دنيا كبنقا
ما ضَرّ وجعاً
لو فرز وجعو
الخيوط
وما خسر جرحاً
نزف
لو كان وقف
في وش هوانك
والأوامر والكوامر
والشروط .
..............
أثبت وموت
لو دقّ عودك
موج عصار
أو بق غيظك
تار ونار
والدنيا ءانفجرت
تجوط
قدرك تبارز
( قوم كسري )
و ( قوم لوط ) .
...............
ما تبكي يا زول
أو تفور
أضحك شديد
أو تُف عديل
في وش
تباريح الأمور
حتماً حتنفرز
الخيوط
حتماً تروق
الدنيا
ما ترجع تجوط .
............
(1)
............
مسيخة القهوة
لو كباية
أو فنجان
لو ما كان
رفيق جنبك
وشُلة ونسة
أو حِبان
وشن معني الكباري
كمان
لو صبحت
عديل عشرين
وما وصلت
رِحِم ( بحري )
ولو خانت
هوي الخرطوم
ولو قطعت
وصال الخوة
في أمدرمان
..............
يا ( سيرة )
عريس وعروس
ءاتجرتقتو
واتضرضرتو
بالأوراد
واتعطرتو بالبمبان
شن طعم الهتاف
غنوة
وما سقتو الفرح
عِنوة
بدون تصريح
من والي
أو تبريك
من السلطان
وواصلتو السهر
طول الليل
لامن
( أذن الآذان )
.................
وآ ضيعة
و وآ حسرة
هوان ءانسان
اذا صِبْح الجميل
تنكيل
واذا صِبْح الأذي
الجاحِد
جزا الاحسان
وآ موت الفعل
في الخوف
ومضغ الشكوي
والأحزان
والتبرير
يصير تقرير
يكون تخدير
نلوكو لبان .
..............
( دنيا عجيبة (1)
كل الحولك
نار دخان
حتي الدم
ما بْقرّب ناسو
وحتي الحب
ما بدي أمان
لو كان برحم
زمن الليلة
ويرفع قدرك
يا انسان
كنا لقينا
يقينا الواحد
وكان
الغلب الآسر
هان ) .
............
دنيا كبنقا
الفار سموهو
حصان ورهان
و ( سيرك ) السُلطة
النط بالزان .
ءامامنا
الناس في المسجد
خاشعة وراجية
وشيخنا مكبّس
في ( الكنكان ) .
.............
دنيا كبنقا
بلدوزر سُلطة
نائب والي
وكادر عام
زير بالجملة
مع النسوان
مسكين الدين
الصار تلجين .
بلدوزر فاجر
وفي رمضان
تلاته بنات
( زي الشربات )
في حضنو الشاسع
وصدرو الواسع
وقعوا وسموا
في شرك الكَبْسة
( نظام العام ) .
...............
دنيا كبنقا
بلدوزر أمير
تقول ( هارون )
( رشيد الشام ) .
...............
دنيا كبنقا
والأحوال
يا ( يا مك البيت )
( حلوة ومنقة )
والحرية
الجاتنا هدية
معاها عصاية
والكرت الأحمر
و( حامل راية )
لو فت الحد
قلت الجد
تجيك الكشة
تقول مسكوك
جوه الأنداية .
............
دنيا كبنقا
جوع ودموع
( زرة وزنقة )
الدولار
( واقف زنهار )
وجنيهنا الوطني
أكلو الفار
السوق مسطول
ءاتلبشس وكنكش
وقبّل ودلل
( للطعمية )
وحتي ( الفول ) .
جنون الشارع
أصبح حجوة
و ( سيرة وعرضة )
ينقز ويصرخ :-
( عزة السمحة )
شالها ( الغول )
الناس مرووشة
تزازي تلِف
بالعرْض والطول
مخلوعة وتضرب
كف بي كف
جوة السوق
قُصاد الرف
لي روحا تقول :-
يا ( مك البيت )
ده ما معقووول .
.............
الشارع نام
وخليفة وشيخ
وأمير وامام
يسار ويمين
أحزاب تسعين
صاروا نِعام
مسطول
في الشارع
يصرخ ويهتف
الشعب يريد
كيزان ( ألمان ) .
................