إن طرنا وين ووين سودانيين وده البجمعنا وياهو عزنا ....

تحية طيبة ..

برة البلد

ماعندهم شغلة بي ات من ياتو قبيلة ولا ياتو حتة
ات سوداني
ومجاراة للماثل في فيديو الراعي السعوديين ماقالو الزول ده من قبيلة كده ولا كده
ولا قالو من المحل الفلاني

قالو راعي (سوداني ) بعداك التوم والشمار وعدم الشغلة العلم المشاط خلانا نجيب اسم الحتة المنها وامكن قبيلتو
البلاقيك في بلاد العرب ديل بعرف انك زول زول وبس
وده الطبيعي والمفروض يحصل والحاصل في حتات كتيرة

,.,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

في السودان في اي مكان شرق غرب جنوب شمال وسط

لو مريت عابر سبيل ما بسألؤك من جنسك شنو ولا لونك شنو

قبل السلام بقولولك حرم تنزل على الديوان

في عموم الثقافة السودانية اكرام الضيف واجب ما بعدو واجب

..............................................

في الحلال تلقى الحروم في شجرة النيم متلمات في جبنة

كل القبائل لاميهن ودع وفنجان جبنة

ماف واحدة تارة غادي من التانية البتحب ينادوها باسم قبيلتها وكده

بتلقى فلانة الحلاوية فلانة الجعلية فلانة الكاهلية فلانة التاموية فلانة الدنقلاوية وووووو الخ

والبينهم عامرة لحدي هسي

..............................................................

في الخرطوم اللامة الخلوق تلقى زول الجزيرة صاحبو من الفاشر

وزول دنقلا صاحبو من كوستي

وزول طوكر صاحبو من شندي

وزول الابيض مخاوي زول سنار

وهكذا

وخوة جد خوة رجال بالصح واقعين واقفين سوا ما بفرقهم الا الموت



...............................................................

القانون الموجود بحاسب كل سبة عنصرية
والفاعل بتخت في الرج زي الما حصل شئ زي الزول البسب الدين
الدولة رغم انها ساهمت كثيراً في اشعال نار الفتنة الا انها لا تقر اي قانون للتمييز

ولو عاينت لتشكيلة الدولة فوق بتلقى كل او غالبية القبائل فيها
يعني ما يصدر من الدولة يتحملها القائمين بامر الدولة لا المجموعات السكانية التي ينتمون اليها
ولو قلنا نحاسب اي زول منهم وقبيلتو واطاتنا صبحت وصبحت يعني فرت لا قدام (لانو بكده بنحاسب كل او غالبية قبائل السودان)

..........................................................................................

ما دعى لذلك

كل يومين بجي بوست وفيهو البخلي الزول زي الطاعناهو شوكة في اباطو
بوستات تحير ياربي الناس البتكتب فيها دي كانت في السودان او حاليا قاعدة هناك
البقولوه ده نهائي ماف (ونهائي ماف ما زي بتاعت الجداد الالكتروني داك) دي الحقيقة

الناس هناك جارية وراء لقمة العيش وعارفة الحاصل عليها ما من الله من الحكومة الظالمة

اها بالمعاينة الهنا وفي حتات في النت تانية والواقع الفي الغربة البرة دي غيروبعيد تماماً
امس القريبة دي غشيت شباب علي الايمان مسافة بلد كل واحد والتاني في السودان اقلاها خمسة ساعات
كلهم قاعدين في فرت صحن هيل عدس ودورو الوست وضحك ما ليهو حد فالكل سوداني


..................................................................................

اخيراً

لست من الناصحين لاحد العقل في راسو بعرف خلاسو

واصابع اليد ميهن واحد

لو قعدنا سودانيين بس الحبة ما بتجينا
وبعدين شن الفائدة من النطاح

فالوطن اولى بمجهوداتنا لا قبائلنا


الله يعدل خطواتك ويديكم الفي خاتركم


وشكراً

العنصرية الموجودة في سودانيز ماعندها اي علاقة بالوطن
الناس همها لقمة العيش والعلاج والهدمة

Quote: العنصرية الموجودة في سودانيز ماعندها اي علاقة بالوطن الناس همها لقمة العيش والعلاج والهدمة

صدقت والله ياخوي



اسعد الله صباحك الحبيب ود ابسن