شــــــــــــــــــــم النســـــــــــــــــــــــيم فى التصنيع الحربى

شم النسيم فى التصنيع الحربى

هل يمكنك ان تتخيل انك تقضى يوم شم النسيم على شاطئ النيل الازرق الجميل و بالتحديد الشاطئ الذى يقع الآن داخل ما يسمى بالتصنيع الحربى قبالة حى كافورى ببحرى؟

نعم يا اخوان فقد كنا نقضى معظم ايام شم النسيم على هذا الشاطئ الجميل فقد كانت هناك شجرة ضخمة ذات ظل عجيب يعنى اكتر شوية من وصف ظليلة و قد اعتدنا فى مثل هذا اليوم من كل عام ان نأتى باكرا ..كل الاسرة الاب و الام .. الاطفال و ربما الجيران. كنا نقضى معظم سحابة اليوم الذى يسبق شم النسيم فى تلوين البيض بالوان جميلة مبهرة وكانت الوالدة تقوم باعداد سندويتشات الطعمية العجيبة المرقدة فى سلطة الاسود الشهية ولا تنسوا الفسيخ يا اخوان فلهذا حديث آخر فوالدتى اطال الله عمرها كانت تقلبه فقط قلبتان على النار فيخرج بكافه طعمه و بهرجه مع الشطة الحمراء و البصل الابيض و عصرة ليمون لن ياتيك الاحساس بالشبع ابدا. من يريد استخدام المطافئ بعد ذلك عليه بسندويتشات المربة اللذيذة يتبعها بزجاجة بيبسى باردة او اثنتين فيتم المنى و يعم السكون فنرقد على البساط لنشاهد الوالد عليه رحمة الله و هو يمارس هواية صيد السمك بهدو و مزاج ولما لا فالجو جميل و الهواء عليل وكل الاسرة من حوله.

بعد كارثة 30 يونيو 89 استولى قوم ياجوج وماجوج على الشط الجميل و اقاموا عليه مصنعا لانتاج معينات الدمار و الحرب فحرمو اهل بحرى من متنفس لهم لكن لن يحرمونا ابدا من مخزون الذكريات و امنيات عودة المكان الى سابق عهده بل اجمل :

مكان السجن مستشفي
مكان المنفي كلية
مكان الاسري وردية
مكان الحسرة أغنية
مكان الطلقة عصفورة
تحلق حول نافورة
تمازح شفع الروضة

رحمة الله تغشاك يا شاعر الشعب.

واحد صاحبى قال لى قريت العنوان قايلك قبضوك تانى...قلت ليهو فال الله ولا فالك ....هههه

المهم ..زى بتاعت تبارك

الناس دى فعلا قابضة علينا لو كنا جوة ولا برة قابضين بتلابيبنا شديد.. الواحد لما يتذكر ذكريات زى دى بيحس بيها زي محاصرة و المكان البنعرفو ذاتو زى اتنشل او تم تجريفه عنوة و ان ثمة شخصا او اشخاص يعملون على اقتلاعا من جزورنا!!!!!!

سلام يا هشام

Quote: فحرمو اهل بحرى من متنفس لهم

الغريبة شاطئ النيل و النيل الازرق الوحيدة الكانت بها متنفسات عامة للناس ....الان يحدث العكس حتى امدرمان اصبح لها (كورنيش ) من كبري شمبات
حتى كبري الحلفايا الجديد.....

بحري بسهولة كبيرة يمكن عمل كورنيش من كلية الزراعة شمبات مرور بالصبابي مرورا بقصر الصداقة حتى كبري النيل الازرق ....
(طبعا المخازن و المهمات و النقل المكانيكي هدمت و هي الان منطقة خالية المباني ......
و حسب ما شاهدة من الخريطية الهكلية لولاية الخرطوم اعتقد ان لا وجود لمتنفسات على النيل في بحري ..........
اله يكون في العون .......

يا سلام يا هشام رجعتني لي حتة قضيت فيها أجمل أيام صباي

أسمها عزبة البوب وشرقها شويه مكان أسمه الحجر لأنه في حجر ممكن تمشي طويل ممكن تمشي فيه لي نص النيل والمنطقة كلها عبارة عن حجر بركاني ضخم

عزبة البوب قالو سموها على خواجه أسمه بوب كان بصطاد فيها السمك نحنا ما شفناها لكن كلمونا السبقونا وشافوه قالوا خواجة أسمه بوب كان بصطاد يوميا في المنطقة ديك وكان عنده سنارات حديثة الزمن داك

زمان وحتى بداية التسعينات كان في عزب ومناطق ما حقت زول استولى عليها جهاز الأمن زي المنطقة تحت كبري كوبر بالشرق وكانت عزبة للعم المرحوم الحاج محمد سعيد الدنقلاوي واستولى عليها جهاز الأمن وحولها لي سكن لضباط الجهاز

الاعتداء على حدائق وشواطئ اهل بحرى ب>ا من زمن الانجليز بانشاء مؤسستى النقل النهرى و النقل الميكانيكى ووضعهما فى واحدة من اجمل المناطق فى االسودان ولكن هؤلاء انجليز مستعمرون فماذا نقول فى جعفر نميرى الذى انتزع منا حديقة البلدية الشهيرة ببحرى و معها ملعب بلدية بحرى و شطهما الرملى الجميل لينشئ فندق قصر الصداقة !!!!!

هذه المنطقة كانت متنفسا كبيرا لأهل بحرى بل كانت حديقة البلدية متنفسا لجميع اهل الخرطوم و تغنى بها الشعراء و الفنانون . فى زمن الديكتاتوريات و غياب القانون يصبح كل شئ قابلا للازالة و الهدم.

شكرا مدثر صديق

فندق قصر الصداقة تحت الانشاء

انظر الاشجار الوارفة خلفه من ما تبقى من حديقة بلدية بحرى. اما ما امامه من اشجار فقد تم قطعه و ازالته ..جريمة تمت دون مقاومة من احد

شكرا اخونا عبد العزيز حسين على المعلومة .
اظن ان جهاز الامن فى زمن جعفر نميرى كان قد وضع عينه على المنطقة الجميلة وكان هناك مشروعا كبيرا لرئاسة الجهاز فيما عرف بمشروع بناية النيل الازرق فى عهد عمر محمد الطيب.

Quote: وكانت الوالدة تقوم باعداد سندويتشات الطعمية العجيبة المرقدة فى سلطة الاسود الشهية ولا تنسوا الفسيخ يا اخوان فلهذا حديث آخر فوالدتى اطال الله عمرها كانت تقلبه فقط قلبتان على النور فيخرج بكافه طعمه و بهرجه مع الشطة الحمراء و البصل الابيض و عصرة ليمون لن ياتيك الاحساس بالشبع ابدا. من يريد استخدام المطافئ بعد ذلك عليه بسندويتشات المربة اللذيذة يتبعها بزجاجة بيبسى باردة او اثنتين فيتم المنى

رفقاً بالحيارى يا عذارى
رفقاً بي و بكل الذين لم يتناولوا وجبة الإفطار بعد
أخي الكريم وصف مثل هذا من الصباح بطلع زيتنا عديل
التحية لك و لكل أفراد الأسرة
تعرف يا هشام لدى صديق اسمه طارق أبوالنجا لديه مقولة مشهورة و هي أن وصف السوداني السعيد يتلخص في أن يكون من مواليد الأربعينات أو الخمسينات و توفي في العام 1988 و بالفعل يا أخي فإن جمال وروعة نمط الحياة في السودان و خصوصاً الخرطوم هو ما عايشناه في طفولتنا و مطلع صبانا الباكر في آواخر الستينات و عقد السبعينات الجميل فلك الشكر أخي أن أيقظت في ذاكرتنا المتداعية ذلك العهد الجميل و تحية للأصدقاء و الصديقات من بحري في ذلك الزمن الجميل
و ختاماً كما يقول المغني من حسرة الحاضر أعيش على الماضي.
و لك كل الود و الإحترام.

Quote: رفقاً بالحيارى يا عذارى رفقاً بي و بكل الذين لم يتناولوا وجبة الإفطار بعد أخي الكريم وصف مثل هذا من الصباح بطلع زيتنا عديل التحية لك و لكل أفراد الأسرة تعرف يا هشام لدى صديق اسمه طارق أبوالنجا لديه مقولة مشهورة و هي أن وصف السوداني السعيد يتلخص في أن يكون من مواليد الأربعينات أو الخمسينات و توفي في العام 1988 و بالفعل يا أخي فإن جمال وروعة نمط الحياة في السودان و خصوصاً الخرطوم هو ما عايشناه في طفولتنا و مطلع صبانا الباكر في آواخر الستينات و عقد السبعينات الجميل فلك الشكر أخي أن أيقظت في ذاكرتنا المتداعية ذلك العهد الجميل و تحية للأصدقاء و الصديقات من بحري في ذلك الزمن الجميل و ختاماً كما يقول المغني من حسرة الحاضر أعيش على الماضي. و لك كل الود و الإحترام.

شكرا يا وليد على هذه المداخلة اللطيفة و لصديقك طارق ابو النجا التحية.

صورة لعربة توزيع منتجات مشروع عزيز كافورى الذى كان يقع قبالة التصنيع الحربى الحالى.
هذه العربة كانت توزع زجاجات الحليب المبستر فى كل انحاء بحرى توصيل منازل و بالاشتراك الشهرى

لاحول يا هشام ياخ أنت قديم غايتو نحنا شفنا العربية الفورد ومكتوب عليها معمل البان بلغرافيا

والله ذكرتني قزازة الحليب الخضراء وخشمها عريض داك ومغلفة بي قصطيرة اتذكر القزازة لو قعدت مدة طويلة تلقى الدهن طلع فوق

زمان بنستنى العربية وكان سواقها الله يطول عمره أسمه عم عبدالوهاب جبارة الله نشيل القزازة باردة وزووووط نقطعها ونحنا واقفين لا سكر لا تسخين


يا هشام ناس أمن نميري ما سووا التصنيع الحربي وعزبة البوب دي ايام الديمقراطية سكنوا فيها جماعة كدا بتاعين بنقو وسطلة لكن لطيفين خالص وبنوا ليهم بيوت عشوائية حول الشجر الكان موجود لكن الكيزان ديل هم العملوا فيها التصنيع الحربي بتاعهم دا في بداية التسعينات

الفنان الجيلاني الواثق كان برضه عنده مكان هناك وكان بجي بي جيتار ويغني وكنا بنقعد معاهم وهو زول ظريف خالص

أغلب رواد المكان دا كان الخواجات وكانو ودودين جداً وكنا بنركب معاهم مراكبهم الشراعية تصدق يا هشام عادي كانو بجو بي ملابس البحر المايوهات (البكيني)

وكنا بنسبح لحدي بري ونجيب بطيخ من المزارعين بي هناك

غايتو لو كلامك دا في التمنيات اكيييد بتكون شفتنا هناك

المنطقة الغرب من عزبة البوب دي كان أسمها ساقية حمد وماتابعة لي لكافوري وفيها أقدم البيوت في السودان وفيها عدد من السفارات الهولندية والفرنسية والهندية وعدد وبيوت رجال الأعمال أولاد الشيخ مصطفى الأمين وبيت كافوري زاته وسفارة الفاتيكان غايتو اخر مره مشيت بي هناك قبل اكتر من 18 سنة رغم أنه بيتنا على خطوات من هناك

Quote: والله ذكرتني قزازة الحليب الخضراء وخشمها عريض داك ومغلفة بي قصطيرة اتذكر القزازة لو قعدت مدة طويلة تلقى الدهن طلع فوق

شفت يا عبد العزيز القزازة دى زاتها كنا بنقرطعها بالدس بورا الثلاجة ..ههههه لذيذة لذة ..الزمن داك اللبن اب موية ما كان ظهر. الناس صادقة و البيع بالحلال و الربح برضو بالحلال.

اما بخصوص جهاز امن نميرى انا بقصد انو المنطقة كانت عليها عيون الاجهزة الامنية من بدرى لانها كانت المقر المقترح لعمارة النيل الازرق - رئاسة جهاز الامن التى اذا بنيت كانت سوف تضم مكتبا كبيرا لقسم افريقيا و الشرق الاوسط للسى اى ايه.

اها يا عبد العزيز يا جديد جبنا ليك شاحنات الفورد الانت حضرتها







بيضاء و جميلة وكانت صورة البقرة السوداء مرسومة على جنبها بوقار.
العربات دى موديل الستينات يا عبد العزيز .. برضو ما مرقت من الكبر ..هههه

قزايز اللبن المبستر

لا لا ما دي ما حضرتها أنا حضرت دي








ودي نبذة عن المزرعة

Quote: عزيز كفوري الذي ولد في العاصمة اللبنانية بيروت. فشد الرحال إلى الخرطوم في العام 1899م بعد أن تمكن من إدخال شحنات من الأخشاب والحديد ومواد البناء بغرض تأهيل مدينة الخرطوم بعد أن أصابها من خراب الحرب ضد المستعمر ما أصاب. في بداية حياته بالسودان إستقر عزيز كفوري في العاصمة الوطنية أم درمان، شأنه شأن بعض الوافدين إلى السودان من شوام ويمانيين و يهود. إعلنت شركة إنجليزية لإفلاسها بسبب الخسائر الباهظة التي تكبدتها في محاولة ري وإستصلاح ألف فدان من الأرض شرق محطة الخرطوم بحري حيث كانت الأرض غير جاهزة للزراعة والترع تحوّل لونها الي الأبيض لكثافة المياه المالحة، فإستحوذ عزيز كافوري على هذا المشروع بثمن بخس وقام بعمليات فلاحية معقدة ومكلفة استمرت سنوات عديدة عمل خلالها لغسل الأملاح من الأرض وتنظيم عمليات الري والفلاحة وتحفيز العمال مما جعلهم يحفظون له فضل معرفتهم بالطرق المثلى للزراعة والحرث. في العام 1922م عندما أعلن عن قيام مشروع الجزيرة كأكبر مشروع مروي في العالم، كان عزيز كافوري من قبلها قد قام بمضاعفة مساحة مزرعته بشراء 150 فداناً من الأرض الجيدة الواقعة بين مدينتي الحصاحيصا والمسلمية ، إلا إن الأرض أدخلت في مشروع الجزيرة مما دعا كفوري ان يطلب من حكومة السودان ان تمنحه امتداداً لمزرعته ببحري شمالا باتجاه الكدرو، بدلا عن التعويض المالي مقابل أراضي الجزيرة التي نزعت ووزعت كحواشات للمزارعين الأمر الذي رحبت به الحكومة وعملت على تنفيذه . وكان عزيز كفوري يزرع حوالي ألف إلى ألفي فدان قطن سنويا حتى العام 1929م وقت حدوث ألازمة العالمية . بعدها تم التحول إلى زراعة القمح وتلاها التحول التدريجي لتربية ماشية «الحليب» التي سميت « بلجرافيا» وقد ازدهرت تحت إدارة ابن عزيز «غبريال» وتطورت لتصبح مؤسسة متفردة كانت تمد حوالي 2000 مشترك بالالبان ومشتاقها في جميع أرجاء العاصمة المثلثة . كانت تضم اكثر من الفي رأس من الماشية وتجري فيها يوميا عمليات الحليب وكان هنالك ما يعرف «بالحَلْبة» وكل حلبة تضم 480 بقرة في الصف الواحد عمليه التوزيع فكانت تتم بواسطة ست عربات في العام 1981م أصدرت الحكومة قراراً بتحويل المزرعة البالغة مساحتها 3000 فدان إلى أراضي سكنية مميزة، إلا إن طيلة الـ 35 عاماً التي خلت تم تحويل حوالي 50 فداناً فقط وبصورة متدرجة إلى أراضٍ سكنية. وقد أدرجت عملية تخطيط المدينة الجديدة المقترحة في مصاف العمليات الكبرى، إذ ان المساحة التي يزمع تخطيطها تفوق مساحة الخرطوم الأصلية + الخرطوم «1» والخرطوم «2» والامتداد .. وقد تم الانتهاء منها في خمسة اشهر وتوجت بتوقيع اتفاقية في22/5/1981م واتبعت بعمليات مسح في الأعوام 1982 / 1983 لتبقي المدينة الكافورية حلماً يداعب آل كفوري بعد إن قضي القرار بتحويل المزرعة الي ارض سكنية ، ليفقد آلاف العاملين معاشهم وذكرياته وتفقد المدينة الخضرة والجمال ويسودها ترقب وانتظار لخدمات قد يطول انتظارها أو يقصر .

كافوري كان زول عادل جداً حدوده مزرعته فقط في مناطق قريبة من ارضه ما كان بتغول عليها زي الحته ديك وزي الحتة غرب المعمل وشرق كبري القوات المسلحة كان فاضية وكان بزرع فيها رجل عجوز كافوري ما أتعدى شبر على المنطقة ديك جو ناس جهاز الأمن قلعوها رجالة كدا وسووها فيلل سكنوا ضباطهم الكبر بعد فترة كسروا الفلل وبنو النصيبة الكبيرة دي أنا ما عارف مشكلتهم شنو مع النيل إن شاء الله وشاحد الله يجي فيضان يبلعهم بي مبانيهم



البي الأزرق معمل كافوري وبي الاحمر الارض السرقوها ناس الأمن
وشوف دي منطقة عزبة البوب السرقوها





الغايظني أنه عملو حيطه على النيل وما عندهم أي مبنى مطل على النيل مضره ساي يسوروا النيل ويسرقوا متنفس التقول من ضيق الواطة البغيظ شديد أنه جنبهم سفارات وفي سفارة مصلقه معاهم بالحيطة بالحيطة

ايوة فعلا دى يا عبد العزيز ..كانت سيارة شهيرة مميزة بلونها الابيض وانضباط سائقيها و الموزعين على حد السواء.

شكرا على ايراد المعلومات عن السيد عزيز كافورى و ما اسهم به من فعل منتج وصالح بالسودان و كما قلت الرجل كان عادلا كيف لا و قد ركب اصعب الدروب فى انشاء مزارع منتجة وطور اسلايب زراعية معقدة اثبتت نجاحها.

انظر ما فعل بعده السودانيون قرروا تحويل الارض المنتجة الى اراضى سكنية لا تسمن ولا تغنى من جوع وكان هذه الاراضى هى الاخيرة فى الخرطوم .. ماهو ضهارى الخرطوم مليانة بالاراضى ضعيفة المردود الزراعى ولكنها صالحة للسكن كان يمكن تخطيطها على اكمل وجه.
ما حدث بالخرطوم من الحكومات المتعافبة واخرها حكومة الاتعاس هو عفيص اى نعم عفيص ليس له علاقة بالعلم ولا بالمعرفة واضر بالبلاد و العباد.

اشتهرت مدينة الخرطوم بحرى بتعدد مناطق الرحلات بها. اذكر ان اول رحلة حظيت بها مع المدرسة كانت رحلة سنة تالتة ابتدائى وهى كانت رحلة مشهورة مخصصة لطلاب الصف الثالث الابتدائى تقام سنويا وغالبا ما تكون وجهتها منطقة الفكى هاشم الغنية بحائقها الوارفة المدهشة و اشجار منقتها الدانية القطوف و التى نشلنا منها المنقة سرا رغم تحزير الاساتذة لأن هذه الجناين كانت تفتح من اصحابها مجانا لرحلات المدرسة ولا يريد المدرسون ان يصيبها اى ضرر لكن الامر لا يمكن ان يخلو من عفرته التلاميذ امثالنا و اصحاب المزارع يعرفون ذلك ولا يتضايقون.

منطقة الفكى هاشم والخوجلاب واحيانا الكدرو من اهم مناطق الرحلات فى بحرى تليها منطقة شمبات الزراعة بمزارعها المحدودة المساحة ولكنها تتميز بالجمال و قربها من المدينة واطلالتها الرائعة على النيل . ولا يمكن ان ننسى مزارع الجريف و سوبا و ام دوم كل هذه المناطق بها مزارع لا يبخل بها اصحابها على محبى الرحلات.

شكراً يا هشام


أظن أن كافوري من أصول أرمنية لكن رجل أحب السودان وعاش وأبناؤه في السودان وبذلوا مالهم فيه وأعطوه خيراً ورده ليهم بخير اكتر
بلدنا فيها خير بس عاوزه نديها مش نشيل منها ح

مات أبناؤه الكبار واستقر الصغار في لندن ويملكون أسهم في شركات تبغ عالمية ولكن يترددوا على السودان كتير ومازالت بيوتهم مفتوحه ومتواصلين مع الناس وليهم وما فرطوا في أملاكهم حتى الأن

والله يا هشام كون المزرعة تتحول لي سكن شيئ عادي بس في المقابل يكون كان مزارع جديدة أضعافها

البزعل ويغيظ هو استيلاء جهاز الامن على الأراضي العامة البملكها كل الناس والهي متنزهات مباني جهاز الأمن في بحري قلعوها من ناس السكة حديد عشان يعملوا فيها معتقلات

حكى لي واحد قبل فترة عن أنه ناس الجيش قامو بتكسير قشلاق الضباط غرب سلاح النقل وحاولوا يبيعوه طلع انه هو وكل الاسحلة لي كبر القوات المسلحة أراضي تابعة لي آل الميرغني الجوا واثبتو مليكتهم للأرض وواضحوا انهم مخلنها للجيش لانه جيش قومي وللوطن لكن في حالة بيعها كأستثمارات فهم أولى بيها وحتى الارض القشلاق روم مكسر وارض خلا

شكرا عبد العزيز

ياخ انت فتحت ليك موضوع هارينى من زمان . لم اسمع بجيش من جيوش الدنيا يبيع اراضى !!!! ولا حتى شرطة ولكن فى عهد دولة السماسرة كل شئ ممكن. قبل عدة سنوات باعت وزارة الداخلية اراضى قشلاق الخرطو غرب و اخرى بام درمان الملازمين . اراضى كبدة بس و اشتراها طبعا تجار و اثرياء الحكومة.

موضوع معتقلات الجهاز فى ارض السكة حديد بحرى نبه اليه كثيرون زمن الانتفاضة لكن حكومة الجزولى دفع الله كانت من الضعف بحيث تلاعب بها الكيزان و غيرهم فمضت دون ان تنجز اى مهام وطنية حقيقية .

Quote: بحري بسهولة كبيرة يمكن عمل كورنيش من كلية الزراعة شمبات مرور بالصبابي مرورا بقصر الصداقة حتى كبري النيل الازرق ....

اها نق فيها خلي يجو ناس زعيط ومعيط يقفلوها لينا بخرصانة ، عليك الله خليهم قاعدين في العشوائي الفاخر بتاعهم في الخرطوم وكافوري

تجي وماتتصل يا.................

Quote: اها نق فيها خلي يجو ناس زعيط ومعيط يقفلوها لينا بخرصانة ، عليك الله خليهم قاعدين في العشوائي الفاخر بتاعهم في الخرطوم وكافوري تجي وماتتصل يا.................

اولاد بحري يا لذاذ ...

انت وين يا حبيب ؟

بالله ما تتعنصروا لينا بي بحريكم دي ...

انا عشت في بحري دي تلاته سنين فممكن احسب روحي معاكم ..؟

يا يحيى

سلامات

نحن من زمان خاسبنك معانا

يا نيو سودانى

سلامات

صدقت والله لكن باقى ليك ما بكونو مدكننها لى يوم اسود من العليهم ده؟

جاييكم قريب

مرحب تاني يا هشام

والله يا هشام مافي حاجة غايظاني زمان غير الأسلحة العسكرية الجوه الفي نص العاصمة دي ياخ والعساكر الحايميين بي سلاحهم

جهاز الأمن أستولى على العاصمة بحري فيها منازل حكومية قديمة فيها جزء من زمن الانجليز وجزء بني زمن عبود عليه رحمه الله وليه فضل كبير في تطوير بحري وبرضه في الخرطوم كشارع البلدية فيه منازل حكومية كتيرة وكانت عباره عن بيوت ضيافة وسكن لكبار الموظفين برضه كلها استولى عليها الكيزان جزء شالوه ناس الامن وأغلبه مكاتب وهمية تلقى لافته بي أسم منظمة وقدامها عسكري بي كلاش
من البيوت الاستولى جهاز الأمن عليها وحولها لسكن لكبار الضباط البيوت الجنوب سجن كوبر وغرب كبري القوات المسلحه وديك أخطر وأهم مكان لجهاز الأمن






جهاز الأمن أستولى على مستشفى الأمل وهو تابع لاهل كوبر وحاولوا الاستيلاء على مدارس كوبر لولا وقفتنا السنة الفاتت وكان عملية بطولية وعظيمة من أبناء كوبر

أما الاسلحة العسكرية والله ياخ دي مصيبة كبيرة ما عارف ليه مصريين تكون في نص العاصمة وكلها وماسكه مساحات كبيرة يعني مثلا كتيبة الأشارة المقابله سلاح الاشارة ماخدة مساحة ضخمة اكتر وكلها ارض فضاء ومكاتب متهالكة وعدد بسيط من العساكر لا يتجاوز العشرة ومسورة بصورة قبيحة ولا يتم تشجيرها صيانتها أو الاهتمام بها لتزرع القبح والكأبة

والله يا عبد العزيز يا اخوى ده ملف مهم جدا البنتكلم عنو ده. ملف الاراضى و البيوت الحكومية وحتى الاهلية التى استولت عليها جهات امنية او نظامية و حولتها لصالحها بدون اى مبرر او مسوغ قانونى.
كما تفضلت و ذكرت اماكن كثيرة من مدينة بحرى تم فيها هذا التغول هذا بلاضافة الى مواقع الاسلحة المختلفة التى تشغل اماكن حساسة من مدينة بحرى فالمنطقة الواقعة جنوب كبرى بحرى القديم و حتى سجن كوبر يشغلها سلاح الاشارة على ما اظن و هى مساحة كبيرة جدا و منطقة من اجمل ما يكون. كذلك سلاح المظلات الذى يقع مباشرة شمال كبرى شمبات ولا ادرى ماهى الحوجة الماسة للجيش ان تكون مثل هذه الاسلحة تشغل هذه المواقع الاستراتيجية من المدينة وكنا قد ذكرنا سابقا منطقة النقل النهرى و الميكانيكى التى بيع جزء منها الى الديار القطرية بمبلغ يفوق ال200 مليون دولار.

وهناك ايضا موضوع الساحات الرياضية و المنتزهات داخل الاحياء التى تم الاستيلاء على معظمها و منحت للمقربين و الخاصة اما كقطع سكنية او استثمارية فمثلا فى المزاد حيث نشأت و ترعرت منح ميدان فريق الهدف الذى كان يمثل المزاد جنوب فى رابطة المزاد والفريق الذى لعبت له اكثر 9 سنوات منذ ان كنت يافعا ولعب له ايضا شقيقى الاكبر عصام و شقيقى حسام هذا الميدان تم الاستيلاء عليه و تحول اولا لمعرض للمنتجات الوطنية فى اول زمن الانقاذ و بعدها تحول بقدر قادر الى ملعبى كرة صغيران استثماريان لا تستطيع الولوج لهما قبل أن تدفع ولا يدرى احد مالك هذا المشروع ومن منحه التصديق و كيف تم ذلك اذ ان معظم هذه الاشياء تتم وراء الابواب المغلقة و دون ان يدرى احد والنتيجة فقدان صبيان و شباب المزاد جنوب للميدان الوحيد الذى كان يمنحهم فرصة لعب كرة القدم رو ممارستها بصفة منتظمة .