ابحثو معي عن خال لحمور .......................!!!!

أنا رفعت يدي منو ظاهر باطن !

مشاكلو كترت ، يوم خادش الحياء يوم منادينو للتحقيق و يوم حارقين ليه بيتهم و كل يوم فلم جديد !
أخر حاجه مدخلني في شبك جديده مع الجمهوريين !

اتحاشي الدخول لبوستاتو أو أي موضوع عنو خوفا من أن أقرا في سياق (الخال ) !
بسبب حمور ، عصام جبر الله (دفعتين قدامي في الجامعه ) و وهبه (تلاته دفعات قدام حبوبتي الله يرحمها ) بيقولو لي يا خال !
و في نفس الوقت ما شايف لي حسنه من موضوع أنا خالو ده : عادي يخش يشاكلني في البوستات ، و ممكن ما يرد لي علي ايميلاتي و مولع سجارتو (قصبه) في وشي !

ضربت لي تمبس أبارك ليه :
- سلام يا علاء و مبروك
- منو معاي
- معاك أمين محمد سليمان
- خال حمور ...؟
قربت أقفل السماعه في وشو !
و نفس السيناريو إتكرر مع أخونا أشرف مصطفي ...
بعد سنه من الحياه العامره بقيت عباره عن (خال حمور ) !

عليه أعلن خلو قائمة أهل حمور من خاله المدعو أمين محمد سليمان ، و علي من يرغب في مل هذه الخانه الاتصال بحمور !

وانا شاهد

ازيك يا امين وكل سنة وانت طيب

فى الاول قريت العنوان ...ابحثوا عن حمور

سلام يا حامد و كل سنه و إنت طيب

Quote: وانا شاهد

ياخي بلغت الروح الحلقوم من العاملو فيني حمور هنا !

امين صديق الكل
يازول العندو ولد اخت
زي حمور ده
مفروض تقيف وسط البلد
وتعلن تمردك صراخ
وتقعد زي حمد فتر
وترجى الفرج
وحتى تجد الحل
لك هذه الوردة
تريح اعصابك وعقلك المجهد
حمور عندنا غالي جدا

أمين
إزيك ياخى
والله يا أمين لو فى ندامه تكون لو ما أختك أنجبت حمور
يازول تبدل ( مع إنى ما عندى ود أخت مما يؤكد القيمة والمقيّم)
نسأل الله يديم المحبة
مودتى موصوله للعزيز حمور ( وهو عارف السكه لو قنع منك)
دمت بخير

السني يا فنان ، عساك طيب

Quote: امين صديق الكل يازول العندو ولد اخت زي حمور ده مفروض تقيف وسط البلد وتعلن تمردك صراخ وتقعد زي حمد فتر وترجى الفرج وحتى تجد الحل لك هذه الوردة تريح اعصابك وعقلك المجهد حمور عندنا غالي جدا

والله يا السني أنا حمور في عضمتو ما مابيهو ، لكن جايب لي كميه من الكركبه لا ليها أول ، لا ليها أخر ...
والله بعد شويه خايف أحمد ولدي يقول إسمو أحمد أمين محمد سليمان خال حمور !

أسامه يا حبيبنا

Quote: يازول تبدل ( مع إنى ما عندى ود أخت مما يؤكد القيمة والمقيّم) نسأل الله يديم المحبة

يا زول ما يبقي كلام ساي ، هسي أرسل ليك توكيل شرعي و صباحات الله بيض تمشي المحكمه الشرعيه !

الخال امين
تحياتي

وكل سنة وان طيب


واركز


والخال ان وقع ما بنفع الجقليب

عمر صديق يا حبيبنا

Quote: والخال ان وقع ما بنفع الجقليب

الخال جاء المكان ده واقف ، مافي شي وقعو غير حمور !!
الجقليب بقي واجب وطني !

كامل التضامــن مع الخال القادم لحمور بدل اميــن محمد سليمان خال حمور ..








ــــــــ
بامناسبة يا خال حمور ما تحمل في قلبك شئ
يا خال حمور تاني ما بقولك خال حمور نهائي سمح يا خال حمور

Quote: كامل التضامــن مع الخال القادم لحمور بدل اميــن محمد سليمان خال حمور ..

كدي يا الطريفي إضامن معاي أنا في الأول ، خالو الجاي ده حا يكون جاء بإختيارو ، أنا مافي زول أداني خيارات !!

يخلخل ضروسو حمور دا!

حمور تبيع!!!











*** كل سنة وانت طيب يا خال
سنة سعيدة عليك ان شاء الله

لو كنت فى عمرك كان قبلت أكون خال حمور يا خال
وبالمرة نشيلو معانا الجنوب كان إنفصل لامن تتحيروا












______________
رغم مشاكلو الكتيرة القلتم ... بس حمور ده مشرِّف للدين والله يا خال

خلاص وقت المشكلاة كبيرة كده
ما تتخلص منو طوالي !
فكو ازبيرات
وبرضو حيقولوا الناس \ ده امين خال حمور الفكاهو ازبيرات
لكن برضو احسن من تفكو عكس الهوا
ياخي اولاد الزمن ده غير المصايب ما عندهم شئ
طوالي جايبين لينا
الــهـــوا

امين سلامات حمور دا ببدلو ياخى؟؟؟؟؟؟؟

زكرتنى فلم عربى اسمو ميدو مشاكل
حسن حسنى كان فيهو ابو ميدو
لما ميدو مشاكلو كترت وقف فى الشارع وكورك يا جماعة ما حدش ياخد ميدو ابى ويدينى بدالو مروحة
اها اسا انت نظامك سقف ولا حيطة

Quote: يخلخل ضروسو حمور دا!

والله يا ود الصايم إنت الفيهم !

Quote: حمور تبيع!!!

والله يا مياده ما داير أبيع ، شيلي ساي كده لوجه الله !













-----
و إنت طيبه يا ميادة ، جيت أسلم عليك في بوستك بتاع الشيوعيين ، خفت علي رقبتي !

Quote: لو كنت فى عمرك كان قبلت أكون خال حمور يا خال وبالمرة نشيلو معانا الجنوب كان إنفصل لامن تتحيروا

يا ريس ، قصة إنك تكون خال دي ، العمر ما بفرق فيها ! بعدين ياخي أنا الداير الداير أنفصل ما حمور !

Quote: خلاص وقت المشكلاة كبيرة كده ما تتخلص منو طوالي ! فكو ازبيرات وبرضو حيقولوا الناس \ ده امين خال حمور الفكاهو ازبيرات

يا السني ، المشكله إنو الزول ده ما بتفكه إسبيريت : عمود طولو مترين طالعه منو سجاره ، يفكو من وين ده ؟!!

يا عمكـ

أمين خال حمور دي ممكن تتخارج منها لكن أمين الياسمين دي البحلكـ منها شنو ؟؟

Quote: أمين خال حمور دي ممكن تتخارج منها لكن أمين الياسمين دي البحلكـ منها شنو ؟؟

ايواااااااااااا
عليك الله ورينا الحتة دي
والله يا استاذ خالد عبد الله لاحظت كم زول قالها ليه
كدي يا خال تعال لخص لي حكاية امين الياسمين دي
قبل ما براي

Quote: كدي يا خال تعال لخص لي حكاية امين الياسمين دي

يجيكـ وين يا ميادة الزول ده مكبر منها اللفة و لو ما ناس أميرة الشيخ و عمكـ قوقل كان نكرها عديل

يا امين ما ترميها في حمور ساكت قالوا الولد خال ....................

Quote: و إنت طيبه يا ميادة ، جيت أسلم عليك في بوستك بتاع الشيوعيين ، خفت علي رقبتي

يا خال
دي المرة الكم تقول لي الكلام دا
شنو يعني.... افهم من كدا انو بوستاتي كلها ملغومة
ثمح!!!!

الفيك اتعرفت


** تخريمة
طيب اسع انا بقرا عن اراء الترابي
قاعدة اجهز بوست عن اباطيل الترابي
نقبل شوية على الشعبييين
سياتك مدعو من اسع
رقبتك دي اعمل ليها ساتر من اسع
ما دايرين ايييي حجج ميته
ههههههههه

حمور في الفيسبوك قال عاوز يتعلم يعمل صينية المكرونه, ده ما يكون السبب بس يا خال؟

Quote: زكرتنى فلم عربى اسمو ميدو مشاكل حسن حسنى كان فيهو ابو ميدو لما ميدو مشاكلو كترت وقف فى الشارع وكورك يا جماعة ما حدش ياخد ميدو ابى ويدينى بدالو مروحة اها اسا انت نظامك سقف ولا حيطة

يا رغيم ، حمور بكركبتو الكتيره كان داير ابدلو بعده مافي زول بقبل بيه ، عشان كنا طرحناه في الاسافير لوجه الله و بعد ده ما لاقي لي زول يدق سدرو !

Quote: أمين خال حمور دي ممكن تتخارج منها لكن أمين الياسمين دي البحلكـ منها شنو ؟؟

يا خالد ، حا أفتح بوست تاني أبيع فيه أميره الشيخ عشان نتحله من قصة ياسمين دي كمان !
ياخي فيصل الرشيد مسميني (أمين ياسمين خال حمور ) ، ده براو داير ليه بوستين !!

Quote: يا امين ما ترميها في حمور ساكت قالوا الولد خال

يا سعادتك ، حمور ده ما شال مننا غير صلعتو الكبيره دي ، جنو و غباو ده ما عارفو جابو من وين !

Quote: حمور في الفيسبوك قال عاوز يتعلم يعمل صينية المكرونه, ده ما يكون السبب بس يا خال؟

مكرونة شنو يا دانيه ؟! ده فتيح مواضيع ساي !
حمور من الفقاريات التي تتغذي علي القهوه و السجائر ، أخر مره أكل كان في رابعه إبتدائي ، تقولي لي صينية مكرونه ؟!

Quote: ** تخريمة طيب اسع انا بقرا عن اراء الترابي قاعدة اجهز بوست عن اباطيل الترابي نقبل شوية على الشعبييين سياتك مدعو من اسع رقبتك دي اعمل ليها ساتر من اسع ما دايرين ايييي حجج ميته ههههههههه

يا مياده ، لو عن الترابي أفتحيه طوالي و أنا بجي انداح ، لكن الشيوعيين ديل في البرد ده والله ما بقدر عليهم !

ياخال
احوالك
حمور دا انت الورطتو مع الجمهوريين ديل
وانت عارف الناس ديل حسكنيت
كان لموا فيك بخلوا ريحتك طير طير
ما شايفني انا مكبر منهم اللفة كيف ؟
غايتو انت وود اختك الا تاخدوا اجازة كم شهر كدا وترجعوا
او سلموا باسويرداتكم لاقرب سفارة اجنبية
يا اخوي في المنبر دا تختا تلاتة
1/ الجمهوريين
2/ عادل عبدالعاطي
3/ الرهط
تاني الحبة ما بتجيك هههههه

Quote: مكرونة شنو يا دانيه ؟! ده فتيح مواضيع ساي ! حمور من الفقاريات التي تتغذي علي القهوه و السجائر ، أخر مره أكل كان في رابعه إبتدائي ، تقولي لي صينية مكرونه ؟!

ههههههههههه

Quote: أمين خال حمور دي ممكن تتخارج منها لكن أمين الياسمين دي البحلكـ منها شنو ؟؟

Quote: ياخي فيصل الرشيد مسميني (أمين ياسمين خال حمور ) ، ده براو داير ليه بوستين !

مووووبالخة,,

Quote: يا خالد ، حا أفتح بوست تاني أبيع فيه أميره الشيخ عشان نتحله من قصة ياسمين دي كمان

بيع ساى والله الواحد كان مشى الليلة من سودانيز خلف وراه ارث ياسمينى تقيل

_____________________________________________________
ياخ انا يوم واحد ماقلت ياخال,,,,تفتكر ليه?

خليك انت خال حمور , انا صاحبه اول ما سافر القاهرة قنعت منه ..
وكمان عجبني كلامك ده بلحيل ...

Quote: و وهبه (تلاته دفعات قدام حبوبتي الله يرحمها ) بيقولو لي يا خال !

رشهم الاتنين يا خال حمور ولا تبالي ..

سلام يا أمين ....

شايف الإسم كيف؟ ........ كامل الإستقلالية.

شوف يا حبيب .. تتخلى عن حمّور أو تفتح ليهو .... ده خيارك تماماً.

بس أُختك ذنبها شنو؟ ..... أوع تاخدها بجريرة طرطشة ولدها.

مودتي

كامل التضامن مع ود عمى

Quote: أنا رفعت يدي منو ظاهر باطن !

نبيع ود اختك فى مصر اهلى اسماعليى زمالك ؟؟؟؟

Quote: ياخال احوالك حمور دا انت الورطتو مع الجمهوريين ديل وانت عارف الناس ديل حسكنيت كان لموا فيك بخلوا ريحتك طير طير ما شايفني انا مكبر منهم اللفة كيف ؟ غايتو انت وود اختك الا تاخدوا اجازة كم شهر كدا وترجعوا او سلموا باسويرداتكم لاقرب سفارة اجنبية يا اخوي في المنبر دا تختا تلاتة 1/ الجمهوريين 2/ عادل عبدالعاطي 3/ الرهط تاني الحبة ما بتجيك هههههه

وهبه يا ضلنا !
إنت والله الجمهوريين ديل فاهمهم غلط ، الناس ديل بتاعين نقاش بالتي هي أحسن ، نحن أي زول بتاع نقاش بالتي هي أحسن ما عندنا معاهو مشكله بغض النظر عن ما يحمله من أفكار !
أنا اتناقشت معاهم لفتره طويله و إنتهينا من الموضوع ده ، حمور جاء طلق النار من أول و جديد !
بعدين ياخي البوست ده ما عشان الجمهوريين ، عشانك إنت تحديدا و بدل ما تحس جاي تاني تكتب لي (يا خال ) ؟!
البوست ده قد تتبعو اجراءت قانونيه لكل من يربطني بحمور

والله بالغت يا " خال "

يا محجوب
في زول رسل لي ماسنجر‎ - بالجد والله ‎- كتب لي فيه :

Quote: قالت العرب: وكم عما يعم السوء فيه وكم خالا من الحسنات خالي

الزول ده يكون قاصد شنو ؟

Quote: ياخ انا يوم واحد ماقلت ياخال,,,,تفتكر ليه?

يا أميره إنتي أحسن من حنين للبلد ، بتقول لي (أمين ياسمينه ) ما عرفتها شافت علي شنو !




















----
بعدين ياخي إنتي غاتسه وين ؟!

Quote: وكمان عجبني كلامك ده بلحيل ... Quote: و وهبه (تلاته دفعات قدام حبوبتي الله يرحمها ) بيقولو لي يا خال !

العوض إيل سونج
حمور إغتالني و أنا في عنفوان الشباب :
تعرف والدتي لو شافت وهبه ، حا تحميني امرق معاو ! و يجي يقول لي (يا خال ) ، لكن دي ما غلتطو غلطة حمور الختاني في الموقف ده !

Quote: سلام يا أمين .... شايف الإسم كيف؟ ........ كامل الإستقلالية. شوف يا حبيب .. تتخلى عن حمّور أو تفتح ليهو .... ده خيارك تماماً. بس أُختك ذنبها شنو؟ ..... أوع تاخدها بجريرة طرطشة ولدها. مودتي

والله يا أبو حميد كتر خيرك علي إعادة إسمي لسيرته الأولي .
صدقني أختي كان شبكوها أم حمور ، هي ذاتها بتنكرو !

ياامين
والله ان زول رطاني سااااكت ، كلام العرب مابخبروا

الخال أمين

ـــ

أعلن أنا الموقع أدناهُ و أعلاه
وبكامل قواي العقلية

أعلن عن رمي طوبة حمور
و أمشير حمور
وشنو كدة ما عارف حمور

يا خال الزول دة جانا في كايرو
و أنا أشكو مُر الشكية لي أب إيداً قوية
من عمايل حمور
جانا وبقينا ما عارفين نلِمُّوا!

إشي بنيوية
وإشي فوضي ذهنية
وإشي إشي إشي


كرهنا ذاتو !!


ياخي بإختصار كدة حمور دة اليشوف ليه أصحاب من هسة!

بعد مقاطعة الخيلان التامة له
أنا صحيفة الخوة معاه
ما داير يفضل فيها حتي بسمك اللهم!

نحاصروا في شِعَب فلان داك
ونقطع عنو الإمداد الروحي
ونمنع خطواتوا من دخول عوالم الحرية
وما جاورها من فنزويلا أو المعابد البوذية


ـــ
أها

خليه يخُم و يصُر!

Quote: نبيع ود اختك فى مصر اهلى اسماعليى زمالك ؟؟؟؟

ناصر يا أبن عمي ، قريبك ده ما عندو أي علاقه بالكوره و مستعد أحلف ليك (اهلى اسماعليى زمالك ) ديل ممكن يكون قايلهم مدن سوريه !
لكن كان لقيت ليه بيعه - إن شاء الله في الترسانه - أصلك ما تتوقف !

Quote: والله بالغت يا " خال "

يا عزام ، أنا بفتكر إنك من الناس المناسبين جدا لمل الفراغ بتاع خال حمور ده ، يلا دق سدرك ، الزول ده أنا نكرتو حطب و مافي طريقة رجعه !

Quote: تعرف والدتي لو شافت وهبه ، حا تحميني امرق معاو ! و يجي يقول لي (يا خال )

Quote: ابحثو معي عن خال لحمور .......................!!!!

أمين يا رائع .. سلامات .
نفترض انك لقيت خال (بديل) لي حمور ..
البحلك من قصة (خال وهبة) دي شنو

Quote: ياامين والله ان زول رطاني سااااكت ، كلام العرب مابخبروا

رطاني هنا يا محجوب و في الماسنجر سيبويه ؟!

Quote: أمين يا رائع .. سلامات . نفترض انك لقيت خال (بديل) لي حمور .. البحلك من قصة (خال وهبة) دي شنو

محمد عبد الله يا حبيبنا ، وهبه ده ضاربو الزهايمر و كل أمراض الشيخوخه المتأخره ، زول بيشتغل بيه مافي !

حبيبها يا حبيبنا ..

Quote: أعلن أنا الموقع أدناهُ و أعلاه وبكامل قواي العقلية أعلن عن رمي طوبة حمور و أمشير حمور وشنو كدة ما عارف حمور يا خال الزول دة جانا في كايرو و أنا أشكو مُر الشكية لي أب إيداً قوية من عمايل حمور جانا وبقينا ما عارفين نلِمُّوا! إشي بنيوية وإشي فوضي ذهنية وإشي إشي إشي كرهنا ذاتو !! ياخي بإختصار كدة حمور دة اليشوف ليه أصحاب من هسة! بعد مقاطعة الخيلان التامة له أنا صحيفة الخوة معاه ما داير يفضل فيها حتي بسمك اللهم! نحاصروا في شِعَب فلان داك ونقطع عنو الإمداد الروحي ونمنع خطواتوا من دخول عوالم الحرية وما جاورها من فنزويلا أو المعابد البوذية ـــ أها خليه يخُم و يصُر!

الزول ده اقطعو ناشف معاه من الأول ، غير الكركبه ما حا تطلعو منو باي حاجه ! بعد شويه بتلقي إسمك بقي (حبيب نوره صاحب حمور ) و كان فتحت خشمك حا يقولو ليك كلامك ده عشان هو صحبك !
أنج حبيب نوره فقد هلك الخال !

ليه يا أمين (الياسمين) كدا ؟!

حمور رجل لطيف و ذكي و لماح

لكنه يحب المناقشة و المجادلة

واشهد له بأنه موضوعي في نقاشه

وباله طووووووووووويل و (سلبة)

و يجيد التفرع و الإسهاب بدرجة واضحة

_______

يوميات واحد طالع من نقاش مع حمور

لسة ما إنتهى

Quote: حمور رجل لطيف و ذكي و لماح واشهد له بأنه موضوعي في نقاشه

بالله يا حاتم ما تقعد تشكر لي فيهو ، داير تبقي خالو ، قدم طلب هسي نقبلو ليك !

والله يا امين الظلام انت زول طيب الجمهوريين ديل نقاش بي اخوي واخوك ما بتطلع بي حاجة اللهم يجبروك تقرا موقع الفكرة صفحة صفحة وبعد ما تنتهي تجي ( مديك - نسبة الي الديك راجل الجدادة) وما عندهم مشكلة ينقلوا ليك موقع الفكرة كله هنا لو كسلان تمشي هناك , وفي النهاية حتلقي روحك ما اتحركت من مربع انك امين خال حمور بتاع الياسمين
والجمهورين كذلك ماسكين في جرايد مهلهلة من زمن اخبارها انتهت

أمين الما سمين
السلام عليكم وصباحات خالية من حموريات
أنسب حاجة تشيل الصورة أم صلعة من بروفايلك وتجيبلك صورة قديمة يكون فيها شعورك زائد حبة
وأي زول يقول ليك يا خال قول ليه حبابك يا جدو

أمين محمد سليمان يحاول ان يختار بين صفتين :
أمين خال حمور
أو
أمين الكان خال حمور

Quote: أمين محمد سليمان يحاول ان يختار بين صفتين : أمين خال حمور أو أمين الكان خال حمور

حمور
أرفع قلمك عن أمين محمد سليمان
خال حمور

والله عبارة ( أرفع قلمك ) دي بتكيفني كيف

Quote: حمور أرفع قدمك عن أمين محمد سليمان

حاضر يا عشاري

Quote: ابحثو معي عن خال لحمور

و انت تمشي وين من حيث الولد خال حيث هو هادي فيك هادي فيك جينات خلقة و اخلاق

تحياتي لك و لابن اختك من حيث يبعثون الي حيث يوم الدين

لطفي

Quote: والله يا امين الظلام انت زول طيب الجمهوريين ديل نقاش بي اخوي واخوك ما بتطلع بي حاجة اللهم يجبروك تقرا موقع الفكرة صفحة صفحة وبعد ما تنتهي تجي ( مديك - نسبة الي الديك راجل الجدادة) وما عندهم مشكلة ينقلوا ليك موقع الفكرة كله هنا لو كسلان تمشي هناك ,

أمير الظلام
أول حاجه : كورتك فكت و بقيت بتاع دافوري و كركبه !
الشي التاني والله ما في أحسن من نقاش الجمهوريين ، لا بغلتو عليك و لا بيوسخو يديك ، تقعد تناقشهم مية سنه ما في زول بيشتمك و كان شتمك منهم زول ما بكررها و ده لانهم حقيقة صادقين في توجههم و فعلا بيعتقدو إنهم علي الإسلام الحق .
زي ما قلت لازم في أي حاجه يحيلوك لموقع الفكره لانهم مقيدين بافكار الأستاذ و كل ما عليهم الشرح .

Quote: وفي النهاية حتلقي روحك ما اتحركت من مربع انك امين خال حمور بتاع الياسمين والجمهورين كذلك ماسكين في جرايد مهلهلة من زمن اخبارها انتهت

اطمنك يا أمير الظلام ، أنا حمور و مربعو إتخطيطهم يوم فتحت البوست ده .

Quote: أمين الما سمين السلام عليكم وصباحات خالية من حموريات

و عليكم السلام يا جعفر يا حبيبنا و دعوتك العميقه دي شكلو ربنا قبلها

Quote: أنسب حاجة تشيل الصورة أم صلعة من بروفايلك وتجيبلك صورة قديمة يكون فيها شعورك زائد حبة وأي زول يقول ليك يا خال قول ليه حبابك يا جدو

إنت كان كده فهمتتني غلط ! أنا ما معترض علي إنو حمور معجزني ، أنا معترض علي إنو أنا بعد 43 سنه خبره بقو بعرفوني بحمور ، بعدين يا سعادتك صوره من غير صلعه دي إلا من تانيه إبتدائي !!

Quote: أمين محمد سليمان يحاول ان يختار بين صفتين : أمين خال حمور أو أمين الكان خال حمور

والله يا حمور كان بقت دي خياراتي : أخير لي أمين خال حمور !
لكن صدقني - و أشار بوجهه نحو السماء - خياراتي كتيره جدا !
ياخي أنا عارضك في اسافير الله الواسعه دي لي يومين مافي زول غير أسامه ابارو كشكر ساي و لمن قلنا ليه تعال عمل زغبير !









----
بالجد بقيت أشفق عليك !

Quote: حمور أرفع قلمك عن أمين محمد سليمان

والله يا عشري لو كان قلمو بس ما كان في أي مشكله

يا ودعمي
كيفك
ضربت لحمور في القاهرة قلت ليه :انت بالمناسبة قريبي؟
قال لي :كيف يعني؟
قلت :خالك امين ودعمي لزم
قال لي:امين خالي بامي!!!!
(في زول خالو بيكون بابوهو؟؟؟؟)
يا زول فكوا نشوف ليك ود اخت كده نوبي ما بتاع مشاكل

ــــــــــ

كيفك ياخال

لو رفعت يدك من حمور تانى البحفر الأعماق معاك منو?

Quote: و انت تمشي وين من حيث الولد خال حيث هو هادي فيك هادي فيك جينات خلقة و اخلاق تحياتي لك و لابن اختك من حيث يبعثون الي حيث يوم الدين

والله يا لطفي عصرت علي ، لكن عافي ليك لله و الرسول لدعواتك السمحات ديل .

Quote: يا ودعمي كيفك ضربت لحمور في القاهرة قلت ليه :انت بالمناسبة قريبي؟ قال لي :كيف يعني؟ قلت :خالك امين ودعمي لزم قال لي:امين خالي بامي!!!! (في زول خالو بيكون بابوهو؟؟؟؟) يا زول فكوا نشوف ليك ود اخت كده نوبي ما بتاع مشاكل

حكومه يا ابن عمي ، الزول ده كان ما إتلقي ليه بيعه في بوستك الحصل خمسه صفحات في يومين ده ، تاني ما بتباع لي ، و لو كمان قايطناه بنوبي ما بتكلم عربي ، بديكم وهبه و ياسر طيفور و البرادو بتاعت العوض فوق البيعه !!

Quote: لو رفعت يدك من حمور تانى البحفر الأعماق معاك منو?

بيني و بينك يا دكتور ، الود حفار ، لكن مشاكلو كتيره !
حمور ده زي الخمر ، ضررو أكبر من نفعو !!

يا أمين،
من فضائل ود أختك عليك، بقيت معروف اكتر من بكري، وعامل خوتّة ووجع دماغ وغاغة، ما يعملها إلا ذو حظٍ عظيم،؛ تعرف رفاقتك الجو معاك المنبر، والقبليهم، مازالوا يشتكو من إهمال الناس ليهم ولي بوستاتهم القيمة، واحدين حردو، واحدين إستسلمو للامر الواقع؛ المهم، ما تأكل ود أختك لحم وترميهو عضم، هو براهو معضِم..
___
لكن بيني وبينّك ود أختك يستاهل البيع، لأنو هو ذاتو بياع..

ياسرهم

Quote: لكن بيني وبينّك ود أختك يستاهل البيع، لأنو هو ذاتو بياع..

ده الكلام النجيض !!
بقي كلامك من لغو الحديث ، و لعلمك أنا أعمق و أكتر بهاء و وضاء و حضورا من حمور أديني شهرين تلاته و بيبقي إسمو حمور ود أخت أمين !!

أمين محمد سليمان عضوا في البورد .. حبابك يا خال

عالم تاكل و تنكر

Quote: عالم تاكل و تنكر

يشهد الله ما أكلته !

لكما تحياتي انت وحمور

حمور من الفقاريات التي تتغذي علي القهوه و السجائر ، أخر مره أكل كان في رابعه إبتدائي ، تقولي لي صينية مكرونه ؟!



اخوي امين انا قبلت ابقالو خال البقنع حمور منو..!!؟؟

Quote: اخوي امين انا قبلت ابقالو خال البقنع حمور منو..!!؟؟

الله أكبر و لله الحمد !
إنت يا دكتور أطلع منها بعد ده ، أنا بجيبو ليك لحد عندك !!














-----
تاني يا حمور أبقي راجل قول لي يا خال !!

حمور لقى خال ( دكتور) وهو د. مجدي أحمد الشيخ و(ربنا حلاك منو) !!

ومن هنا يشرفني أن أطلبك رسمياً كـ ( خال) طالما أنك (خالي من الموانع) !

وغير مرتبط بحمور أو غيره كخال الآن فهل تقبل ؟!!

Quote: ومن هنا يشرفني أن أطلبك رسمياً كـ ( خال) طالما أنك (خالي من الموانع) ! وغير مرتبط بحمور أو غيره كخال الآن فهل تقبل ؟!!

والله رغم إنو أنا كنت داير أكمل تعليمي ، لكن عارف ما بلقى لي بت أخت زيك ، لووووووووول
يا ناديه ، والله أزداد طولا و فخرا بك ...









-----
قال حمور قال !

Quote: أنا بجيبو ليك لحد عندك !!

يا دكتور
حمور حميناهو و حلقنا ليه و لبسناه بدله ، يعني جاهز مويه و نور !
تستلم بتين ؟

Quote: يا دكتور حمور حميناهو و حلقنا ليه و لبسناه بدله ، يعني جاهز مويه و نور ! تستلم بتين ؟

اخوي امين ياخي بتبالغ انا من امس منتظرو...

رسلو سريع ان شاء الله بالفاكس...!!

Quote: رسلو سريع ان شاء الله بالفاكس...!!

يا دكتور
ما بمشي بالفاكس ، في مشكله بتاعت طول و دخاخين .
بعمل ليه اتاشمنت و برسلو ليك بالإيميل ، بس الله يستر عليك و علي جهازك ، كمية الفيروسات ممكن تقضي عليكم الإتنين !

Quote: يا دكتور ما بمشي بالفاكس ، في مشكله بتاعت طول و دخاخين . بعمل ليه اتاشمنت و برسلو ليك بالإيميل ، بس الله يستر عليك و علي جهازك ، كمية الفيروسات ممكن تقضي عليكم الإتنين !

يا اخوي امين اتصرف بس يصلني سريييع...

ياحليلك ياوداختي والله مشتاق ليك شدييييييد..!!

بالرغم من انك زغت مني لمن جيت السودان قبل 5شهور..!!

يا


اين


لسع ماوصلني رجعت في كلامك ياخالو ..!!

Quote: لسع ماوصلني رجعت في كلامك ياخالو ..!!

أرجع في كلامي شنو يا خال !
الحاصل إنو بنطفي في نيران مولعه في واحد من بوستاتو ، داير أسلمك ليه خالي مشاكل !

Quote: أرجع في كلامي شنو يا خال ! الحاصل إنو بنطفي في نيران مولعه في واحد من بوستاتو ، داير أسلمك ليه خالي مشاكل !

والله بالطريقة دي تقعد تطفى ليوم الدين..!!

اقول حاجة احسن حاجة عمك يرشو....!!










ثم ثانيا انت مالك ومالو انت خالو ...!!!

زمن الولد يولع وخالو يطفي....!!

Quote: والله بالطريقة دي تقعد تطفى ليوم الدين..!!

الحمد لله يا خال طلعت عارف إنتي خاشي علي شنو ، قلت ليك الود ده مشاكلو ما بتنتهي !

Quote: ثم ثانيا انت مالك ومالو انت خالو ...!!!

بكل أسف يا خال نحن لسه ما غيرنا الشهاده ، أول ما نغير الشهاده و تستلم ، إنشالله بعداك تبيعو إسبيريات ما عندي بيكم شغله !







-----
يا حمور تعال أمضي هنا خلينا ننتهي من الفلم ده !

Quote: الحمد لله يا خال طلعت عارف إنتي خاشي علي شنو ، قلت ليك الود ده مشاكلو ما بتنتهي !

ودحلتنا وعارفو انت رسلو والباقي علي

دي لكلكة منك ذي تلفونك....!!

Quote: دي لكلكة منك ذي تلفونك....!!

يا دكتور أمجد
حصلت مستجدات و احتمال أحتفظ بحمور ، بديك التفاصيل في التلفون !

Quote: لكما تحياتي انت وحمور

و لك مثلها و أكثر يا أحلام ..

Quote: يا دكتور أمجد حصلت مستجدات و احتمال أحتفظ بحمور ، بديك التفاصيل في التلفون !

ياخال اسمي مجدي ...!!

حموراحتفظ بيهو زي ماداير حلال عليك ماالولد خال..!!

قال مستنجدات ربنا يديم المستنجدات ياخال حمور ...!!

يا دكتور أمجد

Quote: ياخال اسمي مجدي ...!!

إنت بس تعرف تصلحني أنا و تخلي السموك !

Quote: إنت بس تعرف تصلحني أنا و تخلي السموك

لو سمحت ياخال ماتحرف مسار البوست..!!

رسل لينا حمور لو سمحت..!!

Quote: لو سمحت ياخال ماتحرف مسار البوست..!!

Quote: رسل لينا حمور لو سمحت..!!

ياخوي بعد العرفتو امبارح ده ، حمور كان بدلو لي بالوليد بن طلال ما ببدلو !

Quote: ياخوي بعد العرفتو امبارح ده ، حمور كان بدلو لي بالوليد بن طلال ما ببدلو

يعني يادوب الشمار وصلك..!!

خالو زيارة بس انتو الاتنين..!!

Quote: يعني يادوب الشمار وصلك..!!

يا دكتور أمجد ، هو الشمار جاك إنت خالو بتاع الإنترنيت ، ما يجيني أنا خالو البجد جد ؟!!












----
( حمور) فخرنا و عزنا و شمسنا التي تضئ فتحجب ما سواها !

ياخ رجع لى البتاع الرسلتو ليك لما مانافع معاك,,,


ومن الليلة حاناديك ياخال,,

أميره يا أميره

Quote: ياخ رجع لى البتاع الرسلتو ليك لما مانافع معاك,,,

صبرا يبل الابري مافي ؟!

Quote: ومن الليلة حاناديك ياخال,,

يعني يا أميره بقت عليك إنتي ، ما هو دي البلد كلها شابكاني يا خال يا خال ...

حمور فخرنا و عزنا و شمسنا التي تضئ فتحجب ما سواها ! حمور فخرنا و عزنا و شمسنا التي تضئ فتحجب ما سواها !

Quote: يعني يا أميره بقت عليك إنتي ، ما هو دي البلد كلها شابكاني يا خال يا خال

غيرتها رايي فى ياخال دى