أجمَلْ ما فِيكْ ......

أجمَلْ ما فِيكْ ......

(2)

يا أرْبعطاشَر يا .....
لو مُمكِنْ:
حاولي وأبقي قَمَرْ
خَلِّي وجيهِكْ ..... الأسمَرْ داكْ
يِضحَكْ ويضوِّي غناوِينا .....
جَدْ مشتاقِينْ نضحَكْ نِحنا
نتغابى الْعِرْفَة فيْ أحزانَّا
ونغنِّي هديييييل ......

(0)

يا أرْبعطاشْ .....
يا بنيَّة وعُمرِكْ ما فاتْ يوم
أيه رأيِكْ إنِّكْ سنةْ الْخَيرْ
فالِكْ أخضَرْ
وخَطِوْتِكْ واللهْ عديلة عديييييلْ
وأْجمَلْ ما فيِكْ
مُشْ إنُّو مواجع الرُّوحْ
فَتْ مرَّة تروحْ
أو إنُّو الْغُولْ ..... وحكاوي الْغُولْ
تبراكْ يا فاطمة السَّمحَة، كَفاكْ

(1)

يكفينا تمامْ
إنُّو الأحلامْ
الفينا أبَدْ لاْ تموتْ ..... لا تفُوتْ
وإنَّو رويحاتنا الْبِتقاوِمْ
لازِمْ لازِمْ
ما تِتْداعى ويِغشاها الْخوفْ
لازِمْ يِفضَلْ جُوَّاها النّورْ
لو حتَّى الليلْ
يِمتدَّ
ويِرخي سُدُولْ الْعَتمة
كمانْ ..... وكمانْ
ماْ الْفجر قريبْ .....
أو قُولْ قَدْ لاحْ
للْبِمشوا عليهو وداخْرِنُّوا
خيرينْ ..... ويَقِينْ
وبُشارةً سَمراءْ ..... وعَزْماً صاحْ

(4)

يا أرْبعطاشْ .....
ياخْ مرْحبْ بيكْ
وحبابْ الْيوم الْجابْ عينيكْ
باِللهِ عليكْ
خلِّيكْ حِنْينَة كما الأمُّاتْ
وأبْقِيِلْنا مَطَرْ
وشَجَرْ
وطيورْ
نِيلينْ وغُناءْ
شُعراءْ وشاعْراتْ
عازْفِينْ طَمبورْ ..... وكَمَانْ
ومُزارعِيَّة
عُمَّالْ ..... وبناتْ جامْعة
وناسْ رسَّامينْ
أبْقِيلْنا بَلَدْ زي ما بنَحلَمْ
أجمَلْ أجمَلْ
أبْقِيِلنا سلامْ
ومحبَّة وخيرْ .......
ترتاحْ فيْ سماكْ روح الشُّهَداءْ
ويِنفَكَّ سجينْ ......
...... ومعليشْ،
مُمْكِنْ حاجة أخيرة:
شِيلي الْحُكَّامْ ..... كُلَّ الْحُكَّامْ
(ولو دُرْتِي السَّاسة كمانْ، ليشْ لا .....؟!)
دِسِّيهُمْ في جَرَّة كبييييرة
وفِنِّيها هِناااااااكْ
بَجْرْ الظُّلُماتْ ..... وأبعَدْ يا ريتْ
حِلْوة الدُّنيا
مِنْ غير هذي الذُّريَّة الْمَلعُونة *
................
................
................
يا أرْبعطاشْ .....
جَدْ مرْحبْ بيكْ

عصام عيسى رجب – الْخَميس 2 يناير 2014 م
_____________________________________________
* يقولُ "أمل دنقل" في قصيدتِه (تعليق على ما حدَث في مُخيَم الْوُحدات):

قلت لكم كثيراً
إن كان لابد من هذه الذرية اللعينة
فليسكنوا الخنادقَ الحصينة
(متخذين من مخافر الحدودِ دوُرا)
لو دخل الواحدُ منهم هذه المدينة:
يدخلُها حسيرا
يلقى سلاحه على أبوابها الأمينة
لأنه لا يستقيم مَرَحُ الطفل
وحكمة الأب الرزينة
مع المُسَدسّ المدلّى من حزام الخصر
في السوق
وفى مجالس الشورى

انت فنان كبير ياعصام
ولك الود

الفنَّان الْجميييييل يوسف الْموصِلي،

كل سنة وأنت وأحبابك بألف خير ومحبّة وجمال ...... وسعييييد بِلحيل بمحبَّتك لـ: أجمَلْ ما فِيكْ .......

وقول ياااااا رب: سنة خضراء على البلد وناس االبلد ......

نص شعرى باذخ يمكن ان بتحول لنص غنائى جميل يا
عصام عيسى رجب
ماتخلى العنوان ..
اجمل مافيك يافاطنه السمحه
....
والنص كما قدمت يرقى لدخول وشة عمل فنى
ومن خلال الورشه يتم تفكيك وتجميع العمل بالصوره المطلوبه
ويتم تلحينه فى قالب الريقى لأنو التفعيله تقبل ذلك

يمكننا ان نلحنه لحن مبدئى ويتم التشاور فى اخراجه كمنتج وطنى
مبرأ من كل مايحدش مضمونه الموغل فى الصدق والروعه

احترامى

Quote: أجمَلْ ما فِيكْ ......

انك شاعر منحاز للحياة
الحياة كما صورتها يا عصام
فى أمنيات 2014


شكرا

Quote: جَدْ مشتاقِينْ نضحَكْ نِحنا نتغابى الْعِرْفَة فيْ أحزانَّا ونغنِّي هديييييل ......

صديقي العزيز،،
هنا ضغطت على الوجع ،، هذا والله ما نحتااااااااااجه ياعصام!!

لي متين ياناس الدين!!!!!

تذكر يا عبد اللطيف لمَّا قريت في ليلة تكريمكم لي (رابطة أبناء الأبيِّض) قصيدة كتبتها في 1 يناير 2008 م إسمها: طَوقْ النُّجوم ......

ومِنْ تلك القصيدة:

كُلّ السَّنة
تمسِك نِجيماتك عليك
فِترتْ كفاها مِن الكتوف
خليها تسرح في السَّما
وأسرح معاها علي مَهَل
شان ما تقع
يلقاها ضُل
ويسومها في عِزّ الضُهر:
- علينا جاي
النجمة بي كومين تُراب ....
أسرح معاها علي مَهَل
ومرّة مرّة تعِدها
زي طفلِ شاطِر في الضياءْ
وإيدهو بِتزين السَّنة
كلّ السنة
بي طوقْ نجوم .....


ما عندنا طريقة إننا نقبض على جمر الأمَل الوقَّاد ..... ونعض بأرواحنا وقلوبنا قبل أسنانَّا على الفأل الأخضر ........

كل سنة وإنتَ وأحبابك بألف خير ومحبَّة وجمال يا زول يا جميييل .........

شكراً بجمالِك إشراقة،

الْبخَلِّي (أجمَلْ ما فِيكْ ....) أجمَل وأجمَل أكيد هو محبَّة الأحباب زيِّكْ ..... تسلمي، وربنا يخلَّي 2014 سنة خضراء عليك وعلى أحبابك وعلى الْبَلَد ...... والدُّنيا كُلّها ........

الحبيب ملهم كردفان،

مرحب بيك حبابك ..... وشكراً جمييييلاً لمحبَّتك (أجمَلْ ما فِيكْ ......)، وهي بين يديك لتسكب فيها مِنْ جَمالِك وروحِكْ .......

1/1/2014م




كُلُّ عامٍ
تنفلت من أمامنا
أيامُهُ
يوصى عاماً جديداً
ألا يكون خجولاً
وينكسر أمام أدمعنا التي لملمها
ومضى

كُلُّ عامٍ
تتعرى ساعاتُهُ
ويمارسُ بأرواحِنا
شبقَهُ السادي

كُلُّ عامٍ
سيأكلُ من ثمرٍ خبأناه
في القلبِ
ويطأُ بعضَ أحلامِنا
ويكشف الغطاء عما تبقى
لما يليه

كُلُّ عامٍ
سنربي الأمنيات
نخفي بمهارةٍ تجاعيد أرواحنا، أجسادنا، خطواتنا، ضحكاتنا...
بين تراب الوطن
ونبقى في انتظارِ عامٍ جديد


1/1/2014م




كل عام والوطن فاتحاً أحضانه للأحلام الكبيرة من لدن الحادبين على مصالحه الكافة...
كل عام وأنت تعزف من الألحان أبلغها وأبهاها ...


محبتي واحترامي

أما أجمل ما فيك ، هو أن كتابتك بتمسك بتلابيب الروح وتعانق خصر النص وتراقصه حتى الثمالة

وقفتُ هنا طويلا

يا أرْبعطاشْ .....
يا بنيَّة وعُمرِكْ ما فاتْ يوم
أيه رأيِكْ إنِّكْ سنةْ الْخَيرْ
فالِكْ أخضَرْ
وخَطِوْتِكْ واللهْ عديلة عديييييلْ
وأْجمَلْ ما فيِكْ
مُشْ إنُّو مواجع الرُّوحْ
فَتْ مرَّة تروحْ
أو إنُّو الْغُولْ ..... وحكاوي الْغُولْ
تبراكْ يا فاطمة السَّمحَة، كَفاكْ

***

تحياتي عصام

استاذنا عصام اجمل ما فيك انك تطل علينا بعد غياب بهذا الكلام الجميل الفخم ,,, كلام حلو كطبعك الذي اعرفه ..

لك وافر معزتي وتحياتي : ويا ريت لو المرحوم عايش كان اتلاقينا في بيته كالعادة وامتعنا انفسنا بهذا الحديث العذب ،، اللهم ارحم ميرغني الشايب واحسن اليه واجعل الجنة مسواه ..

ياسر العيلفون

مرحب بييييك فنَّانا الجميل ياسِر,

أخبار غُناك، والخاص، شنو .....؟!

أمرق بغناك للناس في 2014 دي .........

وربنا يرحم حبيبنا الحاضر الحاضر أستاذنا ميرغني، صدِّق لهسه غالبني أكتب ليهو ......

وكل سنة وانت بألف خير وجمال .... وغُنا .......

الجميييييل أبو جهينة،

جمَّل الله أيَّامك وأسابيعك وشهورك وسنينك .......

محبَّة الأحباب تدِّي القصايد جمال نفَسو رااااااايقْ ..........


الله يديك العافية .... وسنة بجمالك ليك ولأحبابك .......

Quote: الحبيب ملهم كردفان، مرحب بيك حبابك ..... وشكراً جمييييلاً لمحبَّتك (أجمَلْ ما فِيكْ ......)، وهي بين يديك لتسكب فيها مِنْ جَمالِك وروحِكْ .......

خير ياعصام ... خير تب ...

حبيبنا الشاعر الجميل بَلَّة،

ويييييييينك ......؟!


ياااا رب نشوف ديوانك مارِق برَّا في الشَّمس في 2014


سنة بجمالك يا حبيب