Post: #1
Title: بعد اختياركم لخيار الانفصال .. هل سترضون بالعودة إلينا لاجئين ؟
Author: صبري طه
Date: 12-25-2013, 10:59 AM
Parent: #0
سؤال للإخوة الجنوبيين ...
|
Post: #2
Title: Re: بعد اختياركم لخيار الانفصال .. هل سترضون بالعودة إلينا لاجئين ؟
Author: صابر فضل المولي
Date: 12-25-2013, 11:03 AM
Parent: #1
الجواب صعب .. ولا اقول ليك مافي جواب
|
Post: #7
Title: Re: بعد اختياركم لخيار الانفصال .. هل سترضون بالعودة إلينا لاجئين ؟
Author: صبري طه
Date: 12-25-2013, 11:43 AM
Parent: #2
| Quote: الجواب صعب .. ولا اقول ليك مافي جواب |
يُمكن يكون الجواب كدا:-
سنعود إليكم .. فقط إذا ذهب الكيزان !!
|
Post: #3
Title: Re: بعد اختياركم لخيار الانفصال .. هل سترضون بالعودة إلينا لاجئين ؟
Author: صبري طه
Date: 12-25-2013, 11:05 AM
Parent: #1
هروبكم من جحيم الكيزان وضمانكم لثروة النفط جعلكم تختارون خيار الانفصال وتتركون إخوتكم من أبناء شمال السودان يُعانون الأمرّين (جحيم الكيزان + الضائقة الاقتصادية) ...
وها أنتم اليوم بين جحيمين من النيران الحقيقية (جحيم سيلفا وجحيم مشار) !!
|
Post: #4
Title: Re: بعد اختياركم لخيار الانفصال .. هل سترضون بالعودة إلينا لاجئين ؟
Author: Abdelslam Malik Ali Elhag
Date: 12-25-2013, 11:16 AM
Parent: #3
نهار سعيد صبري
المواطنيين البسطاء غرر بهم من السياسيين
واليوم لو عملوا استفتاء حقيقي انا متاكد انهم حيصوتوا للوحدة
انسان ليهو مليون ميل كلها بلده ليه يحشر نفسه في جزء منه
ارجو انه ما يرد عليك زكريا او دينق لانهم ايدهم ما في النار
|
Post: #5
Title: Re: بعد اختياركم لخيار الانفصال .. هل سترضون بالعودة إلينا لاجئين ؟
Author: Sameer Kuku
Date: 12-25-2013, 11:35 AM
Parent: #4
| Quote: بعد اختياركم لخيار الانفصال .. هل سترضون بالعودة إلينا لاجئين ؟ |
حكايتك بقى زي قصة العرب الدخلوا السودان من الجزيرة العربية و الشمال الافريقي في سالف العصور
هروبا من جحيم الصحراء و بحثا عن الكلاء و الماء في ارض السودان، و من حظهم الكعب
اخترع الخواجات الماكينة و عشان يدور مشوا طلعوا البترول من اراضي العرب، و هسع
اصبح العرب في الخليج اغنياء و السودان حاله - الله ينور بس - و ناسنا الجو اسلافهم زمان رجعوا تاني
مغتربين في هجرة عكسية عشان تشوف الزمن دوار كيف.
يعني عااادي بكرة امكن يدور حرب شامل في السودان و يستقر الجنوب و كلنا نلجأ جنوباً
لكن الحاجة الغريبة انو الجنوب ذات نفسوا مستضيف حوالي 150 الف لاجئ سوداني
و لم يقل لهم انفصلنا و تاني لاحقننا ل شنو؟
المهم كل سنة و انت طيب يا صبري.
|
Post: #9
Title: Re: بعد اختياركم لخيار الانفصال .. هل سترضون بالعودة إلينا لاجئين ؟
Author: صبري طه
Date: 12-25-2013, 11:53 AM
Parent: #5
تسلم يا سمير .. وكل سنة وإنت طيّب ...
Quote: حكايتك بقى زي قصة العرب الدخلوا السودان من الجزيرة العربية و الشمال الافريقي في سالف العصور
هروبا من جحيم الصحراء و بحثا عن الكلاء و الماء في ارض السودان، و من حظهم الكعب
اخترع الخواجات الماكينة و عشان يدور مشوا طلعوا البترول من اراضي العرب، و هسع
اصبح العرب في الخليج اغنياء و السودان حاله - الله ينور بس - و ناسنا الجو اسلافهم زمان رجعوا تاني
مغتربين في هجرة عكسية عشان تشوف الزمن دوار كيف. |
لكن مُشكلة اقتصادنا هي الحروب وعدم الاستقرار السياسي .. ولولا ذلك بدون بترول لأصبحنا أغنياء ...
وعلى المدى الطويل سيكون وضع السودان أفضل بكثير من الجزيرة العربية ...
| Quote: يعني عااادي بكرة امكن يدور حرب شامل في السودان و يستقر الجنوب و كلنا نلجأ جنوباً |
عادي وبي عين قوية .. خاصة وأنّنا لم نصوّت لخيار الانفصال ...
Quote: لكن الحاجة الغريبة انو الجنوب ذات نفسوا مستضيف حوالي 150 الف لاجئ سوداني
و لم يقل لهم انفصلنا و تاني لاحقننا ل شنو؟ |
بس الجنوبيين هُم الاختاروا خيار الانفصال .. يعني اللوم في الحتّة دي ما في محلّو يا سمير !!
ـــــــــ
|
Post: #8
Title: Re: بعد اختياركم لخيار الانفصال .. هل سترضون بالعودة إلينا لاجئين ؟
Author: صبري طه
Date: 12-25-2013, 11:47 AM
Parent: #4
أسعد الله أيامك يا عبدالسلام ...
Quote: المواطنيين البسطاء غرر بهم من السياسيين
واليوم لو عملوا استفتاء حقيقي انا متاكد انهم حيصوتوا للوحدة
انسان ليهو مليون ميل كلها بلده ليه يحشر نفسه في جزء منه
ارجو انه ما يرد عليك زكريا او دينق لانهم ايدهم ما في النار |
الغريبة أنا عايز ناس زكريا ودينق يردوا !!
|
Post: #6
Title: Re: بعد اختياركم لخيار الانفصال .. هل سترضون بالعودة إلينا لاجئين ؟
Author: عبد الباقي الجيلي
Date: 12-25-2013, 11:36 AM
Parent: #3
الحرب يا صبري أخوي ... لا يعير بها أحد ... وليست وقفاً على أمةٍ دون غيرها ...
وقد اكتوينا بنارها سنيناً ... وما زلنا ...
وتشرد أبناء وطننا جنوباً وغرباً ...
ونزحوا داخلياً ...
وما زال بعضهم في تشاد ...
وبعض أبناء النيل الأزرق ما يزالون في الجنوب ...
إذا ما استدعت ظروف الحرب ... ونزح أخوتنا في الجنوب شمالاً
فمرحباً بهم ... فهذا امتدادهم الوجداني الطبيعي ...
ونأمل أن يحفظ الله أبناء السودان جميعاً شماله وجنوبه من وطأة الحروب
|
Post: #10
Title: Re: بعد اختياركم لخيار الانفصال .. هل سترضون بالعودة إلينا لاجئين ؟
Author: صبري طه
Date: 12-25-2013, 11:57 AM
Parent: #6
Quote: الحرب يا صبري أخوي ... لا يعير بها أحد ... وليست وقفاً على أمةٍ دون غيرها ...
وقد اكتوينا بنارها سنيناً ... وما زلنا ...
وتشرد أبناء وطننا جنوباً وغرباً ...
ونزحوا داخلياً ...
وما زال بعضهم في تشاد ...
وبعض أبناء النيل الأزرق ما يزالون في الجنوب ...
إذا ما استدعت ظروف الحرب ... ونزح أخوتنا في الجنوب شمالاً
فمرحباً بهم ... فهذا امتدادهم الوجداني الطبيعي ...
ونأمل أن يحفظ الله أبناء السودان جميعاً شماله وجنوبه من وطأة الحروب |
معاك يا عبدالباقي ...
لكن عايز أعرف "جحيم الكيزان" دا الناس حتتغاضى عنّو وممكن ترجع تاني تتعايش بحكم الضرورات تبيح المحظورات وكدا .. وزاد وجدي !!
|
Post: #11
Title: Re: بعد اختياركم لخيار الانفصال .. هل سترضون بالعودة إلينا لاجئين ؟
Author: الصادق صديق سلمان
Date: 12-25-2013, 12:06 PM
Parent: #10
| Quote: الغريبة أنا عايز ناس زكريا ودينق يردوا !! |
إنت منو القال ليك حا يردوا ليك الاتنين ديل
ما زكريا ودينق براهم
هناك امثال البينو ومن لف لهم
كم اتمنى ان يستقر الجنوب ويتطور اقتصادياً
الوحدة قوة للبلد وليس التفكك والتشرذم
|
Post: #13
Title: Re: بعد اختياركم لخيار الانفصال .. هل سترضون بالعودة إلينا لاجئين ؟
Author: صبري طه
Date: 12-25-2013, 12:14 PM
Parent: #11
Quote: إنت منو القال ليك حا يردوا ليك الاتنين ديل
ما زكريا ودينق براهم
هناك امثال البينو ومن لف لهم |
|
Post: #14
Title: Re: بعد اختياركم لخيار الانفصال .. هل سترضون بالعودة إلينا لاجئين ؟
Author: cantona_1
Date: 12-25-2013, 12:22 PM
Parent: #11
يقول المثل عندنا: (الغلبها بني بيتها قعدت تطارد الكلاب). ما معناه: (غلبها راجلها جات تأدِّب حماها). خلوا الجنوب جانباً حلُّوا مشاكل السودان الفضّل. كان وحدة خير وبركة وكان عاد السودان القديم ولا هو ذاتو إتقسّم دويلات فالخير فيما يختاره الله.
تحياتي
كبـّاشي الصـّـافي
|
Post: #12
Title: Re: بعد اختياركم لخيار الانفصال .. هل سترضون بالعودة إلينا لاجئين ؟
Author: صبري طه
Date: 12-25-2013, 12:09 PM
Parent: #10
Quote: مخاوف من تدفق لاجئين جنوبيين إلى جنوب كردفان بالسودان
توقعت ولاية جنوب كردفان السودانية، تدفق عدد كبير من اللاجئين من دولة جنوب السودان، جراء الحرب الدائرة حاليا بين قوات الجيش الشعبى، وأكدت حدوث تأثيرات سلبية من مجريات الحرب على الأوضاع الأمنية والاستقرار فى المنطقة والتى تشاطر الجنوب بأكثر من 500 كيلو متر فى الحدود. |
|
Post: #15
Title: Re: بعد اختياركم لخيار الانفصال .. هل سترضون بالعودة إلينا لاجئين ؟
Author: Deng
Date: 12-25-2013, 07:45 PM
Parent: #12
صبري طه.
واضح جدا بأنك جاي تعاير الناس في محنتهم. كما يفعل الكوز القمئ فرانكلي.
وهذه ليس بأخلاق إنسان طبيعي.
الفيك أتعرفت.
|
Post: #16
Title: Re: بعد اختياركم لخيار الانفصال .. هل سترضون بالعودة إلينا لاجئين ؟
Author: صبري طه
Date: 12-27-2013, 10:38 AM
Quote: واضح جدا بأنك جاي تعاير الناس في محنتهم. كما يفعل الكوز القمئ فرانكلي.
وهذه ليس بأخلاق إنسان طبيعي.
الفيك أتعرفت. |
لم أكن أعلم بأنّك تعلم بما تُخفي الصدور ... سبحان الله ...
يا ابن العم لا معايرة ولا عيار يدوش .. انفصالكم كان بحجة حالكم الحالي .. فهل ستعود حليمة لي قديما ؟
ثمّ هل نعتبر (كشماليين) الجهل مُبرّر لاختيار شعبكم خيار الانفصال ؟!
بالمناسبة يا دينق .. ولست وحدي .. كثيرون تنبأوا بما يحدث الآن في جنوب السودان .. فهل أتى هذا التنبوء من فراغ ؟!
ثمّ الفيكم إنتو إتعرفت مع خيار الانفصال ولغة المصالح التي أعطيتم فيها الحق للجنوبيين للهروب من جحيم الكيزان .. أمّا أمثالنا من أبناء دار جعل فلتأكلهم النار ولو عبر نيران صديقة !!
وبُمناسبة المُعايرة يا دينق .. كثيرٌ من الإخوة الجنوبيين زاملتهم في الدراسة (المرحلة الثانوية) بمدرسة الشيخ لطفي الثانوية بمدينة رفاعة .. هذه المدينة التي احتضنتهم بعد أن شرّدتهم ويلات الحرب في جنوب السودان .. وأعتز بزمالتي وصداقتي لهم .. وطيلة فترتي معهم لم أعايرهم بذلك ولم أمُن عليهم أيضاً بذلك ...
وعن نفسي ليس لديّ أيّتها مُشكلة في عودة الجنوبيين كلاجئين للسودان .. وقبل ذلك أتمنى من كُلّ قلبي أن تقف هذه الصراعات وأن تعود الحياة السلمية لمواطني الجنوب في أسرع وقت مُمكن ...
حاشية:-
كنكشة البشير وصحبه في السُلطة = كنكشة سيلفاكير وصحبه في السُلطة ...
إذ لا فرق بين السَلطة كلّها كدا مع بعض والجرجير والعجور والطماطم متفرقات .. وهنا دي النجيضة ...
قُلتو لي ديمقراطية وشعب درجة رابعة ودرجة أولى وهكذا بطّيخ .. مُتناسين أنّ آفة التمييز العُنصري تشتد في عالمنا الثالث وتزداد شدّة مع زيادة نسبة الأمّية والجهل ...
بالمُناسبة .. إنت هسّي مع منو ؟ سليفا ولا مُشار .. ولاّ مع البجي أوّل ؟
|
Post: #17
Title: Re: بعد اختياركم لخيار الانفصال .. هل سترضون بالعودة إلينا لاجئين ؟
Author: Abdel Aati
Date: 12-27-2013, 12:19 PM
Parent: #16
بوست غير موفق يا صبري
هم اختاروا الانفصال مضطرون ؛ بسبب عمايل الدولة المركزية فيهم
واذا اتوك لاجئين فهم مضطرون ؛ بسبب الحرب ..
لا تحسابوا بسطاء الناس بما يفعله سفهاء الحكام بهم ..
|
|