فيديو اوبريت "الليلة يا قروية متين ازو الخرطوم"....للناس القدام

الشكر للاخ بكري البكري الذى قام برفع الفيديو على اليوتيوب

Quote: سيـــــــــــــــــاحه في أعمال ألفرقه كان أول عمل لفرقة زهرات توتي خلال الثمانينات كان العمل بعنوان القرويه كتبه ألاستاذ الشيخ عمر الضو ولحنه الاستاذ عمر البشير وكتب فيه عمنا الشيخ ** ** ** ** ** ** ** ألقرويه :- يا ربي متين أشوف ألخرطوم قالو لي في الخرطوم جنينة البلديه وحدثوني وقالو الفسحه بالعصريه وقالو لي كان شفتي البت تسوق عربيه أحييييييييييييييا وتصرف الماهيه ** ** ** ** ** ** ** ألمدنيه:- لا لا الليله يا قرويه وانتي يا قرويه ما تغرك المدنيه وانتي ماك منسيه والله انتي غنيه بزراعتك المطريه وبهايمك المسعيه ** ** ** ** ** ** ** ألقرويه:- ياربي متين أشوف الخرطوم قالو لي في الخرطوم البت بمشو حديثها ودخلوها الجامعه ووظفوها رئيسه وقالو لي كان دارت تقوم تنقي عريسها الدبله الدبله تمشي تقيسها ** ** ** ** ** ** ** ألمدنيه:- لا لا الليله يا قرويه منو بلاك يتحمل يمسك الطوريه منو بلاك يعمل يبني ميزانيه منو بلاك يمووووول وزارة الماليه ** ** ** ** ** ** ** ألقرويه :- ياربي متين أشوف الخرطوم قالو لي في الخرطوم البدره والمنكير ويا حلاة البت يوم تمشي للكوفير أحييييييييييييا متين اشوف ألكوفير ** ** ** ** ** ** ** ألمدنيه:- لا لا الليله يا قرويه انتي يا قرويه بالكرم معروفه وفي هبابيب الليل تقوم تعشي ضيوفها وانتي يا قرويه بالقيم موصوفها ** ** ** ** ** ** ** ** ** ** ** ** ** ** ** ** ** ** ** ** ** وهذا العمل سجل ع التلفزيون عندما كان بالأبيض وأسود وقد أخرجه ألمخرج التلفزيوني منير عبد الوهاب . شيكا

https://ar-ar.facebook.com/permalink.php?story_fbid=305316152857438andid=109405359115186

شكرا
احمد سيد احمد
و شكرا بكري ابوبكر

زمن..!

طه جعفر

كان الاخوان في 2004 في سوادنيزاونلاين تنالوا نفس الموضوع والظاهر من الفيديو الفوق دا انه الشريط تعرض للتلف لأنه في بداية التمنيات بتذكر انه شريط الفيديو عند بث النشيد بيجي مقطع وفي الرابط أدنا يوجد عضو اسمه طارق ارفق النشيد (صوت فقط) ولكن الرابط الان لا يعمل - نرجو من الاخ طارق Tariq أو أي من الأخوان أن يقوم بتنزيل الملف مرة أخرى ويا ريت اللي معاه النشيد كاملا (صوت وصورة) ينزله لينا ويكون ما قصر ............ ودا الرابط في 2004 : معهد نوبل للسلام يعد لائحة أولية بمرشحين لجوائزه - التحية لزهرات توتي وللاخ احمد سيد احمد - والاخ بكري البكري ........

تعديل:

حتى نسخ الرابط الظاهر فيه مشكلة ودا الرابط بطريقة أخرى لا لا يا قروية ما عارف يظبط ولا لا !!!

قبل شهر استضفنا في جامعة الاحفاد للبنات بأمدرمان فرقة الاستاذ/ طارق الامين (الهيلاهوب) وغنت الفرقة العديد من الاغاني التراثية والفلكلورية من جميع انحاء السودان شباب يمتازو باصوات عجيبة وحيوية في الاداء وكان طارق الامين حضور بنفسه يقف علي كل صغيرة وكبيرة وبالجد زهلت تماما عندما قامو بأداء أوبريت يا قروية بالجد لمن (شعرت جلدي ######ت) وحسيت بمرارة وانا اري هذه الاعمال القديمة التي تصلح لكل زمان ومكان وقد سئلت طارق الامين اذا كان لديه تسجيل لهذا الاوبريت فوعدني خيرا (والله يا جماعة اداء راقي بصورة مبالغ فيها) ياريت طارق الامين يتحفنا بيهو هنا

Quote: Ibrahim Adam · يعمل لدى ‏‎University of Juba, Sudan‎‏ كنت متابع في القناة التشادية وجدت هذا الاوبريت يغني مع تغير طفيف فعرفت كم كان عظيم هذا الوطن السودان كنا منار محيطنا كل الدول كانت تستمع لموسيقانا و تغتدي بنا لكن بعد الخراب و التشويه الذي مورس علينا بواسطة الطغمة المتاسلمة و اصبنا بالفقر الثقافي لاحظ ابسط شي زفة العروس تتم بموسيي ليس فيها اي شي يمت للسودان بصلة, اكيد اكيد سوف يرجع السودان افضل مما كان. عاش السودان وطن حر و للاحرار رد · · ‏12 مايو‏، الساعة ‏01:17 مساءً‏ المكوّن الإضافي الاجتماعي لفيس بوك

مشاركة من الاخ ابراهيم آدم من الفيس بوك

هذا الاوبريت الخالد اثبت ان الابداع يحتاج في المقام الاول الي امكانات ابداعية اكثر من مادية
بساطة الاشياءومكياج المنفذات لم يمنع ان يخلد هذا العمل في ذاكرتنا طوال هذه السنين
هو من الاشياء التي ظلت تحفزنا نحو الحياة والانتاج،،،بذر فينا بذور الخيال المبدع منذ نعومة اظافرنا
يا يريت لو نقدر نشوف الموءلف والملحن عشان نقدر نعمل ليهم تكريم
وكمان عرفت ان موءلف هذا العمل يعاني من مشاكل في النظر
التحية لكل مبدعي بلادي الذين يعملون في صمت وحب للوطن وانسانه

فعلا نحن فى حاجه الى امكانات ابداعيه اكتر من ماديه ...


تحياتي