حكاية الأستاذمحمودمحمدطه مع الحمام والقمري والدباس

في معنى ما يقول.. كان الأستاذ محمود محمد طه يقول أن العارف المفكر.. العابد.. يجب أن يعيش أفكاره التى ينادي بها عملياً في تصرفه الشخصي.. وإلا مافي فايدة من كلامه وتنظيره.. تعيش ما تنادي به.. بل أنت أول الناس إعاشة له..
وكان يقول ما يقوله الرجل العارف المنظّر، تطبيقه وما يجسده، يجب أن يكون أكبر مما يقول، بالبرهان العملى..
باختصار هي التربية. والأخلاق.. والخلق والغاية من نفس الوسيلة الصادقة.. يعني إذا أنت تتكلم عن الديمقراطية، والإشتراكية، والمساواة الاجتماعية، والدين الخالص.. يجب أن يكون سلوكك منسجماً مع ذلك تماما.. وإلا سوف تكون فتنة بلا فائدة..
كان الأستاذ محمود يرشد تلاميذه كثيراً لمطالعة السيرة النبوية.. رصد حياة النبي عليه أفضل الصلاة وأتم التسليم.. كيف كان هو إنساني في أي شئ.. حتى دخول الحمام وخروجه منه، النعل الجديد، الثوب الجديد، الشكر.. الصبر.. العفو عند المقدرة.. احترام المرأة.. وكان الأستاذ يوصى خاصة بقراءة ( سيرة ابن هشام) لأنو فيها رصد دقيق لحياة أفضل الخلق عليه أفضل الصلاة وأتم التسليم..
لذلك عاش الأستاذ محمود على هذه الصفات في متقلبه ومثواه بدرجة متناهية في التعامل مع الأحياء والأشياء والناس عامة في سلوكه الشخصي بصورة مذهلة..
وإذا تابعت سيرة الأستاذ محمود ما بتخلص من الحكاية دي ولاتقدر تحصيها..لأن أطرافها عديدة..
الحمام والدباس والقمري:-
لما كان سنوات يعمل في تخطيط مشاريع النيل الأبيض للرأسمالية الوطنية. كان مكتبه في كوستى.. خطط معظم قنوات رى مشاريع النيل الأبيض.. بعضهم كان يكون مختلف معه في الفكر. لكن لايملك إلا أن يأتي بالأستاذ محمود مخططاً له لمشروعه..
ليه!
الدقة الهندسية العالية في شق القنوات والبرابخ.. ومرابط مكائن الري.. وانسيابية الرى.. وميزانية الشغل المناسب بالنسبة للمهندسين الآخرين.. والتسليم في الزمن بالضبط. أو قبله بأيام بتقنية مذهلة في الأداء..
كان لايجامل الرأسمالية في حقو في ميزانية العمل.. في حين إنو يغدقها على أصحاب الحوجة بدون شرط.. يعطي عطاء من لايخشى الفقر..
لاحظ الاستاذ إنو في تيم العمل بتاعو في واحد ( جنزرتي) مساحة بعد الشغل.. عندو طريقة كدا يغزز بيها خيوط وأوتاد يصطاد بيها كمية مهولة من الحمام والقمري والدباس والطيور عامة.. في الغابات القريبة من مشاريع العمل.. أو التى يقومون بقطع أشجارها لكي تصبح أراضي مروية..
قال ليهو يا فلان.. شنو حكايتك أنت مع الطيور دي! هل هي هواية؟ وألاّ عايز لحم يعني..!
ياخي زي ما أنت روحك عزيزة عليك! كمان هي روحا عزيزة عليها.. قاومت قاومت. وما قدرت تنفك من شباكك..
تعاهدني أديك مبلغ كبير. تشتري بيهو لحم زي ما عايز وفي أي وقت!
خمش أداهو مبلغ كبير للغاية في الستينات..
عشان الطيور تعيش حياتا الطبيعية بلا خوف من صايد وصياد وتضيف لرونق الطبيعة رونق، يبتهج بها بني الإنسان..
ولأنو منهجو العارف بالله يجب أن يكون في سلام مع الأحياء والأشياء والخلق أجمعين.. ويحترم كون الله الذي خلق فيه وله فيه موضع زمن ومكان يجب أن يملأه صاح. ويشكر الله على النعمة والشكر عمل..
بقلم
صديق عبد الله منصوري

يا سلاااام ، لله دره ،فلقد عاش حقا خيرا و برا بالاحياء والاشياء

نعم هو داعية سلام حقيقي يا عبد العزيز. يعيش ما يقوله قلباً وقالباً..

واسر بليل نحو ربك مدلجا إن المريد يسرنا سريانه
ـــــــــــــ
الحليلة

أوووووه
حبيبنا الحليلة.. صديق.. القامة إبراهيم خالد. عليك السلام..
نعم السالك عندما ترد اليه أي كلمات يعتبرها نداء شخصي له ( إن المريد يسرنا سريانه)
قال تعالى (فَأَسْرِ بِأَهْلِكَ بِقِطْعٍ مِّنَ اللَّيْلِ وَلَا يَلْتَفِتْ مِنكُمْ أَحَدٌ )

سلام يا حامل المسك...والمسك اقوال وافعال وحياة الاستاذ محمود..تضوع عبر هذا البورد الوطن الافتراضي على الاقل لحدي ما ربنا يرفع البلا من السودان
كمان انا عرفت من المرحوم د.خليل عثمان شخصيا كان معتقل مع الاستاذ في بيت -بونا ملوال -السابق -كما نوه لي بعض الجمهوريين وليس سجن كوبر واثناء ما هم بتونسو..خليل عثمان قال مديت يدي عشان اكتل نملة ماشة في الارض قال ليه الاستاذ "خليها مالك ومالا..ماشا ورا رزق اولادا"..قال ليه النملة دي عند الله اكرم من الجبل لانها دخلتا روح...والقصة تطول والله يرحم الرجلين كانا ايقونات سودانية صاااااااااااح...لاني زمان قعدت مع د.خليل عثمان 1986بصدد عمل فلم يموله الراحل خليل عن حياة محمود محمد طه وللاسف تغيرت ظروف السودان ولم نتمكن من انجازه حتى الان..لاننا لازلنا في مايو7..ولا احد يعرف اقدار الرجال السودانيين والحضارة السودانية واضحوا يمجدون ويكرمون الابتزال ونسال الله السلامة وحسن الختام

نعم يا أستاذ عادل.. نسأل الله حسن الختام.. وتأكيداً لكلامك عن عظمة النملة.. ومن الكلام الشفهي مع دكتور خليل عثمان صديق الأستاذ محمود رحمه الله..
هاك قصة النملة كتابة من مؤلف الرسالة الثانية من الإسلام)(المسلمون يقولون إن الشريعة الإسلامية شريعة كاملة .. وهذا صحيح .. ولكن كمالها إنما هو في مقدرتها على التطور ، وعلى استيعاب طاقات الحياة الفردية ، والاجتماعية ، وعلى توجيه تلك الحياة في مدارج الرقي المستمر ، بالغة ما بلغت تلك الحياة الاجتماعية ، والفردية من النشاط ، والحيوية ، والتجديـد .. هم يقولون ، عندما يسمعوننا نتحدث عن تطوير الشريعة ، يقولون : الشريعة الإسلامية كاملة ، فهي ليست في حاجة إلى التطوير ، فإنما يتطور الناقص .. وهذا قول بعكس الحق تماما ، فإنه إنما يتطور الكامل .. فالكمل من العارفين مثلهم الأعلى أن يتخلقوا بما وصف الله تعالى به نفسه حين قال عز من قائل: (( كل يوم هو في شأن )).. فهم يجددون حياة فكرهم ، وحياة شعورهم ، كل يوم .. واليوم عندهم هو يوم الله .. وليس هو هنا أربعاً وعشرين ساعة ، وإنما هـو وحـدة (( زمنية )) التجلي ، وتلك (( زمنية )) أصغر من الدقيقة ، بل أصغر من الثانية ، بل أصغر من الثالثة .. إنها (( زمنية )) قد تنقسم فيها الثانية إلى بليون جزء ، حتى أنها لتكاد أن تخرج عن الزمن ، في المفهوم الذي يتصوره العقل للزمن .. فهم قد ينطلقون ، أو قد يحاولون أن ينطلقوا ، مع الله في إبداء مظاهره لخلقه ، يجددون حياة فكرهم ، وحياة شعورهم بهذه الصورة المستمرة .. هذا هو الكمال .. وليس الكمال التزام صورة واحدة .. فالعشبة الضئيلة التي تنبت في سفح الجبل ، فتخضر ، وتورق ، وتزهر ، وتثمر ، ثم تلقي ببذرتها في تربتها ، ثم تصير غثاء تذروه الرياح ، أكمل من الجبل الذي يقف فوقها عاليا متشامخا ، يتحدى هوج العواصف .. ذلك بأن تلك العشبة الضئيلة قد دخلت في مرحلة متقدمة من مراحل التطور - مرحلة الحياة والموت - مما لم يتشرف الجبل بدخولها ، وإنما هو يطمع فيها ، ويطمح إليها ..
........
ذاك عن الجبل
ثم هذه عن النملة
( لقد ذكرنا أن ظاهر القرآن عنى بآيات الآفاق ، وباطنه عنى بآيات النفس البشرية . والكرامة عند الله للبشر ، وليست للسموات ولا للأرض ، بل إن النملة عند الله أكرم من الشمس ، لأن النملة دخلت في سلسلة من الحياة والموت ، لم تتشرف بها الشمس ، وهي تتطلع إليها ، وترجوها بشق النفس . ومن أجل ذلك فإنا لن نتحدث عن تفسير الظاهر في هذه الآيات ، ومن أراده فليلتمسه في أي من كتب التفاسير ، فهو مبذول )

يا سلام
النبتة والجبل
والنملة والشمس
فعلا ده االكلام الذى يوقظ الفكر ويهذب الشعور وكانو النا س بقعدو ليه بادب في الطرقات في العصر الذهبي للفكرة قبل ما يتسلل الوباء من جامعة الخرطوم ويجتاح السودان ...
حكمة بالغة وما تغني النذر
كويس انك صححت القصة ووثقتها كويس
وفي قصة تانية عجيبة جدا قال لي احد الاخوان زمان لمن يمشو يعملو الاركان,,كانة بجو اخر اليوم يكلمو الاستاذ بي كل ما حصل وفي واحد اعتقد انه عادل فضل الله-كان خريج علوم رياضيات على ما اعتقد حتى الاسم ده ما متاكد منه عمل ركن وجا كلم الاستاذ وقال ليه قلت كيت كيت والاستاذ يقول وبعدين لحدي ما شرح القالو وقام قال ليه الحضر االركن منو قال ليه شجرة وكديسة كانت قاعدة تحتا قال ليه طيب جميل بشهدو ليك يوم القيامة انك ذكرت الله هنا.ك.
وقمت بعد كل السنين دي كنت اعمل مدرس في محافظة الجوف في االيمن وهناك في مساجد منتشرة في ا لخلا وشبه مهجورة صلينا الجمعة في مسجد القرية ومعاي اثنين مدرسين يمنيين من اولاد تعز ونحن ماشين في الخلا قلت ليهم تعالو نصلي ركعتين في المسجد ده استغربو ليه..قامو دخلو معاى المسجد وصلينا في طيرة راكة في الشباك...لمن مرقنا قلت ليهم المسجد والطيرة دي بشهدوا ليكم انكم صليتو هنا يوم القيامة..صعقتهم الدهشة وعجبتم القصة جدا والغريبة نشروها في كل مكان.. وعملت لي تقدير كبير في نفوس اليمنيين هناك .وهذه طبعا غرابة عودة الاسلام مش كد ه يا حامل المسك

لك التحية والتجلة استاذنا منصوري
الاستاذ حيرنا اي والله انسانية تواضع
محبة للانسانية حتي الطيور لهم قسمة في المحبة
اي انسان هذا الاستاذ هل هو نبتة ملائكية

تسلم يا أستاذ عادل.. فعلا الأستاذ حيرنا.. أي خلق هذا.! أي فراسة هذه..! أي ضكرنة هذه! أي رجالة هذه! أي دين عايشو ومنفذو هذا! أي أصالة سودانية هذه! من أي لبان رضع هو!

رابط مهم في حياته الشخصية وتجسيد أقواله ومعاملته للناس عامة والأحياء والأشياء ( مكتبة الأستاذمحمود بسودانيزأون لاين)
الحياة الشخصية والسيرة الذاتيةللأستاذ محمود محمد طه في تطبيق فكره

عادل تسلم
حكاية بيحكوا الأركان للأستاذ دي صاح!
حكاية الحضور كان كديسة وشجرة.. قد تكون ما متذكرا.. لأنو عندنا ناس هايمين في هذا الفكر.. كل حياتهم هو.. ومتقلبهم مثواهم. لأنهم واجدين فيه خير كتير.. بفضل الله تعالى..
القصة تحديدا ما متذكرا. لكن يكفى أنك أنت طبقتها عملياً هناك. وفي ذلك خير كثير... وأكيد الطيرة والمسجد بيشهدوا ليك يوم القيامة... بقعة طاهرة من الأرض..
بس بتذكر حاجة.. كان بيقولا الأستاذ للمؤذنين.. عندنا والناس الصوتن كويس.. بيقول قدر ما تقدر في أي فلاة من الأرض لما يحين وقت الفرض.. عصر مغرب عشاء صبح ..ظهر. حتى لو براك.. تقيم الآذان وتصلى.. سوف تشهد لك هذه الفلاة يوم القيامة.. دا كلام سمعتو شخصياً..
وطبعا حتى الأعضاء بتاعة الزول ذاتو بتشهد عليهو يوم القيامة.. يعني أعضاءك تشتكيك لى ربها.. الفم يقول اغتاب بي الناس وأكل لحوم الناس.. والعين تقول بدل يعاين للمصحف عاين بي للحرام.. والرجل تقول بدل ما يمشى بي المساجد.. يمشى بي المحلات الما كويسة. والراس يقول بدل يملاني فكر صالح لإسعاد البشرية ماليني خزعبلات وكلام فارغ.. والبطن تقول ملاني من السحت والرزق الحرام وسرقة أموال الناس .. وهكذا..
قال تعالى (يَوْمَ تَشْهَدُ عَلَيْهِمْ أَلْسِنَتُهُمْ وَأَيْدِيهِمْ وَأَرْجُلُهُم بِمَا كَانُوا يَعْمَلُونَ )
عشان كدا في كتاب مهم جدا جدا للأستاذ اسمو ( تعلموا كيف تصلّون) فيه باب للوضوء فيه طريقة محاسبة للأعضاء تطهر الأعضاء بالندم كما تطهرها بالماء الحسي.. أرجو أن تطلع على تفصيل الوضوء فيه لأنو مهم.. وقد قال صلى الله عليه وسلم( من توضأ، فأحسن الوضوء، خرجت خطاياه من جسده، حتى لكأنها تخرج من تحت أظافره)والجمهوريون دائما يكونون على طهارة 24 ساعة، فإن تعذر الوضوء فبالتييم إذا كان طهارة عادية وأنت فرضك الوضوء إلا لعذر..

منصوري وعادل أمين والحليلة لكم التحية والمودة
عليكم الله اكتبوا في سيرة الأستاذ واستصحبوا الآيات والأحاديث والسيرة النبوية

تعيش يا ود قاسم.. نكتر ليك منها بحول الله

فوق

ود قاسم هاك الهدية دي في الآية القرآنية دي وكلام الأستاذ حولها في معنى ما قال
........
(وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا and#1754; وَإِنَّ اللَّـهَ لَمَعَ الْمُحْسِنِينَ )
موش معناهو لازم تمتشق الحسام وتمشى تجاهد في ساحات الوغى!
لكن بمجرد أن يتحرك خاطرك أنك مقصر نحو ربك..
دي الله يقبلا ليك جهاد وينميها ويزيدها وتمشى لى قدام بدل خاطر تترجم الى توبة عن الجرم المعين.. جهاد النفس من نقائصها..

البابا قال في أخر تصريح له: "اننا من خلال التواضع والبحث الروحي والتأمل والصلاة، اكتسبنا فهما جديدا لبعض العقائد. الكنيسة لم تعد تعتقد في الجحيم حيث يعاني الناس، هذا المذهب يتعارض مع الحب اللّامتناهي للإله. الله ليس قاضيا ولكنه صديق ومحب للإنسانية. الله لا يسعى إلى الإدانة، وإنما فقط إلى الاحتضان. ونحن ننظر إلى الجحيم (جهنم) كتقنية أدبية، كما في قصة آدم وحواء. الجحيم(جهنم) مجرد كناية عن الروح المعزولة، والتي ستتحد في نهاية المطاف، على غرار جميع النفوس، في محبة الله..
الحديث أعلاه منقول وهو مكرر بعدد من المواقع :
وأعتقد أن للجمهوريين كلام حول ما أسماه البابا الحب اللامتناهب للإله .. المهم أن الأستاذ سبق هذا البابا في القراءة الصحيحة للدين والعلاقة بين الرب وعباده...

Quote: وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا

لاحظ يا منصوري سبلنا جمع
وده يدل الطريق لي الله ما واحد بل طرق و كل السبل تقود الله
وفي بيت شعر كده بقول في المعنى
اذا خر في البيد للاحجار عاكف فلا معنى للانكار بالعصبية
راو ضوء نوره يوما فظنوه نارا فضلو في نور الهدى بالاشعة
يعني الكفر ذاتو نقص في التوحيد وليس انقطاع كامل عن الذات الالهية

سلم عادل أمين
هو الكافر دا! وين بي يمشى عاد.. منو الخلقو. موش الخلقو ربنا!.. بعد ما ياخد قساسو من العذاب . اكيد ربنا بيرحمو
شوف كلمة كافر ذاتا جاية من وين؟
جاية من الكلمة الإنجليزيةCover
يعني غطى على الحقيقة الأزلية الفي فؤاده بكفرو.. لكن حقيقة الله في قبلو في!
اراد الكافر ام لم يرد..
هو الله دا ملكو.. وما بيدخل في ملكو حاجة ما بيريدا..
هنالك كلام لطيف للأستاذ أفتكر مر عليك يا عادل في الكتب
عن الرضا والإرادة
إنو الله يريد شي لكن لا يرضاه..

يعني يقدر شى. ولكن لايرضاه لامن تتخلص منو يرضى.. كلام دقيق أنظره في مظانه في الكتب
(إِن تَكْفُرُوا فَإِنَّ اللَّـهَ غَنِيٌّ عَنكُمْ and#1750; وَلَا يَرْضَىand#1648; لِعِبَادِهِ الْكُفْرَ and#1750; وَإِن تَشْكُرُوا يَرْضَهُ لَكُمْ )
........
بعدين الحكاية القالا ود قاسم. إنو نكتر ليهو في كلام الأستاذ عن السيرة النبوية والقرآن
أهو دي واحدة منهم
ثم مثلا قال الأستاذ عن الآية (أَمَّن يُجِيبُ الْمُضْطَرَّ إِذَا دَعَاهُ وَيَكْشِفُ السُّوءَ ) قال الأستاذ
المضطر دا موش المؤمن، المسلم! اي مضطر
لأنو حتى غير المسلمين برضو عبيد الله في النهاية وخلقهم الله. يمشوا وين عاد من ربهم! خلقو جميعهم زي عيالو.. زي أسرتو..
والنبي صلى الله عليه وسلم قال: ( الخلق عيال الله، أحبهم لله، أنفعهم لعياله) يعني زي ما أنت عندك أسرة مكونة من زوجة وولاد وبنات وأنت حريص عليهم.. كمان الخلق ديل كلهم عيال الله .. اسرة الله.. أحبهم عند الله هو الذي يسخر عمرو في خدمة خلق الله..
هو حتى الكافر ذاتو لما يبين الحق تمام يوم القيامة ذاتو يعترف بي ربو.. ويقول كدي أدوني فرصة أرجع الدنيا أعمل صالحا
..
(وَلَوْ تَرَىand#1648; إِذِ الْمُجْرِمُونَ نَاكِسُو رُءُوسِهِمْ عِندَ رَبِّهِمْ رَبَّنَا أَبْصَرْنَا وَسَمِعْنَا فَارْجِعْنَا نَعْمَلْ صَالِحًا إِنَّا مُوقِنُونَ ) شوف إنا موقنون دي. يعني ايقنا تمام أنك ربنا. والإيقان درجة فوق للإيمان.. يعني أدركوا بعلم اليقين الذي لاينازع أنو الله ربهم..
ثم
(وَهُمْ يَصْطَرِخُونَ فِيهَا رَبَّنَا أَخْرِجْنَا نَعْمَلْ صَالِحًا غَيْرَ الَّذِي كُنَّا نَعْمَلُ and#1754; أَوَلَمْ نُعَمِّرْكُم مَّا يَتَذَكَّرُ فِيهِ مَن تَذَكَّرَ وَجَاءَكُمُ النَّذِيرُ and#1750; فَذُوقُوا فَمَا لِلظَّالِمِينَ مِن نَّصِيرٍ )
ثم
(يَوْمَ يَقُولُ الْمُنَافِقُونَ وَالْمُنَافِقَاتُ لِلَّذِينَ آمَنُوا انظُرُونَا نَقْتَبِسْ مِن نُّورِكُمْ قِيلَ ارْجِعُوا وَرَاءَكُمْ فَالْتَمِسُوا نُورًا فَضُرِبَ بَيْنَهُم بِسُورٍ لَّهُ بَابٌ بَاطِنُهُ فِيهِ الرَّحْمَةُ وَظَاهِرُهُ مِن قِبَلِهِ الْعَذَابُ )
ثم هنالك كلام دقيق عن الجنة والنار.. أرجو أن تطلع عليه في الكتب. وأن النار اقرب للفناء وأن الجنة اقرب للخلود لأنها ماشة لأصل الخير.. والعذاب له زمن ينتهى فيه وتكرم الخلايق. لأنهم خلق الله.. وأكيد ربنا بيريدهم لأنو خلقهم جميعا. كافرهم ومسلمهم..لكن للمسلم قيمة لا تدانيها قيمة لأنو عرف ربو وهو في الدار الدنيا. عرف ربو وعمل بتشاريع ربو بعقلو، قبل ما يشوف الجحيم والعذاب..

Quote: لأنو حتى غير المسلمين برضو عبيد الله في النهاية وخلقهم الله. يمشوا وين عاد من ربهم!

زي دي:
لقد جاءكم رسول من أنفسكم عزيز عليه ما عنتم حريص عليكم بالمؤمنين رؤوف رحيم.
وفي مقام أرفع:
إن الله بالناس لرؤوف رحيم.
ولولا الأستاذ، ما عرفنا الكلام دا.
تسلمون..المنصوري
عادل أمين
عادل عبد الرحمن
وود قاسم

أتيت بدرّة يا شيخ عبد الحي لى ود قاسم
فعلا حديث الأستاذ عن الآيتين لطيفة من اللطايف

هو يا ود قاسم. محبة الأستاذ للقرآن وللنبي عليه أفضل الصلاة وأتم التسليم وكلامو فيها كتير خلاص ما بينتهى ويحتاج لمجلدات. موش بوست واحد..
هاك دي
(عَفَا اللَّـهُ عَنكَ لِمَ أَذِنتَ لَهُمْ حَتَّىand#1648; يَتَبَيَّنَ لَكَ الَّذِينَ صَدَقُوا وَتَعْلَمَ الْكَاذِبِينَ )
الأستاذ في معنى ما قال
الله عارف نبيهو رقيق وحساس ومرهف في علاقتو معاه وما عايز علاقتو مع الحبيب الأعظم تشوبا شائبة.. ومقياسو في علاقتو مع ربو يوزن بسنج دقيقة جدا موش زي مقياس الناس العادي
عشان كدا في الآية دي الله قدم العفو على العتاب.. ( عفا الله عنك، لم أذنت لهم) جاهو العفو طوالي قبل العتاب لقرتو لعلاقتو الدقيقة مع ربو
........
وطبعا زادت علاقة النبي صلى الله عليه وسلم بي ربو خاصة بعد التتويج في الإسراء والمعراج بعدما شاف كل شئ
وبعدها، حتى في رواية عدد من الصحابة أن رسولنا صلى الله عليه وسلم صار قليل التبسم والضحك.. ولما سألوه الصحابة عليهم الرضوان قال:( والله لو تعلمون ما أعلم، لضحكتم قليلا، ولبكتيم كثيرا )
حتى روى عنه بعض الصحابة أنه بعد الإسراء والمعراج ( كأنما نصب له علم فشمّريطلبه)

بعدين التطبيق العملى للسيرة النبوية عند الأستاذ محمود دي كانت كبيرة
....
في أمر المال مثلا.. دي كانت واضحة وضوح شديد عند الأستاذ محمود هو في زمن كان عدد المهندسين قلة في السودان وعملو يدر عليهو عائد كبير للغاية.. كلو كان من أجل المساكين. المساكين من عامة الشعب موش تلاميذو كمان
في رفاعة، في كوستي، في مدني ، في كسلا، في عطبرة، في بورتسودان، في العاصمة، جميع المدن التى اشتغل فيها..
يحب يركب درجة رابعة في القطر.. يحب يقيف شماعة في البص.. عندما يقدم محاضرة وما يجد مواصلات يمشى برجوله من بحري لغاية الثورة الحارة الأولى.. أو من الموردة لغاية الثورة الحارة الأولى..

كان يقول في المعني
إذا في مرة ظلت واقفة في البص ، متعلقة بأستار البص، تقاوم سرعة البص وتقلبات سرعته، وهنالك شاب جلد ، قاعد على كرسي، وما قام ليها! أعلم من التو واللحظة، أن مروءته نقصت، بالبرهان العملي.

كان معروف عن الأستاذ محمود إنو لايتشهى الطعام أبدا ولا يطلبه بإسمه
.......
قالت السيدة عائشة رضى الله عنها( ماعاب رسول الله صلى الله عليه وسلم طعاماً قط، إن شاء أكله، وإن شاء تركه )
..........
ضابط سلوكه على سلوك النبي صلى الله عليه وسلم
كان يقول الأستاذ محمود ( أنا عربي.. زول كسرة وعصيدة)
وكان يقول :العندو كسرة، عندو إدام، موية وملح وشطة عليها تقضى الغرض..
وقال حقو ما نشبع في الأكل لغاية السودانيين ما يشبعوا وحث تلاميذه على ذلك وألف كتاب ( ساووا السودانيين في الفقر، الى أن يتساووا في الغنى )
......
وقال السودانيين فقرا لازم نكون زي أواسط الشعب على الأقل.. وفي بيتو ما كان في تلاجة ولا تلفزيون لامن انتقل للرفيق الأعلى.. وهو المهندس القدير من أولائل السودانيين الذين تخرجوا من قسم الهندسة من كلية غردون. وكان بعد أن استقال من السكة حديد، له مكتب هندسي في عمارة أب نعوف بالسوق العربي يدر عليه عائداً قل أن يكون مثله في ذلك الزمان، كل العائد ينفقه على المساكين.. خطط معظم مشاريع النيل الأبيض وجلبت له عائدا ممكن يشترى به البنايات والأراضي.. كلها قسمها على أصحاب الحوجة والسائلين له..
لغاية ما انتقل للرفيق الأعلى ما كان عندو دش حمام في بيتو. يستحم زي أواسط السودانيين بالجردل والطش..مشاركة للناس وإعاشة لأفكاره..

كيف يشتري الأستاذ محمود بطيخة مثلا
............
كان معروف عن الأستاذ محمود إنو لايفاصل البايع صاحب البضاعة في السعر ابداً
طوال حياته كان يفعل ذلك..
قلت ليهو البطيخة دي بي كدا! طوالي يصدقك.. ولا يكذبك. طوالي يديك القروش..( المؤمن صديق )
وينظر ليها من بعيد البطيخة مثلا.. ويشتريها.
في ناس الواحد يقعد يطبطبا كدا. ويقلبا جاي ويقلبا جاي.. وبعد دا يقول ليهو ع السكين.. ويقعد الواحد يتفه للزول المسكين المكوم بطيخو في الشارع .ويقول ليهو، ليه كدا سعرها؟ أصلو القيامةقامت!
عشان كدا البائعين لو وجدوا زول صادق ويناولهم طوالي.. ما كان بيمسكوا في سعر هلامي عالي. وبعدين يقعدوا ينزلوا معاك شوية شوية لامن يصلوا لى سعرهم الحقيقي
الأستاذ محمود زول تربية يحاول يعطي منهاج للتربية في كل تعاملو
....
مرة جاي شاقي سوق أم درمان وجاي معاه واحد صاحبو جاي يزورو.. جوا مارين بي جنب واحد مكوم بطيخ.. الأستاذ دنقر على البطيخ عزل واحدة..
قال ليهو بي كم؟
قال بي أربعة جنيه
صاحبو قال: لا حولالالا يا أستاذ أنا البارح أشتريت بطيخة بي هناك جنب البوستة بي جنيهين فقط.. معقول الزول دا ضاعفا دبل؟ ياخي دا بيبالغ
الاستاذ قال ليهو: هو قال كدا ونحن صدقناهو
وبعدين ياخي يمكن زولك بتاع البارح دا جايب بطيخو من قريب.. سعر التكلفة عليهو ما عالي..
وبعدين يمكن زولى دا ضايف سعر التكلفة عليهو.. يمكن جايب بطيخو دا من سنار مثلا,, ضاف حق المشوار عليهو
حتى ياخي يمكن عندو مرتو والدة عايز قروش عندو علاج أضاف عليها احتياجاتو . موش ظريف إننا نساعدو.. الحمد لله البقى عندو سلعة يستعرض بيها علينا وعلى غيرنا عزيز مكرم في سلعتو يزيدا حسب احتياجاتو.. موش أحسن مما يشحد مثلا..
اضاف أتعابو عليها ونحن قبلنا.. مهما كانت هذه الأتعاب..

الأخ عادل محمد عبد الرحمن
تسلم قبيل في رفع البوست. ربنا يرفع شأنك في الدنيا والأخرى

تعرف يا ود قاسم
كان الأستاذ محب من الطراز الأول لمداح النبي صلى الله عليه وسلم.. وبعد كدا طبعا بقا في إنشاد وشعر من تلاميذه
..
لكن المداح كانوا لاينقطعوا عن بيته.. وكان يقول: ديل مداح النبي صلى الله عليه وسلم لازم يكرموا الكرم الخرافي
وكان يخمش بالكتير ويناولهم..
وكان معروف جدا عن الأستاذ محمود دائما. إذا عايز يدي زول حاجة.. قروش.. زول سائل.. زول صاحب حوجة. كان يديهو قدر ما يقضى ليهو حوجته.. موش يديهو حاجة وخلاص.. يسألوا عن حاجتو..
بعدين معروف عن الأستاذ محمود ما بيديك القروش قدام الناس كدا.. يقدمك خارج البيت لغاية الشارع ويكون خامش القروش في يدو.. وفجأة يفتح يدو يقول ليك شيلا أنت.. تلقائياً تلقى نفسك مديت يدك شلت القروش ويدك بقت اليد العليا فوق يد الأستاذ وشلت القروش.ويد الأستاذ بقت أسفل يدك تقائياً
كان لايحب أن تكون يده هي العليا.. بل يد صاحب الحوجة هي العليا
الطريقة دي معروفة عندو تماما
...........

(وَاللَّـهُ فَضَّلَ بَعْضَكُمْ عَلَىand#1648; بَعْضٍ فِي الرِّزْقِ and#1754; فَمَا الَّذِينَ فُضِّلُوا بِرَادِّي رِزْقِهِمْ عَلَىand#1648; مَا مَلَكَتْ أَيْمَانُهُمْ فَهُمْ فِيهِ سَوَاءٌ and#1754; أَفَبِنِعْمَةِ اللَّـهِ يَجْحَدُونَ )
كان يدعو لمنهج الاشتراكية في الرزق.ز الناس شركاء في خيرات الأرض
ولذلك لابد أن يطبق ما يدعو له بالبرهان العملى..
فالقروش عندو هي ماتسد به الرمق ويكفى حاجتك الضرورية والباقي يروح لأصحاب الحوجة
مشهدو في الآية أعلاه ( فهم فيه سواء)
..................
لذلك عندما كان له بيت في مدينة كوستى العامرة بأهلها، هذه المدينة الخيرة.. كان يخطط في مشاريع النيل الأبيض.ز خطط معظمها في الستينات.ز كان العائد كبير للغاية.ز يقعد أسابيع في الخلاء في المزارع مع تيمه بتاع العمل.. يجي راجع لى كوستى باللاندروفر بتاعو.. يستلم القروش من الرأسمالية. عندو تربيزة كبيرة في الصالون، يخت عليها القروش كلهن,, يجوا المساكين. يجوا بعض أصحابه ومعارفه.. يجوا أصحاب الحوجة..
شوف لايمن يجعل يده العليا، بل يعلمك ويجعلك صاحب حق وليس سائل
تجي أنت تحكي قصتك
والله يا أستاذ زوجتى واضعة وما عندي حق السماية
يقول ليهو كم يكفيك
يقول ليهو خمسة جنيه مثلا
يقول ليهو.. روح التربيزة ديك عد ليك خمسة جنيه شيلن
يجي واحد يقول والله يا أستاذ عندي كرونة في اللوري بتاعي اتكسرت واللوري وقف واللوري دا يعلم الله ما عندي غيرو فيهو معايش أولادي
يقول ليهو الكرونة بي عشرة جنيه مثلا
يقول ليهو
روح التربيزة ديك عد ليك عشرة جنيه شيلن
وهكذا
......
مرة واحد صديق الأستاذ في كوستى وزميلو في كلية غردون.. قال ليهو يا أستاذ محمود ياخي البارح فلان جاك هنا شال منك قروش.. والله الزول دا ينبذ فيك في السوق وقال دا زول ضلالى.. رايو فيك سيئ يا أستاذ!
الأستاذ رد عليهو
قال: أنا ما بيهمنى رايو فيا شنو؟ دي مسألة بينو وبين ربو
لكن يهمنى رايي أنا فيهو شنو؟
الزول دا جاء البارح وحكى لى مشكلة عندو في البيت . يستحق المساعدة ليها

قصتو مع الحرامي في كوستى
طبعا الحرامية في أي مكان وأي زمان عينهم نجيضة.. راقب وشاف البيت دا في كوستي في قروش بي تطلع من البيت دا! في زوار كتيرين في أصحاب حوجة كتيرين في حركة غير عادية على البيت دا! في لاندروفر واقفة قدامو..
.......
معروف عن الأستاذ محمود من هواياتو ( قيام الأسحار) حتى بعض الصحفيين لما يسألوه بي يرد كدا..
أها قاعد بالليل فوق الفروة وغالباً لاينام بالليل..
جاء حرامي براحة يتلبد
الأستاذ قاعد على الفروة في ركن مظلم من البيت.. شاف الحرامي من أول وهلة
ما حب يزعج الحرامي لامن يشيل حاجتو العايزا.. ماحب يعمل حركة
لكن أكيد قيم الموقف لو كان في خطورة كان الأستاذ اتحرك عليهو
تابع الأستاذ الحرامي بي نظرو
لقاهو دخل الغرفة لقى ليهو شنطة شالا وعايز يطلع وبدا ينط الحيطة..
الأستاذ جاء وراهو قال ليهو
الشنطة دي ما بتفيدك بي حاجة مافيها قروش. فيها جلابية قديمة وأدوات مساحة ما بتعمل ليك حاجة .. لو عايز قروش تعال أديك قروش..
الحرامي خاف وتلّب في الشارع
الأستاذ فتح باب الحوش مشى وراه
وقال ليهو والله العظيم أديك الأمان.. أنا جبتا معاي قروش.. عليك الله أقيف..
جيب الشنطة وهاك القروش
الحرامي أظن دي أول حالة من زول تقابلو في حياتو
غايتو بين التردد والخوف الحرامي وقف..
الأستاذ أداهو قروش كتيييرة.. وشال منو الشنطة وقال ليهو
ياخي أنت بتسرق مالك؟
محتاج والله مـَرْضـَة؟
مارد الحرامي
قال ليهو تعاهدني تبطل النطيط فوق حيشان الناس
أنا أعاهدك كل ما تحتاج بس تعال لى. تلقى قدر القروش الأنت حا تسرقا
ليه ياخي تعرض روحك أنت للخطر
هسه يمكن واحد معاه سلاح يضربك؟
الحرامي بكى
وقال والله أعاهدك لا أسرق بعد اليوم
وكل ما أحتاج أجيك والله
سامحنى
قال ليهو سامحتك

Quote: قال ليهو تعاهدني تبطل النطيط فوق حيشان الناس أنا أعاهدك كل ما تحتاج بس تعال لى. تلقى قدر القروش الأنت حا تسرقا ليه ياخي تعرض روحك أنت للخطر هسه يمكن واحد معاه سلاح يضربك؟ الحرامي بكى وقال والله أعاهدك لا أسرق بعد اليوم وكل ما أحتاج أجيك والله سامحنى قال ليهو سامحتك

اشهد ان لا اله الا الله وانا محمد رسول الله
برضوا يقولوا مرتد لا حول ولا قوة الابالله
عد تاني في كلام يا منصوري بنصمت بنصمت

الفكرة الجمهورية بنت السودان الاصيل...والسودان بلد قيم...يعني بلد اشتراكي ليبرالي بي الفطرة..والاسلام في السودان سلوك لذلك قبل الشعب السوداني البسيط الفكرة ورفضها المتعلم اب شريحتين...في الجامعات
كدي نرجع ما قبل التاريخ ونشوف جدنا خليوت بعانخي قال شنو..قبل نزول الاديان السماوية نفسها


عشان نعرف المصدر الحقيقي لاخلاق السودانيين..وكرامة الاض والشعب والدور المنتظر السودان لاستعادة القيم في العالم بعد ما فشل المجتمعين الراسمالي والاشتراكي-السودان مركز الوجود-

Quote: I do not tell lies, don’t assaulted the ownership of the others, not committed a sin, my heart goes out to the suffering of the poor , I do not kill people without offense deserves to be killed, I will not accept a bribe to perform an illegal act, I protect servant does not pay to his owner, I do not bed a married woman, say no virtue without evidence, I do not set traps for the holy birds, Or kill an animal "sacred" I do not assaulted on the property of the temple and the state , I offer gifts to the temple, I offer the bread to the hungry, water to the thirsty and clothe the #####. I do this in this life and walking in the way of the Creator. Away from all that make God angry . To draw the way for the grandchildren who come after me. In this world and to those who their successors for forever. Kaliot Piye – Temple of Al- Burkal –Karima- Sudan

ونبينا الكريم قال انما بعثت لاتمم مكارم الاخلاق..والاخلاق اصلا موجودة قبل الدين...والسودان بلد اخلاقي والسودانيين امة اخلاقية الا من ابي
ونقيف هنا نخلي حامل المسك يجدع لي قدام في مكارم الاخلاق

بالله يا عادل الكلام دا قالوا بعانخي؟ حاجة عجيبة.. كدي عشان نشرك القراء معانا شوية أنا وأنت.. أقوم أترجم ليك الكلام القلتو أنت هنا عن جدنا..
معليش لو ترجمتى غير دقيقة
...... لا أقول الأكاذيب... ولا أعتدى على حقوق الغير وهم لم يرتكبوا جريمة..... قلبي يخرج الى معاناة الفقراء... وأنا لا أقتل الناس دون جريمة تستحق أن يكون فيها قتل.. وسوف لن أقبل رشوة لأداء عمل غير قانونى...وأحمى الموظف لكي لايدفع له المالك رشوة وثمنا... ولا أنام على سرير امرأة متزوجة....
أقول لا فضيلة بدون أدلّة
ولا أصنع الفخاخ للطيور المقدسة... ولا أقتل الحيوانات المقدسة...
أنا لا أعتدى على الممتلكات
لا أعتدى على ممتلكات المعبد والدولة.. أقدم الهدايا للمعبد.. نوفرالخبز للجياع.. والماء للعطشى والملبس..
يمكننى القيام بذلك في هذه الحياة... والسير في طريق الخالق... حتى لايغضب الله علينا..
نرسم الطريق للأحفاد الذين يأتون بعدي في هذا العالم.. والى أولئك الذين خلفهم الى الأبد..

ويا حامل المسك ..الترجمة ممتازة ....الراجل الشفيف خليوت ولد بعانخي ده لمن قال لما ياتون من بعدي ادرك انها ستسري عبر الجينات الكوشية عبر العصور لذلك السودانيين في قبل السودان الاربعة ومن قطن بينهم شملتهم هذه الدعوة والدعاء الكريم...ويظل جسد السودان يلفظ كل ما شاذ وقبيح الى ان تقوم الساعة..فقط look behind the dirty window تلقى السودان قااااااااااعد...
واهديك قصيدة الفيتوري العجيبة دي التي تطرب الوجدان السليم
*معزوفة لدرويش متجول*
شعر : محمد الفيتوري



شحبت روحي صارت شفقا
شعت غيما وسنا
كالدرويش المتعلق في قدمي مولاه
أنا
أتمرغ في شجني
أتوهج في بدني
غيري أعمى مهما أصغى
لن يبصرني
فأنا جسد ، حجر
شيء عبر الشارع
جـُزر غرقى في قاع البحر
حريق في الزمن الضائع
قنديل زيتي مبهوت
في أقصى بيت ، في بيروت
أتألق حينا
ثم أرنقُ
ثم أموت

ويحي ،
وأنا أتلعثم نحوك يا مولاتي
أجسد أحزاني
أتجرد فيك
هل أنت أنا ؟
يدك الممدودة أم يدي الممدودة ؟
صوتك أم صوتي ؟
تبكيني أم أبكيك ؟


في حضرة من أهوى
عبثت بي الأشواق
حدقت بلا وجه
ورقصت بلا ساق
وزحمت براياتي
وطبولي والآفاق

عشقي يفني عشقي
وفنائي استغراق
مملوكك لكني
سلطان العشاق..

الله الله الله !


يا لها من سيرة عطرة


سلام لكل حاملي هذا المسك


وألف تحية لك ولضيوفك العزاز يا منصوري

شكرا الأستاذ عادل أمين..على جيبانك نص ناس بعانخي دا!
وشكرا أستاذ مامون للمرور بي جاي
........
نص بعانخي سابق زمنو تماماً. رؤية ثاقبة

واحد زميل الاستاذ محمود وصديقه.. يحب دائماً يحضر محاضرات الأستاذ محمود، ومعجب بشجاعته وبسالته، وردوده المفحمة .. كان هناك بعض الغوغاء في المحاضرة يثيرون الهرج والمرج.. ولا يعبأ بهم الأستاذ، ويفحمهم في الردود..
لايؤمنون بإشتراكية ولا ديمقراطية ولا مساواه ولا غيرو
لما انتهت المحاضرة
قام ضحك
قال للأستاذ محمود
والله يا أستاذ الظلاميين كتروا، حقو بعد دا تسعى ليك مسدس!
قال ليهو: ليه!
عشان أكتل بيهو زول يعني؟
وأمشى لى الله كاتل!
موش حقو أمشى لى الله مكتول وأنا أدافع عن أفكاري وقوى الاستنارة ، بدل ما أمشى لى ربي قاتل!

قصتو مع الكديسة:-
عادة في رمضان يفطر الأستاذ وتلاميذه وضيوفه في الفسحة الكبيرة التى أمام منزل الأستاذ محمود.. جالسين في الصينية للفطور.. واحد من الضيوف إسمو أحمد.. جات كديسة تموء بي جنب أحمد.. أحمد قام ضربا في راسا..
الأستاذ محمود شافو
قال ليهو: يا أحمد حكمك مالو زي حكم أب تكّو كدا!
الجعان بي يضربوه وألاّ يدوه ياكل!
هاك اللقمة دي أديها ليها أنت من يدك، عشان تصحح خطأك بي نفسك عند ربك..
.....
شوف الدقة.. كان ممكن الأستاذ يديها لقمة براهو..
لكن عايز صاحب الخطأ بي نفسو يصحح خطأه ، عسى يرضى عنه ربه
دائما يصحح الأخطاء بالطريقة دي!
يحالول يخلى صاحب الخطأ ، التصحيح ينبع منه ذاته
قصة بسيطة، لكن لها مدلولها في التربية العامة

صديق ازيك
وازيهم ضيوفك..
ملمومين في خير دائما يارب..
مريت عشان اتبرك.
محبتي

أوووووه
الرجل جميل الصفات
جمال المنصوري
تسلم.. ربنا يحقق ليك البركة من خشمك ولى باب السما
قول يارب

أستاذ
عادل محمد عبد الرحمن
قلت لى قصة حرامي كوستى مع الأستاذ محمود عجبتك!
ملاحظة ذكية منك
......
استنى شوية بس أفضا. أجى أحكي ليك كمان قصة حرامي خور أب عنجة مع الأستاذ محمود
الحرامي العمل مشكلة وخلى حياة الناس في خطر مافي زول قدر وقفوا إلا الأستاذ محمود
دي حكاها لى واحد راجل كبير يسكن جنب الحتة ديك. خلف مدرسة محمد حسين. وفي ناس برضو عارفنها أكدت كلام الزول دا معاهم لقيتو متطابق

دي يا عادل كمان
صورة تذكارية للمهندسين السودانيين.. أول نقابة ليهم..
شوف صورتو بينهم بالزي السوداني وسطهم زي القمر
وكمان بالبدلة حاجة تانية خالص
....
يحب الزي السوداني ويحب السودان والسودانين بصورة مذهلة..حب لاتحده حدود
وكان يقول في معنى ما يقول: أي زول يعمل شر في الشعب دا! غير ناج من عذاب الله..
وقولته المشهوره( الشعب السوداني عملاق، يقوده أقزام)
وقولته وشعاره وشعار الحزب زمان ( الحرية لنا، ولسوانا)

ومن حكايات أخونا أحمد العجب في معايشة الأستاذ محمود
.............
كنا فى سيارة مع الأستاذ محمود متجهين من منزله بالمهدية فى طريقنا إلى دار الحزب الجمهوري بالموردة وكان ذلك فى أواخر الستينات من القرن الماضي تقريبا وعند مرورنا بالقرب من السينما الوطنية بأم درمان لاحظ الأستاذ محمود أن رواد السينما يقفون فى صفوف طويلة فسألنا قائلا: (تفتكروا ليه الناس بحبوا السينما كدا؟) فرد الأخ ابراهيم مكي عليه الرحمة قائلا: (لأنهم بينسوا فيها همومهم) فقال الأستاذ: (دا وجه)..وكان رد الأخ محمد فضل رحمة الله عليه: (لأنهم يعيشوا فيها اللحظة الحاضرة) فقال الأستاذ محمود: (دا وجه) ثم استطرد قائلا: (الناس بيحبوا السينما لأنهم بيجدوا أنفسهم فى شخصية البطل ،ما شفتوهم كيف بيكونوا متعاطفين معاه؟). وقال: (الحقيقة البطل ما كان ممكن يكون بالشجاعة البشوفوه بيها على الشاشة لو لم يكن قارئ قصة الفيلم وعارف تفاصيل أحداثها). ثم قال: (لكن الطريق لأن تتخلق بأخلاق البطل من شجاعة وإقدام فى حياتنا اليومية موش دخول السينما وإنما يتم ذلك عن طريق الدين حيث تتقي الله حتى تعلم منه قصة حياتك من المصدر إلى المورد.)

فوق لعودة المنصوري

بلدنا نعلى شانا... يا ناس..
حيدر بورتسودان.. والموصلي موصلينا
............
تسلم الأخ عادل
نعود نواصل

قصة حرامي خور أب عنجة دي نلقى زمن نحكيها.. يا ضيوف البوست هنا كلكم

زمان في الستينات كان خور أب عنجة في أم ردمان عاملين ليهو كدا جسر من خشب. عشان لما البحر يطلع ، الناس تقدر تمر بي فوق للجسر.. ولما البحر ينحسر يظل الجسر زي ماهو
كان في حرامي زي زول كدا بتاع بنقو بي يجي يلفها تحت الكبري دا ويربط للناس المساكين وينشلهم بعد الساعة 12 بالليل
حكى لى أحدهم من أهالى بانت
قال الأستاذ محمود كان جايي ومعاه واحد من محاضرة من شئ ما ذكر.من زيارة مريض.. ما عارف.. والأستاذ دائما يفضل المشى بي رجليهو.. قال لما جوا بي فوق لى كبري أب عنجة دا؟
قال الحرامي صاح فيهم من تحت الكبري وهم ماشين بي فوق
الحرامي الربـّاط قال : بصوت مرعب ( يا زول هييي. اقيف مكانك.. انتظرني لما أطلع ليك. أوريك شغلك؟)
قال الأستاذ محمود قال ليهو: لا ما بتحتاج تطلع.. أنا حا أنزل ليك
معروف عن الأستاذ محمود لما تقابلو وجهاً لوجه ، له سطوة.. ظاهرة.. وعيون فارس ترهب العدو.. ودقة في الكلام المحدد الصارم
قال لما قال ليهو كدا الحرامي سكت
اتقابلوا هو والأستاذ عند نهاية الكبري.. الحراني يمشى طالع والأستاذ محمود يمشى نازل..
الأستاذ مسكوا ثبتوا. لاحظ إنو ما معاه غير مطوة صغيرة..
الأستاذ قال ليهو
أنت حكايتك شنو مع خلق الله! أو كلام قريب من هذا
قال الحرامي: انا خلق الله ما ريحوني.. عشان كدا ما عايز أريحهم
الأستاذ محمود قال ليهو : طيب خلق الله لو ريحوك.. هل حا تريحهم
قال الحرامي : يريحوني كيف يعني؟ بعد ما عملوها فيا.. يا زول أنت نهايتك شنو .. جيب العندك..
الأستاذ قال ليهو: انا ما عندي حاجة هسه.. وبرضو خلق الله مرتاحين منى.. ما بقيت زيك. أهدد الآمنين
قال الشخص الذي ذكر لى الأستاذ قال ليهو..
لو أديتك قروش كفاية تعمل بيها مهنة شريفة. راح تخلى تهديد الناس!
قال ليهو: يا زول أنت منو
قال ليهو : انا محمود محمد طه
قال ليهو ما عرفتك
قال الشخص الذي ذكر لى أن الشخص الذي كان مرافقا للاستاذ ثبت ذلك الحرامي مع الاستاذ وخنقو بشدة وشال منو المطوة..الأستاذ قال ليهو سيبو بعد ما شلت منو المطوة..
قال الحرامي. انا بس عايز اسرق لغاية ما أعمل لى كارو وحمار يضمن لى عيشة وأتوب
الأستاذ قال ليهو : أنا عندي مكتب في عمارة اب نعوف في الخرطوم.. تجيني هناك بكرة أديك القروش البي تجيب ليك كارو وحمار..
قال ليهو : لا أنت عايز تقبضني أو تبلغ عليا
قال ليهو طيب من اليوم وقف السرقة
بكرة تعال بالليل لوحدك جنب القاعدة دي بتاعة الخشب بتاعة الكبري .. بترك ليك المبلغ هنا.. أحفر زي شبر تلقاهو..
قال : والله ألقى المبلغ. أتوب من السرقة لى يوم الله وأغتسل في خور أب عنجة دا!
ذكر لى أن الشخص أن الأستاذ ارسل شخص معين أن يضع المبلغ بنفس الطريقة
قال بعد مشى الأستاذ في إتجاه أم درمان وفاتوا الكبري. الاستاذ يمزح مع صاحبو المعاه قال ليهو.. لو لاحظت للزول دا؟ موش على صوتو.. هو بيرهب الناس ساكت. لكن جسمو ضعيف وهزيل ويتمايل زي المخمور كدا؟ لاحظت عليهو.. مسكتك ليهو أنت ممكن تكتلو.. جسمو واهي..