بمناسبة اسبوع المرور العربي دا يا ناس الحركة

اجمل منظر لما تشوف بتاع حركة ماسك عمك كبير ولا عمتك مرة كبيرة ومقطعا الظلط

لكين

مافي الية رقابة للبواليص بتاعين الحركة الشايلين ايصالات وحايمين بيها في الشوارع؟؟ خاصة الفرعية؟؟ (في نهب حاصل)

وياريت يدخلو كل بتاع حركة في قصة ابراء الزمة دي عشان يشوفو العجب العجاب

بعدين انواع المخالفات زااااااتا شكلها شنو؟ ومنو بتاع الحركة الممكن يكون (قاضي) ويحدد نوع المخالفة وقيمتها؟؟؟

عشان الشغلانة ما تكون جايطة ساكت وبعد شوية ريحتكم تطلع وتلحقو ناس مكتب الوالي وتبقو في تحلل وما تحلل

بعدين ما عشان (مسعول حكومي واحد ماري بالشارع و راكب ليهو عربية فاخرة ومكندشة ومعاهو عربيتين وفد مرافق) تقومو تقفلو الشوارع والكباري وتهرو الناس بالسخانة وتعطلوهم وتشربكو الحركة لمن يغلبكم تحلوها (ما يتنظر هو لاحق شنو يعني؟؟) والعجب نواب البرلمان لمن يكونو طالعين وانت جاي من امدرمان وماشي علي الخرطوم (الله لا وقعك فيهم) البيشوفهم يعصر عليهم ما يقول ديل الناس البيصفقو لليسوي والمايسوي ديك (خلوهم زيهم وزي الناس هم احسن من الناس في شنو؟ كمان وكت ما حلو ليهم مشاكلهم)

ولا شنو؟

Quote: (خلوهم زيهم وزي الناس هم احسن من الناس في شنو؟ كمان وكت ما حلو ليهم مشاكلهم)

بكري العريس كيفك

يخلوهم زيهم وزي الناس كيف ؟ ديل نواب برطمان والناس الزهجانة منهم ديل هم الدخلوهم البرطمان .. عشان كدا تلاقيهم مرطبين وراء الزجاج المظلل وبشوفوا ناس قريعتي راحت كأنهم ناس من كوكب تاني ..

ويا مثبت العقل والدين

Quote: بكري العريس كيفك يخلوهم زيهم وزي الناس كيف ؟ ديل نواب برطمان والناس الزهجانة منهم ديل هم الدخلوهم البرطمان .. عشان كدا تلاقيهم مرطبين وراء الزجاج المظلل وبشوفوا ناس قريعتي راحت كأنهم ناس من كوكب تاني .. ويا مثبت العقل والدين

عبد الوهاب المليك كيفك ياخ


وأكان شفت السواقين بتاعنهم؟؟ ياخ والله الواحد تقول طيار مركبين مكنات كبار خلاص

كثير من العربات الخاصة تحمل لوحات قديمة يقال انها (تابعة لنظاميين) ؟؟ يعني بتترخص ولا ما بتترخص؟

غايتو جنس حالة؟