ياجماعة الخير التصوير في الاعراس ما حبابو ..

تحية طيبة

التصوير في الاعراس بقصد التوثيق (شبه مقبول) اذا كان بواسطة جهة متخصصة او شخص موثوق

لكن الشغلة المطلوقة ساي دي جابت اجل الناس وفضحت عوراتهم
زول بخش العرس وهو معزوم ليه يجي يصور في بنات الناس ويرفع في اليوتوب (التصوير في مناطق محددة من الجسم)

شابات الداخلية وفي ونسة عادية صاحبتهم تصور وترفع (والبنات قاعدات امفكو)

شاب يمسك بنات ناس مساكين يتونس ويصور وبرفع ( المرمد فرحان بالفتح العظيم ده)

.........................

نصيحة لوجه الله

في الحفلات الخاصة امنعوا التصوير حتى وإن كان من اخو العريس (في الحتة دي ماف ديمقراطية ولا حاجة)
اخواتنا الفي الداخلية الشباب الفي الرحلات ما تصوروا (لو الله ابتلاكم بي شئ خلوه قبلو ما تمرقوه )

والله يكون في العون

والله صدقت ياااخ

والبرفع الصور دى فى النت .. بكون مالو يعنى .. مفتكر روحو بطل .. ولا فنان .. ولا شنو ما عارف

زول يستبيحو خصوصياتو فى اللبس ولا الجلسه ولا اى موقف خاص
وبدون علمو يصوروه وينشروه فى النت !!

قمه الدناءة والحقارة

too late
لأنو اصبح .....ثقافة ليها ضل

هل الغلط في المصور ...ولا الغلط في البصوروهن
ولا الغلط في البسمح بالتصور

؟؟؟؟؟؟؟!!!!!!!!

تحية يا صاحب وضيوفه
وبرضو
ما تشيل صور او مقاطع فيديو شخصية في موبايلك
او رسايل خاصة
و
لا تجعل الدخول لحساباتك في النت تلقائية من الموبايل
الموبايل عرضة للسرقة والتلصص

تحياتي
كتبت أخي:
((زول بخش العرس وهو معزوم ليه يجي يصور في بنات الناس ويرفع في اليوتوب (التصوير في مناطق محددة من الجسم)))))
---------------------------
تعليقي هو :
الفرق شنو بين المشاهدة الحرة المباشرة وبين المشاهدة المصورة ؟
زول عزموه (يتفرج في بنات الناس) ويشوف مناطق محددة من (أجسام بنات الناس)
--------------------------------
باختصار شديد الما حبابو:
هو دخول الرجال الأجانب على بنات الناس
أو بالأحرى :
الغريب هو
عزومة الناس للرجال الأجانب للفرجة في بنات الناس

شكراُ للزملاء الاكارم على المرور

Quote: قمه الدناءة والحقارة

العزيز / وضاح .. ليس لها اسم غير هذا
بالطريقة دي اي حفلة يكتبوا عليها

(ممنوع الاقتراب والتصوير منطقة رقيص عروس )

الله يستر اعراض الناس


تحياتي

....

Quote: too late

العزيز / عبدو .. مش بقولوا لو جيت متأخر ما مشكلة المشكلة تصهين وماتجي تب (او كما قال المثل)
صحي والله الشغلة اتجوبكت وبقت فخر وعزة لناس عديل يعني انا صورت كم فيديو ورفعت كم
والناس بالطيبة بتاعتها بتبشر للزول البصور ... الله يستر على الناس

تحياتي

تسلم أخى الجنيد ..كلام عقلانى .

Quote: نصيحة لوجه الله في الحفلات الخاصة امنعوا التصوير حتى وإن كان من اخو العريس (في الحتة دي ماف ديمقراطية ولا حاجة) اخواتنا الفي الداخلية الشباب الفي الرحلات ما تصوروا (لو الله ابتلاكم بي شئ خلوه قبلو ما تمرقوه ) والله يكون في العون

نعم الله يكون فى العون.....ولكن ألأمر بقى شبه عادى والحذر مطلوب.

الواحد يكون فرحان بمناسبته وأهله واحد دخيل إنسان رخيص يصور وينشر..

إذا رأيته لا تتوارى فى منعه...المشكلة ما فى المشاهدة الشخصية المشكلة فى بعض الفيديوهات بتعمل ليها مونتاج سىء.

الجوالات الحديثة ساعدت على ذلك..زمان كاميرة فيديو وأنت شايفو ألأن ممكن تتصور من غير ما تشوف أحد أو تركز إنو أنت بصوروا فيك.
عموماً مرة جالس فى حفل خاص جداً مع ألأسرة الكبيرة وولد صغير ماسك جوال وبصور فيديو لفتت إنتباهى بنتى....مشيت ليهو ومسحت السجلو وإعتذرت ليهو وقلت ليهو مافى مشكلة نحن مصورين صور بنديك منها نسخة وقبل كلامى بصورة مريحة حسيت بيها وبدون حرج.

شكراُ للزملاء الاكارم على الاضافة

Quote: لا تجعل الدخول لحساباتك في النت تلقائية من الموبايل الموبايل عرضة للسرقة والتلصص

الحبيب / ود ابسن
قصة التهكير دي واردة ونحنا تبارك الله ما بنعرف كتير في التكنولوجيا دي
فبرضو ممكن تتسرق الصور والبلاوي زي ماقلت

تحياتي

.....

Quote: باختصار شديد الما حبابو: هو دخول الرجال الأجانب على بنات الناس أو بالأحرى : الغريب هو عزومة الناس للرجال الأجانب للفرجة في بنات الناس

العزيز / محمد اي سليمان

لو قلنا الكلام ده بطلعونا ارهابيين ووهابية واعداء الحرية ورجعيين وعيييك
بس في مشكلة وبقت خطيرة كمان يبقى كيف الدبارة

تحياتي


..............................

Quote: واحد دخيل إنسان رخيص يصور وينشر..

العزيز / اسماعيل عباس

صدقت والله هو كان مو (رخيس) بعمل جنس البعملو ده
والقصة دي المجتمع براهو البقدر يوقفا
ما مشينا بلد الخواجات لكن حسب السمعناهو الناس لو ماشة (ميطنق)
ولا ساترة ماف زول بصورها الا الزول البدور يصور يعني برغبتهم وديل اجارك الله
دي شغلتهم ... بس نقول شنو الفهم قسم

تحياتي