عضوه عديمه الفائده فهل من مُرحب

دائماً كنت أسال نفسى هل إتخذت خطوه سديده بإنضمامى
لهذا المنبر العامر
هل فكرت فى كل ما سيحصل على من إدمان لكم حد الثماله
أكيد ما فكرت فى ذلك وهى عاده لأننى أندفع بكل عواطفى نحو
كل شئ جميل ينال إعجابى
لذلك وبعد متابعه قصيره لما يدور فى المنبر أيام عصره الذهبى
سارعت بطلب العضويه
وألححت فى طلبها من صاحب البيت والقلب الكبير بكرى أبو بكر
حتى لأظنه قد سئم من تكرار الطلب لذلك قبل عضويتى على مضض
ولأننى أعلم أننى عديمه الفائده ولا جدوى من وجودى بينكم
سوى إدخال الملل فى نفوس البعض أخذت عهدأ على نفسى أن
أكفيكم شرِّى ولكن وجدت نفسى مندفعه بحبكم ومجبوره على الإنصهار
فيكم بحكم العديد من الأشياء
ولعل من أهمها مشاعرى تجاهكم التى بدأت تتنامى
اليوم تلو اليوم وأنا ما تعودت كتم مشاعرى
وللمره الثانيه على التوالى عاهدت هذه النفس الضعيفه
أن لاأُرهقكم بمشاركاتى التى لاتزيد ولا تنقص من حجم هذا التميز الذى
يزخر به هذا البورد وطالما أرَّقنى شعورى بالثقل على هذا البورد الجميل
وطالما أحسست بأننى عب على هذا البورد وعلى الباندوث
ومما يزيد من تأنيب ضميرى تذكير الإخوه بين الفينه والأُخرى
أن بكرى يقوم مشكوراً بأرشفه المواضيع ويسعى جاهداً على الوصول بهذاالبورد
الى بر الآمان والعالميه
سليماً معافى من الخُزعبلات مبتعداً عن مواطن الداء
والتى أنا بالطبع عضو بارز فيها
سؤال للقائمين على هذا المنبر هل تقبلون بعضوه غير نشطه
ولا تقدم آى جديد لهذه المساحه المشرقه من الإبداعات
ومن التميز ومن الثقافات المختلفه
ولا تقدم معروفاً بصمتها
أنا شخصيأ إنضممت للبورد دا ومافى نيتى آى حاجه سوى الإستمتاع بكم
لكن الظاهر رجلى جأت فى الهوه بتاعه المشاركه
أنا أكيد عارفه مُسبقاً أنى مافى فائده من وجودى بينكم
لكن ماكنت قائله إن الموضوع يصل لدرجه التقييم
إنت إتكلمتى بموضوعيه أهلا بيك ما إتكلمتى بموضوعيه يلا شتتى
أنا كنت مشككه شويه فى إنى عبء على الباندوث
لكن عبء عليكم دى والله جديده
معليش يا جماعه يعنى أنا شتره شويه
ما بعرف أمنطق الكلام درست الفلسفه لمده سنه وتركتها
محافظه منى على نعمه العقل التى أخشى أن أفقدها يوماً
ولاأتعاطى السياسه الأفى حدود المعقول لنفس السبب السابق
إذا بتقبلوا بى بعيوبى بقعد ولاَّمابمشى طبعاً
لكن ببقى بس عزيزى المشاهد

وجن
دا كلام شنو
بعد كل مشاراكتك دى و لسه ما عارفة قيمتك
طبعا انتى عضوة فعالة و ايجابية
و اعتقد كل الاعضاء كذلك بما فيهم المشاغبين
طالما انك تكتبى فهذا شى ايجابى
استمرى فنحن فى انتظار جديدك
و كلنا نكتب هنا
انه منبر حر
تحياتى

سلام جميعا
الاخت وجن
يا زولة خليك من المقدمات و التواضع الزايد عن الحد، قرأت مشاركتك في بوست الاخت ديما (حينما يقول الاهل لا)، اعجبتني سرعة بديهتك في تحديد اقوى الشخصيات في القصة، اعتقد انك تمتلكي احساس جيد، و لا تستخفي رأي المستمع، فمستمع جيد افضل من شخص يتكلم و لا يستمع لما يقوله الاخرون، لقد لاحظت ذلك جيدا في هذا البورد و هو حوار الطرشان، حيث الكثيرين لا يردون على البعض انما يقذفون بالحجج دون استنباط حوار جاد، و
لذا فمرحبا بك كمستمع و متابع جيد، و بعد ذلك اعتقد ان فيك الكثير لتقديمه لهذا البورد

تحياتي
امجد

who ever told you that he is a big lier SIR
because we all love you and need you so much


نظرة يا السمحة أم عجن

لو كان قليل تبرى الشجن

أعرف صفا الأيام أفيق

أنظر جمال تلك الوجن



دولات صدودك ماوعن

الام وبى اتدرعن

ابكى واصبح متضرعاً

يا ناس دموع عينى ترعاً

وأحمونى ما رضنى الظغن

أمالى جور لى قاطعن

أحشائى هديل أتقطعن

بالفرقة نشابك طعن



يا منبع النور والفطن

يا الفقتى يعرب والوطن

فى جوفى من حبك قطن

يا جاهلة مليون ألأف طن



كيف أٍلى عينيك والوجن

يالبسمتك نور الدجن

جسمك حرير ناسجة العجن

ناضر وباللون انعجن

الضاوية زى خديك من

فى الدنيا يا نور الزمن

أرواح نسائمك لى رمن

نرجس مزج لى مسك اليمن

محلاك يا الجيدك شدن

يالعمرى فيك ضائع سدن

انا عندى شوفتك يا اللدن

أفضل من الروح فى البدن



يا منبع الذوق آه يا من

حبك غرز فى الجوف كمن

يا غالية قط ما ليك تمن

إن هب او جار الزمن

ليك السلام ما ولعن

خديك بالنور يلمعن

وعدد النجوم ما يطلعن

يرضيك وبيك لى يجمعن

العزيزة وجن
اهلا بك اضافة حقيقية
باسهاماتك المقدرة
واصلى هذا الطريق طريق الحرف
فهو مدعاة للتواصل الايجابى
دائما فى انتظار الجديد المدهش

عزيزتي وجن
عارفه
لما الواحد يفكر فينا بي صوت عالي
بجبر الناس التانيه ترد ليه بي نفس الصوت وبي نفس
الاحساس الجميل الاحساس الخلانا كلنا هنا نكون اخوان
ما كلنا عندنا البنقدمو لكن وجودنا بعمق احساس الاسره الواحده
بوطن لمعاني كلمه الحب .. الكلمه الاصبحت محرمه في زمننا ده
يبقي ليه عايزه تطفي شمعه الحب دي جواك
مافي حد طالبك بانك تحملي مشعل الفرح وتجري بيه في ساحات البورد
لنو في مرات كتيره الحزن بعلمنا كيف نبحث عن الفرح
بخلينا نشوف الصوره واضحه ما فيها اي نوع من الضبابيه
يبقي يا بت امي .. ممكن نغيب ممكن نحزن لكن ما ممكن نتنازل عن التواجد

-------
علي فكره انتي عارفه شعار عدم التحنيس
لكن ده تفكير بي صوت عالي
لي كلام اتقال بي احساس عالي

وجن؟ يا بت دا شنو الكلام دا
الا اذا كنت دايره زول يرفع معنوياتك ويقول ليك انت عسل فدي قالوها ليك وانا بعيدها

يا زوله انتي بس قولي عايزه ليك سبب تسيبي حلتنا
تكوني لقيتي ليك حله احسن
كدي قولي الحقيقه

المرهفة وجن

لستى عديمة الفائدة كما خط يراعك الذى سكب لنا معانى الود والانسانية . فاحرفك وتعابيرك واشعارك الملهمة لها معانى سامية (باهية دوزنت داخل سودانيز تحمل ذاك الاسم الرنان (وجن
وكل سنة وانتى طيبة
تحياتى

وجن أختي

اهلا وسهلا بيك بينا، البيت بيتك
.

لقد فرغ كأسي
فمن يملأ كأس أحلامي

أسامه الخاتم
أمجد
ود الجعلى
منعم
الخواض
حنين
إيهاب
بامسيكا
السُنجك
وكل أحبتى البورداب
صدقونى ماقصدتا بكلامى أتعزز ولا أتسبب
ولا أتمدح
مابكره فى الدنيا حاجه قدر الزول يشكرنى
الداير يشكرنى يقول لى إنت شينه شنه ومواضيعك كلها زى وشك
يادوب بنبسط وتتهلل أساريرى
لكن فعلا زى ماقال لى الخواض تفكير بصوت عالى وحبيت أشاركم
إيهاب الحقيقه فرقتكم صعيبه
الله لاجابه
شكرأيا حلوين على زوقكم وكلامكم الجميل
رفعتوا معنوياتى
ولو إنفتحتا فيكم ما تلوموا الآَّ نفسكم
برااااكم جبتوهو لروحكم

وجــنْ تحيــه بسلاســة كلماتــك,وبروعـــة بلاغتــك…
في سباقنـــا المحْمٌوم لمقاعـــد (عزيزي المشــاهـد) يستوقفنا نشيــد ,فنردِد خلــف المزاميــر ألحانها الفريدة نتلعـثم بالقصيد,نـتنفـّس الآهات,نكـفـْكـِفٌ دمعات حريّ, لا ندري هل هي صدي ضحكة,أم لفحــة حزن…!!غير أننا نٌكافــح وهـن الخطوات المثـقـْـلة بالهـِــتاف,
ونــٌـبارك جمــعنـا الصاخِـب….ولهـذا تـنامـت مشاعرك نحو من سبقك,وفاز بمقـعـد …..وهاأنـت تــِـنـْـسلـّين من بين الصدى قيثـاراً إن لم يشجينـا فسـيلـٌوحْ لنـا أن إستمسكوا بجمــع شمـّـلكم…...
التوقيـــع :عزيزك المشاهــد

وجن العجن اخيتي
مالك؟لقيت البوست قلت البنيه مالها
لكن انا عرفتك مالك اظن لقيتي الجماعه كل واحد بيجي جديد بيعملوا ليه بوست ترحيب وانتي ماعملتي ليك واحد دخلتي ساى توش
ومافي زول رحب بيك
بيني وبينك انا برضو دخلت ساي عشان كده
هسي لما اشوف زول جاي والناس ترحب بيه اقول ياربي
ارجع وادخل تاني ولا كيف
والعجب الزول البيكون جايبوا بكري ابوبكر دا انا عاد بغير منه واقول شوف ناس داخلين ساي وناس بيدخلوهم بزفه
لكن ولا يهمك هسي حنقول ليك مرحب بيك ياوجن بيناتنا
هههههههههه ماتزعلي بس شايفه كلام التحنيس ماعجبك عشان كده كتبت ليك الكلام دا
وانا برضو زيك عضوه عديمة الفايده ولكن مستفيده الكثير عشان كده مابمشي من البورد
لكي تحياتي وجن العجن

سلام اهلي الحنان

لا يا وجن

الكلام دة مردود وعديم الصحة والفايدة

انتى وجن
قلم صادق وروح نابضة وامينة

مداخلاتك كلها شموس
وضو

ما تحسى الاحساس المدمر دة

اهم حاجة

نحن بنحبك

ودايرينك بى جنك

تمام؟؟؟؟؟

ما نسمع نغمة متخازلة تانى

ادينى اضانك الشمال دى

الأستاذة الكريمة وجن
لا أظن أن هناك شهادة أكبر من كلمات الزملاء والزميلات على موضوعك

]]عزيزتى .... وجن
والله نفس الشعور
مع انى ما اظن انك ممكن تكونى كدة خاصة بعد كلامك الرائع دة
طبعاً انا عضوة جديدة لنج ، و بصراحة كان عندى نفس الفكرة دى ....... لكن
بعد ما قريت كلامك و ردود اخوانى........
بصراحة... حسيت بالراحة ، خاصة كلام الاخ الخواض،
واذا كان لسة عندك الاحساس دة....... احب اقول ليك
انى يا داب عرفتة قيمتى فى البورد
و شكلو ربنا جابنى ليك عشان تعرفى انو ومهما حسيتى بانك عديمة الفايدة.............
دايماً فى الإنتى احسن واكثر نفعاً منو وانو الأسواء موجوووووووووود
keep on
و ما تشيلى هم
وبالرغم من انى جديدة لكن ............. برييييييييييييييييييدك
المكسرة
زمرد

ارحب
بالزميلة .. عديمة الفائدة

العضوه .. وجن



تمبس

ومرحب بيك يوجن وانت اضافه للبورد

ياخي يا وجن ما تقولي كده .... بيتنا الكبير ده بيسع الجميع والزول من اول زياره بكون صاحب مكان زيه زي الباقين
اختك بت بربر

هى يا جماعه والله خجلتونى
اتارى الناس تحرد وتجئ وتتجئ وتحرد
والله الموضوع عنده طعم حلو
بس يا خوفى من إدمان الحركه دى
وأخر مره أقول ماشه ما ألقى لى زول يقول لى عينك فى رأسك
الآعزاء
العزيز بنفسج
أخيتى بت الجزيره
حبيبتى تماضر
الملأ عمرأووووأو مشرفنى بجلاله قدره
زمرده الجديده والشديده
الزميل تمبس
الفنان القدير الموصلى
عزيزتى بت بربر
والله الواحد ماعارف يقول ليكم شنو ولا شنو
فعلاً كل يوم عن يوم بتعمقوا جواااى شعور الأسره النبيله

الأخت وجن
مررحب بى وبيك ونحن اخر المنضمين للبورد المحترم

عزيزى أنور أنت إضافه حقيقيه للبورد
أهلاً وسهلاً بيك
كنت أتصفح فى صفحتك قبل قليل عمل رائع
دعواتى لك بمستقبل مشرق بإذن الله