أتحدى أي عضو في هذا البورد لو ما نزلت منو دمعة في هذه الغنية

كسبت التحدي يا كوستاوي
كسبته بـ ( غزارة )







______________

يا يمة رسلي لى عفوك ينجيني من جور الزمان

تحزير:
إن داير....كوستاوي ما يكسب التحدي
ما تعاين للفيديو


..............
أنا غايتو ....
مبروك كوستاوي كسبت التحدي

.
يااااااا يُمَّه .. رسِّلي لي عفوكِ ينجيني من جور الزمان
إنها تدفع ذلك الحزن الدفين إلى السطح ، وتُثير كوامِن الشجن الساكِن فينا !!

بكينا يا كوسـتاوي !! تاني داير مننا شنو ؟
شكراً كوستاوي

دمعة يا كبير

دمعاتي شالن وينزلن الله يحفظ امهاتنا جميعا

Quote: دمعة يا كبير

الباوقه اخرررررررررررج ول اجيب ليك فيديو السفه كااااااااااااك

القلوب مليانه حزن يا كوستاوي و الدمعة قريبة ... نحن شعب عاطفي لدرجة كبيرة تجاه انفسنا وتجاه الاخرين وهذه محمده نشكر ربنا عليها رغم انها تتعبنا
عبدالكريم الاحمر

قبلت التحدي ودخلت البوست بغرض افشال خطتك وتوقعاتك يا كوستاوي ولكن فشلت تماما في المحافظة علي التوازن .......وبكيت حتي فُضحت وفضحتني دموعي اي والله .......ثم قلت مرة اخري لماذا اكتب هذا وانا الزول المتربي علي اخفاء لحظات الضعف دعك من كتابتها .........ولكني في الاخر توكلت واهو بكتب ......صادقاً
شكراً يا كوستاوي

أنا شخصيا ما نزلت مني ولا نص دمعة
وقايل البغني ده مرة في الاول
هو مالو مميع صوتو كده؟

مع كل التقدير والاحترام لأمهاتنا

Quote: أنا شخصيا ما نزلت مني ولا نص دمعة وقايل البغني ده مرة في الاول هو مالو مميع صوتو كده؟ مع كل التقدير والاحترام لأمهاتنا

شيخ محمد جلال تحياتى مامتذكر فى حديث شريف بيقول تلك رحمة لمن الاعرابى استغرب من الرسول الكريم قاليهو (أتقبلون ابنائكم؟؟ أو لمن دمعت عينا روسلنا الحبيب صلى الله عليه وسلم فمقاييس الرحمة تختلف بين الناس وطبيعة سكناهم اهلنا ناس النيل حنينين شديد ودمعتهم قريبة واهلنا رعاة الابل اخذو خلسة شيئا من قوة صبرها وتحملها فلا تثريب عليك لو لم تدمع ولاكن اكيد قلبك خفق او يقشعر بدنك احيانا لذكرى حبيب او فقد هم حفظ الله اهلك واحبابك وجميع المسلمين

ودمحمود

Quote: أنا شخصيا ما نزلت مني ولا نص دمعة وقايل البغني ده مرة في الاول هو مالو مميع صوتو كده؟

ما نزلت منك ولا نص دمعة لأنو قلبكك ميت
لو ما قلبك ميت كان بقيت وهابي
إنتو ناس تكفير و قتل و دم
بالتالي نزعت منكم قلوبكم و أستبدلت بالحجارة الصمداء

و وصفك لصوت ود جبارة بالمايع و يشبه صوت المرة
لا أستغربه منكم لأنكم لا تحترمون المرأة أصلا

فماذا ننتظر منكم?
و نحن لمن نستمع للإبداع الفني لا نفتش في اللباسات عشان نعرف نوع المبدع male or female....دا only في فهمكم
الله يشفي
و تحياتي للأستاذ المبدع ود جبارة

ياكوستاوى
الامام الغزالى بقول:
من لم يهزه العود واوتاره والربيع وزهاره
فاسد المزاج ليس له علاج

يا كوستاوي انت زعلت وللا شنو :)
انت مش فاتح موضوع ومعلن تحدي؟
وانا قبلت التحدي وقلت ليك ما نزلت مني دمعة
اها تاني الزعل في شنو؟!
رأيي في المغني هو رأيي الخاص وليس مدعاة لكل هذه الثورة
ومعظم الشعب السوداني رايو معروف في من يرقق صوته

الحمد لله بنتأثر ونخشع بالقرآن الكريم والمواعظ وهو المطلوب
أتمنى ان نتفقد قلوبنا في هذه المواضع

اللهم ارحم الفنان الراحل محمد جبارة، محمد جبارة فنان ملتزم خلوق وصوته خلقه الله بهذا الصوت فهو لا يرققه والقرآن نهى عن السخرية
محمد جبارة غني اغنيتين لن ينساهم الشعب السوداني هذه الاغنية واغنيته الاخرى الطيف رحل خلاني
و الاغنيتن شديتي الالتزام العائلي و الاخلاقي و تدعوان لاجمل ما في الانسان حسن الخلق مع الام و الصديق

اغنية الطيف فيها حس ايماني عالي بالقدر وتتحدث عن الصداقة
(لا لا تقول لي كدي استناني أمشي وأجيك باكر يبقى أنا ما ألم فيك تاني مين عارف المصاير)
اللهم ارحم محمد جبارة ويكفي ان جميع السودانيين قد اتفقوا عليه وهم كانوا اكرم الناس اخلاقا واحبهم لنبيه الذي دعا لمكارم الاخلاق
اللهم اجزي السودانيين خيرا وخفف عنهم فقد كثر بلائهم وابتلائهم بمن لايخافك ولايخشى الله فيهم يرون الصوت الجميل المترنم كفر ولا يرون في قتل النفس التي حرم الله الا بالحق من باس
---------
نزلت دموع كثيرة يا كوستاي و كسبت انت التحدي

تحكي اغنية الطيف فقد الشاعر لصديقه في حادث حركة بعد ان اتى لزيارته بعد غياب ووجده مسافرا فتواعد ا على اللقاء بعد ان يقضي احدهم غرضه بسفر قصير فكان القدر اسرع

حتى الطيف رحل خلاني ما طيّب لي خاطر
أما النوم أبا وجافاني وأصبح داجّي ساهر
قليل يا طيف أقيف وأرجاني وين فايتني عابر
شن حارس وراك أنا تاني ياني معاك مسافر
لا لا تقول لي كدي استناني أمشي وأجيك باكر
يبقى أنا ما ألم فيك تاني مين عارف المصاير
هاك اسمع رنين ألحاني وأبقى معاي سامر
خفف لي قليل أحزاني ياما أنا عشت صابر
شوف كيفن يسوي زماني ديمة علي جاير
آه مر العذاب وراني سهمو في قلبي غاير
شوف الليلة كيف بستاني دا الكان باشّي ناضر
من حر السموم بيعاني طيرو يفر يهاجر
جفّ يبس صبح صناني لافح حرو كافر
عدمان الضليل سواني مجنون قالوا شاعر
كل ما تمر تعدي ثواني منو اسراب تغادر
رحلوا الفيهو صر وحداني نازل ومرة سادر
أحوم أرجع أصد لبكاني مقطوع راسي حاير
وين أحبابي وين خلاني آه يا الله قادر
ما عارف العلي تراني فوق كرعي ساير
وأسكت أسوي في أوزاني أشعار مالا آخر
وإت ياطيف عليك أحزاني ليّ شوية كابر
عشان خاطر قليبي عشاني لحظات بس تخاطر

عايزة فوق

عايزة فوق

أتفق مع الأخت نازك بس أغنية الطيف يغنيها محمد كرم الله رحمة الله عليه

فوق

شكرا اخي شمس الدين على التوضيح..... ويبدو انني خلطت بين محمد جبارة و محمد كرم الله رحمه الله وأطال الله عمر الفنان محمد جبارة

عزيزى نصر الدين
تحية طيبة

الأغنية مؤثرة .. خاصة للمغتربين، وهى على لسان إبن يناجى أمه
(طبعاً أنتو عتتو فى الغربة ما متابعين الجديد)

أها أديك ال Version الجديد للفنان الشاب محمد النصرى
وهنا الأم تناجى إبنها ... وقيل قلبى على ولدى وقلب ولدى على حجر
الأغنية فيها تصوير بديع بالكلمات للحال ومحيط الأم، وقناعاتها ويقينها
نشوف مقياس الدموع .. كيف

بارك الله فيك ياأخي كوستاوي
مش بكيت .... جعرت .... واستغفرت .... ودعيت لأمي وأبوي بالرحمة ....
ودعيت لكل أصدقائي ومعارفي الذين رحلوا بالرحمة .... ودعيت لأموات
المسلمين والمؤمنين جميعاً بالرحمة .. كل ذلك بفضل هذا البوست الذي
ذكرني بأمي التي رحلت .. اللهم أرحم محمد جبارة واغفر له .. واللهم
أجزي صاحب هذا البوست الذي تسبب في هذا الدعاء خيراً .. تحياتي
وتقديري ....

Quote: فماذا ننتظر منكم? و نحن لمن نستمع للإبداع الفني لا نفتش في اللباسات عشان نعرف نوع المبدع male or female....دا only في فهمكم الله يشفي و تحياتي للأستاذ المبدع ود جبارة

نعم خالص التحايا والتقدير للمبدع محمد جبارة
وكل مبدعيين بلادي
وتحايا خالصة لكل بحور المودة
ولمن فارقن الدنيا الفانية
الرحمة والمغفرة

نعم .. أغنية حتى الطيف رحل خلاني للراحل محمد كرم الله عليه رحمة الله
طبعا أنا عارف المعلومة دي وهي معلومة قديمة جدا جدا (ركز في قديمة جدا دي)
بس أبيت أقولا عشان ما أسمع قيل وقال
الله يستر حيدر الزين ما يمر بالبوست ده :) متهمني إني سلفي متستنير ^__^
طبعا محمد كرم الله تاب من الغناء عشرين عاما وكان يؤذن في المسجد ويؤم الناس أحيانا وأطلق لحيته
ولكنه في آخر سنة من حياته غنى مرة أخرى .. نسأل الله له الرحمة والمغفرة ولهذا الفنان وجميع موتى المسلمين

هوي يا ناس والله الغناء حرام حرام حرام .. بس دي معلومات وطرائف وأنا بونس فيكم ساي

Quote: سلفي متستنير ^__^

اتوقع ان يكون الاخ محمد جلال سلفي " متسنير"
وليس سلفي" مستتر"
وله كل الود

الله يسامحك يا كستاوي

انا بكيت……وحقيقي ليس للاغنيه و تفاصيلها……بل لذكرياتي معها….

وابي يحب الاستماع يوم الجمه قبال الصلاة …….يصاقر لك امي امام المبطخ و يدور مسجلاته…...

وتعلمنا منهم ان نسمتع لكل فناني السودان وردي و احمد المصطفي و عثمان حسين و الجابري و كابلي ووردي وصلاح ابن الباديه….و…..والخ

واذكر حينما تاتي اغنيه مثل هذه مغرقه في محليتها يتبارينا (امي و ابي ) ب بشرحها لنا.

ولم يكن الكلام الا انه بيئات سودانيه متنوعه…..فكنا نسعي لان نفهم مثلا كلمة (متكلفته) بهذه اللكنه الشايقيه المحببه.

تماما كما نسعيي لاستيضاح يعض كلمات ( آدم شاش ) لما يفتحوا مثلا (فنجان جبنه يا بنيه) !!

كان ذاك السودان كله بتنوعه ملكنا…..وكنا نحب كل اغانيه و ثقافاته…..ومحزن اين صرنا.


الاغنيه ظلت امي رحمها الله تبكي فيها لانها تذكرها امها التي لم تراها……

رحمهم الله جميعا ورحم المبدع محمد جباره الذي انطلق بهذه الاغنيه لكل التنوع السوداني و نقل الطمور لثقافات لم تعرفه لكنها صارت تطرب له.


كسبت الرهان يا كستاوي.

اللهم ياكريم ارحم امي زليخا محمحد الشيخ واجعل قبرها روضة من رياض الجنة وكل امهات المسلمين.

لدي ذكريات جميلة مع هذه الاغنية. وودجبارة ربنا يديهو العافية والرحمة لمحمد كرم الله الذي ابكانا قبل ودجبارة

شكرا ياخردة

يعدين انت يا مستهبل بعد العمر دا كلو عندك موية في عيونك بتنزل

قال دموع

انت بعد دا بتنزل مواد جيرية وجبصية فقط

دموع في عينك

يا سغيرون

الاكرم كوستاوي تحياتي

كسبت الرهان والله بالرغم من اني حاولت امسك نفسي..

الله يرحم الوالده ويتقبلها فقد فقدتها العام السابق وانا اعمل قريب من القطب المتجمد الشمالي..
ربنا يرحم كل الامهات ويتقبلهم في اعلى الجنان

Quote: أنا شخصيا ما نزلت مني ولا نص دمعة وقايل البغني ده مرة في الاول هو مالو مميع صوتو كده؟ مع كل التقدير والاحترام لأمهاتنا

نعمل ليك شنو كان قلبك حجر او ماعندك قلب اصلا..
الرحمه المنزوعة من قلبك دي هي التي ستدخل الناس الجنة مش زي سواتك دي ..
والشيء المحير احترامك وتقديرك للامهات وده كلام بس عشان تكف بيه العين عن تحجر قلبك يعني نفاق
ربنا يهديك ويحنن قلبك
ولكم مودتي

أغنية بحر المودة
للشاعر السر عثمان الطيب
ذلك الشاعر الشفيف الإنسان من الأغاني التي عمت كل السودان وحبها الكل
يحفظها كل الشعب عن ظهر قلب
فهي أغنية خالصة في أعز ما لدينا كلنا الأم إن كانت على قيد الحياة
أو انتقلت للدار الاخرة عليهنَّ رحمة الله جميعاً

أغنية تشم فيها رائحة الامهات
تبكي الام والأبن في آن واحد

اخي الاصغر له قصة معها
كان يدرس ايامها في دولة سوريا الشقيقة وأنا ادرس في جمهورية المجر
كنا نسافر من العطلة للعودة لديار الدراسة يجهزنا اخينا الاكبر تذكرة سفر
ذهاب اياب نها السنة
في السنة الاولى سافرنا بعد شهر ونصف جاء محجوب اخي الاصغر راجع السودان
سأله اخي الكبير رجعت ليه بسرعة ؟
قال انه امس سمع اغنية بحر المودة وشد رحاله عائد
ومن يومها حرم من تذكرة ذهاب اياب
كانت ترسل تذكرة الاياب نهاية السنة بالتلكس
ههههههههههه

فوق