟ دا مشروع فاشل تعريفه مافيه، ياخي الناس ذاتم بطلوا حكاية الصوفية والتمسح بالقبور دى لأنها بدعة وإنو لازم تشوف ليك شغله غيره وخاصة أنك رجعت من الحج. غضب الجبهحي الحاج غضبا شديدا وقاليه "يازول دا كلام شنو البتقول فيه دا" الجبهجي قاليه "وحات الشيخ كليب الكلام القتو ليك دا كلو صاح" الجبهجي الحاج قاليه "ياراااااجل ، دا احنا دافننو سوا!!!!".

---

Post: #42 Title: Re: ناس قالو... Author: رحمه فضل المولى عجك Date: 06-07-2014, 10:47 PM Parent: #41 شركا اخى الجميعابي على الشرح وهذا المثل موجود في منطقتنا وبنفس المعنى ولكن بمفردات او صيغه مختلفه فنحن نقول ..الحمار بجمه وليده...

---

Post: #43 Title: Re: ناس قالو... Author: كمال الطيب الجميعابي Date: 06-09-2014, 02:05 PM Parent: #42 الأخ رحمه عجبني المثل الحمار بجمه وليده الراجل أفجخي بصلة قبل ما يبقي أصلة ويقابله أكتل الدعته قبال تعتا

---

Post: #44 Title: Re: ناس قالو... Author: عبدالعزيز الفاضلابى Date: 06-09-2014, 07:06 PM Parent: #43 Quote: الصابرات روابح وإن رجعن قماح ياخ كتير من الامثال السودانية تدعو الي الاحباط وتثبيط الهمة والبخل. خد عندك: كان غلبك سدَّها وَسِّع قَـ دَّها دار ابوك كان خِرْبَت شِيل لك منها شلية شملة كنيزة تُلاتِيَّ وقــ دَّها رباعي عايرة وادوها سوط. ومايدعو للبخل: الزيت كان ما كَفّي ناس البيت يَحَرَمْ علي الجيران . وكلامنا زاتو ملكلك ـ الواحد يقول ليك: ياجنا ماك مِتْقَدِم لي وراء تجدعنا معاك؟ او يقولك : فلان قام قعد وافعالنا كُتُر: الشافع يبكي نَدُقُّو عشان يسكت نغسل ايدنا بالصابونة بعد الاكل وكان الاولي قبلة وبعده. شكرا علي اتاحتكم لنا هذه الفرصة.

---

Post: #45 Title: Re: ناس قالو... Author: كمال الطيب الجميعابي Date: 06-09-2014, 09:24 PM Parent: #44 أخوى الفاضلابي جيدا جيت وجيد شفناك وجيد شفنا النفوس السايمه روحا معاك ، أها ياخوى جر عنقريبك بي جاى خلني انحدسك، عندنا : مقنع البايتات والبشيل فوق الدبر مابميل والفنجرى أب جيبين ودراج الولايا أخويا المابنقدر سيل الوادى المنحدر ويالفاضلابي يا أخوى نحن ناسا بنضارى من شين جارنا.......وفي وقت الهجعة للضيف بتوقد نارنا ويالفاضلابي ياخوى أنت بالذات أهلك بمرق اكلن قبال ضيوفن يرمو عصيهم ويالفاضلابي ياخوى أمانا مافينا: بتصادم المغارة خيولا بجن بالليل......يا ود ليل البحور يا الجدك المانجيل ونحن من نفر عمروا الارض حيث ما قطنو وشنقلي طوباية تلقي دهباية (كناية عن الأمل) وعندنا مهيره بت الشيخ عبود القدلت شامخة قدام الجيش في نشوه وهي تنشد: الليله إستعدوا وركبوا خيل الكر .... وقدامن عقيدن بالأغر دفر جنياتن العزاز الليله تتندر .... ويا الباشا الغشيم قول لى جدادك كر وعندنا: الخيل عركـــــــــــسن ماقال عدادن كم...فرتاك حافـــــــــــلن ملاي سروجن دم وعندنا: إن وقفت بتخفي الشمعة خاتيه الكبه....وإن قدلت كذا البان أبنسيمن هبا ومن أقوال أبوى الشيخ فرح ود تكتوكا: كان جابت حلو .... بنقسمو بالمحارة وان جابت خسام ولطام ....تيران ومابننضارة الزول كان عزيز....اصلا عزيز فى داره هيييا آزووووول أمانه السودان دا ما فيه حديس. أخوك الجميعابي

---

Post: #46 Title: Re: ناس قالو... Author: رحمه فضل المولى عجك Date: 06-09-2014, 11:20 PM Parent: #45 Quote: الراجل أفجخي بصلة قبل ما يبقي أصلة ويقابله أكتل الدعته قبال تعتا اخى الجميعابي تحياتى ..وحاتك بعض المفردات تحتاج لشرح ... لكن المثل الاول انا فهمت منه كانك تريد ان تقول: اضرب الحديد وهو حامى. اما المثل الثانى فربما يقابله : العلم في الصغر كالنقش على الحجر. والله اعلم . اما هديتى لك فهى مثل بسيط ... الما عجن بيده ما شبع....

---

Post: #49 Title: Re: ناس قالو... Author: كمال الطيب الجميعابي Date: 06-11-2014, 01:47 PM Parent: #46 الراجل كسريه قبال ماتقوى شوكته وصية تقال للعروس ياكافي البلا والدعته والدعت هي الثعبان وتعتا تكبر ويصعب التخلص منها

---

Post: #47 Title: Re: ناس قالو... Author: كمال الطيب الجميعابي Date: 06-10-2014, 11:46 AM Parent: #45 مرفعينين قتلوا اسد ايد على ايد تجدع بعيد

---

Post: #48 Title: Re: ناس قالو... Author: رحمه فضل المولى عجك Date: 06-10-2014, 11:59 AM Parent: #47 الجلابى ولا المجيلب

---

Post: #50 Title: Re: ناس قالو... Author: كمال الطيب الجميعابي Date: 06-11-2014, 01:50 PM Parent: #48 يجي زمن البقلب الصح بموت الشيخ فرح ود تكتوك

---

Post: #51 Title: Re: ناس قالو... Author: عماد الشبلي Date: 06-11-2014, 02:17 PM Parent: #50 ( الماعندو عجلة يركب السخلة ) مثل جديد من تاليفي ..

---

Post: #52 Title: Re: ناس قالو... Author: عماد الشبلي Date: 06-11-2014, 02:17 PM Parent: #50 ( الماعندو عجلة يركب السخلة ) مثل جديد من تاليفي .. سلام يا جمعابي

---

Post: #53 Title: Re: ناس قالو... Author: عبيد الطيب Date: 06-11-2014, 04:08 PM Parent: #52 لحَلّفك كَتَلك والشّكَاك عَاداك سلام أخي كمال الجميعابي والزوار جميعا ... "السَّمَّاك ماحقربك والعطاك خاواك والدَّاير مشيك لا بدَّ يستنَّاك مهيرة المهجقني التصنَّت الكوراك عارة بي هجارها وشقَّت الكَّاك وعن الدَّهاريب... من قومة الدَّهاريب والسِّحاب الشَّاق كيف دهِن العروس دومة اللِّدينو رقاق تسلم ليَّا هجَّام طيبة الأخلاق سريعن طلقة سيدو بلبِّد السَّواق محبتي

---

Post: #54 Title: Re: ناس قالو... Author: عبدالعزيز الفاضلابى Date: 06-11-2014, 05:31 PM Parent: #53 اخونا الجميعابي يازول ردك علي مداخلتي اقنعني تب وكلامك صحيح مفروض نشوف النُّص المليان من (الكوز) وعين الرضا عن كل عيب كليلة ,,, دي العين المفروض نعاين بيها. يارب اصلح حالنا نحن السودانيين. تشكر يازول ياكلس علي رد اخوك للتفاؤل من جديد .

---

Post: #55 Title: Re: ناس قالو... Author: كمال الطيب الجميعابي Date: 06-11-2014, 07:27 PM Parent: #54 الأخ الكريم عماد الشبلي لك التحية أنا مابعرف كيف بتركب السخله وإنت زول يبدو عليك من كتاباتك إنك فنان. جمع وجميع أخوان أشقا وجامع أخوهم ود أبوهم جمع جاب الجموعية وجميع جاب الجميعاب وجامع جاب الجوامعه ، الجمعابي مقصود بها الاساءة ، آمل ألا يكون ذلك قصدك. لك احتراماتي. الجميعابي

---

Post: #56 Title: Re: ناس قالو... Author: كمال الطيب الجميعابي Date: 06-11-2014, 07:52 PM Parent: #55 أخوى الفاضلابي يازول ماشيل هم تب ، عندنا بحيرة بترول تحت الواطه ، والمرة دى مابندق ني ، كل زول إيجي بي كبايتو ، الناس البغرفو ب(الكيزان) موهن فينا. شده وبتزول ... نسأل الله أن يرفع عن بلادنا البلاء. تحياتي من قبل ومن بعد. الجميعابي

---

Post: #57 Title: Re: ناس قالو... Author: كمال الطيب الجميعابي Date: 06-11-2014, 08:05 PM Parent: #56 صاحب المسدار المبدع الأخ عبيد الطيب هازول ماجبت كلاما سمح بلحيل لك التحية العاطره. الجميعابي

---

Post: #58 Title: Re: ناس قالو... Author: كمال الطيب الجميعابي Date: 06-12-2014, 01:37 PM Parent: #52 الدحش وكت إكبر ببقي حمار

---

Post: #59 Title: Re: ناس قالو... Author: كمال الطيب الجميعابي Date: 06-13-2014, 03:57 PM Parent: #58 أها أكان كدى عر قصة مشهورة في قرية مجاورة لنا أن واحد كضاب خلاس ، سمع أنو في زول من الحلة قدم طلب عشان يمشي للعمره ، أدا الموضوع اسبوعين تلاتة وجا راكب حمارو بدرى ، دق الباب وقال لي مرتو فلان إتصل من مكة وقال هو والناس المعاهو طيبين. المره قالت ليه عمرة شنو آيابا ، فلان ياهو دا قاعد جوه القرعة ماوقعت ليه. لوى لجام حماره وقال لها "أها أكان كدى عر". فجرت مثلا

---

Post: #60 Title: Re: ناس قالو... Author: عماد الشبلي Date: 06-13-2014, 04:41 PM Parent: #59 Quote: الجوامعه ، الجمعابي مقصود بها الاساءة ، آمل ألا يكون ذلك قصدك. لك احتراماتي. الجميعابي لا يازول يا كمال الجميعابي مجرد خطا كيوبورد لك اعتذاري الما عندو عجلة كان بوست نشرته هنا برفقة صورة لطفل راكب سخلة فشلت في ارفاق رابطه هنا ارجو الرجوع اليه لو سمح وقتك

---

Post: #61 Title: Re: ناس قالو... Author: عماد الشبلي Date: 06-13-2014, 04:49 PM Parent: #60 http://www.sudaneseonline.com/msg/board/460/msg/1396641056/rn/2.html رابط يوست الماعندو عجلة

---

Post: #62 Title: Re: ناس قالو... Author: أحمد سيداحمد عثمان Date: 06-13-2014, 05:09 PM Parent: #61 ابو القدح بيعرف يعضي اخوه . الطمع ودَّر ما جمع .

---

Post: #63 Title: Re: ناس قالو... Author: كمال الطيب الجميعابي Date: 06-14-2014, 00:53 AM Parent: #60 الأخ عماد الشبيلي حكي لي أحد الأخوان بأنه طُلب من أحد السعوديين أن يمدح السودانين فقال: قلبن أبيض وبزحو ليك تقعد (يبدو أنه قالها بلهجتم) وتعرف هرجهم (مقارنة بالبنقلاديش) إعتذارك مقبول .. حصل لينا كبير الشرف بمعرفتك. لك التحية وكافة التقدير. أخوك/الجميعابي

---

Post: #64 Title: Re: ناس قالو... Author: رحمه فضل المولى عجك Date: 06-14-2014, 01:10 AM Parent: #63 الرجاله شراده ووراده الهجيمه خوفت الدود السمعه ولا طول العمر

---

Post: #65 Title: Re: ناس قالو... Author: كمال الطيب الجميعابي Date: 06-14-2014, 12:44 PM Parent: #64 العارف عزو كلام الناس مابهزو العارف عزو مستريح

---

Post: #66 Title: Re: ناس قالو... Author: كمال الطيب الجميعابي Date: 06-15-2014, 12:26 PM Parent: #65 خوجل خوجل ناس ود آدم .....خوجل خوجل ناس ودشبيلي (يقال للشخص الحوام)

---

Post: #67 Title: Re: ناس قالو... Author: بدرالدين بابكر مصطفى Date: 06-16-2014, 06:38 AM Parent: #66 موت الحمار بخت الكــــلب رازة ونطاحة وفي رواية أخرى : غارزة ونطاحة شوف العين ما كتل الغزال تحياتي لكم جميعاً مثنى وثلاث ورباع

---

Post: #68 Title: Re: ناس قالو... Author: كمال الطيب الجميعابي Date: 06-16-2014, 08:18 PM Parent: #67 الأخ الكريم بدر الدين لك التحية وشكرا على المشاركه لم أفهم المثل "موت الحمار بخت ال ######" آمل الايضاح

---

Post: #69 Title: Re: ناس قالو... Author: بدرالدين بابكر مصطفى Date: 06-17-2014, 07:37 AM Parent: #68 عدلتها يا كمال المشكلة إنو مصحح بكري دا فاكرنا قليلين أدب تحياتي

---

Post: #70 Title: Re: ناس قالو... Author: كمال الطيب الجميعابي Date: 06-17-2014, 11:49 PM Parent: #69 الأخ بدر الدين لك الشكر على التعديل مع التحية (وحاشاك سوء الأدب) لحقن بقر ود فرح ويقابله لحقن أمات طه وود فرح واحد من منطقتنا سافر الى الصعيد ليشترى بقر وأجر واحد عشان يسوق البقر وهو ركب القطر ورجع البلد الزول نام بالبقر ، فكان كلما سأل عنها يقول (جايه في الطريق) فصار مثلا يقال لحقن بقر ود فرح

---

Post: #71 Title: Re: ناس قالو... Author: رحمه فضل المولى عجك Date: 06-17-2014, 11:56 PM Parent: #70 النيه كن بدت ما بنفع التحنيس والطير كن فقع هلبت بقوم له ريش ولد السندالى بموت بلا حراب وولد الفكى بموت بلا حجاب البدور الدواس ما بيابه الطعن

---

Post: #72 Title: Re: ناس قالو... Author: بدرالدين بابكر مصطفى Date: 06-18-2014, 06:39 AM Parent: #71 يبخروا فيها وهي تضرط يهدوا فيها من الانطلاقة بقت تبيت برة (أمثال الفشاحة) مثل مصري: كييف التراب بيشتري معلقة (معلئة) المعنى إنو أي زول بحاول يجيب عدة شغل للحاجة البريدا الزول البنسطل بالتراب يشتري شنو غير المعلقة، لا ورق ولا سجاير أحمر

---

Post: #73 Title: Re: ناس قالو... Author: كمال الطيب الجميعابي Date: 06-19-2014, 01:40 PM Parent: #71 العصا أمان من (الكـــــــلـــــــــب) والسكين أمان من السلب وفكة الريق مسمار القلب والبختا الاجواد بنغلب من أقوال الشيخ فرح ود تكتوك رحمه الله

---

Post: #74 Title: Re: ناس قالو... Author: كمال الطيب الجميعابي Date: 06-21-2014, 08:42 AM Parent: #73 الببارى الجداد بوديه الدفيس

---

Post: #75 Title: Re: ناس قالو... Author: كمال الطيب الجميعابي Date: 06-24-2014, 02:52 AM Parent: #74 زى الكرب بلا خناق

---

Post: #76 Title: Re: ناس قالو... Author: كمال الطيب الجميعابي Date: 06-25-2014, 01:16 AM Parent: #75 شكارتا دلاكتا ... خالتا وعمتا

---

Post: #77 Title: Re: ناس قالو... Author: كمال الطيب الجميعابي Date: 06-26-2014, 00:35 AM Parent: #76 قصير متل العصير

---

Post: #78 Title: خير الكلام وخير الهدى Author: كمال الطيب الجميعابي Date: 06-28-2014, 01:44 AM Parent: #77 نسأل الله أن يتقبل صيامكم وقيامكم وركوعكم ويهدى سركم ويجعلكم رفقاء بأهلكم واصحابكم ومن خالفكم في الرأى ماتنسونا من صالح الدعاء الجميعابي

---

Post: #79 Title: Re: خير الكلام وخير الهدى Author: كمال الطيب الجميعابي Date: 06-29-2014, 09:59 PM Parent: #78 شكارتا دلاكتا امها وخالتا