النمتى معروف ... الجمتي يطرشنا و الله

السودان تعدد ثقافى
الترزية الذين يصرون على تفصيلة واحدة
بضاعتهم لن تجد سوقا

فى انتهاك واضح لحقوق القراء فى الفهم
الصافى كباشى يجهجه قراء المنبر بمفردات كردفانية لا يفهمها ناس البحر
بكل حزم نطالب سيد الحوش بالزامهم بالترجمة على الشريط

الأخ أحمد حامد صالح بعد السلام
1- أنا كتبت النمتي لكن الزول صاحب البوست كتب الجمتي. الحرف المنطوق هو يجمع بين الجيم المعطشة – مش بتاعة حناكيش الشهادة العربية- والباء ولكن طريقة كتابتها صعبة ويمكن نطقها بسهولة. عليه أعتبر الكلمتين صاح.
2- بمناسبة الترجمة .. التِعليم بقى بالقروش يا صديقي لو كان كلامك دا زمن وزارة المعارف بتاعتنا القرينا فيها ممكن نترجم ليك مجان. لكن التِعليم الآن بقى بالقروش عشان كدا الترجمة عاوزة كاش.. لكن برضو ما بطال تتعلم لغات اجنبية كما تقول حماتي عندما نتحدث معها باللهجة البقارية الصرفة بتاعت كو وواي ويا بتطمِّي.
لك التحية وحول لينا بالوستن يونيون عشان نديك الدرس الأول.

تحياتي

كبـّاشي الصـّـافي
(العوج راي والعديل راي)

سلام صاحب البوست و الزوار،

Quote: النمتى معروف ... الجمتي يطرشنا و الله

انا كتبت في البوست مقولة مشهورة عند الجيش "اثبت كما ثبت الجمتي في جبل عطرون"
انا كتبت المقولة اعلاه بناءا على ما سمعتو و لم ارى المقولة مكتوبة من قبل و بالتالي اتوقع
اي زول سمع المقولة او عارف قصة الجمتي في جبل عطرون ان ينطق الكلمة كما ينطق
كلمة انانيا.

ربما كان افضل ان اكتبو بالنون زي النون في انانيا.

تحياتي.

تحياتي لك احمد والغالي كانتونا

النمتي او الجمتي
كلها واحد لو سمعت نكتة القاضي مع الشماسة الاختتموها ب " والجمتي كبس "

اخى ناصر

انت قايل ناس الخرتوم بعرفو النمتى خليك من الجمتى
ادعوك يا ناصر بالانتصار لناس الخرتوم و الشهادة العربية
و ضم صوتك لصوتهم .. لا للتهميش ... تسقط تسقط لغة الدمبجويا

مع كل الود و التحية

اخى سمير

كده اولا اقبل اعتذارى فى نزع حقوقك الفكرية فى الجمتى
و طبعا انا قلت احسن اتلب من حيطة كانتونا لكن ما دام جيت براك
الغرامة تواليك ... و كباشى طلع براءة

مع كل الود و التحية

يا عزيزى يا كباشى
احسن قبيل .. . انا كنت متوقع الجمتى حاجة تانية
هسع تجى تقول لينا الكلمتين حاجة واحدة
لا يمكن ان نقبل بهكذا تفسير انها مؤامرة واضحة المعالم ...
و هناك مؤشرات اظافر من اورشليم فى الامر
باسم كل المسطحين ادين و اشجب و استنكر تفسير الجمتى بالنمتى
و كن على استعداد
لدفع اتعاب فتحنا لبوست الجمتى بدون تاخير
و تعهد بعدم الكتابة بلغة الدمبجويا و مراعاة حقوق ناس الشهادة العربية

مع كل الود و التحية

الأخ أحمد حامد صالح بعد السلام
أكيد إنت لم تسمع كلام الراجل البحاري القال هو قعد مع البقارة وتاني ما في كلمة بتفوت عليه.
ركبوا في مجموعة للذهاب لبيت عزاء في فريق آخر. عند مفترق طرق سألوا الرجل الذي يعرف الطريق المؤدي للفريق الذي يقصدون. هنا رد الرجل قائلاً: (كِن كي كوكو .. وكِن كي كوكو). واسقط في يد صاحبك البحاري.. فرد قائلاً: يادوب عرفت البقارة برطنوا وما بتكلموا عربي!
الترجمة بعد محاولتك لفهم وشرح العبارة وماذا تعني بعربي عيال البحر.
تحياتي

كبـّاشي الصـّـافي
(العوج راي والعديل راي)

نضم صوتنا لصوت الاخ احمد ونطالب بالترجمه لغير الناطقين بها

تحياتي لك اخ احمد وللمتداخلين

Quote: كلا ندورو واكا شيئ

؟؟

(كِن كي كوكو .. وكِن كي كوكو). ]

يا اخى الفاضل ك كك ككو دى لو قام سيبويه ما يفهم حاجة
اتصلت بناس ام علوان و تلو و ام برمبيطة بدون نتيجة ل ككككككوككك بتاعتك دى


ياخ اكتبوا لينا عربى

اخى العزيز الباقر
كيف اخبارك

واحدة من اكبر اخطاء المؤسسات التى تقود حركة المجتمع السودانى منذ الاستقلال
اصرارها على صهر المجتمع فى بوتقة واحدة بلون واحد و لسان واحد
فات عليهم ان التعدد اثراء و الاختلاف غنى ...

تراث الجبال مميز ورائع لكن للاسف مهدد بالاندثار و التراجع
ناس كباشى الواحد فيهم من يجى البحر ينسى المردوم


مع كل الود و التحية

حماد الطاهر

علك زين

كده ساعدنا فى ترجمة دمبجويات كانتونا


مع كل الود و التحية

أها يا أخوانا ..برضه ما وريتونا النمتي والجمتي ديل شنو ؟!

مع إني فهمت ( كن كي كو كو ) ههههههه
أعتقد يعني ( كان كدا كويس كويس ) كدا ولا ما كدا ؟

اختنا العزيزة امنة مختار
دبايوا
كتبت امنة
مع إني فهمت ( كن كي كو كو ) ههههههه
أعتقد يعني ( كان كدا كويس كويس ) كدا ولا ما كدا ؟
--------------------------------------------------------

يبدو انك بحارية مسطحة فى لغة الجبال
كن : اذا
كى : هذه الناحية
كو : لا

ليصبح المعنى : اذا هذه الناحية لا لا
كان ما يجى كباشى يطلعنا بيش

مع كل الود و التحية

Quote: يبدو انك بحارية مسطحة فى لغة الجبال كن : اذا كى : هذه الناحية كو : لا ليصبح المعنى : اذا هذه الناحية لا لا كان ما يجى كباشى يطلعنا بيش

االأخ احمد حامد صالح بعد السلام
إنت قربت للحل الصحيح لكن خرمت غلط.
كلمة (كُوكُو) – كلمة واحدة- وتعني يلاكم. لا تنطقها كما ينطق الاسم بتاع حلة كوكو.
معنى الجملة: كان كدا يلاكم .. كان كدا يلاكم. أي أن الطريقين يوصلان إلى روما كما يقول الطليان.
طبعاً كلمة (كو) لوحدها تعني لا وهي إختصار لكلمتي (كلا والله). يعني نحن بنعرف الإختصار قبل العنقليز ما يجيبوا قصة أوكي OK
تحياتي

كبـّاشي الصـّـافي
(العوج راي والعديل راي) .

سلام يا اصحاب البوست

أغلب ظني أن الحرف غير عربي و هو في الغالب مستمد من لغات السودان و قد يكون حرف نوبي أيضا

حسب ما اعرف ان الحرف ينطق بادغام النون و الجيم في حرف واحد

لذا تصبح الكتابة المنطقية للكلمة اعلاها

النجمّتي،
أيضا يرد الحرف في كلمات تانية مشابهة
كقولهم شناة النجيتو التي كانت تاكل في كدوبها.

كنت اذكر بعض الكلمات التي يرد فيها هذا الحرف العجيب (نج)
لكنني سأحاول ان اتذكرها لاحقا

لو سألنا ناس محمد جلال محمد هاشم بجيبو لينا اصل هذا الحرف من قرونه

الاخ امجد مرحبا

رغم اننى لست متخصص فى مجال اللغويات
اعتقد ما ذهبت اليه حول < نج > صحيح فى الغالب نطق نوبى

او
Nilo-Saharan language family
بشكل عام
ففى لغة الصنغاى التابعة لهذه المجموعة نجد فون < نج >
على سبيل المثال الام : نجا

لك الشكر و عبرك التحية لاخونا محمد جلال

والله يا جماعة أنا ما فاهم بوستيكم ده ،،، ولكن سأدلو بدلوى فى هذا المجال لأننى أسمع كلمة النمتى وما شاكل ذلك ،،

النمتى هو فى لغتنا النوبية الرصينة هى ( الكوتى مانج ) وهى حشرة لعينة يحلو لها التغذى فى المنطقة الطرية من أزن الأنسان حتى تعمل منها جروحا وخربشات ،، بعضهم يستعملون حاجة أسمها ( الكوتى مانجينق قوبا ) وهى طاقية عجيبة تحمى الأزن من تعديات الكوتى مانج

احتمال أنا فى كلامى ده كله أوووووووووووف بوينت

ماهر

Quote: بشكل عام ففى لغة الصنغاى التابعة لهذه المجموعة نجد فون < نج > على سبيل المثال الام : نجا

ده ياهو الكلام المفيد

هنالك صوت سوداني خالص لايوجد له مقابل في حروف اللغة العربية

وهو الصوت : نجا كما تفضلت

يصعب كتابة الكلمات السودانية والنوبية الخالص التي يوجد فيها هذا الصوت

اعتقد افضل طريقة للتعبير عنه باضافة الحرفين

يعني لا تكتب النمتي .. ولا الجمتي
بل تكب النجميتي

وهذا ايضا غير كاف لكنه الاقرب

كلمات كثيرة يضيع نطقها بسبب ان هذا الصوت ليس له مرادف حرفي يعبر عنه منها
نيالا : مدينة نيالا صوتها اقرب لـ نجيالا
نانا :: الاكل او الطعام نجانجا

والله اعلم

Quote: Ummoayad Moayad · الأكثر تعليقا كِن كي كوكو .. وكِن كي كوكو). كان كدا ولا كدا مابعرف . طيب جايبنك لشنو . ( كلا ندورو واكا شيئ ) الترجمة بلاش . ههههههه

الأخت أم مؤيد بعد السلام من الفيسبوك
كلامك صاح بس عكست النهاية.
الراجل يقصد لو سرتم في الطريق دا بتوصلوا .. ولو سرتم في الطريق الآخر بتوصل برضو.
كما شرحت من قبل الكلمة (كوكو) معناها يلاكم. ولكن لا تنطق كما اسم الحلة المشهورة في بحري حلة كوكو.
والتفسير الكامل للعبارة هو: (كان كدا يلاكم وكان كدا يلاكم).
تحياتي

كبـّاشي الصـّـافي
(العوج راي والعديل راي) .

الاخ ماهر
تشكر على الافادة الرصينة من اللغة النوبية فعلا المقصود هذه الحشرة اللعينة كما تفضلتم النجمتى
فحديثك كان فى صميم الموضوع
مع كل الود و التحية

الاخ وليد المبارك
كتب
هنالك صوت سوداني خالص لايوجد له مقابل في حروف اللغة العربية

وهو الصوت : نجا كما تفضلت

نعم وليد صوت نجا ... نجده عند النوبيين و كثير من قبائل دارفور

لكن للاسف لم يتم اعتماده من قبل الذين رسموا مسارنا الثقافى

فتحولت نجالا الى نيالا و نجرتتى الى نرتتى

ما عارف زى كان زمان البعض يكتبها بجيم منقطة تلاتة

مع التحية

Quote: انت قايل ناس الخرتوم بعرفو النمتى خليك من الجمتى ادعوك يا ناصر بالانتصار لناس الخرتوم و الشهادة العربية و ضم صوتك لصوتهم .. لا للتهميش ... تسقط تسقط لغة الدمبجويا

سلامات عوافي

النمتي ينشتر بكثافة في الخرطوم وخصوصاً مناطق الاشجار والزراعة
فحين كنت ازور شقيقي ببداية الالفينات بكلية الزراعة جامعة الخرطوم والتي تقع في الخرطوم بحري
كان الطلاب يضعون قطع من جريد النخل علي رؤسهم للحماية من النمتي

مع ودي
واحترامي