تفاهة مصرية في اوضح صورها..

القاهرة - أ ش أ

قال عالم المصريات الدكتور أحمد صالح، إن "قطر بتقديمها عرضا للسودان بإدارة آثارها، بمقابل مادي لم يحدث من قبل، فهي لا ترغب فى مساعدتها ولكنها تحاول ضرب السياحة المصرية بطريقة غير مباشرة".

وأوضح: "قطر تسعى لإعداد وتجهيز بديل في السودان عن المواقع الأثرية التي تتميز بها مصر، وتجذب إليها السائح الأجنبي، خاصة وأنها سبق وقدمت هذا العرض المجزي على مصر أثناء حكم الإخوان والذي قوبل برفض جماهيري عارم"، حسب قوله.

وحذر صالح، في تصريح لوكالة أنباء الشرق الأوسط، الأربعاء، من "خطورة استخدام قطر الآثار السودانية ترويجيًا، بعد حصولها على حق إدارتها، لتكون بديلا للسائح الأجنبي عن الآثار المصرية، لاسيما وأن السمات التاريخية لتلك الآثار لا تختلف كثيرًا عما هو موجود في مصر".

وأضاف صالح: "عندما فشلت قطر في إدارة الآثار المصرية في عهد الإخوان، أعدت كل العدة لتوجيه ضربة للسياحة والآثار المصرية بعد سقوط الإخوان، وتدور هذه الضربة حول إدارة الآثار السودانية واستخدامها في سحب السياحة من مصر، لاسيما وأنها تستغل القلاقل الأمنية والاضطرابات التي يقوم بها الإخوان في مصر".

وتابع عالم المصريات، أن "الملايين التي خصصتها قطر لإدارة الآثار في السودان، تتضمن ثلاث نقاط وهي: إقامة حفائر والكشف عن الآثار السودانية في الولاية الشمالية، ودعم فتح مواقع أثرية وتطويرها وإعدادها للزيارة، وإدارة الآثار في السودان لمدة محددة من السنوات والاستفادة منها في فتحها للزيارة"، على حد قوله.)


.............بالله شوف الما بخجلوا ديل..

استغلال السودان لموارده المائية ...محاولة لضرب مصر
استغلال السودان لموارده الاثرية...محاولة لضرب مصر..

الله لا كسبكم ولا بارك فيكم يا .

Quote: الله لا كسبكم ولا بارك فيكم يا .

امين يا رب
اثار السودان تشهد اهمالاً رهيبا ولا احد يكترث لها
زرت قبل فترة البجراوية رفقة صديق سوداني واخر اجنبي
لم يجدا هنالك ابسط الخدمات لا حمام لا مياه شرب ولا حتى كشك لبيع اشياء ضرورية
فقط غرفة واحدة عند المدخل عبارة عن مكتب مهتري الاثاثات

مشكور الاخ عبد الله على المرور الانيق..

هؤلاء المصاروة يعرفون ان اسطورة انفرادهم بالاثار الفرعونية تدر عليهم المليارات وان اي محاولة من السودان للاستفادة من اثاره التاريخية ستؤدي للاضرار بهم ..لأن السياح سيعتبرون السودان منطقة (بكر)...

اكرر شكري

ديل ناس مايجي منهم خير

صدقت يا معتصم ..

لا يرحموا ولا يخلوا رحمة ربنا تنزل

الله ينتقم منهم

دا زول حمبرة ساي

يهرف بما لايعرف

شكرا اخونا ياسر

تسلم يا ود الباوقة ..

يا اخوانا دا رزقهم واكل عيشهم الوحيد وطبيعى يكونوا حريصين مافى حد ينافسهم
اللوم علينا نحنا .. قرون طويلة وليس سنوات او شهور ماذا فعلنا من اجل اثارنا وصناعة السياحة عندنا ؟؟؟؟

انا دا بيتنا فاتح وجها لوجه على اعظم موقع اثرى فرعونى في منطقة كرمة منذ ان نشات لم يكن هذا الموقع الا خرابة كبيرة
لرمى الاوساخ والقاذورات وكانت مفتوحة للغاشى والماشى وتم نهب كل ما فيها من دفنيات ان كانت تماثيل او ذهب او بقية الاثريات
في الفترة الاخيرة وبجهد اهلى تم تسوير الموقع واقامة مبنى صغير كمتحف لجمع ما تبقى .. دا اعظم موقع اثرى عندنا ما بالك ببقية المواقع

نحنا بصراحة السودان دا حرام علينا كشعب

فعلا يا هشام..

نحن اهملنا في هذا الجانب...

وعندك البجراوية والنقعة والمصورات وجبل البركل وغيرها وغيرها ...

بل وعندك الاثار التي تم اغراقها من اجل عيون المصريين في حلفا القديمة...

مع ودي

لن ثم لن ننسى الآثار التى غمرتها مياه بحيرة (الزفت) العالى
ويجب أن تعود يوماً ما.....


شكراً اخونا ياسر

تحياتي صاحب البوست...

كلام العالم صح... وفي محله... ولا شنو الاهتمام المفاجيء من قطر بالآثار السودانية؟! ما مجدّعه ومهمّشه ومبشتنه ليها سنين!!! جديد عليها! وهو السودان مشكلته في الآثار! التعليم والصحة مفروض يكونوا أولوية المساعدات موش الآثار... عشان كده وجود أجندة من ورا القروش الاتكبّت فجأة دي ما شي محتاج تخمين... دي نقطة.. النقطة التانية حقو الناس تفكّر في تبعات القروش دي، لانه حكومتنا الرشيدة ممكن عادي تكون باعت للقطريين شي من الآثار السودانية مقابل المساعدة دي... ممكن تكون ادتهم حق إدارتها أو حتى تملّكها... اصلها الحكومة بعد ده ما فضل ليها إلا تبيعنا احنا زاتنا....

ما أي شي بكون غلط بصورة مطلقة ولا صحيح بصورة مطلقة... وده يشمل تعميم صفة سيئة على الشعب المصري.. وبشمل التأكد من حسن نية قطر في منحتها للسودان.. وبشمل إساءة الظن في الزول ده لدرجة انه يوصف بكلمة مافي ما يتطلب انها تتكتب بالصورة دي في العنوان...


مع تقديري

تحياتي ياسر

***

وحذر صالح، في تصريح لوكالة أنباء الشرق الأوسط، الأربعاء، من "خطورة استخدام قطر الآثار السودانية ترويجيًا، بعد حصولها على حق إدارتها، لتكون بديلا للسائح الأجنبي عن الآثار المصرية، لاسيما وأن السمات التاريخية لتلك الآثار لا تختلف كثيرًا عما هو موجود في مصر".

***

شوف الأنانية وتحقير الغير
طيب إذا آثارنا لا تختلف عن آثاركم ، وين نوديها يا تور الله في برسيمو
برافو قطر
والله لو قطر إشتغلت بجد ، سائح واحد بعد دة ما حيروح مصر


دمتم

استاذنا ابو جهينة..

هي الانانية المصرية التي نعرفها وحب الذات...

واضيف لها التفاهة...

مع ودي

جاء فى صحف الأمس أن السلطات المصرية اوقفت اجراءآت افتتاح معبر قسطل الحدودى بين مصر والسودان والسبب أن مكاتب الجمارك السودانية تعدت الحدود بما مقداره 60 متر ..نعم ستين متر داخل الحدود المصرية مما أستدعى السلطات المصرية لأيقاف اجراءت الأفتتاح الآنفة الذكر حتى يتم تعديل وضع مكاتب الجمارك بما يتطابق مع الحدود الدولية . المصريين يحتلون حلايب ويتمددون عشرات الكيلومترات داخل الحدود السودانية عبر أرقين بل ويمنعون الصيادين السودانيين من الصيد فى بحيرة النوبة التى تقع داخل الحدود السودانية بينما تمتنع عن فتح معبر حدودى كامل لمصلحة الشعبين من أجل حجة مستفزة أكثر منها حجة قانونية....تانى شنو ليكى ياحكومة ؟ وفلتعش وحدة وادى النيل !!!!.

هم كذلك دائماً قلقو..

ويجب معاملتهم بالمثل..

كفى تراخي وتصغير خد..

مع ودي

الاخت مريم بت الحسين

هل اصبح المصريون اوصياء علينا؟؟

هي مواردنا ...نبيعها ...نهملها نستغلها متى شئنا..

وهل معارضتي للحكومة واقراري بفسادها يجعلني اقبل تبجح مثل هذا الدعي؟؟؟

لا والله ...

مع ودي

الاخ حسن

تحياتي

يجب علينا ان لا ننسى ..

والمؤسف ان المعروف لم يقابل بمعروف من المصاروة..


مع ودي

Quote: شكلك كنت مغرمه بالمسلسلات المصريه شيد وما بتقبلي باي شي في المصرين كحال معظم نساء السودان لاسف

الاخ عبدالعظيم مكي.... اها شفته التعميم بعمل شنو!!! انا بالذات ما عندي اي علاقة بالمسلسلات على إطلاقها، وكرهتي الشي يخليني اتمسّك بيه ويقيد وقتي .... بالتالي ما اعتقد انه اي زول يقول رأي ايجابي في نقطة محددة في موضوع البوست يجوز عليه التعميم ده (قصدي انه يكون بحب المسلسلات المصرية يعني)... وعشان اكون صادقة جداً... الايام دي متابعة مسلسل في Dubai One اسمه The Tudors.. وسبب متابعتي ليه هو شغفي بي تاريخ ملوك بريطانيا واهتمامي بالجانب ده... لولا ذلك، ما ممكن تلقاني في مسلسل من غير فايدة... باقي كلامك عن عدم موافقتك لي في الرأي، طبعا من حقّك...

Quote: هل اصبح المصريون اوصياء علينا؟؟ هي مواردنا ...نبيعها ...نهملها نستغلها متى شئنا.. وهل معارضتي للحكومة واقراري بفسادها يجعلني اقبل تبجح مثل هذا الدعي؟؟؟ لا والله ...

اهلا يا ياسر...
مافي حد اتكلم عن وصاية ولا على ما يترتب عليها... وبرضه لو المصريين بفتكروا انهم من حقهم انهم يكونوا اوصياء علينا فده برضه غلطنا احنا وغلط حكومتنا الختتنا في الحتة دي...لكن نرجع لنقطتي القلتها، وقلت فيها انه كلامه صحيح موش معناها اني بأيده... كلامه صحيح بمعنى انه هو قال الحق، حتى لو أريد بيه باطل ... وحقو كلامه ده ناخده بجدية.. موش نوظف اسلحتنا في الاتجاه الغلط... الزول ده حلل تحليل صحيح، وانا عارفه انه مجرد اني اقول انه هو محق بالنسبة ليك ما مقبوله... لكن المثل بقول خذو الحكمة من أفواه المجانين.. الراجل ده بي تحليله ده، وصل لينا معلومة حقو الناس تفكر فيها.... وفي النهاية لو طلع لو نزل هو عالم بكتب تحليل، يا أخطأ يا أصاب... المصيبة لو اترتب عليها فعل... بعداك ممكن نقعد نقول كلام زي كلامك ده عنهم....

انا ضد التعميم... والبقول المصريين (.....) أو كذابين أو إلخ من الكلمات... ما يزعل لو قالوا السودانيين كسلانين... أو اي تعميم آخر....

تحياتي

قطر تحاحي
وتشرك
جني

Quote: يا اخوانا دا رزقهم واكل عيشهم الوحيد وطبيعى يكونوا حريصين مافى حد ينافسهم اللوم علينا نحنا .. قرون طويلة وليس سنوات او شهور ماذا فعلنا من اجل اثارنا وصناعة السياحة عندنا ؟؟؟؟

سلامات ياسر ..

في واحدة من زياراتي السياحة لمصر القروب بتاعنا كان فيه عدد من الكويتين ..
لما وقفنا على تابوت توت عنخ آمون المرشد السياحي أشار للتابوت وقال من الذهب الخالص ..
رديت عليهو بتلقائية كلو من السودان ..
المرشد سكت واحد من الكوايته قال ليّ باستغراب صدقا ؟
قلت ليهو نعم ودي مسألة مسجلة في النقوش الهيلوغروفية ..
لو السودان دولة تهز وترز مش كان سكت على آثاره المبعثرة في العالم بل كان عمل على استردادها قطعة قطعة..
انتو فاكرين هويتنا ضاعت من شوية ؟

الاخ عبد العظيم من الفيسبوك

Quote: وين ردك علي باقي الكلام وتناقضك الباين

ردّي ليك كان

Quote: باقي كلامك عن عدم موافقتك لي في الرأي، طبعا من حقّك..

وده في تقديري كافي جداً...

تحياتي

لو صدقت قطر
لساهمت
في استغلال السودان لكامل حصته 18 مليار متر مكعب من المياه وذلك بتأهيل القطاع الزراعي وقتها ستعرف مصر أن الله حق.
السياحة فنادق ومطاران
وبنية تحتية
لا يمكن للسودان منافسة مصر.
لا تضحكوا
على انفسكم قطر بعد أن فشلت الصفقة مع مصر جاءت للسودان.
قطر لا تفعل ما يغضب الغرب
لن تستثمر في الزراعة
وتفتح على نفسها باب جهنم
تأهيل مشروع الجزيرة يستهلك 8 مليار متر مكعب!
جني

الأخوة الكرام سلام
يا جماعة الخير المصاروة ديل أحبابنا .. أبناء النيل.. (خلوا بالكم من أبناء النيل دي الحالة أنا غرباوي) ما تضايقوهم .. خلوهم يتجدعوا زي ما عاوزين .. مش السودان هو الحديقة الخلفية لمصر... أليس السودان جزء من مصر أم الدنيا؟؟ لأول مرة أشوف الجزء أكبر من الكل... لكن مقبولة عشان جاية من حبايبنا أولاد بمبة.
خلوا روحكم رياضية وأدوهم الدايرنو ..
أليس فاروق هو ملك والسودان.. يعني مافي فرق كتير.. مش محمد نجيب سوداني حكم مصر .. والسادات حبوبته سودانية وحكم مصر؟ ما فوقا حاجة .. أدوهم العايزنو .. وسد الألفية يمشوا ناس القضارف يكسروه بالطوريات والأزمات والكواريك ..
وخليهم يشيلوا حلايب وشلاتين .. وأبو رمادة عشان الرماد يكيل حماد السوداني...
وخلو مصر للطيران تهبط 5 مرات في اليوم في مطار الخرتوم والسودانية تنزل مرة واحدة شهرياً في ميناء القاهرة الجوِّي..
خلوا المصريين يدخلوا السودان بدون تأشيرة وأدوهم الحريات الخمسة (الخامسة دي من عندي عشان هم حبايبنا) ومافيش سوداني يمشي مصر من دون تأشيرة.. ولازم يتمرمط في القنصلية بشارع الجمهورية حتى يدوا 10 تأشيرات دخول يومية
كفاكوا ولا أزيدكوا؟....
تحياتي

كبـّاشي الصـّـافي
(العوج راي والعديل راي) .

الشكر لكل المتداخلين على الاضافات القيمة والمرور الانيق...

ولكني اؤمن ان المصاروة لا ينظرون للسودان إلا من منطلق مصلحة بلادهم...

ونحن للاسف الشديد ظللنا فترة طويلة منذ الاستقلال نخدمهم في هذا الخط بغباء او بخبث او بطيبة زائدة عن الحد...

ولم نجني إلا السراب...

ولذلك علينا الان ..لا اتحدث عن حكومة او معارضة...علينا جميعاً ان نلتفت لمصلحتنا الوطنية التي اضعناها كثيراً...


مع ودي

السلام عليكم


ديل شعب ادمن النفاق وعدم الايمان بان الرازق هو الله وليس قطر او امريكا او غيرها