Post: #1
Title: بوبار فك الزرار (يوجد جالوص)
Author: محمد النيل
Date: 01-07-2014, 02:08 AM
سياسة البوبار وفك الزرار هى الجايبة لينا الدمار
نحنا كدا اصلاً
تجد الواحد فينا بيته من الجالوص مكون من غرفة واحدة وبرندة عرش بلد ينز موية مطر
وراكوبة وتُكُل
ومصر يعمل ليه سراميك برا وجوة
مع انو بتمن السراميك دا ممكن نبنى غرفة تانية
كله من اجل البوبار وشوفونى
تلقى الواحد فينا شبابيكو مشخعلة وعايز يعمل ليها ستاير اغلى من تمن كل الشبابيك المهلهلة وكمان بالدين!
يا سلاااام شوفونى
تلقى الواحد فينا باب الشارع تعبان وغير جيد التامين
يقوم يشترى ليك شاشة تلفزيونية مسطحة كبيرة ثمنها اغلى من تمن باب الشارع يجى الحرامى داخل بيه ويسرق الشاشة السمحة
دا كلو من باب شوفونى
الواحد فينا يكون مرتبه قدر حاله تلقاهو قدم لسلفية فى البنك كى يشترى سيارة من باب شوفونى وحق البنزين فى تلتلة
والبنك زاتو لا يدقق فى مدى امكانية فى سداد قيمة السيارة ودخل المستدين او هل فعلا هذا المستدين موظف يستحق السلفية ام لا
والبنك عارف الشخص دا ح يتصرف ويدفع ح يدفع حتى لو على حساب تعب قريبه المغترب او حتى لو يتلقى رشاوى فى وظيفته لسداد اقساط السيارة.
ح يدفع ح يدفع حتى لو لمدة سنة او سنتين وحتى لو فى النهاية فشل فى الدفع البنك ح يقلع العربية
وفى الحالتين البنك كسبان
لانه البنك بيكون شفط من هذا البوبارجى دم قلبه فى سنتين وفى النهاية البنك ح يبيع العربية بسعر مجزى ايضاً
وهناك من يسعى بأى تمن وبأى اسلوب للحصول على آخر صيحة موبايل وحق الرصيد فى تلتلة
وبوبار الزواج حدث ولا حرج
وصالات الافراح حدث ولا حرج
تلقى الواحد فينا قاشر احسن قشرة وآخر وجاهات تحلف تقول الزول دا الليلة ما اكل سخينة او فتة عدس فى الغداء
بوبار ليس له حدود
و و و و
هذا على مستوى الافراد
اما على مستوى الدولة
نحنا ما قادرين نصنع رقشة صناعة سودانية كاملة
يجوك ويقولوا ليك نحنا عملنا مصنع طيارات
وكمان من غير طيار
وفى نفس الوقت خطوط سفرية باسم السودان حاجة معتبرة ماعندنا بسبب عدم حصولنا على اسبيرات لتشغيل الطائرات هذه وبجانب الفساد المالى والادارى طبعاً
كدى النصنع اسبيرات ساى فى الاول.
بوبار الحكومة والصرف البذخى ماليه حد
والشعب رغيف الخبز فى تلتلة والسكر وضروريات الحياة كذلك بجانب الصحة والتعليم المنهار وعلو نسبة العطالة والعنوسة من الطرفين.
اما على المستوى الرياضى مثال واحد يكفى
فريق المريخ يدفع المليارات عشان يلعب مع بايرن ميونخ
ويقولوا ليك ان شاء الله يغلبنا 30 صفر المهم يقولوا المريخ لعب مع البايرن ميونخ
المهم شوفونا نحن الاحسن
ياهو دا حالنا نلوم حكومتنا والعيب فينا كلنا اضافة للحكومة طبعا
وابواب البوابير او البوبار فك الزرار ما ليها حد
|
Post: #2
Title: Re: بوبار فك الزرار (يوجد جالوص)
Author: الطيب عثمان يوسف
Date: 01-07-2014, 07:16 AM
Parent: #1
*** بوست زاد الحالة العلي ...
|
Post: #3
Title: Re: بوبار فك الزرار (يوجد جالوص)
Author: محمد النيل
Date: 01-07-2014, 07:28 AM
Parent: #2
| Quote: بوست زاد الحالة العلي |
اريتو حالك حال السرور يا الطيب
|
|