عفواً الموقع تم حجبه بواسطة الهيئة القومية للاتصالات...Sorry , this page has been blocked by Na

www.bing.com

امجد .. ازيك ..
محرك البحث الجديد bing قامت بحظره عدد من الدول ( المحافظة ) علي حد زعمها ..
فيهو خاصية ممكن تعرض ليك اي ( فيديو ) بدون الدخول للموقع الفيهو الفيديو .. ( مثال : الافلام الاباحية اغلب مواقعها محظورة في بعض دول الشرق الاوسط ) ..
تستطيع من خلال محرك البحث .. مشاهدة ما تريد و تجاوز الحجب ..

..
..

معليش ما حأوريك الطريقة .. عشان ضعاف النفوس وكدا ..
بالنسبة للحظر في السودان .. اظن من باب حاكو حاكو .. او انه احدهم سمع انه قفلوه في دولة تانية .. حبا يقشر بالموضوع من الصباح ..

امجد
كان متوقع اصلا

قبل اربعة ايام كننا بنتناقش انو المحرك الجديد حيشيلو منو مفتاح السودان
ياخي هو كمان بالغ
ياخي الموضوع كله ختاه في السهلة ومشي
اهو بقي ما بيدور المحرك

مافي مشكلة يا حبايب أمجد صاحب البوست والضيوف
ادخلوا علي.
www.bing.no
or
www.bing.nl
بس اللغة حتكون صعبة عليكم شوية:


:
:

Quote: www.bing.no or www.bing.nl

برضو لحقوا امات طه

???
طيب ما يمنعوا مثلاً العربات في الشوارع لانها بتعمل حوداث و تقتل الناس
و يقفوا الكهرباء عن البيوت و يلغو الهيئة القومية للكهرباء ، لأنو الكهرباء ممكن تكهرب الاطفال
و انا شايف برضو انو يمنعوا زراعة البلح لأنو في ناس بيعملو بيهو العرقي

الأخ امجد..
بالرغم من موقفى المبدئي ضد الحجب والمصادرة الا اننى (قد)اتفهم حجب المواقع الأباحية اما الذى لا اتخيله او اتوقعه ان يتم حجب بعض المواقع لكتاب قد نختلف او نتفق معهم امثال د.فرج فودة ود.سيد القمنى ود.خليل عبدالكريم والمستشار محمد سعيد العشماوى.تخيل ان الحجب قد طال حتى هؤلاء.
الا يوجد هكر ابن ستين فتلة يقوم بتدمير ذلك الموقع الظلامى المتخلف؟
مع تحياتى

.
.
يا قمرنا.. البوبا.

والله أنا دقست دقسه شديده خلاص والله جدا
كان أديكم ليهوا بي طريقه تانية بالايميل
ولا الماسنجر ولا اي طريقة أخري.

المهم معوضة وبنجيب ليكم البديل.

أخ من الدقسة.
.
..

أمجد ..
ردك دا بدخل في باب العوارة .. ممكن تستخدمه لمن زول يقول ليك .. ( جراي الحصان .. و لا بعيدة مدني ) ..
ممكن اجابتك تكون علي شاكلة ( سريع القطر ) ..
بس دا ما الموضع بتاعه .. ألا اذا كنت فاهم الموضوع اساسا غلط ..

..
..

الحاجة التانية ..
ردي ليك ليس تبرير لإغلاق الموقع .. انما هو قراءة بسيطة لمحاولة الوصول لفهم معين .. ( رأي منك رأي مني رأي من شخص ثالث ) ..
يعني ما تدخل بي في باب مغالطات حمقاء .. ما بقدر اضحك عليك في هذا اليوم بالتحديد لانه مركب وش كرتون ..

..
..

الحاجة التالتة ..
العربات و الكهرباء و بقية المثال .. ممكن تشيل سامبل منهم في ورقة A4 و تخت فيها دمغة جريح و تمشي وزارة الداخلية تستفسر عن عدم حظرهم ..
ما بقدر افتيك في الموضوع دا ساي كدا ..
سياسية الدولة ( بغض النظر عن سوء الحكومة ) هي التي وضعت سياسات من ضمنها آلية الحجب بواسطة الهيئة القومية للاتصالات ..
اذا كانت الحكومة ( تقتل البني آدم ) .. فأكيد ما بغلبا تقفل موقع ..
و لا ما كدا يا مناضل يا مستنير ..

الاخ حميدة
عوير القرد ...

الرد يندرج بكل تأكيد في باب ما ذكرت لأن الفعل جاء داخلاً من نفس ذلك الباب(عوارة الحجب التي تتطلب بالضرورة عوارة مماثلة في الاندهاش مع تقليب اليد حسرة على انعدام القدرة على رد الفعل و قادر الله)

اما بالنسبة لوش الكرتون خصوص سيادتكم يعني فولله لا نملك الا نحزن مرات عدة كدا على عدم قدرتكم على الضحك في هذا اليوم و نرجو من الله الا تستمر الحالة لايام قادمات حفاظاً على صحتكم النفسية و البدنية و اشياء من هذا القبيل

بالنسبة لنقطة سيادتكم الثالثة فالذي اثار في نفوسنا الدهشة ( و زي تقول ياداب عرفنا الاندهاش) انها لم تخرج في مجمل معناها عن الذي ورد في ما سبقها من نقطتين و ربما يمكن الرجوع لتعريف منهج التفكير الدائري في بحث هذه الحالة و تفسيرها) فيسرني يا اخانا الفاضل ان نصحح لكم عدة مفاهيم نظرية خاطئة في فهمكم لهذا البوست:
من الواضح جداً اننا لا نطالب بحظر العربات و الكهرباء و غيرها مما ورد في سياق الامثلة على بله سياسة السلطة في الحجب و المنع تحت مظلة حاكو حاكو و انما ندل نفس هذه السلطة على افعال اخرى حمقاء يمكنها ان تنجزها في اطار مسلسل البله الكعبولي الذي تدير به حياة الناس
و اما سياسة الدولة التي تدفع بانها تقتل بني ادم اذن لا ضير عليها و لا مأخذ اذا قررت حجب موقع (لأنها اسوأ من ذلك حسب ما فهمت من حديثك) فيا سيدي العزيز انا باقول انو دا غلط و دا غلط برضو و لا يمكن تبرير الخطأ الادنى بانهم يرتكبون ما هو اسوأ من ذلك

و اما بالنسبة لكوننا مناضل و مستنير فهذا اطلاق نظري ساي منك (لأنك ببساطة لا تعرفني و لا اعرف لنفسي نضالات استنارية من الشهرة لتبلغ مسامع سيادتكم و اشك في انكم خليتو الوراكم و القدامكم و قعدتو تلمو في داتا عني فذلك فعل يندرج شوية تحت مظنة المستحيلات ) فيمكن على هذا الاساس ان تعيد النظر فيه

نبدا ليك .. من تحت .. ( حيث انتهيت ) ..
مناضل و مستنير دي انها قلتها من باب الاستفزاز .. و لإعطاء نوع من انواع الحياة للحروف الميتة البنكتب فيها دي ..
ذي سيادتكم الشابكني بيها دي .. مخاطبة الناس من خلال الكيبورد مرات بتحتاج لدفرات استفزاز عشان نحس بالآخر ..
المهم .. دا تنظير ساي ..
اديك قاعدة ذهبية .. انا ما قاعد ابرر نهائي ..
عشان كدا ما تمسك الحاجات الانت ما فاهم قصدي فيها شنو .. و تجي تتفلسف من هذا المنطلق ..
حديثي كان .. حأقولوا ليك مرة تانية بالحركة البطيئة ..
( الحكومة البتجد مبرر لنفسها انها تقتل مواطن .. ممكن تقنع نفس المواطن دا انه احسن ليهو يقفلوا الموقع دا و يحافظ علي حياته ) ..
فهمتني ..
السياسة المتبعة من الحكومة الحالية في جميع الشأن .. مبرر كافي لاي فعل ما دون القتل ..
هانت عليهم ارواح الناس .. ما بهون عليهم موقع ..
حتي البوست بتاعك دا بندرج ذي ما قلت انت تحت بند .. العين بصيرة و اليد قصيرة .. و في حاجة كتيرة مفروض و لازم و كانت و يا حليلا ..
ركز في المهم ..!!

..
..

بالنسبة لدعواتكم لفك وش الكرتون .. بقول ليك دعها فأنها مأمورة .. و عندي غرض ورا الموضوع دا ..
و الدنيا نهاية اسبوع .. و داير امشي بيتنا بدري .. عشان عندي دافوري العصر .. عشان كدا لازم ادخل في الحالة دي ..