Post: #1
Title: آآآآآآى شكلو فى مؤامرة !!
Author: نعمات عماد
Date: 04-15-2014, 11:13 PM
أصلو ما قاعدة تحصل لينا حاجات كويسة
عكس دول تانية اللهم لا حسد و لا ارتياب
|
Post: #2
Title: Re: آآآآآآى شكلو فى مؤامرة !!
Author: نعمات عماد
Date: 04-15-2014, 11:18 PM
Parent: #1
الجو عندنا دايما صيف
فى بلدان حوالينا عندهم عدة فصول حلوة
اللهم لا اعتراض !
|
Post: #3
Title: Re: آآآآآآى شكلو فى مؤامرة !!
Author: نعمات عماد
Date: 04-15-2014, 11:26 PM
Parent: #2
مثلا قطر
أمهلوها 4 شهور نحن ولا 4 أيام ما أدونا ليها
زاتوا ما فى اى جهة مهتمة بامهالنا
يمهل و لا يهمل !
|
Post: #5
Title: Re: آآآآآآى شكلو فى مؤامرة !!
Author: نعمات عماد
Date: 04-15-2014, 11:34 PM
Parent: #3
واقفة على عصباتها.....الأمم المتحدة عشان جزيرة القرم.
و مصر دى غالباهم ؟
حلايب سودانية ..
|
Post: #6
Title: Re: آآآآآآى شكلو فى مؤامرة !!
Author: cantona_1
Date: 04-15-2014, 11:35 PM
Parent: #3
يا نعمات يا بتي سلام مربع
نحن شعب (مخسوس) عشان كدا حاجاتنا كلها (مخسوسة).
الجو 11 شهر صيف وشهر واحد رمضان.
عندنا أطول وأنقي نهر والمي في الخرتوم ومدني قاطع.
عندنا السد والكهرباء قاطعة 25 ساعة في اليوم
عندنا 124 مليون حيوان وكيلو اللحم أغلى من كل دول العالم. واللبن أغلى من سعره في لندن.
عندنا 200 مليون فدان أراضي زراعية ونيلين وأمطار 6 شهور في العام ونستورد البصل من الأردن!!
كفاك ولا أزيدك؟ مش قلت ليك نحن شعب (مخسوس)؟
تحياتي
كبـّاشي الصـّـافي
.
|
Post: #4
Title: Re: آآآآآآى شكلو فى مؤامرة !!
Author: Abureesh
Date: 04-15-2014, 11:33 PM
Parent: #2
شفتى عندنا هنا في نيويورك...
الجو ربيـع والصباح كانت في مطـرة خفيفـة.. رزاز.. توقفت ولكن السحاب ما زالت مرابطـة.. ودرجة الحرارة حوالى 22، الجو برة نضيف، والنسيـــم البارد يملأ الرئـة غصبا عن الزول
ويطرح الوجـه وينشط العينين..
|
Post: #8
Title: Re: آآآآآآى شكلو فى مؤامرة !!
Author: نعمات عماد
Date: 04-16-2014, 00:00 AM
Parent: #4
السعادة قسم الا الله بدى الجنة
أملنا فى الاحتباس الحرارى يغير جونا
حتى نلحق الامريكان
مبروك عليكم انفراج الاسارير !
تقديرى
|
Post: #7
Title: Re: آآآآآآى شكلو فى مؤامرة !!
Author: نعمات عماد
Date: 04-15-2014, 11:46 PM
Parent: #1
سلام يا كانتونا يا ابنى
مساك الله بالخير
عليك الله زيد فى الخسوسيات دى لمن نعرف حاجة !
الكتاحات عاميانا مرة واحدة !
سلام لاهلك الانجليزيين
تحياتى
|
Post: #10
Title: Re: آآآآآآى شكلو فى مؤامرة !!
Author: امجد الجميعابى
Date: 04-16-2014, 00:09 AM
Parent: #7
عندنا علماء و مفكرين و اساتذة
و حاكمنا عمر البشير
شفتوا حكمة الله
|
Post: #12
Title: Re: آآآآآآى شكلو فى مؤامرة !!
Author: نعمات عماد
Date: 04-16-2014, 00:16 AM
Parent: #10
يا ابنى فى حكمة بتقول :
الترابى دى فى خشمنى !
|
Post: #11
Title: Re: آآآآآآى شكلو فى مؤامرة !!
Author: فردوس جامع
Date: 04-16-2014, 00:16 AM
Parent: #7
سلام يا نعمات و مرحب بيك....
Quote: سلام يا كانتونا يا ابنى
مساك الله بالخير
|
ضحكت لما بكيت...
أصلو جات في بالي قبل شوية و أنا بقرأ بوست هشام آدم
قربت أرد و أقول ليه يا إبني دي بس إنشغلت و نسيت ... أها لما قريت كلامك ده ضحكني شديد
خصوصاً الفارق العمري بين المنادي و المنادى ...
بركة الله جوكم يتصلح على طول و أسراريكم تنفرج على طول.
جوّنا صاري وشو (مطرة و برد )
تحياتي
|
Post: #15
Title: Re: آآآآآآى شكلو فى مؤامرة !!
Author: نعمات عماد
Date: 04-16-2014, 00:36 AM
Parent: #11
اهليين با فردوس يا بنتى
انشالله ترحب بيك السعادة
الله لا يجيب فوارق و لا فوارغ و كلهم ابنائى و بناتى
آآميييييين و شكرا لدعواتك الطيبة
الجو المكفهر ده انجليزى و لا ايه ؟
يا ريت لو الشمس بتتعبأ فى قزايز و تترسل .
كونى بخير
|
Post: #31
Title: Re: آآآآآآى شكلو فى مؤامرة !!
Author: cantona_1
Date: 04-16-2014, 12:22 PM
Parent: #11
| Quote: خصوصاً الفارق العمري بين المنادي و المنادى ... |
سلام مربع يا فردوس جامع يا بتي
طبعاً عمِّك شاب 32 سنة غير العطلات والجُمع.. بس العطلات والجُمع بتساوي كم سنة .. دي متروكة لحصافتك.
وكما قلت نحن شعب (مخسوس) ومن خاسياتنا خسوسية العُمر. أطال الله عمرك ومتعك بالصحة والعافية.
تحياتي
كبـّاشي الصـّـافي
.
|
Post: #13
Title: Re: آآآآآآى شكلو فى مؤامرة !!
Author: عبدالعزيز عثمان
Date: 04-16-2014, 00:20 AM
Parent: #7
هن الانكليزييين ديل زاتن ماهن المغلب...
لا خلونا لي ابونا الخليفة ندلي راتبنا ونكسر عناقريبنا
وله صبرو معانا شوية لمن نتعلم صبرن...
لكلكوها وفكوها وطارو
خلونا شقين ضلفة
وحرابتنا واحدين ايمانن ضعيف قالو الا عيسي
ارح يا كانتونا اخوي الليلة زانده البعوض انونني الكرشي حمانا النوم
ارح قبال الشمش تمرق تجي وردية الضبان..
|
Post: #21
Title: Re: آآآآآآى شكلو فى مؤامرة !!
Author: نعمات عماد
Date: 04-16-2014, 10:15 AM
Parent: #13
سلام يا عبد العزيز با ابنى
الانجليز اعتبروا أفريقبا أضخم حديقة حيوانات فى العالم
استولوا عليها و ختو الذئب جنب الشاة وو الأسد جنب التور
والكدايس جنب ال هوهو ......الخ
ولن تنتهى الفوضى الخلاقة بالهين .
تشرفنا يا ابو القصاصين
تحياتى
|
Post: #9
Title: Re: آآآآآآى شكلو فى مؤامرة !!
Author: نعمات عماد
Date: 04-16-2014, 00:08 AM
Parent: #1
كل المحاورات فى الدنيا بحددوا ليها زمن يحقق أهدافها
نحن ولا قالو لينا كم سنة ؟
ما يمكن الونسة تجر....
|
Post: #14
Title: Re: آآآآآآى شكلو فى مؤامرة !!
Author: قصي محمد عبدالله
Date: 04-16-2014, 00:34 AM
Parent: #9
سلام لجميع المتداخلين.
نكورك في السوق مع الغرباء من غلاء الأسعار،
وننصح جيراننا وأصدقائنا بتخزين البضاعة لحدي مالسوق يرتفع!!!!!!!!
يعني:
كل واحد بكورك في واحد، وكل واحد بكورك فيهو واحد!
كأنها كما تدن تدان!!!!!!!!!!!!!!!!!!!!!!
نسال الله سترة الحال للجميع
|
Post: #16
Title: Re: آآآآآآى شكلو فى مؤامرة !!
Author: فردوس جامع
Date: 04-16-2014, 00:46 AM
Parent: #14
Quote:
الجو المكفهر ده انجليزى و لا ايه ؟
يا ريت لو الشمس بتتعبأ فى قزايز و تترسل . |
أمريكي لكن شكلو مشترك في المؤامرة... سي آي أيه :)
|
Post: #24
Title: Re: آآآآآآى شكلو فى مؤامرة !!
Author: نعمات عماد
Date: 04-16-2014, 10:58 AM
Parent: #16
سلام يا فردوس
يكفينا شر السى آى ايه
و اخواتها وبنات عمها و صاحباتها وجاراتها...و...و
|
Post: #32
Title: Re: آآآآآآى شكلو فى مؤامرة !!
Author: cantona_1
Date: 04-16-2014, 12:27 PM
Parent: #16
سلام مربع يا فردوس جامع يا بتي
جو العنقليز اليومين دول جو فول ساكت. شمش ودرجة حرارة طاشرات .. وهواء مافي .. لكن يوم كدا كانت الغمامة حايمة قالوا دي كتّاحة جايانا من دول الديزرت في نورث أفريكا. برضو عرب حاسدين برسلوا الكتّاحة.
تحياتي
كبـّاشي الصـّـافي
.
|
Post: #23
Title: Re: آآآآآآى شكلو فى مؤامرة !!
Author: نعمات عماد
Date: 04-16-2014, 10:51 AM
Parent: #14
ابنى قصى
سلام واحترام
بيوت كتيرة فى السودان يتعايش فيها المتكاسل عن الصلاة مع المداوم
على المسجد يتناصحو بالحسنى ساترين حالهم برا بوالديهم .
باختلافتنا الكتيرة ممكن بهدوء نتفاعل ونتبادل النصائح الى يوم الدين .
كلامى لنفسى ولكل هن همه سودانى
احى نشاطك ما شاءالله
تقديرى
|
Post: #36
Title: Re: آآآآآآى شكلو فى مؤامرة !!
Author: قصي محمد عبدالله
Date: 04-16-2014, 01:08 PM
Parent: #23
تحياتي وتقديري
| Quote: باختلافتنا الكتيرة ممكن بهدوء نتفاعل ونتبادل النصائح الى يوم الدين . |
أكيد ما في شك،
الكل يعرف كل شئ،، ومن لا يعرف يستطيع أن يعرف من خلال البحث والتحري ،
هنا فقط يتم تنشيط بعض المواضيع والنقاش حولها لتصحيح مفاهيمنا بشأنها
حتى تثبت أكثر في العقول بصورة أفضل، والذي لا يعجبنا، بلا شك يعجبنا ضده.
كل ذلك من أجل السمو بالمفاهيم والقيم السمحة.
تحياتي وتقديري
|
Post: #17
Title: Re: آآآآآآى شكلو فى مؤامرة !!
Author: نعمات عماد
Date: 04-16-2014, 00:49 AM
Parent: #1
ابنائى الاعزاء عبد العزيز عثمان و قصى محمد عبد الله ممكن أرد الصباح ؟
النوم سلطان
شاكرة مروركم البهى
|
Post: #18
Title: Re: آآآآآآى شكلو فى مؤامرة !!
Author: قصي محمد عبدالله
Date: 04-16-2014, 01:10 AM
Parent: #17
صباح أي دولة؟
|
Post: #26
Title: Re: آآآآآآى شكلو فى مؤامرة !!
Author: نعمات عماد
Date: 04-16-2014, 11:15 AM
Parent: #18
Quote: and#213;and#200;and#199;and#205; and#195;and#237; and#207;and#230;and#225;and#201;and#191;[/Q[B
] ما فهمت السؤال
صباح أى دولة ؟
|
Post: #38
Title: Re: آآآآآآى شكلو فى مؤامرة !!
Author: قصي محمد عبدالله
Date: 04-16-2014, 01:44 PM
Parent: #26
"ما فهمت السؤال
صباح أى دولة ؟"
هههههههه
صباح أمريكا ممكن يكون ليل دولة أخرى ونهار بلد آخر.
الأعضاء منتشرين حول العالم، واحدين مساهرين وواحدين في ذات الوقت قايلين.
تحياتي
|
Post: #19
Title: Re: آآآآآآى شكلو فى مؤامرة !!
Author: Abureesh
Date: 04-16-2014, 01:27 AM
Parent: #17
الأخت نعمات،
طيب خلينا في الجــد.. وأكيـد تابعتى بوستات كوستاوى الكان يشتكى من الجليد وملا المنبر بالصور.. ونحن ما قصرنا برضو.. يا دوب طلعنا من شتاء جهنم طويل
الواحد مما تصبح يلبس كل حاجة عنده في الدولاب. ولو مرق يمشى زى السكران عشان ما يتزحلق ويقع.. خصوصا كبار السن الزينا ما يكسروا ترقوة واللا مخروقـة..
عشان كدا لما نسمع عدم شكركم دا بعد الله ادانا في السودان الشمس المشرقـة.. وبرضو محتجين..
أعجب لناس.. الطاقـة الشمسيـة تسيح العضام بعد تسوى الجلد باربكيو.. ورغم دا يشتروا البنزين من السوق الأسود عشان يشغلوا بيه جنريتر..
ياخ لوح واحد من الخلايا الشمسيـة يولع البيت اليوم كله ولعشرين سنة.. كهرباء مجانية ونظيفـة.. إتحركوا ياخ.. إتلحلحـوا
|
Post: #20
Title: Re: آآآآآآى شكلو فى مؤامرة !!
Author: اخلاص عبدالرحمن المشرف
Date: 04-16-2014, 03:07 AM
Parent: #19
الحظ والمؤامرة ولا عجز الانسان
الخشب مالئ البلد سوو دخان وشاف وطلح الامريكان سوو بيوت
انهار تفيض وتتدفق وانبوب لابيض ود سعد ولا الشرق ما مدينا ليبيا سوتو نهر صناعي اخضر
حرقنا الجنوب وعمرنا ماليزيا
ثورتين (اكتوبر وابريل ) وهبه وحاكمنا فكر حسن البنا مصر سنه واحدة وفلعتهم لمن عرفو حاجة
والله المتأمرين يانا نحنا
|
Post: #28
Title: Re: آآآآآآى شكلو فى مؤامرة !!
Author: نعمات عماد
Date: 04-16-2014, 11:33 AM
Parent: #20
بنتى العزيزة جدا اخلاص
فى ناس عندها حساسية من الخشب المحروق !
تفتكرى دخان الحطب على الجلد + تسييح العظام حق ابوريش
بيعمل امراض ؟
يا اخلاص باقى المداخلة اذاكرليهو وارجع .
معا يا بناتنا للاستفادة الحضارية من الخشب .
شكرى
|
Post: #25
Title: Re: آآآآآآى شكلو فى مؤامرة !!
Author: نعمات عماد
Date: 04-16-2014, 11:08 AM
Parent: #19
سلام با ابنى ابوريش
قبل ما نتحركو على الصناعات التقيلة...
موش نعالجو سييح العظام و عطرابة الجلد ؟
ولنا عودة للرد على باقى المداخلة
عافية انشالله
|
Post: #22
Title: Re: آآآآآآى شكلو فى مؤامرة !!
Author: نعمات عماد
Date: 04-16-2014, 10:28 AM
Parent: #1
العالم عندهم الشعب مقسم حكومة و معارضة ..
نحن عندنا الشعب بى هنا ...و الباقين بى هناك مع بعض !
|
Post: #27
Title: Re: آآآآآآى شكلو فى مؤامرة !!
Author: صلاح جادات
Date: 04-16-2014, 11:29 AM
Parent: #22
الاخت نعمات لك التحية
واحي الاخت اخلاص علي هذه المداخلة الاوسكار
Quote: الحظ والمؤامرة ولا عجز الانسان
الخشب مالئ البلد سوو دخان وشاف وطلح الامريكان سوو بيوت
انهار تفيض وتتدفق وانبوب لابيض ود سعد ولا الشرق ما مدينا ليبيا سوتو نهر صناعي اخضر
حرقنا الجنوب وعمرنا ماليزيا |
|
Post: #29
Title: Re: آآآآآآى شكلو فى مؤامرة !!
Author: Asim Fageary
Date: 04-16-2014, 11:40 AM
Parent: #27
سلام مربع لكم ..... نعمات وضيوفها الكرام
ياخي دا بوست روعة لم أنتبه له إلا الآن
قلتي يا نعمات: الناس كلهم عندهم حكومة ومعارضة
ونحنا عندنا شعب هنا .. وحكومة ومعارضة بهناك
يعني التغريد عندنا خارج السرب
نحنا من ما لخبطنا موسيقانا وبقينا نسمع سلم سباعي من خلال الثقافة المتسللة عبر شاشات التلفاز والمواقع الإلكترونية
صارت الآذان لا تفهم السلم الخماسي !
|
Post: #40
Title: Re: آآآآآآى شكلو فى مؤامرة !!
Author: نعمات عماد
Date: 04-16-2014, 02:14 PM
Parent: #29
سلام ابنى العزيز عاصم
مشاغل اخرتني عن الرد ومرحب بيك في بوستك وبوست كباشى وقصى
والمنبر اجمعين نرجوكم اكتبوا وردوا على بعض انا سعيدة بوجودكم
اكل العيش بيعلم السباعى احسن ما فى الخماسى
ماعندو عشرة بلدي .
شاكرة و مقدرة
|
Post: #42
Title: Re: آآآآآآى شكلو فى مؤامرة !!
Author: نعمات عماد
Date: 04-16-2014, 02:26 PM
Parent: #40
سلام اكتب من الهاتف لذا اعذروا لخبطة الرد
كباشى عافية منك آبوي
العالم برجع ايك بعد يترجموا لى شوية حاجات
احييك على اشارتك للمتآمر الاول الفساد........
مشكورين
|
Post: #43
Title: Re: آآآآآآى شكلو فى مؤامرة !!
Author: نعمات عماد
Date: 04-16-2014, 02:31 PM
Parent: #42
دول كتيرة عندها هوية
نحن الافارقة ما جايبين خبرنا
والعرب ما فاهميننا
و نحن لا فاهمين و لا جايبين خبر روحنا
|
Post: #30
Title: Re: آآآآآآى شكلو فى مؤامرة !!
Author: نعمات عماد
Date: 04-16-2014, 11:51 AM
Parent: #1
سلام ابنى صلاح جادات
تحية و احترام
فعلا مداخلة اوسكار لى عودة لها انشالله .
احى بوستاتك واطالب باوسكار لك
تشكر على المرور
تقديرى
|
Post: #33
Title: Re: آآآآآآى شكلو فى مؤامرة !!
Author: حسن ادم محمد العالم
Date: 04-16-2014, 12:33 PM
Parent: #30
نعمات وكل الشباب سلام
رايك شنو فينا نحن الحبش
الجو جميل والناس جميلة و روحها جميلة نصفنا مسيحين والنصف الاخر مسلمين الداير يمشي الكنسية يمشي والداير المسجد يمشي وحكومتنا فيدرالية حقيقية اي حكومة تعمل الشي الدايروه دون تدخل المركز
وليالي اديس عالم تاني وسكة حديد من اديس لجيبوتي وبالمناسبة دي بداية السنة نفتتح ميترو اديس زي ميترو دبي ومافي حد احسن من حد ولو حابة
تسمعي اغاني سودانية علي قفا من يشيل كل المقاهي فيها حبش يغنوا سوداني واي زول عندو مشكلة بنحلها ليهو كان ناس المنطقتين وناس دارفور
لو فشلتوا في موضوع الوثبة ما عليك برضو بنعمل ليكم منبر هنا
بالله دايرين شنو وبالمناسبة كل الفنادق العالمية موجودة هنا لزوم الاجتماعات والمؤتمرات والسياحة ولو حابة تجي زيارة سياحيةعندنا منتجعات كروفتو
وشاشامني وبابولية واوس وكمان معظم مدننا مربوطة بمطارات وكمان بنعمل سد النهضة ونبيع ليكم كهرباء كل دة ومواردنا شحيخة بس ما عندنا فساد
واي زول يلعب بنقطع ليهو راسو ومافي كبير علي القانون
|
Post: #34
Title: Re: آآآآآآى شكلو فى مؤامرة !!
Author: cantona_1
Date: 04-16-2014, 12:37 PM
Parent: #33
يا نعمات يا بتِّي الخسوسيات كتيرة..
مش عندنا الزول الأسود بقولوا عليهو أخضر؟
وملاح الأسود بسموه البراطيش يا ناس داخليات الثانويات في وبعد زمن الإستعمار؟
عندنا تمن دستة المنقة في خرتوم أحمد يساوي تمن كرتونة سعة 10 دست في حلتنا أم طرقاً عراض.
عندنا تمن صحن الفول في الخرتوم يعادل تمن ربع الفول في حلفا الجديدة.
عندنا تمن كيلو السمك في الخرتوم يساوي تمن القفة في كوستي.
ما عندنا (تختيت) شوال البصل في الصيف ب50 جنيه وفي الشتاء ب500 جنيه.
عندنا ترزية من زمن المهدية وبنستورد الجلاليب من الصين.
لبسنا الطاقية من زمن الطاقية أم قرنين وبنستورد الطواقي من الشرق الأقصى.
الحاجات المخسوسة كتيرة ...
من تطلع من جبل أولياء وحتى ربك بتقابلك كم شجرة ظليلة؟ ماء البحر في متناول اليد ولا تشجير، وتقولوا الدنيا سخانة. الشجر يصنع ثاني أوكسيد الكربون الذي يمتص الحرارة من الجو ويلطِّفه.
البحر على مرمى حجر من استاد الخرطوم والنجيلة في الإستاد صناعية!!!
تحياتي
كبـّاشي الصـّـافي
.
|
Post: #35
Title: Re: آآآآآآى شكلو فى مؤامرة !!
Author: cantona_1
Date: 04-16-2014, 12:46 PM
Parent: #34
أها دي فردوس بت جامع قالت: ضحكت لمن بكيت!!
مش دي خاسية خاسة بالشعب السوداني؟
قول لواحد عنقليزي: I laughed until I cried خليهو يفهمك قلت شنو؟
يعني فردوس بتتكلم ساكت .. بالله شفتوا ليكم زول بتكلم ساكت؟ ينوم ساكت. يمشي ساكت. يدخل ساكت . ياكل ساكت. يصلي ساكت. لكن بتكلم ساكت؟؟؟ دي مش مخسوسة للشعب السوداني؟
الناس كلها بتاكل بفمها إلا نحن السودانيين بناكل بخشومنا.
تحياتي
كبـّاشي الصـّـافي
.
|
Post: #37
Title: Re: آآآآآآى شكلو فى مؤامرة !!
Author: Asim Fageary
Date: 04-16-2014, 01:15 PM
Parent: #35
والله يا كباش الصافي سربعت بالبوست دا جنس سربعة يظهر إنه وقع ليك في جرح
أها يا كباشي يجيك زول يقول ليك: أنا قاعد أمشي
تخيل إنه (قاعد) وماشي كمان بتتفهم إنه على كرسي مدولب
غايتو يا كباشي الإهداء ليك: (رب بوست لك لم تكتبه يدك)
|
Post: #39
Title: Re: آآآآآآى شكلو فى مؤامرة !!
Author: د.محمد حسن
Date: 04-16-2014, 02:00 PM
Parent: #37
قبلكم وقبالكم
عين ما صلت على النبي
يا كافرة يا نصرانية
|
Post: #41
Title: Re: آآآآآآى شكلو فى مؤامرة !!
Author: Abureesh
Date: 04-16-2014, 02:22 PM
Parent: #39
Quote:
سلام با ابنى ابوريش
قبل ما نتحركو على الصناعات التقيلة...
موش نعالجو سييح العظام و عطرابة الجلد ؟
|
كالتى نيمات.. إنتـا من كردفان والله سنـو؟
هو تاقـة بتاع سمس دا ما سناءة تقيل.. الواه كفيف جدا.. قدر أنقريب بس..
بتلتمية دولار تشترى لوه وماهو بتاريـة وكمان ماهو تانى هاجة قدر رادى يتكلم دا.. اشان يانى يهول كهربا بتاء شمس لكهربا بتاء بيت..
بالنهار لوه يشتقل بالليل بتارية يشتقل... سفتى كيف؟ تانى كلاس مافى كهربا قتــأ، مافى أداد زاتو..
|
Post: #44
Title: Re: آآآآآآى شكلو فى مؤامرة !!
Author: نعمات عماد
Date: 04-16-2014, 02:45 PM
Parent: #39
سلام دكتور محمد حسن
مرحب بيك فى بوستك وبوست اخوانك
حبس حابس والاذكار لسه ما قمت عليهن تحياتى
|
Post: #45
Title: Re: آآآآآآى شكلو فى مؤامرة !!
Author: نعمات عماد
Date: 04-16-2014, 02:53 PM
Parent: #44
ابوريش يا ابنى
افكار مبالغة زى لهجتك
لكن الالواح الرخاس ديل داخلات فى
المقاطعة ؟وكيف نعدى بيهن من الحيطة ؟
حيطة الرسوم الكتيرة
|
Post: #46
Title: Re: آآآآآآى شكلو فى مؤامرة !!
Author: نعمات عماد
Date: 04-16-2014, 03:03 PM
Parent: #1
نحن اولاد نديهة ....و بتمش فينا النجيهة
سلة العالم للغذاء
سلة العالم للغذاء
لمن فضينا من الغذاء ومن العالم المتحضر
|
Post: #47
Title: Re: آآآآآآى شكلو فى مؤامرة !!
Author: نعمات عماد
Date: 04-16-2014, 03:35 PM
Parent: #46
سلام الابن كباشى والقروب
ادونا فاصلين تلاتة الى ان نعود
من امكنة فى خصام مع الانترنت
دمتم
|
Post: #48
Title: Re: آآآآآآى شكلو فى مؤامرة !!
Author: نعمات عماد
Date: 04-16-2014, 04:05 PM
Parent: #46
salam Osama facebook
I love sudan so much to the extent that
I want to point out the injustices, the disasters
I can't shout out loud, so I have to be sarcastic!
|
Post: #49
Title: Re: آآآآآآى شكلو فى مؤامرة !!
Author: نعمات عماد
Date: 04-16-2014, 04:05 PM
Parent: #1
نحن اولاد نديهة ....و بتمش فينا النجيهة
سلة العالم للغذاء
سلة العالم للغذاء
لمن فضينا من الغذاء ومن العالم المتحضر
|
Post: #50
Title: Re: آآآآآآى شكلو فى مؤامرة !!
Author: نعمات عماد
Date: 04-17-2014, 06:20 AM
Parent: #49
اينتى العزيزة اخلاص
سلام واحترام
اعود ثانية لمداخلتك الاوسكار ,هناك نقطتين :
1 _ الدخان الذى تتعصب له بعض الاخوات و ازواجهن
الموضوع يستاهل بوست واذا فى الارشيف بوست هاتوه !!
2 _ أخطاء حدثت فى تاريخنا ادت لتخلفنا اغلبها حدثت فى
فترة الحكم الحالى .اتمنى ان تشاركى والجميع فى اقتراح
الحلول ولا اقصد البرامج الحزبية المفصلة ولكن نقاط
مركزة و مختصرة .
تقديرى
|
Post: #51
Title: Re: آآآآآآى شكلو فى مؤامرة !!
Author: نعمات عماد
Date: 04-17-2014, 06:57 AM
Parent: #1
سلام اخى العالم
اهنيك على وجودك فى بلد ليس فيه فساد
موضوعك افضل دعاية سياحية لاثيوبيا الجميلة
والتى يشرفنى زيارتها .
بس شكلك اتفشرت علينا شديد نحن السودانيين
كنا و ما زلنا معاكم و الدليل الخرطوم بها جالية
ضخمة ده غير الاقاليم .سؤالى لك :
ما حجم مساهمات الاثيوبيين الموجودين فى الخرطوم
فى النهضة الاثيوبية ؟
تحياتى لاثيوبيا ولكم
|
Post: #52
Title: Re: آآآآآآى شكلو فى مؤامرة !!
Author: نعمات عماد
Date: 04-17-2014, 07:25 AM
Parent: #1
من حقنا كسودانيين ان نحلم
تذكروا أوبريت الحلم العربى ترا ترلالالا
سمعنا بالحلم الامريكى الذى لم يوقفه تضخم دفتر
الجرورة الامريكى فى دكان الصينى الشاطر
الحلم السودانى ما هو ؟
السلام اولا و العيش بكرامة
|
Post: #53
Title: Re: آآآآآآى شكلو فى مؤامرة !!
Author: نعمات عماد
Date: 04-17-2014, 07:26 AM
Parent: #1
من حقنا كسودانيين ان نحلم
تذكروا أوبريت الحلم العربى ترا ترلالالا
سمعنا بالحلم الامريكى الذى لم يوقفه تضخم دفتر
الجرورة الامريكى فى دكان الصينى الشاطر
الحلم السودانى ما هو ؟
السلام اولا و العيش بكرامة
|
Post: #55
Title: Re: آآآآآآى شكلو فى مؤامرة !!
Author: نعمات عماد
Date: 04-19-2014, 08:07 AM
Parent: #1
|
Post: #57
Title: Re: آآآآآآى شكلو فى مؤامرة !!
Author: نعمات عماد
Date: 04-28-2014, 09:51 PM
Parent: #1
لو صبر الوالى قليلا على جماعتو .....
كان وصل المبلغ ل تيريليون جنيه..
كان جينيس ذات نفسه جانا جارى !
يا جينيس تعال عندنا تحلل و حاجات و شنو و شنو .
|
Post: #58
Title: Re: آآآآآآى شكلو فى مؤامرة !!
Author: نعمات عماد
Date: 04-28-2014, 10:00 PM
Parent: #1
نداءات المساعدة
دواء لطفل مريض
رسوم لطالبة فقيرة
ايجار لارملة ام لايتام
ولا مرة قالو الوالى اتصل واتبرع ب 10 جنيه
هى ال 900 مليار شوية ؟
|
Post: #59
Title: Re: آآآآآآى شكلو فى مؤامرة !!
Author: نعمات عماد
Date: 04-28-2014, 10:14 PM
Parent: #1
كل يوم احس ان الحكومة قاعدة تحمر لينا عيونها
آى اختلسنا ترليونات و ناس جابوا مخدرات
آها قولوا بغم !
بغم الله عليك .
|
Post: #60
Title: Re: آآآآآآى شكلو فى مؤامرة !!
Author: نعمات عماد
Date: 04-28-2014, 10:33 PM
Parent: #1
اقول لجماعة المحكمة الاخدوا كل واحد مليار فقط :
انتو عندكم تخفيضات ؟ فاتكم ال 900 مليار..
ايها الوالى :اوعى يكون المليارات دى حقت
تجهيز الخيران للخريف ؟
|
Post: #61
Title: Re: آآآآآآى شكلو فى مؤامرة !!
Author: نعمات عماد
Date: 04-28-2014, 10:50 PM
Parent: #1
ألى الاخوة فى الداخل
قبل المظاهرات التوجه للمكاتب التى بها مليارات متلتلة
واستعمال المبالغ لشراء خوذات وواقبات من الرصاص vest
, و مواتر كمان .
|
Post: #62
Title: Re: آآآآآآى شكلو فى مؤامرة !!
Author: نعمات عماد
Date: 04-28-2014, 11:09 PM
Parent: #1
ما آخر اخبار الحوار ؟
رمضان والعيد والحج كله اجازة للحكومة .يعنى باقى اقل
من شهرين على اعلان الفشل !
|
Post: #63
Title: Re: آآآآآآى شكلو فى مؤامرة !!
Author: نعمات عماد
Date: 04-28-2014, 11:30 PM
Parent: #1
مرات أظن ان انقلاب الانقاذ ما خططه الترابى الا عشان يخرب على الصادق
وها قد عاد ليحفر مرة اخرى للبشير و عبد الرحمن الصادق
اقول للترابى : احفر اسرع ! ووسع حوافيها عشان تقع فيها !!
و اقول للصادق : عاين وراك !
|
|
|