الكافرة أمك دي !

الكافرة أمك دي !
عطفا علي النكتة الشعبية الشهيرة
ودون الأنبهار الساذج السطحي بالمجتمع الغربي
والتأكيد علي الذكاء الشعبي التلقائي دون هتافية او شعارات في تحليل الوضع أي وضع ومقابلته بالسخرية او الطرفة

صاحبن لي مشي هولندا قبل سنوات في عمل ,, وبحكي لي
اسم ابوهو محمد ,, والخواجات بقلبنو الاسم يعني انا مستر ابوسن عبدالحفيظ ,, ده لو ما عملوهو مستر عبد ابوسن الحفيظ
المهم
ما علينا
مشي هولندا ,, وملصقين ليهو ديباجة في جيب القميص فوق ,, مستر مثلان
محمد إكس
اها قال لي يا زول مشيت عطشان عطش شديد للبيرة الصاقطة ,, ووقع فيها وقعة كديس في لبن اسيادو مافي ,, شبع شبع جد وارقد يا عيش انا جرابك ,, هيع انا الكيك الكمل بلادو فريك ,, وفريك هناك مافي ,, ياكل شنو ? قال لي قلت حسب الطشمة مافي حاجة تكتل سم الخرابة ده غير حاجة واحدة

اها
قال لي
قلت مافي حاجة تكسر سم السكرة دي غير لحم الخنزير ! لحم الخنزير داهن ودسم ,, منها نقاوم البرد ومنها نكتل سم السكرة ,, يعني عرسة وتجرة ,, طيرتين بي فرد دورابة , خشيت المطعم وطلبت لحم خنزير

اها الجرسون خواجة وكده ,
حمر فيني شديد وعاين للديباجة
مستر محمد أكس
قام سألني
أنت مش مسلم
قلت ليهو بلحليل مسلم ,, وقربت اقول ليهو
مسلم وقاتلناكم حتي تصير كلمة الله هي العليا ,, او تسلموا اما تدفعوا الجزية وانتم صاغرون , وطلبنا ان لا نبدأكم بالسلام ,, ونضيق عليكم في الطرقات ونحصركم في اطرافه ,, يعني يا خواجة لو لاقيتك في زقاق اعصرك علي الحيطة لحدي ما الجير يشيل في هدومك ,, ولا تلاقيك شوكة سدر مارقة من الحيطة تطعنك في نايطتك ! وتعمل لي نبت يكتلك وتلاقي الله بالنجيضة كافر ود كافر

قال لي
قلت ليهو بكلام الخواجات
بلحيل مسلم
اها قام قال لي
مابديك لحم خنزير
استغربت وسألتو ليه ?
قام قال لي
لأنك مسلم والاسلام يحرم لحم الخنزير
ياخي ده جرسون ولا مفتي
حسب الفي راسي قلت ليهو
وانت مالك ومالي ? بحاسبوك بعدين ولا بحاسبوني انا ?
الجرسون ابي بي الله واحد ,, حنستو , برضو ابي
قال لي
في النهاية بعد غلبت منو حيلة الكافر ود الكافر ده ,, نابذتو ,
هو بعرف الدين اسحن منو اصلو
كلو ما جاب راسو
اخدت بعضي وبت القوا

شوف جنس الخواجة ده
لاهو انتلجنسيا ولا مثقف
ولا مسؤول حكومي ولا رجل دين
مواطن اغبش ساي
وتاجر
بهمو يبيع ويربح
وبرضو عندو فهم
فهم تكون عبر مسيرة تاريخية ضخمة , انتقل مجتمعه من العصور المظلمة لعصر النهضة وعهد التنوير
مارس القرصنة قديما ,,هاجر لأمريكا وجلب العبيد من افريقيا , واضطهد الهنود اصحاب الارض
وعاش حقبا تاريخية متنافرة
ونهاية أمره
كون سلطة مدنية وحكومة علمانية ,, تبيح الخمر والدعارة والتعري وتفرض الديمقراطية حكما حتي صارت سلوكا مجتمعيا
‏ يمارسه المواطن في تلقائية

نعم يا صديق،

الأمم تمر بمراحل مختلفة:

مرحلة الطفولة المبكرة، يعني أكل الطين والخمجي وكل السلوك الجاهل.

ومرحلة طفولة الشقاوة ، الإضرار بكل شيء، من لمبة الشارع لي كديسة الجيران.

وتمر بمرحلة المراهقة ، والله لا يوريك، شيتا كعب.

ثم مرحلة الرشد والابداع وخلق مجتمع الديموقراطية والحرية ودولة الرفاهية.

وأحيانا تنتكس وترد إلى أرزل العمر لتعود للطفولة أو المراهقة

أو حالة العمى الذي يغبش وعيها ويوديها في ستين داهية،

كما هي حالنا اليوم.

أها يبدو لي أنو الجرسون الخواجا دا من أمة تمر بمرحلة الرشد.

صدقت آ حامد آ خوي
ومتل كلامك ده , المجتمعات بتتعلم زي الشفع ومن شب علي شي شاب عليهو
وانت صغير تلابع اخوك زاتو , وجنس مناقرة وجنس مشاكل ,, علا بتكبر واخوك ببقا ليك سند , تتكل فوقو ويشيل ليك فوق الدبر والدم ويموت قدامك
اها الشعوب دي دفعت ضريبة تطورها ,, وعانت وتشردت , وخاضت حروبا اهلية ,, ومورس عليها كل انواع الظلم ,, من محاكم التفتيش لمحاكم الساحرات واتخوزقو ,, التمن الدفعوهو مو هين
ولا امسك رواندا القريبة دي ,, اتكاتلو كتال شديد السوهو والهيتو ,, موت ضان ,, قتل بشع ,, وقعدوا في الواطة بعد كملت مروتم وفترو ,, وعملو متحف لفظائع الحرب الاهلية تذكرة لأولادهم
وامسك جنوب افريقيا من الفصل العنصري حتي ابتداع العدالة الانتقالية
الموضوع داير صبر شديد
وداير تجرد
من منو ?
من الناس الواعين والمثقفين

أبو سن أخوي،

لاكين أمم السجم دي، ما بستفيد من تجارب الأمم السبقتا؟

يعني لازم تمر بكل المراحل المتخلفة دي عشان تنجض؟

يعني لازم نمشي في درب الأمم الاتقدمت دي خطوة خطوة، زي ما قال شرحبيل أحمد،

لازم ندخل وراهم جحر الضب زي ما دخلوهو قبالنا؟؟

ما في طريقة شورت كت؟

آ حامد آ خوي
رغما عن مثلنا
من جرب المجرب احاطت بيهو الندامة
لكننا ماسكين في المثل
اللعوج راي و العديل راي
وقت عارفو اعوج راكب من فوق ليهو ليه
وزي ما قلت المعني مبارينهم ذراعا بذراع ,, نتعلم منهم الضريبة المضافة ولا نتعلم منهم دعم الانسانية
ومتل ما بقولو بنشيل منهم الحاجات البتنفع معانا ونسودنها
عندهم مجلس بلدية لخدمة المدينة
كمان نحن عندنا مجلس بلدية للمدينة وسودناهو وعملنا مجالس بلدية لكل حي ومنو يترفع ناس لمجلس المدينة لكن الهدف منو ما خدمة المدينة
ياخ نحن بنجي ورا ونركب غلط

هسعتي الجزار المسلم البضبح الكلاب والحمير ده ,, وهو عارفهم محرمات دي واحده والناس بعافوهم ,, اها ده هسه يقولوا عليهو شنو
الهتافية والشعارات دون قناعة راسخة بذلك

إتا عارف يا ابسن،

برضو في أمل.

أقصد إنو الأمم دي ما (كل نقي موحد).

بالعربي كدا يعني زي حبل التبش،

فيهو النجض واستوى وفيهو النصنص،

وفيه الدابو رامي.

والأمل، إنو النجض دا يجر وراهو الباقي في الطريق الصحيح.

وأفتكر دا الحصل لي ناس رواندا وبورندي.

لكين جنوب أفريقيا موضوعا براه.

دي ربنا أداها قاطرة عديل كدا،

قاطرة اسمها ماديبا مانديلا، جراها لي بر الأمان قبال يموت.

ربنا ياخد بيدو، الراجل فوق موتة.

واحدن قال
طلق الخواجات ديل ما فضل ليهم من الاسلام شي كتير
يسفو الصعوط
ويشربو المريسة
وياكلو العصيدة
وبرضو الذكاء الشعبي في الحكي

يا زول،

إتا ما سمعتا بي ست العرقي الجابت للخواجا كرسي في الحوش، قال ليها داير بنبر.

جلبت ليه البيرة، قال ليها داير عرقي تمر،

وقفت في نص الحوش وانفنست وسلت الزغرودة،


أيوووووووي، جيد لينا، الخواجا أسلم.

Quote: أيوووووووي، جيد لينا، الخواجا أسلم.

قويه ..


عرقي البلح والبمبر واسلام الخواجه ..



والله حوار سمح بالحيل ..
وكملتو اللتنا طاب ( اي تماماً) .

حبابك امجد
كملنا اللتاك طب علا جادعنا

يا جماعه .....
مجادعتكم كلها طشمي وست عرقي ..

الواحد قرب يطشم زاتوووو ..

تحياتي ,,,

حبابك محمد
الخلفة ما بتبقي زي القندول
الطشمي جانا في السكة ساي زي مسحة الانداية
ولا كما قال
زي النص الناقص
لا يسكرك ولا ينعنشك ولا يخليك صاحي

ذكرتني قصة الخواجا الداير يعرس ليهو سودانية.

أولا بالتبادي، أهل البت كان عندهم شرط أساسي إنو الخواجا يسلم ويعلن اسلامو، عشان الناس ما تقول عرسو بتهم لي كافر.

تانيا، ساقوهو للقاضي ومعاهو شهود من أصحابو المثقفين عشان يعلن اسلامو في المحكمة.

قام القاضي فرح بدخول الخواجا في الاسلام ولقنو الشهادتين وتمام التمام.

أها، قام القاضي قال ليهو، دحين إتا بقيت مننا وفينا. لازم بعد دا تتعلم الوضو والصلاة. وخلي اصحابك ديل يعلموك شوية قرآن تصلي بيهو.

أها وقبال الخواجا ما يطلع من المحكمة، القاضي تذكر موضوع الخمر.

ناداهو وقال ليه: طبعا الخمر محرم في الاسلام، ومن الليلة دي تودع الخندريس.

قام الخواجا طوالي احتج.

سأل القاضي وقاليهو، دحين موضوع تحريم الخمر خاص بالخواجات بالبسلمو فقط؟؟

القاضي قال ليهو لا طبعا، الخمر حرام على جميع المسلمين من كل الملل والنحل.

قام الخواجا قال ليهو - وهم باقي الصدق قاتلم - طيب ليه أصحابي ديل مسلمين، وكل ليلة بسكرو معاي زي الما حصل حاجة؟؟

ههههه
بركة الما جاب ليهو سيرة الطهور
صاحبن لي
عرس خواجية وجابها السودان ,, واسلمت
اها من اسلمت قال لي كرهتني
قوم الصلاة
السكر حرام
ما تكضب
ما
ما
ما
قال لي هسه اقدم انا ولا هي في الاسلام

ههههههه
قطعت مصاريني بالضحك ياخ
استغفرتك يا مالك روحي
ذكرتني ونسة بت المجذوب وجد محميد ومحجوب وودالرواسي في موسم الهجرة
مانديلا انجز فرضه الوطني وانسجن عمر رجال ولم يهن او يلن او ينكسر
وترك رصيدا ذاخرا لشعبه من الصمود والتضحية
‏ صحي ما قلنا شي ,, الخواجات فيهم التبش وفيهم الدردقو وفيهم النجيضن موص ,, ما اياهم البشر علا الغالب في المجتمع حقهم شنو

أبسن أخوي،

والله ونستك طيبة وسمحة.

بس بدور أمشي، وراي شوية أشغال.

لاكين بجيك باكر نفتو كلو، والرهيفة اتنقد.

ودعتك لي مامون الوداعه حامد اخوي
انا زاتي مارق علا بجي بعدين

Quote: يسفو الصعوط ويشربو المريسة وياكلو العصيدة

التحية لصاحب البوست والمتداخلين بوست بى ريحة الصندلية

مرحبا احمد
وتحية لك ايضا وشكر

Quote: ولا تلاقيك شوكة سدر مارقة من الحيطة تطعنك في نايطتك !

ههههههههههههههههههههه
جزم ما يعرفا الا الراسخون والموغلون في الفرنغيتة
.
.

Quote: شوف جنس الخواجة ده لاهو انتلجنسيا ولا مثقف

الهقللللللللللللللللللللللل
.
.
يا زول هوي ما تسوي لينا فلايت فكرية
ادينا سكة غير اللاعب
ول عوس لينا لقمة بملاح لبن ول كمان امش على البتزة بملاح ثقافة ثقافة ؟
قال سقنل تو استاندنق اب بملاح لحم ههههههههههههههههههه
يا حفيظ من عبدالحفيظ ويا ابو ادريس من التميس
اتا كنت وين يا زول الزمن دا كلو
عووووووووووووك ابقوا عشرة على العيال انا داير اغرق لي بكافر
.
.
شكرا لهذه المتعة يا عبدالحفيظ ابو سن لكن وقعت معاي وقعة بزليطا
قال تنجستينيا قال
دردق بي يا اللوري دردق بي

ها زول الهقلة التهقلك مالك داير تسي لي الخلعة
هجمتني لامن بلعت حراساتي
ومالها الثقافة ? لغوتنا دي ما زاتا ثقافة المعني علا ألوي ليك لساني واطقعك بي رطانة لا تفرز راسا من قعرا , ابدا ليك بي إز وانتهي ليك بي واط واجدع ليك ايشينات بالجمبات كدة زي الجرير المحاوش صحن الضلع
حبابك ياخ وشرفت البوست
ومرحبا بك
وسعيد انني دفعت الابتسامة دفعا نحوك

الهقلة التهقلك اتا دا آ الملقلق
ههههههههههههههههه
والله يا جنا سويت لي زعولة
قدر ما سجيت فيك ما قدرت اجهوجك
مرات اقول ناس السافل انقرضو ومرات اقول ناس الصعيد انقرضو
ومرات اقول تكس ارجع ومرات اقول منك ومن الفيش لكن خايفك تخرخر
ومرات اغني الله لي انا من سامية
بروفايلك لقيتو صقيعة حواشة هارساها البودة لاصرفا ولاعدلا
.
.
بس الجرير المحاوش بصحن الضلع دا بعدك مني بعيد خلاص باقي نحن ناس سلات وملاح رز
لكن نضميك الكتر داك اياهو نضمينا ...... لكن اظنو تلاقح موروثات ساهي
خسمتك بجدي ود صباحي اتا من وين ؟
خفت امسك في ابوسن دي توديعي رفاعة الهوي ولبعدين ابقى في حاو وهش
اخير تشبر وتقول ساهي عشان نعرف نتفاوض معاك
.
.
كسح كسح بجيك صاد اصلو الليام دي لابطبي في اباطي
ارح

حبابك مية غير المنسية
أكان جيت للقبيلة حرم ما بجيبا ليك ,, وجني وجن من وين في الاهل ,, كلنا اولاد تسعة والما شرب موية البحر شافو ,, والماشافو لاقا الشافو وحجاهو بيهو
إن قلت الصعيد ياني ود الصعيد بعد القسمة ,, من كوستي بحر ابيض ,, وان قلت ريح ايانا آخر حد غرب وان قلت صباح اهلي فزوا بدري من رفاعة وقرية صغيرة وديعة تنام علي ضفة الازرق وترسل سهام عيونها نحو السافل ,, المعني عودي راكب معاكم محل قبلتو

أتا لابي لابطوبك زي جنا النديهة وانا موبايلي علواني
شرفت البوست كتير والله

والله يا ود اب سن انا اكثر منك كرها للقبلية والعنصرية لكن سعالي معناة المعنى بسعل من بلدك
عشان باقي شايف كلامك مرات تلشغو ومرات تجيبو ملان شيتا صعيد وشيتا سافل وشيتا غرب وشيتا شرق لمن سويت لي فلايت فكرية هههههههه
قتا الزول دا اصلو دار اللذاعة ؟
اصلو شنو هو ؟ شبع ؟
.
.
حبابك والله حبابك وحباب اليوم الجابك

ههههه
بتعرف نم الاندايات ?

تؤكد الطرفة عنوان البوست , ان السودانين يعرفون جوهر الدين وليس مظهره , فيقولون في سودانية صاخبة
بالنهار يسبح وبالليل يضبح
فلا تخدعهم مظاهر التدين الاجتماعي المزيفة

أخوي ابسن، حبابك،

عترت في ردك على واحد من الاخوان، عترت على قولتا ليك عجبتني.

قلت:

Quote: ومالها الثقافة ? لغوتنا دي ما زاتا ثقافة المعني علا ألوي ليك لساني واطقعك بي رطانة لا تفرز راسا من قعرا

الكلام دا ذكرني موضوع مهم بالحيل.

أنحنا يا ابسن اخوي، واعوذ بالله من كلمة أخوي، ناس فاقدين الثقة في أنفسنا. حاجاتنا دايما ما بتعجبنا.

أفكر هسع لمعظم الفضائيات العربية. تلقا المزيعين والمزيعات بتكلموا بلهجة بلادم. المصري يقولك (شايف إزاي حضرتك) والسوري يقولك (مو هيك) والخليجي يقولك (يا رجال).

وتعال شوف لك جنس لغة عربية فصحى (مكسرة) في قنواتنا انحنا.

ومكسرة دي فيها تورية (هي فعلا مكسرة مجازا في قنواتنا لانها بتحبها - يعني كسير متبادل، وهي مكسرة حقيقة لأن قواعدها يتنسحن سحن).

أها، البهدلة لزوما شنو.

خاطب العالم بدارجيتك، عشان يحس بتفرد شخصيتك.

ولا ما كدي؟

والموضوع دا كبير، برجع ليهو تاني، خاصة في تفشي ظاهرة الشعر الدراجي بين الشباب اليوم.

التشعلق، تشعلق الناس في لهجتن ما لهجتم باعتبار إنها الثقافة، ذكرني ناسا في حلتنا.

زمان أول ما ظهرت كلمة (كالتالي) كلزمة ومدخل في كلام المتعلمين، زي ما يقول لك مثلا: ياخي الموضوع دا كالتالي،

أها عندنا بعض الجماعة بالحبو التنطع - ايه رايك في التنطع دي - لا ما تخاف، اخوك مثقف جد جد -

أها، الجماعة المتنطعين ديل، فهمو كلمة كالتالي دي على إنها كتالي)، بمعنى إنو الموضوع سري، ولا غميس ولا خطير ولا فيه مؤامرة ولا تحت تحت.

تلقى الواحد يقول لاخوهو، يا زول، الموضوع دا أبعد منو، على اللمين الموضوع دا كتالي تب.

وبجيك راجع لي موضوع دارجيتنا.

واتذكرت طرفة بعد ما رسلت المداخلة وأنا بضيفا هنا .

عندنا حاجة وداها ولدا لندن للعلاج.

الحاجة طبعا قعدت ليها شهر واحد في بريطانيا، ودا طبعا ما كافي عشان تتعلم انجليزي،

عشان كدا لمن رجعت بدت تتكلم مصري.

Quote: أنحنا يا ابسن اخوي، واعوذ بالله من كلمة أخوي، ناس فاقدين الثقة في أنفسنا. حاجاتنا دايما ما بتعجبنا.

like

كملوا مجادعتكم

تحياتي

لايك الله مقدارك ابراهيم اخوي
ارح جادعنا إتا ذاتك

حبابك حامد آ خوي
النعلك ماك حامد سيد المرض ( بباجح فوقك ساي )
عجبني قولتك لي يا ابسن ,, اياهو نطقنا ليهو ,,
الزول العرضحلجي طلب الزبون عشرة جنية , اها الزبون احتج ,, العرضحال بي خمسة بس ,, العرضحلجي قال ليهو
ده فيهو ريثما ,, امسحها ليك ?
جيتني محل الوجع ,, طنقعة المذيعين والمذيعيات ومقابضتم بي عرفه ومن غيرها
بتان بجيك

أبسن اخوي، ماك ملاحظ إنو رمضان دا نهاريو قصير شديد؟

أنا والله كان عندي ليك كلام كتير و(مثقف) ومكلف عن لغتنا السودانية القاعدين يعيروها ويقول ليها دارجة،

والدارج والادروج هو الشخص البستعمل رجليه في التنقل، مش لانو باقي الناس بستعملو أيديهم، لاكين لانهم بيملكو وسائل اخرى تبدأ من الدواب ولا تنتهي بماكوك الفضا.

كيف تكون لغتنا دارجة واتقال بيها احلى الكلام،

غنى بيها الحاردلو لي شبل الاسد لمن لقاهو حابسنو في جنينة النسا (حديقة الحيوانات ذا زوو).

وقف الشاعر البدوي واتحسر على حال الشبل وقال ليه:

جلبوك للمدن ساكت كترة درادر ########ة
أمك في الحريم ماها المرة السميعة
نترة ناس ابوك للرجال لويعة
وإت أكان كبر، جنبا تقلب البيعة.

وقال بيها عاطف خيري:

لجنة لسان الضو إذا نطق الزوايا.

بجيك باكر. أبقى في العافية.

آ الحردلو ده زولن جنب ودربو زلق
كنت بقول للصحاب شعر الحردلو قديما والقدال وحميد حديثا وغيرهم تصل اشاراته آفاق ابعد من فهم المتلقي البدوي , وقول الشعر الدارج لا يعيبه بل هو سهولة اخراج المكان بتوحد الفؤاد والعقل واللسان
تعرف آ حامد أخوي
مراتن كتيره بتونس مع عيالي الصغار واجدع ليهم كليمه كليمتين دارجيات قح ,, اها قح دي شن قولك فوقا ? ماني مثقف ?
وبرضو ده سونبهار ساي ماهي مداخله

Quote: كنت بقول للصحاب شعر الحردلو قديما والقدال وحميد حديثا وغيرهم تصل اشاراته آفاق ابعد من فهم المتلقي البدوي , وقول الشعر الدارج لا يعيبه بل هو سهولة اخراج المكان بتوحد الفؤاد والعقل واللسان

يا جنا، أبسن،

يا زول إتا عايلة ناس دريدا وليفي شستراوس ولوران بارت دحين بتقرب ليكم؟

عموما أنا عندي نظرية (اسمع الكلام دا ... ن ظ ر ية عديل كدي) في موضوع الابداع باللغة المحلية دا.

الاصل في الإبداع هو التقاط وإعادة صياغة كل ما هو مدهش في الأصلي المحلي (indigenous) من أجل إخراجه من المحلية إلى العالمية ومن حيز الخصوص إلى العموم ومن الحيز الذاتي إلى الحيز الموضوعي حتى تمكن رؤيته من الخارج.

أها الأصلي المحلي دا يخرج للعالم أكثر احتفاظا بالأصولية ( واعوذ بالله من كلمة الأصولية)، إذا جاء عبر وسائل إفصاح محلية أصلية. ودا ما بيمنع أنو يحتفظ بالكثير من هذه الأصولية حتى إن جاء عبر وسائل إفصاح مكتسبة.

عشان كدي بنلقى أفارقة بيبدعو بالفرنسية والانجليزية، وأمريكان جنوبيين بيبدعو باللاتينية.

ما في مشكلة، ما انا (السوداني) أفريقي ببدع بالعربية. اللغة هنا (غنمية حرب) كما قال الفنان والناقد حسن موسى.

والابداع بها جائز وحاصل في التاريخ القديم والواقع المعصر.

عشان كدا أنا مبسوط طب من الجنيات البكتبو الشعر بلغتنا المحلية.

والحكاية جات بعد لفة طويلة ودوخة ومشوار من محمد سعيد العباسي الذي كان يكتب الشعر كما يكتبه المتنبي، مرورا بقادة شعر الحداثة ناس جيلي عبدالرحمن ذلك التيار الذي امتد حتى ناس مامون التلب، وانتهاء بتيار الغابة والصحراء والنور عثمان أبكر ومحمد عبدالحي.

دي رحلة طويلة ودوخة شديدة كانت الغابة والصحراء ختاما. (إبداعنا أفري-عربي) والسلام ختام.

ثم جاءت الطامة الكبرى عندما جن عمنا النميري، وشطب الثقافة نهائيا من الأجندة الوطنية وعمل بدلا عنها محاكم العدالة الناجزة والعايز مسرح يروح يتفرج في الجلد وقطيع الأطراف وحتى الشنق.

وفزّ المبدعين وفكو البريق للخارج والمهاجر والمنافي.

لاكين الابداع ما بموت في ضمائر الشعوب. نيتة تحرقا بي جاز الليلة، وتفتكر إنها ماتت، باكر تلقاها خدرت تاني ووجدت طريقا للحياة.

أها، السعال يا ابسن أخوي هو:

ليه جات النبتة المرة دي تحمل أوراق من نوع الأصلي المحلي (indigenous) ؟؟؟


وكلما الليل زاد نجمة في كتف العسس،
جرت العصافير المطار،
ودخل الشعر وكر المباشرة (عاطف خيري)

وبجيك راجع.

حامد آ خوي
حبابك كل مرة , لقد أضفت إضافات قيمة ووسعت دايرة الشوف ,, الناس القلتهم ديل ما بعرفهم لكن كان بحت لا تحت بلقاهم اولاد عمومة ولا خؤولة لينا ما الناس دي كلها اصلها واحد ,, لو من سيدنا آدم ولا حيوان وحيد الخلية ولا ذرة ايدروجين واحدة طاشة او كما قال نظرية الانفجار العظيم , ودي بالذات ممكن تكون بت عم نظريتك الهسة دي ,
المهم
كدي خليني النفهم في الاول ,, انا لامن اقول لي زول
آ يام ستارفينق ويل يو قيف مي سمسمنق تو إيت
بعد دخلت الكلمة مخي اول ومرقتها وسلمتها لساني ,, ومرات بكون عمل ليها تيست قبل يمرقها ,, وفي الوقت ده كلو بكون مشغول بنطقها ومعناها ,, ياربي ستارفينق دي صاح و لا صاح اقول هنقري
لكن بالدارجة بقولها دون المرور بكعوجة الدروب غير المرئية دي
ها زول وحاتك ميت الجوع ,, دحين ما بلقي لي شيتن آكلو
اها مع القول ده في موسيقي تصويرية تلقائية بتصاحبو , يعني ميت دي بجرها جره جد ,, وممكن تصاحبها ايماءات تنندرج تحت التمثيل الصامت او التعبيري
فالتعبير باللغة الام لا يترك مسافة بين العقل واللسان ,, فيأتي القول عفو الخاطر منسابا
الابداع زاتو علي قولك

الاصل في الإبداع هو التقاط وإعادة صياغة كل ما هو مدهش في الأصلي المحلي
اها انا بفتكر الابداع إلتقاط ما يبدو عاديا وتبيان ادهاشة ,, رؤية غير المرئي للآخرين ,, هو خلق عالم موازي وليس تصوير ذات العالم
هسعتي اسهل لي اتونس بلغتي الام ولا الاجنبية ,, طيب اترجم الكترابة وعيييييك وانا اخوك اتا ,, كيف ?
اها حتا نا عندي نظرية من كتب صادقا ابداعيا بعاميته وصل للعالمية ,, بعدينك العالمية تطير ,, هو الادب ده للمتعة الذهنية يعني ولا عندو دور بأديهو داخل المجتمع حقو ? دور تحريضي ,, دور ثوري ,,, رفع الذائقة الفنية وتطويرها ,, رفع الحس الانساني ,, وكما قال صلاح في تقديم مصطفي سند
وخير قراءة للشعر ما جعلتنا بعد قراءته أكثر انسانية
الشعر ده برضو عندي فيهو نظرية يعني تنظر اتا براك
الشعر الداير شرح ده ما شعر ,, الشعر بخاطب الذاكرة والتجارب المخفية والرغبات والامال ,, اها مفروض توووش يخش ليك وتتكيف منو ولا ما يخش وتجليهو ,, اي ممكن تفهمو بعد داك وتسأل لكن ما بكون شعر بالنسبه لي
تحية لعاطف خيري صاحب التصاوير المدهشة والرمزية الشائكة
البنوت طفن الرتاين
وولعن
عاطف خيري
والبنوت عيونهن هارجة
زي جهر الكهارب الفي المدينة
القدال

أبسن أخوي ما اختلفنا كتير،

أنا قل: * الاصل في الإبداع هو التقاط وإعادة صياغة كل ما هو مدهش في الأصلي المحلي


وإتا قل ** اها انا بفتكر الابداع إلتقاط ما يبدو عاديا وتبيان ادهاشة ,, رؤية غير المرئي للآخرين ,, هو خلق عالم موازي وليس تصوير ذات العالم

والفرق بين الموفقنن زي الفرق بين الواقف بي بره وبدق في الباب وعايز يدخل وبين الواقف بي جوه ويدق في نفس الباب وعايز يمرق.

لا بد من ان يطاقشو أو اقليها يتلامسو. والموقفين، وبي لغة الليلة بقولو عليهن (يتقاطعان).

ومن (تبيان إدهاشو) دي إتا خرجت لفضا النقد بكان التبيان والمقاربات، وانا أصلا في زريبة المكاشفي جوة، محل الالتقاط وإعادة الصياغة.

وود خخيري قال: "اللغة في زريبة ربها، تعجن حنوط المعنى في قرع السكوت" .. لله دره من ولد.

أها. يعني كأنو إتا مهموم بانو المتلقي يفهم، عشان كدا بتبين، وبتبين دي واحدتن تانية غير بت بتي وبت هوفن.

وانا مهموم بإنو المبدع يلتقط ويعيد صياغة المدهش المحلي. يعني يجرب يصنع موجود جديد، محتاج لتبيان جديد، ودا وقود الحركات الثقافية، الابداع الجديد الذي يستدعي ميلاد النقد الجديد.

واظنو دا بكمل دا، إن كان أنحنا، والحمد لي الله، النقد دا ما سمعنا بيهو علا في اسم صندوق النقد الدولي لمن نقراهو في الجرايد.

أهم حاجة إتنا ما قلت لي خسئت يا عدو الله،

وانا ما قلت ليك أسكت يا ظلامي.

أو العكس.

وخلي ام العيال تحضر القهوة، انا ماشي أقضي لي مصلحة وبجيك،

باقي ونستك حلوة زي كهوتك.

مما بديت أتابع الونسة دي عرفتها ماشه تبقى عضم ..
و اقول لي روحي كدى أصبر يمكن تجي حكايه حكايتين من ناس الكاروشه تفرق عليك ضُهر رمضان دا
و رمضان دا أصلو ما فيهو عيب ... غير التمباك دا ..
لكن قعدت معاكم هنا بلا تمباك .. يعني كلامكم دا المزاج ذاااااتو
و الله يا ابوسن متعه بس .. ناهيك عن ما يجمل به حامد بشير هذه اللغة من حلاوة نقده ..

و بعدين خايف اطلعكم من الحكي لو قلت ليكم ليه نحن ما بنقدر نتكلم بي لهجتنا
قدام باقي اللهجات العربية او اللغات التانية ... يعني السوداني لسانو بتعوج سريع خلاس
و الواحد ختة كراعو في الخليج و لو قاعد مع سودانين يقول ليك السيارة ... السيارة التركبك بركة رمضان دا
دا بسمو شنو ...


.....

مجاهد نايل،

مشكور وما قصرت واديتنا أكثر من حقنا.

لاكين حكاية خجلنا من لهجتنا دي شيء عجيب ويقيظ.

تصور بقاري يجيك من جنوب كردفان ولا جنوب النيل الابيض ويقل في الخرطوم، اخيي أنطيني أشرب.

ناس الخرتوم بضحكو عليهو.

لاكين كان جاهم سوري ولا لبناني وقال ليهم انطوني، ينطو طوالي وبدون استنكار للهجة.

ياخي أنحنا عايزين ثورة شعبية لتحرير اللهجات السودانية .

Quote: تصور بقاري يجيك من جنوب كردفان ولا جنوب النيل الابيض ويقل في الخرطوم، اخيي أنطيني أشرب.

الأستاذ حامد بدوي بشير سلام مربع.
كانت هنالك بنت صغيرة أتت للإمام عبد الرحمن بالقهوة ومعها بعض حفيداته. سألته: سيدي أصب ليك؟ فضحكت حفيدات الإمام. علمت أنها أخطأت في اختيار الكلمة الصحيحة. عادت وقالت له قبل أن يرد عليها: سيدي أدر ليك؟ وضحكن الصبايا للمرة الثانية. وأحتارت الكردفانية الصغيرة. عندها إعتدل الإمام عبد الرحمن وقال لحفيداته: مشكلتكن أنها تتحدث العربية الفصحى وأنتن لا تعرفن كلامها الفصيح. وأورد لهن الآيات الكريمة التي تؤكد فصاحة الكردفانية التي تتجاوز لهجة هجين الخرطوم، فقال لهن: قال تعالى: ( إنا صببنا الماء صبّا). وقال تعالى: (يرسل السماء عليكم مدرارا).
تحياتي

كبـّاشي الصـّـافي
(العوج راي والعديل راي)

عدل بسبب التكرار

ود أب سن وود بدوى أنتو البنطون لغوهو

التحية ليك يا عبد الحفيظ وكل سنة وأنت طيب

غايتو ذكرتنى طريقة كتابتك حبيبنا عمك أبراهيم أحمد أبراهيم

سلام يا حامد بدوى ومشتاقين ياخ

عدل للتكرار

عدل للتكرار

ياخوانا أنا فترتا

مجاهد نايل،

مشكور وما قصرت واديتنا أكثر من حقنا.

لاكين حكاية خجلنا من لهجتنا دي شيء عجيب ويقيظ.

تصور بقاري يجيك من جنوب كردفان ولا جنوب النيل الابيض ويقل في الخرطوم، اخيي أنطيني أشرب.

ناس الخرتوم بضحكو عليهو.

لاكين كان جاهم سوري ولا لبناني وقال ليهم انطوني، ينطو طوالي وبدون استنكار للهجة.

ياخي أنحنا عايزين ثورة شعبية لتحرير اللهجات السودانية .

مجاهد نايل،

مشكور وما قصرت واديتنا أكثر من حقنا.

لاكين حكاية خجلنا من لهجتنا دي شيء عجيب ويقيظ.

تصور بقاري يجيك من جنوب كردفان ولا جنوب النيل الابيض ويقل في الخرطوم، اخيي أنطيني أشرب.

ناس الخرتوم بضحكو عليهو.

لاكين كان جاهم سوري ولا لبناني وقال ليهم انطوني، ينطو طوالي وبدون استنكار للهجة.

ياخي أنحنا عايزين ثورة شعبية لتحرير اللهجات السودانية .

مجاهد نايل،

مشكور وما قصرت واديتنا أكثر من حقنا.

لاكين حكاية خجلنا من لهجتنا دي شيء عجيب ويقيظ.

تصور بقاري يجيك من جنوب كردفان ولا جنوب النيل الابيض ويقل في الخرطوم، اخيي أنطيني أشرب.

ناس الخرتوم بضحكو عليهو.

لاكين كان جاهم سوري ولا لبناني وقال ليهم انطوني، ينطو طوالي وبدون استنكار للهجة.

ياخي أنحنا عايزين ثورة شعبية لتحرير اللهجات السودانية .

مجاهد نايل،

مشكور وما قصرت واديتنا أكثر من حقنا.

لاكين حكاية خجلنا من لهجتنا دي شيء عجيب ويقيظ.

تصور بقاري يجيك من جنوب كردفان ولا جنوب النيل الابيض ويقل في الخرطوم، اخيي أنطيني أشرب.

ناس الخرتوم بضحكو عليهو.

لاكين كان جاهم سوري ولا لبناني وقال ليهم انطوني، ينطو طوالي وبدون استنكار للهجة.

ياخي أنحنا عايزين ثورة شعبية لتحرير اللهجات السودانية .

مجاهد نايل،

مشكور وما قصرت واديتنا أكثر من حقنا.

لاكين حكاية خجلنا من لهجتنا دي شيء عجيب ويقيظ.

تصور بقاري يجيك من جنوب كردفان ولا جنوب النيل الابيض ويقل في الخرطوم، اخيي أنطيني أشرب.

ناس الخرتوم بضحكو عليهو.

لاكين كان جاهم سوري ولا لبناني وقال ليهم انطوني، ينطو طوالي وبدون استنكار للهجة.

ياخي أنحنا عايزين ثورة شعبية لتحرير اللهجات السودانية .

عدل بسبب التكرار

مرحب بيك مجاهد شرفتنا زيارتك ومداخلتك وخلت زولي ده يهضرب زي الرامياهو جبنة الصباح
تعرف يا مجاهد ودون المرور بنظرية المؤامرة الشهيرة , لكن برضو مؤامرة اها شن قولك ?! غولات عديل كده ! ولو داير شوف النكات المبذولة في الاجهزة القومية والقومابية ,, يجيك واحد يقول ليك في واحد من اهل العوض وقرررر يا ضحك ,, ده اسمو شنو ده ,, السخرية من طريقة النطق و من الكلمة نفسها رغم انو عبدالله الطيب و عون الشريف قال ان ما يبدو من لغتنا كدارجية انما هو لغة عربية فصيحة اشد الفصاحة زاتا ,, اها ناس الكوميديا الساذجة دي ساهمو ويساهمو كل يوم في احتقار اللغة السودانية ,, وتفتح لهم الابواب الموصدة من الاجهزة الاعلامية القومية وغيرها في حركة مقصودة بدلالة معاداتها للمسرح والفن الجاد وغيره
هسه اخير
اداهو ألم
ولا
رصعو كف
واها قبال انسي دلالة المؤامرة بمنع رواية الجنقو واخواتها للصديق بركة ساكن ,, وغيرها لأنها بلغة سودانية قحة
واها
الخلا الحمام ذوق واتيكيت وخلا الادبخانة والمستراح جلافة شنو ,, رغم اننا نستعمل المستراح استعمال صحيح وذو دلالة واضحة ,,

هههههه آي شايفو ... أنا ذاتي لامن خفته إضطريت قريتن كلهن قلت يمكن في شي جديد ..
باقي لي المنبر بكون علّق ساي ....

إبراهيم ناصر دا قبيل شكلو اللايك بتاعو ما وقع ليك يا ابوسن

Quote: ، واعوذ بالله من كلمة أخوي،

كمان لو اتوسعت لي شويه في نظرية المؤامره دي انا برضو بستغرب ليها خاصة و انو التمدن الحالي دا حدو قريب
يعني الما أبوهو أهل العوض ..جدو قطع شك منهم
و أظن الأعلام بالذات عندنا في السودان ما بسوق الشارع .. الشارع هو البسوق الاعلام ( دا غير ما في السياسه طبعا )
يعني النكت اتوجدت قبال الاعلام ما يعرفا ... و سمعنا بيها و قرررررققرر قرقرنا بيها
حتان بعد داك جونا بتاعين المكرفونات ديل

مجاهد
ههههه ما وقعت لي قبيل دوبها لامن اتا جبتها ,, اخوك زول خلا ساي وبخش بالموبايل الاقتباسات بتجي بي لغة كوتر
الاخو دي عندنا معني سوداني ولو اردت الطنقعة سودانوي ,, يقول ليك فلان ده اخو اخوان ,, واخو بنات ,, وده مشكار والزول بتنبر بيهو ,, بعدينك انا وريث الثقافة السودانية وما بخليها ليهم ( كمية خطوط تحت ليهم دي )
صحي النكات متداولة دون ان تأخذ شرعيتها ,, ولامن تجي تحكيها لي ناس تتلفت تشوفها كان هبشت واحد تجليها ,, لكن الاعلام ده حاجة مختلفة فكأنك تقوم بنشرها ,, او بالاصح نشر الثقافة العنصرية ,, قصاد اللهجات او الاثنيات او الجنادر ,,
مافي اشكالية المرأة هي المرة وهي الولية دون ان نقصد انتقاصا من حقها ودون ان نحمل اللغة مضامين اخلاقية او لغة محاكمة او نقد ,, ومن يقول مرة او ولية يقولها ويحترمها احتراما شديدا ,, ولكنك تعجز ان تخاطب بها احداهن فتوصفك بالرجعية والظلامية ( مع حفظ حقوق الطبع ) ,, وتقبل إمرأة دون ان يرف لها جفنا وهي فرحة جزلي ,,
‏ نحن عاجزين عن تقبل فكرة كون لغتنا هي لغتنا فقط ! كما المصرية او السورية دون احساسا بالدونية قصادهم
اقول ضربت ليك تلفون وتصك اذني دقيت ليك ,, يدقوك فوق رويسك ده
ونجي لوجع المذيعين والمذيعات مقروءة مع دعاية سوداني وخليك سوداني ويقدمها مصريين بلغة مصرية فجة

المذيعين و المذيعات والفنانين الشباب
بإضافة بعضهم اول السطر اعلاه ,, ولو اردت الصدقت حقا لقلت جلهم
‏ افسدوا علينا القنوات المحلية بتقعرهم في الحديث ,, وتعطيش الجيم والضحك الغير مبرر والاهم انهم لا يجتهدون في تحضير انفسهم للحوار , يقرأون من ورقتهم دون الاسترسال فيما يطرحة الضيف من محاور جديدة تضيف للنقاش وتؤكد ان الحديث لذو شجون ويأخذ بعضها بعضا , يكون اللقاء كأنه امتحان لابد ان يجاوب الضيف علي كل ماورد فيه
ثم كأنهم يعجبهم صدي صوتهم فلا يتركون للضيف زمنا للحديث ويقاطعونه في ادق اوقات الحوار ,

رزقت بنتا ,
وتورطت ورطة جد

ورطت ورطة
اتفقت مع بناتي او بالاصح طلبن هن انو اسم المولود من حقهن براهن , وكأي ديكتاتوري وافقت ولكن بشرط ,, يكون عندي حق الاعتراض والرفض
وهاك يا اسماء ,, والله اول مرة اسمع بيها ,, واشيل اسأل ,, اها ده معناتو شنو ولا يملن الشرح وقوقل قاعد ,,, جابو لي كراس ,, الاسم ومعناتو ,,وكلهن اسماء كوفر ( ليست كفر بلة تعبير سوداني ) ,, وانا اشيل واعترض وهن يشيلن ويجيبن لي ,, غايتو الاسماء الزمان الكنا بنشوفها اسماء جكس نضيف مافيها زي مي و ندي وسهي وكدة ,, اما سمية ونجوي وانتصار ,وسهير فدي اسماء متخلفة علي حد قولهن
غايتو حسمت الاختيار مجبرا ,, فبكرة كانت السماية ولي الليلة الاسم بروح لي
تقولو لي استلاب ثقافي
ده بقا استلاب اسري

قبل الاسماء الاجنبية القال عنها حميد
لا الأسامي الاجنبية تمحي من عيني ملامحك
وقال
الاسامي اجنبية
ختت الراس اجنبية
طفيت النور اجنبية
رعشة الفركة اجنبية
والخوازيق عربية
اها قبل الاسامي الاجنبية عيالنا الصغار بدو بي طيور الجنة وانتهو بالكليبات الشرقية والغنا الما مفروز ,, لا بعرفو الكاشف لا عركي ولا مصطفي و محمود ,, ضاربين الغنا الاجنبي البتغنيهو الاسما الاجنبية , واللي بتتحدث عن مشاكل وواقع ما حقنا ,, واريتها كان فيروز ولا مارسيل ولا نجاة راضي ولا ام كلثوم ,, غنا تسدد منو اضنينك

أبسن اخوي،

حرررم دي مي كانت المحرية فيكا.

بس أديكم ضهري، تقعوا فيني قطيعة وطنيز مع صاحبك نايل.

شيخ القبيلة قال لي بامسيكا:

بامسيكا دي مي كانت المحرية فيكا
يقابلك نايل ومن الكسبتو يخلي ايدكا؟

إت يا ابسن يقابلك نايل وتنقلب عليّ؟

أنا ماني راجلا خام ومتخلف وما بعرف يتعامل مع التقنيات الحديثة،

علا منبر بكري أصابوا فيروس جنون التوالد أو في رواية أخرى الاستنساخ.

وراح يكرر في مداخلتي،

ها دا ذنبي أنا؟

صلحوا منابركمن على اللمين نترسا ليكم كلام عضم لامن تقولوا بس.

شوف ديل بالله.

بجي راجع بعد انفش شوية من الزعلة دي.

ها حامد اخوي طلق بباجح فوقك ,, المباجحة دليل المحبة
وانا زي ما قال ودضحوية
ما سمسار قوالة
ولا رفيقي بعقرو
ونفسي مكجنة الناس السوا وبتنقرو
ها زول طب خاطر ساي
وراجينك تب

أبسن أخوي، حررم، ما قلت لي بباجح فيك، الفيني راحت.

أنحنا ما ناس قلوبنا صابون لوكسي.

أها كنا بنتحدث فوق مسعلة لغتنا المحلية السموها دارجية، إدرجن فوق النار.

أمسك عندك الهند.

الهند دي، فوقا كمين إقليم وكل إقليم كمين ولاية وكل ولاية عندها لغتها المحلية.

أولي الأمر ما قالوا للهنود لازم غصبا عنكم، تتعلموا اللغة الهندية (Hindu) وهي اللغة الرسمية للبلاد، زيها زي اللغة العربية في السودان، أو ممنوع تتعلموا إلا باللغة الرسمية.

لا أبدا، أولي الأمر الهنود عملوا نظام تعليمي يسمح لكل فرد هندي أن يتعلم بلغته المحلية من الروضة وحتى الجامعة، بشرط ان يتعلم ايضا اللغة الهندية الرسمية بالإضافة للغة الانجليزية.

يعني اي هندي متعلم اليوم، تلقاه (بالضرورة)، بعرف هندي وانجليزي بالاضافة للسان أمو.

ولأنو الهندي بدرس العلوم بلسان أمو، طبعا لازم إبرز ويتفوق. مافي حاجز لغة، مافي تفكير بلغة وكلام بلغة ثانية.

عشان كدا الهنود اليوم غزو العالم باتقنيات الحديثة. أشطر ناس في تقنية المعلومات وهندسة الإليكترونيات اليوم تلقاهم هنود. بلقيت ذات نفسو غنى بسبب شطارة الهنود. الاخترع ال hotmail هندي. الهند دولة نووية. الهند الآن دولة صناعية وفيها منطقة لصناعة الإليكترونيات بسموها وادي السيلكون.

دا كلو عشان أولي الأمر الهنود عقولم واسعة ونظرتم بعيدة، مو زي ناس قريعتي راحت.

اتخيل، أطفال كادقلي يدرسو باللغة النوبية واطفال دنقلا يدرسو بالرطانة الدنقلاوية وأطفال كسلا يتعلمو بلغة البجة ... وهلم جرا. ... شوفت كيف، هلم جرا ..

كان مافي سوداني يستنكر لهجة سوداني تاني أو يضحك عليها أو يحول الناطقين بها إلى نكات سخيفة في إعلام أسخف.

وما تخليني، يا أبسن أفش زعلي منك ومن صاحبك نايل في أولي الأمر واروح في داهية وترتاحو مني.

تلقوها في الغافل، أنا راجل حصيف ونجيض ومدردح.

حامد آ خوي حبابك
وإت مرحب بيك يووت
اضفت لي معلومة هنديه جديد كتر خيرك
الهند البعرفو عنها بلد الديانات المتعددة , لكن حكاية التعليم دي جديده علي , آي صحي شان كده الهنود شطار في التكنولوجيا الحديثة وهكارين اولاد لذينا
احترام التراث واللغة شرط لازم لتطورم ,, وحل المشكلة بالقوة عجز عنها ستالين في روسيا سابقا ,, حلاها بالرجالة وبعد اكتر من ستين سنة رجعت تاني بعد انيهار الاتحاد وبصورة عنيفة وازرط

دوار جمل نسيبتو
مثل سوداني
ويتموهو ليك
دوار جمل نسيبتو ,, اكان لقاهو يغني واكان ما لقاهو يغني
يعني ما فارق معاهو
هسة دي بفصحوها كيف زاتو

يا الله يا الله ..
ما أحلاكم آ ناس !!
متعة باذخة والله متابعة هذا الابوسن !!

استاذي ود المشرف أكيد الاحترام
انتم اهل مكة الذين يدرون شعابها ,, وما انا سوي عضوا جديدا أتلمس الخطي واسير حذرا أن أطأ طرف احدهم دون قصد او يطأني من ظنني غير ما يريد
يسعدني جدا ويشرفني ان يقرأني قدامي الاعضاء , وتزداد فرحتي انني وقعت عندهم موقعا سمحا
لك التقدير والود بقدر ما يتسع لك

بحيادية تامة ودون الولوج في خلافات
الضايق ركبوك من يشوفك يعيا
وبعضهم يقول
الضايق ركوبك من يشوفك يحيل
ويحيل لفظة عامية تطلق للرغبة في ممارسة الجنس
واحيانا يقولون
ضايق فيك ركوب الفزرة
والفزرة معروفة فالدابة الفزرا ركوبها سهل
ولكن يخرج المثل من دائرة الدلالة الجنسية ويصبح معناه وفق موقعه
فالذي يستغلك يجوز فيه ذلك
والذي يستفيد منك يجوز فيه ذلك
وعموما يضرب المثل للاستفادة و الاستغلال

قالوا الصبيان بقعدو وسط الرجال في ديوان الحلة ولا المجلس ,, يتشاوروا و ينضمو ,, علا فرد واحد ساكت ساي ما بنضم ,, اها امو شاكلتو
ككيف ما بتنضم وسط العيال
قال ليها
العيال لابسين حجباتم وبقومو ينضمو ويهزوهم ,, وانا ما عندي ححاب
الحجاب هين ,, امو باعت ليها بقرة وملتو حجبات ,, ضرعاتو الاتنين بقن حجبات من اباطو لا تحت
اول ما الناس قعدت ,, وقف هو
سا,,,, سا ,,,,, سا ,,,,, سا آناس
وسا تقال للتنبة ولفت الانتباه
سا ,,, سا ,,, سا
أني فنيسة ديك !
أكان مشيتو كي معاكم وهز ضراعو اليمين والحجبات يسون كش كشك ,, ورفع ضراعو الشمال وهز ضراعو والحجبات يطاقشن
واكان قبلتو كي معاكم
والسلامو عليكون
اها فنيسة الديك دي الصوفة القاعده براها في ضنب الديك وكبيره و طويله

الوكرة!
الاسد منجض ابوالحصين نجاض ,, كل مرة ماخد حقو وفريستو التعب فيها
اها يوم ابوالحصين جا للاسد , وقال ليهو
الليلة لقيتك مكانا سمح ,, مليان صيد وشدر و موية ,, اها الاسد وابوالحصين اتناكعو لامن تفف وصلوا المحل
الاسد عاين كدة وقال لأبوالحصين
مكانك ده سمح ,, لكنو وكرة
ابوالحصين قال ليهو
كيف وكرة ! كدي اسمع صوت الصيد ده
الاسد قال ليهو
ده وكرة ما بخشها ! بشوف الدروب خاشه ,, لكن ما شايف لي دربا مارق
احذروا الوكرة بعدم الدخول فيهاالوكرة!
الاسد منجض ابوالحصين نجاض ,, كل مرة ماخد حقو وفريستو التعب فيها
اها يوم ابوالحصين جا للاسد , وقال ليهو
الليلة لقيتك مكانا سمح ,, مليان صيد وشدر و موية ,, اها الاسد وابوالحصين اتناكعو لامن تفف وصلوا المحل
الاسد عاين كدة وقال لأبوالحصين
مكانك ده سمح ,, لكنو وكرة
ابوالحصين قال ليهو
كيف وكرة ! كدي اسمع صوت الصيد ده
الاسد قال ليهو
ده وكرة ما بخشها ! بشوف الدروب خاشه ,, لكن ما شايف لي دربا مارق
احذروا الوكرة بعدم الدخول فيها

فلتخط لك دربا ما بين
ان تتحدث فقط ليري الناس حجباتك وتقول خارم بارم
وما بين ان تعرف الوكرة فتتجنبها

كبير المكابراب
رجلا يملك تسعة اولاد لهم بسطة في الجسم وقلة في العقل ,, وليس اسوأ من الضخم مفتول العضلات ومفتريا ,,
وكبير المكابراب هذا رجلا متسلطا مستقويا بأولاده ضخام الجسد ,, يقف هو اولاده علي قارعة الطريق الوحيد يتعرضون للمسافرين ,, يمسح والدهم احد قدميه بالزيت ,, فيوقف المسافر انه غبره ,بالتراب حجة الكديس في عرض البحر , والدليل ان قدمه صارت غبشاء ,, تلك القدم المواجهة للمسافر بعد ان كانت لامعة مثل اختها ,, ويحدث النقاش الذي يحسمه التسعة بجلد المسافر واخذ ماله
يتبع........

اها المرة الجاية أكان الله جابك بالدرب زاتو بتعمل حسابك ,, بتجي بي فوق ليهم ,, وابعد عن الشر وغنيلو ومضارفة المؤمن علي نفسو حسنه
لكن عاد وين إلا تطير
يحصلوك التسعة مزودين بعكاكيزهم المضببة وسكاكينهم المصنوعة من صحن البلي ووارد اب جلفة ,, سكين تقطع الابره كج علي اتنين
يجو قايدك لي ابوهم
ها زول عينك لينا وتبرانا بي فوق مالنا مجظمين ولا مجانين
وانت سهم الله مرمي فيك ,, مقلوع مقلوع اسحن ما يدقوك في فصاحتك دي ,, تسكت بس
اها ده حار وده ما بنكوي بي وده إلا ده
يقلعوك زي الترتيب وتحمد الله الما كووك بالمحور

فوق
لحين ميسرة ....

الجري قبل الشوف قدلة
مثل سوداني

الجري قبل الشوف قدلة
المعني يعني قبل العين تشوف المصيبة الجاية ممكن تتخارج ,, تتخارج علي اقل من مهلك ,, تتقدل ساي ,, والقدلة مشي الاعجاب والخيلاء والفخر
يعني تجي تغالط وقت العين تشوف
انا اخو السمحات طلق اكان عارف ما كان مرقت ,, كان رجيتم وخليت ريحتم طير طير,, هيع انا البشبع الصقار كبد الرجال
شان الجري عيبة

اها الجري ده عيبة كبيرة ,, حتي المك نمر رغما عن تاريخه المشرق وتقهقره وليس هروبه بل انسحابه التكتيكي متحرفا لقتال لم يشفع له ,, فكان محض هروب ,, وعلي العليهو بقا مثل يقولو ليك
قوم قومة نمر من شندي
والخليفة في ام ديبكرات مرق يجيب الفزع ولم يهرب من قتال خائفا
وده كلو خليهو ,, قصة المتنبئ وموته اياهو خوف الفضيحة وكتلو بيت شعر بتفوجج فيه و يتنبر وضارب الطراوة ما قايلها بتجي الريح قالبا

امكن اكتر ابيات وضحت عيب الجري في الشعر السوداني , والشعر السوداني مليان بأشعار الحماسة والفخر , وعموما اشعار الحماسة بقولنها البنات اكان فوق ابهاتن ولا اخوانهن ولا ازواجهن ,, يعني نادر تلقي ليك شعر حماسة كاتبو رجل ,, فالبنات بحرضهن وبمنحن
اها القصيدة الشهيرة في تقديري وطريفة
حجر الزلط مين بقيسو
والليلة دوبا
والله بعز بنيتو
فتقول فيها
يا الجنيات المشيتو
النعل كدي ماجريتو
إتي مالك ومال جرينا
ماكي فارسا بتبارزينا
ولاكي صبيا بتباطيننا
النعلو اخوك مافيهو فينا
اخوي الليلة كان جري
شعري بزينا
وبعقر ما بجيب جنا
يعلم الله جريتو جري السواد
وكسرتو شوك الكتاد
وقايلنو قصب البلاد

عكاز الطرور اب ضربتا سلامة
اها ده من الامثال البقولوها في القومابي
القومابي هو البتفشخر وبفتخر ساي ,, نفخ بس ,, وهو كضاب المية ,, يعني مية نفر بي جيهة وهو براهو يغالط فيهم ,, يغالط مية حضروا القصة
الطرور ده قصبة بتقوم في البحر , تريانه ومليانه وضخمه لكنها فخة ساي ,, زي الاسفنج ,, تشوفها ماكنة تخعلك ,, وبربطوها مع بعض وتبقي طوف , مركب يعني ,, لخفتها طبعن
ولامن تضرب بيها زول تسمع طااااااخ لامن تنخلع زاتو ,, وتعاين لكبرها تقول كتلو ,, لكن ولا حاجة ضربتا سلامة ساي ,, يعني فزاعة بس
جوعارة بس

قالوا
اخونا مفلس وسروالو مقدود ,, وقاعد في دونكي الموية وقرفان قرف شديد ,, والبنوت بردن في الموية ,, وناس البقر والسعية ,, المهم مولد بس
جا واحد راكب فوق فرسو وفرسو عاجبو , وروحو عاجباهو ,, وقلبو غاتس تب
اها الفرس جاي عطشان من ما شاف الموية ساي , رفع كرعينو القداميات وصهل , وزولنا من فوق ليهو زي دعاية فيلم زورو ,, والبنات اتلفتن عليهو ,, وزولنا راسو كبر تب , اها داير يتنبر قال للحصان
هاي ,, حصان ود الحايل موت ما لقيتا لي رقبتي دي نلقي ليك اتا يين
صاحبنا الزهجان عندو فاس كتال ,, صغير وكلو حديد ملحوم لحام ,, دنقر ليهو وقبل عليهو بي ضهرو وخت سن الفاس في الواطة وقابضو باليمين
وقال ليهو
هاي
دواس بدوري سبب
بدور موت هبيشيني في فنيستي دي

ههههه
يعني ماخد وضعية قتالية ,, يهبشو بي وده يتنالو بالفرار بي هنا ,, الجاري عليهو ما يحصلو
والبادئ اظلم ومغلوب
الرجال صناديق ما تفتشها
وزولنا ده قهران وما فارقه معاهو
اها الزول الماعندو البخسرو ابعد منو بلحقك امات طه

قالوا
واحد جاب ليهو مهندس مدني يخطط ليهو ارضو الزراعية , اها ركبو اللاندروبر ! وبووو لامن تفف وصلوا المشروع , نزل المهندس بي نظارتو لف المشروع ,, والزول مباريهو ,, اها المهندس انعصر بول ,, مشي يتسير ,, قعد يبول وكل مرة يزح ويتر لي ورا ,, بال من واطي لي عالي
وعمك بعاين ليهو بي الطوالة
عمك قال ليهو بعد ما بال وجاهو
المشروع خليتو
ليه!?
قال ليهو
انت يا ولدي بولك ما هندستو داير تهندس لي واطتي كيف
اها الواحد يصلح نفسو اول حتي ينضم ,, يعني ماممكن تختار اسم اسم كودي اجنبي وتجي تتكلم عن التراث الشعبي لأنك جواك في عقلك الباطن زاتو رافضو ( ده تنظير مني ساي دون استناد اكاديمي ما يجي واحد يغالطني ,, لو غالطني بنكرو وبنط منو

قالو
وآفة الحديث رواته
و
الهبرن هافن ما صبرن شافن
المهم
قالو
واحد مثقف ( مش مثقافاتي اللافة اليومين ديل ) بنبذ في واحد
انت واحد مبتذل وما بترقي لمستوي الحوار معاك , وواحد شوفيني مصاب بعقدة الذات والتفوق العرقي
وهكذا
اها البنبذو فيهو ما فرز شي لكن عرفو نبذ ونبذ شين ,, فقام قال ليهو
غايتو جنس نضيماتك دي ما بعرف ليها ,, لكن
أ,,,,,,,,, امك (.........)رر كده

قالو
وآفة الحديث رواته
و
الهبرن هافن ما صبرن شافن
المهم
قالو
واحد مثقف ( مش مثقافاتي اللافة اليومين ديل ) بنبذ في واحد
انت واحد مبتذل وما بترقي لمستوي الحوار معاك , وواحد شوفيني مصاب بعقدة الذات والتفوق العرقي
وهكذا
اها البنبذو فيهو ما فرز شي لكن عرفو نبذ ونبذ شين ,, فقام قال ليهو
غايتو جنس نضيماتك دي ما بعرف ليها ,, لكن
أ,,,,,,,,, امك (.........)رر كده

الواحد يعافر ,, يعافر في الكتابة لامن يوم ينفهقك

المرفعين ماشي مع ولدو في الغابة ,, لقو عذرة بني آدم , ولدو ما شاف بني آدم قبل كده , سأل ابوهو
ابوهو قال ليهو
دي مش عفنة ?
سيدها اعفن من منها

ولو لاقيتو ماترجاهو , يدو بتتفك وتحصلك
ما توكدو

من وكد وكدوهو

حكمة مبالغة

من وكد وكدوهو

...
لحين ميسره
...

عبدالحفيظ ابوسن:

Quote: ( بباجح فوقك ساي )

ياسلالالالام ياخ كنت متابع خيطك الظريف مستمتعآ ومتثقفآ في اللغة الداخلية الحنينة
تلك التي نسمعها ونحن في المهد ، لكنا ندخل المدارس ونتنكر لها
البجاح دي لسنين عددا ظننتها من منجورات أمي
حتى سمعتها من البروف عبدالله الطيب أو عون الشريف

حبابك ابوساندر

رديت ليك امس والليله ما لقيت الرد

ياربي المنتدي ده مسكون

العبوب او البو
الدغور

بتذخر اللغة الدارجة بمسيات مدهشة يمكن استعمالها كتشبيهات تغنيك عن كثير من القول
البقرة البتلد وجناها بموت ,, بشيلو جناها وبسلخو جلدو ويحشوهو بي قش , ويربطو ليهو عصي بدل الكرعين , ويمسحو ضهرو بي موية ملح ,, ويختو جمب امو تلحسو عشان تدر اللبن ,, في بقر بدس اللبن ما تحلب إلا تشوف جناها وحركة اللحس دي بتدر اللبن ,,
وتستعمل كلمة عبوب او بو للاساءة للشخص ,, بو بالفتح

حفيظ:

Quote: ياربي المنتدي ده مسكون

هههه أكيد ، ماشايف الشياطين البتتقافز من بوست لآخر ؟

مرحبا ابوساندرا
الشي ديل ما ربطوهم وفاكينهم ساي في رمضان ? غايتو اخوك بختا الوكرات والبوستات الاستفزازية ديك ,, تبقي ليك زي الحسكنيت ,, ولا النقول زي الدخلت يدك في شوال دقيق ,, اها بقول
مية نطة ولا واحد بعبوص

قال ليهو
امي قالت شافت امك في الانداية ( يعيره )
قال ليهو
امي خليها ,, انت الودا امك الانداية شنو ?

شيخ العرب الدنيا خريف والبلد صابنة صبنة شديدة ,, بسأل في الناس البجو من غادي
اها المطر كيف
يقولو ليهو
البلد محل وقاطة من حتة سحابة
اها طوالي بلوي خشمو غادي منهم ,, وما بشتغل بيهم
جاهو واحد وسألو
قال ليهو
والله يا شيخ العرب محل تنزل تتسير وتقطع الجمار
اها وشيهو انشرح وهاك يا فطور للضيف
وجيبو القهوة الزول بكون متقريف
شان كدة
بقولو
السعد ملافط

فوق
لحين ميسرة..

يا سسسسسسسسسسسسسسسلام يا عبد الحفيظ ياخ الله يمتعك بالبهجه.. دى حكاوى طاعمه جدا
والله ذكرتنى حكاوى امى الله يعطيها عافيه الدين والجسد... نفس الطريقه .....
تعرف ..انا بتذكر القصص لكن بنسى التفاصيل
وهى دائما ما تحكى لنا القصص عن عالم الحيوانات القصه فى حد ذاتها بتعالج مشكله اجتماعيه او فيها حكمه وبطريقه ساخره ومضحكه
قالت مره الاسد ( ملك الغابه) عمل اجتماع للحيوانات وقال للثعلب تمشى توصل الغنمايه دى بيتهم عشان الدنيا ليل وكده...
قال الثعلب فرح فى سرو شديد للفرصه دي ...لكن عايز يظهر للاسد انو هو ما عندو رغبه فى المهمه دى عشان الاسد يصر عليه
طبعا الاسد ما بحب اى حيوان يعصى اوامره فقام الثعلب قال للاسد والله يا سيدى نعلينى مقطعات والحسكنيت كتير فوق الوادى
والثعلب فى سرو بيقول دى يسويها الله دى يسويها الله لكن فى الظاهر بيحاول يعمل فيها ما عندو الرغبه
طبعا زى حكايه يمتنعوا وهم راغبون ....طبعا القصه دى باختصار لانى نسيت معظم التفاصيل

وبرضو عندها القرد اسمو ابو حليمه... وابو حليمه دا الحيوانات بتلجأ ليه عشان يخارجها من الاسد وظلمه لانو ابو حليمه عندو سرعه البديهه
والحكمه

من حكاويها انو الاسد مشى للبقره وهى والده وشال جناها وقال دا ولد التور حقوا !!!
البقره المسكينه مشت حكت لى ابو حليمه قالت ليه اتخيل انو الاسد جاء وشال منى ولدى وقال للحيوانات التور حقوا ولد ( طبع مافى زول بقدر يقول للاسد بغم)
قام ابو حليمه قال ليها انتى امشى الاجنماع بعدينك وما تقولى اى حاجه

قال ليك الحيوانات كلها مشت الاجتماع والاسد قاعد بتكلم مع الحيوانات ....
جاء ابو حليمه ماشى سريع جنب مكان الاجتماع وقام الاسد شافو وبدأ ينادى يا ابو حليمه ..يا ابو حيمه مالك ماشى سريع كدا وما جيت الاجتماع انشا الله المانع خير
ابو حليمه قال للاسد والله انا ابوى ولد ماشى اودى ليه الاكل
قالم الاسد قال ليه انت مجنون الرجال بيولدو ابو حليمه قال ليه والتيران بيولدو
فقال ليك الاسد خجل ورجع للبقره طفلها

طبعا يا عبد الحفيظ هذا البوست شفع ليك عن بوستك بتاع لا تستحق أمراة دموع الرجال ولا بوست بهذا المعنى

تحياتى وواصل الحكى

حبابك زينب وسعيد بي مرورك وطلبي ليك كدي راجعي آخر مداخلة هنا
لا إمرأة تستحق فيض دمع رجل !

زينب فعلا بقولوا للقرد
ككو ابوحليمة
الثعلب ابوالحصين
الذئب المرفعين
قالو واحد قال للمرفعين داير اشغلك راعي للغنم واديك ماهية شهرية
قال ليهو
الماهية خليها ثبت لي السرحة
ما مشكلة ماهية الوزير ولا المدير كم ,, المهم صلاحيتو وبطلع ماهيتو براهو

القرادة قالت
انا واخوي الجمل جبنا العيش من القضارف
شوفو
قدمت نفسها عليه
وجعلته اخوها لتوهم الناس بتساوي مجهودها معه
وهي لم تبذل مجهودا بل كانت عبئا عليه ولم يشتركوا إلا في زمن الرحلة

في الزمن الزمين في ارض السودان
كان الزعيم الفلاني لا يطأ ارضا بقدمه الشريفه حتي تصبح ملكه
اها يوم جا جمب واطة واحد ,, واحد ماعندو غير ارضو دي بس ,, وقال كده سيد الواطه دنقر ورفع الزعيم في كتفو
طلق ما تمشي بي كرعينك ,, افو ! معقول كراعك الشريفه تدوس الواطه ال######انه دي
وكب شالو لامن مرقو بي هناك
الناس ضحكت عليهو
قال ليهو
خايفو يخت كراعو في واطاتي وتبقا حقتو

ما تخرب الموت بالرفسي !

واحد بتو حملت سفاحا ,, قال ليها
يا بتي لا شرفا حفظتي ولا مالا جبتي
يعني فضيحة بس بدون عايد
ملحوظة
ليس للنكتة او الامثولة الشعبية دلالات سياسية لذا وجب التنوية , اه

النفير
عادة سودانية حميدة
ولكن
النفير والفزع يساوي بين الناس غنيهم وفقيرهم
فهل ما يحدث الآن نفيرا سودانيا قحا ?

Quote: ليس للنكتة او الامثولة الشعبية دلالات سياسية لذا وجب التنوية , اه

كيفن يا أخو ما لها دلاله لها ولله العظيم فرجه من حلفا حتى شجيرات نمولي لما كانت نمولي سودانية
وباقيلي زي صياح البريطانية رصيفة بت المجذوب ما دحين الدنيا مفخرة وزندية من فارس حتى غارسيلا السودانية

مرحبا عادل وعيد سعيد
لا اقصد مطلق الحكاوي بل ذات الحكوة فقط , والتنوية بقصد السخرية وتثبيت ان لها دلالة سياسية
كامل الود

حكوة حقيقة
شيخ العرب بنضف في كدوسة ساي ,, ومشغول شغلة شديدة ,, جاتو مرتو تبكي من جوة
مالك يا مرة بتبكي ?
ابوي قالو مات
فرد عليها دون ان يرفع رأسه
اتي في ابوك المات ولا في كدوسي الانكسرت فيهو القشة
فائدة
ملايين الباكين لموت عزيز
وعشرات من ينضفون كدوساتهم رغما عن مسؤوليتهم المباشرة في بكاء اولئك
تنوية لازم
الفائدة لا داع لها ولكنها ضرورية لفك الالتباس لنخرج من طق الحنك ساي

أبو سن
تحياتي يا شفيف
بحلف وبالحلقوم وبصيح أنك حريف
عاد كان كدا أعد البصر كرتين ربما ينقلب عشانك مرتين بين قوس وقوس لهجتين
دايماً في حياتنا بتحصل مفارقات عنيده يا الحبيب قدر ما تحاول تجبر رجلا تلقاها طاشه وشريده
واحياناً تنتكث الحاجات في ضوء حضوره وكثير من الناس في لحظات دفن بدس محافيرا حباً في زيادة البكا
تعال نطلع شوية
حال الناس نزوح وقعاد وفي القعاد ناساً عليهم ينزحو ويترابط
يوم انطق الثكلي في كوة الدويم سألنا السبب قالوا الراجل روحه طلعت
إنكالت المره بالرماد والتراب خياتا يسون وووووي
والثلكي يلامس السما ما بهدا يفور يطلع زي اللبن كان بجمر أو بدون جمر لهبات الثكلي
والجنازه لحين ما طلعت
الثكلي يحش كبدة الناس حش اللهبات دمعتم ما بتخر
الناس حناجرم تعبت والفجرية قربت تشاشي
الناس الجوه الحاضرين الغسل والعيون تبحلق يمين تبحلق زي عيون الحديه
تبترب طلع نفس صاح هوي يا ناس هاتو الولية
أطوطحت حتي ما وصلت الدمعه عبره والعبره ثكلياً يفج مسامع الميتين وااااااي علي
وسوسو بخجل في شحمة أضانه اليمين ( الراجل فيه باقي أمر ـ زبد رغبته ما خلص )
صاحت سجمي .. سجم حالي الباقي علي
لكن لابد من أمر
ما شاخت الحياة طلع الولد
ناس بقولو ود اللقية
وناس بقولو ود الفطيسه
لسع في الكوه طق حنك

البراري
سلام يا صاحب وكثير ود
ههههه
لكن عمك ده ما سبق فتوي مضاجعة الوداع
ود الفطيسة ! اسم ختير ضومة كدة
وبقولو يا عادل آ خوي
انت تبكي وهو يلحس في دموعك

وبقولو
يدك في خشمو واصبعو في عينك
و
تحفر ليهو في قبر ابوهو وهو يأجر ليك المحافير سوق اسود

قال حميد

يا ارزقي
يا مستفيد من بزة اطفال السواد
المانزل فوقم ملك
ونقول
غضبا لمن يسترزق من كوارثنا ويستفيد , الزول ما عاد طفبوعي كما قال بشري الفاضل
مع كامل الود

بالله أحاحى فوق البوست ده لى شهر .. أقول أدخلو .. أنط وأمش لغيرو
وعقلى يقول لى ما ياها النكته القدبمه ديك تاعب روحك مالك شوف غيروا .
أها الليله كملت البوستات البتنقرى جت ,, وعاينت لى بوستيك ده ولقيتو
عمل أربعه صفحات ,, عقلى قال لى يازول الشئ ده ماهو نكته ساى كدى أدخل شوفو .
وماشاء الله بسم الله دخلت ولقيت حوا الولاده ما خذلتنا بعد شردة عماد عبد الله وآخرين
قليلين مبدعين من هنا ,, أها لقيت ليك خواء المره دى عوضتنا بزول يمكن بسد فرقة الناس
الكتابتهم طاعمه وكانو بهار البكان ده ,, عوضتنا بيك يا أب سن ,, والله ماك زول ساهل
من أول كلام كتبتو فى هذا الخيط خليتنى بدون ما أشعر سكيت القرايه حتى الصفحه الرابعه .
الشى الذى إستدعانى أن أذهب غدا وأشوف لى دكتور بواسير فى أيام العيد دى .
يأخ والله شغل جميل وحكى مفرح وأجمل مافيهو إنك بتستعمل كل لهجات السودان المتاحه
والغير متاحه ,, أها من يوم الليله حأشوف لى بنبر من بيت العرقى داك .. ودى القعده فى بوستاتك
كلها .. بس إن شاء الله العرقى يكون بكر .

Quote: زي النص الناقص لا يسكرك ولا ينعنشك ولا يخليك صاحي

أما دى فأثبتت لى إنك معلم كبير ,, فتك بعافيه .

مرحبا كمال سالم
اسعدني تقريظك واحزنني مفارقة من الذين يفترض بهم الحضور ,, ولا اقارن نفسي بمن ذكرت رغما عن عدم معرفتي بهم , فأنا أكابد الكتابة مكابدة ,, ولعلهم لو أتو سيتبين لك نشاز خطوي مع تناغم رقصهم
من هنا اناشد من ذكرت ومن لم تذكر
اناشدهم بقول الشاعر توفيق زياد
اناديكم


أشد على أياديكم..

أبوس الأرض تحت نعالكم

وأقول: أفديكم

وأهديكم ضيا عيني

ودفء القلب أعطيكم

فمأساتي التي أحيا

نصيبي من مآسيكم.

أناديكم

أشد على أياديكم..

أنا ما هنت في وطني ولا صغرت أكتافي

وقفت بوجه ظلامي

يتيما، عاريا، حافي

حملت دمي على كفي

وما نكست أعلامي

وصنت العشب الأخضر فوق قبور أسلافي

أناديكم... أشد على أياديكم!!

واحد شحد حمـــــــار جارو ,, فجارو اعتذر بأنو الحمار مافيش ,, وداك شايف الحمار ,, قال ليهو
تقول الحمار مافي وانا شايفو ياهون داك
قال ليهو
هو انت طالبنا حمار و لاعذر
لذا قيل
الما بفهم التلاويح لا يريح لا يستريح
‏!‏?

قالوا ابوالحصين جا للاسد وقال ليهو لقيت ليك مرتع سمح خلاس ,, صيد راقد هبطرش ,, اها ابوالحصين مشي قدامو والاسد ناكعو ,,, لقو طين ,, ابوالحصين خفيف فت مرق بي هناك ,, الاسد رفع كراعو اليمين ابت ,, جر الشمال غرقت للنص ,, داير يجر ضنبو لقاهو اتلكك ,, ناداهو
ابو الحصين انا ورطت
قال ليهو
هو انت شفت ورطة لسه ? خلي الشمش تفقع واهل البقر الاكلتهم يجوك بي حرابهم
الشمش تنشف الطيب ببقي اسمنت بس
لذا قيل مثلا سودانيا
لو شكرو ليك ارتع دون

ام رخم الله قالت انا اخير من تلاته
الشايل حمالتو وقاعد مع نسابتو
البمشي البحر ويجي بي جنابتو
القاعد في المجتمع وبسأل رفاقتو
ام رخم الله طيره غبيانه قال القدال
وام رخم الله مكسيكيه

سلام يا صديقي العزيز عبد الحفيظ. ومرحباً بك في المنبر.
قرأت خيطك هذا باستمتاع كواحد من أبناء السكة الحديد بكوستي.
ولم يسعفني الوقت للمشاركة فيه. فمثلك لا يدخل عليه بمداخلة عجلى.
ولكني اليوم مضطر لفعل ذلك لأن مصاب أهلنا من المهانة والجوع والذل
والطوفان مصاب كبير. يدك معنا هنا، يا عشا البايتات ومقنع الكاشفات.
** حملة سودانيز أون لاين للمنكوبيين من أهلنا فى السودان بسبب الامطار**
ومثلك لا ينام وأهله مشردون، هائمون على وجوههم مع الهوام في الطين!

هيا على الصلاة. هيا على الفلاح!!! ولا صلاة اليوم لمصل إن لم "ينقذ" أهله. وإلا فلننقذ
أنفسنا من "الإنقاذ!!!!!!"

أليس كذلك يا صاحبي؟

هيا على الفلاح!!!!!!!

مرحبا حيدر بدوي تحية لك ولعيالك
سررت بك وحين رأيت اسمك تذكرتك ونحن بمدرسة الاهلية وانا رئيس الجمعية الادبية اقدمك بصوتك الندي
شمس الخريف الباكية
في كل قيف متاكية
سأكتب عنك في بوست الناس التنضح سكر
عن الفرح وسط الحزن وكتابتي التي عاتبتني فيها هنا ,, لم اترك يوما مساعدة اهلي ومعي نفرا كريما من ابناء كوستي في جميع اصقاع الدنيا ,, ولمدة خمس سنوات لم يتوقفوا عن دعم
الفقراء
الايتام
مرضي الايدز
مرضي السكري
مرضي الكلي
المعوقين
وتوج ذلك بإنشاء مستشفي لحوادث الاطفال
وذلك عبر بوابة
منتدي كوستي سيتي
كامل دعمي لكم رغما عن انني اري رأيا مغايرا ,, فنحن نساهم في حل ازمة النظام ,
تحية لك ولاسرتك

بيوت الجالوص افضل مواد البناء لجو السودان , تحتاج فقط لعبقرية مهندس بدمج الخبرة الشعبية مع العلميه
الاسمنت يحول البيوت لخزن حديديه حين تقطع الكهرباء

يعلي السودانيون من شأن النشاط الجماعي
فيقولون
الموت وسط الجماعة عرس
تحية لشباب نفير

الضيف اب ربابة
الضيف الوصف المفراكة شخوص طريفه في الواقع الشعبي
بجيها

الضيف اب ربابه ,,, والربابه آلة عزف وترية شعبية زي العود ,, يعني تعزمو ويفضحك ,, ينتك للناس ويبشع بيك
مرتو رفله ,, بيتو شين و######ان ,, ما بعرفو يطبخو ,, الكمونيه بي بعرها ,, ملاحهم مقطوع مويه
الضيف الوصف المفراكة , ده الضيف البتعزمو ويتلفت يعاين في بيتك ويدنقر ويصنقع ويتناطي
قالو الضيف عزموهو وجيعان والمره دايره تلايق الملاح فتشت المفراكه سما واطه ما لقتها ,, الضيف قال ليها مفراتك ياهون ديك مغزوزه في الراكوبه

قالو الجمالي شادي جملو , وفيهو خرجين ,, خرج مليان عيش والتاني رملة عشان يوازن الحمل
لاقاهو واحد ,, واعترض عليهو كيف يشيل خرج فيهو تراب ويتبع جملو ,, يدفق التراب ويقسم العيش
الراي عجب الجمالي , وقام سألو عندك شنو في السعية ؟
قال ليهو إلا حماري الراكبو ده
الجمالي قال ليهو بقولو
الزول رايو قدر مالو ,, وانت رايك تالف وما بعمل بيهو
مشي قدام لاقوهو الجهديه ,, شايل شنو ,, قال ليهم تراب ,, قدو الجراب دفق التراب
امشي جمالي مجنون ساي

يا تدري يا ينكسر قرينك
يعني
يا تحلبي اللبن او اكسر قرنك ,,
امكن ما فيها لبن
امكن ما والد زاتو
النصيحة دبر معزاية

واحد شاف كديستين راقدات في بعض بكل حنية
قال لأخوهو
شوف المحنة دي كيف
اخوهو جدع ليهم لحمة وقالن كده اتشكلن وقنبن يتخربشن
اخوهو قال ليهو
متحاننات شان ما بينهن دنيا

فوق
ساي
كده

الراجل ومرتو مسافرين , نزلو في بلد فيها اخو مرتو ,, وبتو المعرسها وداخوهو ,, المرة اصرت يمشو لي اخوها في الاول ,, وراجلها ما رضيان
اها الزول اكرمهم كرم زايد , وضبح ليهم ,, ختو الاكل ,, وبعزم لي عمك
صل علي النبي ,,, صل علي الرسول
والزول متضايق ,, قال ليهو
لا حرم ,, خلاس كفاي ,, نقوم نمشي علي ود اخوي ده ما بقبل لو عرف بي جيت واتأخرت منو
ود اخوي من ما شافو ساي ,,
عمي حرم تخش ,, حرم تقعد ,, حرم تنبطح ,,
جابو الاكل
عمك يدو في خشمو ,, حرم تدخل يدك ,, حرم تشيل العضم ده
اها عمك شبع تب
يقول له حرم تاكل ,, عمك يدق الصينيه بي اصبعو ,, حرم عدوك ,, حرم عدوك
مرق بعد داك هو ومرتو ,, وزعلان قال ليها
المتلي انا بستخصر فيني مرتو الشعيراتها ما فايتا راسها ,, ما شفتي ود اخوك ,, حرم مرتو تقش في الواطه وشعرها يقش معاها

فوق
لحين
ميسره

ما كنت بشوف ناس الفيس , وبرضو ما كنت متوقع هذا التشجيع منهم
سعيد بكم ومتابعتكم
عبدالعظيم مكي كتر خيرك ياخ
صلاح الدين احمد والله فعلا حار ليهو , ودي بتذكرني إلا توريني الخلا دي كراع وديك رجل شنو
عباس عذالدين حليلها الاصبحت ذكري
طارق ابومحمد يكفي انني انتمي لكم
بابكر حسن وعيد سعيد
طارق عبدالله , الله يمتعك بالعافيه

تحفظ القصص الشعبية الحقيقية منها والخيالية كثيرا من القيم السودانية المبثوثة في ثنايا الواقع السوداني , ولكل منطقة في السودان حكايتها ولغتها , تتشابه بعض الحكايات لتشابه الواقع احيانا او للنقل من منطقة لأخري مع تلهيج ! الحكاية
وكواقع ماضويا محكيا فتجد فيها بعض المضامين التي تجاوزها الواقع , ومحاكمتها بقيم الحاضر فيه اجحافا كبيرا بها , وجاوزا للموضوعية
فالماضي محض ماضي وقراءته لا تعد اكثر من قراءة للتراث , ويخضع لنظريات التراث , ولا يعني البتة عندي ان نعود له ,, فالقيم الانسانية ابنة الواقع المحدد ومحاولة ادخاله قسرا في الواقع سيشوهه ويفسد الحاضر

واحد شحد ليهو جمل من صاحبو , والجمل آنذاك كعربة آخر موديل ,, فهو وسيلة الترحال الوحيدة,
المهم
اتلفح بي توبو و ركب جمل صاحبو وهج السوق ,, شاءت الاقدار يخلي توبو فوق الجمل وينسرق الجمل
اها جا راجع ,, ولاقاهو صاحبو ,, وين جملي ؟
قال ليهو
جملك راح وفوقك توب !
يعني تغرم لي توبي الروحو جملك

قالو الراجل نسيبتو ماتت ,, رفعها في حمار وربطها وماشي يدفنها ,, في السكة لاقا ناس بلعبو ضاله ,, وهي لعبة شعبية عند اهل البادية , تلعب بالعيدان وتسمي كلاب وبرسم مربعات في الارض تسمي بيوت
المهم ماعلينا
زولنا قال يطعن ليهو طعنة طعنتين ويمشي متخارج يدفن نسيبتو ,, واللعب جر ,,, الحمار عندو زمن عليقتو ثابت في البيت ,, جا وقتها ورجع الزريبه
الشمش طاحت وزولنا نسي الجنازة ومشي البيت
لاقتو مرتو ,, اها ان شا الله قبر امي لين ,, لي قناعه عندهم انو القبر اللين سعادة الآخرة ,, قال ليها ,,, طلق مندي موية بس ,, وطق الموضوع ضرب ليهو في راسو
انا اخو القبر ! ما نسيت الجنازة
مرتو فجأة شافت الحمار والجنازة المربوطة
هي يا فلان ماياهون دي امي جات راجعة
قال ليها
علي بالطلاق الخير اللقتو امك دي في البيت ده كان مشت الجنة تجي راجعه البيت

فوق
لحين
ميسرة

يقول المثل
اخوك كان رميتو قوم منو
ويقول
اكان حبيت خلي فرقة
واكان كرهت خلي فرقة

فرقة تعيد بيها اواصر الود , وفرقة قد تخسر فيها من تحب , ونحن لامن نحب بننبهل ساي ونتدفق ,, ونحكي
ومن الحكي بنظهر عيوبنا

الكلام ده ليه ؟ شايف الناس البتقبقب في بعض دي ,, الواحد يسك اخوهو محل محل ,, لو اتدسا ما يخليهو ,, ولو وقع ما يريحيو ,, ولو مات يشمت فيهو
مساحات التسامح بدت تضيق بالناس ,, وكلو زول مقهور داير يفضي قهرو وزهجو في اخوهو

الولد مشي اشتكي لي عمك ,, قال ليهو

اولادك دقوني وجابو الدلوكة ودقوها ورقصوني رجالة بدون سبب كمان
عمك قال ليهو
وا حسرة شيبي الما حضرت رقيصك ,, يا اولاد جيبو الدلوكة النشوف رقيصو !

الحسنة معطت شنب الاسد

مجبورة ام كنيش علي التدورو وتاباهو راجل امها تقولو يابا

يا أب سن متعك الله بالصحة والعافية وطولة العمر
كما أمتعتنا ببوستك الظريف دا

شوكران يا بدر ياخ
شرفت البوست

عوج الدرب

سكينو دايما حمره


اب نارا تولع من صباح للعشيه

يعرم علي المافيش

في النار وتقول ليك جهز جاييك


اوصاف للكرم

من نكات وحكاوي الطفولة
في ملك عندو كوكا hydrocoele ( قلة مائية ) ,, والكوكا ظاهره للرائي ,, ومانع أي زول يقول اب كوكا جمبو ,, ولو قلتها بكتلك ,, واحدن مسخوت وشويطين راهن ليهو ناس انو يقولها في وشو
مشي للملك وقال ليهو
والله يا مولاي الناس دي بتحبك حب ولو مت يبكوك بكا ,, ناس الشرق يا اب كوكا ,,, وناس الصعيد يا اب كوكا ( يبكوك ) ,, وكل الناس يا اب كوكا يا اب كوكا
وفاز بالرهان
بالمناسبة الناس عندهم راي انو الكوكا لو دخلت الموية بتطلق صوت زي القعونجة , لذا يقول المثل
الكوك ببين عند المخاضة

الحبيب أبو سن ...

والله ضحكتنى ضحك ...

Quote: بالمناسبة الناس عندهم راي انو الكوكا لو دخلت الموية بتطلق صوت

يا أبو سن ... الكوكا ما بتعمل صوت إذا دخلت الموية ... نتعمل صوت أذا حرقت جنبها ريشة (جداد أو حمام).

الكوكا مرض ذكوري يصيب الخصية ويجعلها كبيرة الحجم جدا , وهو مرض معيب وسط الرجال
اها
الفهم الشعبي بتاع حكاية انو الكوكا بتصدر صوت عند ملامسة الموبة , طلعت المثل
الكوك ببين عند المخاضة
الكوك جمع ,, يعني الناس لامن تجي تخوض الموية بنعرف العندو كوكا ,, زي حكاية الفيهو بخور بنشم
يعني عيبك بمرق وقت الحارة
ياخ ده مثل ختيير عديل كدة
و
أنبليت
اختا الرملة ما تقع البكان الهش

قاضي شرعي
ماحصل انجز قضية طلاق بين متخاصمين زوجة و زوج
يجوهو للطلاق ,, يقبل علي الراجل
قادر الله ! كدي يا فلانة اصلي الباب وتعالي
قادر الله ! عليك الله عاين ليها بي وراء ,, والله تقعد الشافع وما يقع
شوف الكرعين ديل مصبوبات صب
السدر ,, ما شا الله تقول فتاة بكرة
ويواصل في الاوصاف الجسدية والحسية وكل مرة يزيد الجرعة
وفجأة
يقوم الزوج يجر يد مرتو ويتخارج
اما انك رجل قليل ادب ,, علي بالطلاق لو ما قاضي اضبحك جخخ هنا واقش سكيني فيك
اما انك زول مامحترم

مسرور انا جدا بمشاركه الاخ الحبيب عبدالحفيظ بقلمه الجميل وبحضوره المتميز في هذا المنبر واتمني له مزيدا من التميز والاسهام الفاعل

عاطف ابراهيم يا صاحب
تحية لك و حمدلا بسلامة المدام
سعيد برؤيتك في بوستي

فوق
لحين
ميسرة

اهلنا بقولو لي ابوهم يابا ,, ولي اعمامهم ابوي فلان ,, فبتعرف انو عمو ,, وبرضو امي فلانة ,,
قالوا طه ده ابوهو ميت ووحيد ,, امو ماتت وهو عايش مع خالاتو اربعة , يعني امهاتو ,,
مرة طلع وما جا راجع ,, خالاتو قالن هسه الناس يقولو نحن اهملنا فيهو وما فتشناهو عشان ما ولدنا ود بطنا
اها اتفقن اي واحدة تمسك جهة من الجهات الاربعة تكوس فيها ,, وما ترجع إلا وطه في يدها ,,,وفعلان مرقن ,, ولي الليلة ما جن راجعات وما معروف مكانهن يوم
وبقي مثل
يقولوا ليك
لحق امات طه

بالقالو حمد
حمد ده صاحب مركب يؤجرها للركاب لقطع النيل ,, مرة في نص البحر المركب دخلتها موية ,, وبدأ حمد في سد قدود المركب بما يتوفر له من قطع قماش قديمة مجهزة للطواري الزي دي ,, وكملت الهديمات ,, واحد كورك لي حمد
تعال بي هنا في قد
فرد عليهو حمد
مافي شئ اسد بيهو القد إلا ,,,,,, ذاكرا كلمة نابية دارجة لعضوه التناسلي
وبعد فترة كوركت مرة
الموية جاتنا بي هنا ,, تعالوا سدوها
رد ليها واحد
لكن نان مافي شي يسدو بيهو ,,يسدو بي شنو تاني
فردت عليه المرأة
بي القالو حمد
فصارت مثلا يستعمل في غير بذاءة مقصودة

Quote: وفعلان مرقن ,, ولي الليلة ما جن راجعات وما معروف مكانهن يوم وبقي مثل يقولوا ليك لحق امات طه

بالللللله
لي يوم الليلة ؟؟؟

مرحب بدر الدين
وسعيد بمرورك
هههههه ده اسلوب الحكي السوداني القح ,, يحكي ليك عن حاجة حصلت قبل زمن طويل جدا ويقول ليك لي الليلة ما قعل و فعل , يعني دايرو يبيخ القصة ويقول ليك ماتو
طبعن دي مبالغة في الحكي
اها ساي كده يقول ليك
ياخ جيتك ألف مرة و لا مليون مرة ما لقيتك ,, وتكون دي اول مره
ولا
كلمتك ألف وخمسمية مرة
دي اكتر واحده عا########ي ,, شفت الدقة دي ألف وخمسمية مش ألفين ولا ألف

قالوا
واحد مسافر سفر بعيد ,, وودع مرتو ,, مرتو قالت ليهو مابقدر اصبر علي البعد ,, آذن لي لو تعبت اشوف لي راجل يطفي رغبتي

قال ليها ,, موافق لكن علي شرط ,, تشوفي الناس البمرقوا يتسيروا ويتجمروا في الخلا ( يخرجون للبول والغائط ) تشوفي ابعد زول بمرق فيهم
اها الراجل سافر وطول في سفرو ,, ومرتو تعبت ,, بقت تمرق المغرب تراقب الناس المارقين الخلا بأباريقهم ,, مافيهم زول مرق بعيد , طرف الحلة والعين تعاين يقعد
اها مرة شافت واحد مرق وهي بتعاين ليهو لامن غاب من عينها ,, رجتو لامن جا راجع ,, ومشت عليهو ,, وقالت ليهو انا راجلي مديني الأذن وحكت ليهو القصة ,, وهسه انا دايراك
قال ليها مافي مانع ومشي معاها البيت ,, وقال ليها كدي النضبح العمبلوك ده للعشا ,, وفعلا ضبح العمبلوك , وعلقو في الشعبه وقال ليها امشي البيت واجهز واجيك
مشي
وكـــــــــــلاب الحلة شمت الدم وجات علي العمبلوك المعلق ,, وهي شالت عكازها وقنبت تحاحي في الكـــــــــــلاب ,, للصباح ما جا ,, وهي ما نامت من الكـــــــــــلاب
الصباح جاها ,, وشاكلتو
كيف تغشني وتخليني للصباح مساهره مع الكـــــــــــلاب
قال ليها
لو وصلتك كان بقيتي زي العمبلوك ده ,, وناس الحلة فيك زي الكـــــــــــلاب

يكون الراجل بعرف الزول دا بالتحديد (الزول البمرق بعيد دا)
عارف رجالتو وعفتو وحكمتو
زمان في حلتنا في واحد مُصر يطلع الخلا رغم إنو ولادو حفرو ليه بير في البيت (يقضي فيها حاجته)
المهم الزول دا بيطلع بعيد خلاس
لمان سألوه قالوا ليه: لماذا لا تقضي حاجتك في بيتك
اتخيل طلع السبب شنو؟
إنو البتاعة دي مقسومة نصين، نص للرجال ونص للنسوان
وفي النهاية البير واحدة
فهو يرى إن لخبتة الكيمان دي عملية ما كريمة في حقو
هههههههههههه

تحياتي مثنى وثلاث ورباع

مرحبا بدر وشرفت
ممكن يكون بعرفو حقيقة ,, وممكن يكون في تصور ان المستور ديمة مستور
ههههههه
لكن زولك طلع صعب خلاس ,, قلت لي عدم اختلاط حتي في العذرة !
عندي عمي ساكن معانا وبيتنا عشرتين من البحر , وعندنا مستراح معروش ومنور وبي بابو ,, لازمن يطلع الخلا المغرب ,, ونحن في وسط المدينه واعرق الاحياء
عندنا ناس في نواحي رفاعة ,, ناس البطانة فوق ,, لامن يجيهم خاطب لي بتهم بسو ليهو عصيدة ليننة ,, هي حارة وملاحها حار ,, ويشوفوهو ,, العصيدة اللينة بتلصق في اليدين ,, وحاره طبعا ,, لو قام بشر ونطط ما بدوهو ,,, ولو كرز ساي واتحملها ده زول سترة

قالو
وحكاها لي خالي مصطفي عبدالله مليك ذاكرا اسم صاحب القصة
واحد عندو غنماية منجضاهو نجاض شديد , يجي يحلبها تدقش حلة اللبن تدفق اللبن ,, يخت كراعها وسط كرعينو كعادة حلب الغنم ,, تتململ توقعو علي قفاهو ,, يجيها بي قدام تنطحو ,, مرة لقيتو مدنقر جاتو بي ورا نطحة واحدة درشتو علي قدومو وسعت لحتفها بقرنقها ! طقاها ضبحها ,, اكل لحمتها متلذدا ,, ودبغ جلدها عملو فروة لسرج حمارو
يوم خت السرج ورفع فيهو الفروة وتلب يركب في الحمار ,, الهوا وحركة كراعو رمت الفروة
نزل رفع الفروة وهم بالتبة ,, الهوا رمي الفروة ,, رفعها تاني ,, وجا يتلب وقعت في الواطة
مشي عليها بالفرار قددها كلها
وانبطح فوقها خنقها لامن زبد ويهرج
جننتينا حية وميته

أخيك كان فاتاك بي لقمة لو اكلت صحن كلو ما تشبع
مثل من غرب السودان

أخيك كان فاتاك بي لقمة لو اكلت صحن كلو ما تشبع
مثل من غرب السودان

تشتهر المرأة في بالاهتمام الشديد بالرجل وفي تقديرة أكثر النساء مهارة في الطبخ هن نساء الغرب
بتهتم بالرجل واهتمامها بزوجها أشد ,, لذا اتت مقولتهم
شايب دار صباح أكان لقيتو امسكو ,, لكن شايب دار غرب فكو ,, مافيهو سبب
يعني لو رجل كبير السن اتي ليتزوج إمرأة لو كان من الغرب ده ما تديدو ,, لكن لو من الشرق اديهو طوالي ,, ده بكون مهمل وجيعان بس

فوق
لحين
ميسرة

فوق
لحين
ميسره

اربعين قدم ولا بولت الندم
مثل من الغرب

فوق
لحين
ميسرة

قالو
المرفعين بعرف جوعار اخوهو
وابو نقدح بعرف محل يعضي اخوهو

المال ابو اللاوليس يقوم في العود الناشف
مثل سوداني
اللاوليس هو اللبلاب

قالو ابليس اتشارك مع واحد , زرعوا بصل , ابليس شاف البصل اخضااااار وسمح , اها الزول قال ليهو اختار
داير الفوق ولا التحت
ابليس اختار الفوق
ودقس
بعد فترة زرعوا قمح
اها المرة دي دقس مرة وعرف اللعبة
اختار التحت
ودقس
بني آدم اكان قام ألعن من ابليس

أفلس من فار المسيد
مثل سوداني
المسيد مافيهو قروش أكل بس

مكرر
دوار جمل نسيبتو
لو لقاهو يغني
ولو ما لقاهو يغني

ود أبوسن سلام يا ناظر
مفترع روعة رغم الغياب من المنبر عدنا ووجدنا المتعه في كتاباتكم فكان استفتتاح للعودة
تشكرات يا حبينا ليك والجماعه البجادعو فيك
مع خالص التقدير

Quote: بحيادية تامة ودون الولوج في خلافات الضايق ركبوك من يشوفك يعيا وبعضهم يقول الضايق ركوبك من يشوفك يحيل ويحيل لفظة عامية تطلق للرغبة في ممارسة الجنس واحيانا يقولون ضايق فيك ركوب الفزرة والفزرة معروفة فالدابة الفزرا ركوبها سهل ولكن يخرج المثل من دائرة الدلالة الجنسية ويصبح معناه وفق موقعه فالذي يستغلك يجوز فيه ذلك والذي يستفيد منك يجوز فيه ذلك وعموما يضرب المثل للاستفادة و الاستغلال

سلام يا ود أبسن ينصر دينك ويشرِّط دلاقينك ويديك دلاقين من ماركس آند سبنسر وسيلفردج وهارودس كمان.
عندما كتبت المثل – الضايق ركوبك مما يشوفك يعيا- في مداخلة سابقة في بوست إفترعته.. تصدى لي هجين الخرطوم ومعهم بل ساقهم بعض محترفي النضال الإليكتروني لإختلافي معهم في الرأي .. ولم يفهموا المثل كما تفهمه أنت وأمثالك من فصاحى السودانيين وفسروه على أنه وحي جنسي .. إلى آخر القائمة السياسية المغلفة بدسم الغتاتة المحشو بسم البلادة الثقافية الإثنية. وعندها قلنا لهم: وما علينا إن لم تفهم البقر، مع إعتزازنا بالبقر وما يمت لها بصلة، خاصة وأن أكبر سورة في القرآن هي سورة البقرة.
تحياتي

كبـّاشي الصـّـافي
(العوج راي والعديل راي)

Quote: اقول ضربت ليك تلفون وتصك اذني دقيت ليك ,, يدقوك فوق رويسك ده

أسمع دي يا ود أبسن... سوداني مقيم في ليبيا أيام القذافي .. عمل تأشيرة خروج وعودة. قال لصديقه الليبي: أنا ماشي البنك أدق القروش في الجواز. لم يفهم الليبي المقصود كيف يدق السوداني القروش في الجواز؟؟ - لا يتم التحويل من ليبيا إلا عن طريق البنك- طلب الليبي من السوداني أن يرجع له ضروري بعد ما يدق القروش في الجواز لأنه يحتاجه في موضوع مهم.
بعد أن قام السوداني بتحويل المبلغ الذي يريده، رجع الشركة ووجد الليبي في انتظاره. سأله الليبي: دقيت القروش في الجواز؟ أجاب السوداني بنعم. عندما شاهد الليبي ختم البنك في جواز السوداني مع المبلغ الذي تمّ تحويله، قال للسوداني: الله يخرب بيتك، مش كان تقول عاوز تمشي البنك تصرِّف عمله حرة؟ كنت عاوز أعرف كيف يدق السودانيون القروش في الجواز بواسطة البنك.
مش بالله اللهجة عندنا؟
تحياتي

كبـّاشي الصـّـافي
(العوج راي والعديل راي)

Quote: بتان بجيك

يا ود أب سن سلام مربع... قل بتان بتجيني .. هياتا كي .. الهوّل ولا ياتوا؟
تحياتي

كبـّاشي الصـّـافي
(العوج راي والعديل راي)

Quote: ولا تلاقيك شوكة سدر مارقة من الحيطة تطعنك في نايطتك

يا ود أب سن سلام مربع... الإقتباس أعلاه جعلني أستفسر هل ما قاله الإمام الصادق المهدي عن قبيلة أولاد حِميد في ابوجبيهة أنها من رفاعة وليس من قبائل البقارة! وجدت كلمات كثيرة تجمع بين لهجتنا في قبيلة اولاد حِميد ولهجة رفاعة عامة في شرق النيل الأزرق والبطانة، فهل لك في الإثنيات علم .. نلتقي مع المحبة.
هل يعرف الكثيرين هنا معنى: (فلان نايطا بوجعا)؟
تحياتي

كبـّاشي الصـّـافي
(العوج راي والعديل راي)

.

شكرا يا ريس بكري
اصدر نميري قوانين سبتمبر سنه 83 , والتي قال عنها الصادق وهو معارضا لا تساوي الحبر الذي كتبت به واتي رئيسا ولم يلغها وماطل فيها

قالوا ناس الخلا الرواعية المبارين بهايمهم ,, ومعاهم شيخ وامام ليعلمهم امور دينهم ويؤمهم
سألوا الامام
انت دحين شريعة نميري دي جنسها شنو?
قال ليهم
دي شريعة الله
اها يعني شنو ?
قال ليهم
توا البكتل زول يكتلو ,, والبقطع يد زول يقطعو يدو ,, والبقد عين زول يقدو عينو
نط واحد سألو
اها والبطلع مرة زول ?!

فقال ليهم
توا البطلع مرة زول أكان عزب بدقوهو ,, وأكان بقي بي ام عيالو بكتلوهو
قالو ليهو
ها ,, كلامك اللخير ده ما زي كلامك اللول
البطلع مرة زول يطلعو مرتو

البطلع مرة زول يطلعو مرتو
ههههههه
تبدو كطرفة تدعو للضحك
ولكنها ليست كذلك من منظورهم ,, فالجزاء من جنس العمل ويتوافق مع اول الاحكام ,, العين بالعين والكراع بالكراع والطلوع بالطلوع !
كفهم ساذج للعدالة ! وإن شئت تعكس نظرتهم للمرأة كشئ مملوك لزوجها او ابيها او شقيقها ,, فالفعل لا يسيئها بل يسئ لزوجها
ورغما عن سذاجة المفهوم واستنكارنا له , إلا اننا نمارسه الآن والآن مقصودة

رغما عن سذاجة المفهوم لأولئك الرعاة ######ريتنا منه , إلا اننا نعيد إنتاجه ونقع في ذات الفخ
لذا
ضروري التوعية والوعي
وضرورة ان نمتلك الادوات الفكرية اللازمة لنستطيع ان نر بشكل اوضح
حتي
نستطيع عرض قضيتنا وجعل الآخرين يلتفون حولها

سلام يا عبدالحفيظ
إنت وحامد بديتو نقاش جميل حول شعر الحردلو وأخوانه
وما تميتوه، يا ريت لو واصلتو فيه
وإن تعذر ذلك
واصل في مشهادك دا
كلو ستة


تحياتي مثنى وثلاث ورباع

مرحب بيك بدر
وشاكر ليك متابعتك وتشجيعك
الحديث ذو شجون ويجر بعضه بعضا
انا بكتب والاسترسال بتم بواسطة الآخرين وبخليك تواصل
انا كاتب جديد وبعتل بوستاتي براي وبكتب ما يعن لي لحظتها
احاول قدر الامكان اكون مفيدا
بس
يا بدر
اخوك اصابه الخرف باكرا وبتذكر فجأة حاجه وتتداعي الذاكرة او تأبي
فيدك معانا
شوكران ياخ

قالو واحد لقي مرتو مع غريب في فراشه
فقال ليها
والله يا فلانة ما باقي ليك إلا تسفي الصعوط
وطبق الراجل ومرق سكينو ختاها ليهو في رقبتو وسألو
هاي جاباك عرم ولا حقارة
قال ليهو
جابني عرم
فكاهو
وقال ليهو
امشي ,,, عرم حارم انا ضقتو

ودي قصة حقيقية كنت شاهدا عليها
واحد زول خلا , خش كوستي وقدر ما فتش ما لقي محل ياكل فيهو
فسأل
قالو ليهو
ده رمضان
قال
رمضان ده فرضا فرضتو الحكومة ولا اقتصاد معيشة

فوق
لحين
ميسرة

الشنبة الكعبة
يتلاقو بالدربة
يسالمو بالضنبة
للخير يتعادو
للشر يتنادو

يا سلام عليك يا عبد الحفيظ
انا متلوم شديد لاننى تاخرت عن الدخول فى هذا البوست الجميل بصاحبه ومشاركيه ابتداءا من حامد والى اخر المشاركين المبدعين ..
مثل هذا البوست ما احوجنا اليه فى مثل هذه الظروف التى تغرق ثقافتنا الجميلة بكم هائل من الثقافات الوافدة الينا والوافدين اليها عبر النت والوسائط المختلفة ..
واحسن مافى هذا البوست حتى الان وقد وصل الى الصفحة الرابعة ان المدعين بالثقافة والدين واولئك المخربون للبوستات بضحالتهم لم ياتوا اليه بعد واتمنى ان لا ياتوا يتركونه على سجيته البريئة التى بدا بها وان شاء الله نتداخل بالمشاركة على هذا المستوى الراقى
تحياتى لك وربنا يوفقك

وهذه مشاركتى الاولى هنا وكنت نشرتها ضمن مذكرات اروتى ونشرت ..على هذا المنبر

اتمنى ان تعجبكم لتبحثوا بعده عن مذكرات اروتى

تحياتى لكم جميعا

عندنا فى بلدنا بعض الاعراب يزرعون البطيخ فى الرمال او الترقس باللهجة النوبية وتوجد منطقة تحمل اسم ترقسى بالقرب من ابكر يزرع اهلها البطيخ والشمام ويسوقونه فى المنطقة بالحمير.. ويطلق عليهم اسم الترقاسة .. تجد الحمار يحمل قفتان وسطهما عود توضع على السرج وتجد الحمار يئن من الحمل الثقيل وحينما يصل سوق السبت يكون الحمار المسكين كله ماء من كثرة العرق ..
وفى اى قرية يسرق الصغار البطيخ فى اول الموسم وهى هواية اكثر من انها احتراف ..

زراعة الجروف هى ايضا من صميم عمل المزارع والجروف هى الاراضى المحاذية لضفة النيل والتى يغطيها فى فيضانه وبعد ان ينحسر منها او يشرد بلغة البلد تزرع بالسلوكة واهم ما يزرع فيها نوع من الذرة اسمه المقد وهو الاكبر فى قندوله من الذرة العادية وقصبته فى السمك تعادل خمسة اضعاف الذرة العادية ايضا يزرعون اللوبيا والفاصوليا والويكة والطماطم واجود نوع من الطماطم هى طماطم الجروف التى تشم رائحتها على بعد عشرة امتار اضافة لنكهتها المميزة ..
يقوم صمد الساقى بتوزيع طين الجروف على اهل الساقية ويتفاوت الناس فى المساحة وغالبا ما تحدث بعض المشادات بينهم عند التوزيعفى منطقتنا ظهرت جزيرة جديدة بعد الفيضان وهرع الناس للحيازة وكل واحديريد حوزة اكبر مساحة ممكنة.. واحتدم الجدل بين الاهالى واختلفوا وكان صوت الشجار يصل الى البيوت فاطلق عليها احد اعيان البلد اسم ام ديى.. والديى فى الرطانة الشجار والكلام الكثير..... يقولون لك لا تسويها ديى....
كنا نزرع بالسلوكة والثانى يرمى التيراب فى الحفرة ويغطيها بقليل من الطين خوفا من الكوليدا والكوليدا طائر صغير اكبر حجما من ودابرق على راسه تاج مثل الحداد او الهدهد له منقار طويل يدخله فى حفرة السلوكة وياكل التيراب .. وعندما يكون الطين لين يزرع سكاجم اى بسرعة ..
واذا تاخر المزارع فى الزراعة بالسلوكة... فى هذه الحال ربما تيبس قشرة الارض التى يراد زراعتها فى هذا لابد من البرقان والبرقان بالعربي هى الحفر بالطورية لازالة القشرة الناشفة ومن ثم غز السلوكة وتتم العملية بامان والبرقان عملية متعبة لذا تجد المزارع حريص على ان يزرع ارضه اولا باول خوفا من ان يدخل فى عملية البرقان المتعبة ..
هناك بعض النباتات التى تنمو بعد انحسار النيل اهمها السعدة او السعدى بلغتنا والعصبة وهو نوع من النباتات التى تفضلها الاغنام له رائحة ذكية والدفرة او الدفرى .....ا
فى اول الشتاء يجيىء الحلب او الغجر لمنطقتنا وفى هذه الايام نسبة للزراعة المكثفة فان اشغال الحديد من مناجل وطوارى تتطلب وجود عمالة من الحرفيين المهرة وكان الحلب او الغجر الذين ينزلون فى البيوت المهجورة او شجر النيم الظليل من الاشياء الموسمية فى البلد... والحلب عرفوا بتجارة الحمير واصلاح كافة اشغال الحديد والالمنيوم اذا عندك حلة مقدودة او منجل ميت او سكين وكنا نحن صغار نتفرج فيهم وننادى بعضنا البعض بان الحلب وصلوا واول وصولهم يغرسوا السندالة ويضربوا عليها بكل قوة ليعرف اهل الحى بانهم وصلوا ..
نساء الحلب يعملن فى بيع البخور وحب اللبان والودع وقراءة الكف والزار احيانا ..
واشتهر سالم الحلبى وزوجته عزيزة فى المنطقة الواقعة ما بين دنقلا وكريمة يزورون كل قرى هذه المنطقة قرية قرية يجلبون الحمير ويبيعونها وسالم هذا له زبائن متخصص فيهم فى كل قرية يعرفهم ويلعب معهم القمار فاذا اخذوا منه يظل فى البلد الى ان يتمكن من اخذ كل ما اخذوه منه ومضاعف وفى اليوم الثانى مباشرة او فى نفس اليوم يقلع السندالة ويهرب نحو المشرع... والمشرع هو مكان وجود المراكب التى تقطع النيل بين الشرق للغرب ..
مرة تفرجت على سالم وهو يخرت احد الاعراب واسمه على كان ممن يلاعبه القمار فاخذ كل قروشه وحماره ونعليه وقلع السندالة وحمل اطفاله وعزيزة على حميره وبسرعة الى المشرع ..
كما قلت الحلب بارعين فى شراء وبيع الحمير وعندهم مقدرة على تطويع اى حمار مهما كان على المشى بطريقة معينة وادخاله للمركب وهم لا يرحمون الحمار ويضربونه بشدة وقسوة غير معهودة عندنا فى البلد... وعندهم عصى و عكاكيز من القنا والسنط مضببة بجلد الثور وفيها مسمار صغير ينغز اى حمار مهما كان دراوى يمشى زى الخيط المستقيم ..
طريقتهم فى شراء وبيع الحمير تتم كالتالى.... يقف الاعراب صف والحلب فى الصف المقابل سالم وعزيزة واولادهم وتبدا المساومة فيقول العربي الحمار دا بى 75 قرش فيرد الحلبى يفتح الله وتستمر المساومة الى ان يتفقا على حل وسط ويكون خمسين قرشا مثلا ..
عرف الحلب ايضا فى المنطقة بانهم لا يتحفظون فى الحديث وممكن الحلبى يفاجئك باى نوع من الحديث غير المالوف وتجد الحلبى يتحدث مع زوجته واطفاله بالفاظ نعدها بذيئة... والحلبيات من اجمل النساء وكانت عزيزة اية فى الجمال وعندما تدخل اى بيت تغازل الرجال امام نسائهم وهو امر غير متعارف عليه فى المجتمع القروى ولكن هذا معروف فى البلد يقولوا ليك.... دا حلبى يقول زى ما يقول اى لا يختشى ..وكانت عزيزة عندما تدخل اى بيت بسرعة يعطوها ما تريد خوفا من لسانها ..
واذا قدر لك و سمعت نقاش بين عزيزة وسالم تسمع العجب وكنا نحفظ مشاكلهم فى القروش وحصيلة اليوم والنقاش الحاد الذى يتطور الى شتائم بذيئة بينهما امامنا دون خجل عمن هو موجود ..
يعيشون على السليقة حياتهم قاسية غير مستقرة لا يعلمون ابناؤهم لا يملكون منازل او اراضى تعودوا على هذه الحياة منذ الازل .. وقد عبر صديقى الشاعر محمد الحسن سالم حميد عنهم فى قصيدته الرائعة التى تحكى عن حمو حلبى نورى المعروف

مرحبا
الكيك
رأفت ميلاد
حبابكم مية غير المنسية
سأعود
في
حين
ميسرة
و
سونبهار كده كتر خيركم

زي الدبيب
املس وناعم
تعصرو عليك يعضيك

لحين ميسره

من الفيس
مرحبا عبدالله محمد عبدالله
وحبابك
قالت العرب
الحديث ذو شجون ويجر بعضه بعضا
فدحين الزول بدور الناس البفتحو نفاجات الكلام , والذاكرة ماكرة ,, ومزاجي أمكر منها ,, مراتن يواتيني الكلام وتغلبني الكتابة ,, ومراتن اعمل رد والراس القاهو قرعوبه ساي
المتاوقة شرك يا حبيب
شاكرا لك تشجيعك ياخي

حبابك الكيك
ولك الود اطنانا
وعذرا للتأخير فالبال مشغول وولا زال
اهلنا المحس والحلفاوين اصحاب حضارة راسخة وضاربة في القدم ,, يقول صديقي المهندس عاصم الشيخ ود كوستي ,, ان حضارتنا سابقة حضارة مصر , بملاحطة حجم الاهرامات , اهرامات مصر أكبر وإهراماتنا اصغر , والانسان يتعلم بالنموذج الاصغر اولا , او كما قال
واكاد اقول ان معظم اسماء ادوات الزراعة والمنزل ذات اصول نوبية , احتفظت بإسمها او حورها النطق
الغجر او الحلب كانوا يأتوننا حتي كوستي , واشتهروا بفحش الكلام وعدم الحياء والسلوك المتفلت , يأتون بكامل الاسرة ويستقرون في اطراف المدينة , وحسب ما قرأت فهم ينتشرون في كل بقاع العالم بذات السلوك ,, ولعلك تذكر الفلم الامريكي الغجر يصعدون للسماء
شاكرا لك مداخلتك الثرة واتمني ان اراك كثيرا هنا تأصيلا ! للثقافة السودانية

مرحبا رأفت ميلاد
وحبابك
والاخطر ليس ضياع لغتنا وتراثنا فقط , بل حتي اطفالنا يحفظون الاغاني العربية الموغلة في محليتها , ولا يعرفون الفن السوداني
وساهمت الحكومة تحت دعاوي التأصيل في محاربتهم للقنوات السودانية , فهي قنوات غير جاذبة , وهتافية ,, وغير قادرة علي مخاطبتهم

ود أبوسن سلام يا ناظر
مفترع روعة رغم الغياب من المنبر عدنا ووجدنا المتعه في كتاباتكم فكان استفتتاح للعودة
تشكرات يا حبينا ليك والجماعه البجادعو فيك
مع خالص التقدير

مرحبا عباس
وحبابك آلاق
سعيد ان لاقت كتاباتي هوي من هم في براعتك
هذه شهادة افاخر بها
وشكرا لك

تحية
يا ناس وين اخونا حامد بدوي الرجل الذي اثري البوست بجيد القول

الأخ / عبد الحفيظ أبوسن

كل عام وأنتم بألف خير ، بالرغم من انني من غير الناطقين بها ( أي العربية) يعني بيئة رطانة وحلفاوي كده إلا يا أخوي نضمك سمح بالحيل .

والأجمل ناسبني واحد أخو من عرب الشكريه ، والسلالة معانا في حلفا وطفلهم ناشئ بيننا إلا أنني أرى في (إبن إختي) الصغير فصاحة العرب .

مرحبا ولياب
وحبابك ياخ
لاشك ان اللغة النوبية لغة اصيلة متجذرة في الثقافة والتراث السوداني , والنوبة يفتخرون بلغتهم ويحرصون علي تعليمها لأولادهم وان سكنوا بعيدا عن ديارهم
وهم اهل تراث وحضارة
سعيد بك , رغما عن صداقتي لكثير من اهلنا الرطانة إلا اني لا افقه شيئا عنها , سوي شذرات لا تسقني ماءا ولا تملأ معدتي ,بل كلمات وجمل متفرقة سرعان ما انساها
كامل الود

من الفيس
مرحبا عبدالله
وشاكرا لك تواصلك
والله يا عبدالله آ خوي الراس بقا جايط ,, هم المعيشة ,, هم الاولاد وتعليمهم ,, الواقع البائس والملخبت وجايط ,, والدوشة ما بين هذا و ذاك وتلك ,, وده حار وده ما بنكوي بيهو
نخش في دفسيبة الجماعة هنا ,, عاك وعيك وصفتك و نعتك , واتا قلت وانا ما قلت ,, الواحد يطلع دايش ,,
اها نضمينا بقا زي نم الاندايات ,, والانداية لامه الخلوق كلهم ,, تسمع شي دوبيت وشي جراري و شي جرداق ,, يخشن راسك وتبقا تنضم بره من راسك

أخوك
أكان
كتلك
بجرك
للضل
مثل سوداني

قالو
الولد وابوهو ماشين في السوق ,, ومفلسين فلسه فار مسيد بس ,, لقو ليهم واحد فارش بلح ,, بلح كبار وسمح
الود قال لأبوهو
عاين سماحة البلح ده ,, الزول لو عندو قروش يشتري ملوة للشفع الفي البيت ديل
ابوهو قال ليهو
لا ,, كفاهم ربع ملوة
الولد قاليهو
لا ,, خليهم ياكلو
لا ,, كفاهم
لا ,,, خليهم ياكلو
لا
لا
الابو لما في الولد بالعكاز في نص السوق علقو
جنك تبذير

فوق
لحين
ميسرة

البغلة
المبارية
الخيل
مثل سوداني

Quote: رمضان ده فرضا فرضتو الحكومة ولا اقتصاد معيشة

ههههههههه

مرة في الدامر في ناس قاعدين يفطروا في نهار رمضان
والمطعم مسوينو بالدس في بيت وراميين ستارة على باب البيت
المهم في واحد وصفولو البيت جاء مد راسو بي وراء الستارة
لقى الجماعة قاعدين ياكلوا ، قال ليهم: دا مطعم ؟؟؟
واحد قال ليه: لا استديو


تحياتي مثنى وثلاث ورباع

رازّة ونطاحة

أو غارزة ونطاحة


أصح الأول على ما أظن
الرازة هي البقرة الما قادرة تقوم وبرفعوها من ضنبا
وبعد دا قليلة أدب وتناطح
والغارزة هي الما بتحلب
والمثلين يؤديان غرضين مختلفين قليلاً

الأول مثل يطلق للما قادر يسوي أي شي ويكابس في خلق الله
والثاني معناتو: لا خيراً فيهو ولا كفاية شرو

مرحبا بدر يا صاحب
ههههههه ما اخد ليهو صوره ?
هنا الحكومة بتستفيد من رمضان ,, هنا دفعو المطعم قريب 3 مليون وسمحو ليهو يفتح ,, وبتاع المطعم شال ال 3 مليون وختاها في الفاطر رمضان شفت كيف !
شرطن يكجر المطعم حقو ,, ما حكومة اسلاميه وما بتدور الفطور في نهار رمضان ولو كنت مريضا او علي سفر
صاح المثلين
لا نارا منك ولا دخانا يعمر

من الفيس
مرحبا عبدالله يا صاحب
عندي اخوي د. ابوبكر طبيب بالرياض الآن ,, مسخووت
يقول ليك زمن الدنيا بي خيرا ,, البيرة راقده هبطرش
وهو لا بشرب ولا حضر زمن البارات الجمبها مطاعم السمك والباسم
ههههه عندو مثل شهير يقول ليك
الله يكفينا شر الفقر المتلت
انت فقران
اهل ابوك فقرانين
اهل مرتك فقرانين
قدر ما الله يديك مروة تنط حيطة الفقر دي تلقا الناس ماسكة في سروالك ,, يا تدلي ترفع سروالك ,, ولا تنط عريان وتخلي سروالك في مكانو
والاشاره واضحه

Quote: قدر ما الله يديك مروة تنط حيطة الفقر دي تلقا الناس ماسكة في سروالك ,, يا تدلي ترفع سروالك ,, ولا تنط عريان وتخلي سروالك في مكانو والاشاره واضحه

أخوك صور الحالة تصوير مبدع وبسيط

مرحبا بدر يا صاحب
وحبابك
آي والله فشقيقي د, بكري رجل ذكي , والمثل ذكي جدا
يا ترجع تساعد اهلك ,, ولا تنساهم وتنط عريان
وكلنا من اسر لا علاقة لها بالانقاذ ,, فدايما نحن مجابدين في الداير مساعدة ,, وتخلي الاوضه الكنت داير توسع بيها للعيال
وداك مطالب وماعندهم حق ملاح الليلة ,, وتبطل تشتري شنو كده ما بعرف
المهم طوالي نحن في البحت ده
وسروالنا بي تكة فرد جبده ,, التكة تحزك ويدوك الواطة

من الفيس
حبابك يا عبدالله يا صاحب
قلت لي بتنطو ام فكو ساي ,,, واها الناس يجبدو شنو ! ما باقي إلا الخرابه ديك ,, ويخلوك خمسي مشكل
الزول الحر ما بطفر عريان ويفوت اهلو
يكري اخوي ده مسخوت سخته شديده
يقول ليك
الجاتك في مالك ن........ت ام اهلك
عندنا واحد في كوستي زول قوية ,, يشرب ويبيع ,, مرة الصباحية كابسو الجماعة ,, المرة شاده حلتا في النار ,, سمع بي حركتم ,, جدع البضاعه في الحله وطفر بي عند الجيران ,, وجاهم بي لفة الشارع جاكي ,, خش البيت ,, وين ? بتريض الصباح ,, بضاعه مافي ,, مشو
مشو بي هنا ,, جاهو واحد من الزباين ,, قال ليهو
امشي جيب ليك عيشه وتعال

تعرف يا عبدالله ليه الناس بتموت في البنج ? وكترت الايام دي
ياخ الشعب كلو عيونو مفتحه ,, تغمد كيف لكن ,, تكون داير تنوم ,, تتذكر بكره قروش المويه ,, ولا مصاريف المدرسه ولا ... ولا ....
بي اللاه عينك تبق فجأة وتفتح وما تشعر انك ما نايم إلا زول يلكدك ,, ها زول مالك سارح ومهود كده
اها الزول بمشي العمليه ,, يدوهو البنج القدرو ,, يتذكر قروش العلاج ,, فت يفتح ,, يكمدوهو بي جرعه تاني ,, يغمد ,, تجي الجرعه القبيل خاشه مع التانيه ودي الغميده ,, يسلموهو القبر بي فد سفريه

الفي والدك بقالدك
قريبي ولدو صغير لقي ليهو عقرب , مد ليها كراعو مخصوص ,, لدغتو ,, جاب قطعة قماش ربط فوق للدغة , وجاب موس فصدها وعصر فيها ليمونه
سألت ابوهو عن القصه ,, وضحك ,, قال لي
ابوي زمان ,, كان البتلدغو عقرب , بعملو ليهو النشا ,, ومديدة الحلبة ,,
اها مشي فتش ليهو عقرب لامن لقاها ,, مد ليها يدو ,,,
كورة النشا وصحن مديدة الحلبة راقدات جمب عنقريبو تلاته يوم , لا اكل لا شرب ,, وحمي شديده

الولد وابوهو بقبضو في الصبر , والصبر ده أظنو السنجاب بلغة مجلات ميكي وافلام الكرتون
بقبضو وبياكلو
اها بقنصو ليهو , والصبره بتخش الجحار ,, وبطلقوا النار في خشم الجحر , وبعاينو في الجمبات ,, هي بتكون حافره ليها كم جحر ,, النار والدخان بكتلن جوه وبت بتجي نابله من جحر الطواري
الولد الصبره خشت جحر جمبو , ودخل يدو وراها يقبضا ,,
كورك لي ابوهو
ابا ,,, قبضت لي نصيبا
ابوهو قال ليهو
فكها !
قال ليهو
فكيتها ,, وابت تنفك مني

في كوستي
واحد من اعمامنا المعروفين ,, عندو سفنجة ,, لوري يعني ,, ومارق بالخلا والدنيا ليل ,, سواقه الليل بارده للعربيه ,, والزوغان ساهل من ناس المرور ولا غيرهم
‏ ‏ اها مرقوا مغربين ,, الاستك ضرب ,,,وقفوا بنشروهو وركب الاسبير ,, ماشين قدام ,, ضرب واحد تاني ,, نزلو ,,, رقعو الاستكين ,, وربطو واحد ,,, ما مشو كويس ,, طاااااخ ضربن الاتنين القدام
عمنا قال للمساعد ,, نزل السرير المربوط في جمبة اللوري ,, وقج نامسيتو في الخلا ,, انحشر جواها ,, وقال
اها يا الله الليله بطلت شغلتك كلها وقابلتيني إلا انا ,, اها الليله انا نايم قبلي
شاهدت عمنا ده ,, وبقا علي الحديده ,, ويبدو لي دوبها كانت ماشا تحلج معاهو

ام حالبين
دي أكلة عجيبة خلاس
أكلة رواعية في الخلا
بشوفو محلة دلجة ,, يعني ارض زي البلاط ,, وبجيبو بعر البقر الناشف ,, يولوعو فيهو النار في الواطة المحددة ,, بعد تهمد النار ,, يقشو الواطة , ويضرضرو دقيق ,, ويرمو فيها عجينه دقيق مخلوط بي لبن ,, تبقي زي الرغيفة القوية وصلبة ,, للأكل بكسروها ويفتوها في اللبن

حبيبنا عبد الحفيظ,

ازيك ياكوستاوى وأريتك طيب..

بوست ماهل ومتعة

الجيلي احمد ?!
ياخي بفتش فيك بالودع
وجننت ام عيالك هنا
وحاولت رقمك حق بلاد بره
ليك وحشة يا صاحبي ووحشة لشتائك الدافئ
شفت بوست ليك هسعتي ,, قلت اخش اقول ياك بس ,, محبة فيك ,, وانشغلت واتخارجت ,, اجي ألقاك
حضرنا ولم نجدكم
شوق ليك ولحديثك

المروة سفاهه
مثل سوداني
‏!‏

حكومتنا دي فتحت ابواب لبع كتيره ,, لكل من يأنس في نفسه عدم الذمة واتساع تعريفه الاخلاقي ,, من الغفير لغاية وين اقول ليكم
تاكل وتأكل
وبارك الله في من نفع واستنفع ,, وده دون النظر لي المتضرر ,,
المهم واحد من اعمامنا ناس السوق ,, فتح ليهو باب لبع جد ,, اكشاك ,,,,اراضي ,,, تصاديق دموريه ,, دقيق
و ورت معاهو ,, بقا مقندل
واحد تاني مسكين ,, كان صحبو زمن الاسلام ! والحال ما عاجبو علا محتاج
يوماتي بجي يفطر معاهو
مره قال ليهو
انت دحين يا فلان بي اسمو ,, ما تجي اوديك الحج
قال ليهو
مالك حرام ما بحج بيهو
قال ليهو
طيب ما يوماتي بتجي تفطر معاي من مال الحرام ده
قال ليهو
انا باكل وبستغفر

قصة بتاع الدخوليه مع الفكي البزورو
لي
حين
ميسرة

واحد ماسك العطا حق الدخولية والمعدية ,, بدفع قروش للمجلس ,, وبمسك الدخوليه والمعدية ويخلص قروشهم
الدخولية هي زريبة الهوامل ,,اي بهيمة شماشية هايمه ساي , بقرة ولا غنمايه ولا حمار لقوها لافي بدون سيد او هدف ,, بودوهو الدخولية ,, لو جا سيدو بيغرموهو ,, لو ما جا بعد زمن معلوم ,, سيد الدخولية ببيعو ويكب قروشو في جيبو ,,
وعندو واحد شيخ بجيهو كل زمن ينزل معاهو في بيتو نعمنو زول غنيان وعندو ديوان ,, ياكل ويشرب ويدرس الناس كم يوم في جامع الحله ,,ولامن يسافر بعصر ليهو زولنا قريشات
اها مره جا ,, ودروسو كلها في الجامع
الدخل المجهول حرام وربا وحرام قوطع
قروش المعديه حرام , مفروض الزول تخلص منو بعد يقطع البحر , امكن تغرق ,, امكن الزول يموت قبال يصل ,, حرام قوطع
الدخوليه قروشها حرااااام ودي مكاسه
وزولنا اتنفخ بقا تامبيرا بس
الشيخ باكر بقا مسافر ,, من الصباح يعاين في يد الزول قدر ما يرفعها ولا يدخلها في جيبو
زولنا قال ليهو
والله يا ابوي الشيخ درسك ده اتعبني شديد ,, وانت زول حلالي ,, ومالي ده كلو مال حرام ,, وقدر ما فتشت لي مال حلال ينفع معاك ما لقيت
قال ليهو
خلاس جيبو خلينا نزبل بيهو البيت

قصة سيد الدخولية والفكي بتوضح ذكاء الشعب السوداني في التفريق بين الدين , ومن يدعون حملة راية الدين , الفعل والقول , القصة قد تكون حقيقية او لا تكون , لكن مضمونها يتجاوز حكوتها الشعبية , لاحظ فتوي الفكي اللحظية
نزبل ببها
والزبالة معروفة بدلا عن الاسمنت والجير , وواهما سيد الدخولية المال القذر مصدره يمكن ان يغسل ويستعمل

حبابك آب سن
الكي آخر العلاج
قيل إن هناك امرأة (بصيرة) في أم درمان تجيها لي أي مرض ما عندها ليك علاج غير تكويك
تجيب مراويدها وتحمرن في النار وتقعد تسأل فيك : بتشكي من شنو
وعندها بنوتاً سمحات تجيبن يحضرن الكي عشان ما تنفزر وتتجرس
المهم جاها واحد ويعاين بي طرف عينو للمراويد وشررها المتطاير
لمان ختوا فوقو الكية أصدر صوتاً غريباً
الراجل انهجم وقال: يا ساتر
المرا قالت ليه: قول يا شافي إنت والسترة اتفرقتوا

ههههه بدر يا صاحب
قلت لي زولك شاف المحور محمر ونار ,, ضرط ,,,, ههههه
السترة فارق دربا
قالو المرة داير تشتري ليها بصل من واحد عمك ,, والزول البكبر عضلاتو بترخرخن ,, عمك قام عليها وفكاها ,, ليها خاويه ,, وخجل ,, ولمت فيهو المرة
هي يا الحاج ,,, عاد اخجل زيد البصل
هي لكن يا الحاج اخجل دي زياده دي
هي يا الحاج اخجل دي تديها لي نسيبتك
وعمك علي حس الخجله ومطاعنه المره يشيل ويزيد
المرة دايرة ترفع قفتها في راسها ,, والقفه تقيله
فكتا ليك مموسقة وطويلة لامن توبا اخدت ليهو نطه مكان الحادث
ختي القفة يا مرة ,, يا ما بتخجلي ,, هسه بصلك ده كلو بي جنيه

واحد من نظار كردفان ,, زمن الادارة الأهلية انسيت اسمو ,, لكن حا اتذكرو
في واحد سفيه جنو شربه ومشاكل ,, وبجيبو ليهو كل مرة ,, وبحاكمو
والزول عندو علاقة مع ضابط تنفيذي ,, يحكمو بي سجن ,, قريبو الضابط يسقط الحكم ,,, يحكم عليهو بي غرامه ,, قريبو يسقطها
جابوهو مره ,, حكم عليهو بي 30 جلدة ,, وينجلد قدامو وفورا
مسكو الزول جلدوهو
بعد انجلد ناداهو
اها امشي لي قريبك ده خليهو يسلهن ليك من جعباتك

عطالتك عين بيها عدوك
ساعد النصاري ما تقنب خسارة
البوست ده اتعبني بالعتالة
عمل لي قطايع وفلايت
خايفو يتملص مني زي ملصة حبة محجوب شريف من جرابو
واحد يساعد

واحد ظريف جدا ,, وملتقي للشباب
عرس
و
طلق
بعد فترة صغيرة, سألوهو من السبب
قال
ما متعود واحد ينوم معاهو في سرير واحد

Quote: ختي القفة يا مرة ,, يا ما بتخجلي ,, هسه بصلك ده كلو بي جنيه

الجماعة طلعوا درون !!!
كانت بقت عليه فضيحة وخسارة


يا زول إن غلبك أنا بعتل ليك البوست دا ما تخاف

بدر
يا دفعة
ماقصرت ياخ ان شا الله ما يقصرن ايامك
قالو
الماعندها ضنب يحاحي ليها رب العالمين

ام رخم الله ما بتجيب صقر
مثل

البلد إن أبوك عمدو وجفوك نظارو
متل المتلي قاعد فيهو شن اخبارو
بلوي حكاري في الفي مشيهو حاكي عصارو
منو البانينا غير المولي واسعة ديارو

نوم النمرة والقيد المبرشم دقو
ما بجيب حاجة المظلوم وينصف حقو
قول لي جريعة العسل اللذيذفي مقو
نحن مرقنا والبتقانتو الانشقو

يا ناس السجون بالله ما ترازونا
خاف تترفدوا وفي الفنقة بتلاقونا

فوق
لحين
ميسرة

قالو
عرس من لو
وقعت يشيلوك
ولو
ندمت يقيلوك

الهيوب
من احتفالات الاطفال بعاشورا
وتختم بيوم التوسعة

الجكاكي
وام كرناكي
وجرار الزيت
اخير منهم ست الروابي

حكي لي اخونا صلاح الحسن
قال لي عندنا جدا لينا صعب خلاس , وحصلت مشكلة ,, وهو قام فيها وابي يتراجع ,, اها ما راي براي ? أكان كتلني ما بخليهو وعارفو غلط
لمو فيهو الناس
صلي علي النبي ,, صلي علي النبي
قال ليهم
كل زول يصلي علي القدرو

قريبي , في قرية الصقيعة شرق النيل الازرق
أكل ليهو ملاح لوبا وترعو بالزيت ,,, زيت سمسم عصارة ,شبع تب شبعة فار وقع في كورة لي لبن ,, لي اضنينو
والدنيا صيفا يقلي الحبة ,, شبع تب وعنا الزير اجوغر بالموية ,, واللوبا بتعطش ,, يشيل ويشرب ,,, الحلق ناشف والبطن تامبيرا بس
اها يشرب والموية مع الزيت خلطت بقتو ليك جنازة بحر ,, والنفس مقابضة غرقان ,, والحيل انبت ,, وعطشان وفرقة لي حقنة مافي
اتضايق تب ,, المرة شافتو نادت جيرانا ,, خموهو في كارو ودوهو البحر ,,, وبحر ازرق قيفتو رملة ,, خلوهو إلا بالسروال ودفنوهو في طرف البحر وردموهو رملة صاقطة
لي المغرب زولنا انفشا واشتغل كمبرسون فوق وتحت

اها جابوهو البيت
شالوهو شيلة جنازة ورجع بي كرعينو والناس انكسرت فيهو
قال كلمة صارت مثلا
علي بالطلاق تاني ماأكل لوبا في الهجير
وأكان أكلتها ما أكب فيها زيت
وأكان أكلت ما أشبع فيها
وأكان شبعت ما اشرب وراها موية
وأكان شربت وراها موية أكتح لي حبة جردقة

خالن لي صحبي احمد الطيب من تمبول ,, عرس
وساق مرتو شهر العسل الخرطوم , ماشين في شارع النيل قصاد قاعة الصداقة ,, قال النخش ناكل في الرواكيب العلي البحر ده {قبل سنوات الكلام ده} ,, اها خش وطلب شية , الشي الوحيد البعرفو
ضربو الشية وجو للحساب
الحساب مية وخمسين ألف
ها زول ليه اصلك ضبحتلنا
والحجة قامت فوق ,, والناس اتلمت والعروس خجلت وجات تنضم نظام ادفع ياخ بلاش فضايح ,, قال ليها
ها مرة هوي خليك عند لداياتك
والناس يعجبوك ,, يحمسو في الطار
لا ياخ بالغو والله
كتيرة
وزولنا اتمرعف تب وشم الدم
واحدن عاقل من ناس الكافتريا قال ليهو
اها داير تدفع كم
نان انا محتاج ليكم لكن ده استكراد ساي , يقول مية وخمسين ,, طلق العتود في تمبول قرنو قبضة ايد بي 30 ألف
اها وفهمك شنو
نتحاسب
كويس نتحاسب
اولن لحيماتكم ديل نص كيلو ما جايباتنو ,, قول كيلو بي 15 ,,, وادهو رطل زيت بي 2 ,,, فحم وبهارات قول 5 ,, وطباخة قول 5 ,, وادها 5 حق المروحه والكرسي ,
اها فضل مني ساي وما حقكم طلق فوق 50 ما أزيدكم وانا مظلوم ولو عندكم قول تاني ورونا ليهو

آمال حسن
حبابك يا خية
فرحان بيك وبمتابعتك
المجتمع السوداني بكثير من القصص والطرائف المضحكة والمعبرة والحكيمة
اتوهطي سمح

ود ابو سن .. يا ظريف ... سلام يغشاك
نحكي ليك الطرفه دي ..
والناس الكبار ديل قصصهم .. عجب ..
قالوا كان في تمساح كبير خلاث ..معدم ليك ناس البلد البهائم .. والناس
كل يوم ياكل ليك زول .. ولا بقره . ولا غنمايه ..
اها عم حسن .. كان واقف في القيفه .. وجاء التمساح كاوشو ليك ...
وبقدرة قادر .. خبتك .. خبتك .. لبعك ...
عمك حسن قدر يتخارج من التمساح قبل ما ياكلو..
ناس الحله عرفو بالقصه .. وكل واحد يمشى لعم حسن يحمد ليهو السلامه ...
,يسالو عن الحكايه شنو ؟؟
وعمك .. يبداء في سرد الحكاية من الاول ...
كنتا بحش في الزراعه .. وقفت جنب البحر .. جاني التمساح برااحه ..
قبض لي كراعي .. ودخلني لجوه البحر .. ضربتو بعكازي .. قديت عينو ..
فكاني .. قمت جااري منو .. ما قدر يلحقني .. الحمد لله على كل حال ..
القصه دي حكاها اكتر من ميه مره ..
كل ما زول يزورو .. يسالوا عن القصه شنوو .. يقوم يحكيها ليهووو ..
لامن زهج منهم .. وقال ليهم .. ياااخ اريتو لو كان التمساح دا اكلني وريحني منكم ......

مرحبا كانتونا وحبابك
لا أدع معرفة أكاديمية بخصوص الانثربولوجي ,,, وموضوع القبايل وبطونها وافخاذها ومنشأها وحياة الخوة اخوك مارق منو كيت ,,, ولا اريد ان اتحدث حديث هتافي حول بغضي عن الحديث الإثني والقبلي في السودان ,, فالجميع أهلي رطانة وفصحاء ومن كان في حديثه عوج او عديل ,, شمال جنوب حتي الجنوب المقتطع من صفحة الجسد ,, فأحبهم واحب حكاويهم ولي صحاب من كل بقاع الوطن ووالله ووالله لم اسأل احدا عن قبيلته او جنسه لا تصريحا ولا تكنية
واللغة تخضع للوسط وتخضع لقانون السيادة والنفي الديالكتيكي وقانون البقاء الداروني ,, فتسود لغة المنطقة التي تكون فيها علي لسانك وتحفظ الذاكرة بعض لغة اهلك والتي ستصبح من لغة المنطقة كلها
كما أسلفت فحديثي زي نم الانادي ,, من كل شدرة عود
هههههه
صدقت والله نحن عندنا نضمي حقنا برانا ,, لكن شوف بعد كبرنا وقرينا لقينا الخواجات زاتهم بقولو
Cut the road
Kill the light
اتعبتنا بتغير اللغة ياخ ههههه
شاكر تداخلك ووجودك ضروري
وسؤالك قائم
شنو يعني
نايط

ههههه
مجيدو ي دفعة
بكري اخوي المسخوت
يدو انكسرت , جبصوها ليهو ,,, وبقا قاعد في البيت زهجان ,, قلت ليهو تعال لي في السوق ,, اشرب القهوة وطق الحنك وفرق ,,, جاني يومين تلاته ,,, وابا يجي
مالك
قال لي الناس كرهوني مرقتي من البيت ,, ناس ولا بعرفهم يسألوني
ها زول ,, مالك ,,, كفارة ,,
وانا احكي
كورة? مالك ومال الكورة شوف قرايتك
اها يوميا كده ,, قلت اخير لي زهج البيت من كترت السؤال

حبابك محي الدين سر الختم
هههه
جايز ياخ
حكي عمنا آدم من 27 كوستي وزول سكة حديد قديم لف السودان ومصر وبقا شايب
قال لي
المصرين لامن يجو يختارو العساكر , بدخلوهم البحر في الشتا عرايا ,,, ولامن يمرقو بشوفو المدلدل برفضو ,, والمعلق فوق بودوهو التدريب

Quote: الحلق ناشف والبطن تامبيرا بس اها يشرب والموية مع الزيت خلطت بقتو ليك جنازة بحر ,, والنفس مقابضة غرقان ,, والحيل انبت ,, وعطشان وفرقة لي حقنة مافي اتضايق تب ,, المرة شافتو نادت جيرانا ,, خموهو في كارو ودوهو البحر ,,, وبحر ازرق قيفتو رملة ,, خلوهو إلا بالسروال ودفنوهو في طرف البحر وردموهو رملة صاقطة لي المغرب زولنا انفشا واشتغل كمبرسون فوق وتحت

هههههههههههههههههههه
والله وصفتو جنس وصف
إن لاقاني في السوق بعرفو تب

مرحبا بدر
يا صاحب
زولنا اللوبا ادبتو ادب القبورة الفي القضارف , واتورط في الحليفة لامن اتذكر حلاة ملاح اللوبا
اها بقا يتراجع شوية شوية لامن أكلا عديل كده
عمن لينا الدنيا رمضان ,, ونهارو حار وطويل ,, وساكن عزابي , ام عيالو رسلت ليهو الرقاق في كرتونة ,, وداير يبل الرقاق في اللبن بعد العشا ,, اها حسب ذكرتك نهار اليوم الحار , كتر الرقاق والرقاق بياخد ليهو فورة
قال لي صحيت السحور , ولقيت الحلة طامحة فوق ,, تراهو الشي ده بزيد ,, أكلت وشبعت والرقاق قاعد في محلو ,, داير اخليهو لكن اتذكرت عطشة النهار ,, قمت عليهو أكلتو وكملتو غصب , ورقدت ,,, عليك امان الله سمعت الأذان حق الصبح وانا راقد في عنقريبي غلبتني القومة , لامن الشمش بقت نص السما حتي حيلي شداني وقمت ,, ولم ليك فيني اب نحار عد بي باقي اليوم

واحد دينكاوي كان شغال في دكان ابوي عتالي ,, اسمو يوسف ,, وانا طفل الوكت داك ,, وهو رجل محب للاطفال ,, وكان مثل عمي بيونسني ويحكي لي
من حكاويه التي لا تنسي رغم بعد المسافة الزمنية
قال لي
كان معاي واحد صحبي عتالي ومات , وماعندو اهل ,, مات في الاسبتالية ,, جابو المساجين يدفنوهو ومعاهم عساكر اتنين بي بنادقم
مشينا المقابر , المساجين بحفرو ,, وانا قاعد جمب الجنازة في النقالة ,, والحفر زاتو للمطموره جمب النقالة ,, والغبار حق الصيف قايم , مع تراب المطمورة كتحنا ,, زولي الميت يقوم يتعطش {يعطس } ويقعد في نص النقالة
المساجين والعساكر بي بنادقم فكو البيرق ,, وانا قاعد جمبو , ما اتحركت
الجماعة واقفين بعيد دايرين يشوفو البعاتي ده بياكلني كيف ,, واقفين يعاينو ,, اها وقت اتأكدو انو بني آدم وما ميت ,, لكن ناس الاسبتاليه لأنو زول مسكين ساي ما اهتمو بيهو
الجماعة جو راجعين
لكن والله يا يوسف انت راجل شداع خلاس
انا ما شداع , لكن حيلي مات غلبتني الجرية

واحد من اعمامنا خراجي ,, وجاتو الوردة { الحمي } اها صاحبو بقا يجي الصباح يشد حمارو ويملأ ليهو خرجو ويوديهو لي زباينو ,, واصلو ما فارقه معاهو وهو زاتو خراجي ,,, نهاية اليوم يجيب ليهو مصاريفو
اها بعد نصح وبقا شديد داير يشكر صاحبو
والله آ موحمد آ خوي تب ماقصرت معاي ,, ان شا الله تورد ونجازيك

فوق
من اجل
علي حامد شاطر
بنواحي الفيس

اتنين مسافرين ,, وجو جمب نجار بسوي العناقريب والبنابر والسواقي
والنجار ما بقيس ابدا ,, شغال بالنجار حقو او القدوم ,,, ينجر بدون قياس ويطلع نفس المقاس ,,
اندهشو من شغلو
واحد قال الزول ده ماهر اخوهو قال ليهو بالو فاضي بس
اها
سألو من بيتو وعرفوهو ,, شالو ليهم لحمة وخدار وفواكة ومشوا لمرتو في البيت
قال ليها
فلان راجلك رسل الحاجات دي وقال ليك هو معاهو ضيوف
وسافرو
بعد كم يوم جو راجعين وغشو النجار
‏ ينجر المرق يجي يدخلو في كراع العنقريب يلقاهو اكبر منو ,, ينجرو تاني يطلع صغير

قالو الشيخ فرح ودتكتوك جابوهو شاهد في قضية زني , وزي ما بقولو هل شاف مرود في مكحلة
فقال ليهم
بعيني شفتو
بي ايدو حاويها
وبي خشيمو عاضيها
وصلبو يمشي ويجيها
أكان فيها ولا خاتيها الله يعلم بيها

أب سن
والله ما بقدر أفوتكم إنت وصاحبك داك ود كرداش
غايتو الكلام دا يتخيل لي بكون أحلى بكتير لو كان سمعناه من خشمك ولي أضانا
عجبني قصتين كلما اتذكرهن بضحك براي زي المجنون
قصة الزول سيد الفرار: كان بدور موت هبشيني في فنيستي دي
وقصة زول اللوبيا

أدامك الله يا صديقي

بدر يا دفعة
قالو الزول بقا مسؤول كبير خلاس ,, الكبير الله ,, وقفز بالزانة وعمل عزومة لناس وجاهة الدنيا دي ,, لكن ابوهو امي وجاهل
قال ليهو يابا اي راي يسألوك منو ,, قول رايك وقول ليهم ده راي لكن في راي تاني
اها جو المعازيم ودقو الحنك ,, وعمك يقول رايو التلفان ده ويقول ليهم
ده راي لكن في راي تاني
المسائل ظابطة معاهو ,, علا ويحيدن مسينيح شك في الموضوع,,وشنو عمك قايم بيهم سداري كده
اها قام سألو
إنت فلان{ للمسؤول} ده ولدك طوالي
قال ليهو
آي ولدي ,, ده راي لكن في راي تاني

الما بصلح تركو اصلح


الشقاية ما لقايةالما بصلح تركو اصلح


الشقاية ما لقاية

الزول السمح ودابسن الله يخضر ضراعك

اها

جد لينا بحاحي للحملان ويشيل ويصرر في النعاج المغرب اذن
وهو في شغلتو دي يشيل في البعر ويجلب
الجماعة مروا بفوقوا وادوه لكزة ياحاج الصلاة المغرب زمنو ضيق
عاين ليهم كي وقالهم الفائق بصل



..........................................................................

جد لينا ما الفوق ده واحد تاني باقي الجدود كتار زي دوائر الكرتلة
بجغم احياناً واحياناً دي يعني صباح ومساء على مدار العام
وضعوا ما بطال جزار الحلة والحلال المجاورة اها بخش من انداية لي انداية
وبتملي فل ولا بخلسوا منو قرش رفيقو سالوه خبارو الزول ده ما بدفع
قالهم زولي ده زي بقرة المفتش زول بوديها الزريبة ماف . باقي ماهو جزار وكدي


..................................

قلنا نعتل شوية معاكم

سلام يا عبد الحفيظ
زميلنا الخواجة كنت أوصله للمستشفى ليخضع لعملية جراحية بسيطة و في الطريق كنا نتكلم عن الناس و مصايبهم فترجمت له قدر قدرتي قصة الثعلب و ولده و عذرة البني آدم ، ضحك الرجل حتى بانت نواجذه.

شوكران للصحاب
الجنيد
سيف
بجيكم راجع علا عندي واحده خايفه تطش
شيخ عرمان بكوستي رحمه الله , عالم وعندو برش صلاة في دكانو ,, بدرس الناس في السوق قبل العصر , وبصلي بيهم العصر
اها يوم داك بعد سلم , شك ياربي الصلاة دي ناقصة ولا تامة , سأل الناس واختلفو
نط واحد
قال ليهم حرم ناقصة
يتبع

اها سألوهو نعمنو زول متوكد من كلامو لامن حلف طلاق
قال ليهم
كان من الامام يقول الله اكبر , بركب من كوستي وببضع في الخرطوم ولامن ارجع حتي الامام يسلم ,, هسه حرم سلم وانا في الحصاحيصا ,,
شارع الخرطوم زمان
كوستي سنار مدني الكاملين الخرطوم

الجنيد يا صاحب
هههههه
الجدود ديل عندهم مصايب ,, قلت لي بقرة المفتش هههههه ولا الصلاة مافضي ليها من العليقة وصرصير البهم والحليب
عندي جدي بعلم في واحد الصلاة , جد والله لو ما خايف لوم الاهل كان جبت اسمو
المهم بعلم فيهو والزمن داك الجهل مستشري
واقف وراهو ويقول
فنقس ياخايب ,,, انعدل يا باطل ,,, دنقر
وهو كان بصلي مع الشيخ احمد الطيب ود الشيخ حياتي في الجامع ,, وصلاة الضهر زمنها اتغير ,,, ولامن جا لقاهم في السجود الاخير
قال ليهم
تاني قمتوا علي ل.......... كم
والجماعة انفقعو بالضحك ,,

حبابك سيف النصر
ههههه
وقال ليهو من وكد وكدوهو
البتجي توكدو بوكدك
تفتش في عيبو هو زاتو بفتش عيبك
شكرا ليك والله
اهو ليك السبق في نشر ثثافتنا الوطنية

الزول السمح ود ابسن

طبت وطابت ايامك

الله يدي العافية جدكم ولو عند الكريم يرحمه ويحسن اليه

دي ذكرتني ايام محو الامية العملوها في التسعينات ديك

والدولة كانت اسلامية حتى الشياب كان فاصلين فصولهم الحروم بي جمبة والرجال بي جمبة
في حين انو بكونو قامو من الجبنة كلهم سوا شفت التعليم ده بفرق بين الناس كيف....

الشياب والحاجات كلهم تلقاهم صارين كراسين واحد حساب واحد عربي
بالمناسبة لحدي هسي انا ما فاهم ليه التفرقة السطرية بين الحساب والعربي دي

اها (قالوا) والعهدة على القائل واحد الشياب الاستاذة كتبت ليهم (بجعة ) وحفظوها صر
بكرة جات الحصة وعملت مراجعة قبل البداية وسالت جدنا من صورة البجعة دي
اها الاسم رايح ليه (جع ... . لا ما كدي تح فيها ما لقاها في نافوخو تب قام قاليها (قني....)


استغفر الله من حقهم

فوق
لحين
ميسره

الجنيد حمد
يا صاحب
اسوأ ما حدث آنذاك يقبضو الزول جوه بطن بيتو ويطالبوهو بي قسيمة الزواج , والزول بي عيالو
وفيهم ناس متزوجين دون ان يلقوا بالا لقسيمة مكتوبة ومحفوظة
فكان عادي جدا يقبضوك في الخرطوم مع مرتك وانت من كوستي ,,, فتتلتل وتتلتل اهلك يفتشو القسيمة وين ويرسلوها ليك