Post: #1
Title: ايامي في معسكر الدفاع الشعبي .....
Author: omer osman
Date: 09-21-2010, 10:42 AM
Parent: #0
أو للدقة شهوري العشرة في معسكر الشهيد عيسي بشارة بالقطينة ....
فبراير 1991م - ديسمبر 1991م .............
|
Post: #2
Title: Re: ايامي في معسكر الدفاع الشعبي .....
Author: omer osman
Date: 09-21-2010, 10:46 AM
Parent: #1
قبل الدخول في سرد تفاصيل تلك الأيام ..........
لاشك هناك سؤال اعلم انه سيتبادر الى اذهان الكثيرين ............
الزول ده عمره كم واشتغل كم سنة لمن كل يوم ناطي لينا بي قصة جديدة ؟
ومصدري علمي ليس رجماً بالغيب لكن لانه سؤال ظل يطاردني على ارض الواقع من من كثير من الذي جمعتني بهم الظروف ..........
|
Post: #3
Title: Re: ايامي في معسكر الدفاع الشعبي .....
Author: omer osman
Date: 09-21-2010, 10:52 AM
Parent: #2
طبعي هكذا لا افوت اى فرصة للدخول في تحدي مهني جديد ........
اعشق عمل المباحث واقسام الشرطة وكنت اجد نفسي فيه دائماً .....
في تلك الايام تحديداً كنت سعيداً ومزهواً بوضع النجمة الثانية على كتفي (الحمد لله علامات الرتب ليست هلال) 
ففي شهر فبراير 1991م كان قد مضي علينا في الخدمة سنتين هما سنتي فترة الاختبار والنجمة الثانية لاتعتبر ترقية بقدر ما تعتبر تثبيت في الخدمة المستديمة .....
الان يحق لنا وبعد ان اصبحنا (ملازمين اوائل) ان نخاطب الملازمين ونذكرهم بانهم (مكتوبين بقلم الرصاص)
|
Post: #4
Title: Re: ايامي في معسكر الدفاع الشعبي .....
Author: omer osman
Date: 09-21-2010, 11:01 AM
Parent: #3
في احد نهارات ايامي بقسم العمارت رن جرس الهاتف (الثابت بالطبع فلم يكن هناك اختراع اسمه الموبايل) .....
رن جرس الهاتف في مكتب رئيس القسم النقيب الطيب ابشر (له الرحمة) ولما لم يكن موجوداً في المكتب قمت بالرد على الهاتف .....
- السلام عليكم .....
- وعليكم السلام ورحمة الله .....
- معاك النقيب ..........من المديرية (رئاسة شرطة الولاية) (حالياً مبني رئاسة الوزراء) منو معاي ؟
- الملازم اول عمر ياسعادتك ........
- كويس انا ذاتي عاوزك انت ......
- في خلال تلك الثواني لابد من إجراء جرد سريع جداً في ذهنك لكل ماحدث في القسم من بلاغات وخلافه والا لماذا يتصل علي نقيب من المديرية ؟
وربنا يجيب العواقب سليمة ........
- طيب ياعمر انت وقع عليك الاختيار ومعاك خمسة ضباط تانيين عشان تمشوا الدفاع الشعبي ......
- ده شنو ودفاع شعبي لشنو ؟ اوعه الناس ديل يكونوا عاوزين يدربونا تاني !!
- جداً ياسعادتك طيب ممكن نفهم الموضوع شنو بالضبط والخمسة المعاي منو ؟
- الموضوع بنشرحو ليكم بكرة في المديرية وماعندك مشكلة في اتنين دفعتك ماشين معاك ح ......... و ع ...........
|
Post: #5
Title: Re: ايامي في معسكر الدفاع الشعبي .....
Author: omer osman
Date: 09-21-2010, 11:07 AM
Parent: #4
سعدت جداً حتى قبل ان اعرف تفاصيل الموضوع لوجود دفعتي (ح و ع) خصوصاً ع فهو صديقي المقرب .....
مساء ذلك اليوم كانت هناك مباراة في استاد الخرطوم لا اذكر اطرافها لكن كعادتنا ندخل مع بعض الكورة شلة من ابناء الدفعة او زملاء اخرون .....
وجدت صديقي ع في الكورة كما توقعت .........
ابلغته بالخبر وعلمت بأنه لم يكن يعلم فهو اليوم كان في راحة مناوبة ......
ابدي ضيقه لهذا الامر وقلت له ياخي تجربة خلينا نمشي نشوف الحاصل شنو ...
وافق وهو بالطبع لم يكن يملك حق الرفض ففي نهاية الامر القصة تعليمات ..........
اتفقنا على ان نلتقي غداً في مكتب النقيب ك لمعرفة التفاصيل ..........
|
Post: #6
Title: Re: ايامي في معسكر الدفاع الشعبي .....
Author: Saifelyazal Elmaki
Date: 09-21-2010, 11:18 AM
Parent: #5
جنابو عمر
تحية عطرة
واصل سردك
متابعين
| Quote: تلك الايام تحديداً كنت سعيداً ومزهواً بوضع النجمة الثانية على كتفي (الحمد لله علامات الرتب ليست هلال) |
مبالغة
لك التحية وللنجمة الانحناءة
|
Post: #8
Title: Re: ايامي في معسكر الدفاع الشعبي .....
Author: omer osman
Date: 09-21-2010, 11:20 AM
Parent: #6
Quote: مبالغة
لك التحية وللنجمة الانحناءة |
ولك التجلة والتقدير سيف اليزل ياصفوة ........
الف شكر للمتابعة ...........
|
Post: #7
Title: Re: ايامي في معسكر الدفاع الشعبي .....
Author: omer osman
Date: 09-21-2010, 11:18 AM
Parent: #5
في اليوم التالي ذهبت الى المديرية بعد ان ابلغت رئيس القسم ورئيس القسم الاوسط الذي نتبع له .........
وهناك شرحوا لنا القصة ...........
سيتم ادخال مجموعات من افراد اللجان الشعبية في الاحياء في معسكر الشهيد عيسي بشارة ....
بغرض تدريبهم تدريباً عسكرياً وتزويدهم بالمعارف القانونية الاساسية كقانون العقوبات والاجراءات ........
وستوكل هذه المهمة الى الشرطة باعتبار ان اولئك الخريجين سيعملون لاحقاً في مساعدة الشرطة في الاطواف الليلة وخلافه .......
وتم تكليف عميد بقيادة هذه القوة المكونة من خمسة ضباط بخلافه وعدد 22 تعلمجي منتدبين من مدرسة الشرطة وشرطة الاحتياطي المركزي .......
|
Post: #9
Title: Re: ايامي في معسكر الدفاع الشعبي .....
Author: ذواليد سليمان مصطفى
Date: 09-21-2010, 11:25 AM
Parent: #7
واصل الحكى
متابع جيد
|
Post: #12
Title: Re: ايامي في معسكر الدفاع الشعبي .....
Author: omer osman
Date: 09-21-2010, 11:29 AM
Parent: #9
Quote: واصل الحكى
متابع جيد |
الف شكر ذواليد ...........
|
Post: #10
Title: Re: ايامي في معسكر الدفاع الشعبي .....
Author: omer osman
Date: 09-21-2010, 11:27 AM
Parent: #7
بعد ذلك اجتمع بنا العميد قائد القوة وابلغنا باننا سنقوم بتسليم انفسنا غداً الى قيادة الدفاع الشعبي بالخرطوم حيث سيتولون ترحيلنا الى معسكر القطينة ......
وسيكون المقدم م هو القائد المناوب وسيقيم معنا بالمعسكر بصفة دائمة على ان يقوم العميد بزيارتنا من وقت لاخر .......
المقدم م وبرغم فارق الرتب لكن وضح من اللحظة الأولي انه رجل مرح وحبوب والنكتة في طرف لسانو .....
النقباء الاتنين احدهم ك الذي اتصل على اول مرة والثاني ص هما اكثر صرامة من المقدم .......
ك كنت اعرفه من قبل من بعيد لبعيد ........ لكن ص لم اعرف من قبل وهو دفعتين قدامنا وسمعنا انو زول شاطر ......
الملازمين اوائل ع وح هم دفعتي وليس بيننا حجاب .......
اذن الشكل العام كان مبشراً والمجموعة تبدو متناسقة وبالتالي لا نتوقع حدوث مشاكل تذكر .........
|
Post: #11
Title: Re: ايامي في معسكر الدفاع الشعبي .....
Author: أحمد ابن عوف
Date: 09-21-2010, 11:29 AM
Parent: #7
جنابو قريبي
كل سنة وانت طيب
اخوك مجند دسيمبر 90 - يناير 91، اول دفعة لطلبة الدفاع الشعبي القطينة
لكن المنقه هنا يا قريبي:| Quote: باعتبار ان اولئك الخريجين سيعملون لاحقاً في مساعدة الشرطة في الاطواف الليلة وخلافه ....... |
يعني انتو الدربتو ناس الحسبة ديل وللا شنو، بالذات القضايا التخش في حتة وخلافه دي
تحياتي
|
Post: #13
Title: Re: ايامي في معسكر الدفاع الشعبي .....
Author: omer osman
Date: 09-21-2010, 11:33 AM
Parent: #11
Quote: جنابو قريبي
كل سنة وانت طيب
اخوك مجند دسيمبر 90 - يناير 91، اول دفعة لطلبة الدفاع الشعبي القطينة
|
انضبط يامستجد .......... هههههههههههههههههههههه
Quote: يعني انتو الدربتو ناس الحسبة ديل وللا شنو، بالذات القضايا التخش في حتة وخلافه دي
|
ود ابن عوف .. قريبي
لاحقاً ستجد اجابة على هذا التعليق ............
|
Post: #14
Title: Re: ايامي في معسكر الدفاع الشعبي .....
Author: أحمد ابن عوف
Date: 09-21-2010, 11:36 AM
Parent: #13
| Quote: انضبط يامستجد .......... |
تمام سعادتك
| Quote: لاحقاً ستجد اجابة على هذا التعليق ............ |
سنكون متابعين
|
Post: #15
Title: Re: ايامي في معسكر الدفاع الشعبي .....
Author: omer osman
Date: 09-21-2010, 11:40 AM
Parent: #13
الشهادة لله المجموعة المختارة من الضباط والافراد لم تكن لها اى ميول سياسية .....
وواضح ان من قام باختيارهم قام بذلك بشكل مهني بحت .........
اصبح التخوف لدينا ليس من المجموعة المصاحبة لكن من فكرة العمل مع ناس الجيش في حتة واحدة ......
والجيش والبوليس هما الهلال والمريخ هناك تنافس وغيرة معلنة وغير معلنة بينهما .....
ويتطلب الامر دائماً قدراً من الحكمة والتعقل واذا توفر ذلك يمكنهما تشكيل ثنائيات خطيرة ومفيدة جداً للبلاد والعباد ......
استقبلونا في قيادة الدفاع الشعبي بترحاب شديد ازال كثير من الهواجس والظنون ........
وتم توفير حافلة لتقل الضباط وعربة كبيرة لنقل التعلمجية وتحركنا صوب القطينة ........
الطريق ممل وكنت احس به طويلاً وبعيداً لاحقاً بقيت عااادي بجي الخرطوم مرتين في اليوم وارجع القطينة .............
|
Post: #16
Title: Re: ايامي في معسكر الدفاع الشعبي .....
Author: omer osman
Date: 09-21-2010, 11:49 AM
Parent: #15
وصلنا المعسكر (معسكر الشهيد عيسي بشارة) والمعسكر لايبعد عن الشارع الرئيسي كثيراً وهناك ظل داخلي يقودك اليه .......
علمنا انه في الاصل كان معسكر الشركة التى قامت بتشييد طريق الخرطوم كوستي واظنها المانية .....
شكل المعسكر كان جميلاً ومنظماً جداً وهو يتكون من كرفانات هي سكن الضباط والاطباء والمنسقين ومكاتبهم وخيم لسكن المستجدين .....
عرفونا عن عيسي بشارة الذي سمي المعسكر عليه لكن لا اذكر شيء عنه الان او عن ظروف إستشهاده .........
خصصت لنا احدي الكرفانات الكبيرة مكونة من غرفتين وصالون وحمام ومخزن صغير ........
المقدم والنقيب ك خصصت لهم احدي الغرف ..... ودفعتي ح والنقيب ص خصص لهم الصالون بعد تزويده باثاثات غرفة
انا وصديقي ع كان من نصيبنا الغرفة الثانية ...........
وجدنا بالمعسكر عدد من ضباط الجيش واغلبهم ملازمين بدبورة قابلونا بسلام فاتر نوعاً ما لم نستغربه بالطبع .......
اخذنا في جولة في المعسكر ومررنا على خيمة العميد وقتها الطيب محمد خير .........
حيث كان دائم الحضور الى المعسكر وطلب تخصيص هذه الخيمة له ...........
وكان هو عراب فكرة تدريب قيادات الخدمة المدنية العليا والوسيطة ومداخل الخدمة .........
|
Post: #17
Title: Re: ايامي في معسكر الدفاع الشعبي .....
Author: وليد عبد اللطيف
Date: 09-21-2010, 11:50 AM
Parent: #15
عمر جنابو
| Quote: في تلك الايام تحديداً كنت سعيداً ومزهواً بوضع النجمة الثانية على كتفي (الحمد لله علامات الرتب ليست هلال) |
لذلك ارى كثيرون لايأكلون البطيخ لان بداخلة اللون الاحمر
ههههههههه
------------------------
متابعين وكيف جنابو الصغير
|
Post: #18
Title: Re: ايامي في معسكر الدفاع الشعبي .....
Author: omer osman
Date: 09-21-2010, 11:56 AM
Parent: #17
Quote: لذلك ارى كثيرون لايأكلون البطيخ لان بداخلة اللون الاحمر
ههههههههه
|
عليك الله في احلي من البطيخ ...........
حصل شفت ليك فاكهة زرقاء .......
جنابو الصغير وامو بالف خير والحمد لله .............
|
Post: #19
Title: Re: ايامي في معسكر الدفاع الشعبي .....
Author: Hassan Bakri Nugud
Date: 09-21-2010, 12:08 PM
Parent: #15
متابعة.
ـــــــــــــ
جنابو ، كل سنة وإنت طيب ياخ.
|
Post: #20
Title: Re: ايامي في معسكر الدفاع الشعبي .....
Author: omer osman
Date: 09-21-2010, 12:11 PM
Parent: #19
| Quote: جنابو ، كل سنة وإنت طيب ياخ. |
وانت طيب ياحسن ..........
شاكرين للمتابعة ............
|
Post: #21
Title: Re: ايامي في معسكر الدفاع الشعبي .....
Author: عبد اللطيف عبد الحفيظ حمد
Date: 09-21-2010, 01:31 PM
Parent: #20
يا عمر عثمان
طيب الفاكهة الحمراء طعمها شنو؟؟؟؟
أيوة شوفت فواكه زرقاء كثيرة.... ما تنسى البيضاء برضو حقتنا!!!
يا خي الموية دي ذاتها زرقاء والسماء زرقاء والأرض كذلك هذه الأيام!!!!
الهلال الشغل الناس هلالو!!!!
أنتو ماسكين في اللون الأحمر والأصفر القبيح لون الشحوب
|
Post: #22
Title: Re: ايامي في معسكر الدفاع الشعبي .....
Author: omer osman
Date: 09-21-2010, 02:14 PM
Parent: #21
| Quote: طيب الفاكهة الحمراء طعمها شنو؟؟؟؟ |
ماسمعت بي حلا وحمار .......
| Quote: يا خي الموية دي ذاتها زرقاء والسماء زرقاء |
والله الموية والسماء ما عندنا فيها كلام .......
لكن هلالكم ده عندنا فيهو كلام كتير .............
|
Post: #23
Title: Re: ايامي في معسكر الدفاع الشعبي .....
Author: عثمان محمد كرار
Date: 09-21-2010, 03:28 PM
Parent: #22
متابعين ياسعادتك
وياحليل القيادات الوسيطه وموسي فضل داكوتا
|
Post: #24
Title: Re: ايامي في معسكر الدفاع الشعبي .....
Author: عبدالمجيد المقابل
Date: 09-21-2010, 03:40 PM
Parent: #23
متابعين و مستمتعين بالحكاوي
==
جنابو إنت عارف عيبك الوحيد إنك وصيفابي
|
Post: #25
Title: Re: ايامي في معسكر الدفاع الشعبي .....
Author: السمانى عمارة
Date: 09-21-2010, 05:02 PM
Parent: #24
الاخ العزيز عمر عثمان
كل عام وانت والاسرة الكريمة على احسن حال
متابعين شديد رغم مرارة الاحمر وحلاوة الازرق ليلا وليلى نيلا وهلالا
|
Post: #26
Title: Re: ايامي في معسكر الدفاع الشعبي .....
Author: SHIBKA
Date: 09-22-2010, 05:40 AM
Parent: #25
جنابو عمر
متابعة من قريب
|
Post: #30
Title: Re: ايامي في معسكر الدفاع الشعبي .....
Author: omer osman
Date: 09-22-2010, 06:53 AM
Parent: #26
Quote: جنابو عمر
متابعة من قريب |
شبكة قريبتي الراقية .............
سلام وشاكرين للمتابعة ..................
|
Post: #41
Title: Re: ايامي في معسكر الدفاع الشعبي .....
Author: عثمان هبّاني
Date: 09-22-2010, 11:59 AM
Parent: #30
يا جنابو عمر ...
يا تعمل لى الجماعة الزرق ديل تسعة إستعد ولا نحن نقد سلك بالمشروع ويا سوق القطينة جوك مجندين ...
والله هناك الباسطة التقول جايبنها من الجنة ....
واصل ... متابعين معاك
|
Post: #29
Title: Re: ايامي في معسكر الدفاع الشعبي .....
Author: omer osman
Date: 09-22-2010, 06:51 AM
Parent: #25
Quote: الاخ العزيز عمر عثمان
كل عام وانت والاسرة الكريمة على احسن حال
متابعين شديد رغم مرارة الاحمر وحلاوة الازرق ليلا وليلى نيلا وهلالا |
الاخ العزيز السماني .......
كل سنة وانت طيب ............
حلاوة الازرق دي شكلها حلاوة قطن سريعة الذوبان ........
|
Post: #28
Title: Re: ايامي في معسكر الدفاع الشعبي .....
Author: omer osman
Date: 09-22-2010, 06:48 AM
Parent: #24
Quote: متابعين و مستمتعين بالحكاوي
==
جنابو إنت عارف عيبك الوحيد إنك وصيفابي |
ياهلا بالدكتور الانسان .......
احتمال تكون دي حسنتي الوحيدة ...........
|
Post: #27
Title: Re: ايامي في معسكر الدفاع الشعبي .....
Author: omer osman
Date: 09-22-2010, 06:45 AM
Parent: #23
Quote: متابعين ياسعادتك
وياحليل القيادات الوسيطه وموسي فضل داكوتا |
هلا عثمان .......
المستجدين بقوا يظهروا واحد واحد .........
جمعكم كعب زي نقاط الزير .....................
|
Post: #31
Title: Re: ايامي في معسكر الدفاع الشعبي .....
Author: omer osman
Date: 09-22-2010, 07:16 AM
Parent: #27
على عكس بقية ضباط الجيش الذين وجدناهم في المعسكر كان استقبال وترحاب قائد المعسكر مختلفاً .....
الرائد وقتها مرغني كان هو قائد المعسكر علمت بعد عدة سنوات انه ذهب الى مناطق العمليات واستشهد بجنوب السودان .....
له الرحمة من نوع الناس البقولوا عليهم ما زول دنيا ........... فبرغم تدينه الواضح جداً الا انه بشوش ومتسامح الى اقصي درجة ........
المقدم م قائدنا الميداني من الشرطة زول لسانو فاكي والنكتة في طرف خشمو حتى لو كانت من النوع الذي يوقع تحت طائلة قانون النظام العام ......
الرائد مرغني كان يستمع اليه ويبتسم ابتسامة خفيفة يعقبها بعبارة (الله يهديك ياشيخ م ) ........
الرائد مرغني كان يقيم بالقطينة ومنزله كان مفتوحاً لنا في كل الاوقات فالرجل كان كريماً ومضيافاً بشكل لايوصف ...... له الرحمة
في احدي المرات حضر لزيارة المعسكر السيد العميد سليمان محمد سليمان وكان والياً على الجزيرة .......
اصطحب السيد الوالي في زيارته بعض الفنناين من مدني ..... مرغني بوصفه قائد المعسكر وبحكم تدينه كان لديه رأي في موضوع الغناء ......
فما كان منه بعد ان رفع التمام لسعادة العميد سليمان الا ان ابلغه برأيه واخطره بأنه سيغادر المعسكر عند بدء فقرة الغناء ويعود بعدها وقد كان .....
لم يخلق ازمة او بطولة من الموقف وتصرف معه بحكمة وعقل ........
ولا انسي ابداً انه كان يحرص على التعامل معنا برفق اكثر من تعامله مع ضباط الجيش ربما لاحساسه باننا نعيش غربة الى حد ما .......
اللهم اغفر لعبدك مرغني وارحمه واسكنه فسيح جناتك ...............
|
Post: #32
Title: Re: ايامي في معسكر الدفاع الشعبي .....
Author: omer osman
Date: 09-22-2010, 07:26 AM
Parent: #31
يومين تلاتة تكسرت الحواجز المصطنعة بيننا وبين بقية ضباط الجيش في المعسكر وضباط الامن العام ......
واصبحنا سمن على عسل وارتبطنا بصداقات دامت الى يومنا هذا ونسعد كثيراً عندما تجمعنا الظروف ..........
ونتيجة لذلك التألف والروح السمحة التى كان يقود بها الرائد مرغني المعسكر تجاوزت مهامنا وادورنا مهمة تدريب منسوبي اللجان الشعبية فقط .....
واصبحنا نشارك في كل الانشطة التدريبية لمختلف منسوبي المعسكر من قيادات عليا او وسيطة .......... الخ
النشاط كان يبدأ باكراً منذ صلاة الصباح وينتهي عند موعد الفطور ثم يستائنف بعدها اما في شكل محاضرات قانونية لمنسوبي اللجان الشعبية او نشاط ميداني لباقي المعسكر ....
مابين الشرطة واللجان الشعبية في الاصل لم يكن عامراً حيث تغولت اللجان الشعبية في بداية عهدها على صلاحيات واختصاصات الشرطة كثيراً .....
هذه الحساسية والجفوة خيمت على اجواء الايام الأولي لكن بمرور الايام تعرف منسوبي اللجان الشعبية على الشرطة اكثر فاكثر وتفهموا طبيعة عملها ومدي الجهد الذي تقوم به ..
|
Post: #33
Title: Re: ايامي في معسكر الدفاع الشعبي .....
Author: omer osman
Date: 09-22-2010, 07:31 AM
Parent: #32
واذكر انه من ضمن مؤشرات التحفز المتبادل .........
كنت ادرس مادة الاجراءات الجنائية وفي حديث عن التفتيش وضابطه ....... الخ
سألني احد منسوبي اللجان الشعبية ..... اذا مشينا كشة في بيت خمور او دعارة ولقيت ضابط او عسكري بوليس قاعد هناك اعمل شنو ؟؟؟؟
بسرعة رديت ليهو ....... تعمل ميت !!!!!
تعال يانبطشي سوق المستجد ده احلق ليهو صلعة بالموس وخليهو يقيف ادارة داخلية في الشمش دي ......
في زول عندوا سؤال تاني ؟؟؟؟؟؟؟؟
صنننننننننننننننننننن
|
Post: #34
Title: Re: ايامي في معسكر الدفاع الشعبي .....
Author: omer osman
Date: 09-22-2010, 07:40 AM
Parent: #33
ثورة القضاة والمستشارين ............
حدث هام في ايامي في الدفاع الشعبي .......
سمعنا والعهدة على الرواي انه اثير في اذاعة الحركة الشعبية وقتها ..........
كانت هناك دورة مشتركة للقضاة والمستشارين وبعضهم من اصحاب الدرجات الرفيعة في السلكين والبعض في مداخل الخدمة ......
القضاة والمستشارين القانونيين من الفئات التى إعتادت على إصدار الاوامر والتعليمات لا تلقيها ......
لذلك كان من الصعب عليهم تقبل فكرة الخضوع للتدريب عسكري لكنهم حضروا في نهاية الأمر .........
كان لكل دورة مشرف من الضباط وشاء الحظ العاثر للقضاة والمستشارين ان يكون المشرف عليهم احد ضباط الجيش الذين يجيدون فارغة العسكرية بامتياز .......
منذ لحظة نزولهم من البصات بدأ في توبيخهم وتقريعهم بكل الفاظ ومسيمات العسكرية ال######ة ...........
الصدمة عليهم لم تكن هينة وكرامة وهيبة وظائفهم صارت على المحك في نظرهم .......
وفي دقائق تجمعوا وقرورا حمل حقائبهم ومغادرة المعسكر ...........
اختلط الحابل بالنابل وحصلت جهجة مبالغة فهذه اول مرة يتمرد فيها منسوبي احد الدورات وبدء التفكير في كيفية التعامل مع هذه الازمة ......
|
Post: #37
Title: Re: ايامي في معسكر الدفاع الشعبي .....
Author: فيصل نوبي
Date: 09-22-2010, 07:56 AM
Parent: #32
يعني إنت حاضر ناس الطريفي ؟
|
Post: #38
Title: Re: ايامي في معسكر الدفاع الشعبي .....
Author: omer osman
Date: 09-22-2010, 11:44 AM
Parent: #37
| Quote: يعني إنت حاضر ناس الطريفي ؟ |
الطريفي ياتو ؟ يافيصل
اوعه يكون الطريفي (حيدر الزين) ........
ياخي ده موغل في الملكية بكون الطلائع ما خشاها .....
|
Post: #36
Title: Re: ايامي في معسكر الدفاع الشعبي .....
Author: Abdlaziz Eisa
Date: 09-22-2010, 07:52 AM
Parent: #31
الصفوي جنابو عمر
سلامات
نتابع من البداية وما كنا عايزين نشغلك الردود الجانبية..
لكن ناس الزريبة الما بيعجبهم لون الحماس والهمة زرقوا البوست..
ولون الزرقة ابدا لا يصمد بطلوع الشرحان.. بشارات الصباح!!
نجمة نجمة..
واصل
|
Post: #39
Title: Re: ايامي في معسكر الدفاع الشعبي .....
Author: omer osman
Date: 09-22-2010, 11:48 AM
Parent: #36
Quote: الصفوي جنابو عمر
سلامات
نتابع من البداية وما كنا عايزين نشغلك الردود الجانبية..
لكن ناس الزريبة الما بيعجبهم لون الحماس والهمة زرقوا البوست..
ولون الزرقة ابدا لا يصمد بطلوع الشرحان.. بشارات الصباح!!
نجمة نجمة..
واصل |
الصفوة دائماً هم من يصنعون الاحداث .....
شوف إفطارات البورداب ....... نجوم الدوحة (اميرة وهارون) المغرب طارق جبريل السودان داليا الكباشي ، وانت تصنع الفارق في سنغافورة ..... ، وليد عبداللطيف في جدة
|
Post: #35
Title: Re: ايامي في معسكر الدفاع الشعبي .....
Author: أحمد الصديق
Date: 09-22-2010, 07:42 AM
Parent: #27
هلا جنابو
تحياتي
يا ريت لو ودوك عطبرة زاتو.
سلامي لجنابو الصغير.
|
Post: #40
Title: Re: ايامي في معسكر الدفاع الشعبي .....
Author: omer osman
Date: 09-22-2010, 11:50 AM
Parent: #35
Quote: هلا جنابو
تحياتي
يا ريت لو ودوك عطبرة زاتو. |
نأسف للتأخير يا ابوحميد .......
جنابو الصغير تمام التمام .........
قدمنا ليهو لي باسويرد ........... لمن بكري يرد بكون بقي كبير
|
Post: #42
Title: Re: ايامي في معسكر الدفاع الشعبي .....
Author: omer osman
Date: 09-22-2010, 12:03 PM
Parent: #40
Quote: وفي دقائق تجمعوا وقرورا حمل حقائبهم ومغادرة المعسكر ...........
اختلط الحابل بالنابل وحصلت جهجة مبالغة فهذه اول مرة يتمرد فيها منسوبي احد الدورات وبدء التفكير في كيفية التعامل مع هذه الازمة |
سابقة جديدة وخطيرة ..........
وفي اثناء نقاش القادة في كيفية التعامل معها قررت ان اتشالق واقوم بدور ما في حل هذه الازمة .......
بحكم عملي في الاقسام كنت اعرف تلاتة اربعة من القضاة والمستشارين وكلاء النيابة ........
طلبت منهم ان يجمعوا لي كل قوة الدورة في ميدان المطار (رقعة كبيرة من الاسفلت داخل المعسكر اظنها كانت مهبط هليكوبتر للشركة صاحبت المعسكر)
ربما لمعرفتهم الوثيقة بي وثقوا في كلامي وتحدثوا لبقية زملائهم وبالفعل تجمعوا في شكل حلقة كبيرة حولي .......
طلبت منهم الجلوس على الارض وجلست معهم على الارض .........
هذه الحركة على صغرها وفرت لي مدخل طيب ومقبول للحديث معهم .........
بادرتهم بقولي ياجماعة في زول عاقل ما بحترم القضاة والمستشارين ........
ثانياً انتو فيكم ناي بمثابتي ابائي وناس بمثابة اخواني الكبار وناس بمثابة اخواني الصغار ........
وفيكم العم والخال والجار ونحن كلنا في النهاية سودانيين ولا احقاد او اذلالال بيننا ......
القصة ابسط من ما خطر في بالكم ......... ياجماعة في نفس القضية مش في قاضي بحكم بي خمسة سنين وواحد بحكم بي تلاتة سنين ....
ياجماعة تقديرات الناس بتختلف والملازم ده ما قصد الاهانة ولا الاذلال بس خانو التقدير واداكم جرعة عالية جداً من اول وهلة .......
ليكم علي الزول ده تاني ما يصلكم وشوية شوية انتو براكم ح تحسوا بمتعة وذكريات ايام التدريب الصعبة ........
بعد عدة تعليقات ومداخلات اقتنع الجميع بكلامي وعاد الهدوء وانفض التمرد ....
وبالفعل حتى الملازم تفهم ان الطبيعة المهنية لهولاء القضاة والمستشارين كان يجب وضعها في حسبانه عند حديثه معهم على الاقل في الايام الاولي ....
|
Post: #43
Title: Re: ايامي في معسكر الدفاع الشعبي .....
Author: omer osman
Date: 09-22-2010, 12:08 PM
Parent: #42
Quote: يا جنابو عمر ...
يا تعمل لى الجماعة الزرق ديل تسعة إستعد ولا نحن نقد سلك بالمشروع ويا سوق القطينة جوك مجندين ...
والله هناك الباسطة التقول جايبنها من الجنة ....
واصل ... متابعين معاك |
خليهم ياعثمان لي خمسة استعد بتاع الصفاقسي ......
سوق القطينة ونوادي القطينة دي قصص براها ياعثمان .........
|
Post: #45
Title: Re: ايامي في معسكر الدفاع الشعبي .....
Author: اساسي
Date: 09-22-2010, 12:28 PM
Parent: #43
ياخي االقطينة !!
اتدربت في معسكر القطينة للدفاع الشعبي سنة 94 وكان الزاما لدخول الجامعات التدريب , معسكر القطينة الشهرين انا كل يوم قادي سلك وماشي المشوار من المعسكر للمدينة في جنح المغارب , كمية الكوارع الاكلتها في مطاعم القطينة تكفي الدوري الاوربي اربعة مواسم كدارات , اما الباسطة الاكلناها في القطينة تشغل مطاعم الحلويات ستة سنوات مع الجمع والاجازات . ذكريات المعسكر ماتزال عالقة باذهاننا حتي الان , اذكر انه هناك تعلمجي جديد بتاع جيش اسمع محمد عجل , كل ما اجي ماشي بي جمبو بهمس ليهو ازيك يا محمد كفرات والراجل يدور وينفعل ويشبكني ليك ارنب نط وزحفا استعد بعد ينتهي الجزاء يقول لي قلت لي شنو قبيل انت اقوم اقول ليهو محمد ترتار ياخي الراجل دا مرة حنني لمن عيونه رقرقن ومشي اشتكاني للملازم وبيت اليوم داك كركون زي الورد
اذكر انه في تعلمجي ظروفه شكلها متعثرة جاب ليهو كيس بتاع خيش فيهو لقيمات اداني ليهو قال لي بيعوا للمجندين واخد الكمية الدايرها من اللقيمات طبعا اخوكم ما مغبون وافقت طوالي شلت الكيس بتاع الخيش ومشينا الخيمة وعملنا حفلة يومها باللقيمات , صاحبنا لاقاني بعدين في تمام تزعة قال لي بعت اللقيمات ؟ قلت ليهو لقيمات شنو ؟ الارجل اتخلع قال لي كيف الكلام دا , قمت الجمته وقلت ليهو انت قايلني دلالية ؟ صاحبنا بقي كل ما يلاقيني يحدر لي ولحسن الحظ كان مسئول من تدريب كتيبة اخري .
اسال الله ان يغفر لنا كمية الكوارث العملناها في تلك الفترة وان يسامحنا اخوانا هؤلاء
اجمل مافي هذه التدريبات ان في خواتيمها يتم الاعتذار من قبل الجميع المتدريبن والتعلمجية ويتم التعافي بينهم
|
Post: #48
Title: Re: ايامي في معسكر الدفاع الشعبي .....
Author: omer osman
Date: 09-22-2010, 01:08 PM
Parent: #45
| Quote: اتدربت في معسكر القطينة للدفاع الشعبي سنة 94 وكان الزاما لدخول الجامعات التدريب |
غايتو كان صاح كان غلط الانقاذ ادت نص الشعب السوداني فرصة يتعرف على العسكرية ويمارسها .....
العسكرية حلوة واحلي حاجة فيها فترة التدريب ...........
| Quote: اذكر انه في تعلمجي ظروفه شكلها متعثرة جاب ليهو كيس بتاع خيش فيهو لقيمات اداني ليهو قال لي بيعوا للمجندين واخد الكمية الدايرها من اللقيمات طبعا اخوكم ما مغبون وافقت طوالي شلت الكيس بتاع الخيش ومشينا الخيمة وعملنا حفلة يومها باللقيمات , صاحبنا لاقاني بعدين في تمام تزعة قال لي بعت اللقيمات ؟ قلت ليهو لقيمات شنو ؟ الارجل اتخلع قال لي كيف الكلام دا , قمت الجمته وقلت ليهو انت قايلني دلالية ؟ صاحبنا بقي كل ما يلاقيني يحدر لي ولحسن الحظ كان مسئول من تدريب كتيبة اخري . |
ياخ عمك يكون جاهو هارت عديل كده ....
| Quote: اجمل مافي هذه التدريبات ان في خواتيمها يتم الاعتذار من قبل الجميع المتدريبن والتعلمجية ويتم التعافي بينهم |
بالضبط هذا ما يحدث وكثيراً ما تسيل دموع الضباط والافراد لوداع المتخرجين ......
خصوصاً عند وداع اولئك المشاغبين والمبزبطين الذين ياكلون لقيمات التعلمجية ...............
|
Post: #44
Title: Re: ايامي في معسكر الدفاع الشعبي .....
Author: صلاح أبودية
Date: 09-22-2010, 12:20 PM
Parent: #40
جنابو عمر
كل سنه وانت طيب
Quote: المقدم والنقيب ك خصصت لهم احدي الغرف ..... ودفعتي ح والنقيب ص خصص لهم الصالون بعد تزويده باثاثات غرفة
انا وصديقي ع كان من نصيبنا الغرفة الثانية ........... |
ما عرفتك يا أبو الحروف !!
|
Post: #46
Title: Re: ايامي في معسكر الدفاع الشعبي .....
Author: omer osman
Date: 09-22-2010, 12:33 PM
Parent: #44
| Quote: ما عرفتك يا أبو الحروف !! |
حركة في شكل وردة ياسعادتك .......
خليك قريب لمن نجي لقصص ناس الجيش وعكلتت الدور الداير وسر الليل
|
Post: #47
Title: Re: ايامي في معسكر الدفاع الشعبي .....
Author: عفاف الصادق بابكر
Date: 09-22-2010, 01:00 PM
Parent: #46
 متابعييييين بشغف ..
 بوست ما منظور مثيله..
 ما تتطول الغيبة .. واصل ..
تحياتى للمدام والصغنونى (اوع يكون قالب الليل نهار)
|
Post: #49
Title: Re: ايامي في معسكر الدفاع الشعبي .....
Author: omer osman
Date: 09-22-2010, 01:12 PM
Parent: #47
Quote: متابعييييين بشغف ..
بوست ما منظور مثيله..
ما تتطول الغيبة .. واصل ..
تحياتى للمدام والصغنونى (اوع يكون قالب الليل نهار) |
عفاف ....... قلب البورد النابض
الف شكر للمتابعة ...........
جنابو الصغير لحدي الان منضبط جداً .....
بس خايفين عليهو من تأثيرات عصابة القناع الاسود (حقوق المصطلح محفوظة لداليا الكباشي)
|
Post: #50
Title: Re: ايامي في معسكر الدفاع الشعبي .....
Author: طارق جبريل
Date: 09-22-2010, 01:19 PM
Parent: #47
مالك ما سقتة معاك نسيبك الغتيت داك
|
Post: #51
Title: Re: ايامي في معسكر الدفاع الشعبي .....
Author: omer osman
Date: 09-22-2010, 01:38 PM
Parent: #50
| Quote: مالك ما سقتة معاك نسيبك الغتيت داك |
واتخيل ياطارق قصة النسب دي ذاته اتبلورت في الايام ديك ........
بجيك بالتفاصيل لي قدام .................
|
Post: #52
Title: Re: ايامي في معسكر الدفاع الشعبي .....
Author: Abdlaziz Eisa
Date: 09-22-2010, 04:17 PM
Parent: #51
Quote: الصفوة دائماً هم من يصنعون الاحداث .....
شوف إفطارات البورداب ....... نجوم الدوحة (اميرة وهارون) المغرب طارق جبريل السودان داليا الكباشي ، وانت تصنع الفارق في سنغافورة ..... ، وليد عبداللطيف في جدة |
يا جنابو
في ضيوف هنا وشهم زرّق من انجازات ووصف الصفوة ده..
وعلشان ما يزعلوا نخليهم يجيبوا الكورة من برة!!
نتابع............
|
Post: #53
Title: Re: ايامي في معسكر الدفاع الشعبي .....
Author: عثمان محمد كرار
Date: 09-23-2010, 00:42 AM
Parent: #52
غايتو في نسوان من حلة الكداريس بيجن يبيعن شاي الصباح عندهن شاي كارب خلاص
|
Post: #54
Title: Re: ايامي في معسكر الدفاع الشعبي .....
Author: عثمان محمد كرار
Date: 09-23-2010, 00:56 AM
Parent: #53
من القصص الطريفه مره مشي مندوب من الخيمه لاحضار الغدا وكان بين المطعم والخيم مظله يجلس فيها الضباط اها صاحبنا مشي جاب صحن الفاصوليا والعيش وماشي علي الخيمه واليوم داك كان فاصوليا غير عاديه لانو خاتين فيها لحم اها وهو ماشي شاف ليه قطعت لحمه دخل ايدو واداها خشمو طوالي بس الضابط يشوفو وتعال شوف محاضره والناس منتظره الغدا قام الضابط شال صحن فاضي وكان جمب المطار الصغير احواض مويه وكانت لونها اخضر و######انه غرف شوية مويه وكباها في صحن الفاصوليا واداها للمستجد يشرب وبعد الشراب ارنب نط عشان يطرش وواصل المهم عشره اشخاص في الخيمه اتغدو بي رغيف حاف واتوكلو علي التمرين (الضابط كان بتاع شرطه :))
|
Post: #56
Title: Re: ايامي في معسكر الدفاع الشعبي .....
Author: omer osman
Date: 09-23-2010, 06:30 AM
Parent: #54
| Quote: (الضابط كان بتاع شرطه :)) |
غايتو ده ما انا .........
|
Post: #55
Title: Re: ايامي في معسكر الدفاع الشعبي .....
Author: ALZOLZATOO
Date: 09-23-2010, 01:01 AM
Parent: #53
جنابو عمر
كل سنة وانت طيب
انا برضو تدربت في معسكر القطينة في ديسمبر 91 اسامة بن زيد الثانية
كان مقدم الشرطة اسمو محمد خير تقريبا وملازم اول امير بركية رجل مهذب ومحترم وضابط منضبط
اذكر انو يوم جانا قائد الدفاع الشعبي والناس بدات تشتكي من المعاملة والاكل لانو كان حدث انو في واحد سبه دين وجلدوهو في المعسكر والناس طلعت من المعسكر
المهم واحد قال ليهو العيش فيهو سوس قال ليهو نحن لمن كنا مستجدين كان العيش زي حلاوة سمسمية من السوس لووولز
المهم كانت ايام جميلة وكل يوم كنا قادين سلك لي سوق القطينة محل الباسطة واللبن
ايام لها نعناع
تحياتي
زاتوووو
|
Post: #57
Title: Re: ايامي في معسكر الدفاع الشعبي .....
Author: omer osman
Date: 09-23-2010, 06:34 AM
Parent: #55
| Quote: لانو كان حدث انو في واحد سبه دين وجلدوهو في المعسكر والناس طلعت من المعسكر |
هذه الواقعة سنرد إليها لاحقاً بالتفاصيل وكيف إنها كانت السبب في مغادرتي معسكر الدفاع الشعبي !!!
تحياتي يا زاتوووووووو
|
Post: #58
Title: Re: ايامي في معسكر الدفاع الشعبي .....
Author: معتصم محمد صالح
Date: 09-23-2010, 07:38 AM
Parent: #57
صباح الخير يا كمندان ..
طالما القصة دفاع شعبي ما قطينة بس فهي سانحة لنجتر ذكريات الدفاع الشعبي بحلوها ومرها .. طبعا كنا اوووول ناس يطبقوا فيهم قصة الدفاع الشعبي قبل دخول الجامعة (اسامة بن زيد الاولى 1990) وطبعا الفكرة كانت جديدة وقالوا لمزيد من التجويد واكتساب المعارف يتم تحويل الطلاب من ولاياتهم الى ولايات اخرى ونحنا طبعا ناس الخرطوم كان نصيب جزء كبير مننا التوجه الى بورتسودان ( معسكر اسوتربا ) .
وبدانا البزبطة قبل المعسكر ومن الخرطوم حيث تخلفنا وكنا اربعة من مدرسة واحدة تخلفنا عن موعد البصات التي انطلقت فجرا وكان الفصل شتاء وكان تخلفنا متعمدا حيث قررنا التوجه الى بورتسودان بواسطة القطار الذي كان اسبوعيا .
بعد مرور يومين على تحرك البصات ذهبنا الى السكة حديد وامتطينا قطار بورتسودان الذي تحرك عند الثامنة صباحا وبعد مسيرة طويلة تخللتها العديد من الاعطال والمعاناة بالاضافة لتعرضي لالتهاب حاد نتيجة هواء السطح الذي صعدنا اليه في محطة الجيلي لنوفر ثمن التذكرة وارتفعت درجة حرارتي مع الكحة المتواصلة وقبيل الوصول الى بورتسودان بدأنا نسأل الركاب خصوصا الخبراء منهم عن اسوتربا وعن بورتسودان باعتبا انها اول رحلة لنا الى الثغر الحبيب وكعادة السودانيين بدأت النصائح تنهال علينا ولا انسى موقف تلك المرأة التي اولتني عناية خاصة عندما اشتدت علي الحمى فانزلوني الى داخل العربة التي كنا على سطحها اسرعت تلك المرأة الى احدى حقائبها الموجودة في مزيرة عربية القطر وبعد بحث مضن اخرجت كيسا مربوط باحكام وبدات في البحث عن شئ بدا لي مهما بعد لحظت مدت الي يدها بحبات من القرض نعم تلك الحبة العجيبة التي اوقفت الكحة المتواصلة من محطة عطبرة ثم اعطتني حبتين ( ريفو ) وهي حبوب مثل الاسبرين شائعة الاستخدام في مصر ، وقتها كان القطار يصعد الى جبال البحر الاحمر بمشقة والشمس تودعه خلف الجبال بعد قليل استقرت حالتي وكان رفاقي يتحلقون حولي واصبحنا محط انظار الركاب الذين تواصلت نصائحهم واتفقوا على ان ننزل قبل دخول القطار الى بورتسودان وليتنا لم نفعل لان القطار له ( سندة ) وهي وقفة قصيرة جدا في محطة اسوتربا كما ان العودة من بورتسودان الى اسوتربا ليلا صعبة ولا توجد مواصلات بعد المغرب استقر الراي على النزول في اسوتربا التي وصلناها مع مغيب شمس اليوم التالي لتحركنا من الخرطوم وتفاجأنا بعدم توقف القطار في اسوتربا بل قلل من سرعته كثيرا عند وصوله المحطة فصاح فينا احد الذين قدموا النصائح (يا اولاد تلبو سريع القطر ما ح يقيف ) فقد منع وقوف القطار منذ احياء المعسكر قبل اسبوع و لم تكن امامنا فرصة للتفكير فاخذنا شنيطاتنا سريعا وقفزنا من القطار .. ووجدنا انفسنا في وسط المعسكر وحولنا عدد من التعلمجية الذين لم يجدوا صعوبة في التعرف علينامن صلعنا التي نصحنا البعض بحلاقتها في الخرطوم و رحبوا بنا ترحيب الغائبين لخمسة ايام عن تمام الصباح ترحيبا لم يراعوا فيه معاناتنا خلال السفر الذي امتد ليومين .. وكانت اولى العبارات التي طرقت مسامعنا مرحب بالسواح ..
|
Post: #59
Title: Re: ايامي في معسكر الدفاع الشعبي .....
Author: معتصم محمد صالح
Date: 09-23-2010, 08:33 AM
Parent: #58
ياخ كنتو تجو يوم التخريج ... انشاء الله جبتو معاكم (كمرات) عشان تتصورو .. مكملين النوم في القطر يلولح فيكم وانتو تشخروا .. عبارات متتالية انهمرت علينا من اولئك التعلمجية الذين كانوا خليطا من البحرية والدفاع الجوي .. يلا يا مجند يا كهنة كل واحد يحلق صلعة لاخوه ... يا ربي .. اي صلعة هذه التي سنحلقها .. يا جنابو نحنا حالقين ..قالها اكرم ( ود كوبر ) وهو الان قاضي محكمة عليا .. يا ميت انتو مخنفسين تقول لي حالقين كيف .. نحنا اي زول بجينا هنا لازم يحلق صلعة عندنا هنا .. وتجدد صرف الفارغة الذي لم ينته الا بسؤال احدهم لنا عن الامواس وهل احضرناها معنا وبالطبع لم نكن في حاجة اليها .. ارسلو احدنا الى دكان المعسكر لاحضار الامواس .. وحلقنا الصلعة صلعة .. لم نكد نرفع رؤوسنا من الحلاقة الا وتعالت الاصوات من جديد ..يلا يا ميت قوم على حيلك .. اقيفو هناك جنب السلك .. ختو شنطكم دي هنا .. والعندو غذاءات يطلعا من الشنطة بي جاي .. بالطبع حملنا اهلنا كمية معتبرة من البلح والطحنية والمربة والسكر .. تمت مصادرتها فورا ... كل هذا ولم يسألنا احد عن اسمائنا وعن اوراقنا .. كانوا يعرفوننا تماما .. لان اسمائنا ترد مع الغياب في كل طابور .. قال لنا احدهم .. بقيتو اشهر من قائد المعسكر ذاتو .. كل يوم اساميكم بتتقال للعقيد صباح ومساء ..
بعد اكثر من ساعة طلبوا مننا التحرك الى احدى الخيم .. صرفوا لنا مهماتنا .. طقم الدمورية .. بوت .. كباية بلاستيك صغيرة .. مشمع .. يلا يا مجند امشي غير سريع وتعال واعمل حسابك الاباويت ( جمع بوت ) في الجيش هناك لغة خاصة خصوصا في جمع الاشياء مثل الملاحيظ للملحوظات .. الاباويت دي طوالي تكون بتلمع ..
كنا نظنها نهاية الليلة وسنخلد للنوم بعد استلام المشمع ولكنها كانت بداية لليلة طويييلة .. لم نكد نفرغ من تبديل ملابسنا حتى انطلقت صفارة ... ورأينا الجميع يجري داخل المعسكر ... من اين اتى هؤلاء .. مئات من زملائنا خرجو من العنابر والخيم .. كلهم يجري في اتجاه واحد ..الى الارض الحرام كما يسمونها .. ارض الطابور .. كلهم يجري الا نحن الجمتنا الدهشة وتسمرنا في مكاننا .. يا كهنة انت هناك واقف مالك .. اتانا احدهم وبدا في الصياح يلا يا ( دلقون ) اجري .. وجرينا حيث جرى الاخرون .. الى الارض الحرام ...
خلال دقائق انتظم المجندون كل في كتيبته .. صفوف متراصة ومنتظمة .. وامامهم وقف التعلمجية .. كل شئ منتظم .. كنا الكلمة الشاذة وسط هذا النظام .. اتانا الحكمدار ..ووقف امامنا .. ما لقيتو حتة تقيفوا فيها طبعا .. ولا ح تلقوا ..امشي هناك اقيف ورا .. لحظات تم تبادل التمامات بين ضباط الصف .. ساد بعدها هدوء لم يقطعه الا حضور قائد المعسكر وكان برتبة الملازم .. اسمه معتز كانت النعمة والراحة تبدو عليه .. تم تسليمه الاوراق ورفع التمام النهائي اليه ..
طابور .. طابور صفا ... اييييينتباه ... وقف الملازم امام الطوابير .. طبعا يا اخوانا الليلة عندنا احتفال كبير .. تشاركنا فيه فرق البعوض وقد يستمر الحفل حتى تمام الصباح .. لانو عندكم اخوانكم جو بدري شوية .. وعشان كده ح نحتفل معاهم للصباح .. من قواعد العسكرية الراسخة ( الشر يعم ) وهو شرنا الذي عوقب به كل المعسكر (بادارة داخلية ) انتهت عند الساعة الثالثة فجرا ..وكانت بداية سيئة لعلاقاتنا مع زملائنا في المعسكر ..
اواصل....
|
Post: #60
Title: Re: ايامي في معسكر الدفاع الشعبي .....
Author: ashraf mukhtar
Date: 09-23-2010, 09:03 AM
Parent: #59
| Quote: طلبت منهم ان يجمعوا لي كل قوة الدورة في ميدان المطار (رقعة كبيرة من الاسفلت داخل المعسكر اظنها كانت مهبط هليكوبتر للشركة صاحبت المعسكر) |
مطار صدام
|
Post: #61
Title: Re: ايامي في معسكر الدفاع الشعبي .....
Author: محمد البشرى الخضر
Date: 09-23-2010, 09:26 AM
Parent: #60
Quote: أو للدقة شهوري العشرة في معسكر الشهيد عيسي بشارة بالقطينة ....
فبراير 1991م - ديسمبر 1991م ............. |
إحنا يا جنابو أول دفعة طلاب جامعات جلينا منكم بشوية اتخرجنا -إتخارجنا - في يناير واحد وتسعين
أذكر الرائد ميرغني رحمة الله عليه
و الملازم اول محمد خالد و الملازم ثاني ياسر - أعتقد استشهد أيضا - و الرقيب أول مظلي بشارة
كنا على ما أذكر الكتيبة التانية السرية التانية يمكن
كان جلالاتنا بتبدأ بي " الله و الوطن يا كتيبة اتنين بيان بالعمل يا كتيبة اتنين "
قام ناس التنسيق سموا الكتائب اسماء تانية كتيبنا اتغير اسمها لتبوك
فاتغير الشعار لـ " الله و الوطن يا كتبة تبوك بيان بالعمل يا كتيبة تبوك"
اذكر يوم صرف اول ماهية قسمونا حسب الكليات و الزمن داك البرلم كان اعدادي علوم قبل التوزيع على الطب و الهندسة وكان الملازم اول محمد خالد موجود فقال:
دا شنو إعدادي إعدادي لافي طب ولا هندسة أسي كان دخلتو الكلية الحربية ما أخير ليكم بدل الكلالي الكعبة دي
اذكر ايضأ كان معانا في نفس الفترة دفعة من الخدمة المدنية منهم ناس الطيران المدني اعتقد
التلاوة كانت الحلقات مشتركة بيننا وبينهم اذكر بابكر حنين كان ماسك حلقة خيمتنا
تعرف يا جنابو تجربة الدفاع الشعبي دي بالرغم من إن الكيزان قاموا بنشاط رهيب للتجنيد فيها لكن عادت عليهم بالوبال
أول احداث عنف في الجامعة بسبب اغلاق اتحاد المحايدين لمكاتب جمعيات يسيطر عليها الاتجاه الاسلامي
الكيزان نالوا فيها علقة شهيرة وطردوا من البركس عماد المعركة كان طلاب الدفاع الشعبي
اكثر فائدة عادت على دفعتنا اننا نزلنا الجامعة الناس بتعرف بعض أو شايفة بعض
فكان في تضامن ضد حركات السناير خاصة في البركس
شكرا يا جنابو على البوست اللطيف
|
Post: #63
Title: Re: ايامي في معسكر الدفاع الشعبي .....
Author: الامين محمد علي
Date: 09-23-2010, 09:46 AM
Parent: #61
سلام ..يا جنابو
الاخ ودالبشرى شكلو كان في نفس كتيبتي...
وحقيقي كانت فترة الدفاع الشعبي غريبة ومليئة بالاحداث والظريفة..
اذكر في وفد جاء من الخرطوم لتفقد الطلاب بعد سريان اشاعات عن تعرض بعضهم للموت..
الوفد كان به وزراء واظن مدير الجامعه..
طبعا فتحو باب الشكاوي في طابور لا زلت اذكره،،الناس القدام وفهمو العسكريه مستحيل اطلعو ويشتكو
لكن في كتيبة افرادها حضرو متاخرين فخرجو للشكوى...
-واحد شكى من قلة الاكل ..سموهو مستجد مجاعة واجبروهو اشرب صحن فاصوليا
- واحد شكى من انو اللبس ما اسلامي ((كان رداء للكتيبة 4)
- اما اظرفهم فما زلت اذكرهو ..كان عامل فيها تفتيحا ..فقد مدح المعسكر واثنى عليهوو
شكى من قصر المدة وطالب بمدها شوية
اول ما الوفد رجع الخرطوم ..تعال شوف الصفافير والطوابير ..اول زول طلعو كان الراجل الطالب بمد الفترة ..محمد خالد قال ليهو انت قايلا جمعية تاسيسية تختبر يا مستجد وسموهو مستجد مظاهرات
وكان اسمه سليمان بقرا اداب وقد ذاق الامرين بعد ذلك..
اجمل حاجة كان النكات البتحصل في الادارة الداخلية:واحد بقرا بزنس الانجليزي حقو كان جيد
قال ليهو ضابط في ادارة شيل الجردل ..فقال اي كانت ..الضابط قال ليهو انا اخليك يو كان
شخصياً لي ذكريات تملأ كتب عن هذه الفترة العجيبة..
|
Post: #66
Title: Re: ايامي في معسكر الدفاع الشعبي .....
Author: omer osman
Date: 09-23-2010, 11:37 AM
Parent: #63
| Quote: شخصياً لي ذكريات تملأ كتب عن هذه الفترة العجيبة.. |
يا الامين ..... ما تبخل علينا بيها .......
البورد طلع (ثكنة عسكرية) عديل كده .......
|
Post: #65
Title: Re: ايامي في معسكر الدفاع الشعبي .....
Author: omer osman
Date: 09-23-2010, 11:02 AM
Parent: #61
تعرف يا ودالبشري شكلي كده ح اعمل لي كتيبة من البورداب المستجدين المجاهدين ممكن اعمل بيها إنقلاب عديل كده ....
| Quote: و الملازم ثاني ياسر - أعتقد استشهد أيضا - و الرقيب أول مظلي بشارة |
كان في اتنين ملازمين اسمهم ياسر ........ واحد سمعت بيهو ما قابلتو وعرفت انو سافر الجنوب قبل وصولنا المعسكر ........
التاني هو ياسر بشير راجل مهذب واخلاقو عالية ومنضبط جداً جداً اشتغلنا فترة طويلة لحدي ما خليت الدفاع الشعبي
الان هو الياور الذي يقف خلف الرئيس البشير ..... وحقيقة الراجل يستاهل ربنا يوفقه
الرقيب اول مظلي بشارة .......... تقاعد ويعمل الان فرد أمن في شركة دال الزراعية ..........
|
Post: #62
Title: Re: ايامي في معسكر الدفاع الشعبي .....
Author: فيصل عثمان الحسن
Date: 09-23-2010, 09:32 AM
Parent: #60
| Quote: انا برضو تدربت في معسكر القطينة في ديسمبر 91 اسامة بن زيد الثانية |
الاعزاء عمر والزول ذاتو , تحياتى وتقديرى .
فى الفترة المشار اليها تم احضار حوالى خمسة من طلاب احدى الجامعات السودانية الى احد بيوت
الاشباح الذى كنت مرابط فيه بسبب الاعتقال طبعا , احدهم يسمى منذر يسكن الكلاكلة القبة وآخر هو
شقيق الزميل المقدم شرطة معاش الفاتح كامل وكان أفراد الحراسة ينادونه بأخو الكجر , وقد سمعنا
انهم تمردوا لسوء المعاملة فى معسكر الدفاع الشعبى بالقطينة , وتعرضوا جميعهم لتعذيب قاسى ومعاملة كريهة , وكان مكان احتجازهم الغرفة المجاورة للحمام وهى غرفة شهيرة حيث انها المكان الذى توفى فيه الطبيب على فضل وكانت دمائه الطاهرة تلطخ جدرانها.
|
Post: #67
Title: Re: ايامي في معسكر الدفاع الشعبي .....
Author: omer osman
Date: 09-23-2010, 11:39 AM
Parent: #62
سيادتو فيصل .........
الف شكر لمرورك .............
وكل عام وانت بخير ...................
|
Post: #64
Title: Re: ايامي في معسكر الدفاع الشعبي .....
Author: omer osman
Date: 09-23-2010, 10:54 AM
Parent: #59
معتصم محمد صالح ...........
عامل لي فيها ملكي وبتاع دهب ......
من يوم الليلة تاني محل ما تلقاني كان ما وقفت انتباه وطبقت قيام النفر البيادة وحييت ما تسلم علي ........
انتو قايلين الدبابير دي نحن اشتريناها من سوق سعد قشرة والا شنو ؟؟؟؟؟
|
Post: #68
Title: Re: ايامي في معسكر الدفاع الشعبي .....
Author: معتصم محمد صالح
Date: 09-23-2010, 02:25 PM
Parent: #64
لم يخيب البعوض ظن قائد المعسكر في الاحتفال بنا بما يليق .. ويبدو ان زملائنا اعتادوا على لسعات البعوض وطنينه وبدأوا يتعايشون معه.. نزل يدك يا زول ..خلي البعوض ياكل رزقو ..ساعات مرت ونحن متصلبون في اماكننا .. ويتبادل التعلمجية صرف الفارغة لنا .. اخذ منا الارهاق والجوع ماخذا .. الى اتى الفرج عند الثالثة فجرا عندما عاد قائد المعسكر الى الطابور بعد ان كمّل نومتو .. ووقف امامنا وقال .. ح نعمل انصراف .. الناس ترجع الثكنات تغسل وتكوي وتجمع لطابور الصباح عند السادسة صباحا .. اثناء وقوفي راودتني افكار كثيرة بمغادرة المعسكر فور طلوع الشمس ويبدو انها اتفقت مع افكار زملائي عندما التقينا عقب الانصراف .. واتفقنا على الانتظار حتى تشرق الشمس ونعرف المداخل والمخارج ..
تم توزيعنا في خيمة مع 6 من زملائنا الذين رحبوا بنا رغم ما فعلناه فيهم .. اكرموا وفادتنا بخبز جاف متبقي من العشاء .. التهمناه بشهية لاننا لم نذق طعاما منذ نزولنا من القطار .. بدأوا في غسيل ملابسهم ..ونظافة الاباويت .. لم نكن نحتاج لغسل الملابس الجديدة .. فكرت في نومة صغيرونة قبيل التمام .. وبالفعل دقست للحظات قطعها احدهم دخل الخيمة ويحمل في يده طشت الغسيل وكراع كرسي مكسور ..يخبط بها .. الصلاة يا مجاهد .. الصلاة يا مجاهد .. خرج زملائنا سريعا نحو مسجد المعسكر .. وقلنا انها فرصة لنومة الى موعد التماما .. وما هي لحظات حتى عاد صاحب الطشت الى الخيمة .. الصلاة يا مجاهد .. الصلاة .. وكان معه تعلمجي امرنا بالجري نحو المسجد ..
لانوم اذن .. عقب انتهاء الصلاة .. وقف احدهم وتحدث طويلا ..الى ان بدات الارض تضئ .. وعقب انتهاء الحديث وجدنا الدجميع يجري ايضا نحو فنطاس الماء الوحيد بالمعسكر .. ويشكلون صفا طويلا .. اخبرونا انه مسموح لك بكوب من الماء فقط في الصباح .. لان الماء يتم احضاره بالتانكر من بورتسودان .. احضرنا اكوابنا ووقفنا في الصف واخذنا نصيبنا من الماء .. وبعضهم لم يصل الى الماء بسبب انطلاق صفارة التمام .. وجرينا نحو الارض الحرام .. اثناء التمام جلت ببصري في المعسكر .. كان مدينة لحجاج البحر يتجمعون فيها .. وتم اغلاقه لسنوات وفتح خصيصا لنا .. قام زملائنا خلال الفترة التي سبقونا فيها باعادة نظافة وبناء العنابر والحمامات .. كان شاسعا جدا .. انتهى التمام .. طلبوا مننا نحن الجدد عدم التحرك .. ثم اتانا احدهم (عريف بحرية ) قال انه سيدربنا ما فاتنا ويلحقنا بزملائنا .. سالنا .. في واحد عندو اي فكرة عن العسكرية ( اختبرت فورا ) .. هي اللحظة التي كنت انتظرها .. ( اختبرت ) تعني ان ترفع يدك الى الامام .. قال ماشاء الله .. طلايع مايو ولاشنو .. امرني بالخروج من الصف .. خرجت .. قال لي بتعرف شنو عن العسكرية ؟ قلت له اي حاجة .. يا زووول .. نحنا بنجرب .. ولو طلعت كضاب .. بكون في كلام تاني .. ابديت موافقتي .. بدأ معي .. صفا .. انتباه .. خلف در .. يمين در .. شمال در .. معتاداً مارش .. اغلب تدريبات البيادة .. طبقتها باحترافية عالية جد اذهلته .. قال لي بتعرف شنو تاني .. وعندما لاحظت رضاه عن ادائي .. قلت ارمي ليهو التقيل .. اعرف استخدام 7 انواع من الاسلحة .. اجتزت مشروع خلوي .. اعرف التكتيك العسكري وجميع دروسه .. ياخ من الاخر انا دخلت دورة صاعقة .. لا اله الا الله .. يا زول كدي تعال جاي انت تكون مخابرات ونحنا ما عارفين .. اخذني فورا الى مكتب الحكمدار ( صول ) كرر الاختبارات .. سألني عن بعض المعلومات عن التكتيك اجبته بثقة .. سالني عن اجزاء الكلاش ذكرتها سريعا مع توضيح الفك والتركيب ... ذهل .. اخذني بدوره الى مكتب قائد المعسكر .. عند الدخول الى مكتب الملازم وامعانا في تثبيت عسكريتي .. قمت بضرب رجلي بالارض بصورة قوية جدا اذهلت الملازم .. الذي وقف وقال .. مبروك ... فيما اندهش مرافقي الذي رفع يده محييا فقط .. وتمت اعادة القصة للملازم الذي سألني عدة اسئلة وفقت في اجابتها ..
الكديت ( التدريب العسكري بالثانوي ) .. وما ادراك ما الكديت .. وفي مدرسة المقرن الكديت كان مختلفا .. كنا مرضى بالعسكرية دخلنا دورات مع سلاح الاسلحة .. ومع قيادة المنطقة العسكرية .. كانوا يرحبون بنا كثيرا ويساعدوننا ويمدونا بالمهمات العسكرية التي كانت نادرة في ذلك الوقت 1986 - 1988 .. ذهبنا الى ناس المظلات بكرري وطلبنا الدخول في دورة صاعقة استغربوا في بادئ الامر .. شككوا في امكانية تحملنا للدورة .. ووافقوا واجتزنا الدورة بنجاح كامل .. ثم دورة للاسلحة الخفيفة بسلاح الاسلحة .. ثم مشروع خلوي مع ناس الكلية الحربية .. قال لي الملازم .. ياخ انا ما دخلت دورة صاعقة .. امر الصول بالانصراف وتركي معه .. ودار حديث مختلف عرفني فيه بالمعسكر وطرق ادارته وتوزيعاته ..وقال لي انك لا تحتاج لتدريب لذا سنستفيد منك في المعسكر ..وخيرني بين الانضمام الى المطبخ او خدمة الحراسات على الابواب .. ولما كان الجوع يسيطر علي منذ الليلة الماضية قررت الانضمام الى المطبخ .. نادى على احد العساكر امام مكتبه وامر بصرف كاكي اخدر لي وقال لي اخلع الدمورية .. بعد لحظات كنت ارتدي الكاكي الكامل اسوة بالتعلمجية ..ودوروني الى المطبخ .. وجدت اربعة اشخاص هم قوة الممطبخ .. بقياة رقيب اول بحرية وعريف ووكيل عريف من الدفاع الجوي وجندي من البحرية وصرت خامسهم .. كانت الساعة تشير الى الثامنة وقتها وجدتهم .. عرفوني بهم ... وعرفتهم بنفسي ... بعد لحظات كنت اتناول اشهى وجبة من اللحم المحمر المخصوص لناس المطبخ فقط .. لان بقية المعسكر ستفطر عدسا ذلك اليوم .. واللحم مقتطع من طبيخ الغداء ...
اها ياكمندان شفت العسكرية كيف ..
ساواصل
|
Post: #69
Title: Re: ايامي في معسكر الدفاع الشعبي .....
Author: omer osman
Date: 09-23-2010, 02:40 PM
Parent: #68
| Quote: خلي البعوض ياكل رزقو |
او كما يقول التعلمجية (اصغر منك بعمل ليك شنو)
| Quote: عاد قائد المعسكر الى الطابور بعد ان كمّل نومتو |
ما قالوا ليكم (الضابط مابنوم ... الضابط بكون بفكر) .....
| Quote: وفي مدرسة المقرن الكديت كان مختلفا |
كنت في الكديت بمدرسة الخرطوم الجديدة 84-86 لكن النصيحة لي الله حتى في وقتنا كديت مدرسة المقرن كان مميز جداً ........
من يوم اللية يا معتصم ح تكون صول ادارة كتيبة بورداب سودانيز اون لاين .......
مبروك ياحضرة الصول ................
|
Post: #70
Title: Re: ايامي في معسكر الدفاع الشعبي .....
Author: عثمان محمد كرار
Date: 09-24-2010, 06:58 PM
Parent: #69
واصل ياسعادتك
|
Post: #71
Title: Re: ايامي في معسكر الدفاع الشعبي .....
Author: ALZOLZATOO
Date: 09-24-2010, 10:08 PM
Parent: #70
والله يامعتصم محمد صالح حالتك تحنن هاهاهاي
ياخي نحنا وقعنا في كتيبة وهي الكتيبة التالته وهي مكونة من المتاخرين عن المعسكر والعائدين بعد الخروج من المعسكر كنا عايشين عيشة رفاهية عديل كده وفي حاجات بتحصل في الكتيبة الاولى والتانية ماسمعنا بيها الا بعدما نزلنا الجامعة
اذكر انو انا دخلت المعكسر تقريبا يوم 19 ديسمبر 1991 متاخر حوالي اسبوعين اها تاني يوم عملوا لينا الكشف الطبي وقدر ماذكرت للطبيب بلاوي الدنيا كلها برضو طلعني لائق طبيا بس كتب لي قطرة عيون ودي خلتني كل يوم امشي اطلع بره المعسكر واجي داخل بي عين قوية انو مشيت اجيب قطره والغريبة انو لقيت القطره ناشفه هاهاهاي مافيها ولا نقطة لكن قلنا ماخسارة
المهم بعد اسبوع جانا رقيب اول الله يطراهو بالخير اسمو عبدالقادر دروه بكسر الدال قال ممكن تقدموا لي اذن بعد ده وطبعا قاصد الناس الموجوده في المعكسر لمدة قريبة للشهر
اها كتبت طلب اذن للخروج وذكرت انو انا شغال وماسك رواتب ناس ولازم امشي اصرف الجماعة وطبعا اخوك كان مضرب على راس السنة وكده هاهاهاي اها تاني يوم جانا الرقيب وقال الاذونات بتاعتكم كلها رفضوها ماعدا واحد بس
وين بتاع المرتبات هاهاهاهاي قلت ليهو انا سعادتك قال لي انت الوحيد الادوك اذن وسط استهجان من ناس الخيمة انو كيف خلال اسبوع احصل على اذن
المهم قابلت مقدم الشرطة وقال لي الساعة كم قلت ليهو عشرة قال لي بكره نفس المواعيد دي تكون واقف نفس وقفتك دي قلت ليهو حاضر سعادتك اها ومشيت مع ملازم جيش اسمو حسين وطبع لي اذن خروج اها خرجت يوم 30 ديسمبر
ورجعت يوم 8 يناير لوووووووووولز بعد حضور تخريج اصحابي في الكلية الحربية
اها طبعا دخول المعسكر بالليل طبعا اها جيت ماشي محمل بالبلح والطيبات لقيت العساكر قابضين ليهم كم نفر كده مشوا القطينة واتعشوا هناك ومتجرسين للعساكر انو مشينا اتعشينا بس والعسكري شابكهم خلاص نمشي لي قائد المعسكر نقول ليهو الجماعة ديل قالوا هنا مافي عشاء هاهاهاي
المهم جيت ماشي بي جنبهم ولا شغال بيهم قام واحد قال لي تعال يا سعادة اللواء زريبة هي جاي من وين وماشي وين
قلت ليهو ماشي الخيمة قال لي جاي من وين قلت ليهو من الخرطوم قال لي عندك اذن قلت ليهولا
قال لي ليك كم يوم قلت ليهو عشرة ايام وشايل شنو قلت ليهو بلح وتعينات هاههاي عاين لي صاحبو كده
قام قال لي اتفضل ياسعادة اللواء خش ههههههههههههههههههه قام قال للجماعة الواحد يا يكون زي ده يابلاش ماتمشوا تاكلو ربع باسطة وتجوا تتجرسوا هنا لووووووووووولز
ياخي عندك عضو منبر هنا من اكبر المشاغبين بالمعسكر استلم حسن زمرواي ياجنابو
تحياتي
زاتوووو
|
Post: #72
Title: Re: ايامي في معسكر الدفاع الشعبي .....
Author: SHIBKA
Date: 09-24-2010, 10:37 PM
Parent: #71
متابعة للبوست عن قرب ياسعادتك
الصول معتصم
اها بقيت كيف ؟؟؟
|
Post: #73
Title: Re: ايامي في معسكر الدفاع الشعبي .....
Author: طارق جبريل
Date: 09-25-2010, 00:12 AM
Parent: #72
انا بعد اتخرجت رجعت السودان
اي حاجة اسال منها يقولوا لي تجنيد اجباري
قطعت تذكرة والطشة البي وشيها لي وم الليلة
|
Post: #76
Title: Re: ايامي في معسكر الدفاع الشعبي .....
Author: omer osman
Date: 09-25-2010, 04:35 AM
Parent: #71
| Quote: اذكر انو انا دخلت المعكسر تقريبا يوم 19 ديسمبر 1991 |
كراعك حارة يازاتو ...... ههههههههههه
تقريباً ده الوقت الذ غادرت فيه المعسكر قبله او بعده بايام ......
الاذونات دي قصة ولو إشتغنا بيزنس فيها كان غنيننا .......
الطلبة والمجاهدين الصغار لم نكن نمنحهم اذونات الا للشديد القوي وحالات نادرة .....
الى حد ما كنا نتساهل مع قيادات الخدمة المدنية والقضاة ...... الخ مراعاة لعامل السن والمسئوليات ..الخ
|
Post: #74
Title: Re: ايامي في معسكر الدفاع الشعبي .....
Author: cantona_1
Date: 09-25-2010, 00:41 AM
Parent: #21
| Quote: يا خي الموية دي ذاتها زرقاء |
يا عبد اللطيف عبد الحفيظ ... سلامات .. وين موية زرقاء في الخرطوم؟ موية الخرطوم بُنِّية. وموية الله والرسول بدون لون. مافي موية زرقاء إلا بتاعة العيون حماك الله. تحياتي.
كبـَّـاشي الصــَّافي
|
Post: #75
Title: Re: ايامي في معسكر الدفاع الشعبي .....
Author: mohmed khalail
Date: 09-25-2010, 02:18 AM
Parent: #74
يا جنابو ياخ والله اسعدتنابالسرد الجميل واعدتنا الي زكريات القطينة ومعسكر القطينه وشايف ربع المنبر العام طلع دفاع شعبي ياخ والله منكم خوف.
اها يا سعادتك انا جايك بأمر تحرك من الدفعة الرابعة ولا الخامسة ما متذكر (اسامة بن زيد) سنة 1994 ومن الذين جهجهونا وكرهونا حياتنا في الدفعة ديك(الطريفي) حتى تطور الامرذات يوم الى تمرد وعندما هممنا بالفتك به هرب الي ثكنات الضباط ياخي المعسكر كلو ما لحقو (جري خوف) اها في عز الغضب خرج علينا جنابو عاطف وهو ملازم اول شرطة (ان شاء الله يكون هو ده زاتو صديقك ع) والحق يقال كان قمة في التهذيب والاحترافية لكن حظو العاثر انو جاء لتهدئة خواطر شباب اخرجهم الطريفي من طورهم فتم الاعتداء عليه بوحشية وجرح جرح غائر في وجهه استوجب جراحة وخياطة وللامانة بعد عودته للعمل لم يحمل حقد على احد بل واصل عمله وكأن شئ لم يكن اما الطريفي سبب المشكلة فأصبح يتحاشانا ولكن الطلاب قطعو ليهو جلالة جكة (جرى وجرى ..الطريفي المرا)
| Quote: يعني إنت حاضر ناس الطريفي ؟ |
نوبي اتحفنا بذكرياتك يبدو انك دفعة مطار صدام وقد سلك يا مان
| Quote: الرقيب اول مظلي بشارة .......... تقاعد ويعمل الان فرد أمن في شركة دال الزراعية .......... |
يا جنابو بشارة لما نحن جينا كان صول واي صول والله ما شفت عسكري قح زيو حضرة الصول بشرى وبرغم سنو اتحدى الدفعة يوم بعد الرياضة الصباحية وكانت طويلة مرهقة لكن بعد ده كان تحديهو لينا ان يسبقه احد الى المعسكر وقد قبلنا التحدى لان دفعتنا كانت قرابة ال5000 مجند لكن كل العدد ده لم يستطع اللحاق به واستطاع الوصول للمعسكر قبلنا.
اما عن قائد المعسكر الرائد ساكن القطينة في زمنا اصبح مقدم وحقيقة كان رجل شديد الهدوءلم نحتك به كثيرا ولكنه كان زول مولانا وفي حالو.
من ضباط الجيش الذين قاموا بتدريبنا ملازم ثاني عزالدين وملازم ثاني كوز جنو جلالات دفاع شعبي لا اذكر اسمو الان المهم عائد اليكم بالمزيد من الذكريات عن تلك الفترة الجميلة.
|
Post: #77
Title: Re: ايامي في معسكر الدفاع الشعبي .....
Author: omer osman
Date: 09-25-2010, 04:47 AM
Parent: #75
تعرف يامحمد خليل ......
نحن ذاتنا استفادنا بدنياً من فترة المعسكر وإستعدنا لياقة الكلية بالتمارين والجري مع المستجدين ..
اذكر في احدي المرات انا والملازم ياسر (العقيد ياور الرئيس الأن) ........
كنا جارين بره المعسكر مع سرية من قيادات الخدمة المدنية (جري بالسلاح) .....
حقيقة كان هناك ناس كبار في السن او لديهم ظروف صحية والجري مع شيل السلاح عملية مرهقة ....
لمحت احدهم يكاد يسقط من الاعياء .... تقدمت اليه وحملت عنه السلاح البندقية الكلاشنكوف .. قلت ليهو اجري ساي بدون سلاح ..
بعد شويتين تاني واحد عمك قرب يروح فيها برضو شلت منو السلاح وبقيت جاري بي بندقيتين .....
شوية كده لقيت ليك ياسر برضو شايل بندقيتين ........ وكل واحد من التعلمجية شايل بندقيتن ....
طبعاً لمن وصلنا المعسكر ما قلنا ليهم شلنا منكم السلاح عشان حنيننا عليكم ...... قلنا ليهم شلنا السلاح
عشان نحن خايفين على سلاحنا يقلعوا منكم العدو ما خايفين عليكم انتو اصلوا في التدريب في 10% خسائر ما مشكلة ...
|
Post: #78
Title: Re: ايامي في معسكر الدفاع الشعبي .....
Author: omer osman
Date: 09-25-2010, 04:56 AM
Parent: #77
من اغرب الاشياء في معسكر القطينة ......
المعسكر لديها بوابة رئيسية تفتح على شارع الزلط الرئيسي واسوار في تلك الناحية ......
ومن الخلف لا توجد اسوار ولا من ناحية القطينة ...... يعني المعسكر شبه قاعد في السهلة ساكت ...
وبرغم ذلك توجد حراسة على البوابة وبعد المغرب لايمكن الدخول الا عبر عبارة سر الليل ........
استخبارات المعسكر هي التى تقوم باعداد وتوزيع سر الليل للضباط او الاشخاص المخول لهم الخروج والدخول ...
دائماً قبل المغرب كده بجيك فرد الاستخبارات حايم بدفتر (الدور الداير) هكذا يسمونه ناس الجيش وهو دفتر مخصص لتوزيع
التعليمات وابلاغها الى المعنيين ..........
وفي العادة ينقسم سر الليل الى اتنين (من المغرب الى الساعة 12) (ومن 12 الى الصباح) .....
الديدبان في البوابة الرئيسية يقوم بعمل (معارضة) ما سياسية طبعاً ..... لكن تعني اعتراض السيارة او الشخص بقوله
ثثثثثثثثثثثثثثثابت ..........
مين .....
امين .......
وبعد ذلك يتم تبادل سر الليل بينه وبينك بطريقة معينة .....
|
Post: #79
Title: Re: ايامي في معسكر الدفاع الشعبي .....
Author: omer osman
Date: 09-25-2010, 05:07 AM
Parent: #78
دورة رجالات الادارة الاهلية ........
العميد وقتها الطيب سيخة كان هو عراب دورات الخدمة المدنية ...... الخ
قام جاب لينا دورة لقيادات الادارة الاهلية في دارفور ..........
اجزم بان اصغر من في تلك الفصيلة لم يكن عمره اقل من 65 سنة .....
هذه الفصيلة حيرت الطب والطبيب فاغلبهم رفض مجرد مناقشة ان يتخلي عن عصاه التى يتوكا عليها او هي جزء من مظهره كزعيم
فتجدهم داخل الطابور وكل زول شايل عصايتو .....
حتى صفا انتباه لم يتقونها او ربما للدقة لم يكونوا يتجاوبوا مع التدريب مطلقاً .....
ولا مجال للتعامل معهم بعسكرية صرفة فااعمارهم لاتسمح بذلك مهما كان الأمر .........
جربنا ان يحفظوا اناشيد الدفاع الشعبي فلم يحفظوا الا مقطعين فقط من في حماك ربنا .....
في احدي المرات كنا بصدد تسجيل اسمائهم وكان يقوم بذلك دفعتي (ح) وهو من النوع الذي نسميه في السودان (حلبي) ..
وهو يكتب في الاسماء .... فاته اسم احدهم ....
ما سمعت ياحاج قول اسمك تاني ..........
هوووووي يا الحلبي انا بقول كلامي مرة واهد سمت سمت (سمعت سمعت) ما سمت ما سمت .....
دفعتنا ازداد حلوبية واتلفت على اسه ده يكتبوهو شنو ؟
قلت ليهو اكتب (واحد اخلاقو في نخرتو وقافلة معاهو) ........ هههههههههههه
|
Post: #80
Title: Re: ايامي في معسكر الدفاع الشعبي .....
Author: omer osman
Date: 09-25-2010, 05:13 AM
Parent: #79
مشينا مع الفصيلة العجيبة ضربنار .......
اول حاجة واحدين فيهم قالوا .......
كييييييييييف تدونا كلاشنكوف نضرب بيهو ده (سلاح عوين) (سلاح نسوان) ههههههههههه
طيب دايرين شنو ؟
جم ثري وانت طالع .......
والله يا جماعة نحن ما عندنا جم ثري هنا غايتو معليش عشان خاطرنا اضربو بالكلاش ده .......
وبعد الكلام ده لقيت واحد عمك في (قيام راقداً) ومنشن غلط .....
ياحاج انت مفروض تنشن في السواده في نص التختة .......
يا ولدي انا كا راعيت (شفت) للتختة السوداه هينة ........
يعني ياحاج انت التخته ذاته ما شايفه ......
ايوه يا ولدي .....
اقول ليك حاجة هي ما كلها خمسة طلقات فكها في اى حتة بس لي قدام ما تكتل لينا زول هنا ........
|
Post: #81
Title: Re: ايامي في معسكر الدفاع الشعبي .....
Author: omer osman
Date: 09-25-2010, 05:18 AM
Parent: #80
طابور تخريج الفصيلة العجيبة ......
أول مرة في تاريخ العالم والعسكرية فصيلة تتخرج وهي قاعدة في كراسي .........
الجماعة دي طبعاً ما نقشو لينا اى حاجة في البيادة والطوابير ....
والطيب سيخة جاء يحضر التخريج .....
واكتشف انو الطابور هو الناس القاعدين في الكراسي قداموا ديل ......
قلنا نضعف الايمان نخليهم يقولوا في حماك ربنا ........
ودي ذاته الا طعمناهم بي كم واحد من دفعة الطلبة ختيناهم في نص الفصيلة الجالسة .......
لم تكرر مرة اخري تجربة هذه الفصيلة بعد ان ثبت تماماً عدم جدواها ......
|
Post: #82
Title: Re: ايامي في معسكر الدفاع الشعبي .....
Author: omer osman
Date: 09-25-2010, 05:26 AM
Parent: #81
زيارة العميد اح بيويوكوان عضو مجلس قيادة الثورة للمعسكر ..........
امر إعتيادي بالنسبة لنا ان يزورنا احد مجلس قيادة الثورة في المعسكر ......
وعندما زارنا العميد بيويوكوان طلب منه قائد المعسكر ان يقوم بمخاطبة المجاهدين ........
مجاهدين ده شنو يا مرغني (قائد المعسكر) مش مستجدين
لا ياسيادتك ديل مجاهدين ما مستجدين ...
كيف يعني عسكرية ده فيهو رتبة اسمو مجاهدين .....
مش ناس لابسين قميص طلبة ده ....
ده متسجدين يا مرغني .....
طيب خلاص ياسيادتك مستجدين مستجدين بس قوم قول ليهم كلمتين ......
مرغني انت نسيت عسكرية والا شنو ؟
انا عميد اتكلم مع مستجدين !!!!! طيب ملازمين ديل يسوي شنو ؟ اذا عميد بتكلم مع مستجدين
غايتو شيلك ختك في طولك في عرضك ......
وافق العميد على الكلام مع المستجدين ..........
ما بتذكر قال شنو بالضبط لكن كل الجماعة اتكيفو من كلام شديد بما فيهم مرغني نفسه ...
|
Post: #84
Title: Re: ايامي في معسكر الدفاع الشعبي .....
Author: omer osman
Date: 09-25-2010, 05:31 AM
Parent: #82
زيارة العميد محمد الامين خليفة عضو مجلس قيادة الثورة ......
بعد الترحيب والطوابير ....... الخ
طلب الاجتماع بدورة قيادات الخدمة المدنية في الهنقر ......
بعد ما اتكلم اهااااا في زول عندوا حاجة .....
يا سيادتك الضابط عملوا لينا ... وعملوا لينا ......
والتعلمجية قالوا لينا ...... وقالوا لينا ......
وهم يظنون انهم ادونا هواء تقيل وبعبوص ابن ###### ..........
ضحك العميد وقال ليهم .......
الله اكبر والحمد لله ... طمنتونا على مستوي التدريب تماماً ... هههههههه
|
Post: #83
Title: Re: ايامي في معسكر الدفاع الشعبي .....
Author: Abdlaziz Eisa
Date: 09-25-2010, 05:27 AM
Parent: #77
|
Post: #85
Title: Re: ايامي في معسكر الدفاع الشعبي .....
Author: معتصم محمد صالح
Date: 09-25-2010, 06:44 AM
Parent: #83
سلامات يا كمندان ..
صول بس .. بالله
ياخ بقول ليك دورة صاعقة وووو ..تقول لي صول ..
طبعا ياعمر دفعتي مقدمين وعقداء في الجيش والشرطة وكنت ساكون معهم لولا لطف ربك ..
كديت المقرن كان من 85 الى 88 .. وفعلا كان كديت عجيب ومعظم دفعتنا بتاعت الكديت دخلت الكلية الحربية وكلية الشرطة واصبحوا قادة متميزين ..
يا خ حيرتنا هسه نحكي ليك كديت ولا دفاع شعبي .؟؟
في صباح احد ايام عام 1987 كان لدينا احتفال في المدرسة ومن ضمن فقرات الاحتفال اكل الضفادع والدبايب والصراصير والارانب وجميعها مهارات تعلمناها مع ناس المظلات في دورة الصاعقة ..
وبعد الفراغ من الاحتفال واكل كميات معتبرة من الاصناف المذكورة اعلاه اقام انصار السنة ركن نقاش عقب الاحتفال مباشرة شنوا فيه هجوما شديدا علينا وتضامن معهم ناس الجبهة الاسلامية وتسرب لنا الخبر في الشعبة وهي مكتب الكديت الخاص بالطلاب لان هناك مكتب خاص بالصول ( رحم الله عمنا صالح هجانة ) المهم .. جاءنا احد ضباط الصف ( كنا صولات طبعا) وجاب الشمار .. انصار السنة قالو ناس الكديت بياكلو الميتة والدم .. تم جمع القوة بصفارة جمع سريع .. وتسليحها بعصايات التدريب الحمراء الطويلة ديك يا عمر رغم اننا كنا احد مدرستين لديها اسلحة ( ماركة واحد ) اكثر من 40 بندقية وكمية معتبرة من صناديق الذخيرة ( اتخيلو ده كان في مدرسة ثانوية !! ) .. عقب تسليح القوة بالعصي تم صرف التعليمات بالتوجه الى ميدان الباسكت حيث ركن النقاش وتفريق الركن بالقوة واعتقال قادة انصار السنة والجبهة الاسلامية الامر الذي اكتمل في اقل من 5 دقائق حيث تم ضرب كل من كان في الركن وماهي لحظات الا وكان قادة انصار السنة والجبهة مكبلين في الشعبة واذكر منهم الاخ خالد محمد خير ( اظنه عقيد في الجيش الان ) وبعد مفاوضات مع الاساتذة وناظر المدرسة تم اخلاء سبيلهم بعد تعهدات بعدم تكرار ذلك منهم وكانت الحادثة مدخلا لصداقات معهم امتدت حتى الان ...
اها يا عمك نواصل ليك كديت ولا دفاع شعبي ... ولا ذهب ..
لانو في الكديت في باقي حكاوي عجيبة ..منها قصة اطلاق النار الكثيف الساهة الخامسة صباحا داخل المدرسة ومحاصرة الشرطة للمدرسة ...
|
Post: #86
Title: Re: ايامي في معسكر الدفاع الشعبي .....
Author: معتصم محمد صالح
Date: 09-25-2010, 06:50 AM
Parent: #85
تحياتي يا شبكوش وتقديري لسؤالك المتواصل .. لازلت مربوطا في السرير ب 3 كيلو تراب حتى الاربعاء القادم ..
دحين انت ما دخلت دفاع شعبي ؟؟ اخوات نسيبة ولا اسمهم شنو كان ؟؟
|
Post: #89
Title: Re: ايامي في معسكر الدفاع الشعبي .....
Author: SHIBKA
Date: 09-25-2010, 07:22 AM
Parent: #86
الرائد معتصم ما دتم الصول ما نافعة
| Quote: دحين انت ما دخلت دفاع شعبي ؟؟ اخوات نسيبة ولا اسمهم شنو كان ؟؟ |
الله مرقني
لما اتخرجت ومشيت اطلع شهادتي قالوا لي جيبي خلو طرف من المنسقية
مشيت المقرن
وطلع انو كليتي في جامعة الخرطوم ما مطلوب منها تجنيد
لكن نفس خريجين الكلية من امدرمان الاسلامية مطلوب منهم
اها قلت ليهم ديل بعافيتهم
طلعت شهادتي
الدفعة البعدي طوالي اتخيل لي مشوا الدفاع الشعبي في مدرسة في الجريف
|
Post: #87
Title: Re: ايامي في معسكر الدفاع الشعبي .....
Author: omer osman
Date: 09-25-2010, 06:55 AM
Parent: #85
Quote: اها يا عمك نواصل ليك كديت ولا دفاع شعبي ... ولا ذهب ..
|
واصل ياجنابو .........
يازول انت فتنا بهناك ........
غايتو شغل الصاقعة والقصص دي اختصاص اخونا صلاح ابودية وابراهيم الرشيد ....
رغم انو ناس المشاة زي عندهم رأي في ناس الصاقعة ديل ...
انهم بتاعين جاكات ساي في العمليات الجد المشاة احسن منهم .....
وغلاة المشاة يصفون ناس الصاقعة بــ (تعيينات العدو) العدو يستولي على تعييناتهم بسهولة ..
|
Post: #88
Title: Re: ايامي في معسكر الدفاع الشعبي .....
Author: omer osman
Date: 09-25-2010, 07:03 AM
Parent: #87
وعشان ما يزعل مننا انصار المظلات والصاقعة .......
اشهر واخطر عملية نفذها الجيش السوداني كانت عملية (جبل بوما) بجنوب السودان ...
كان ناس المظلات وطائرات الهليكوبتر هي القوة التى نفذت العملية لتحرير بعض الرهائن من قبضة الحركة الشعبية ايام نميري ..
قريبي وزوج أختي الشهيد المقدم طيار محمد محمود كان قائد سرب الهليكوبتر الذي شارك في العملية ........
نميري منح كل القوة من ضباط مظلات وافراد وطيارين وسام الشجاع ....
ياريت لو واحد من الاخوان في الجيش يلقي مزيد من الضوء على هذه العملية التى تشبه الافلام الامريكية ......
محمد محمود (له الرحمة) استشهد لاحقاً في منطقة الناصر حيث إسقطت طائرته بصاروخ اطلقه متمردي الحركة الشعبية وقتها ...
وهي المرة الأولي التى يعلم الجيش ان التمردين لديهم صواريخ روسية الصنع ......
|
Post: #90
Title: Re: ايامي في معسكر الدفاع الشعبي .....
Author: معتصم محمد صالح
Date: 09-25-2010, 07:59 AM
Parent: #88
نحكي ليك الضربنار بتاع الساعة 5 صباحا ..
كانت هناك منافسات رماية بالذخيرة الحية بين المدارس وتقام في مدرسة الخرطوم القديمة .. كانت هناك دروة صغيرة يشرف عليها عقيد في الجيش اسمه صديق واظنه كان قائد النطقة العسكرية المركزية .. ( الدروة ) للملكية هي مكان ضرب النار ..الاسلحة المستخدمة في الدروة كانت القربينة وبعض المسدسات لان الدروة كانت صغيرة والقربينة المستخدمة يا عمر ليست قربينتكم الواحدة دي انما اخرى تستخدم رصاص صغير جدا 6 ملم وهي اختبار حقيقي لمهارة الرماية .. حتى ولو مررت النظر عبر فتحة النشنكة الى الضبانة الى الهدف فلن تصيبه بسهولة .. لان اغلب البنادق بتاكل يمين او شمال .. كانت المنافسة شرسة بيننا وبين مدرسة الخرطوم القديمة لاننا كنا نتمتع بقدر عال من العسكرية والانضباط وهم لديهم الدروة داخل مدرستهم وقربهم من القيادة العامة ومجاورتهم لسلاح الاسلحة اتاح لهم قدرا كبيرا من المهارات .. كان اصرارنا كبيرا على انتزاع كاس المنافسة الامر الذي تطلب استعدادات كبيرة وابتكرنا اساليب جديدة لتدريب فريقنا منها الكرتونة المقدودة التي اتى بها قائد المدرسة وقتها المقدم اسامة محمد عثمان الان بالقيادة العامة .. بعد تجويد التدريب تماما اتي اقتراح بتطبيق عملي وتقدمنا بطلب للدروة لعمل تدريب عملي قوبل بالرفض مع ان ناس مدرسة القديمة يوووومي بضربوا .. الدروة دروتهم والرصاص رصاص الحكومة .. لم نيأس وفكرنا وتوصلنا الى عمل التدريب داااخل مدرستنا ... والبنادق عندنا والذخيرة متوفرة .. لجأنا للعقيد صديق قائد المنطقة العسكرية الذي كان مبسوطا مننا لانضباطنا وعسكريتنا الكاربة ..لم يتردد في التصديق لنا بعمل ضرب نار داخل المدرسة الا انه اشترط ان يكون بالذخيرة الفشنك وهي ايضا كانت متوفرة بكميات كبيرة جدا داخل المدرسة .. في اليوم التالي مباشرة ومع خيوط الفجر الاولى بدأ الضرب .. وكان ميدان الباسكت -لمن يعرف مدرسة المقرن- كان مسرحا لضرب النار الكثيف .. ومعلوم ان صوت الذخيرة الفشنك اعلى من صوت الذخيرة الحية .. والبندقية ماركة واحد صوتها عالي جدا ومعروفة بثباتها وتستخدم نفس ذخيرة الجيم 3 .. بعد لحظات واثناء توقف الضرب لبرهة سمعنا صوت مايكرفون ن خارج المدرسة وقف الضرب يا زول .. وقف الضرب .. خرجنا لاستطلاع الامر .. ووجدنا قوة كبيرة من الشرطة بقيادة مقدم .. وجميعها على اهبة الاستعداد للرد بالنيران الحية طبعا ... وما ان رأونا الا واشهروا اسلحتهم في وجهنا وطالبونا برفع ايدينا.. كنا نحمل تصديقنا معنا .. ابرزناه للمقدم فقال لنا كان عليكم احضار صورة منه منذ الامس لان قيادة المنطقة لم تبلغنا .. وتم منعنا من مواصلة الضرب بعد ان قضينا على اكثر من صندوقين ذخيرة ..
وبعدها بايام تمكنا من انتزاع كاس الرماية للمدارس الثانوية والموجود حتى الان بشعبة التدريب العسكري بالمدرسة ..
يخيل لي يا عمر كفاية كديت لانو قصصوا كتيييرة .. ونرجع بيكم بورتسودان ..
|
Post: #91
Title: Re: ايامي في معسكر الدفاع الشعبي .....
Author: معتصم محمد صالح
Date: 09-25-2010, 10:29 PM
Parent: #90
انت بوستك ده يا كافي البلا ما فيه صورة مالو ...
اها دي صورة البندقية الكانت عندنا منها كمية ..
|
Post: #92
Title: Re: ايامي في معسكر الدفاع الشعبي .....
Author: cantona_1
Date: 09-26-2010, 01:16 AM
Parent: #91
يا معتصم يا ولدي تاريك زول بلوة كدا؟ لكن ما قلت لي ما علموكم (تتلبين من تيارة)؟ القفز من الهليكوبتر؟ وكمان معاك البندقية ويفكوا ليك الحمام الآلي وتضرب بالكلاش عندك 30 طلقة حتشوت كم حمامة؟ تحياتي.
كبـَّـاشي الصــَّافي
|
Post: #93
Title: Re: ايامي في معسكر الدفاع الشعبي .....
Author: Abdlaziz Eisa
Date: 09-26-2010, 03:45 AM
Parent: #92
جنابو وجنابو
واصلوا الحكي الجميل.. متعكم الله بالصحة والعافية..
|
Post: #94
Title: Re: ايامي في معسكر الدفاع الشعبي .....
Author: معتصم محمد صالح
Date: 09-27-2010, 06:25 AM
Parent: #93
يا عمك انت حردت بوستك ده ولا شنو ؟؟ معليش والله جينا داخلين توووش وبالتقيل .. يلا تعال واصل
|
Post: #95
Title: Re: ايامي في معسكر الدفاع الشعبي .....
Author: omer osman
Date: 09-27-2010, 06:30 AM
Parent: #94
| Quote: يا عمك انت حردت بوستك ده ولا شنو ؟؟ معليش والله جينا داخلين توووش وبالتقيل .. يلا تعال واصل |
معقولة يامعتصم ياخ ................
بالعكس انت عملت إضافة ممتازة جداً للبوست ............
يلا نواصل سوا .........
|
Post: #96
Title: Re: ايامي في معسكر الدفاع الشعبي .....
Author: omer osman
Date: 09-27-2010, 06:52 AM
Parent: #95
التعلمجي كونجين ........ علامات بارزة من علامات معسكر الشهيد عيسي بشارة
هو الانضباط يمشي على قدمين .............
لو في شركة عاوزه تعمل دعاية لمكاوي حقو تجيب بنطلون كوجنين بيان بالعمل ........
البنطلون عاااااادي ممكن يقيف براهو بدون رجلين زول جواهو ........
ما شغال بحكاية مجاهدين والا طيارين دي كتير شغال بي عسكريتو وبس .........
في احدي المرات واثناء ادارة داخلية طويلة تملل المجاهدين او المستجدين وبدأ مسلسل الوقيع والدوخان .......
كوجنين ضرب كف بكف ......
شابكننا اليوم كلو جلالات (في حماك ربنا ..... الثبات في الصفوف والـمضاء والـفنا ............ )
وينو ثباتكم ده ......... والله انتو في صف رغيف ما تثبتو
|
Post: #97
Title: Re: ايامي في معسكر الدفاع الشعبي .....
Author: omer osman
Date: 09-27-2010, 07:08 AM
Parent: #96
النبطشي (م ، أ) ................
والنبطشي المقصود هنا بلغة الجيش هو فرد يقوم على خدمة سكن الضباط وتلبية طلباتهم التى لا تنقطع ...........
وقبل ان ندخل في قصة م أ .......... قيل ان احد النبطشية ترقي بسرعة شديدة .....
الجماعة سألوهو ........ عن السر في ذلك ؟
قال ليهم تعرفوا الضباط ديل زي الشفع لو واحد طلب حاجة جيبه على قدر الضباط القاعدين لانهم كلهم ح يقولوا عاوزين زيو
صاحبنا م أ ده اشتهر بيننا بقلة التفكير والاستعجال الشديد في الانصراف من قدام الضابط حتى قبل ان يفهم المطلوب منه .......
عاااااااااادي ممكن تقول ليهو جيب لي تلاتة كبابي شاي يجي شايل ليك تلاتة طلبات شية ...........
قمنا قلنا ليهو يا م أ ياخ قبل ماتنصرف اسمع كويس وكان الكلام ما وقع ليك اسأل اى سؤال عشان تعرف المطلوب شنو بالضبط ....
في يوم كنا قاعدين مجموعة من الضباط و م أ بكب في الشاي ...........
واحد من الضباط قال ليهو عليك الله يا م أ انا اديني نص كباية ......
ما كان من (م أ) الا وبسرعة قال ليهو فاضية
|
Post: #98
Title: Re: ايامي في معسكر الدفاع الشعبي .....
Author: omer osman
Date: 09-27-2010, 07:17 AM
Parent: #97
بعض المستجدين بتخيل ليهم انو الضابط ده مان مستجد زيهم في يوم من الأيام بقوموا يعملوا حركات انت ناقشه وعملتها قبل كده مليون مرة .......
اثناء حصة الاسلحة مررت قدام مستجدين في وضع قيام راقداً .........
طوالي تذكرت ونحن طلبة في كلية الشرطة ماذا كنا نفعل عندما يمر امامنا احد الضباط ونحن في ذات القيام ......
بسرعة شديدة عملت خلف در ولم يخيبوا ظني ..........
وجدت كل البنادق مصوبة نحوي ......
بعضهم سقطت بندقيته من الكبكبة والرجفة الحصلت الزول ده بشوف بي وراء والا كيف عرف نحن منشنين عليهو ......
يامستجدين يا وهم ...... قوموا فوقوا ......
ارفعوا السلاح ده فوق .......... خطوات تنظيم .........
خليكم كده .......... لمن الحصة تنتهي ..........
|
Post: #99
Title: Re: ايامي في معسكر الدفاع الشعبي .....
Author: omer osman
Date: 09-27-2010, 07:25 AM
Parent: #98
كان كل ضابط بكون مسئول او مشرف على احدي السرايا ........
وفي احدي المرات كنت مشرف على سرية من القيادات العليا للخدمة المدنية ..........
الجماعة عاوزين يعملوا جريدة حائطية .........
بعد ما جمعوا المواد وكتبوا الاعمدة المختلفة ..........
جابو لي الجريدة عشان اجيزه ليهم باعتباري مشرف السرية .........
الاتنين الجابو لي الجريدة (دكاترة في مجالهم) واحد اذكر اسمو عمر اظنوا اصبح وكيل وزارة الطاقة والتاني دكتور في جامعة الخرطوم ....
قلت ليهم ........ والله ياجماعة الكلام ده عيب ...... معقولة بس !!!
الجماعة نططو عيونم واتخيلوا انهم عملوا حاجة غلط ...........
انا والله ما براجع شغل دكاترة وناس كبار زيكم في شغلة اساساً ما تخصصي .......... في عسكرية ممكن خلاف كده لا .....
شيلوا جريدتكم علقوها وتاني ما تجيبوا لي الجريده دي اراجعه .......
|
Post: #100
Title: Re: ايامي في معسكر الدفاع الشعبي .....
Author: mohmed khalail
Date: 09-27-2010, 07:32 AM
شنو يا كمندان ما جاوبت على سؤالي؟
جنابو ع وين الحي بيهو ولا ما ياهو الزول الدربني سنة 94 في نفس المعسكر وحضر حادثة الطريفي.
تحية عسكرية قبل الانصراف
|
Post: #111
Title: Re: ايامي في معسكر الدفاع الشعبي .....
Author: omer osman
Date: 10-01-2010, 08:43 AM
Parent: #100
Quote: شنو يا كمندان ما جاوبت على سؤالي؟
جنابو ع وين الحي بيهو ولا ما ياهو الزول الدربني سنة 94 في نفس المعسكر وحضر حادثة الطريفي.
|
نأسف للتأخير ياابوحميد
لا ده (ع) تاني ما عاطف ..........
ع دفعتي لم يكن في القطينة في 94 كنا وقتها الاتنين في المباحث المركزية ......
الغريبة بدون تخطيط عملنا انا ودفعتي ع في شرطة الولاية سوا ومشينا القطينة سوا ورجعنا الولاية سوا ومشينا المباحث سوا
|
Post: #101
Title: Re: ايامي في معسكر الدفاع الشعبي .....
Author: omer osman
Date: 09-27-2010, 07:37 AM
تخريج أول دفعة من اللجان الشعبية ............
حدث كبير والاستعدادت له كانت كبيرة .........
وباشراف ضباط من قيادة الدفاع الشعبي في الخرطوم ..........
احد ضباط الجيش من النوع الذي لايعجبه البوليس ابداً ............
تسأل عن امكانية قيادة ضباط البوليس (نحن) لطابور التخريج وهل بنعرف ؟؟؟؟!!!!
ووجه حديثه للمقدم بتاعنا .........
اسه ضباطك ديل قدام المنصة بعرفوا يعملوا (يمين انظر) ؟؟؟؟؟؟!!!!!!
قال ليهو ضباطي ديل ......... والله لو داير (زووووووط انظر) يعملوها ليك ....
تكهرب الجو ....... وتدخل الرائد مرغني بحكمته ولطف الجو .......
وكان يوم التخريج يوماً مشهوداً واصبحنا امام تحدي حقيقي ...........
وكنا قدر ذلك التحدي ............. تخريج ولا اروع وربما الأول من نوعه في تاريخ معسكر الشهيد عيسي بشارة ......
ضيف شرف التخريج لا اذكره من كان لكن اذكر انه وجه بأن يقود ضباط الشرطة طوابير التخريج ما امكن ذلك .........
السيد مدير عام قوات الشرطة والذي كان حاضراً لذلك الطابور منحنا ثنائه لكل الضباط والتعلمجية من الشرطة في المعسكر .........
احبتنا في الجيش نعترف بتفوقهم علينا في العديد من مجالات العسكرية إلا (البيادة) الطوابير هذه تخصص وتفوق شرطي بحت .......
ويشهد بذلك كل الطوابير المشتركة التى تشارك فيها قوات من الجيش والشرطة ......
|
Post: #102
Title: Re: ايامي في معسكر الدفاع الشعبي .....
Author: معتصم محمد صالح
Date: 09-27-2010, 09:23 PM
Parent: #101
لنعد الى بورتسودان ومعسكر اسوتربا نهايات العام 1990 ..
... تم احضار اللحم المحمر يرافقه صحن سلطة كااارب وصحن شطة بالدكوة .. والرغيف الساخن .. واكلت حتى تصبب العرق مني لانني لم اذق طعاما منذ غداء القطار والذي كان سندوتش طحنية .. وشربنا الشاي ثم تجاذبنا اطراف الحديث .. جميع قوة المطبخ من ابناء شرق السودان عدا العريف واسمه ادم من ابناء دارفور .. انتمائهم للمطبخ اكبر من انتمائهم للعسكرية وقطعا معرفتهم .. وانا على العكس .. ضربت صفارة الفطور .. قمنا بتوزيع العدس والرغيف بواسطة طلاب يتم احضارهم لمعاونتنا .. فجأة تذكرت اصدقائي الذين رافقوني في القطار .. شعرت بتأنيب ضمير .. رجت وبحثت عنهم وجدتهم في حالة يرثى لها ..جلبت لهم مزيدا من العدس والرغيف ..ووعدتهم بوجبة دسمة في الغداء .. وقد كان .. صباح اليوم الثالث .. كنا نجلس صباحا نتناول القهوة فدخل علينا الرقيب اول قائد المطبخ وكان يذهب الى بيته في احد الاحياء القريبة من المعسكر (دار السلام ) .. وقال ( تُباه ) .. ووجدت امامي شخصا آخر غير الذي استقبلني بالامس .. شوفو يا جماعة .. الناس قالوا المطبخ فيهو بزبطة .. شوف يا جندي مستجد انت ( يقصدني ) .. من الليلة ما عايز تحرك من المطبخ الا با ذني .. كمية من التعليمات الجديدة صرفها لنا .. وبدأت اكره المطبخ وحاولت جاهدا للخروج منه لالتحق بالحراسات ..ونجحت في الحصول على فصل من المطبخ بعد الخروج المتكرر اثناء الطبيخ اوتوزيع الوجبات .. وتم استدعائي لمكتب الحكمدار وابلاغي قرار نقلي الى البوابة الشمالية منضما الى قوة الحراسات ...
|
Post: #103
Title: Re: ايامي في معسكر الدفاع الشعبي .....
Author: مدثر صديق
Date: 09-28-2010, 11:37 AM
Parent: #102
أرسل لى الأخ محمود ذكرياته التاليه وبحكم انه ليس يديه اشترام فى سودانيز أونلاين ولم يجد ايميل الاخ جنابو عمر عثمان فى بروفايله فطلب منى نشر هذه الذكريات:
Quote: ذكريات فى معسكر الدفاع الشعبي
1- الفترة من اكتوبر الى نوفمبر 1996م (دورة أسامه بن زيد السابعه)
2- المكان: معسكر الشهيد عيسى بشارة بالقطينه
3- تحركنا من ميدان المولد بالسجانه (ملعب الليق) بشحانات سالكا (سالكا شركه كانت تعمل فى مجال نقل البضائع) العملاقة وكأننا قطيع من البهائم أو أكداس من البضائع وكان كل منا قد جهّز شنطة حديدtrunk ، كتلك التى حملتها Jane Eyre وهى تغادر الى منزل Mr. Rochester ، فى داخل الشنطه بلح ، رغيف ناشف (قرقوش) وربما طحنيه ومربي بالاضافة لبعض الغيارات من الملابس. حلقنا الصلعه من قبل ان نتحرك من البيت وبعضهم حلقَ فى ميدان المولد والذى تأخر نال جزاء تأخره حلاقة عجيبه قررّها التعلمجيه عقب وصولنا لبوابة المعسكر بالقطينه وهى أن يحلق كل واحد لأخيه وذلك بغض النظر عن ما اذا كان الحالِق أو المحلوق يجيدان مهارة الحلاقة فكان ان تزعمط أناس وتجرّح آخرون فحمدنا الله أننا حلقنا عند أهلنا..
4- ركبنا شاحنة السالكا نحن وأمتعتنا وقال لنا المنسقون أن هذه آخر عربه تتحرك للمعسكر فكان التدافع عظيماً ووالله الذى لا اله غيره كان كل منا يصارع اخاه على طول الرحله من السجانه حتى القطينه لكى يجد له متسعاً داخل الشاحنه وفى خضم هذه المعركه صاح أحد طلاب الشهادة العربيه قائلاً لأحد زملاءه أننى وجدتُ حديده اتمسك بها ولكن سرعان ما اكتشف ان هذا ساعدُ احد الطلبه السودانيين فمازال أصدقاء ذلك الطالب صاحب الساعد يسمونه حديده الى أن تخرجوا من المعسكر
5- وصلنا بعد هذه الرحله الشاقه الى بوابة المعسكر حيث لا ظل الا تحت الشاحنه والشاحنات الاخرى التى وصلت قبلنا، انزلنا امتعتنا وطلب منا التعلمجيه الجلوس فى صفوف وكتابة أسماءنا اما الذين لم يحلقوا رؤوسهم فكانت قصتهم ما اوردناها آنفاً
6- ظللنا جالسين فى الشمس لمده طويله تخللها كتابة اسماءنا عدة مرات، بعد ذلك طُلب منا القيام وحمل الشنطه والمسير وما أن تمشي خطوات حتى يصيح التعلمجى ثاااااابت فنقف ويطلب منك وضع الشنطه فى الارض، تكرر هذا المشهد الى أن وصلنا الى ساحة بالقرب من مسجد المعسكر فأجلسونا وجاءوا لنا بسندوتشات فول أكلناها بِشَرَه مع أن التعلمجيه إعتذروا لنا بأن الفول مُخَمِّر!!!
7- بعد ذلك بدأ توزيع العُدَد (النمره، ملابس الدموريه ، شدة بلاستيكيه ذقنا عذابها بعد ان لبسناها حيث جرّحت أقدامنا جميعاً) بعد ذلك سمحوا لنا بالمغادرة الى عنابرنا وهى عباره عن راكوبه كبيره ، حدّدَ كلٌ منا المكان الذى يريده وقام بتقطيع الحشائش النابته فى المكان لكى يحصل على أرض مستويه يفرش فيها نمرته! كان الوقت قد قارب العشاء ونحن تحركنا من السجانه حوالى العاشره صباحاً. خلدنا للنوم بعد هذا اليوم الاول العصيب ولكن بدأ الرعب يصيبنا من هوام الارض وبدأت الحكايات ان فلان لدغه عقرب وعلان فى الكتيبه الاولى قتل حيّة ضخمة، ذهب كل منا ليؤمن ظهره فقام بتكويم كميه كبيره من الرمل خلف الراكوبه جهة رأسه منعاً لمرور أى مخلوق صغير والشئ الاخر الذى فعلناه هو أن تلتف ببطانيتك كالجنازة وذلك أيضا مخافة تسرب العقارب والثعابين والكرَب (وهى عناكب سامه ذات لدغه مؤلمه جداً)
8- واجهتنا مشكلة فى الماء حيث كان معتكراً لدرجة انك ترى بُرادة الحديد الناتجه من الصهريج والمواسير ونسبة لأن المعسكر غالبا مايكون مهجورا طوال العام فلا تتم نظافة للصهريج من قبل ، لم تكن هناك أزيار بل خمس أو ست حنفيات فقط لثلاثة ألف مجنّد!! قدّر لوحدك كمية المزاحمه عند الوضوء أو الشراب. أذكر ذات يوم اتى قائد المعسكر (اسمه .... النّو) ليتلقى شكاوى المجندين، فشكا احدهم أن أحدى الحنفيات كُسِرَت فقال له القائد كلما كسرتم واحده قفلناه بالضّبه الى أن نقفل جميع الحنفيات ونرى من اين ستشربون!
9- مسألة الاستحمام كانت غاية فى الصعوبه من عدة نواحى، أولاً يجب عليك المزاحمه فى الحنفيه حتى تملأ الجردل وثانياً تحمل الجردل وملابسك لمسافة بعيده جداً لتصل الى الحمامات وثالثاً تنتظر فى الصفوف حتى تحظى بحمام ، فكنا نستحم أسبوعياً فقط وأذكر أن أحد الزملاء أقسم أن لا يستحم حتى يتخرّج!
10- برنامج التدريب كان يبدأ من تمام 6ص وبعده التربيه (وهى تمارين رياضيه أو جكه حول المعسكر وأحيانا للحله المجاوره) بعد الرجوع من التربيه تكون الساعه حوالى الثامنه والنصف او التاسعه وهذا موعد الفطور الذى فى الغالب فول أو عطرون بالعدس والذى أنهك كل المجندين وقطّع شفاههم بالجروح. بعد الفطور تتحرك للبياده وهى أبيخ برنامج ويستمر من العاشره حتى صلاة الظهر على ما اظن ويوم السعد ذلك اليوم الذى تُقطع فيه البياده من الساعه 11ص نسبة لحضور وفد رفيع من وزير أو والى أو قائد عسكرى أتى لمحاضرتنا فيتم جمعنا فى مسجد المعسكر وهو عبارة عن هانقر ضخم جداً وبااااااااارد لدرجة أننا كنا ننوم بمجرد دخولنا وربما يصحو فقط الصفان او الثلاثه صفوف الأماميه ليستمعوا للمحاضره بينما البقيه فى سُبات عميق على الرغم من محاولات التعلمجيه الدوران بين الصفوف منعاً للنوم ولكن ما أن يذهب التعلمجى للصف الامامى حتى يجد ان الصف الخلفى نائم كله!
11- بمناسبة المحاضرات هذه أحكى لكم هذه الطرفة التى حصلت أثناء محاضرة ووفد رفيع لا أذكر تحديداً من المُحاضر لكن ما أن تم جمعنا داخل المسجد وبدأت المحاضره حتى بدأ احد المجندين بالتكبير بصوت عال جدا وبدون سبب فقام المحاضر بانتهاره فسكت قليلا ثم عاد الكره مره أخري ثم نهره المحاضر وقال له له إن أخواتك يُغتَصبن فى الجنوب وأنت تُكبّر هنا فما كان من المجند الا ان كبّر مرة اخرى فغضب المحاضر وقال له أخرج من هنا يا منافق ! فسكت المجند ولكنه لم يخرج لأنه متأكد انهم لن يعرفوا من الذى كان يكبّر من وسط ثلاثة الآف مجنّد.
12- نرجع لبرنامج التدريب مره أخرى، بعد البياده يرجع الجميع الى ثكناتهم الى أن يؤذن الظهر فنذهب للصلاة وبعد الصلاة تلاوة القرآن فى حلقات، كل حلقه شيخها أحد المنسقين، أحياناً وبعد التلاوة يقوم هذا المنسّق بالحديث عن الحركه الاسلاميه وماقدمته من تضحيات فى سبيل الدين وماقدمتهم من شهداء وبعد حديث طويل يسأل كل طالب فى الحلقه عن رأيه فى الانضمام للحركه الاسلاميه! فيحظى بإستجابه وقتيه فقط من الطلاب لكى يتخارجوا منه! بعد الحلقه غالبا لايوجد برنامج فيخلد الناس للنوم الى حين الغداء هذا الحال كان فى الكتائب من الرابعة حتى السادسه أما من الأولى حتى الثالثه فكان عندهم مايسمى بتمام وحده (اى طابور الواحده ظهراً) نحن نائمون تحت الشجر وهم واقفون فى الهجير!
13- الغداء دائماً طبيخ لايخرج من الاصناف الاتيه: باميه، رِجله (ولها مزرعة خلف المعسكر مباشرة وأحيانا نكون فى البياده ويأتى الكارو حاملاً شوالات فيوقفه أحد المجندين وينظر الى مافى الشوالات فيجد الرجله الخام فيكيل لها كميه من السباب واللعن ويعلن بأن الغداء اليوم رجله!) وآخر صنف من الطبائخ هو الفاصوليا والتى غالبا ما تُطبخ يوم الجمعة فيتركها الناس فى صحنها لأن يوم الجمعه هو يوم زيارات الاهل ومعهم الأطايب المنزليه فيأكل الجميع ، من أتى أهله ومن لم يأتوا، فتبور الفاصوليا فى ذلك اليوم شرّ بور. كل الطبائخ أعلاه غير مسبّكه وخاليه من اللحم الا ماندر والرجله بالذات عباره عن برسيم عائم فى ماء ولكن الجوع كااااااااااافر كما يقولون!
14- بعد الغداء وصلاة العصر نتحرك لبيادة العصر والتى تستمر حتى قبيل المغرب حيث يرجع الجميع الى المسجد لصلاة المغرب وغالبا مايكون هناك محاضرة أو عرض فديو (حلقات من ساحات الفداء) أو حفل إنشاد جهادي يرقص فيه المجندون كما الDJ والراب والروك ..الخ يستمر هذا الوضع الى صلاة العشاء وأحيانا الى مابعد التاسعة مساء فيظن المجندون أن لا تمام 9 اليوم فاذا بالصفارة تنطلق ويتحرك الناس الى التمام كأنما يساقون للموت وهم ينظرون! أيضاً كنا فى الكتائب من الرابعة حتى السادسه محظوظون فما ندر أن نقف إدارة حتى الفجر أما من الأولى حتى الثالثه فكانوا فى ادارات داخليه على الدوام حتى الثالثه صباحاً.
15- أجمل ما فى المعسكر كان إقامة دورة فى كرة القدم بين الكتائب الست وكان اللعيبه على مستوى عال من المهارات والتشجيع والحماس يهز المعسكر فكانت تسريه لانفسنا من ضنك المعسكر، لا أذكر بالتحديد من الفائز بكأس هذه الدورة وأرجح أنها كتيبتنا الخامسه!
16- بعض طلاب الشهادة العربيه إستاء من اول يوم وقالوا: والله دخلنا معسكرات لكن ليست بهذه الصورة! بعضهم أتى بشنطه كأنما السوبرماركت من كثرة مافيها من الاطعمة والمعلبات، بعضهم ظل ساكتاً ومستاءاً طيلة المعسكر وبعضهم أصبح قمة قى الإستهبال والزوغان من التدريب بحجج مختلفة! ومن أغرب ماحدث أن أحد طلاب الشهادة العربيه وفى أول جمعة خرجنا جميعاً تحت الشجر لنغسل ملابسنا فما كان من ذلك الطالب الا ان وقف محتاراً ماذا يفعل فكان أحد الطلبه المحليين يملى عليه أن ضع الملابس فى الطست وكب عليها الماء ثم أفرك الملابس بالصابون فعرفنا أن هذا الطالب يغسل ملابسه لأول مره فى حياته وربما يكون غسل لكن بالغساله وليس بيديه!
17- النقيب شرطه عاطف (كان غريب الأطوار واتهمه بعضنا بالجنون والبعض الاخر بفقدان الوعي)كان من الضباط المسؤلين عن كتيبتنا وكان غالبا مايجمعنا بعد تمام التاسعه ويطلب من تكرار نشيد فى حماك ربنا عشرات المرات وبعد كل مره يقول: مابطّال لكن ضعيف عيدوا مره تانيه. الى ان يزهج فيقول للتعلمجى هل تريد هؤلاء فيجيب أن لا فينصرف النقيب الى ثكنته ويقوم التعلمجى بصرفنا لثكناتنا أيضاً.
18- الصول بشارة (كان يسمى شرحبيل نسبة للشبه الشديد بينه وبين الفنان شرحبيل أحمد) كان يزأر كالأسد فيخاف منه التعلمجيه قبل المجندين.
19- التعلمجيه والضباظ يمتازوا بسرعة البديهه والرد الساخر اللاذع والقطامه المفرطه، ذات يوم ونحن نخرج لتمام 6ص ونأتى فرداً فرداً لأن ذاك يتسوك وذاك قام من النوم لتوه وذاك يأكل..الخ فغضب الرقيب أول المسؤول فقال: أجمعوا سريع ماتجونى كدا زى دم الرُّعاف واحد واحد!! أحد الرقباء أيضاً كان صوته رقيق وفى بروفة التخريج اخذ يصيح طابور صفا فكان الناس يضربون الارض بصوت خفيف يوازى صوت الرقيب المبحوح فما كان منه الا أن صمت قليلاً ثم قال: ليه أنا شاحدكم ماتضربو الارض دى شديد!
20- هذا جزء مما جادت به الذاكره وسمح به الوقت والا فان الطرائف والقصص التى حدثت خلال الخمسة وأربعين يوماً من عمر المعسكر أكثر بكثير من الذى سردناه وربما يأتى من يزيد عليها من نفس دفعتنا هذه وتكون ذاكرته أحسن منى. |
|
Post: #104
Title: Re: ايامي في معسكر الدفاع الشعبي .....
Author: مدثر صديق
Date: 09-28-2010, 10:21 PM
Parent: #103
فوق ^__^
|
Post: #105
Title: Re: ايامي في معسكر الدفاع الشعبي .....
Author: omer osman
Date: 09-29-2010, 06:35 AM
Parent: #104
| Quote: أرسل لى الأخ محمود ذكرياته التاليه وبحكم انه ليس يديه اشترام فى سودانيز أونلاين ولم يجد ايميل الاخ جنابو عمر عثمان فى بروفايله فطلب منى نشر هذه الذكريات: |
الف شكر مدثر والف شكر لصديقك محمود الذي قدم تصوير رائع ودقيق لحال المجندين بالمعكسر ينم عن ذاكرة حديدية ماشاء الله .......
على العكس من ذلك كان سكن الضباط والمنسقين مجهز تجهيز ممتاز ونوعية الاكل فيها ما لذ وطاب ......
بالطبع عدد المجندين كان كبيرا جداً يصل في بعض الاحيان الى 5000 الف مجند ومهمة اطعام عدد بهذا الحجم لابد ان تكون شاقة وصعبة ان لم تكن مستحيلة ......
|
Post: #106
Title: Re: ايامي في معسكر الدفاع الشعبي .....
Author: omer osman
Date: 09-29-2010, 06:43 AM
Parent: #105
بمرور الايام اتسمت العلاقة بيننا وبين ضباط الجيش بالمعسكر بالود والصداقة بعكس علاقتنا بالمنسقين فقد ظلت متوترة دائماً ....
اولاً لم نكن على إستعداد لتقبل فكرة تدخل الملكية في شئون التدريب العسكري ثانياً هم كان لديهم نظرة عدائية واستعلائية الى حد ما اتجاه العساكر بصفة عامة ......
اذكر انه من ضمن حروبنا الباردة معهم اننا اتخذنا قرار بعدم الصلاة معهم في مسجد المعسكر وكنا نكتفي باقامة صلاة جماعية امام سكن الضباط .....
بعد سنوات عندما تراجع نفسك ومواقفك تشعر في بعض الاحيان ان هذا القرار كان فيه نوعاً من الغلو فما دخل الصلاة في صراعنا مع المنسقين وهل المسجد لله ام لهم .....
زادت حدة التوتر وخرجت الى السطح يوم ان قررت ادارة المعسكر اسكان احد المنسقين معنا في الكرفان الخاص بنا ضباط الشرطة .......
في موقف جماعي قلنا ليهم شوفوا السماء ده قريب لو الزول ده يسكن معانا ......... توترت الاجواء زيادة لكن لم يكن امامهم خيار غير البحث عن مكان اخر لاسكان المنسق ...
|
Post: #107
Title: Re: ايامي في معسكر الدفاع الشعبي .....
Author: omer osman
Date: 09-29-2010, 06:51 AM
Parent: #106
اسندت قيادة المعسكر الى ضابط برتبة العقيد وهو من عائدي الخدمة بالقوات المسلحة وكانوا كثيرين منهم بقوات الدفاع الشعبي ..........
القائد الجديد كان واضحاً حجم الفرق والاختلاف بينه وبين المرحوم مرغني القائد السابق ......
فبرغم التدين كان هو السمة المشتركة بينهم الا ان روحه وطريقته في التعامل تختلف تماماً عن الرائد مرغني ..............
فقد اراد ان يسبغ بتدينه هذا كل حركة المعسكر والعسكرية نفسها وفي اول لقاء لنا معه قال انه بصدد تغيير حركة العسكرية من الشمال الى اليمين .......
من المعلوم ان كل الحركات العسكرية البيادة .. حمل السلاح ...... الخ كله يتم بالشمال وتعلمناه هكذا واتقنها على هذا النحو .......
طيب ياسيادتك الحكاية دي حتم كيف ؟
دي مهمة التعلمجية يدربوا المجاهدين من أول يوم على اليمين ...........
لكن ياسيادتك التعلمجية ديل اقل حاجة الواحد فيهم ليهو زي عشرين سنة بشتغل بالشمال كيف بين يوم وليلة يقلب يمين .........
دي مهمتكم انتم الضباط تعلموا التعلمجية ..........
جداً ياسيادتك نحن بنعلم التعلمجية ....... لكن نحن ذاتنا الضباط ديل البعلمنا منو .... 
|
Post: #108
Title: Re: ايامي في معسكر الدفاع الشعبي .....
Author: omer osman
Date: 09-29-2010, 06:57 AM
Parent: #107
حقيقة العمل في الدفاع الشعبي خلا الواحد بقي زي الاستاذ لحدي يوم الليلة محل ما امشي القي زول وقف إنتباه ويقول لي انت دربتني في القطينة ........
وكذلك اتاح لنا فرصة التعرف على كمية من قيادات الخدمة المدنية والقضاة وحتى ناس الثقافة والفنون ففي احدي الدورات كنا معنا مجموعة من الممثلين والفنانين ...
اذكر منهم الممثل الاشهر (جمال حسن سعيد) الذي كان يسعدنا بفقراته الكوميدية التى يقدمها من خلال الطوابير او الادارة الداخلية او خلافه ......
قال لي ضاحكاً في احدي المرات انتو جايبننا هنا (غسيل مخ) مش كده والله انتو بطانيتي ما تغسلوها خلي رأسي الغليد ده .....
|
Post: #109
Title: Re: ايامي في معسكر الدفاع الشعبي .....
Author: معتصم محمد صالح
Date: 09-29-2010, 07:51 AM
Parent: #108
وبلغت البوابة الشمالية .. طبعا بلّغت بتشديد الللام ( للملكية ) .. لم يصرفوا لي سلاح كبقية قوة البوابة وهذا الامر احزنني جدا .. لانني اجيد استخدام 7 انواع من الاسلحة والبقية لا يعرفون شيئا غير الكلاشنكوف وبعضهم الجيم 3 .. والكلاشنكوف بالتحديد تخصصت فيه واعرف عنه كل صغيرة وكبيرة .. الامر الاخر الذي ضايقني هو ان قوة البوابة تناديني بالمستجد دائما .. واصبحت كالمراسلة .. يا مستجد امشي جيب شاي .. يا مستجد امشي املأ الزير .. يا مستجد .. يا مستجد .. لا أهنأ بالجلوس دقيقتين متواصلتين الا وياتي طلب جديد .. كانوا يلعبون الكوتشينة .. ولاحظت عدم رغبتهم في اشراكي مما زاد غيظي ..
المعسكر كان محاطا بسلك شائك .. يمكنك ان تتخطاه بسهولة ..هذا اذا تمكنت من بلوغه لان المعسكر كان واسعا ومكشوفا واي تحرك نحو السلك سيكون مرصودا لكل من بالمعسكر وليس من الحراسات فقط .. التحرك نحو اطراف المعسكر كان في اتجاه واحد فقط .. الى الحمامات التي تقع في اقصى جنوب المعسكر وهي الثغرة التي استغلها المجندين في الخروج من المعسكر ودائما الحركة من والى الحمام كثيرة ويذهب المجند بزيه الابيض نحو الحمام ويكون مرتديا ملابس ملكية تحت زي المعسكر ( الدمورية ) طبعا البنطلون بكون مكفكف تحت السروال .. وخلف الحمامات يقوم بخلع الميري ودفنه .. والخروج من تحت السلك .. ولكن الى اين ؟؟ فبورتسودان بعيدة جدا ويلزمك وقت طويل للذهاب والعودة ..بالقرب من المعسكر كانت توجد بعض الاحياء العشوائية وقتها ( فيلب ) و ( دار السلام ) واقرب الاحياء الماهولة كانت ( ديم عرب ) وهو ايضا يتطلب وسيلة نقل .. كان المجندون يذهبون الى دار السلام وفيلب فقط.. ولاشئ هناك يمكن ان يجعلك تغامر بالذهاب الا كسر روتين المعسكر .. بعض المجندون كانوا يذهبون لاحتساء ( المريسة ) نعم فقد كانت متوفرة بكثرة في دار السلام ..
ضقت ذرعا بالبوابة خصوصا بعد تعودت قوة المعسكر على توكيلي بمهمة السهر نيابة عن النبطشي .. شووف يا مستجد .. لو النبطشي او الضابط جا على البوابة .. ما تمشي عليهو .. من تشوفو من بعييد .. صحيني .. ولو شفت نور عربية العقيد - كان ياتي كل يومين او ثلاثة لتفقد احوال المعسكر وغالبا في الليل- من تشوف نور العربية صحيني وما تمشي عليهو .. وكانت الطامة الكبرى التي اعادتني للبس الدمورية واعادتي للطابور ..
|
Post: #110
Title: Re: ايامي في معسكر الدفاع الشعبي .....
Author: SHIBKA
Date: 09-29-2010, 09:05 AM
Parent: #109
عمر ومعتصم
واصلوا
اها يامعتصم الرجعك شنو للطابور والدمورية؟
|
Post: #112
Title: Re: ايامي في معسكر الدفاع الشعبي .....
Author: Osama Mohammed
Date: 10-01-2010, 10:21 AM
Parent: #110
جنابو ازييك
الدفعة الانت قلتها دي بتاعت اللجان كان فيها بعض الطلاب جو لمدة شهر ( واسمهم المتخلفين ولا المخلفين ما عارف ) المهم نحنا جينا نشد من ازر بعضهم في يوم كدة وجدنا المعسكر مقلوب وكانت في حادثة مشهورة بتاعت واحد اسمو النتيفة الله يقرفو .
قابلت احد اصدقاء اخوالي بتلك الدفعة وهو ( عثمان كوبر ) عسكري بمية ضابط ربنا يذكرو بالخير وفي صول اسمو ابراهيم .
رجاء لا تذكر حادثة النتيفة فهي يعف عنها اللسان والغريبة كان عامل فيها امام المسجد .
|
Post: #113
Title: Re: ايامي في معسكر الدفاع الشعبي .....
Author: omer osman
Date: 10-03-2010, 06:53 AM
Parent: #112
| Quote: رجاء لا تذكر حادثة النتيفة فهي يعف عنها اللسان والغريبة كان عامل فيها امام المسجد . |
بالتاكيد يا اسامة لم اكن انوي ذكرها ...........
شكراً برضو للتنبيه ...............
|
Post: #114
Title: Re: ايامي في معسكر الدفاع الشعبي .....
Author: omer osman
Date: 10-03-2010, 06:54 AM
Parent: #113
الحلقة الأخيرة
|
Post: #115
Title: Re: ايامي في معسكر الدفاع الشعبي .....
Author: omer osman
Date: 10-03-2010, 06:56 AM
Parent: #114
لماذا ؟ وكيف ؟ غادرت معسكر القطينة !!
|
Post: #116
Title: Re: ايامي في معسكر الدفاع الشعبي .....
Author: omer osman
Date: 10-03-2010, 07:02 AM
Parent: #115
في احدي صباحات المعسكر العادية ..... حد الملل سمعنا ان احد الطلبة قام بسب الدين لاحد التعلمجية ......... يبدو ان التعلمجي افرط في عسكريته مع الطالب وان الاخير نفذ صبره وبلغ به الغضب درجة دفعته لارتكاب هذه الحماقة ...... بالطبع في معسكرات التدريب لم تكن هذه الحالة أو المرة الأولي التى يقع فيها مستجد في هذا الخطأ الشنيع دينياً وأخلاقياً وعسكرياً ، لكن الجديد هذه المرة كان في الكيفية التى تم بها التعامل مع الأمر بحسب تعليمات السيد قائد المعسكر !!!
|
Post: #117
Title: Re: ايامي في معسكر الدفاع الشعبي .....
Author: omer osman
Date: 10-03-2010, 07:06 AM
Parent: #116
السيد قائد المعسكر قرر ان يتعامل مع الأمر تعامل جنائي بفتح بلاغ لدي شرطة القطينة وإتخاذ الاجراءات الجنائية في مواجهة الطالب تمهيداً لاقامة الحد على الطالب كما بلغنا ، كل محاولات إثناء السيد العقيد عن قراره بحكم صغر سن الطالب وظروف التدريب ...... الخ ومعاقبته في إطار المعسكر ... فشلت كل تلك المحاولات وشرع قائد المعسكر في مباشرة الاجراءات بنفسه ....... وإقتيد الطالب الى شرطة القطينة وتم فتح البلاغ في مواجهته .....
|
Post: #118
Title: Re: ايامي في معسكر الدفاع الشعبي .....
Author: omer osman
Date: 10-03-2010, 07:14 AM
Parent: #117
عدد الطلاب بالمعسكر كان كبيراً جداً وبدأ المعسكر يغلي بسبب رفض الطلاب ما لحق بزميلهم وانتشر التململ وسطهم ولم تنفع كل محاولات التهدئة والسيطرة على الأمور ..... ليأتي بعد ذلك قائد المعسكر ويصب النار على الزيت !!!
بعد إنتهاء إجراءات التحقيق مع الطالب تمت إحالة اوراق البلاغ الى المحكمة التي كانت برئاسة قاضي حديث عهد بالخدمة ومن خريجي دورة القضاة بالدفاع الشعبي قبل شهر تقريباً ، اقنع قائد المعسكر مولانا القاضي بأن تنتقل المحكمة الى الهنقر الموجود بالمعسكر حتى تتم المحاكمة على رؤوس الاشهاد ......
|
Post: #119
Title: Re: ايامي في معسكر الدفاع الشعبي .....
Author: omer osman
Date: 10-03-2010, 07:22 AM
Parent: #118
في عصر ذلك اليوم .... وبينما نحن في السكن .... حضر احد المنسقين وهو في حالة من الفرح الغريب ...... يدعون للحضور الى الهنقر ومشاهدة المحاكمة وتنفيذ الحد ..... قوبل باستياء وتجاهل شديدين من قبلنا وانا شخصياً كنت في اشد حالات الغضب والعجز عن فعل شيء لايقاف هذه المهزلة ........ وجلد الطالب امام زملائه واشتعلت ثورة طلاب معسكر القطينة وخرجت الأمور عن السيطرة تماماً ..... 99% من ضباط وافراد المعسكر كانوا غاضبين من الطريقة التى عالج بها قائد المعسكر الواقعة ....... ووقفوا موقف سلبي امام مظاهرة الطلاب الغاضبين ....... حمل الطلاب شنطهم وملابسهم وغادروا المعسكر او اعداد كبيرة منهم ...... توجهوا نحو الخرطوم مشياً على الاقدام وانتشروا على طول الطريق من القطينة الى الخرطوم في مشهد اثار انزعاج واستغراب كل من شاهده .....
|
Post: #120
Title: Re: ايامي في معسكر الدفاع الشعبي .....
Author: omer osman
Date: 10-03-2010, 07:27 AM
Parent: #119
خبر ماحدث بمعسكر القطينة وصل الخرطوم قبل وصول اول فوج من الطلاب الغاضبين اليها ......... وعلى الفور انتقلت قيادات أمنية وسياسية رفيعة الى المعسكر ودخلوا في إجتماعات مغلقة امتدت لوقت طويل مع قائد المعسكر ........ كان الجو متوتراً جداً لكن افلحت بعض التدخلات في إعادة عدد كبير من الطلاب الى المعسكر ...... نمنا ليلة تلك ولا ندري ما سيحدث غداً .......... صباح اليوم التالي قام قائد المعسكر باستدعاء المقدم قائدنا الميداني وابلغه بما عسكه الى القيادات التى حضرت الى المعسكر وتوجيهات تلك القيادات ...
ماذا قال لهم سعادة العقيد قائد المعسكر ؟؟ وبماذا وجهوا ؟؟
|
Post: #121
Title: Re: ايامي في معسكر الدفاع الشعبي .....
Author: Hassan Bakri Nugud
Date: 10-03-2010, 08:01 AM
Parent: #120
والله يا سعادتك حكيك زي نقاط الزير ! .. واحدة ، واحدة ..
أحكي ياخ .
سلام ومتابعة.
|
Post: #125
Title: Re: ايامي في معسكر الدفاع الشعبي .....
Author: omer osman
Date: 10-14-2010, 10:45 AM
Parent: #121
خاضرين ياهندسة ..........
|
Post: #122
Title: Re: ايامي في معسكر الدفاع الشعبي .....
Author: أيوب خليل
Date: 10-03-2010, 09:52 AM
Parent: #117
.
الدفعة عمر عثمان
على ما اعتقد قائد المعسكر كان وقتها النقيب النو وأن الطالب الذي سب الدين بالمعسكر إسمو هيثم من أولاد الصحافة مربع 27 ، وكان في الكتيبة الثانية السرية الرابعة في الفصيلة الكان قائدها شرقاوي على ما أعتقد
واصل ومتابعين معاك البوست الجميل
|
Post: #123
Title: Re: ايامي في معسكر الدفاع الشعبي .....
Author: محمد عبد الماجد الصايم
Date: 10-03-2010, 10:15 AM
Parent: #122
يا جنابو .. طلعت ..... روحنا ياخ!!
أنا غايتو بقيت ما بخش بوستاتك إلا بعد الصفحة التانية
أها برضو بعد الصفحة التانية لسع الأمور معلّقة!
غايتو بعد دا نقرا ليكـ في المكتبة بس!!
|
Post: #124
Title: Re: ايامي في معسكر الدفاع الشعبي .....
Author: عثمان محمد كرار
Date: 10-06-2010, 04:03 PM
Parent: #123
وين يا جنابو ?
|
Post: #128
Title: Re: ايامي في معسكر الدفاع الشعبي .....
Author: omer osman
Date: 10-14-2010, 10:52 AM
Parent: #124
عدنا ياعثمان .......
|
Post: #127
Title: Re: ايامي في معسكر الدفاع الشعبي .....
Author: omer osman
Date: 10-14-2010, 10:50 AM
Parent: #123
| Quote: يا جنابو .. طلعت ..... روحنا ياخ!! |
والله ياعمك ظروف الدنيا تجبرني واخالف وعدي واتلوم ........
|
Post: #126
Title: Re: ايامي في معسكر الدفاع الشعبي .....
Author: omer osman
Date: 10-14-2010, 10:48 AM
Parent: #122
Quote: الدفعة عمر عثمان
على ما اعتقد قائد المعسكر كان وقتها النقيب النو وأن الطالب الذي سب الدين بالمعسكر إسمو هيثم من أولاد الصحافة مربع 27 ، وكان في الكتيبة الثانية السرية الرابعة في الفصيلة الكان قائدها شرقاوي على ما أعتقد
واصل ومتابعين معاك البوست الجميل |
ايوب سلام ........
قائد المعسكر وقتها كان برتبة عقيد واسمه (ط) والنو كان مقدم لكن تولي قيادة المعسكر لفترة بسيطة .....
لا اذكر اسم الطالب الان وربما تكون معلومتك في هذا الخصوص ادق مني ......
|
Post: #129
Title: Re: ايامي في معسكر الدفاع الشعبي .....
Author: omer osman
Date: 10-14-2010, 10:58 AM
Parent: #126
| Quote: ماذا قال لهم سعادة العقيد قائد المعسكر ؟؟ وبماذا وجهوا ؟؟ |
فائد المعسكر الله يسامحه ......... شال اللوم كل اللوم ورماه على النفباء الاتنين بتاعين البوليس ......
النقيب (ك) والنقيب (ص) هم السبب في كل هذه الثورة فقد ضغطوا على الطلبة في التدريب بصورة دفعتهم للثورة ......
بالطبع لم يكن التبرير او المعلومة صحيحة لكن في غياب رواية اخري وضرورة الاسراع في احتواء الموضوع تم فبول تلك الرواية الملفقة ......
وعليه تفرر انهاء الحاق النقباء الاتنين بقوات الدفاع الشعبي واعادتهم فورا الى وحداتهم بالخرطوم ................
|
Post: #130
Title: Re: ايامي في معسكر الدفاع الشعبي .....
Author: omer osman
Date: 10-14-2010, 11:02 AM
Parent: #129
استبد بي الغضب فنحن لم نفيق بعد من صدمة ما حدث بالامس ..... لنجد صباح اليوم مسرحية سيئة الاخراج
مطلوب مننا ان نكوم كومبارس فيها ........ بالطبع رفضت المشاركة في تلك المسرحية .....
وفلت للمفدم الفائد الميداني بتاعنا ... نخن جينا ستة يا نرجع الستة يا نفعد الستة لكن التضحية باتنين مننا وتحميلهم مسئولية دون سبب فهذا مرفوض تماماً عندي ......
دار جدل كثير وتحدث معي العديد من الزملاء بضرورة صرف النظر عن كلامي ووجهة نظري تلك بمافيهم النقباء المبعدين طالبوني بعدم الزج بنفسي في هذه المعمة الغير معروف نهايتها بعد
|
Post: #131
Title: Re: ايامي في معسكر الدفاع الشعبي .....
Author: omer osman
Date: 10-14-2010, 11:10 AM
Parent: #130
تمكست بوجهة نظري وطالبت بمنحي (امر تحرك) للخرطوم اسوة بزملائي المبعدين .......
ولما لم اجد استجابة .... وضعت ملابسي في شنطة هاندباك وركبت في حافلة المعسكر التى ركب فيها النقباء تمهيداً لترحيلهم للخرطوم .....
زاد تصرفي هذا من درجة التوتر الفائمة اصلاً وبلغ فائد المعسكر بذلك .......
بمفاييس العسكرية كان تصرفي جامحاً وربما يوفعني في مشاكل كبيرة لكن رفضي للظلم الذي حدث كان من ذلك ...........
قائد المعسكر شعر بانه لاسبيل لنزغ فتيل هذه المشكلة الجديدة الا باخلاء طرفي وتسليمي امر تحرك اسوة بزملائي النقباء ....
وبالفعل ظللت جالس بالحافلة المتوقفة واعد امر التحرك على عجل وانطلقت بنا الحافلة عائدين للخرطوم .........
تركنا القطينة والدفاع الشعبي ورانا لكني كنت اشعر بالرضاء عن نفسي لاعتقادي بان هذا هو التصرف الصحيح الذي يجب القيام به .......
|
Post: #132
Title: Re: ايامي في معسكر الدفاع الشعبي .....
Author: omer osman
Date: 10-14-2010, 11:15 AM
Parent: #131
سبحان الله بعد اقل من شهرين وجدت العقيد (ط) في نادي الضباط بالخرطوم .......
سلمت عليه عااادي وسألته عن اخبار المعسكر ورد على بكل مرارة الدنيا بانه احيل للتقاعد ؟؟؟!!!
ياسبحان الله هل فعل ما فعله بالطالب المسكين ابتغاء وجه الله تعالي ام كان يتقرب به الى المسئولين ؟؟؟
وجات النتائج عكس توقعاته ........ ان الله عليم بمافي الصدور لكني لم اجد في نفسي اجابة تنصفه او تظلمه.
|
Post: #133
Title: Re: ايامي في معسكر الدفاع الشعبي .....
Author: omer osman
Date: 10-14-2010, 11:17 AM
Parent: #132
THE END
|
Post: #134
Title: Re: ايامي في معسكر الدفاع الشعبي .....
Author: ابراهيم الرشيد عبدالرحمن وراق
Date: 10-14-2010, 11:26 AM
Parent: #133
سلام ياعمر
بالله ادينا سلك
رسلت ليك بالمسنجر ما عارف وصلك ولا لا
تحياتى
|
Post: #136
Title: Re: ايامي في معسكر الدفاع الشعبي .....
Author: omer osman
Date: 10-14-2010, 11:34 AM
Parent: #134
كهرباء والا تلفون ......
شر البلية ما يضحك !!
حاضرين ياعمك ........
|
Post: #135
Title: Re: ايامي في معسكر الدفاع الشعبي .....
Author: Hassan Bakri Nugud
Date: 10-14-2010, 11:28 AM
Parent: #132
Quote: سبحان الله بعد اقل من شهرين وجدت العقيد (ط) في نادي الضباط بالخرطوم .......
سلمت عليه عااادي وسألته عن اخبار المعسكر ورد على بكل مرارة الدنيا بانه احيل للتقاعد ؟؟؟!!! |
يُمهل ولا يُهمِل !
تعرف عشان كده يا جنابو بنقول إنو دخول السياسة في العسكرية نقّص كتير منها كقيمة ..
المؤسسةالعسكرية دي مؤسسة عظيمة بي نزاهتا ، وحيادها ، وإنضباطها ، وإحترافيتها .. دخول العوامل التانية دي فيها قطع شك بيأثر في قيمتها وفي نظرة الناس ليها.
الموقف الإنت عملتو ده قد لا يجرؤ كثيرين من الكانو معاك انهم يعملو زيو لانو العوامل التانية هي البتتحكم في قراراتهم ، مش حسّهم العسكري المنضبط ، المحايد والرافض لي الظلم بكل أشكالو.
غايتو والله يا سعادتك البلد فقدت ظابط !
______________
حمد الله علي السلامة .
|
Post: #137
Title: Re: ايامي في معسكر الدفاع الشعبي .....
Author: omer osman
Date: 10-14-2010, 11:35 AM
Parent: #135
| Quote: غايتو والله يا سعادتك البلد فقدت ظابط ! |
كتاااااااار ياحسن ربما اكون افل فامة منهم ........
الله في ..........
|
|