دروشات...

دروشة أولي:
غايتو من الصباح الشاي مسخ علي ومسكتني غمة !
حتى الحاجات حقتنا السمحة العرب مسخوها علينا !
بالله نحنا دائما نقول العروس ووصيفاتها , يعني البنات البكونوا لابسات فساتين سمحات زي بعض ومباريات العروس زي ضلها !
هسع تاني كيف نقول وصيفة !
ست البنات.

دروشة تانية:
المفاجآت عادة سارة !
اللهم اجعله خير!
ست البنات.

دروشة ثالثة:
الرغيف كتير وكبار ونضيف واللحم هبر , والكيك أشكال وأنواع ,
والناس نضاف وملمعين ,
والفرح يتنطط من عيونهم وكل زول يستمع في اهتمام ,
والندوة عن حقوق الإنسان وبهجته ,
وأنا من ضمن الحضور المبسوطين ,
وفي الاستراحة الناس قاموا للأكل واللوغيد ,
وأنا يبقا لي سم !
والمطرة صبت فوقي !

عارفين ليه ؟؟
تم عرض الطيارة السودانية الجارينها بالحبل في مطار الخرطوم ,
كدليل لظلم الشعوب !!!
ست البنات.

ست البنات
اتصبري
الوجع في الجوف كثير
اهو الناس ترفع وتخت في راسة منتظرة مفاجأة البشير
وكمال وكمال يمسكون في خناق بعض انتصاراً لانفسهم وينسون ان ينتصروا للشعب
شفتي الوجع دا كيف

ستهم
شوف عيني بي قراصة في صحن الكوكتيل بدل من الخبز

والجاي أكبر لوكو الصبر

يا علي أخوي ,

سلام ,

الوجع نفخنا بقينا زي القربة !

حسبنا الله ,
لكن الصبر طيب, وباكر اجمل !

ست البنات

يا خالد ,

سلامين ,

وسنة سعيدة عليكم ,

ووين الحي بيك ؟

مشتاقين كتير ,

لكن الغبش ليهم رب يمهل ولا يهمل .

ست البنات.

دروشة رابعة:

.(Your heart is asking me to come, but your eyes are saying there is no way)
تلك كانت اغنية :
بقليبك تقول لي تعال وتعال, وبعيونك تقول لي لا مافي مجال ,
كما غنتها لي أسترالية تهيم حبا بشاب سوداني يبدو انه أفشى لها بعض أغنياتنا وربما بعض أسرار ثقافتنا (الدقاقة).
ست البنات.

ست البنات رغم الظروف ما تشيلي هم واتصبري وما تشيلي هم ... فعلا هي دروشات في الصميم ولكن ليس لنا إا ان نقول الجاي احلى يا ستهم ولا شنو ,,

تحياتي : ياسر العيلفون

سلام ست البنات

عمنا عبد الله رجل نكتة وحاضر البديهة وساخر لأبعد حد. بمناسبة أزمة الرغيف الحاصلة في البلد اليومين ديل قام ولده المغترب سأله:

يا با قاعد تمشو بيت الفراش بالأكل ؟
عبد الله: كيفن ما بنمشي
الولد: والرغيف بتجيبوه من وين؟!!
عبد الله: يا ولدي الصواني الفي بيت الفراش كلها ملحات بدون رغيف !!
الولد:الملحات بياكلوهن بشنو؟؟
عبد الله: كل زول شايل رغيفته في جيبو !!

إلى هذا الحد وصل بنا الحال في بلاد المليون ميل مربع (سابقا) كان الحلم أن تكون سلة غذاء العالم

الله يفرج على أهلنا الصابرين المحتسبين ويكفينا شر الجوع الكافر

صدقتي يا ست البنات

لكن كله كوم والطيارة الدافرنها في المطار دي كوم براه ..

المزيعة تضحك في قناة العربية وتسأل هل الطايرة قامت بعد الدفره ولا لساتها في الارض ؟؟


نحن غدد الخجل عندنا اتحلجت وبقت ما فارقة .. اكلي اكلك ساي ونومي عافية

جاي ادروش معاك أكان ما إشالبوني عيال المنتدي ديل

الاخ ياسر ,
سلام,
نحن شعب يستحق افضل من ذلك !
ست البنات.

سلام اخي ود بلة ,
الولد:الملحات بياكلوهن بشنو؟؟
عبد الله: كل زول شايل رغيفته في جيبو !!
غايتو دا المضحك المبكي !!
غايتو بقينا ملطشة وكل يوم مش بنرجع للخلف بل بنرجع العالم كلو معانا قرون للخلف!!
وبقت عندنا ابتكارات عجيبة بسبب الفاقة !
من زمن قدر ظروفك , لي زمن دكن رغيفك !!

الله يكون في عوننا .

ست البنات.

اخي درديري كباشي,

سلام,
(نحن غدد الخجل عندنا اتحلجت وبقت ما فارقة).

يا الله والله دا تعبير في الصميم ,

الله يفج الغمة !

ست البنات.

اخوي عبدالحفيظ أب سن ,

حبابك ,

أريتون بس ينشالبوك ساكت !

كمان بس يوهدبوك لامن تنسى النضم الجايي تنضمو !

الله يقلع الكان سبب لخمتنا وغمنا !
هسع بالله اسحاق بلة دا بس خلانا كل زول يرقع ليهو جيوب كبار لرغيف البكيات !
شفت البقينا فيها كمان!

ست البنات.

ستنا
مشتاقيين وينك وحشتنا حروفك

يا حبيبة كل اول ليه اخر
يا حليل اهلنا الله يصبرن اشتقنا للسودان ولى كل شبر فيه
الدعوات بس مافى غيرها

ربنا يرفع البلاء عنهم وياخد بيدهم
ونبل شوقنا فى اهلنا نشوفن طيبين الحنينين

يا ست البنات وستنا

لو الدروشة كده

العقل يطير

يانا المعاك دراويش للطيش