بعيد يا أخوانّا بتذكّر

Quote: بعيد يا أخوانّا بتذكّر حلاة الذكرى لمّا تهف وفي أعماقنا تتحكّر محال في لحظة نحنا نخون ولي ماضينا نتنكّر أصلو عمرنا جدول شوق وحبة ذكرى ما أكتر *** بعيد يا أخوانّا بتذكّر حليل الخور يفرّحنا ومويتو تفيض وتتبعثر ونبني بيوتنا بي طينة نسيبا تفوت وتتكسّر ونمشي أهلنا فرحانين نفتش علبة السكّر ونشحد يابا تعريفة دحين يا أبوي ما بتقدر؟؟ يقول والله والله ويحلف زين ويتعزّر ونزعل نحنا بي رقة دموعنا الغالية تتقطّر *** بعيد يا أخوانّا بتذكر لمة بيتنا كل صباح وقعدة يمة في البنبر تناول داك حبيبة شاي وتدي التاني ما بتفتر ونحنا نشيل زلابية وعيش مع شاهينا نتحنطر دي صورة نعيشا كل صباح حفظنا القعدة والمنظر *** بعيد يا أخوانّا بتذكّر شوارع الحلة والدكان ولون الشارع الأسمر وحاجة تبيع تسالي وفول تحت نيماً ظليل أخضر ونختف نحنا نجري هناك وهي المسكينة ما بتقدر ونضحك ونحنا ما عارفين جزانا يكون وكت نكبر ونلقى الدنيا ... مرة الدنيا لمّا تضيق وتتعكّر وأصلو الما عتر مرة مصيروا يعيش ويتعتّر

عبد العزيز العميري
..................................................................

رحمة الله عليك .