مصطفي سيد أحمد ، رؤيه مغايره !!!

قلت لصديقي في الجبهه الديمقراطيه أيام الدراسه الجامعيه (ياخي إنتو والله فاكنها فينا ساي بمصطفى سيد أحمد ده ، الزول ده فنان و كل حاجه لكن ما للدرجه العاملنها دي ) ، فاخرجني (الفِرد) من بين يديه بدون أذي جسيم .
تعلمت من ذلك الدرس و دروس أخري أن مصطفي سيد أحمد - عليه الرحمه - فوق النقد عند قبيلة اليسار و المثقفين عموما .

إنتماء مصطفي السياسي شكل ليه حمايه و قداسه من النقد و شويه شويه تحولت القصه لجزء من ثقافة اليسار و من ثم الثقافه عموما في وطننا الشقيق !
لازم تكون بتحب مصطفي و شرايطو في عربيتك عشان تكون مثقف ، و العجب لو كنت بتعرفو - عليه رحمة الله - معرفه شخصيه أو عندك معاهو صور !!
صار مصطفي سيد أحمد و فنو مقياس لمدي ثقافة الناس في سوداننا الشقيق ، مثله مثل بنطلون الجينز الوسخان و كتب ماركيز و الشنطه المعلقه في الضهر !!

أظن غير آثما أن مصطفي سيد أحمد عليه رحمة الله كفنان ما قدر الجوطه و الهليله العاملنها ليهو و إنو الموضوع فيهو hype عاملنو الشيوعيين و اليساريين عموما و اضفو عليهو و علي فنو قداسه ، حتي صار أمر نقدو أشبه بالرده و العياذ بالله !

واصل ياعمو امين ياخال حمور

وجيب لينا الهواء

اصلو نحنا ماناقصين......!!!!!


سلام ياجميل

هارون سفيرنا في دوحة العرب

Quote: واصل ياعمو امين ياخال حمور وجيب لينا الهواء اصلو نحنا ماناقصين......!!!!! سلام ياجميل

الموضوع عارفو بجيب الهوا و ده سبب فتحتو : ليه الناس ما تنتقد و تتعامل مع فن الأستاذ مصطفي سيد أحمد زيو و زي باقي الفنانين ؟ مش المساله تذوق للفن ؟! ليه القدسيه الزايده عند تناول أعمال مصطفي سيد أحمد الفنيه ؟

Quote: ، و العجب لو كنت بتعرفو - عليه رحمة الله - معرفه شخصيه أو عندك معاهو صور !!

الكوتيشن دا محجوز لناس الدوحة*





_______________________________________________________
ناس الدوحة المثقفين بس,,,مابالضرورة يكون عندهم عضوية فى سودان فور ال

ولا اقول ليك نرشح ليك ممثل,,,,

________________________________________
مع تثبيت محبتى لمصطفى وفنو واى حاجة,,,,

Quote: الكوتيشن دا محجوز لناس الدوحة*

أميرة الاسافير عندما تصطاد في المياه الاصلها معكره !!

Quote: ليه الناس ما تنتقد و تتعامل مع فن الأستاذ مصطفي سيد أحمد زيو و زي باقي الفنانين ؟

لانو ما زي باقي الفنانين .....

Quote: لانو ما زي باقي الفنانين .....

ما كل الناس شايفاهو كده !

هذه مداخلة لي في بوست سابق ..........

Quote: سيادتو عماد صباح الخير ........ اللمسة الـ Touch الجاية من روح مصطفي هي سر مصطفي (قل الروح من أمر ربي) أها من أمر ربي الناس بتحب مصطفي وغناء مصطفي .............

حــد يصحي بد الدين الأمير!



________
بالعدم .. محمد طه الحبر!

Quote: حــد يصحي بد الدين الأمير! ________ بالعدم .. محمد طه الحبر!

الليلة ووووب,,,


انت ياودالصايم الرمزية دى مادرسوكم ليها

بت الشيخ!
رمزية شنو ياخ!
مش الاتنين بموتو في مصطفى!
وتيب!

يا امين يا نوتة

مصطفي سيد احمد هو اخر فنان بعد جيل العمالقة والاعمال التي قدمها

اعمال مميزة وفيها تجديد ويعتبر فنه نقلة نوعية في الفن السوداني

يجد التعاطف والاحترام من الجميع

لانه غنائه كان للبسطاء في السمحة قالو مرحلة

وغني للنخب الزيكم كدا

مريم الاخري

Quote: يا امين يا نوتة مصطفي سيد احمد هو اخر فنان بعد جيل العمالقة والاعمال التي قدمها اعمال مميزة وفيها تجديد ويعتبر فنه نقلة نوعية في الفن السوداني يجد التعاطف والاحترام من الجميع لانه غنائه كان للبسطاء في السمحة قالو مرحلة وغني للنخب الزيكم كدا مريم الاخري

جيل العمالقة يا خلي كان و ما زال الناس بينتقدوهم عادي !
ياخي خليك من تجاربي الشخصيه لمن أقول زي كلامي ده : قبل كم يوم في بورد أب صلعه ده في زول فتح بوست قال ليك في حفله الفنان غني غنيه لمصطفي ما غناها كويس جو شباب مسكو دقو و كسرو ليه الساوند سيستم و فرتقو الحفله : وين ده حصل للعمالقه ؟

Quote: اللمسة الـ Touch الجاية من روح مصطفي هي سر مصطفي (قل الروح من أمر ربي) أها من أمر ربي الناس بتحب مصطفي وغناء مصطفي .............

مافي زول يا عمر معترض علي حب الناس لمصطفي ، الاعتراض علي اعتراض الناس البتحب مصطفي علي عدم نقدو و التعامل مع فنو زيو و زي باقي الفنانين !
الأمر من وجهة نظري علي علاقه بإنتماء مصطفي السياسي أكتر من فنو ، في hype معمول لفن مصطفي أدي لزيادة المعجبين لاسباب أخري ليست بذات علاقه بفنو

Quote: الأمر من وجهة نظري علي علاقه بإنتماء مصطفي السياسي أكتر من فنو ، في hype معمول لفن مصطفي أدي لزيادة المعجبين لاسباب أخري ليست بذات علاقه بفنو

الاخ امين الالتفاف والاجماع علي مصطفي سيد ليست له علاقه بالحزب او القبيله او ما الي ذلك,

مصطفي سيد احمد فنان وله قاعده عريضه من المعجبين وحتي اهل المعرفه بالموسيقي يؤكدون انه

فنان متكامل وبالتاكيد سيبقي النقد بتلك الطريقه خط احمر لمحبي مصطفي سيد احمد ..

والذين يعرفون مصطفي سيد عن قرب يؤكدون انه انسان بكل ما تحمل الكلمه من معني ..

شخص بهذه المواصفات جدير بالحب والاحترام ..

ولكن بعيدا عن بنطال الجنز الممزق .. مارايك انت في مصطفي سيد احمد الفنان ؟

سلام يا أسامه

Quote: الاخ امين الالتفاف والاجماع علي مصطفي سيد ليست له علاقه بالحزب او القبيله او ما الي ذلك, مصطفي سيد احمد فنان وله قاعده عريضه من المعجبين وحتي اهل المعرفه بالموسيقي يؤكدون انه فنان متكامل وبالتاكيد سيبقي النقد بتلك الطريقه خط احمر لمحبي مصطفي سيد احمد .. والذين يعرفون مصطفي سيد عن قرب يؤكدون انه انسان بكل ما تحمل الكلمه من معني .. شخص بهذه المواصفات جدير بالحب والاحترام ..

ياخي أنا كلامك ده كلو ما عندي عليه اعتراض و أنا ذاتي بتعجبني بعض أغانيه و بالتأكيد في ناس بتعجبهم كل أغانيه و بالنسبه لشخصيتو ما عندي شك إنو عليه رحمة الله كان قدر محبه الناس ليهو دي .
الاعتراض علي القدسيه الزائده دي :
معظم أصحابي في الجامعه كانو بحبو مصطفي ، لو اعترضت علي تشغيل غناهو لصالح فنان تاني في العربيه مثلا ممكن أسمع ستين كلمه فارغه .
في بورد بكري ده البوستات بتتفتح و الاتهامات بتتبادل إنو فلان ده من شدة ما كعب ، مصطفي مات زعلان منو !! غير مسألة ضرب الفنان الذكرتها سابقا . كلها شواهد لقدسيه حاصله لفنو و كانما بلغ فيه الكمال .
ما شايف لي التفاف و إجماع علي فن مصطفي إلا عند المثقفين اليساريين الشباب و ده ذاتو ممكن يكون بيثبت كلامي بتاع إنو النظره لفن مصطفي فيها جزء كبير جاي من انتماؤو السياسي .

Quote: ولكن بعيدا عن بنطال الجنز الممزق .. مارايك انت في مصطفي سيد احمد الفنان ؟

رأيي إنو فنان عادي لا يميزه عن الكثيرين إلا انتماؤو السياسي و شويه شويه بقي سمع اغانيهو جزء من الانتماء السياسي و الثقافي ده ذاتو : يعني لو ما بتحب مصطفي مفروض تتحسس ثقافتك و معرفتك .

Quote: الأمر من وجهة نظري علي علاقه بإنتماء مصطفي السياسي أكتر من فنو

انتوا يا اخوانا بدر الامير نايم للان والا شنو ؟

Quote: الزول ده فنان و كل حاجه لكن ما للدرجه العاملنها دي

مرحبا أمين.
هى رؤية مغايرة فعلاً، ليس بما حوته، بل بما ذهبت إليه من (إبتسار) و(إختزال)
لمجموع من (القيم) التى تجاهلتها الكتابة عن (ظاهرة) فنية، وعن (وجدان) شاءت
له حزمة من الظروف والملابسات أن يتجسد فى ساحة بعينها من الإبداع، وفى شخص/حالة
بعينها فى وسط تلك الساحة.
ومصطفى لم ولن يكون حكراً لقبيلة اليسارعامةً، أو الشيوعيين خاصة، ولا لرهط المثقفاتية وحدهم،ودونك من هم منظمين
ومنتظمين فى صفوف الحزب الشيوعى، أو منحى اليسار عامةً من المبدعين والفنانين، فهل وصلت
أصواتهم لتلك المرتبة والمكانة التى توافرت لمصطفى مثلاً؟؟؟
ثم أن الظرف السياسى الغريب، والذى تزامن مع بزوغ نجم مصطفى كان له أثره القوى والواضح
فى، لا أقول تضخيم (الظاهرة)، بل فى وضعها فى قالبها وإطارها الذى ملأته وفاضت عنه.
وما أعنيه بالظرف السياسى هنا ليس هو (الحِراك) الحزبى الكسيح، والدافورى الذى كانت ولا تزال
تمارسه الأحزاب السياسية، بل عنيت به الوجدان السياسى الواعى والمتقدم للكثير من قطاعات الشعب
السودانى، والشباب منهم بالأخص بما يدور حولهم من خيبات وإحباط، وقصور أداء، بل وغربة لم يجدوا
معادلاً لها إلآ فى تلك الكتابات التى تستكنه بواطن الأحلام التى تراودهم وتغازلهم، والتى صاغتها
عقول وأرواح فتية وشابة تحلم بواقع (مغاير) لما هو مطروح أمامهم، بضاعة غير تلك االتى (تفرش)
على قارعة دروب وطرقات الإبداع، والتى شاءت عبقرية مصطفى أن تحولها، وبمنتهى الوعى، التحسس
والتلمّس والربت الحنون إلى مقاطع وجمل موسيقية كانت تراعى مقامات (الطرب) العالى المتميز،
واسقف المُتمنى من غاية (الغناء) والموسيقى بصورةٍ عامة.
تطول الكتابة، ويقصر الوقت فى وسط لهثنا، فلا يكاد المرء ينتصر للفكرة كاملةً، وبكل تجلياتها
وإشاراتها، الظاهرة منها أو الخفية.

أتمنى أن أعود بكتابة (ماهلة) ورحيبة عساها تعادل ما إفترعت من تكهنات هى فى واقع الأمر تساؤلات
دارت وتدور فى خاطر الكثيرين، فلماذا مصطفى تحديداً، ولماذا تلك المكانة، لا فى وسط المثقفين فقط، بل وفى
داخل كافة القطاعات المتباينة الفكر والثقافة والتعليم، بل والمكانة والإنتماء الطبقى الإجتماعى.

شكراً يا أمين.

Quote: هى رؤية مغايرة فعلاً، ليس بما حوته، بل بما ذهبت إليه من (إبتسار) و(إختزال) لمجموع من (القيم) التى تجاهلتها الكتابة عن (ظاهرة) فنية، وعن (وجدان) شاءت له حزمة من الظروف والملابسات أن يتجسد فى ساحة بعينها من الإبداع، وفى شخص/حالة بعينها فى وسط تلك الساحة.

كدا كويس يا امين
يعنى لازم تحرجنا يعنى

اها يا الفالح تعال اشرح لينا طالما ان ورطتنا الورطه دى

عبد الله شمس الدين

كلامك دا قولو لى زول ما عندو حديده

عبدالله ياخي شكرا علي كلامك العميق و مداخلتك الضافيه دي و داير أرد عليها لكن والله الفيني كملت ، بجيك الصباح كان المولي شاء !!












------
طبعا لا يغيب عليك و لا علي القراء الكرام إنو علي بشير ده ما جاء لحوار و زي ما قال خضر حسين : حرم ما جاء لحوار !!

سلام امين

الحته بتاعت غنا مصطفى حكرا لليسار ليست دقيقه

لو اخدته نظره سريعه لمعجبي مصطفى بتلقى فيها كل الوان الطيف

مصطفى قدر يصل لشريحه كبيره

بعدين مصطفى غنا غنا ما تقليدي وده اداهو تفرد

انا معاك مصطفى كان بغني كتير في مجتمعات نخبويه لكن برضو كان بغني للكل

المشكله في بعض الناس فاكرين فن مصطفى ورثه شرعيه ليهم دون سواهم

ودي المشكله

نادر.... يانادر

Quote: المشكله في بعض الناس فاكرين فن مصطفى ورثه شرعيه ليهم دون سواهم ودي المشكله

وهذا هو بيت القصييييييييييييييييييد.....!!!!!

امين تحباتي

كدي خليك من مصطفي الفنان

ماممكن تتحدث او تنقض شخصيه مصطفي الانسان؟

مودتي






____________________
ود الصايم جينا ليك شوق في عيونا

ود الحبر .. بالأكتر والله!!

Quote: كدي خليك من مصطفي الفنان ماممكن تتحدث او تنقض شخصيه مصطفي الانسان؟

كدى الله يقدر وكان قدرك زاتو ماحتقدر هى القدرة زاتها خشم بيوت,,

الحبر

عليك الله امين ماتخلى اصصصصصلو

متابعين

رساله من الاخ نادر عباس :

Quote: أمين تحياتي وبعد يا صديقي مصطفى ضلع أصيل وقيمة فاضلة من قيم المحاننة التي بدأت تفارق ألارض النيلين رويداً رويداً إلى أن خلا السودان وفرغ منها ونفض يديه تماماً. مصطفى يا صديقي كان رافداً من روافد النيل يسقي الحيارى الحب ويطيّب خاطر الفقراء والمساكين، ولعلمك هو لا يزال يفعل ذلك حتى بعد وفاته بأكثر من عقد من الزمان، لقد كان رسولاً للحب هذا في جانب الإنسانية. أما فنياً (موضوع بوستك) فمصطفى كان مشروعه ولا يزال محل نقد وشد وجذب من ذات اليسار الذي تدعي أنه يستأثر بمصطفى وفن مصطفى، اليسار (أو الشيوعيين كما ذكرت) أول من سن فضيلة النقد الذاتي في أنفسهم قبل غيرهم فكيف يفعلون ضد ما يدعون؟؟ ولو راجعت هذا المنبر (وبالمناسبة لقد كنت أنا عضواً في المنبر لأكثر من 6 سنوات) ستجد أن أعمال مصطفى وقد تم تناولها بالنقد بصورة علمية مدروسة من مختصين في مجال النقد الغنائي والموسيقي، ولو رأي عضو المنبر الفنان الأستاذ/ يوسف الموصلي - المنقطع عن البورد هذه الأيام آملاً أن يكون الداعي غير - بوستك هذا لقال نفس ما قلته لك. ومن ضمن ما أذكر من محاور النقد والتنظير في هذا الإطار هو التشابه في القوالب اللحنة لمصطفى سيد أحمد، وكان التبرير لذلك على ما أذكر أن مصطفى كان يحاول جاهداً انتاج أكبر قدر من الأغنيات لمشروعه كأنه كان يعلم أن المنية تطارده وأنه لن يمكث طويلاً في هذه الدنيا. وووو إلى غيره مما ستجد له توثيقاً لو راجعت ارشيف المنبر جيّداً. ومع خالص تقديري واحترامي لك وكيساري لا أدعي وصاية على مصطفى سيد أحمد بل أؤكد على أن مصطفى ملك لكل من غنى لهم من المسحوقين والمعدمين ملح الأرض كما كان يحلو له أن يناديهم أدعوك لتناول مشروع مصطفى وفق رؤية نقدية تسهم بلا شك في بلورة رؤى جديدة في هذا المشروع المتجدد دائماً. وبعد كل ما ذكرته لا أنكر عليك تماماً ما ذكرته في هذا الخيط، قد يكون هناك من اليساريون من شبه لك ذلك، لكن أعلم يا صديقي أن التعميم مخل خاصةً لو جاء في مثل هذه الحالة. ختاماً دعني أستلف لك أبيات الشاعر أسامة الخواض في قصيدته "هكذا كان قلقاً علي مستقبل العشب " في رثاء عبدالخالق محجوب كان مسموعاُ ومرئياُ لدي الزهرةِِ, مقروءً كصفحاتِ الرياضةْْ واسمه السري "راشدْ" واسمه القومي مكتوب باحلام الشبابيكِِ، هكذا ظل وسيكون مصطفى سيد أحمد صوت من لا صوت له في وطن أدمن الهتافات الخاوية.

أمين ياسمين خال حمور اخو بدري
سلام

أول حاجة إنتا جئت لحوار ؟ و لا جاي تمسك بينا زمن ساي ؟

ثاني حاجة حتركز و لا حاتزوغ ؟!
زي المرة الفاتت تعبنا و راهقنا كيبورداتنا جنس مراهقة بي ضهرك
وقعدنا و فرتقنا كلامك و في الاخر طلعتا لينا باحكام قطعية الدلالة و ضايرتا البوست و شتتا

ثالث حاجة : ماهي علاقتك بفرضية فرعنة فرعون ؟

رابع حاجة : رحم الله اخانا حيدر الزين و رد باسورده لانه كان سيريحنا من الكثير هنا






------------------------------------------

هذه المداخلة على سبيل التحية و المجاملة

امين
سلام و مودة

Quote: الأمر من وجهة نظري علي علاقه بإنتماء مصطفي السياسي أكتر من فنو

مصطفى كان ينتمى للحزب الشيوعى السودانى
الحزب تعامل مع مصطفى كما تعاملت مع غيره من فنانيه (من واقع منشزراته و انشطته
كما ان الحزب ظل و لا يزال به الكثير من اهل الفنون و لا احد منهم طاله هذا الاعجاب
كما اذا لاحظت ان(القائمين باعمال) المصطفى فى بورد اب صلعة دا بينهم و الحزب الشيوعى و الشيوعية
نفسها ما صنع الحداد, بل و يصدرون البوستات ضد الحزب
اذن المسالة خاصة بهذا الفنان المتفر حقا و لا دخل لها بالسياسة

مساك الله بالخير يا أمين ...
أي كلمة قلتها في هذا الطرح مظبوطة مائة بالمائة ...
وفعلاً هي تساؤلات مشروعة ....
ولو جردنا المرحوم مصطفى من كل القدسية والهالة المعمولة حوله ، وسألتني عن فنه ...
بقول ليك رأيي فيهو وبصراحة إنو بيطربني فعلاً خاصة لما يغني في منطقة الباص ....
لأنو في المنطقة الصوتية دي بيظهر الفايبريشن بشكل مريح وجميل ؟....
وكمان بقول ليك إنو غناء الراحل فعلاً إرتبط عندي بمرحلة عمرية معينة كنا ( قايمين فيها ) وعاملين فيها من مثقفاتية العالم الما عارف شنو داك ...!
وإنو زول كان غناي وفنان مسؤول فعلاً وإمتاز على غيره بأنه وفي سنواته الأخير تبنى نوعاً من الغناء والكلام المختلف برمزيته وبروح جديدة صاحبت نوع معين من الشعر الكان مطروح من قبل شباب تلك الأيام ....وهو نوع جديد ومختلف شكلاً وموضوعاً عن ما كان مطروحاَ ....
لكن كمان مسألة قدسية نقده دي والله أنا ما شايف ليها أي مبرر ...
لأني ومن زاوية تانية بقول ليك إنو المرحوم كان لمن يغني بالعود بيقد زمن ....!
أو ما بيتقيد بالزمن في الأساس ...!
ودي ( في رأيي المتواضع ) مشكلة وخلل كبير ..
يمكن ناس الموسيقى الأكثر باعاً يفتوني ويقعدوني في ( علبي ) ...
وأنا طبعاً عارف الكلام ده بجيب لي الهواء ..
ومرحب بأي هواء من أي زول ومستعد أثبت ليهو الكلام ده ....!
بس ما يكون الزول ده ود الأمير ...
ببساطة لأنو هو زااااااااتو قادي زمن ....!!


يا أخوانا إن شاء الله تكونوا واقعة ليكم حكاية قادي زمن دي ....!

( الأحمر ده على سبيل الإحتياط وكده ...!)

Quote: هى رؤية مغايرة فعلاً، ليس بما حوته، بل بما ذهبت إليه من (إبتسار) و(إختزال) لمجموع من (القيم) التى تجاهلتها الكتابة عن (ظاهرة) فنية، وعن (وجدان) شاءت له حزمة من الظروف والملابسات أن يتجسد فى ساحة بعينها من الإبداع، وفى شخص/حالة بعينها فى وسط تلك الساحة.

أنا يا عبد الله ماتكلمت عن مصطفي كفن و كظاهره فنيه عشان اختزلها أو ابتسرها ، أنا بتكلم في البوست ده عن سبب القدسيه المعموله لمصطفي و كانو أتي بما لم تستطعه الاوئل !!

Quote: ومصطفى لم ولن يكون حكراً لقبيلة اليسارعامةً، أو الشيوعيين خاصة، ولا لرهط المثقفاتية وحدهم،ودونك من هم منظمين ومنتظمين فى صفوف الحزب الشيوعى، أو منحى اليسار عامةً من المبدعين والفنانين، فهل وصلت أصواتهم لتلك المرتبة والمكانة التى توافرت لمصطفى مثلاً؟؟؟

أها هنا يا عبد الله أنا مختلف معاك ، مصطفي عليه رحمة الله كان و مازال حكراً لقبيلة اليسارعامةً ، و للشيوعيين خاصة، و لرهط المثقفاتية . مصطفي كان بغني للبسطاء ملح الأرض لكن البسطاء ديل ما كانو بسمعو ، كانو بسمعو النخب ! حصل مشيت سوق الخضار و لقيتهم مشغلين شريط لمصطفي ؟ قعدت ليك مع مزارعين بحبو مصطفي ؟ مصطفي غني لعم عبدالرحيم لكن عمك عبدالرحيم ما كان بسمعو : كانو بسمعو المثقفاتيه و اليساريين بشكل عام !!

Quote: دارت وتدور فى خاطر الكثيرين، فلماذا مصطفى تحديداً، ولماذا تلك المكانة،

أنا يا عبد الله ما قاعد أتكلم عن مكانة مصطفي الفنيه ، أنا بتكلم عن سبب القداسه لمكانه الفنيه دي ! و عزيت السبب الأكبر ما فنو لكن إنتماءو السياسي !
و مستني رجوعك تاني لإثراء النقاش .

أب كدوك يا نادر

Quote: الحته بتاعت غنا مصطفى حكرا لليسار ليست دقيقه لو اخدته نظره سريعه لمعجبي مصطفى بتلقى فيها كل الوان الطيف مصطفى قدر يصل لشريحه كبيره بعدين مصطفى غنا غنا ما تقليدي وده اداهو تفرد انا معاك مصطفى كان بغني كتير في مجتمعات نخبويه لكن برضو كان بغني للكل المشكله في بعض الناس فاكرين فن مصطفى ورثه شرعيه ليهم دون سواهم

غنا مصطفى فعلا ما كان حكرا لليسار ده كلام سليم : كان حكرا لليسار و المثقفاتيه عموما ، زول ما مثقف أو عامل فيها مثقف أو يساري ما بحب مصطفي ما قابلني ، في نفس الوقت ما لاقاني زول ما متعلم بحب مصطفي ، زي ما بقول بشاشا : هل ده صدفه ؟
الشي التاني يا نادر مصطفي فعلا كن بغني للكل لكن بسمعوه و بحبو النخبه بس في تقديري .

Quote: وهذا هو بيت القصييييييييييييييييييد.....!!!!!

أبدا والله يا صفوه !
ديل جزء بسيط جدا جدا من المشكله ، لكن ما أسها و أساسها .
الزول البفتكر إنو وريث لفن مصطفي عشان كان صحبو و لا ساكن معاه في غربه يستاهل الشفقه و ليس النقد !!

سلام يا محمد الحبر

Quote: امين تحباتي كدي خليك من مصطفي الفنان ماممكن تتحدث او تنقض شخصيه مصطفي الانسان؟ مودتي

ما فهمت كلامك لو هو سؤال أو استنكار لكلامي عن مصطفي الإنسان ، علي كل في الحالتين أن قلت :

Quote: و بالنسبه لشخصيتو ما عندي شك إنو عليه رحمة الله كان قدر محبه الناس ليهو دي .

الشي التاني أنا أصلا ما تكلمت عن فنو أساسا . أنا استنكرت علي معجبينو إنو يضفو قداسه تمنع نقد فنو ده .

Quote: عليك الله امين ماتخلى اصصصصصلو

أميره و ود الصايم
حرم ما اتيتو لحوار !
الباقي أظنكم عارفنو !!

سبحان الله يا امين

الليلة دي كنتا بتكلم مع زميل لي قلتا ليه بتتخيل اني عمري ما قعدتا سمعتا اغنية عم عبدالرحيم؟؟
بتجي طاشة الدرب علي اضاني لكن عمري ما سمعتها..

مصطفي عمري ما ملكتا ليه شريط
عمري ما فتشتا ليه اغاني..

رغم انو غناي ما فيها كلام لكن المثقفاتية عقدونا من غناهو...
كلامي ما معناها انو ما قدم حاجة دة باعتبارو من الثوابت..لكن الجماعة اياهم يا امين هم الدخلوا فينا العقدة دي وربنا يحلها...

بالنسبة لفناني المفضل وردي (رغم اني بتغاظ منو مرات لكن بريد موسيقاه وغناهو لدرجة الولة ..مش تناقض غريب؟)
وبعدين الكابلي ..الاستاذ دة عندو طبقة صوت وطرب بتوصلني السما وبتجيبني راجعة..
عثمان حسين..صوتو بالنسبة لي عادي لكن حنين جدا ومريح للسمع
زيدان ابراهيم....

وخلاص

حاتم المحيرني و متحير

Quote: أول حاجة إنتا جئت لحوار ؟ و لا جاي تمسك بينا زمن ساي ؟ ثاني حاجة حتركز و لا حاتزوغ ؟! زي المرة الفاتت تعبنا و راهقنا كيبورداتنا جنس مراهقة بي ضهرك وقعدنا و فرتقنا كلامك و في الاخر طلعتا لينا باحكام قطعية الدلالة و ضايرتا البوست و شتتا

الكلام ده جد....هظار....خاتف لونين ؟ قصتو شنو ؟ لانو والله بقيت تحير حناني ذاتو !!

حاتم علي ؟؟؟؟؟؟؟؟

Quote: الكلام ده جد....هظار....خاتف لونين ؟ قصتو شنو ؟ لانو والله بقيت تحير حناني ذاتو !!

Quote: حاتم علي ؟؟؟؟؟؟؟؟

أمين و ابن اخته حمور - كيف الكلام دا معاك يا امين قدمنا الخال على ابن اخته لضروريات اولوية الرد ليس إلا -

الرجاء مراجعة هذا الموضوع:

الحد الفاصل ، سؤال في السياسه !

وسأعود للموضوع المطروح هنا

تحياتي لكما

عوض يا حبيبنا ، سلام

Quote: مصطفى كان ينتمى للحزب الشيوعى السودانى الحزب تعامل مع مصطفى كما تعاملت مع غيره من فنانيه (من واقع منشزراته و انشطته كما ان الحزب ظل و لا يزال به الكثير من اهل الفنون و لا احد منهم طاله هذا الاعجاب كما اذا لاحظت ان(القائمين باعمال) المصطفى فى بورد اب صلعة دا بينهم و الحزب الشيوعى و الشيوعية نفسها ما صنع الحداد, بل و يصدرون البوستات ضد الحزب اذن المسالة خاصة بهذا الفنان المتفر حقا و لا دخل لها بالسياسة

الحزب الشيوعي ما طلع بيان يحث عضويتو علي حب مصطفي ، لكن بالتأكيد كمان مافي شيوعي ما بحب غنا مصطفي ، هل ده صدفه لو ما الاتجاه السياسي الواحد ؟ و دي برضو ما أس البلاء و لا المشكله : لكل شخص الحق في حب من يهوي من الفنانين و الشيوعين من ضمن الكل ده ، أس البلاء هو القدسيه الحاصله من محبي مصطفي .
إستدلالك و إشارتك الخفيه لعمر عثمان كزول أبعد ما يكون عن الشيوعيه و اليسار عموما و من محبي و (القائمين باعمال) مصطفي صحيح لاكن عمر عثمان و كل (القائمين باعمال) مصطفي في بورد أب صلعه ده بيدخلو في الكاتوقري بتاع رهط المثقفاتية !!

عثمان يا دغيس ، سلام من الله عليك

Quote: ولو جردنا المرحوم مصطفى من كل القدسية والهالة المعمولة حوله ، وسألتني عن فنه ... بقول ليك رأيي فيهو وبصراحة إنو بيطربني فعلاً خاصة لما يغني في منطقة الباص .... لأنو في المنطقة الصوتية دي بيظهر الفايبريشن بشكل مريح وجميل ؟.... وكمان بقول ليك إنو غناء الراحل فعلاً إرتبط عندي بمرحلة عمرية معينة كنا ( قايمين فيها ) وعاملين فيها من مثقفاتية العالم الما عارف شنو داك ...! وإنو زول كان غناي وفنان مسؤول فعلاً وإمتاز على غيره بأنه وفي سنواته الأخير تبنى نوعاً من الغناء والكلام المختلف برمزيته وبروح جديدة صاحبت نوع معين من الشعر الكان مطروح من قبل شباب تلك الأيام ....وهو نوع جديد ومختلف شكلاً وموضوعاً عن ما كان مطروحاَ ....

غايتو ما عارف أقول ليك شنو ، ما لانو كل كلمه - بإستثناء الكلام الفني اللي أنا ما بفهم فيهو - قلتها بتعبر تماما عن رايي و بس لكن لانها جات من زول بيعرف موسيقي (ما متاكد يا عثمان لو إنت عزفت لمصطفي ولا لا ) .
كونو في هاله و قداسه معموله لفن مصطفي فافتكر دي مساله ما أظن في زول يقدر ينكرها و كونو مع كل إحترامنا ليهو و لي فنو - إحترام حقيقي ما لظروف صياغة الكلام - ما أظن إنو مصطفي كان أحسن - ولا من أحسن - من أنجبت حواء الغناء السودانيه إلا إذا كنا بنتكلم في محيط و مدارارت المثقفين و اليساريين !!
دايرين لينا نقاش بتاع ناس بتفهم في الموسيقي عن فن مصطفي يعامل فيها زيو و زي أي فنان أخر ، و قد أكون ما متابع لكن ما أظن كانت في تجربه نقديه لفن مصطفي و لا حا تكون في ، ما لم تزح القداسه دي و اللي بتخلي أمر إبحار أي من الموسيقيين أو الفنانين في بحر نقد مصطفي رحله غير مامؤنة العواقب .

تعرف يا ود عمي
قريت كلامك طوالي ولعت شيشة وجيتك
انا من صغري شبيت علي اغاني الفرعون بحكم انه حتي بيخاطبني كنوبي
وفوق هذا شخص فنان لا يختلف عليه شخصان
قوم في التسعينيات يتلموا الاتنين في مصر المحروسة والاتنين برضو بيمثلوا
اليسار العريض..اها انا زول وردي هو فناني الاول والاخير (بالمناسبة انك تفطم علي
حب وردي صعب تغيره)الزملاء في الجبهة الديمقراطية بيعشقوا مصطفي
بس الله قادر ما بلعته..
الي ان كان يوم...
1992شهر سبتمبر اصر مجموعة من الشباب واصطحبوني الي لابس في مصر الجديدة
لجلسة استماع في مصر الجديدة(صالة للمناسبات الخفيفة)وهناك وجدت هذا المصطفي يدوزن
في عوده باغنية عم عبدالرحيم واطلقت احداهن زغرودة فتوقف مصطفي عن العزف وارسل دمعتين
وهو يقول عندما تكون مساحة هذه القاعة ارحب من مليون ميل مربع فهذه كارثة..واخذنا الي
ملكوته..وبحكم تواجد قريب لي في مركز القاهرة للكلي اصبحت اقابل مصطفي هناك..وتعارفنا
اعجبني فيه التزامه وانسانيته الصادقة..فعرفت ان الفن ضمير المجتمع وكيف ان التزامك
بفنك لا يقل عن الصوت والاداء والموسيقي في توصيل رسالتك للمجتمع..
مصطفي ظاهرة تحتاج للبحث والتنقيب ربما تحجيمه في الاطار الضيق قد يضر به ولكن سيكسب
من حمل مصطفي رايتهم من وراء النقد الجاد والموضوعي دون اسفاف او اختزال..
مصطفي قيمته الحقيقية في ايمانه بما قدم وهنا الفرق بين الكنار والانسان الملتزم
فالكنار رغم جمال صوته في الاخر طيرة ساكت..
حكي لي صديق ان مصطفي قد تقاسم السكن مع فتيات من دولة جارة وبعد جلسة وما اكثرها في خرطوم
الثمانينيات وما احلاها ذهب بعض السمار من شلة مصطفي الي القسم الاخر للونسة معهن
عندما احس مصطفي بذلك ذهب اليهم وطردهم من منزله قائلا :انا ديل اخواتي وما برضي اصحابي
يتسامروا معاي ويمشوا انصاص الليالي يتونسوا معاهن ..تاني ما تجوني..
الله يرحمه علامة فارقة وفن ملتزم وده الفرق بينه وبين الباقين بما فيهم الفرعون..

سلام يا ساره

Quote: سبحان الله يا امين الليلة دي كنتا بتكلم مع زميل لي قلتا ليه بتتخيل اني عمري ما قعدتا سمعتا اغنية عم عبدالرحيم؟؟ بتجي طاشة الدرب علي اضاني لكن عمري ما سمعتها.. مصطفي عمري ما ملكتا ليه شريط عمري ما فتشتا ليه اغاني.. رغم انو غناي ما فيها كلام لكن المثقفاتية عقدونا من غناهو... كلامي ما معناها انو ما قدم حاجة دة باعتبارو من الثوابت..لكن الجماعة اياهم يا امين هم الدخلوا فينا العقدة دي وربنا يحلها...

عجبني جدا تعبيرك بتاع (المثقفاتية عقدونا من غناهو) لانو فعلا حقيقه ، علي الأقل بالنسبه لي أنا .
و المشكله إنو ما في مفر و لا في حته تتضاري فيها كان عندك راي في غنا مصطفي ، فالمثقفاتيه هم البكتبو و بقرو الجرايد وهم البكتبو و بقرو المنتديات ، هم أصحابنا و فردنا و أخوانا و أخواتنا الكبار و الصغار : عندك راي في غنا مصطفي تقطعو في حشاك و يا بخت من بعد من الشر و غنالو !!
نقد فن مصطفي أصعب من نقد الدين لانو نقدو رده فكريه و نقد الدين إستناره ! و دونك خوفي من فتح البوست ده و دونك كلام هارون الصفوه في أول مداخله و كلام دغيس - النقد حاجات فنيه في أداء مصطفي - لكن نقدو ده حا يجيب ليه الهوا زي ما قال ، و حا يجيب لي الهوا زي ما قال لي هارون !‎!! و الامثله دي من بوست ما تم 24 ساعه من فتحو .
منو من الفنانين في وطننا الشقيق منذ تاسيس الغنا في عهد بعانخي* لحدي الليله لو الواحد عايز ينتقد عملو الفني ، أو يقول ياخي أنا ما شايف ليهو شيتا زائد في الغنا بكون خايف علي رقبتو من التنميط السالب و الهوا و الكلام الكتير ، منو غير مصطفي ؟!! و ده تحديدا القدسيه البتكلم عنها دي !!


-------
*طبعا دي نجره مني ساي !!

العزيز أمين

تحايا طيبة,

* أول حاجة لابد من تثبيت أنني لم أقرأ كامل البوست فأكتفيت الآن بالمداخلات الأولي فقط لفهم الموضوع علي أمل العودة للبقية.

* ثانيا اليك هذه الحكاية :

صديقي وشقيق زوجتي كان بليبيا وكان يسكن مع أبناء قريته

حكي لنا أحد الذين كانوا يشاركونه السكن التالي :

كان عبدالعظيم (فاقعنا بأشرطة مصطفي) ونحن ما قادرين نقول حاجة لأنه يكبرنا سنا هذا أولا, وثانيا لأنه درسنا في المتوسطة.

فقال أحدهم للبقية........ والله يا جماعة مصطفي ده لا بيعرف يغني ولا حاجة لكن خوفنا من أستاذ عبدالعظيم هو المصبرنا عليه

أسع نقوم نقول ليه الكلام ده يطلعنا متخلفين وما بنعرف نستمع للغناء الجيد.... ونبقه في البفكنا منو... عشان كده نتحمل بس.



-----------------------------------------------

طبعا عن نفسي أنا من المدمنين لغناء مصطفي..... لدرجة أنني واقف عنده والذين سبقوه فقط.

Quote: فعرفت ان الفن ضمير المجتمع

بل قل ان اللحظات التاريخية التى اتى فيها الفنان الانسان مصطفى سيد احمد بابداعاته ملأ فراغات الجوع و الاشواق عند الفقراء والغبش بكل اقتدار..







شكرا يا امين يا قريبى

آمين ودزينب سلام,

مصطفى حسب علمي كان ديمقراطي وليس شيوعي منظم ولكن حتى لو افترضنا جدلا إنه كان شيوعي فـوردي و محمدالامين شيويان و مع ذلك لم يكف الناس عن نقدهم في رأي هو قربـه من الناس الذي حبب الناس فيه بجانب تميزه في اداء الحدوتة الشعبية وليس الأداء الوصفي المباشر

Quote: مصطفى حسب علمي كان ديمقراطي وليس شيوعي منظم

العزيزة الأستاذة عفراء

تحياتي

المعلومة أدناه للتأريخ وليس لشئ سواه..... ولولا كلامك أعلاه لما كنت سأقول قولي هذا:

* عندما كنت عضوا منظما بالحزب الشيوعي السوداني كنا المرحوم مصطفي وشخصي في فرع حزب واحد .

شكرا أستاذ عاطف للتوضيح

معلومتي كان مصطفى عليه الرحمة هو مصدرها في بدايات 1989 ولكن من الواضح ان معلوماتك اكثر دقة

شكرا مرة أخرى

هلا يا امين...
وموضوعك ده بالمناسبة فيهو بوح وبهابش جزئية من الضروري ان ينتبه ليها اليسار العريض والمثقفاتية..
ليييييه..؟؟؟
كدي قبل ما نجي لمصطفي سيداحمد في جدل ونقة كده ابتدروها ناس اليسار ديل زاااتهم والمثقفاتية
(عن ايدلوجيا الفن) وانو الايدلويجا في طريقها للتطبيق علي ارض المجتمع من الضروري ان تشيل معاها في الطريق ده الفنون بصورة عامة ورواد التغيير هم الفنانين..
تاريخيا وردي كان يتم التسويق له كفنان مربط بسيرة اليسار وان كان وردي قد السلك وعبر الحانه الشجية قد هرب من نافذة (الفعل الايدلوجي) الي قلوب الشعب... لانو موسيقاه طالعة من جوووف الشعب وما مبنية علي فكرة ايدلوجية احادية..
ثم كانت هنالك مغازلة لابو اللمين ثم العركي ...وامال النور وكثيرا كان العشم اليساري والمثقف ينظر اليهم بعيون (توطين ايدلوجيته) ولكن في كل الاحوال كان الفنان غير مستعد للعب هذا الدور لانه بعزله من محيطه ويضعه كسمكة زينة فنية في محيط ايدلوجي صاخب..
....................
نجي للراحل مصطفي سيد احمد وهو بالتاكيد فنان بدرجة مهيبة ومجدد علي مستوي الالحان وعلي مستوي الكلمات وكان علامة فارقة في مسيرة الغناء السوداني... وتقافته العالية ولعل ايضا يساريته مغرية تماما لكل حزب يساري ان يضعه في كرسي (الفنان الغايب) ويربطه ببرنامجه السياسي والثقافي..
ولكن مصطفي سيداحمد وجد نفسه متنازعا مابين فكرة الفنان الغايب عند اليسار وفكرة فلسفته لفنه الخاص الذي يريد ان يرسله لكل الناس..
الجدار والحاجز المبني حول مصطفي هو مسئولية اليسار الذي يبحث عن (فنانه الغائب) ولذا يتم شحن مفردة مصطفي وغناوي مصطفي بدلالات هدفها الاساسي خدمة الايدلويجيا..والشحن ده هو الببني الاسقاطات
الانطباعية في موسيقي مصطفي ووساعتها كل شي بيعزل الخطاب الايدلوجي عند اليسار هو ايضا قادر في مكان ما علي عزل غناوي مصطفي عن العامة(وممكن يتقال ليك ده فنان شيوعي ..او ده فنان بتاع شيوعيين)
وهكذا موانع...
طالما ارسل مصطفي مشروع موسيقي وغنائي في الفضاء السوداني فهو تحت النقد بالتاكيد لفنه كده موسيقي
وككلمات والحان ....
ورغبة صناعة الفنان الغائب لن تتوقف وسيظل يبحث اليسار العريض عنه طويلا وسيظل النزاع ما بين ادلجة الفن او فن الفن مدورة وفي النهاية هنالك فنان عظيم تعزل اغانية والحانه عن الكثيرين كون الفن يشحن بالاديلوجيا والمستمع يشحن اذنه الموسيقية بالاشياء التي يكرهها في تلك الايدلوجيا...
و
ولسع جاييك لجزئية العاملين فيها خلفاء راشدين لورثة مصطفي الفنية
والوعي الغريب الموجود عندهم

امين خال حمر

احتراماتي

ليه ما عارف بحس مرات انه مثلك الاعلى ديك العده
اكان نهرتو بكسر العده واكان خليهو بكسر العده ..

فوق حتى لا يصير مصطفى صنما يعبد
و يبقى فن مصطفى تنذوقه نجرح فيه ان رأينا ما يقتضي


البصاص

الاخ امين سلام

Quote: الأمر من وجهة نظري علي علاقه بإنتماء مصطفي السياسي أكتر من فنو

سؤال لكم جميعا

كم عدد عشاق مصطفى

أكثر هم أو أكثر أعضاء (الحزب الشيوعى/الأحزاب الشيوعية) فى العالم العربى


اظنك عرفت عذاب المغني !!!

تحياتي وسلامي أمين

أول جملة خطرت ببالي وأنا أقرأ هذا البوست أن أقول لك

" شكيتك على الله يا أمين ، طرشقت لى فكرة البوست الذي أجهز مادته ، بل واخترت له عنوان

" أنا لست مثقفاً ولم أكن كذلك في يوم من الأيام "

تدور فكرته في عرض بعض ( المعطيات ) التي أصبحت ضرورة ولازمة لكل من يود أن ينظر له الآخرون على أنه مثقف أن يتصف بها .
من ضمن تلك المعطيات ( الوله والهيام ) في حب الفنان الراحل مصطفى سيد أحمد

لكنني ما لبثت أن شكرتك في سري أن أوصلت فكرتي دون أن تعرضني لمسؤولية مصاقرة البوست وتولي الردود . ( شفت الإنتهازية دي كيف ؟؟ ) أصلو أخوك من مدرسة الأستاذة تماضر شيخ الدين فقد صح عنها القول ذات مرة .

" أنا بستغرب في الناس البتفتح بوست ، وتقعد تحرسوا تلاتة أو أربعة صفحات . أنا من أفتح لى بوست أقول يا رب متين ( يحتل ) وارتاح منو "
أو كما قالت .

متابعين

حكومه يا ابن عمي ، سلام

Quote: الزملاء في الجبهة الديمقراطية بيعشقوا مصطفي بس الله قادر ما بلعته..

Quote: مصطفي قيمته الحقيقية في ايمانه بما قدم وهنا الفرق بين الكنار والانسان الملتزم فالكنار رغم جمال صوته في الاخر طيرة ساكت..

Quote: الله يرحمه علامة فارقة وفن ملتزم وده الفرق بينه وبين الباقين بما فيهم الفرعون..

شفت يا عبد الحكيم ، ده كلامي ذاتو إنو قصة مصطفي و الهاله دي كلها جايه من إنتماؤ السياسي !
إنت ما بلعت فنو إلا لمن شفت إلتزامو بقضايا وطنو لانو إنتو الإتنين شايفنها بنفس الاتجاه اللي هو الاتجاه الشيوعي أو اليساري عموما .
الشيوعيين و مثقفي اليسار هم العملو الهاله و القداسه دي لمصطفي ما لانو فنان عظيم ، لكن لإنتماؤ السياسي .
بالنسبه لي مثلا وردي هو الفن و الطرب يمشي علي قدمين : ده رايي من ما وعيت علي الدنيا و وردي شيوعي و معارض للحكومه دي و وردي بغني في قعده لعمر البشير !! رايي في فن وردي ما اتغير !!
أنا متاكد تماما إنو لو كنت شيوعي ، هسي كنت حا أكون بدافع عن فن مصطفي و صوتو و أداؤه و أنا في الحقيقه بدافع عن مواقفو السياسيه المطابقه لموقفي .

Quote: صديقي وشقيق زوجتي كان بليبيا وكان يسكن مع أبناء قريته حكي لنا أحد الذين كانوا يشاركونه السكن التالي : كان عبدالعظيم (فاقعنا بأشرطة مصطفي) ونحن ما قادرين نقول حاجة لأنه يكبرنا سنا هذا أولا, وثانيا لأنه درسنا في المتوسطة. فقال أحدهم للبقية........ والله يا جماعة مصطفي ده لا بيعرف يغني ولا حاجة لكن خوفنا من أستاذ عبدالعظيم هو المصبرنا عليه أسع نقوم نقول ليه الكلام ده يطلعنا متخلفين وما بنعرف نستمع للغناء الجيد.... ونبقه في البفكنا منو... عشان كده نتحمل بس.

يا ابومكاوي
تعرف أنا ممكن ااكد ليك إنو في كميات زي نسيبك ده ، مش كده و بس ، ممكن يكون في ناس كتار بيدعو حب مصطفي تبع القشره الثقافيه لا أكتر ولا أقل ، لانو أنا متاكد تماما إنو مصطفي سيد أحمد عليه رحمة الله كفنان أقل كتير جدا جدا من الهاله المعموله ليه !!

Quote: تعرف أنا ممكن ااكد ليك إنو في كميات زي نسيبك ده ، مش كده و بس ، ممكن يكون في ناس كتار بيدعو حب مصطفي تبع القشره الثقافيه لا أكتر ولا أقل

الصديق أمين

أعتقد بأنك مداختي غلط

أنا لم أوحي بأن نسيبي (مدعيا).... بل علي العكس فهو مثقف لا يشق له غبار وصادق جدا في حبه لمصطفي

لكن الذين كانوا يشاركونه السكن لا يحبون غناء مصطفي ولكنهم مجبرون علي سماعه احتراما لأستاذهم وابن قريتهم

الذى يكبرهم سنا .

Quote: كم عدد عشاق مصطفى أكثر هم أو أكثر أعضاء (الحزب الشيوعى/الأحزاب الشيوعية) فى العالم العربى

كده ضيعت الحزب الشيوعي السوداني و ضيعت مصطفي زاتو







__
ده حسب إحصائية عدد العرب عام النكسة, خليك من اسه.

تعرف يا امين ود الجيران "الولائى "
ما كتب عن انطوان تشيكوف مكتبات كاملة
لانه كاتب مثير للجدل
وما سيكتب عن مصطفى ايضا سيكون بما لا يحصى
لانه فعلا مغنى مثير للجدل
كلما تدخل عليه من ناحية تجد النواحى تشعبت
رغم انه رحل قبل ما يزيد عن العقد ونصف
لكنه ما زال يثير الاسئلة

حكاية انه شيوعى دى اعرفها عنه بحكم الدراسة معه والتزامل
وكان يصر ان التغيير فى السودان "لازم يكون احمر "على حد قوله

لكن يا اخى الكريم مازلت اقول انه فنان مثير للجدل بما لا يتوقف
وارجو ان تلاحظ معى الاحتفالات التى تتزامن لرحيله فى كل انحاء الدنيا
لسودانيي الديسابورا هل فى جملتهم شيوعيين ؟

الاستاذه الام سلمي الشيخ اضم صوتي الي صوتك


الاستاذ أمين

هل هذا الإنتماء السياسي يعني هو الذي صنع هذه القامة الفنية!!!؟

بالطبع لا

فإذا كانت الإجابة نعم لكنا نملك الآن المئات من "مصطفى سيد أحمد.

وإنما قدم مصطفى غناءا، مميزا خارج عن مألوف الغناء الذي يسمعه جميع السودانيين، بما فيهم عضوية الحزب نفسه

قدم لنا إنتاجا ممهورا ببصمته هو شصيا.

تحياتي يا أمين

معلوم أن مصطفى تغنى لعدد مقدر من الشعراء تنوعت انتماءآتهم الفكرية فلولا مصطفى لما سمعنا بالقدال ولاحميد ولا الكتيابي ولا صلاح حاج سعيد ، وكثير من أغاني مصطفى لا تحمل طابعاً سياسياً لذلك يصعب القول ان فن مصطفى مملوك أو محتكر من فئة معينة لتنوع انتماءات معجبيه ومحبي فنه ، في اعتقادي ان تجربة مصطفى تجربة فريدة ومحاولة إكسابها أي بعد سياسي يضر بها أو ينسفها .. مع العلم بإنتمائي لجيوش العوام وقليلي الثقافة ممن يهيمون في حب مصطفى ..

Quote: الاستاذ أمين هل هذا الإنتماء السياسي يعني هو الذي صنع هذه القامة الفنية!!!؟ بالطبع لا فإذا كانت الإجابة نعم لكنا نملك الآن المئات من "مصطفى سيد أحمد. وإنما قدم مصطفى غناءا، مميزا خارج عن مألوف الغناء الذي يسمعه جميع السودانيين، بما فيهم عضوية الحزب نفسه قدم لنا إنتاجا ممهورا ببصمته هو شصيا

يامعلم
دا من راسك ولا من الكوبي
غايتو بقيتو تسووها ظااااهرة

Quote: يامعلم دا من راسك ولا من الكوبي غايتو بقيتو تسووها ظااااهرة

من الكوبي







_____________________________
حيدر الزين قالو بالانعاش بسبب ايقافه

Quote: حيدر الزين قالو بالانعاش بسبب ايقافه

كده كويس يا حيدر اسه , تشّمت فينا الحبر

التحية للفنان الذي ألبس الشعراء تيجان الغار، وكحل عيون الدنيا بطعم الغنوة!!!!!!

والله الواحد من ناحية ممتعض وأحياناً يحسبه نوع من الحسد!!!
ياخي طالما مصطفى فنان محترم وغناه جميل، الناس بتحبه!!!!
بعدين غناه للمتأمل مش زي غنا الناس اللي أنت حكمت عليه بأنه عادي. وأغاني الغير عنده لها طعمها الخاص..... نصيحتي ليك ما تنزلق في دربك الماشي فيهو ده!!!

حتى بعد موت مصطفى لماذا تأبون علينا أن نحبه وندافع عنه بكل ما أوتينا من قوة، ونحافظ على رقي فنه فينا!!!!!!! هل هذا معيب؟؟؟

لماذا لا تريدوا لهذا الكروان أن يغني؟؟؟ ورغماً عن كل الظروف هو يغني حتى بعد رحيله !!!!!
نحبه وندافع عن فنه في داخلنا وفي داخل الوطن المليون ميل!!!!!!
مصطفى ده هو الفنان الظاهرة!!!!!!
يعني فارض نفسه!!!! انت الحارقك شنو داير أعرف؟؟؟؟
التحية لبدر الدين ود الأمير، وأقول له خليك دائماً "دايس على الإبر المسممة بالكلام".
بعدين انت قلت ثقافة حب مصطفى ثقافة يسارية!!! يا أخي الصحيح هو ثقافة حب مصطفى ثقافة سودانية خالصة!!!! مثلاً أنا بحب مصطفى وليس لي انتماء سياسي!!!

Quote: الصديق أمين أعتقد بأنك مداختي غلط أنا لم أوحي بأن نسيبي (مدعيا).... بل علي العكس فهو مثقف لا يشق له غبار وصادق جدا في حبه لمصطفي لكن الذين كانوا يشاركونه السكن لا يحبون غناء مصطفي ولكنهم مجبرون علي سماعه احتراما لأستاذهم وابن قريتهم الذى يكبرهم سنا .

صدقت يا عاطف ، يبدو أن الأمر قد التبس علي ، لك و لنسيبك الاعتذار والعتبي .

قرشي يا ابن عمي سلام من الله عليك !

Quote: بل قل ان اللحظات التاريخية التى اتى فيها الفنان الانسان مصطفى سيد احمد بابداعاته ملأ فراغات الجوع و الاشواق عند الفقراء والغبش بكل اقتدار..

مصطفي فعلا غني لفقراء و غبش بلادي لكن ما أظنهم سمعوه ، الكانو و بسمعو فيه لحدي الليله ديل مثقفي و نخبة بلادي ما فقرائها .

سلام يا عفراء

Quote: في رأي هو قربـه من الناس الذي حبب الناس فيه بجانب تميزه في اداء الحدوتة الشعبية وليس الأداء الوصفي المباشر

أداء مصطفي وافق هوي المثقفاتيه و ناس اليسار لانو هو نفسو بينتمي ليهم و دي في حد ذاتها ليس عيبا أو منقصه .

Quote: آمين ودزينب سلام,

‎------------
غايتو يا عفراء قصة امين ود زينب دي بالغتي فيها ، ياخي أنا إسمي بقي جاري سطر كامل تجي تزيديه بإسم الحجه ؟!
بعدين ياخي معناتها في معرفه اسريه ، أوعي تكوني قريبتنا متنكره !

سلام أمين

Quote: أوعي تكوني قريبتنا متنكره !

أنا قربت ابقي قريبتكم أنابت امنة حسن جميل اخت المرحومةبثينة حسن جميل جارتكم والدة اولاد الكوباني وخالة هنية عبـيد اها قسرت معاك؟؟؟

Quote: أنا قربت ابقي قريبتكم أنابت امنة حسن جميل اخت المرحومةبثينة حسن جميل جارتكم والدة اولاد الكوباني وخالة هنية عبـيد اها قسرت معاك؟؟؟

قربتي شنو يا عفراء ، إنت دخلتي في اللحم و العضم عديل !!!!!

سلام يا كريم و كتر خيرك علي مداخلتك السمينه و الثمينه دي

Quote: هلا يا امين... وموضوعك ده بالمناسبة فيهو بوح وبهابش جزئية من الضروري ان ينتبه ليها اليسار العريض والمثقفاتية.. ليييييه..؟؟؟ كدي قبل ما نجي لمصطفي سيداحمد في جدل ونقة كده ابتدروها ناس اليسار ديل زاااتهم والمثقفاتية (عن ايدلوجيا الفن) وانو الايدلويجا في طريقها للتطبيق علي ارض المجتمع من الضروري ان تشيل معاها في الطريق ده الفنون بصورة عامة ورواد التغيير هم الفنانين.. تاريخيا وردي كان يتم التسويق له كفنان مربط بسيرة اليسار وان كان وردي قد السلك وعبر الحانه الشجية قد هرب من نافذة (الفعل الايدلوجي) الي قلوب الشعب... لانو موسيقاه طالعة من جوووف الشعب وما مبنية علي فكرة ايدلوجية احادية.. ثم كانت هنالك مغازلة لابو اللمين ثم العركي ...وامال النور وكثيرا كان العشم اليساري والمثقف ينظر اليهم بعيون (توطين ايدلوجيته) ولكن في كل الاحوال كان الفنان غير مستعد للعب هذا الدور لانه بعزله من محيطه ويضعه كسمكة زينة فنية في محيط ايدلوجي صاخب.. ....................

و ده بالظبط الحصل لمصطفي و دي سبب فتح البوست و كلامي كلو :
مصطفي و حب مصطفي بقي تيمه من تيم اليسار و المثقفين عموما ، يعني ما ممكن تكون مثقف أو يساري سوداني بدون ما تكون بتحب مصطفي أو هو فنانك المفضل عديل كده . حب مصطفي و فن مصطفي بقي جزء من أيدلوجية اليسار و المثقفين عموما !!
حتة محاولات اليسار لمغازلة فنانين أخرين كانت غايبه علي تماما و إنت سلط عليها الضو بالتفصيل .

Quote: طالما ارسل مصطفي مشروع موسيقي وغنائي في الفضاء السوداني فهو تحت النقد بالتاكيد لفنه كده موسيقي وككلمات والحان .... ورغبة صناعة الفنان الغائب لن تتوقف وسيظل يبحث اليسار العريض عنه طويلا وسيظل النزاع ما بين ادلجة الفن او فن الفن مدورة وفي النهاية هنالك فنان عظيم تعزل اغانية والحانه عن الكثيرين كون الفن يشحن بالاديلوجيا والمستمع يشحن اذنه الموسيقية بالاشياء التي يكرهها في تلك الايدلوجيا... و ولسع جاييك لجزئية العاملين فيها خلفاء راشدين لورثة مصطفي الفنية والوعي الغريب الموجود عندهم

في حدود علمي الفني البسيط مصطفي ما كان تحت النقد لفنو موسيقتو وكلماتو والحانو وده نتيجة الحمايه و القداسه العاملنها المثقفين و اليساريين عموما . نقد فن مصطفي يا كريم مثل نقد اليسار يستدعي هجمات (شرسات) من قبل منسوبي اليسار فاثر الناس الصمت خشية الهوا !
قصة إنك بتفتكر إحتضان اليسار لفن مصطفي و دمغ فنو بالايدلوجيه اليساريه عزل اغانية والحانه عن الكثيرين جديره بالتأمل و التدبر و النقاش حولها !!
الخلفاء الراشدين لورثة مصطفي الفنية ديل (مبلولين ) بيهم إنتو ناس الدوحه : الله يصبركم بس !!

سلام يا عاطف

Quote: " شكيتك على الله يا أمين ، طرشقت لى فكرة البوست الذي أجهز مادته ، بل واخترت له عنوان " أنا لست مثقفاً ولم أكن كذلك في يوم من الأيام " تدور فكرته في عرض بعض ( المعطيات ) التي أصبحت ضرورة ولازمة لكل من يود أن ينظر له الآخرون على أنه مثقف أن يتصف بها . من ضمن تلك المعطيات ( الوله والهيام ) في حب الفنان الراحل مصطفى سيد أحمد

هسي يا عاطف لو طلعت من ناس (لو أقسم علي الله لابره) أنا أقبل وين ؟
رايي إنك تفتح البوست لانو رغم ملامح شبهو لبوستي ده ، إلا إنو فكرتك أعمق و أشمل و الأهم من ده إنت في عضمتك أعمق من سيد البوست ده ا كثر قدره علي الردود مما سيدفع النقاش إلي الأمام و من ثم نستفيد كلنا كدابنا من بوستاتك .

بت الشيخ جارتنا الولائيه و صديقتنا الإسفيريه ، سلام

Quote: تعرف يا امين ود الجيران "الولائى " ما كتب عن انطوان تشيكوف مكتبات كاملة لانه كاتب مثير للجدل وما سيكتب عن مصطفى ايضا سيكون بما لا يحصى لانه فعلا مغنى مثير للجدل كلما تدخل عليه من ناحية تجد النواحى تشعبت رغم انه رحل قبل ما يزيد عن العقد ونصف لكنه ما زال يثير الاسئلة

مصطفي فعلا فنان مثير للجدل و أكبر دليل نقاشنا ده و زي ما قلتي زول توفي قبل أكتر من عشره سنين و نحن لسه بنتناقش عنو و فيهو ، و في رايي الجدل ده جايبو إنتماء مصطفي السياسي بصوره مساويه أو تقل قليلا عن فنو ، ما عارف لو مصطفي ما كان يساري و سياسي منظم : هل كان صمد غناهو لحد الآن ؟

تعرف يا امين عارفك حتصنفني شيوعي
ولكن يا امين هذا شرف لم انله انا زول ما عندي
انتماءات سياسية..ولكن مصطفي بيعجبني لانه غني للناس البسطاء
وانتمي ليهم حقيقة

Quote: ما عارف لو مصطفي ما كان يساري و سياسي منظم : هل كان صمد غناهو لحد الآن ؟

هنا المحك
هل مصطفي لو ما كان يساري كان قدر يقدم العمل المتميز ده؟
علي فرض انه مصطفي ده محل قيقم كان حيقدر يغني عم عبدالرحيم
وعمنا الحاج ود عجبنا..؟؟
اليسار يضيف للانسان ومصطفي عندما اصبح يساريا لم يصبح كذلك ليدعم
اليسار مسيرته الفنية ..لا
اصبح يساريا لان الابداع هناك والافكار النيرة والمبدعين والابداع

ياخي محمد وردي قدس الله سره واطال بقائه..كان في امانة الله بيغني
يا شعبا لهبت ثوريتك ووو
اتنكر لتاريخه واختلف مع محجوب شريف واليسار واصبح جليس عبدالرحيم
غني شنو بعد داك؟؟يا عجب يا تعب؟؟ده بيشبه تاريخه وفنه..فارقهم واصبح
ياكل من سنامه (وهو دسم جدا)
اليسار يستطيع صناعة الفنان واليساري الفنان يستطيع ان يضيف لفنه ولفكره..
فالفنان ايضا يحتاج لتلميع..رغم ان مصطفي كتب اغلب تاريخه بكفاحه اكتر من تلميع اليسار
المباشر له..(لان الفترة كانت بسيطة من 86ـ89)

فاليسار والابداع صنوان..

حاتم
قلت لي :

Quote: الرجاء مراجعة هذا الموضوع: الحد الفاصل ، سؤال في السياسه !

راجعت الموضوع المطروح في بوستي الجبتو ده و راجعت معاهو حاجات تانيه وقريت كلامك ده مرتين تلاته عشان أتاكد من إنك فعلا كتب الكلام الشايفاهو عيوني دي :

Quote: أول حاجة إنتا جئت لحوار ؟ و لا جاي تمسك بينا زمن ساي ؟ ثاني حاجة حتركز و لا حاتزوغ ؟! زي المرة الفاتت تعبنا و راهقنا كيبورداتنا جنس مراهقة بي ضهرك وقعدنا و فرتقنا كلامك و في الاخر طلعتا لينا باحكام قطعية الدلالة و ضايرتا البوست و شتتا

و لقيت الأتي :
إنو أنا عمري ما إتداخلت معاك و لا غيرك - كان في بوستي الإنت جبتو ده ولا في بوست تاني بغير كل أدب و إحترام و رغبه جاده في الحوار يبقي كيف أنا جاي أمسك بيكم زمن ساي و ما جاي لحوار ؟
لقيت برضو إنو أخر مداخلتين في البوست ده كانت مني و أخر مداخله بينا كانت مني ليك و إنت الما جيت : يبقي كيف زايغ منك و كيف إتضايرتا و شتتا و البوست قاعد و إنت ما رديت ولا علقت علي كلامي ؟
--------
قبل كده يا حاتم أنا قلت ليك ياخي أنا تاني ما حا اتداخل معاك لانك قولتني كلام أنا ما قلتو و فضلت وراك و (بليتك ) (بل) العرديب لحدي ما اعتذرت لي في العام هنا و في الخاص هناك ، اكبرت فيك المساله دي و انتهيت من الموضوع ده ، جيت تاني عملت عمليتك دي في بوستي الجبتو هنا ده ذاتو و ما سالتك ، تاني هسي جيت كتبت سخفك و كلامك الفوق ده ، فدحن يا حاتم يا أخوي خليني أقول ليك كلمتين ختهم حلقه في إضنينك الكبار ديل - رغم إنو أنا ما شفتهم - لو عايز تخش معاي في أي نوع من أنواع النقاش دائما تذكر :
أملك من الصبر علي أذاك و أذي أمثالك ما لا تظن ، و من الأدب والإحترام لنفسي و للناس ما لا تفهمه بسوء طويتك ، و من الأخلاق ما يفوق قامتك ولو اعتليت سلما ، و من الحجه و المنطق و المعرفه ما (أقعد ) سبعتاشر من نوعيتك دي في (علبها) ، مشكلتي كلها إني لا أملك من الوقت ما يكفي !!! يعني عندي مشكلة زمن ، فدحن يا حاتم يا أخوي أختاني و شوف ليك شغله تانيه غيري ، لانو أنا والله ما فاضي ليك !!






----------
معليش يا أخوانا علي الخروج من النص الاضطراري ده !!

بكري يا حبيبنا سلام

Quote: معلوم أن مصطفى تغنى لعدد مقدر من الشعراء تنوعت انتماءآتهم الفكرية فلولا مصطفى لما سمعنا بالقدال ولاحميد ولا الكتيابي ولا صلاح حاج سعيد ، وكثير من أغاني مصطفى لا تحمل طابعاً سياسياً لذلك يصعب القول ان فن مصطفى مملوك أو محتكر من فئة معينة لتنوع انتماءات معجبيه ومحبي فنه ، في اعتقادي ان تجربة مصطفى تجربة فريدة ومحاولة إكسابها أي بعد سياسي يضر بها أو ينسفها .. مع العلم بإنتمائي لجيوش العوام وقليلي الثقافة ممن يهيمون في حب مصطفى ..

و ممكن بنفس القدر يا بكري أقول ليك لولا القدال وحميد والكتيابي و صلاح حاج سعيد ما كان في زول سمع بمصطفى !!
أختلف معاك جدا في مسألة تنوع انتماءات معجبي مصطفي ومحبي فنه ، في رايي معجبيه ومحبي فنه في غالبيتهم الغالبه جدا : يساريين و مثقفين فقط لا غير .
مسألة البعد السياسي في أغاني مصطفي ده مساله جابها هو و من ينتمي ليهم سياسيا ما جبناها نحن و دي الحاجه الغابة ليهو الحصانه و القداسه المضروبه حولو دي .
بعدين يا بكري ياخي مافي زول بيكتب في بورد بكري ده ممكن يكون من جيوش العوام وقليلي الثقافة : إنت شكلك اتعقدت من موضوع أبوالريش ده ساي ) لوووول

وهبه و خدر ارفعو يدينكم من ود الحبر ده و إنت يا ود الحبر أرفع يدك من الطريفي صاحبي : الزول ده لو في حرم سيرتو ساي ما تقدر تجيبها !!

سلام يا عبد اللطيف

Quote: التحية للفنان الذي ألبس الشعراء تيجان الغار، وكحل عيون الدنيا بطعم الغنوة!!!!!! والله الواحد من ناحية ممتعض وأحياناً يحسبه نوع من الحسد!!! ياخي طالما مصطفى فنان محترم وغناه جميل، الناس بتحبه!!!! بعدين غناه للمتأمل مش زي غنا الناس اللي أنت حكمت عليه بأنه عادي. وأغاني الغير عنده لها طعمها الخاص..... نصيحتي ليك ما تنزلق في دربك الماشي فيهو ده!!! حتى بعد موت مصطفى لماذا تأبون علينا أن نحبه وندافع عنه بكل ما أوتينا من قوة، ونحافظ على رقي فنه فينا!!!!!!! هل هذا معيب؟؟؟ لماذا لا تريدوا لهذا الكروان أن يغني؟؟؟ ورغماً عن كل الظروف هو يغني حتى بعد رحيله !!!!! نحبه وندافع عن فنه في داخلنا وفي داخل الوطن المليون ميل!!!!!! مصطفى ده هو الفنان الظاهرة!!!!!! يعني فارض نفسه!!!! انت الحارقك شنو داير أعرف؟؟؟؟ التحية لبدر الدين ود الأمير، وأقول له خليك دائماً "دايس على الإبر المسممة بالكلام". بعدين انت قلت ثقافة حب مصطفى ثقافة يسارية!!! يا أخي الصحيح هو ثقافة حب مصطفى ثقافة سودانية خالصة!!!! مثلاً أنا بحب مصطفى وليس لي انتماء سياسي!!!

كتر خيرك علي مداخلتك اللي بتدينا بيان بالعمل عن بعض ما أحاول أن أقول هنا :
يعني يا عبداللطيف يا أخوي لمن تقول لي ( نصيحتي ليك ما تنزلق في دربك الماشي فيهو ده!!!) مش كانو أنا تكلمت في ذات الله تعالي مش وجهت نقد موضوعي لفنان ممكن الناس تحب غناهو و ممكن تشوفو عادي المستوي و لا يرقي لأن يكون الكلام الكبير القلتو ده ؟!!
بعدين يا عبداللطيف ياخي حسد شنو لا سمح الله ؟ و أنا لا عندي علاقه بالسياسه ولا بلغناء ، و كلامي ده كلو لا يخرج عن وجهة نظر شخصيه جدا قد تكون صحيحه و قد لا تكون لمواطن غير متخصص : يعني مافي منطق ولا سبب أكون حاسد الأستاذ مصطفي عليه رحمة الله .
المساله الأهم من ده كلو إنو مافي زول عاب علي محبي مصطفي حبو ولا في زول قلل من شانو كفنان ولا كشخص ، عبنا القداسه العاملنها ليهو محبيو الزيك ديل .

Quote: تعرف يا امين عارفك حتصنفني شيوعي ولكن يا امين هذا شرف لم انله انا زول ما عندي انتماءات سياسية

تعرف يا حكومه يا بن عمي :
أنا ضد توجه الشيوعيين و أفكارهم لكن مما الله خلقني ما شفت لي شيوعي بلا أخلاق و لا زولا ما عميق . كل من عرفت من الشيوعيين في الحياه ومن منسوبي الجبهه الديمقراطيه في الجامعه كانو أنضر الناس و أكثرهم إنتماء و حبا للناس ، ما شفت لي شيوعي فيهو طق علي المستوي الشخصي ، احتمال عشان كده صنفتك شيوعي !!

Quote: اليسار يضيف للانسان ومصطفي عندما اصبح يساريا لم يصبح كذلك ليدعم اليسار مسيرته الفنية ..لا اصبح يساريا لان الابداع هناك والافكار النيرة والمبدعين والابداع

الثقافه و اليسار و مصطفي بقو زي الشي الواحد ما تقدر تفرزهم ، و كونو مصطفي كان شيوعي ده كان خيارو و ما كان في زول يقدر ولا من حقو يتدخل فيهو ، لكن حته اليسار و مصطفي البقو شيتا واحد ديل و بقي أي نقد لفن مصطفي كانو هو نقد لليسار دي المساله الدايره نظر .

Quote: أملك من الصبر علي أذاك و أذي أمثالك ما لا تظن ، و من الأدب والإحترام لنفسي و للناس ما لا تفهمه بسوء طويتك ، و من الأخلاق ما يفوق قامتك ولو اعتليت سلما ، و من الحجه و المنطق و المعرفه ما (أقعد ) سبعتاشر من نوعيتك دي في (علبها) ، مشكلتي كلها إني لا أملك من الوقت ما يكفي !!! يعني عندي مشكلة زمن ، فدحن يا حاتم يا أخوي أختاني و شوف ليك شغله تانيه غيري ، لانو أنا والله ما فاضي ليك !!

no further comment to be added it is my mistake from the beginning to participate with u, I apologize for that

فى بداية البوست كنت فاهم أمين قاصد حاجة..
وبعد قراءة البوست لنهايته شعرت من المداخلات أنى مافهمت قصد أمين زى ما الناس فهمتو..

فللضمان كدا:

أنا فهمت أن أمين بقول مصطفى فنان وإنسان..
فنه ممكن مايعجب بعض الناس..
ويمكن انتقاده كأى فنان..
ويمكن أن تفضل عليه بابكر ود السافل ولاتخرج من زمرة المثقفين.

يا حمور* الكلام دا لو ماصاح ألكزنى.
____________________________________
* السن بتضاحك نديدا!

ما أظنك محتاج لكزه يا نديدي بلة ..
ده الفهمتو أنا زاتي من البوست ..
وهو ما اؤمن به انا ايضا.
ليسمح لي الخال أن اضيف أن تحويل الاستماع لمصطفى الى احدى لوازم المثقفين سئ في حق مصطفى.
تقرأ ماركيز و أدونيس و درويش و تسمع مصطفى و تلبس الجينز و تحرص على صك عبارات خاصة لك و تحتفي بشخصية او اثنتين من قاع المجتمع تعرفتها هذه اصبحت "عدة" الشغل الثقافي.
بهذا يصبح لمصطفى سيد أحمد جمهورا ليس جمهور.
أي انه لا يسمع مصطفى ليتذوقه .. لكنه يسمع مصطفى لأنه لابد أن يسمعه.
طبعا اضيف لمصطفى الأن عقد الجلاد.
من لا يسمع عقد الجلاد هو وغد أفاك بلا ذائقة و ينبغي أن يجلد بالسياط حتى يموت.

Quote: أنا فهمت أن أمين بقول مصطفى فنان وإنسان.. فنه ممكن مايعجب بعض الناس.. ويمكن انتقاده كأى فنان.. ويمكن أن تفضل عليه بابكر ود السافل ولاتخرج من زمرة المثقفين.

بله موسي حينما يختصر البوست في كلمتين !!
ده بالظبط الداير اقولو يا دوك .

Quote: ده الفهمتو أنا زاتي من البوست .. وهو ما اؤمن به انا ايضا.

تعرف يا حمور قد يكون نقاشنا في بوست خضر حسين هو واحد من أكتر الحاجات الشجعتني أفتح البوست ده ، لانو بعد كلامك تاكد لي إنو حا يكون في ناس كتار زيي بيفتكرو إنو مصطفي سيد أحمد فنان عادي و عادي جدا لكن ما قادرين أو ما عايزين يصرحو بكده بسبب الهاله و القداسه الحاصله و خوفا من الهوا و الرأي (أب دق ) !!

ياخي خليك من مصطفي سيد احمد , احمد المصطفي زاتو انا شايفه كان قاعد ساكت
مصطفي سيد احمد ثلاثة ارباع اغانيه بي لحن واحد وفكرة واحدة ما بتتفرز زاتو الا لي زول مرضان بيهو
خلي دا كلو عشان تعرف اننه انحنا شعب وهم وما بنفهم غنا , تسمع في الحفلة الفنان البيقلد مصطفي يغني ليك في الحزن النبيل
تلقي الحفلة دي تتمايل وتتراقص وتبشر واخر انبساط !!؟ انا ما عارف لو كان اسمها الفرح النبيل كان اغمي عليهم ولا كيف؟

Quote: ياخي خليك من مصطفي سيد احمد , احمد المصطفي زاتو انا شايفه كان قاعد ساكت مصطفي سيد احمد ثلاثة ارباع اغانيه بي لحن واحد وفكرة واحدة ما بتتفرز زاتو الا لي زول مرضان بيهو خلي دا كلو عشان تعرف اننه انحنا شعب وهم وما بنفهم غنا , تسمع في الحفلة الفنان البيقلد مصطفي يغني ليك في الحزن النبيل تلقي الحفلة دي تتمايل وتتراقص وتبشر واخر انبساط !!؟ انا ما عارف لو كان اسمها الفرح النبيل كان اغمي عليهم ولا كيف؟

أمير الظلام
ياخي أحمد المصطفي عليه رحمة الله كان انتقدت غناهو زول بسالك مافي ، لكن كلامك بتاع مصطفي ده بجيب ليك البل !!

يا امين

اشواق

Quote: لكن كلامك بتاع مصطفي ده بجيب ليك البل !!

وهو بل نصاح......!!!!

وحاتك دق الويكة

وفجيغ الطماطم.....!!!!

ازيك يا أمين


لا شئ فوق النقد

ولكن

هل الفكرة هي مناقشة قدسية مصطفي كفنان أم هي نقد مصطفي كفنان


اذا كانت هي الثانية اى النقد

فابدأ بتقديم نقدك لتجربة مصطفي


اما اذا كانت هي الثانية

فاعتقد انها نقاشات ذات طابع شخصي أكثر من انه موضوعي



ولك ودي واحترامي الاكيد

Quote: رساله من الاخ نادر عباس

سلام يا امين خال حمور
معليش للمداخلة الشترة
بس نادر ده ياهو نادر
عباس زروق ؟

الأرقم يا حبيبنا ، سلام

Quote: هل الفكرة هي مناقشة قدسية مصطفي كفنان أم هي نقد مصطفي كفنان اذا كانت هي الثانية اى النقد فابدأ بتقديم نقدك لتجربة مصطفي اما اذا كانت هي الثانية فاعتقد انها نقاشات ذات طابع شخصي أكثر من انه موضوعي

الفكرة هي مناقشة قدسية مصطفي كفنان ، وخليك من تجاربي الشخصيه في قدسية مصطفي ، أنا دللت عليها بكميه من الأشياء حصلت في منبرنا ده أو جابوها أخبار هنا .
مصطفي فنان و شخصيه عامه يا الأرقم ، من حقي أقول رايي الشخصي حول فنو أو حول الهاله و القداسه المعموله ليهو بدون سبب من وجهة نظري طبعا !!
لك من الود و الاحترام مثله و يزيد

سلام يا سفيان صاحب حمور ود أخت أمين

Quote: سلام يا امين خال حمور معليش للمداخلة الشترة بس نادر ده ياهو نادر عباس زروق ؟

والله يا سفيان ما عندي فكره عن إنو الاخ نادر ده ياهو نادر عباس زروق ولا لا ، لانو رسالتو ده رسلها لي إيميل بدون معرفه شخصيه بيننا .
إذا كان الاخ نادر متابع البوست لسه و قرا كلامك ده ، ممكن يجاوب ليك السؤال ده في إيميلي و أنا برسل ليك ردو كان هنا أو في الخاص .

أمين خال حمور الذى (بألمانيا؟)
سلام يا اخونا

Quote: و العجب لو كنت بتعرفو - عليه رحمة الله - معرفه شخصيه أو عندك معاهو صور !!

هههههههه... لو عندك صور شخصية معاهو تقوووووم كده تعمل حريف و تباصيها من الدوحة الى
حبيبنا ود الحبر الذى فى الخرطوم و يقوم كده يشتت ليك القشرات فى المنبر و انتا تتلقى آى التلميع!

يا بكري الذي من غير صلعه أو صلاحيات !

Quote: هههههههه... لو عندك صور شخصية معاهو تقوووووم كده تعمل حريف و تباصيها من الدوحة الى حبيبنا ود الحبر الذى فى الخرطوم و يقوم كده يشتت ليك القشرات فى المنبر و انتا تتلقى آى التلميع!

ياخي أنا كان عندي صوره مع مصطفي بكتب لي بوست زي ده ؟
بعدين ياخي والله ود الحبر ده إنتو عاصرين عليه ساي ، الراجل ده من خيرة شباب وطننا الشقيق !

عمو أمين يعلم الله كنت جاي لحوار لكن لمن لقيت دي غلبني

Quote: امين خال حمر احتراماتي ليه ما عارف بحس مرات انه مثلك الاعلى ديك العده اكان نهرتو بكسر العده واكان خليهو بكسر العده ..

اسي بس أخد لي صنه وكدا وجايك

Quote: عمو أمين يعلم الله كنت جاي لحوار لكن لمن لقيت دي غلبني

مرتضي يا شقي الحال ، تعرف الكلام ده يعميني فيهو لحدي ما إنت جبته هنا !
والله يا بصاص لكن إتلومت

سلام يا أمين



إذا أردت أن تنتقد مصطفى أنظر إلى االظروف التي صاحبت مشواره الفني القصير المليء بالمصاعب والمشاكل الصحية منها والسياسية ( المضايقات والمنفى)

مع إنجازه لهذا القدر الكبير من الأعمال الفنية الجديدة والمختلفة شكلا" ومضمونا" وأيضا" كمية الصدق المحسوسة في أداء مصطفى للكلمات ..

إئتنا بنقد موضوعي بستصحب كل هذه الأشياء وبعد ذلك فضل عليه حنان جبجبة ولن تطالك تهمة البساطة والمشي على أربع





----------------------------------------------------------------------
شافع خدر البنط جوز داك خلي بالك منه

سلامات أمين والأخوة المتداخلين..

Quote: علي فرض انه مصطفي ده محل قيقم كان حيقدر يغني عم عبدالرحيم وعمنا الحاج ود عجبنا..؟؟ اليسار يضيف للانسان ومصطفي عندما اصبح يساريا لم يصبح كذلك ليدعم اليسار مسيرته الفنية ..لا اصبح يساريا لان الابداع هناك والافكار النيرة والمبدعين والابداع

تسلم يا عبدالحكم..
لإنه اليسار الحقيقى هو اليسار المرتبط بالبسطاء والمسحوقين البحتفوا
بى البعبر عنهم, قيقم ما بعبر عن الناس ديل لإنو ما قال لى الواحد منهم
:طوريتك فى الطين مرمية: ولا غنى للواحدة منهم وحبيبها داير يهاجر:قالت
لى غنية وإنت معايا:. دا اليسار الحقيقى يسار محجوب شريف الخلق حب الناس
ليهو..الشعب دا يا أمين بصيرته نافذة بعرف زوله ما محتاج لواسطة من حزب
شيوعى أو غيره.

التحايا يا أمين وللاخوة المتداخلين ، والاخوات ...

Quote: صار مصطفي سيد أحمد و فنو مقياس لمدي ثقافة الناس في سوداننا الشقيق ، مثله مثل بنطلون الجينز الوسخان و كتب ماركيز و الشنطه المعلقه في الضهر !!

- كون مصطفي صار مقياسا للثقافة :
هل من الخطأ اعتباره واحدا من مقاييس الثقافة ؟
ماهي المقاييس المفترض ان تقاس بها ثقافة الناس ، وبالتالي هل ما قدمه مصطفي كان ضدا لهذه المقاييس ؟

- مسألة بنطلون الجينز الوسخان :
- هل فرض المثقفون اللابسون للجنز الوسخان رؤيتهم علي الناس ؟ أعني فكرتهم عن ربط الجينز الوسخان بالثقافة !
- هل افترض هؤلاء الناس ان من لم يرتد الجينز الوسخان ليس مثقفا ؟
- هل تعدي هؤلاء الناس اصحاب الجينز الوسخان وحافظي اغنيات مصطفي علي افكار الاخرين وحيواتهم ؟ لماذا اذن يتعدي عليهم الناس ويدينون نظرتهم للاشياء؟

- مسألة كتب ماركيز والشنطة المعلقة في الضهر:
- هل الخطأ في قراءة ماركيز ؟ أم في الشنطة المعلقة في الضهر ؟
- هل كان علي هؤلاء الناس الظانين بأنفسهم ظن الثقافة الا يعلقوا شنطهم علي الضهر لينالوا رضا المجتمع ثم ينتظروا أن يحدد لهم هذا المجتمع تصوره لشكل او هيئة المثقف ؟

- هل أخطأ لابسو الجينز الوسخان قارئو ماركيز حاملو شنط الضهر في تقديسهم للمغني الذي غني لهم لمظفر النواب وعبد الرحيم ابو ذكري والصادق الرضي وعاطف خيري وحميد وغيرهم
ممن كانو يحفظون اشعارهم ؟
وهل كان علي مصطفي ان يغني للناس : الروح تروح.......ما مشكلة أو : ياريت حبيبي أباح .. او غيره مما ترضي عنه ثقافة الوسط والتيار السائد ، هل كان عليه ان يغني مثل ذلك لترضي
عنه السماع والنظارة ؟


ثم مودتي .

مصطفى سيد أحمد فنان مجتهد لأنو غنى فتره قصيره بالمقارنه بكمية الأعمال القدمه والعدد الكبير من الشعراء الغنا ليهم بعتقد إنو كان حازق في إختيارو للأغاني وأدى الأشعار البتتوافق مع توجهو السياسي والأشعار الرمزيه مساحه كبيره في أغانيهو ودا الشي الخلى مصطفى سيد أحمد فنان صاحب قضيه وخلى أهل اليسار والمثقفين مفتونين بيهو وبعضهم خلق قدسية مصطفى سيد أحمد التي إنتشرت وزادت بعد موته بصورة كبيرة وهي غير مبرره من وجهة نظري ففي الأخير مصطفى كان طارح نفسو كفنان ومن حق الموسيقين نقد مصطفى واعمالو من ناحية فنية دون الإلتفات لهذه القدسيه.
ومن حق أمين محمد سليمان يقول مصطفى ما بيطربو ومن حقي أقول مصطفى بيتسمع عند اللزوم وكترتو بتزهجني





__________________________________________________________
عمو أمين عليك الله بعد ما تخلص من مصطفى خش لينا على ناس عقد الجلاد

وما ذنب مصطفي وما جريرته .. اذا كان قد احبه البعض ووضعوه موضع القداسة وماذنبه وماجريرته اذا ابغضه البعض أو حرص

على عدم حبه او الاستماع اليه أو قلل من شأنه حتى لايحسب في الزمرة الأولي ...................

الشاهد في الأمر مصطفي ظاهرة ومرحلة وفتح جديد في تاريخ الغناء السوداني ادخل معاني وكلمات جديدة وصعبة في الاغنية السودانية

ويستحق ان يحتفي به ويقدر حق تقديره .................

سلام يا معز

Quote: إذا أردت أن تنتقد مصطفى أنظر إلى االظروف التي صاحبت مشواره الفني القصير المليء بالمصاعب والمشاكل الصحية منها والسياسية ( المضايقات والمنفى) مع إنجازه لهذا القدر الكبير من الأعمال الفنية الجديدة والمختلفة شكلا" ومضمونا" وأيضا" كمية الصدق المحسوسة في أداء مصطفى للكلمات .. إئتنا بنقد موضوعي بستصحب كل هذه الأشياء وبعد ذلك فضل عليه حنان جبجبة ولن تطالك تهمة البساطة والمشي على أربع

مافي أي نقد لفن مصطفي مني في البوست ده يا معز و كونك تشوف إنو إنو أنا إنتقدو ده جزؤ من الاشكاليه الأنا بتكلم عنها :
النقد الفني - في فهمي علي الأقل و لو غلطان صححوني - بيتم لمن يكون في نقد في شكل technical justification للتجربه الفنيه أو لجزء منها يعني
إنو أجي أقول إنو مصطفي إختيارو لكلمات أغانيه ضعيف مثلا ، صوتو فيهو ضعف في الحته الفلانيه ، موسيقتو مكرره.....الخ . لكن أنا ما عملت كده لانو الكلام ده ذاتو أنا ما بفهم فيهو قدر ده . أنا كل القلتو إنو أنا شايف إنو في هاله و هليله أكبر من اللازم لمصطفي و فنو و كلامي ده كان استنادا علي ذائقه فنيه و ليس علميه أو نقديه ! و عزيت الهاله دي لإنتماؤو السياسي اللي عمل ليهو حصانه من النقد .
تهمة البساطه و المشي علي أربع دي ما مفروض تصلني و لا تصل أي زول بقول رأيو و ده كل العملتو أنا هنا و مش قلت رايي الزعلك ده في موضوع علمي ولا سياسي بتكون فيهو جهه صائبه و أخري خاطئه ، ده مسألة تذوق لا أكثر لا أقل .
مداخلاتكم دي يا معز هي البتثبت صحة كلامي الأنا بقول فيه ده وإلا فيم وصف الناس بالبساطه و المشي علي أربع لمجرد إبدأ رأي يعتمد علي ذائقه شخصيه ليس إلا في مصطفي و غناهو ؟!!!

دكتور الوليد ، سلام من العزيز القدير

Quote: - هل أخطأ لابسو الجينز الوسخان قارئو ماركيز حاملو شنط الضهر في تقديسهم للمغني الذي غني لهم لمظفر النواب وعبد الرحيم ابو ذكري والصادق الرضي وعاطف خيري وحميد وغيرهم ممن كانو يحفظون اشعارهم ؟ وهل كان علي مصطفي ان يغني للناس : الروح تروح.......ما مشكلة أو : ياريت حبيبي أباح .. او غيره مما ترضي عنه ثقافة الوسط والتيار السائد ، هل كان عليه ان يغني مثل ذلك لترضي عنه السماع والنظارة ؟

يا وليد ، لابسو الجينز الوسخان أو قارئو ماركيز أو حاملو شنط الضهر أو محبي مصطفي لم يخطئو و لم أقل بذلك .
أنا قلت مصطفي بقي مظهر من مظاهر الثقافه و المثقفين زي الحاجات الذكرتها دي ، و حب غناهو ما بقي نتيجه لذائقه فنيه لكن دخلت فيهو معطيات تانيه كإنتماؤو السياسي و تحولو لمظهر من مظاهر الثقافه و المعرفه ، و الكلام ده يا وليد أنا دللت عليهو بامثله ما كلام ساي .

و عليكم السلام يا عمر !!

Quote: وما ذنب مصطفي وما جريرته .. اذا كان قد احبه البعض ووضعوه موضع القداسة وماذنبه وماجريرته اذا ابغضه البعض أو حرص على عدم حبه او الاستماع اليه أو قلل من شأنه حتى لايحسب في الزمرة الأولي ................... الشاهد في الأمر مصطفي ظاهرة ومرحلة وفتح جديد في تاريخ الغناء السوداني ادخل معاني وكلمات جديدة وصعبة في الاغنية السودانية ويستحق ان يحتفي به ويقدر حق تقديره .................

مصطفي ما عندو لا ذنب ولا جريره كان الناس حبو أو كرهو ، شأنه شأن أي فنان !!
يا سيدي من حقك و من حق الكل أن يري إنو فنانو المفضل هو فتح من الله و آيه من آياته لكن كمان من حق الناس التانيه - بناء علي ذائقتها الفنيه - إنو يقولو ما شايفنو كده !!

يبدو إنو أنا جبت كلام فارس و علقت عليهو علي أساس إنو كلام المعز فعذرا .

سلام يا معز

Quote: تسلم يا عبدالحكم.. لإنه اليسار الحقيقى هو اليسار المرتبط بالبسطاء والمسحوقين البحتفوا بى البعبر عنهم, قيقم ما بعبر عن الناس ديل لإنو ما قال لى الواحد منهم :طوريتك فى الطين مرمية: ولا غنى للواحدة منهم وحبيبها داير يهاجر:قالت لى غنية وإنت معايا:. دا اليسار الحقيقى يسار محجوب شريف الخلق حب الناس ليهو..الشعب دا يا أمين بصيرته نافذة بعرف زوله ما محتاج لواسطة من حزب شيوعى أو غيره.

و ده كلام أنا متفق معاك فيهو ، لكن كلامك سياسه و الموضوع فن ، و ده الجايب الجوطه الحاصله في موضوع مصطفي ده : إختلاط الحاجتين (السياسه و الفن ) في مصطفي خلي التفريق بيناتم صعب بل شبه مستحيل ودي في حد ذاتها أصلا ما مشكله ، المشكله إنو نقد فن مصطفي أو حتي التعبير بعدم تذوقك لفنو بقي زيو و زي نقد اليسار و الحزب الشيوعي !

Quote: مصطفى سيد أحمد فنان مجتهد لأنو غنى فتره قصيره بالمقارنه بكمية الأعمال القدمه والعدد الكبير من الشعراء الغنا ليهم بعتقد إنو كان حازق في إختيارو للأغاني وأدى الأشعار البتتوافق مع توجهو السياسي والأشعار الرمزيه مساحه كبيره في أغانيهو ودا الشي الخلى مصطفى سيد أحمد فنان صاحب قضيه وخلى أهل اليسار والمثقفين مفتونين بيهو وبعضهم خلق قدسية مصطفى سيد أحمد التي إنتشرت وزادت بعد موته بصورة كبيرة وهي غير مبرره من وجهة نظري ففي الأخير مصطفى كان طارح نفسو كفنان ومن حق الموسيقين نقد مصطفى واعمالو من ناحية فنية دون الإلتفات لهذه القدسيه. ومن حق أمين محمد سليمان يقول مصطفى ما بيطربو ومن حقي أقول مصطفى بيتسمع عند اللزوم وكترتو بتزهجني

طيب يا مرتضي إنت ما أهو ميه ميه ، البدري شايل حسك مالو ؟!

يا عمو امين

Quote: طيب يا مرتضي إنت ما أهو ميه ميه ، البدري شايل حسك مالو ؟!

البدري دا مؤخرا بقى صعب شال حال الطريفي عديل ما يشيل حالي أنا !!!!


بالجمبه كدا الناس ديل كان عرفو كلامك لي الفي المسنجر بتاع انو الخلاك ما تريد مصطفى شنبو وشعرو الكتير دا بيبلوك بل جد


_____________________________
نتلاقي بعدين بعد ما برشلونه يمتعنا اسمع انت في نواكشط بتحضر دوري أبطال أوربا كيف؟؟ ولا بقيت مكتفي بديربي نواكشط الأكصر و وتلال نواكشط ياخ انت قاعد في نواكشط دي كيف؟؟

الاخ نادر عباس
أول حاجه أنا أسف جدا علي التأخير في الرد علي مداخلتك .
كلامك جميل جدا و أنا متفق معاك في اغلبو ، بس عندي تعليق في الجزء ده :

Quote: أما فنياً (موضوع بوستك) فمصطفى كان مشروعه ولا يزال محل نقد وشد وجذب من ذات اليسار الذي تدعي أنه يستأثر بمصطفى وفن مصطفى، اليسار (أو الشيوعيين كما ذكرت) أول من سن فضيلة النقد الذاتي في أنفسهم قبل غيرهم فكيف يفعلون ضد ما يدعون؟؟ ولو راجعت هذا المنبر (وبالمناسبة لقد كنت أنا عضواً في المنبر لأكثر من 6 سنوات) ستجد أن أعمال مصطفى وقد تم تناولها بالنقد بصورة علمية مدروسة من مختصين في مجال النقد الغنائي والموسيقي، ولو رأي عضو المنبر الفنان الأستاذ/ يوسف الموصلي - المنقطع عن البورد هذه الأيام آملاً أن يكون الداعي غير - بوستك هذا لقال نفس ما قلته لك.

أنا يا نادر ما قاعد أنتقد في التجربه الفنيه لمصطفي لسبب واحد و بسيط : أنا لا أملك أدوات النقد العلميه البتخليني أنتقد تجربة حنان جبجبه الفي مثال فارس خليه من نقد تجربة فنان بحجم مصطفي سيد أحمد ، أنا قلت رأيي في غناهو من ضمن أشياء أخري في البوست .
رأيي في غناهو ده ناتج عن ذائقه موجوده عند أي بني ادم فمن الطبيعي الناس تختلف و تتفق حول فنان معين ، عشان كده ده ما موضوع البوست : موضوع البوست هو كيف إنو إنتماء مصطفي السياسي وفر ليهو حمايه من النقد و عمل ليهو هاله و قداسه و خليهو منطقه (ممنوعه الاقتراب و التصوير ) من جهه و من جهه تانيه كيف حب مصطفي بقي جزء من أدب اليسار و مكمل لثقافة الناس في السودان بصوره أصبح حب مصطفي بيمثل ثقافه في حد ذاتها !!

Quote: قلت لصديقي في الجبهه الديمقراطيه أيام الدراسه الجامعيه (ياخي إنتو والله فاكنها فينا ساي بمصطفى سيد أحمد ده ، الزول ده فنان و كل حاجه لكن ما للدرجه العاملنها دي ) ، فاخرجني (الفِرد) من بين يديه بدون أذي جسيم .[/QUOTE وقد دخلت غرفة سناير لنا وأنا برلوم بجامعة الخرطوم فسألتهم مشيرا لصورة ضخمة لمصطفي معلقة علي الجدار : (الزول أبو شنب دة منو؟) فكادوا - وكانت غرفتهم بالطابق الثاني - ان يلقوا بي من الشباك شكرا يا امين علي وضع يدك في عش الدبابير وقول ( البغلة في الإبريق ) . . ______________________________ عانينا من التكفيرالثقافي ما عانينا أيام الجامعة بس لأننا لا نسمع لمصطفي

---

Post: #110 Title: Re: مصطفي سيد أحمد ، رؤيه مغايره !!! Author: أمين محمد سليمان Date: 02-24-2010, 04:38 PM Parent: #109 سلام يا عزان Quote: وقد دخلت غرفة سناير لنا وأنا برلوم بجامعة الخرطوم فسألتهم مشيرا لصورة ضخمة لمصطفي معلقة علي الجدار : (الزول أبو شنب دة منو؟) فكادوا - وكانت غرفتهم بالطابق الثاني - ان يلقوا بي من الشباك ده الكلام اللي الناس البتحب مصطفي هنا في البورد ما قادرين يفهمو لمن نقول إنو في قداسه و حصانه لمصطفي ضد النقد من محبيهو - ما كلهم طبعا - لكن الغالبيه الغالبه . ما مفروض تكون في مشكله إذا قلت رأيك في فنان بغض النظر عن ماهية هذا الرأي فالموضوع في الأخر موضوع تذوق بختلف من شخص لآخر . Quote: ______________________________ عانينا من التكفيرالثقافي ما عانينا أيام الجامعة بس لأننا لا نسمع لمصطفي والله يا عزان ، لو البوست ده كلو طلعت منو بكلمة (التكفيرالثقافي) دي لكفاني . لانو دي هي الظبط الكلمه البتفي بالغرض بدون الدخول في شروحات . في الفتره اللي أنا كنت طالب في الجامعه - مصطفي كان حي عليه رحمة الله - كان ما بتحبو و تسك حفلاتو و شرايطو في عربيتك فانت الجهل يمشي علي قدمين . - يا أخوانا : أنا لابس جينز وسخان و شايل (الحب في زمن الكوليرا ) في شنطتي ! - لكنك ما بتحب مصطفي : انت و الجهل سواء !!

---

Post: #111 Title: Re: مصطفي سيد أحمد ، رؤيه مغايره !!! Author: محمد الواثق Date: 02-24-2010, 06:21 PM Parent: #110 حبيبنا امين سلام مصطفى سيد أحمد علامة فارقة في خارطة الغناء السوداني . ورؤيته من زاوية معجبيه تقدح فيه كثيراً . فمصطفى قدم ما لم يقدمه اقرانه في زمنه بل فات الكبار المتوجين دون مملكة . تعرف يا أمين انا قصتي مع مصطفى دا بدأت في عام 1982 ونحن طلبة في الأهلية الثانوية عن طريق صديقي العزيز جدا ( الفاضل الطيب عبد الحليم ) ابعد واحد عن الجبهة الديمقراطية واليسار . يعني مصطفى لا يضيف له ايمان اليسار به شيئاً ، ولا ينقص منه كفران اليمين شيئا .

---

Post: #112 Title: Re: مصطفي سيد أحمد ، رؤيه مغايره !!! Author: أمين محمد سليمان Date: 02-24-2010, 07:40 PM Parent: #111 رساله علي البريد الخاص من الاخ حسام الزين Quote: الاخ أمين خال حمور تحية وسلام (أول حاجة عذراً لخرق الخصوصية ,مع علمى التام بأنك لم تضع عنوانك البريدى في البوست الخاص بتناول تجربة الأستاذ مصطفي (برؤية مغايرة للاَراء من خارج المنبر لكن سولت لي نفسي الاماره وعملا بمبدأ أخيرلك أقول البحرق حشاي ,اٌملاً في صبرك علي الاذى المشار اِليه في اِحدى مداخلاتكم الثره...و وبالعودة لموضوع البوست وجدلية مصطفى-واليسار لماذا لا ننظر للمسألة برؤية أكثر مغايرة وبقراءة عكسية لما تفضلت,,,,,,,,كلنا يعلم حجم الصعاب التي تعترض كل من حدثته نفسه بأن يمارس الغناء في السودان ناهيك عن أن يكون القادم الجديد جاى بكلام كتر ونصوص بالتأكيد ليست جديدة ولكن لا تمثل ما أجتمع عليه جمهور لجان اِجازة النصوص وشعراء الأغنية السودانية. اِذا نحن اِزاء فنان تأبط عوده وسعى لخلق واقع تداولي جديد لأغنياته من خلال جلسات الاِستماع والتوغل داخل شرائح الطلاب وجموع أهل الوعي والاِستنارة وهو الوسط الوحيد الكان متاح لمصطفي أن يؤسس مشروعه من خلاله بالحساب المنطقي للأشياء والحساب المنطقي يشمل كافة الأوضاع السياسي منها والاِستعداد الفطري لقبول الجديد من الافكار في ظل ماضوية وانحياز زائقة الغناء السوداني لكل ما هو طارف وتليد......خلاصة ما أريد أن أشير له من خلال هذه المماحكة الطويلة أن مصطفي أنجز ما أنجز بضراعو الأخدر وليس لليسار والحزب سهم في مشروع مصطفي وخاصة في مراحل التأسيس اِلا بقدر ما أضاف للوعي الخاص بمصطفي والاِضافة هنا ليست مفصلية لأن الحزب واليسار كما تفضل كثير من المتداخلين معك ساهما بصورة راتبة في الوعي الجمعي للمستنيرين في السودان وفيهم غنايين وكتاب وتشكيليين...........اذا اليسار قد لقي لقيته في أحد أبنائه النابهين والمجتهدين وأرخي سدوله علي التجربة بصورة واضحه في الفترة ما بعد اِنقلاب الجبهة 1989 مستفيدا من البعد الوطنى - الاِنساني للتجربة كأحد أدوات النضال.... وتم تبنيها من المعارضة بكافة أطيافها عدا الاِسلامى منها طبعا لأسباب معروفة..........عشان كده يا أمين يا خال حمور يا أخوى مفروض نفرق بين علاقة اليسار ومصطفي في المراحل الأولى للتجربة وندى الراجل حقو وحق التعب والشلهته لحدى ما عبرت التجربة للناس وبعد داك هيمنة اليسار علي مصطفي يؤخذ ويرد فيها...........ا بالنسبة للنقد الموسيقي البحت الاِحترافي لتجربة مصطفي أعتقد انو مفيد للتجربة أكثر مما انو بيهز مقدسات الأمة وثوابت دستور العشق الأبدى لمصطفي ,,,يعنى لو جا زول قال مصطفي زمنو فارق مثلا أو ألحانو بتشبه روحه هل ده حيمس التجربة ورسوخه في وجدان الناس؟؟؟؟؟ الناس بتنطرب لأبوداؤود بالكبريتة..............والمميز لمصطفي انو ما لحن ولا صوت ولا كتابة مصطفي حالة يتم التعاطى معها كاملة غير منقوصة ومحققة بالبعد الانساني............. أمين البوست بتاعك مفخخ,,,, لكن أرجو أن يساهم الأساتذة بتاعين الموسيقي في المنبر في تحليل تجربة مصطفي بصورة علمية وهم بالتأكيد أدرى بشعاب الموضوع,,,,,,,,,, وكسر حاجز الخوف والمسكوت عنه مع الود

---

Post: #113 Title: Re: مصطفي سيد أحمد ، رؤيه مغايره !!! Author: عاطف عمر Date: 03-14-2010, 09:43 AM Parent: #1 نرفع البوست بناء على طلب العزيز د. أمير عمر أصلو البوست وقع ليهو في ( قبولو ) تماماً كما المربوطة بخمسة آتو وتلاتة آسات __________________ ما تزرزروني كتيير أنا ما حريف شديييييد في الوست

---

Post: #114 Title: Re: مصطفي سيد أحمد ، رؤيه مغايره !!! Author: Amir Omer Date: 03-14-2010, 07:19 PM Parent: #113 شكراً يا عاطف لرفع البوست غايتو انا قريتو واستمتعت بالمداخلات جداً ومتفق مع أمين كالعادة لكن شكلي عامل زي الزول الجا العرس والناس بتلملم في الساوند خليها المرة الجاية إن شاء الله

---

Post: #115 Title: Re: مصطفي سيد أحمد ، رؤيه مغايره !!! Author: أمين محمد سليمان Date: 03-14-2010, 07:40 PM Parent: #114 Quote: شكلي عامل زي الزول الجا العرس والناس بتلملم في الساوند يا أبو أمير ساوند سيستم شنو ؟ العرسان بقو تلاته تقول لي والناس بتلملم في الساوند ؟!!!!!! لكن رايك مهم والله ، بالذات بعد ما عرفتك متفق معاي... ---------

---

Post: #116 Title: Re: مصطفي سيد أحمد ، رؤيه مغايره !!! Author: أمين محمد سليمان Date: 03-14-2010, 07:42 PM Parent: #115 كتر خيرك يا عاطف علي رفع البوست : مداخلة وثق دي ما شفتها إلا هسي !