هل عقمت هذه الأمه ؟!

أول ما جال بخاطري عند قراءه خبر ترشيح المعارضه للسيد الصادق المهدي إنو هل عقمت هذه الأمه عشان تكون خياراتها البشير و الصادق ؟
و إذا كان البشير قد جاء للسلطه مغتصبا ، فما هو مبرر المعارضه لترشيح السيد الصادق ؟
لا مشكله لدي علي الإطلاق مع سيد الصادق - في عضمو - فخبرة الرجل السياسيه ليست محل شك أو تشكيك لكن المشكله في ما يمثله السيد الصادق من واجهه و وجه لفشل ظل ملازم لكل زعماء الاحزاب في الفترات الديمقراطيه في عدم قدرتهم علي المحافظه عليها ، و إمتد هذا الفشل ليشمل تعاملهم و تطبيعهم مع الدكتاتوريات الحاكمه حال استلامها للسلطه !

الاحزاب السودانيه كالإنقاذ تماما فشلت في فهم نفسية المواطن السوداني و التغيير الذي طرأ في عقليه و نفسية الناس في السودان ، الناس (فترت ) و ملّت من الدائره الخبيثه بتاعت الدكتاتوريات العسكريه و من ثم ديمقراطيات فاشله يسيطر عليها نفس الناس من خمسين سنه و يقومو بتسليمها للعساكر من جديد . الناس دي مشكلتها إنها بعيده عن نفسيه الناس و ما قادره تشوف التغيير الحاصل في العالم عموما و في السودان خصوصا !
لمن أوباما و كلينتون كانو بتصارعو للفوز بتمثيل الحزب الديمقراطي ، كان في كميه كبيره جدا داخل الحزب الديمقراطي بتايد هيلاري لانو كانو بفتكرو إنو أوباما ما عندو فرصه للونو و صغر سنو و عدم خبرتو ، ما قدرو يفهمو نفسية الأمريكان و إنهم قرفو تماما من بوش و سياساتو و كانو عايزين تغيير حقيقي في كل شي ، نفس الشي هنا : الناس قرفت و فترت مش من الإنقاذ بس ، بل من كل الساسه و السياسيين في السودان ، عشان كده ما من الحكمه إختيار وجه و واجهة السياسيين في الخمسين سنه الفاتت كمرشح بديل عن الإنقاذ !

فرصه فوز مرشح مستقل مدعوم من الاحزاب أكبر من فرصه فوز الصادق المهدي أو أي من ديناصورات السياسه السودانيه ! فهل عقمت هذه الأمه ؟!

Quote: فرصه فوز مرشح مستقل مدعوم من الاحزاب أكبر من فرصه فوز الصادق المهدي أو أي من ديناصورات السياسه السودانيه

ينصر دينك يا امين


بل هو الاجدى والانفع

لانه بما انه مستقل بكون على الحياد وما بكون ميال لحزب معين وكمان بتكون ثقة الاحذاب الاخري فيه عاليه وتصرفة تجاه حزب معين لا تطاله الظنون

Quote: لانه بما انه مستقل بكون على الحياد وما بكون ميال لحزب معين وكمان بتكون ثقة الاحذاب الاخري فيه عاليه وتصرفة تجاه حزب معين لا تطاله الظنون

سلام يا شفتنا
غير كده يا وليد العامل النفسي بتاع إنو نمرق من الحفره بتاعت نفس الناس و بالتالي نفس الفشل !
أدونا حبه امل و ضوء في أخر الدرب ! ما ممكن تجيبو لينا نفس الناس و نفس الاشكال و نأمل بنتيجه مختلفه ! !

سلام يا أمين
الامه ما عقمت - ما اعتقد
العقمو كل او معظم قادتها السياسيين و احزابهم
دى ناس عايشة في خيالها و عالمها الخاص بيها و فارقت الواقع نهائي
مسجونة في اشجانها و اوهامها و صراعاتها الخاصة و امراضها و نرجسيتها معوقاها انها تشوف ابعد من ذواتها المتضخمة و المتيبسه

اعود قطعآ

Quote: الامه ما عقمت - ما اعتقد العقمو كل او معظم قادتها السياسيين و احزابهم دى ناس عايشة في خيالها و عالمها الخاص بيها و فارقت الواقع نهائي مسجونة في اشجانها و اوهامها و صراعاتها الخاصة و امراضها و نرجسيتها معوقاها انها تشوف ابعد من ذواتها المتضخمة و المتيبسه

عصام يا جبر الله
كل يوم باقتنع إنو سودانا الشقيق ده ماشي يرقد غرب قريب ما بعيد ، ياخي دي فرصه لا تعوض ‎، الناس زهجانه و متضايقه من الإنقاذ و فسادهم و سيطرتم علي كل شي ، و معارضه سطحيه ما تسقط جاليه خلي حكومه ، يجو يرشحو الصادق المهدي ؟
الحل شنو لمن تفتح البورد و تلاقي معظم من تعتقد في رجاحة عقلو و سلامه مقصدو مؤيدين ترشيح سيد صادق و بشده ؟!

Quote: فما هو مبرر المعارضه لترشيح السيد الصادق ؟

سلامات با امبن
المبررات كثرة
اولها الصادق كان اخر رئيس وزراء منتخب اغتصبت منه السلطة
بعدين حكاية انو ما عمل شيئ دي بايخة جدا
الناس قعدت 20 سنة تحت الانقاذ وما حاسبتها على اخطائها
ليه نحاسب الصادق على فترة قصيرة لم ينتظر العسكر على انتهاء مدتها
التغيير ياتي عبر الانتخابات وليس الدبابات
انتو بتحاكموا الصادق ولا تحاكمون هؤلا المغتصبين للسلطة ليه
بالمناسبة مع احترامي لرايكم
نوع النقد ده لايخدم الا الكيزان

Quote: انتو بتحاكموا الصادق ولا تحاكمون هؤلا المغتصبين للسلطة ليه بالمناسبة مع احترامي لرايكم نوع النقد ده لايخدم الا الكيزان

يا حيدر ما يخدم الكيزان !!!!

انت عاوز تدخل دمقراطية بدون ما تقبل الرائي المضاد
في الاول طبق الدمقراطية في نفسك وسيب العاوز يخدم اجندة الكيزان يخدمها
دي الدمقراطية كده
طبقوها في روحكم بعد داك فتشوها عند حكومة


ما هي انتخابات
ناس اترشحو ضد ناس
اكيد حا تكون فر اراء مع ديل واراء مع ديك
ومفروض عليك تقبل ده

بدون ما تغلفها لينا في شكل انه كلامكم ده بخدم الكيزان

ده نمره واحد

نمره اتنين البمنع شنو نحاكم الكيزان ونحاكم الصادق

!!!!

ليه نحاكم الكيزان ونستثنى الصادق
هو لو كان الصادق قدر المسئولية كان الكيزان ديل اتشعبطوا فيها

الاخ امين سليمان

اذا ترشح السيد الصادق المهدى سيفوز على الجنرال البشير. هذا ان لم يحدث تزوير.

صحيح حصل تغيير فى الثلاثين سنة الماضية. ولكن تعبئة قوى المعارضة ونفوذ حزب الامة

ورغبة الناس فى التغيير كبيرة.

صحيح السيد الصادق كبير فى السن ولكن خبرته السياسية وتجربته الرئاسية وعلاقاته الدولية اكبر من اى سودانى حى خلاف البشير الذى اغتصب السلطة بليل.


اؤيد ترشيح السيد الصادق لو اتفقت قوى المعارضة على ذلك بما فى ذلك الحركة الشعبية.

فوز الصادق سيكون تمهيدآ للانتقال من الشمولية العسكرية الجبهجية الى الديمقراطية والتداول السلمى للسلطة.

وكفى بالصادق فخرآ انه سيكون رمز هذا الانتقال السلمى الديمقراطى.

قد يلوم بعضنا الانظمة الحزبية النيابية على التفريط فى السلطة.

ولكن هذا البطء شأن الديمقراطيات. المشورة والتداول ومعرفة اراء الجميع تحتاج الى وقت.

تجربتنا الديمقراطية - على سلبياتها - قصيرة.

الناس تحتاج ان تتخارج الان من هذا الحكم الشمولى. وبعد داك التنافس الحقيقى على البرامج والسياسات.

ارجو ان يختم السيد الصادق المهدى عمره بهذه الرمزية الصادقة والديمقراطية التى ستجنب البلاد مزيد من المواجهات.

لو اتيح للشباب ان يرشحوا لرشحت عادل عبد العاطى بعد ان يتخلى عن تهافته فى مواجهة الحزب الشيوعى.

ولكنت رشحت تراجى مصطفى من بنات الهامش الكندى.

لا شك لدى انه اذا ترشح السيد الصادق المهدى ودعمته احزاب:
الامة
الحركة الشعبية
الاتحادى الديمقراطى
الحزب الشيوعى
المؤتمر الشعبى

وغيرها

سيفوز السيد الصادق على الجنرال البشير بسهولة فى غياب التزوير.

الانقاذ اعدمت 23 عسكري لمجرد انهم قاموا بنفس ما قاموا به للاستيلاء على السلطة
وكان للصادق المهدي كل المبررات لازاحتهم بالقوة ايضا
لكنه رجل يركن للسلم ويدلل عليه بوعي تام
لما لا بكون المرشح الانسب للرئاسة
اتمنى ان ترشحوا بعض من ترونهم مناسبين ايضا
بدلا عن توجيه اللوم غير المبرر للصادق
اخر انتخابات حزب الامة حصد 8 مليون صوت
لا يوجد في اعتقادي من يصلح وسط قادة الاحزاب للترشح
المشكلة ليست فيهم
وانما في قواعدهم

Quote: اتمنى ان ترشحوا بعض من ترونهم مناسبين ايضا

كتار جدا

في حزب الامه ده تحديدا في اكتر من نفر

في الحركة الشعبية في اكتر من نفر


اقول ليك شي

ياسر عرمان مالو عيبو لي

مع انه ما زولي
لكني افضله على الصادق المهدي

Quote: انت عاوز تدخل دمقراطية بدون ما تقبل الرائي المضاد

بالتأكيد لا يا وليد
لكن مبلغ قصدي الهجوم المحموم على ترشيح الصادق امره غريب جدا
في نفس الوقت ترشيح المؤتمر الوطني للبشير ولا غيرو لا يقابله اي نقد
نعم الصادق ليس فوق مستوى النقد
لكنه في نظري افضل من الكيزان
وزي ماقال واحد في يوست اخر
انسو الصادق وتزكروا الكيزان (المحاسن والمساوي)
ايهما افضل
ولو ما نفع
يطير في اقرب انتخابات قادمة
دي الديمقراطية البعرفها

شوف هلع وذعر المؤتمر الوطنى واجهزة امنه من مجر فكرة ترشيح السيد الصادق لانتخابات رئاسة الجمهورية



الراكــــوبـــة فى الخريـــف ... شكروهــــا

فعلا ترشيح الصادق يا امين هو اعلن عقم لهذه الامه

الامة لم تعقم ولكن عمق سياسيها عن التفكير السلم

أرشح د.اكيج كوج(سفير السودان بواشنطون) لرئاسة السودان الموحد .

Quote: سلامات با امبن المبررات كثرة اولها الصادق كان اخر رئيس وزراء منتخب اغتصبت منه السلطة بعدين حكاية انو ما عمل شيئ دي بايخة جدا الناس قعدت 20 سنة تحت الانقاذ وما حاسبتها على اخطائها ليه نحاسب الصادق على فترة قصيرة لم ينتظر العسكر على انتهاء مدتها التغيير ياتي عبر الانتخابات وليس الدبابات انتو بتحاكموا الصادق ولا تحاكمون هؤلا المغتصبين للسلطة ليه بالمناسبة مع احترامي لرايكم نوع النقد ده لايخدم الا الكيزان

حيدر يا ميرغني سلام يا حبيبنا
كلامك صحيح يا حيدر : الصادق كان اخر رئيس وزراء منتخب اغتصبت منه السلطة و دي بالذات ما في صالحو : عمل شنو الصادق المهدي عشان السلطه ما تغتصب و تسلم للعسكر ؟
محاسبه الكيزان علي ما فعلوه في البلد أمر حتمي عند سقوطهم ، لمن ترشح الصادق المهدي - في تقديري - بتساعد علي بقائهم لانو فرص فوزو معدومه .
و كلامك سليم يا حيدر التغيير ياتي عبر الانتخابات ، عشان كده قلنا ليكم رشحو زول عندو فرصة فوز ! و زي ما قلت في أول البوست ، الصادق - في عضمو - ممكن الناس تتناقش - تتفق و تختلف - في تقييمو ، لكن الما فيهو خلاف : مساله إنو بيمثل واجهه لفشل الحفاظ علي الديمقراطيات اللي الناس ماتت في سبيلها !
يا حيدر ما جاوبت علي سؤالي : ليه الصادق ولا الميرغني و لا الترابي ؟ ليه ما مرشح مستقل مدعوم من الاحزاب يدينا امل إنو الجاي ما زي الفات ؟!
بعدين يا حيدر مافي شي بيخدم الكيزان غير إنك ترشح ليهم زول ما عندو فرصه فوز !

سلامات أمين
كتبت في بوست للأخ أبو ساندرا مداخلة في ذات الإتجاه
أجد أنه من المناسب إيرادها هنا فهى في نفس خط هذا البوست

Quote: معقولة بس يا بركة ؟؟ من جرب المجرب حاقت به الندامة لم يكن السيد الصادق المهدي مجرد مجرب فالرجل كان صاحب السجل الذهبي في إضاعة الفرص قد نتفق معك في كل ما أصبغته على السيد الصادق من عفة اليد وعفة اللسان أما قصة ( أنه ديمقراطي لم يرتكب وزر الإنقلاب يومآ ) فأرجو أن تراجع فيها كتاب الدكتور منصور خالد التوثيقي ( النخبة السودانية وإدمان الفشل - الجزء الأول صفحة 300 ) حيث يخبرنا الدكتور منصور عن أول لقاء بين الرئيس الأسبق النميرى والسيد الصادق وكيف أن الصادق قد ذكر للنميري " أن تردي الأوضاع في السودان كان لابد أن يقود إلى ما قاد إليه بدليل أنه نفسه - أى الصادق - كان يعد لإنقلاب عسكري. وقد ظن أن إنقلاب الخامس والعشرين هو نفس الإنقلاب الذي كان يدبره . وذكر أن تراجعه عن الإتصال باللواء الخواض قائد الجيش عندما أحس في الساعات الأولى من صباح الخامس والعشرين من مايو بأن هناك تحركاً غريباً للجيش في الشوارع كان لظنه أن ذلك التحرك ربما كان لمؤيديه ..... " وحيث لم يصدر عن السيد الصادق بكل ما يملك من فصاحة وبلاغة أو لم يصدر من حزبه ما ينفي هذا الحديث تظل الرواية عندي صحيحة . تعلم ونعلم يا بركة ان الإجماع الذى حظى به السيد الصادق عقب سقوط مايو لم يتأت لأى زعيم سياسي سوداني ، لكنه خذل الجميع وأضاع وقتاً عزيزاً يحتاجه الشعب السوداني ، فقد انتخب الشعب السوداني على اختلاف مشاربه السياسية السيد الصادق رئيساً لحكومته لكنه خذله بضعفه وتردده أمام الضغوط الأسرية تارة بتعويضات آل المهدي وتارة بالإهتمام بنقل رفات السيد الإمام الهادي المهدي وتارة بصفقة تجنيب السيد شريف التهامي المحاكمة والمادة 105 ( ولن نبيع هنا الماء في حارتكم ) . أيضاً خذل السيد الصادق ناخبيه بين إئتلاف وفض إئتلاف والحكومات الخمس ( إن كان الرقم صحيحاً ) في غضون ثلاث سنين - نحتفظ له أنه قد أتانا بعرف جديد وهو أن تستقيل كل الحكومة ويظل سيادته باقياً أبداً - إلا أن كل ذلك يهون أما ضعفه وتتردده أما ابتزاز الجبهة القومية السوداني وإضاعته فرصتين نادرتين للسلام أولهما بعد إجتماع الساعات العشر مع د. قرنق وثانيهما تعطيله لمبادرة الميرغني قرنق نوفمبر 1989 وإسقاطهما في البرلمان بواسطة الكتلة البرلمانية لحزب الأمة لتأتي نفس هذه الكتلة البرلمانية لتجيز الإتفاقية مع إضافة كلمتي ( مع إيضاحاتها ) لرفع العتب . لم يكن وقتها تعبير ( حق تقرير المصير ) ضمن أدبياتنا السياسية . لكن في ذلك الوقت جرت مياه كثيرة تحت الجسر وسعت الجبهة القومية داخل الجيش وخططت وجهزت . ليس ذلك فقط يا بركة بل وكما تعلم أيضاً أن سيادته قد إستهان إستهانة مزرية بتقارير ( جهاته ) الأمنية عن التحركات المريبة لضباط في الجيش محسوبين على الجبهة القومية الإسلامية وكان تعليقه القاسي ( متى يعلم هؤلاء القوم أن الجبهة القومية الإسلامية ليست ضد الخيار الديمقراطي ) - أو كما قال - دا كلو كوم الكوم التاني عليك الله اقرا حجة الحركة الشعبية لتحرير السودان ( النأى ) برئيسها عن الترشيح لرئاسة السودان ، تجدني أتفق مع الأخ الأستاذ عادل عبدالعاطي في رؤيته ( طبعاً بعد غربلة الكلمات الحادة ) ، فالحركة ياصاحبى لا تريد الإنفصال وحسب بل تريد أن تورطنا بـ ( زعامة مهدوية ) جديدة يضيع معها وقت الجار الشقيق الأكبر كى تتفرغ هى لكل برامجها وربما مشاريعها ( التوسعية ) أصلو مصر واثيوبيا وكينيا ويوغندا أحسن منها في شنو ؟؟؟

Quote: في نفس الوقت ترشيح المؤتمر الوطني للبشير ولا غيرو لا يقابله اي نقد

يا حيدر
كيف الكلام ده


كدي براحة

لو انت لاعب كورة وبين الشوطين جا وكان عندك فرصة تصل المدربين

حا تمشي لمدربك تقول ليه فلان ده كعب حا يغلبنا


ولا حا تمشي لي كوتش الفريق التاني وتقول ليه يا زول قونك كعب غيروا لينا


مالنا ومال المؤتمر الوطني

نحن في تحالفنا ده

Quote: عمل شنو الصادق المهدي عشان السلطه ما تغتصب و تسلم للعسكر ؟

هل هذا مبرر لدعم حجة الانقاذيين في الانقلاب
طيب ماذا فعلوا هم اذا
اليس افضل لنا ان يكون السودان على الحال الذي كان عليه في عهد الصادق من الوضع الراهن؟
بعدين من يحاسب من؟
الصادق تحاسبوا صناديق الاقتراع وليس الفالتين من ثكنات الجيش وتجار الدين
هل انتظروه ليكمل مدته ثم يحاسبوه؟
انا ادعم ترشيح الصادق لانه له قاعدة لايستهان بها مهما كان رائي فيها
الحاجة التانية هذه المرة سنختلف عن سابقتها
السلطة الكاملة لن تكون في يد الصادق
سيدين بالكثير لمن ينتخبوه لانهم لن يكونوا جلهم من الانصار
ياحبيب ده رايي اتمنى يجد الاحترام مثلما احنرامي لرأيكم

سلام يا عادل

Quote: اذا ترشح السيد الصادق المهدى سيفوز على الجنرال البشير. هذا ان لم يحدث تزوير.

مختلف معاك جدا في الكلام ده !

Quote: ولكن تعبئة قوى المعارضة ونفوذ حزب الامة ورغبة الناس فى التغيير كبيرة.

قوي المعارضه عبأت وين يا عادل شوف نحن في يوم كم ، خبر ترشيح سيد الصادق ده جا أمس . بعدين حزب الأمه نفوذو في تقديري ضعف جدا بعد مشكلة دارفور .

Quote: الناس تحتاج ان تتخارج الان من هذا الحكم الشمولى. وبعد داك التنافس الحقيقى على البرامج والسياسات.

ياخي ده مني الناس كلها ، لكن (وما نيل المطالب بالتمني ) ، رشحو زول الناس ممكن تتفق عليه كخطوه أولي عشان يفوز !

العزيز امين محمد سليمان
مساء الورد كميات والياسمين

ما عقر بالمعني المفهوم لكين زي ما تقول السودان ده في واحدة من غرائب أقداروا أنو مورث لبيتين
منهم الصادق المهدي ده وحيظل ده قدر ممكن يلازم شعبنا لوقت قد يطول عشان كدة الخيارات حتمشي في الاتجاه
ده بغض النظر عن الممكن يحققوا السيد الصادق المهدي إن حكم كصاحب حق إلاهي في حكم السودان

تجربتو الاولى ما كنت مولود بس تجربتو الثانية في الفترة الديمقراطية الجاء بعده إنقلاب البشير
إثبتت للكل فشل الخيار الطائفي من اساسوا لانو الصادق أتولى رئاسة الوزراء مابين 1986 - حتي 1989
وبعتقد انو مهّد لتقبل الناس لأنقلاب البشير رغم ميثاق الدفاع عن الديمقراطية الوقعتوا الاحزب في النهاية بتصرفاتو وتصرفات حزبوا الحاكم وقتها كعناصر غاية في الهشاشه لم تكن في قدر المسؤلية التي كانو يجب قيامهم بها

عقرت لامة أو لم تعقر حيضل الصادق أو محمد عثمان أو أي واحد في حكم الابقار المقدسة دي خيار مفروض على الشعب السوداني لامد قد يطول



تحياتي

العزيز أمين... ولا على سيرة الصادق نقول ليك الحبيب أمين.
الحقيقة إنو ما عقمت الأمة لكن الظروف المرت بها في العقدين الأخيرين كانت لا تهيئ البيئة المناسبة لتخريج قادة لعدة أسباب أهم هذه الأسباب أن القائد يحتاج للاحتكاك و المواصلة مع من يقودهم و العشرين سنة المظلمة دي ما كان متاح فيها الجو الصحي لهذا الاحتكاك و التواصل. نظلم الصادق المهدي كثيرا إذا حملناه وحده مسئولية الفشل خلال فترة حكمه القصيرة... كيف ننسى الجبهة القومية و دورها التخريبي؟ كيف ننسى الحزب الشيوعي و تحريكه للنقابات بحيث لم يكن يمر يوم إلا و نقرأ في الصحف عن عدد من الإضرابات؟ و كيف ننسى دوره في تحطيم معنويات الجيش و تخابره مع الحركة الشعبية، التي بغض النظر عن دوافعها كانت تحارب الدولة القائمة؟ بل كيف ننسى دور الحركة الشعبية نفسها و زعيمها الراحل يرفض مقابلة الصادق بصفته رئيس وزراء و يصف الحكم القائم بمايو تو؟
الصادق المهدي ليس ملكا أو نبيا تجري على يديه المعجزات... حكم البلاد في وقت كانت كل الظروف تشي بفشل التجربة. من ناحية مميزات الصادق نجد أنه من أصدق السياسيين السودانيين إن لم نقل أصدقهم و يتعامل مع السياسة بجدية. لا أظن أن هناك سياسيا سودانيا غير الصادق المهدي يتعامل مع خطاباته بعلمية و يكتبها في المكتبة... حتى أصبح مثار سخرية منا جميعا و قد تعودنا على ضجيج الخطابات السياسية. شخصيا يعجبني وعي الصادق بدور الدين في تشكيل المجتمع السوداني... لا أتفق معه جملة و تفصيلا في اجتهاداته لكن على الأقل هو يحاول أن يحل معادلة الدين و السياسة بصورة أو أخرى. من ناحية أخرى فإن ترشيح الصادق يحمل رمزية كونه آخر رئيس وزراء منتخب قبل وقوع واقعة الإنقاذ.
للأسف لا أملك حق التصويت لأنه من شبه المستحيل أن أسافر لاوتاوا للتسجيل ثم أسافر مرة أخرى للتصويت و حتى لو كان من حقي التصويت فربما لا أصوت للسيد الصادق المهدي فمن يدري لعل مرشحا ثالثا يظهر و أرى أنه الأحق بصوتي. لكن هذا لا يمنعني من القول بأن الصادق المهدي مرشح ممتاز و إلى حين آخر فهو مرشحي الذي أدعو للتصويت له.

Quote: هل هذا مبرر لدعم حجة الانقاذيين في الانقلاب طيب ماذا فعلوا هم اذا اليس افضل لنا ان يكون السودان على الحال الذي كان عليه في عهد الصادق من الوضع الراهن؟ بعدين من يحاسب من؟ الصادق تحاسبوا صناديق الاقتراع وليس الفالتين من ثكنات الجيش وتجار الدين هل انتظروه ليكمل مدته ثم يحاسبوه؟ انا ادعم ترشيح الصادق لانه له قاعدة لايستهان بها مهما كان رائي فيها الحاجة التانية هذه المرة سنختلف عن سابقتها السلطة الكاملة لن تكون في يد الصادق سيدين بالكثير لمن ينتخبوه لانهم لن يكونوا جلهم من الانصار ياحبيب ده رايي اتمنى يجد الاحترام مثلما احنرامي لرأيكم

يا حيدر مافي زول بيبرر للحرامي السرقة ، الناس بتسال سيد البيت ليه ما أمن بيتو ؟! الحرامي موضوعو و حسابو مختلف !!
بعدين يا حيدر اعتراضي علي سيد الصادق ما إعتراض شخصي عليهو ، إعترض علي ما بيمثلو : يعني لو ترشح السيد محمد عثمان ولا الترابي ولا محمد إبراهيم نقد أو اي من ديناصورات السياسه السودانيه في الخمسين سنه الفاتت كنت حا أقول نفس الكلام بنفس المفردات ، كلهم بيمثلو نفس الشي - الترابي طبعا قصه براها ‎- لو إنت فهمت من كلامي إنو أنا بفتكر سيد الصادق زيو و زي الكيزان ، يبقي يا إنت ما فهمت كلامي ، أو أنا ما وضحت كويس !
الحاصل ده فرصه و فرصه حقيقيه لإنهاء حكم الإنقاذ و عبر الانتخابات !! حا يزورو و حا يخوفو الناس و حا يعملو اي شي في سبيل إنهم يقعدو في السلطه ، عشان كده
مافي سكه تهزمهم إلا إنو الناس كلها تجمع عليهم !
المعارضه - إذا فعلا همهما علي البلد - مفروض ترشح شخص مستقل و تقيف معاهو كانو رئيس حزبها ! يعني سيد الصادق يحث قاعدتو و يوجه دعمو للمرشح ده كانو هو المترشح ، و السيد محمد عثمان نفس الشي و بقية الاحزاب ! لو عملو كده : لو البشير بقي رئيس لجنة الانتخابات ذاتها ما حا يفوز لانو المسأله بتبقي كيزان ضد البلد كلها !
يا سيدي رايك دائما محل تقدير و إحترام ،

Quote: شوف هلع وذعر المؤتمر الوطنى واجهزة امنه من مجر فكرة ترشيح السيد الصادق لانتخابات رئاسة الجمهورية

يا عادل هلع وذعر المؤتمر الوطنى واجهزة امنه كان بيكون في قمتو لو رشحت المعارضه شخص مستقل مدعوم منها دعم غير محدود .

Quote: الامة لم تعقم ولكن عمق سياسيها عن التفكير السلم

أم حازم يا ستهم
اختصرتي لي كلام كتيير بجملتك دي !

ه

الاخ أمين تحياتي

فقط الشعوب المغلوبة على أمرها تعيد تجريب المجرب سلفا و إنتاج فاشليها مرارا و تكرارا

لا توجد وجوه جديدة او شباب يحملون لواء التغير الحقيقي ، فقط يسبون و يلعنون الإنقاذ ، و لا يطرحون البديل ابدا

ولن يغير الله ما بقوم حتى يغيروا ما بأنفسهم

وعشان كدا الإنقاذ إتحكرت
--------------------------

كلهم ذات عصابة الحرامية القديمة ، يتبادلون ذات الأدوار القديمة ، عسكر و حرامية ، حرامية و عسكر ، لا يشبعون ابداً


و زي ما قالت احدى صديقاتي الاسفيريات :

احسن ليكم الكيزان ولا نسابة الكيزان ؟
--------------------------------------

الإنتخابات (مزورة سلفا) و هي رجس من عمل المؤتمر الوطني فقاطعوها يرحمكم الله

هامش الحريات الذي يأمل الناس في وجوده بعد الإنتخابات - حتى لو فاز المؤتمر الوطني - لن يكون موجودا في ظل القوانين المقيدة للحريات و لا تعتقدوا انه بعد الإنتخابات حيزيد لانها حاتكون ديموقراطية منقوصة ، و المؤتمر الوطني سيحرص عبر التزوير ان لا تكون نسبة الاحزاب في البرلمان الجديد مؤثرة للحد الذي يسمح بتعديل القوانين المقيدة للحريات

وياريت احزاب السجم و الرماد دي تقيف وقفة مشرفة مرة واحدة في عمرها و تعلن مقاطعة واعية و مسئولة للإنتخابات

هم أتفه من أن يقفوا موقفا مشرفا و سيشاركون طمعا في نصيب من كعكة السلطة ، و المؤتمر الوطني حايقسم ليهم معاهوا لأنو وجودهم ضروري في الإنتخابات لإطفاء الشرعية على إستمرارية المؤتمر الوطني في الحكم لعشرين سنة قادمة

ولا عزاء للشعب الصابر الفضل

***

أتمنى صادقا من الشعب السوداني أن يقف موقفا شجاعا و مسئولاً بمقاطعة الإنتخابات القادمة حتى لا يمنح الإنقاذ الشرعية التي تحتاجها لعبور عنق الزجاجة الذي تعيش فيه بعد قرار توقيف البشير و عزلتها الدولية ، ليكن فوز الإنقاذ في الإنتخابات منقوصا و خاليا من الشرعية

أما أحزاب السجم و الرماد فسيتحملون المسئولية التاريخية المتمثلة في المتاجرة بإرادة الشعب السوداني في رفض حكم الكيزان سئ الطعم و اللون و الرائحة

***

المقاطعة ليست موقفا سلبيا او فرجة بل هي موقف قوي و مسئول يرسل رسالة واضحة للمؤتمر الوطني و الأحزاب المعارضة إنو نحنا ملينا منكم و من قرفكم و حرمنتكم المستمرة منذ الإستقلال الى اليوم و صدقوني هذا الموقف الواضح اشرف لنا بدل المشاركة في عملية التزوير التي ستجري لأصواتنا

وفي النهاية المؤتمر الوطني جاء بالبندقية و الدبابة خصما على ثورة ابريل الشعبية و نتيجة لعدم تقبل الشعب لديمقراطية الصادق المهدي المهزوزة ولن يذهب بغير ثورة شعبية

قبل هذه الإنتخابات المهزلة التي جاءت كناتج جانبي لإتفاقية نيفاشا ماذا كان الحل ؟

الحل كان امام اعينكم ايها السادة الا وهو العصيان المدني و الإنتفاضة

مالكم نسيتم ام تناسيتم اكتوبر و ابريل ؟

ان الشعب السوداني بعد عشرين سنة من حكم الإنقاذ القائم على بيوت الأشباح و القهر صار شعب جبان و خواف و إنتهازي الكل يكابس ليأكل رزق يومه بالحق بالباطل المهم يعشي وليداته حتى لو يسرق ، واسقطت الإنقاذ معايير القيم و الأخلاق و الدين عبر تجويع و إفقار الشعب و اصبح الحلال ما طالته اليد و الحرام ما حرمت منه

راجعوا كلام الكواكبي عن الشعوب المقهورة

السؤال الحقيقي هو :
-------------------

متى سيصل الشعب السوداني لحالة الغليان الحقيقية التي ستؤدي الى قيام ثورة شعبية ؟

لو رجعتوا للتاريخ ما فعلته الإنقاذ بالناس أضعاف جرائم عبود و نميري و الأحزاب مجتمعة !

فلماذا لا يثور هذا الشعب الأبي المعروف عنه حرارة القلب و الحماقة ؟

الجواب هو أن الإنقاذ نجحت في تدجين هذا الشعب عبر العصا و الإرهاب و القهر

وسياسة جوع كلبك يتبعك
-------------------------

وهي مدركة لحكمة :

ربما اكل الكلب مؤدبه إن لم ينل شبعه
-------------------------------------

لذا هي تحرص على إلقاء بعض الفتات للشعب من حين لآخر ليتلهي به راجعوا سياسة الإنقاذ في التحكم في السيولة


***

ختاماً الرهان على الإنتخابات في إحداث التغيير رهان فاشل

مافي انتخابات في السودان شالت ليها ديكتاتورية

الدكتاتوريات ذهبت بالثورة الشعبية

و الإنتخابات تجلب العسكر و الديكتاتوريات

الى السلطة

شكرا يا عاطف علي مرورك الضافي
و الصادق المهدي مهما إختلف حولو الناس لا يمثل واحد علي ميه من سوء الكيزان و ما فعلوه بالبلاد و العباد في العشرين سنه الفاتت . لكنه قطعا ليس خيارا فاضلا من خيارات المعارضه ، خليك من أن يكون أفضل خيار !
طبعا أنا ما مطلع علي تفاصيل ما تم في الخفاء لإختيار مرشح المعارضه ، لكن متاكد جدا إنو زعماء الاحزاب - و بالذات الكبيره - ما ممكن يقبلو بمرشح مستقل و يساعدو في وصلو للسلطه إنكار لذاتهم و إعلاء لشأن الوطن و المواطن المسحوق ليهو عشرين سنه ده !

مشكور يا امين على الردود الطيبة

Quote: الصادق المهدي مهما إختلف حولو الناس لا يمثل واحد علي ميه من سوء الكيزان

هذا ما اعنيه بالضيط
اما افضليته بين قادة المعارضة تسنده معطيات كثيرة
الاشكال الان هل ستتفق المعارضة على ترشيحه؟
وفي حال رفض الصادق نفسه اي مرشح بدلا عنه وخاضها منفردا
هل سنضمن فوز اي منهما؟

تحياتي يا خال ..
بعد الأشواق و الاستجداء و ما شابه و طقوس الاحترام و اللذي منو ..
في تقديري أنك تنظر للأمر من الزاوية الخطأ ..
الأمر ليس استبدال شخص (البشير ) بشخص ( الصادق )
بل اسقاط نظام شمولي ( الانقاذ ) لحساب نظام ديموقراطي ( حزبي تعددي ).
اذا نظرنا للأمر بهذه الطريقة بدون النظر الى تفصيلة محاسن البشير الشخصية على مستوى القيادة او مساوئ الصادق الشخصية على ذات المستوى ربما يمكن أن نكون ناظرين من الوجهة السليمة.
النظم الشمولية اثبتت بالتجريب عجزها التام عن قبول الاخر و التداول السلمي للسلطة. خذ عندك تجربة موريتانيا الاخيرة مثلا التي صرّح رئيسها العسكري أن دور المعارضة هو أن تكون معارضة فقط و لا حق لها في السلطة. و عبر التأريخ السياسي للعالم لم يحدث أن استطاع نظام شمولي أن يطور نفسه و يصحح الاخطاء التي تمر بأي نظام حكم. و يصبح صوت الشارع كوراليا لا يعبأ به. لأن الشارع لا يؤثر إلا إن غفل الحاكم عن شرطته و جيشه فتهب انتفاضة او ثورة او انقلاب. فلا سبيل سلمي اعتيادي ليخسر موقعه او ثقة الشعب فيه.
بينما يقف النظام الديموقراطي على الضفة الاخرى دوما محتاجا للشعب خائفا من رقابته.
وزير فاسد واحد لم تتم اقالته و محاسبته يمكن استخدامه ورقة ضد الحكومة الديموقراطية فتخسر سلطتها لذلك تضطر لمحاسبته، كعملية بتر العضو الفاسد من الجسد ليعيش الانسان معافى.
احزابنا الديموقراطية جميعها مصابة بامراض كثيرة و عديدة ..
لكن ميزتها الوحيدة اضطرارها ( إن لم نقل قناعتها ) للتداول السلمي للسلطة و اعتمادها في قوتها على الجماهير.
لا يوجد نظام حكم في العالم يمتلك وصفة سحرية لحل المشاكل.
و حتى نظام الانقاذ يعترف اليوم أنه فشل في اشياء كثيرة خلال عمره في الحكم. الفرق أن النظام الديموقراطي يسمح لك بالخيار. ان تبقي الفاشل في الحكم او تمنحه فرصة ثانية. بينما تبقى الاحزاب الشمولية رغما عنك. تمنحك حقوقك صدقة و تتفضل عليك بها.
تذكر مقولة الفريق صلاح قوش حين قال اننا بدأنا متشددين و يمكن أن نرجع ذلك مرة اخرى.
العقلية التي تعتبر انفتاحها منحة يمكن ان تتراجع عنها في اي لحظة ليست هي العقلية الانسب التي تستطيع كمواطن ان تتعاطى معها.
هامش الحريات الذي يمن به جهاز الأمن في الصحف كل بضعة ايام و يتعامل معه كعطية و صدقة ينبغي أن يحمد الناس الله عليها و يحافظوا عليها بشدة دون اثارة غضب السلطة.
كأب سمح لأطفاله باللعب عصرا .. لكن عليهم أن يلعبوا بهدوء دون أن يزعجوه و يوقظوه من نومه. فلو فلعوا فالويل لهم.
النظام الديموقراطي هذا يمكنه أن يرشح أي أحد.. و من المهم أن يفوز هذا الأحد.
فمهما بلغ فشل الامام الصادق المهدي فانت كناخب تعلم انه فشل يمتد لفترة خمسة أعوام. و خلالها يمكنك أن تسقط الحكومة و أن تطالب بأي تصحيح و تغيير. فانت لن تدفع السلطة للامام الصادق و تذهب. هذه شمولية ديموقراطية. ان تترك له الخيط و المخيط و تنتظر. المواطن في النظام الديموقراطي فاعل اصيل. انظر الى حزب الشعب في سويسرا كيف قاد حملة ضد حقوق المسلمين اجبر فيها الحكومة نفسها أن تفعل ما لا تريده و وضعها في موقف أحرج ما يمكن.و بعد حظر المآذن يتحرك الان في اتجاه حظر النقاب و بناء مقابر للمسلمين و طقوس الزواج الاسلامي.
هذا هو المواطن في النظام الديموقراطي.
بينما في الشمولية تنتظر أن يمنّ الله على الفريق البشير بالعدل و عمل الخير إن كنت من معارضيه أو تسهر تدعو الله له أن لا يتغير و لا يتبدل إن كنت من مواليه.
لأن الأمر منه و إليه.
فلو أصبح الرئيس غدا بقرار أن يلوّن أهل السودان جميعا بيوتهم باللون الفستقي فأنت لا تملك إلا أن تطيع سواء كنت معارضا او مواليا.


الخيار يا خال ليس بين رئيس و آخر.
الخيار بين استمرار نظام شمولي و بناء نظام ديموقراطي قد يحتاج لترسخ تجربته لعشرين و ربما أربعين عاما.
فاختر.
اما أن تركن للشمولية ( و هي نوع حكم يمكن أن يمدحه كثر طبعا لاسباب شتى ) و تنتظر الجبار.
أو تقرر وضع قدمك على أول الطريق الديموقراطي المجهول التعرجات.
قد يأتي انقلاب جديد فجأة اسوأ من الانقاذ.
قد تدخل البلد في مجاعات.
قد يغزوها خليل ابراهيم ثانية و قد تتقطع أوصالها.
كله وارد.
لكن ربما يمكنك أن تعتبرها الاثار الجانبية للعلاج السليم .. هذا إن كنت مؤمنا أن خير الشمولية و لو تطاول و امتد فهو ظل قصير خادع.



ـــــــــــــــــــــــــــــــــ
الشروحات و الاستفاضة لم تكن لك يا خال بقدر ما كانت محاولة لايصال الفكرة لقارئ قد لا يعلم ما تعلمه أنت.

Quote: مساء الورد كميات والياسمين ما عقر بالمعني المفهوم لكين زي ما تقول السودان ده في واحدة من غرائب أقداروا أنو مورث لبيتين منهم الصادق المهدي ده وحيظل ده قدر ممكن يلازم شعبنا لوقت قد يطول عشان كدة الخيارات حتمشي في الاتجاه ده بغض النظر عن الممكن يحققوا السيد الصادق المهدي إن حكم كصاحب حق إلاهي في حكم السودان عقرت لامة أو لم تعقر حيضل الصادق أو محمد عثمان أو أي واحد في حكم الابقار المقدسة دي خيار مفروض على الشعب السوداني لامد قد يطول

ناصر يا حبيبنا
الياسمين إنتحر علي أسوار الجزائر العاصمه و لك أن تلقي نظره علي صورة بروفايلي لتتأكد !


بالنسبه لسودانا الشقيق : فعجبني جدا تعبير تراجي إنو (الامة لم تعقم ولكن عقم سياسيها عن التفكير السلم ) ! و ده بالظبط الحاصل :
الناس دي ما قادره تفهم إنو ال mentality حقت الناس اتغيرت و بقي في تغيير جذري و حقيقي علي مستوي العالم البقي كلو مربط مع بعض ده ، و علي مستوي البلد :
منو كان بتخيل إنو أمريكا يحكمها شاب أسود خبرتو كلها سنتين في الكونجرس ؟
منو كان بتخيل إنو الخرطوم تطلع عن بكرة أبيها لإستقبال سياسي سوداني : خليك من إنو يكون السياسي ده جنوبي و من سنة 83 مصورنو لينا إنو سبب مشاكلنا الظاهره و الباطنه ...
البلد و العالم كلو اتغير إلا أحزاب المعارضه اللسه بتفتكر إنو الصادق المهدي أحسن خيار موجود في الساحه السياسيه !!

امين النوتة

عيدك مبارك

ولماذا تصب جام غضبك علي ترشيح الامام

هل عمقت الحركة الاسلامية ايضا

الرئيس البشير غير مناسب ومطارد دوليا

كان الاجدي بالحركة الاسلامية ترشيح مرشحا اخر

لانهم حتما فائزون بانتخابات الرئاسة بيدهم السلطة والنفوذ

العزيز أمين

التحايا وما تعرفه من الاحترام ..

Quote: فرصه فوز مرشح مستقل مدعوم من الاحزاب أكبر من فرصه فوز الصادق المهدي أو أي من ديناصورات السياسه السودانيه !

هنا اختلف معك ،

كان يمكن لذلك ان يكون مقبولا لو اتفقت الاحزاب علي هذا المرشح مبكرا ووضحت رؤيتها من وقت ابكر ،

وانا هنا الوم الاحزاب ،

اعني ان تسمية مرشح مستقل والتبشير به والدعوة للتصويت له في الزمن بدل الضايع دا ما أظنو يجيب نتيجة ،

خاصة مع ضعف اعلام المعارضة عموما ،

بالنسبة للسيد الصادق المهدي فانا قريت في اكتر من حتة انو لم يتم ترشيحو بعد ،

غض النظر عن ذلك في النقطة دي باتفق مع الاخ حمور في نظرتو للموضوع ، يعني في مسألة الدفاع عن ترشيحو لا كشخص بل كفكرة ، مع احترامي ليهو كشخص ديمقراطي ،


طيب ،

من الناحية التانية البدائل شنو ؟

قصة ترشيح سلفا كير دي ما ح تقع لسلفا نفسو أولا باعتبارو حسب تقديري طامع ان يكون الرئيس الاول لدولة جنوب السودان الجديدة ايا كان اسمها ،

ودا تطور هام جدا في مسيرة الحقوق لشعب الجنوب ما اظن ناس الحركة الشعبية يضيعوه مقابل الامنيات بسودان خير ديمقراطيي يتساوي فيه الجميع حقوقا وواجبات !


قصة البدائل الاخري البتطرحا الناس هنا دي لا تعدو كونها احلام مثقفين ،

دا مع كامل احترامي لرؤي الناس دي وامنياتا للسودان وللشعب السوداني ، بل ومع كامل يقيني بصدق نواياهم للوطن ،

في النقطة دي للأسف السودان الواقعي ليس سودانيزاونلاين !

يعني باقرا في كتير من البوستات ترشيحات لشخصيات غاية في الاحترام والموضوعية وتصلح لرئاسة السودان ،

لكن هل الامور في السودان بتمشي كما يهوي المثقفون واصحاب النوايا الحسنة ؟

يا خي بس في سودانيزاونلاين دي شوف كمية التهجم البيواجهوها بعض الناس المحترمين عند اول بادرة خلاف !

دا طبعا لا يعني ان هناك من هو مبرأ من الخطأ او من هو فوق المحاسبة ،

لكن اول ما شخصية عامة ليها اسهاماتا تهاجم من قبل واحد من الناس لأي سبب من الاسباب حتي ولو كان موضوعي ، ح تلقي كميات من الناس شاركت في الهجوم علي الزول دا ،

قصدت من الكلام دا الاشارة الي سلوكنا المعادي في غالبو للتميز والابداع والبعد عن القطيع ،

دا تماما ما ح يحصل للمرشح المرتقب المستقل ، اضافة لأنو اعلام الحكومة كلو ح يكون ضدو ، ودا طبعا في ظل انعدام اعلام فاعل لصالحو ،

في المسألة دي خلينا نرجع شوية لاعلان الدكتور عبدالله علي ابراهيم لترشحو للرئاسة ،

كان اول من استنكر دعوتو جموع من المستنيرين السودانيين ،

بعضهم علل دا لتوقيت الاعلان وبعضهم عللو بمكانو ،

في النهاية يقل جدا انك تجد مواقف داعمة لترشيحو من طبقة المثقفين الهم اقرب ليهو ناهيك عن رجل الشارع البعيد عن لغتو اصلا ،

في منبرنا دا لا اذكر الا انو عدد قليل جدا من البوستات فتح في الشأن دا ،

طيب ،

في ظل الواقع دا حقو نقرا كلام حمور مرة تانية

والسلام .

السلام عليكم سيد امين
طالما تم نفى خبر ترشيح الصادق فإذا مازالت الفرصة متاحة لاختيار شخص مقارب للمواصفات التى ذكرتها, من ياترى يكون؟
الصادق المهدى شخصية فاشلة اغلبنا يتفق على ذلك وايضا نتفق ان له وزن سياسى هام لاتباعه الذين لايفكرون بالطريقة السودانيزاونلاينية بتاعتنا دى.
وكيف ح يعرف انو فاشل لو لم يقل الشعب كلمته فيه؟
هو بيعتبر انه الحاكم الشرعى للبلاد لانه لم ينزاح ديمقراطيا بل ازاحه العسكر وهو يفتخر بذلك. دا من حقه
طيب كلام كويس.
نحنا نضرب عصفرين بحجر واحد.
فطالما المعارضة التفت حوله ويبدو انو ح يحصل رغم النفى. نعيد به الديمقراطية ونضعه فى المكان اللى هو كان فيه اولا وبعدين فى الانتخابات اللى بعدها نزيحه من الحكم ديمقراطيا وقتها يكون عرف قدر نفسه وننهى الاحزاب الطائفية وعسى ان حزبه يعى و يتطور ويصبح حزب ديمقراطى فعلا.
دا رأيى فى القضية _ او كما قال عادل إمام
But still I think it is too little too late

سلام اخ امين

قلت

Quote: أول ما جال بخاطري عند قراءه خبر ترشيح المعارضه للسيد الصادق المهدي إنو هل عقمت هذه الأمه عشان تكون خياراتها البشير و الصادق ؟ و إذا كان البشير قد جاء للسلطه مغتصبا ، فما هو مبرر المعارضه لترشيح السيد الصادق ؟

انا اختلف معك اختلاف 180 درجه
نعم عقمت الامه!
عند ترشيح الصادق والبشير
ولكن اتمني ان تجيب علي سوالي فمن استشار الامه من المبتداء لترشيح الصادق والبشير؟
فوالله يجب ان تعتزر لهذا المسمي الذي اخترعته واطلقت عليه اسم الامه ونعته بالعقم الا اذا كنت تقصد بالامه حزب الامه
والا فمن استشار الامه في الترشيح لتنسب لها العقم!
ولكن سوال علي الطاير
وهل عقم الاسلام او المسلمين السودانيون ليرشحو سعاده البشير؟
فان خيرت في يوم بين الصادق والبشير في انتخابات رئاسيه
فساصوت للصادق رغم اقتناعي انه ليس امل الامه لانها امه ولوده
ولكن سافعل ذلك لاسقاط عدو الامه (البشير) الذي حكمنا بقوه السلاح 20 عام
علي امل ان ياتي حبيب الامه في الدوره الانتخابيه التاليه بعد 5 او 4 اعوام من حكم الصادق
او اي مرشح اخر ضد البشير
Politics is a game and it’s a dirty one.
وشكرا

الأخوان
العوض
حاتم
حمور (ضربت ليك مية تلفون امبارح ما رديت )
حيدر
خليل
وليد
ود النيل
و منعم
ياخي كتر خيركم علي كلامكم الطيب و أرائكم النيره ، بجيكم الصباح إن شاء الله ...

أمين تعليق بسيط وأخير ياخي لو الهدف إسقاط البشير وبس
بالتأكيد الناس لازم تدعم أى مرشح يتفقوا عليها بغض النظر هو منو
يعني ما إيمان بإمكانيات السيد الصادق المهدي بقدر ماهو رغبة للناس إنها توصل
مرشح غير البشير للحكم كرغبة شعبية


مع أني مؤقن أنو ده محتاج لانتخابات حرة ونزيه صعب توفره
بس بتبقي محاولة جادة من الناس تستحق الوقفه والدعم


تحياتي

Quote: نظلم الصادق المهدي كثيرا إذا حملناه وحده مسئولية الفشل خلال فترة حكمه القصيرة... كيف ننسى الجبهة القومية و دورها التخريبي؟ كيف ننسى الحزب الشيوعي و تحريكه للنقابات بحيث لم يكن يمر يوم إلا و نقرأ في الصحف عن عدد من الإضرابات؟ و كيف ننسى دوره في تحطيم معنويات الجيش و تخابره مع الحركة الشعبية، التي بغض النظر عن دوافعها كانت تحارب الدولة القائمة؟ بل كيف ننسى دور الحركة الشعبية نفسها و زعيمها الراحل يرفض مقابلة الصادق بصفته رئيس وزراء و يصف الحكم القائم بمايو تو؟ الصادق المهدي ليس ملكا أو نبيا تجري على يديه المعجزات... حكم البلاد في وقت كانت كل الظروف تشي بفشل التجربة. من ناحية مميزات الصادق نجد أنه من أصدق السياسيين السودانيين إن لم نقل أصدقهم و يتعامل مع السياسة بجدية. لا أظن أن هناك سياسيا سودانيا غير الصادق المهدي يتعامل مع خطاباته بعلمية و يكتبها في المكتبة... حتى أصبح مثار سخرية منا جميعا و قد تعودنا على ضجيج الخطابات السياسية. شخصيا يعجبني وعي الصادق بدور الدين في تشكيل المجتمع السوداني... لا أتفق معه جملة و تفصيلا في اجتهاداته لكن على الأقل هو يحاول أن يحل معادلة الدين و السياسة بصورة أو أخرى. من ناحية أخرى فإن ترشيح الصادق يحمل رمزية كونه آخر رئيس وزراء منتخب قبل وقوع واقعة الإنقاذ.

سلام يا العوض
أنا ما محمل سيد الصادق فشل الحفاظ علي الديمقراطيات لوحدو ، لكن بما إنو كان علي قمة السلطه التنفيذيه يبقي هو المسؤل الأول عن هذا الفشل ، لكن ده ما سبب الاعتراض علي ترشيحو لانو زي ما قلت إذا كان تحالف الاحزاب رشح السيد محمد عثمان كنت حا أقول نفس الكلام رغم إنو السيد محمد عثمان ما كان في أي منصب تنفيذي في الفتره الديمقراطيه !
البلد دي ما ممكن تكون خياراتها الإنقاذ و سيد الصادق و السيد محمد عثمان و بقيه الديناصورات القاعدين من ما إتولدنا ديل : كلامي كلو يا العوض منصب علي إنو ما ممكن يكون سيد الصادق أحسن خيارات المعارضه بإعتبارو واحد من الديناصورات دي و ليس لإعتراض عليهو في شخصو .

سلام يا حاتم و ياخي تشكر علي مداخلتك الشحمانه دي ...

Quote: فقط الشعوب المغلوبة على أمرها تعيد تجريب المجرب سلفا و إنتاج فاشليها مرارا و تكرارا لا توجد وجوه جديدة او شباب يحملون لواء التغير الحقيقي ، فقط يسبون و يلعنون الإنقاذ ، و لا يطرحون البديل ابدا ولن يغير الله ما بقوم حتى يغيروا ما بأنفسهم وعشان كدا الإنقاذ إتحكرت

ياخي والله شرحت فكرتي من البوست كلو في كلامك الموجز ده ،
ياخي ما ممكن نحن كل مره في نفس الناس و نفس السياسات كأننا كشعب ما تعلمنا شي في العشرين سنه الفاتو ، ما ممكن يكون كل سياسي البلد ما شايفين الشايفاهو الناس ، ما ممكن البلد دي كلها ما فيها من ( يلبس الدرع كاملة
يوقد النار شاملة
يطلب الثأر
يستولد الحق
من أضلع المستحيل)
ودي مصدر الإحباط و سبب قرف الناس و فترهم من الحاصل ده كلو ...

Quote: الإنتخابات (مزورة سلفا) و هي رجس من عمل المؤتمر الوطني فقاطعوها يرحمكم الله

متفق معاك تماما إنو الانتخابات حا تتزور و إنو الكيزان حا يعملو كل ما في وسعهم للفوز ، لكن ما متفق معاك في مسالة مقاطعتها دي ، الناس تقاطع الانتخابات ليه ؟ و البديل شنو لإسقاط النظام ؟! نحن أمام نظام خرب البلد و معارضه كسيحه ما تقدر تسقط إتحاد طلاب ، لمن بضغط دولي تلقي فرصه لقيام إنتخابات مفروض تثتثمر في صالح الشعب المنكوب ده حتي لو الناس عارفه سلفا إنو الانتخابات حا تتزور ، علي الأقل يتم فضح النظام بيها ! و من هنا كأن اعتراضنا علي سيد الصادق يا حاتم ، إنو ما عندو فرصه حقيقيه للفوز .

حمور زيادة ...

الزول البريدو ... يا زول ما عِندك حبوبا محسِية ... الله يرضى عليك ، شوف لي الحِكاية دي ... ولو ماف ... تبقى ريدتي لله وخلاص

Quote: الخيار بين استمرار نظام شمولي و بناء نظام ديموقراطي قد يحتاج لترسخ تجربته لعشرين و ربما أربعين عاما

الدِيمُقراطِيات الحصلت في السودان كانت بِترْجِع أسباب فشلا لِقُصر مُدة حُكْمِها ... يعني لو " الصادِق المهدي " مثلاً مثلاُ فاز وحكم حيِطْلُب مِنا نِحنا كشعب إنو نصْبِر عليهو (20) أو (30) سنة علشان التجرُبة يسْتقيم عودِها ... هو العُمُر فوقو كَم (20) سنة يا حمور؟ أبوي الله يِرحمو ، حِضِر الصادِق المهدي لامِن زح المحجوب مِن رِئاسة الوُزراء وقعد محلو وهو إبن 29 سنة بس لأنو ود الإمام محمد أحمد المهدي ... أكان عِندو سبب تاني غير ده؟ عِندو؟ ما عِندو ... أبوي الله يِرحمو حِضِر كُل الديمُقراطِيات الحصلت في السودان ... وأنا حِضرت الديمُقراطِية التالتة ، لم تُنجِز شئ البته ... كُل الإنْجازات التمت في السودان مِن الأزهري رفع العلم ، لِغاية يومنا ده ، أكانت مِن نصيب العساكِر (عبود/نِميري/البشير) لِلأسف الشديد ... ما تَرجِع ده لِقُصر مُدة الحُكم الديمُقراطي ... الصادِق المهدي المفروض مثلاً في الديمُقراطِية التانِية (الأولى دي نخليها ليهو ، ونقول أكان بِتعلم فيها ألف باء سياسة) عمل شنو؟ وفي الديمُقراطِية الثالِثة عمل شنو؟ ده تاريخ نِحنا حاضرينو وعايشناهو ... كانو تُجار الإتِحادي الديمُقراطي بِسرِقو الشعب الصباح الصباح وما حادِثة الوزير أبو حريرة الكان وزير وِزارة التِجارة عنك بِغايِب ... الصادِق أكان رئيس الوُزراء وأضاف ليهو وزير الدِفاع وسقطت (14) مدينة في الجنوب لامِن قال جون قرنق < حأشرب قهوتي في شندي > ... لازِم الديناصورات دي تِنزاح بِالمره ... أو فاليكُن العسكر ... العسكر الإتصالح معاهُم الصادِق المهدي في بورتسودان ودخل بعد صُلحو الإتِحاد الإشْتراكي بِتاع نميري ... العسكر الإتوالى معاهُم الصادِق المهدي هسِع في زمن الإنقاذ ... كيف أقبل بيهو وهو إتصالح مع زول قتل (10) ألف مدني وطرد (160) ألف مِن شُغُلُم البِياكلو مِنو عيش لِلصالِح العام تحت مُسمى التمكين ... لا لا يا حمور أخيرلي الفيل مِن ضُلو

Quote: فرصه فوز مرشح مستقل مدعوم من الاحزاب أكبر من فرصه فوز الصادق المهدي أو أي من ديناصورات السياسه السودانيه ! فهل عقمت هذه الأمه ؟!

حياك الله يا امين
بس وريني كيف اكون هناك مرشح مستقل
والمستقلين ذانم خشم بيوت
في اكتوبر قالو جيبو سر الختم الخليفة لانه مستقل طبعا ناس حزب الامة وافقو
لانو تحت تحت ميولو عليهم والاتحاديون لهم مستقليهم والشيوعيون اعجبوك في الحتة دي
والاخوان عندهم دفع الله الحاج يوسف ومن سار علي نهجه
اذن حكاية مستقل دي بقت لعبة مكشوفة والاجماع حولها صعب ان لم يكن مستحيلا


وشكرا مجددا اخ امين

الاستاذ امين سلام واحترام

الامر صعب ومعقد
والوضع السياسي في سودان اليوم مختلف جذرياً عن مسيرته التارخية
واعتقد اذا توصلت قوى المعارضة الى مرشح بكون هذا الامر خضع لابعاد ومفاهيم صعب أن يصل اليها الرجل العادي ( غير السياسي )
في سياق العشرين سنة الماضية من عمر الوطن كان الصراع رهيباً جداً جربت فيه كل السبل لعودة الديمقراطية من قبل المعارضة
وجربت فيه كل السبل من قبل الحكومة لتثبيت نظام الحكم الواحد
اعتقد اذا كان ترشيح الصادق المهدي هو الخيار يعني ذلك أنه الاقرب للفوز
اعتقد عدد الموالين للصادق المهدي في شخصة ومكانته الدنية مع توحد كل قوى المعارضة تعني هزيمة باينه بالفهم السياسي العادي للمؤتمر الوطني

نسبة الوعي والمتعلمين هي نسبة تشكل اقل من 20% من الذين سوف يدلون بأصواتهم
لذا الدخول في صراع الانتخابات بدون استخدام القعل والاستفادة من كل المعطيات في هذه المرحلة مهمة جداً
اعتقد أن قوى المعارضة اذا نجحت في الاتفاق على الصادق كمرشح تكون ضمنت 80% من الاصوات قبل بداية الانتخبات
واربكت حسابات المؤتمر الوطني الاصلاً مجبر على دخول هذه الانتخابات

اي مرشح يستتطيع الفوز على المؤتمر الوطني يبقى مكسب للوطن
لذا من رشحو الصادق المهدي هم أكثر ذكاء وحنكة
بالبلدي لعوبها صاح من غير توقع

ودمتم
وعاش السودان أكثر خصوبة لإنجاب بناته وابناءه الاوفياء الاقوياء

وليد الشفت

سلام وتحية

ملاحظة
انت بتجقلب مالك
اذا كان ترشيح الصادق المهدي بخلي البشير يفوز تبقى في مصلحتك
مش انت قلت بتصوت للبشير

ملحظة صغيرة
شايفك قلبت الصورة تاني
انشاء الله خير

سلام يا حمور

Quote: في تقديري أنك تنظر للأمر من الزاوية الخطأ .. الأمر ليس استبدال شخص (البشير ) بشخص ( الصادق ) بل اسقاط نظام شمولي ( الانقاذ ) لحساب نظام ديموقراطي ( حزبي تعددي ). اذا نظرنا للأمر بهذه الطريقة بدون النظر الى تفصيلة محاسن البشير الشخصية على مستوى القيادة او مساوئ الصادق الشخصية على ذات المستوى ربما يمكن أن نكون ناظرين من الوجهة السليمة.

يا حمور كلامك ده زي كأنو أنا قلت يا أخوانا أحسن البشير من الصادق ! الموضوع كلو عباره عن ليه تحالف الاحزاب يرشح الصادق المهدي و ليس شخص مستقل يكون مقبول عند الناس و مدعوم منها ، الناس المجربه (جدا ) دي ما عندها سكه.
الناس المعارضه البشير ما معارضنو لشخصو ، معارضنو لسياساتو و طريقه وصولو للسلطه ، معارضين كتيل الناس و تعذيبهم و إفقارهم ، معارضين السياسه الحا تأدي لتقسيم البلد . بالنسبه للاعتراض علي سيد الصادق ذكرت أكتر من مره إنو الاعتراض نابع من ما يمثلو في أذهان الناس و ليس قدحا في شخصيتو .
بالنسبه لكلامك إنو مرشح المعارضه بيمثل النظام الديموقراطي و البشير بيمتل النظام الشمولي فده كلام سليم عشان كده أنا اعترضت علي ترشيح سيد الصادق لانو فرصتو ضعيفه رغم إنو بيمثل أحلام الناس بنظام ديموقراطي !

Quote: احزابنا الديموقراطية جميعها مصابة بامراض كثيرة و عديدة .. لكن ميزتها الخيار يا خال ليس بين رئيس و آخر. الخيار بين استمرار نظام شمولي و بناء نظام ديموقراطي قد يحتاج لترسخ تجربته لعشرين و ربما أربعين عاما. فاختر. اما أن تركن للشمولية ( و هي نوع حكم يمكن أن يمدحه كثر طبعا لاسباب شتى ) و تنتظر الجبار. أو تقرر وضع قدمك على أول الطريق الديموقراطي المجهول التعرجات. قد يأتي انقلاب جديد فجأة اسوأ من الانقاذ. قد تدخل البلد في مجاعات. قد يغزوها خليل ابراهيم ثانية و قد تتقطع أوصالها. كله وارد. لكن ربما يمكنك أن تعتبرها الاثار الجانبية للعلاج السليم .. هذا إن كنت مؤمنا أن خير الشمولية و لو تطاول و امتد فهو ظل قصير خادع.

كلامك ده كلو أنا متفق معاك فيهو ، و عشان كده أنا حا أصوت لمرشح تجمع الاحزاب مهما يكون ،
و خليك من الفرق بين النظام الشمولي و الديمقراطي في عضمتم ، ياخي مافي زول سوي - من وجهة نظري - ممكن يصوت ليه لزول مسؤل من قتل عشره ألف مواطن من بلدو ، نقتي الكتيره دي عباره عن disappointment من ترشيح سيد الصادق لانو ما أفتكر إنو عندو فرصه للفوز ، في حين إنو ترشيح مستقل مدعوم من الاحزاب - في تقديري - كان حا يخلي الناس تلتفه حولو .

خلي يا حبيب

Quote: ولماذا تصب جام غضبك علي ترشيح الامام هل عمقت الحركة الاسلامية ايضا الرئيس البشير غير مناسب ومطارد دوليا كان الاجدي بالحركة الاسلامية ترشيح مرشحا اخر لانهم حتما فائزون بانتخابات الرئاسة بيدهم السلطة والنفوذ

أنا صابي غضبي علي الرشح الامام ، لانو الإمام ما بفوز يا خليل !
بالنسبه للكيزان : ياخي سمعت ليك بحاكم جا بدبابه و جات إنتخابات مشي رشح زول غيرو ؟!
يا خلي شغلة السلطه دي أكبر من فهمنا و قدرتنا علي الاستيعاب ، الناس دي ممكن تموت ما تتنازل عن السلطه !

سلام يا وليد

Quote: يعني باقرا في كتير من البوستات ترشيحات لشخصيات غاية في الاحترام والموضوعية وتصلح لرئاسة السودان ، لكن هل الامور في السودان بتمشي كما يهوي المثقفون واصحاب النوايا الحسنة ؟ يا خي بس في سودانيزاونلاين دي شوف كمية التهجم البيواجهوها بعض الناس المحترمين عند اول بادرة خلاف ! دا طبعا لا يعني ان هناك من هو مبرأ من الخطأ او من هو فوق المحاسبة ،

إذا تم ترشيح واحد من الشخصيات المحترمه والموضوعية واللي تصلح لرئاسة السودان و تم دعمها دعم غير محدود من الاحزاب أفتكر فرصتو بتكون كبيره جدا .
المانع شنو يا دكتور إنو سيد الصادق يدعم مرشح المعارضه كما و لو أنو هو النازل الانتخابات ، و إذا المسأله إنو في ناس بتمشي بالإشاره فيكفي إنو الإمام يقول صوتو لمرشح الاحزاب و يدعمو ، كذلك يفعل السيد محمد عثمان و باقي قاده الاحزاب ، لكن ينزل واحد منهم - و خاصه إنهم ليهم أكتر من خمسين سنه ما قدمو حاجه تذكر للسودان الشقيق ده - ما أعتقد إنو عندهم فرصه .

Quote: في المسألة دي خلينا نرجع شوية لاعلان الدكتور عبدالله علي ابراهيم لترشحو للرئاسة ، كان اول من استنكر دعوتو جموع من المستنيرين السودانيين ، بعضهم علل دا لتوقيت الاعلان وبعضهم عللو بمكانو ، في النهاية يقل جدا انك تجد مواقف داعمة لترشيحو من طبقة المثقفين الهم اقرب ليهو ناهيك عن رجل الشارع البعيد عن لغتو اصلا ، في منبرنا دا لا اذكر الا انو عدد قليل جدا من البوستات فتح في الشأن دا ،

ع ع إبراهيم يا دكتور ما مقبول من كل الناس - و بالذات الشيوعيين - و هو ما شخصيه مستقله .
دكتور الجزولي دفع الله قبل الإنتفاضه ما كان معروف غير في وسط الأطباء بإعتبارو نقيبهم ، بقا رئيس الوزراء في حكومه الإنتفاضه بإجماع الاحزاب و النقابات عليهو ، صحيح ما كان في إنتخابات لانها كانت حكومه إنتقاليه لكنو استمد شرعيه قبولو من إجماع الاحزاب عليه ، لك أن تتخيل إذا الاحزاب مجتمعه رشحت شخص مستقل و دعمتو دعم حقيقي بتوجيه قاعدتها للتصويت عليه فرصتو بتكون أكبر من سيد الصادق اللي هو في نفسو إذا في إجماع عليهو من قيادات الاحزاب ، مافي يخماع عليهو من القاعده .







-----
لو ما خايف بعدين يجو ناس الياسمين و الرماد يبقو لي في حلقي كان قلت ليك إذا نزل الصادق المهدي ضد البشير حا يطلعو ليكم النتيجه 64.8% للبشير مقابل 33.4% لسيد الصادق و 1.8% للباقين !