صنع خصيصاً لتلائم أجواء السودان ..!!

أجواء السودان وافقت ليكم ؟!!


أي تلاجة سيحت !!

أي مكيف ضرب وحلف الكومبريسور بتاعو ما يقوم !!

أي عربية حايمة في السودان عندها مشاكل تكييف ######انة وتغيير لديتر ..!!

ما في زول عندو لستك عربية ما ضرب ...!!

الكهارب والسلوك في الأعمدة اتقطعت وساحت من السخانة !!!

البيوت أي جهاز شغال بالكهرباء اتعطل ..!!

كدي تعالوا هنا !!

انتو البتقولوا صنع خصيصا لاجواء السودان :

لمن صنعتو البتاعات دي :

شاورتو أجواء السودان وأدتكم موافقة ولا دا اجتهاد وتزوير منكم ساي !!!

ناذر خليفة...

وأى مواطن ضرب...
وسلوكه كلها ضربت..
وبقى خارج الخدمة..
والبلد ذاتها ضربت وسلوكها ساحت..
ومافيش سلك مظبوط...
بس احنا العشم ساى مخلينا نتمسك بالخراب دا...

سلام نور تاور ..

يا خي في استسهال بحقوقنا كمستهلكين بطريقة عجيبة !!

انا غايتو والصيف لسع في اولو عندي تلاتة اجهزة كهربائية باظت وضمانا لسع ما انتهى ..

طبعا اكبر مستهبل في السودان هم الشركات بتاعت التبريد والتكييف ..

يدوك ضمان ولمن الجهاز يبوظ كل البيعملوهو بيجو يقيسو كهربة البيت ويقولو ليك المشكلة في كهربتك ما تامة 220 !!

طبعا السودان دلو كهربتو فيها مشاكل ومستحيل تقريبا تلقى بيت كهربتو 220 ..

طبعا دي طريقتم وحجتم عشان يزوغوا من صيانة او استبدال الجهاز ..!!

وما في زول فاضي يشتكي او يسك النيابة واقسام البوليس ..!

لانو المواطن والبلد وكلنا علي بعضنا فيوزاتنا ضاربة ..!!

لكن الله في ..!!

Quote: طبعا السودان دلو كهربتو فيها مشاكل ومستحيل تقريبا تلقى بيت كهربتو 220 .

تقوم تشتري منظمهم كهرباء يكون ملائم لأجواء السودان

ناذر تحياتي
قال شاعر حلمنتيش لمحبوبته في رائعته الشهيرة (عايز أكون) أو (أبقى وتبقي) ما عارف
أبقى جاركم
درجة واحدة من حرارة نص نهاركم
ويبدو أن شاعرنا الفحل لم يكن يتصور أن تفوق درجة حرارة شمس الخرطوم هذه الأيام حرارة قلوب أهلها ، وفي شدة الحر هذه مررت بكاركتير يقول فيه واحد مطلع لسانو مترين لبائع تلج ما عندك تلج أبرد من دا.
نحن في أمورنا كلها البضاعة المباعة لا ترد ولا تستبدل ، ونحن أحد أهم الدول المؤسسة لجهاز تطفيش حماية المستهلك ، ونحن من الدول التي تبيعك الوهم عادي وأمام كل المسئولين ، كدي يوم كده يكون مزاجك تمام أو نص كم حتى أقيف في ميدان أبو جنزير وأدي عنقرتك لي مكاتب الخطوط السعودية ويمم وجهك شطر الشرق تشوف العجب عربات مفتحه ضهرياتا ومكرفون واحد يذيع ويتكلم عن علاج البهاق ووجع الركب وتكبير وتصغير وتهليل وتفتيح ووجع العيون وضعف النظر والعجز في الشأن كله والشعر الغجري المجنون وعندهم جمهور كبير لشراء الوهم وإنت وبختك.

عن عبارة صنع خصيصاً للسودان فهناك إحتمالات ، يكونوا مثلاً قاصدين لبنان وتشابه عليهم الجكس أو يكون ما متوقعين أصلاً أن درجة الحرارة تصل إلى ما وصلت إليه حتى لو كان خرم الأوزون قصاد ديوم بحري أو شارع العدني في البقعة أو سنتر الكلاكلات. وهي قطعاً مفاجأة لأن حياتنا كلها مفاجأت فقد سبق أن قال وزير الشنو كده ما عارف بعد أن طفحت العاصمة وأصبحت تماثل الأمازون في الطين والضفادع ، قال بلا خجله أن الخريف فاجأنا ... وكان الخريف ما كان له أن يأتي أصلاً.

إرشادات طبية:
عليكم بشرب الماء "الموية حبيبتي الموية" وألزموا الضل ، وما تطلعوا في الشمش إلا للضرورة القصوى وإن كان لابد من ذلك شوفوا ليكم شمشية تدرقوا بيها من الشمس وبالعدم قطعة كرتونة وألبسوا النضارات الشمسية لكين أختو النضارات أمات جنيه وجنيهين لأنها ضربت الشمش فيها بهذه القوة والتركيز بتضرب ليك العدسة وتخليها معتمه. وكتروا من البطيخ المو موسيخ وقبل كل هذا أسألوا الله السلامة.
===
ولو قدرنا إشترينا بلد تلائم مثل هذه الأجهزة بيكون حلينا المشكلة من جذورها ، بس شوف لينا حته فيها هوا والشمس لا تتعامد فيها مرتتين في السنة

اها الزيت كيف. !!!!!!

أيمن محمود سلامات ..

Quote: تقوم تشتري منظمهم كهرباء يكون ملائم لأجواء السودان

غايتو البصيرة أم حمد قطع شك تبقى ليك هههههههههههههه

وبرضو لو فكرنا في المنظم زي دا لازم نستشير أجواء السودان في الاوال هههههههههههه

الملا عمر شخصيا ..!!

وينك يا راجل ؟ من زمن اندحار طالبان في معارك تورا بورا وتاني ما شايفنك ؟!!

ومشكور على المداخلة والشروحا بتوضيحاتها لكن في دي :

Quote: وإن كان لابد من ذلك شوفوا ليكم شمشية تدرقوا بيها من الشمس

قبل كم يوم أيام السخانة الشديدة البتسيح المخ كنت في السوق العربي لي غرض والله كان ما مجبور ما امشي .. اشوف ليك واحد كدة طويل وعريض شايل شمسية فاريها فوق راسو .. طبعا منظر ما مالوف في الخرطوم .. أي زول بيعاين للراجل دا ومستغرب من البيسوي فيو دا !! بعدين اقول ليك حاجة . ثقافة شيل الشمسية في السخانة او المطرة ما عندنا في السودان لدرجة انك لو داير تتسحسح في السخانة دي وممشيت تشتري شمسية .. روحك حا تطلع حتين تلقى ليك محل فيهو شمسية ..!!! دا لو ما دخلت محل وسألوك بي طهامة : الشمسية دي شنو ؟ ودايرا لي شنو ؟!

كمان بقت علينا شيل شمسيات في اخر عمرنا ..!!

يااخ ناذر مش في حاجه اسمها جمعية حماية المستهلك ؟؟ ديل قاعدين يعملوا في شنو؟؟ ولا شغلتهم بس الاكل والشراب..

لازم يكون في مساءلة للموردين بتاعين الاجهزة الكهربائية ومطابقتها للمقاييس والمواصفات ..

واذا كان بلدنا يتباع فيها الدجاج الفاسد والمعلبات منتهية الصلاحية فما بالكم من الأجهزة الكهربائية المخالفة للمواصفات..

نقوم نرسل ليكم ترموميترات من السويد تقرأ درجة الحرارة الصحيحة من خمسين ولا فوق

الله يعين يا ناذر، قطعنا شجرة الغابات ما خلينا شدرة واقفة...

كيفك محمد ..

Quote: اها الزيت كيف. !!!!!!

زيوت المكنات زاتا ما مطابقة للمواصفات ..!!

ولا زيت شنو قصدك ؟!

سلام اخونا جعفر ..

Quote: يااخ ناذر مش في حاجه اسمها جمعية حماية المستهلك ؟؟ ديل قاعدين يعملوا في شنو؟؟ ولا شغلتهم بس الاكل والشراب.. لازم يكون في مساءلة للموردين بتاعين الاجهزة الكهربائية ومطابقتها للمقاييس والمواصفات ..

أعمل حسابك .. الأمين العام لي جمعية حماية المستهلك دكتور ياسر ميرغني عضو معانا في البورد ..

قبل ما نسائل الموردين ديل في سؤال : هل نحن عندنا مواصفة معينة للأجهزة الكهربائية ولا مافي ؟!

والمواصفات اللازم تتطابق دي مواصفاتا هي نفسها شنو ؟!!

الموردين اي شي رخيص من برة بيجيبوهو ويبيعوهو بي اغلى الاثمان هنا وزول سائل عليهم مافي !!

سلام سيف اليزل ..

Quote: نقوم نرسل ليكم ترموميترات من السويد تقرأ درجة الحرارة الصحيحة من خمسين ولا فوق الله يعين يا ناذر، قطعنا شجرة الغابات ما خلينا شدرة واقفة...

كلام صحيح ..

الترمومترات زاتا العندنا ما صنعت للاجواء الزي دي .. أنا متأكد أول أمبارح بالذات درجة الحرارة ما اقل من 48 لكن كم مقياس حرارة مصر انو درجة الحرارة 42 ..

الغابات دي لو ما قطعوها كوبري الانقاذ الجديد دا كان اصلا ما قام ..

البركة في العشرة خمسطاشر شدرة الفضلوا ..!!