نحن = قبل الأرشفة

نحنا اول شعب قطع الرحط وفتح الخشم وعمل الصبحية ، نحنا اول من استعمل لستك العربيه ترتاره وكرسي وقاعدة للطشت والزير وصنعنا منو شبط ونبلة
نحنا اول من اكل ام فتفت والمرارة واستخدم الالتي نحنا اول من عاس الكسره بالطايوق واول من اخترع المفراكة والمعراكة والكرجاكة والمستراح.
نحنا اول من سمى ست الريد وست البنات وست ابوها وست النفر وست النسا وستنا وعاشميق وسميره دنيا ، نحنا اول من شال الجنازة في عنقريب ونشف العدة في نفس العنقريب نحنا اول من استخدم راس البيت مخزن والحوش اوضة نوم، واول من عمل حظيرة اكبر من البيت (سنة يالديامه) نحنا اول من قال كلام ساكت ، وقام قعد ، وكر عليك ، وووب علي ، وسجم الرماد ، وسجمي وسجم اللبت امي (رحم الله حاجه كسوبه)
نحنا اول من ادخل السوط بيت العرس وبيت الطهور، نحنا اول من اكل الرز بالعيش واول من شرب البلح وإتمسح بالسمسم ولبخ القرض نحنا اول من لعب البلي بغطاء البيبسي وكسر الفول بقزاز البيبسي
نحنا اول من لعب سكج بكج، وحرينا ، وشليل وينو، والحجله والفات الفات والرمه والحراس ، نحنا اول من لبس الجلابيه بالجنبين، والسروال ابو تكه والمركوب الاحمر والطاقيه الخضراء نحنا اول من استعمل علبة النيفيا للتمباك ، والسفنجه للرصع ، وام دلدوم في القتال نحنا اول من غلى الحلبة ، والمحريب والشمار وشرب القنقليز والقضيم والعرديب ، ووالله الولية الخلطت البهارات وعملت منها الحلو مر دي مرأة ماساهله ورحم الله قراصة البلح
نحنا اول من صنع البمبر واول من صنقر ودنقر وشوي القنقر (الله يديك العافية يأالتنقر) نحنا اول من صنع ملاح الروب والكول والكجيك والملوحه وام رقيقه والنعيميه والصلته.
نحنا الكتلنا غردون وحرقنا الباشا وقلنا يا الباشا الغشيم قول لي جدادك كر، ونحنا الدنيا جبناها وبنيناها بيوت في بيوت ، تقول لي شنو وتقول لي منو