مسدار الوثبة

مسدار الوثبــة
===========================
وثبـــة ووثبتيــن والتالتة بــرة الــدولــة
والقافلين عليك خسرو الرهان والـجولة
يسألك الكريم رب العباد المولــــــــــي
حلــــقات المسلسل ام خطابك اولي ؟
...
يا عـــــــــمر البشير انا معترض..ما راضي
ممكن انسى ليك كل الحصل في الماضـي
الواجعني منك .وفي سبيلــو بقاضــــــــي
يا خسارة المسلسل زمنو راح في الفاضي
...
اتلاقو الجميع كل عمة تضرب عمــــة
والناس يا عمر.. آمالا كان في القمـــة
نسمع بالخطاب قلنا الحكاية مهــــمة
دا الجامعنا ليهو من العصــــــر بالذمة ؟
...
يا عمــر البشير الدولة رسبت رسبــة
و اضحت للجهــــاز .. نص البلد منتسبة
السبب القبيل خلى الخلوق محتسبة
قنبلة الرئيس طلعت اشاعة ووثبــــــة
...
يا عمر البشير حبل الصبر اتمطــى
والـسودان يسير .. إلا زي البطة
منتظرين قرارك وقلنا زي الشطـــة
يوم طلع القرار القصة طلعت نطـــة
...
يا عمر البشير الوثبة تب مرغوبـــة
نتمني العمار لارضنا المحبوبة
في عز الخريف ما تشكر الراكوبة
لـــــكن بالخطاب فعلا قلبت الهوبة
...
يا عمــر البشير هاك الكلام الواعي
البترول يطير ..سودانا ارضو زراعي
خليك للسلامة وللتقدم ساعـــي
لكن للخطاب صدقني مافيش داعي
...
يا عمر البشير ..ضيعت زمن الامــة
قلنا لقيت علاج ممكن يزيل الحمى
عاملين للخطاب قومة وشمار و هلمة
قايلنو اسكريم.. لكن طلع داندرمــــة""