اليوم زيفة وصقط وفوف.......

القصد من البوست المؤانسة ....
ببعض الدوبيت والموروث عن البرد في حياتنا نحن اهل الريف...
ومن العادات المتأصلة جدا في بوادي الغرب..
أن ينام الرجل في الشق الأيمن وتحديدا صعيد..
لا أدري لماذا.....؟
ببقالك تيلة دهب في وريدِك
ببقالك ختم بوبار عشان بنريدك
ببقالك قسيم للريد دعوتي تصيدك
وببقالك صغير ياأم طوق أنوم بي صعيدك
ودائما وكثيرا ان البرد يأتي من الشمال
"الخلاَّني أسوِّي التابة ليَّا مقوت
دايرك تبقي من تالا البرد كبوت

وعن فوف الجزو ورحلة الشمال..
يقول الراحل إبراهيم ود خليفة مخاطبا صديقه شيخ جامع علي التوم
أيَّام كان الزمان صبيا بعُرفه وهما مغروران بالصبا والشباب
والأشواق تهطل علي حناياهم نقناقة ..
"يا شيخ العرب الصقيع قابلنا
والمنريدو من شوفت فريقو أزمنَّا
أخير ليك برية العرَّافو مال وإتنَّا
والله الحِجْلُو بعد النومة بآاخُد رنَّا

Quote: أما الثالث فقد ذكر "صدر أم عريساً طامحاه وهذه لا اشرحها

ليه يا ود المقدم ليه ياخي مابي تشرحها
أشرحها وشرّحها ...عسى ولعل المعادلة دي تتفكفك لينا
والله يدفيّك كمان و...كمان.. قادر ياكريم
وليك ياحبيب من المحبّة أضعاف

العبيد
نضيك حلو وطاعم
الذكريات العذبة وقود زيفة القر

Quote: نضيك حلو وطاعم الذكريات العذبة وقود زيفة القر

الذكريات دي نكتها البرد
قلت لي هي تُقابة القِر يا ود أب سن
وأصعب أيّأم البرد هي المستقرضات..
ويسمونها العجوز لأنها تأتي آخر البرد وفيها القِر
وهي التي قيل فيها"برد الشولي الحمي العجوز البولي....

ومن روائع الزيف والبرد ولسعات شوقه
قول الشيخ محمد شريف العباسي:
الشتا جانا بي بردو وسحابو الدّكَّن
ولسَّه قيودنا من أم بادر أبن ينفكّن
ود اللّريل اللَّمَّاتُو بي الصَّي جكّن
فراقو الخلَّى ريشات القلب ما يركّن


محبتي ودمت سمحا وتُقابة بلد

ومن ذكريات الفوف وبرد السَّافل
يحكي أحدهم ان حاج بلَّة أبو ضراع توفي بمنطقة مراعي الجزو
وكما تعلمون ينعدم الماء هنالك والزاد وحتي الأسواق
قال مُحدثي: كنا بجادول مخضرّ وقام عمَّك بلَّة جابلو ميتي
اها لا عندنا مي ولا كفن ولا ريحة ولا حنوط..
قالوا : صالح وأحمد وسالم يسرجوا اليوم ويعلقوا معاهم جُتَّة حاج بلّة
ويلفوها في الدِّلي....
إمتطي ثلاثتهم النجائب وأسروا بليلهم نحو أقرب مُشرع مسافة ثلاثة ليالي
دونكي الختيماية، وعلي صفاح بعير أحدهم جنازة حاج بلَّة
قال مُحدثي: سرينا ليلنا ثم الضُّحي ولم يكن عندنا زادا إلاَّ سعون لبن القارص والقليل من حليب النّوق للشاي، إنخنا جمالنا حيث لا توجد شجرة
نستظلُّ بها لأن المنطقة صحراء ومن روث الإبل أوقدنا النَّار وصنعنا شاي
"أبوكتحة" الحليب، ثم رحلنا وأسرعنا الخبب ، حتي لا تنتفخ الجُثَّة بفعل حركة العيس وعند الغروب إنخنا المطايا مرة أخري حيث أزحنا وكاء سعون القارص وشربنا ثم واصلنا سيرنا وعند الهذيع الأخير من اللَّيل
وحتي لا يأتينا الوسن والنعِّاس صار البذر يتجادعون النَّم والدوبيت..
اليوم البـِـِرَمَِي مــَشقـْلــَبْ الأخفافْ
ليهو جــَنادي والدّرب منو ما بنخاف
سنتين هجرة والجيب فاضي والمُخ لاف
ومن ها البسرة ربي يحوّد القرياف
ثم صنعنا لنا شاي وواصلنا وعند بذوغ الشمس وطلوع الكافرة من الصباح وصلنا لسوق الختيماية وعندما إنخنا الجمال هرولنا نحو دكَّان ود اللَّمين وذرعنا السبعة من القماش مع بعض العطر ، وبعدها هرولنا نحو بعير سالم
وعندما حللنا عُقَد الحبال والزِّمل وفتحنا الدِّلي لم نجد جثَّة حاج بلَّة
قصصنا أثرنا مرةً أخري وقبيل الأصيل لاحت لناظرنا الصقور تحوم
حول تلَّة صغيرة ولم نجد من جثّة حاج بلّة إلا القليل من هامَّة مشغلب الأخفاف

ليصيح الجميع:
هلا وزايلة حاج بلَّة ود أبو ضراع من الدنيا راح ومن الدِّلي راح....
*الدِّلي كالفروة ولكنه من الجلد المدبوغ بدون وبر
أهل البادية يسمونه الإنسان مشقلب الأخفاف

العبيد اخوي سلام ،،ياخي يمين السنة دي اكان ختينه جنس نضمك ده تكتلنا صقطة،،،راجع ليك عشان احتفي معاك بيت بيت..
دربي علي الدوام،،تاوقت بالشباك لقيت الصقط قطن موزون راجي الكبس في الصريف،،،الله اسندك يالسمح.

Quote: and#199;ديفة الرُّوبزن دخلن كويع الخُشَّة أجمل خلقة من صُل الدبيب الوشَّه يا أم نهدا متوقر لا انكسر لا انفشَّه لي البارح طريتك ودمعي ساساق بشَّه.

مجنون عديل واللهِ

العبيد اخوي كيفك من الطوله؟
واصل يا الحبيب خلي جنابو عمر يخرج من صمته بعد عودته من الإجازة ، يبدوا انه
ما زال مرهقاً من حفلات التكريم التي هو أهل لها لما قدم للكرة الهلاليه والسودانية
وكذا اشتقنا لمداخلات ام عروض الخطافية , الماجدة منى خوجلي وكذلك المزنوح شيقا
لابِد ليهو مُدَّه, لا يكون عرس في أم مضوي, حرَّم قالوا مجهِّزه ( الساطور والشوال).

أمشي اتلاعب يا شيقا
كُل المحبه

يا سلام يا عبيد
والله لي يومين أزازي على بوستك دا
بس المشكلة دايرلو روقة
زول يقراه حرف حرف

كويس إنك شرحت سدر أم عريساً طامحاه

لأنك كنت حتخش معاي في حتة ضيقة جداً


تحياتي مثنى وثلاث ورباع

حباب العبيد وناسو
ضحكتني قصة ناسك الملصو الجنازة في السكة , معناتو مستعجلين وناقة الجنازة وراهم
بدور اسألك
طمحت راجلا ,,, وما بقولو الراجل طمح مرتو ,, بقولو هجرا
والطمح البعرفو هو الفوران حق السوايل ,, يعني اللبن قبل يفور بقولو طمح ,, بعمل ليهو غوفة كده ويقوم بيها

مرحب حباب الجنرال ود المكي
ودائما تعجبني ذائقتك العالية جدا للدوبيت
ولذا أهديك هذه المربوعات بالرغم من البوست عن الزيفة والفوف
ويا ذوق تسلم.....
فروج النعامات البــِصــَوَّى خلاهـِن
سيدك عندو بالتين فى النميم بملاهن
المعزى على جيهة الرصــَّب ما تاهن
يوم الجمعه قَرْض اصبع وعدنا معاهن
الشاعر الرائع إبراهيم العوني الكباشي"إبراهيم توية"
*البصوِّي خلاهِن من الصّي والقفر وبالتين من بالات الأقمشة
والمعزي من معزة وهي الصيد والرَّصب اي الحصباء
وماتاهن اي مكان سروحهن ويقصد دمرهن وحركة سير باديتهن
لكن هذا المقطع رائع يا ودالمكي أخوي
"قرض اصبع وعدنا معاهن"
ود الحُر بلد عاجة ام دقون جافاها
وأم عِيشوبة هي وضهر الحمار نطاها
دِيك الصفرة قِدامو الرِّ هاب قلاها
وتومة سيدو في العِد الطِّوال متواها
الشاعر الفحل حمد ود الصغير الراحلي الكباشي
*عاجة من مراعي الجزو او مراعي الشِّتاء
نحن اهل بوادي الغرب رحلة الشتاء والصيف عندنا الصيف الموطأ إلي الدَّمر
ورحلة الشِّتاء نحو الشمال ومراعي الجزو
وأم دقون أي لها ألسُن ممتدّة من الحجار والرِّهاب هو السراب وقلَّاها أي رفعها
وتومة سيدو أي محبوبة صاحبه ومفردة تومة جميلة جدا ولها وقع خاص
والعِد أي الآبار ومتواها أي دمرها ومكان حركتها
ونحن أهل البوادي يكون إنتاجنا وربحنا في فصل الشتاء ، تزاوج النِّعم حيث تكون الخصوبة عالية حيث البهائم تسمن في فصل الخريف وايضا تلد البهائم في الشتاء
وكذلك في فصل الشتاء نبيع بهائمنا وتكون افراحنا في فصل الشتاء الزواج وطهورة الأبناء لأننا نعود من رحلة النشوق إلي الدَّمر، وكذلك في الشتاء يكون "ضمي" البهائم طويلا ونرتاح قليلا من عناء الورد والنشل من الآبار، وكذلك ايضا نحب الليل جدا والسّري.....
وين أمسيت وين أصبحت
واللَّيل فوقو ارباحي وعليَّا منَعَت
إتْ كان ماقدرت على رسن الوحش قطَّعتَ
ماكان بهجمبَّك النذْرة الهَويشة وشحتَ
*رسن الوحش اي رسن الدَّير المصنوع من جلد البقر
والنَّذرة اي غروز وجافية والهويشة وشعت اي نكور وشوس
سلامنا وتحياتنا إلي سماحة اللواء وعودا حميدا وأم عروض
وأبوي الطيب جنا شيقوق ذلكم الرَّجل الدَّرت
وراشد جراب الدوبيت

ود صُرَة المنبر ود أب سن بجيك صاد يا زول يا شفيف

Quote: حباب العبيد وناسو ضحكتني قصة ناسك الملصو الجنازة في السكة , معناتو مستعجلين وناقة الجنازة وراهم بدور اسألك طمحت راجلا ,,, وما بقولو الراجل طمح مرتو ,, بقولو هجرا والطمح البعرفو هو الفوران حق السوايل ,, يعني اللبن قبل يفور بقولو طمح ,, بعمل ليهو غوفة كده ويقوم بيها

ود الصُرَّة الذي تنشده رمَّالية ودع المنبر
الشفيف ود أب سن ....
الصبيان زولهن إمَّلص ...
من الدُّنيا راح ومن الدِّلي راح.....
الناس مستعجلين عشان لقوا سبب رجعهم الفرقان .....
دايرين يقابلوا ستَّات اللَّكيك وسمحات النافلة..
عشان رحلة الجزو بطول بلحيل والفوف + الحليب+ قديد الصيد
دي برضو معادلة صعبه خلاس....وكمان في الجزو مافي زول بشرب موية
زولك الشاعر الراحل صاحب الصوت الجميل بخيت ود عبد المولي الكباشي
عندما طال مكوثه برحلة الجزو وفهقو الشُّوق إتمني الحر والسموم لإبله حتي تزلج "الخداج وإتمني ان تروح إبله وهذا يندر عند البدوي...
"يا مولايا تهوِّن حرِّي
سمومها تعطَّش الجذرة العلوها مسرى
يروحن منَّنا لوكتن حوار ما يضلِّي
عشان ما نشوف خلقة المِن وسط منزرِّي
أها خلقة المن وصف منزرِّي وضامرة دي الودرت عمك حاج بلَّة
قلت لي الطُماح....... ياخي الطُماح دي أمره عجب
البدو يا ود أب سن مولعين بالطُماح حتي يسمون جمالهم النجائب
"صدر الطامحة راجلها" شوف زول توية
"البدني الطَّامح ؤ مطلِّق
بلا الشرشوفو متعلِّق"
بعدين نعم نقول اللّبن طمح ونقول الوادي طمح..
شوف مقطوعة الطاري وهي تمدح أهلها في سيرة "زفَّة " عُرس شقيقها
"البحور طمحَن سوا
والسلاح شالو الهوا"
وهاك دي عن الطُماح يا ود أب سن
جمعة ودعاقل الكباشي كان غنيَّا وجميلا حتي عذاري البادية يطمحن
أزواجهن له ولكن سبحان مبدل الأحول وفي تداول الأيام البيض بين الناس
نكبته جهادية ود تورشين وصار فقيرا ومزرارعا يمتطي ناقة "رقيت"
أني الدُّنيا أُم قديد ما ضُق تلاتِلها
غرارة العبوس ما بضلِّي خايلها
كراعي ما مشت يوما أبطِّلها
كم فرَّشت تويلي وكورها فاصلها
وكم علَّقت أم رقيش البي كناتِلْها
ما بركب حويشي اللُّمُّو بِبْهِلها
عيل تيسن يجوار النَّاقة يندلها
حزمت الهرتكيك البلَّمُو عِتلها
جنب بت الحصان الدَّبسي بي حجلها
لله دُر هذا الشاعر كني الدُّنيا بأم قِديد وأهل البادية كثيرا حين يحزنون
يقولون "الدنيا أم قدود" أها دي قدود صديقي العارف حسب الله الكباشي
مو حسب الله البرلمان......
من ثراءة لم يتذوق تلاتل الدنيا ولكن رجع وقال غرارة العبوس لا يبقي جميلها وسمحها ، ثم دلف لثروته اولا لم يمشِ راجلا ابدا وكثيرا ما فرش
فراء التويلي والتي يكون بها رونق للكور او السرج ومن كثرة إبله لا يمتطي الحاشي وإنما يسرج البعير القوي الذي يسنُّ الناقة
حزمت اي جمعت والهرتكيك اي الإبل الكثيرة وبلَّمو من البلام وهو كالرَّسن ولكن يُشبل علي البعير الذي لم يسرج سابقا والبلام هو رسن الطَّاعة ودائما أهل الإبل الكثيرة يمتطون الجياد والخيل
ومن أجل هذا الثروة طمحت العذاري لأجله
جميع بت المكان الطاحني سِنْبِلْها
لي زملي الغلاد هي طامْحِي راجلها
في شاني عريسها يوت بكاتلها
وكان قولي كضب دقني أسلِّلها
طاحني سنبلها اي العطور اليابسة ، وبت المكان اي الدرجة والرفعة
لكن أنظر بعد هذه الثروة والخير ماذا فعلت به جهدية ود تورشين..!
بقيت عيل أطُق البادي أزاولها
شيلي فوق رقيتَن عيل أمايلها
نعالي من كعبها الكرش بكمِّلها
يارب ياكريم الحال تبدلها
والغلبة العلي تك تنزلها
جردو ماله وصار فقيرا وعاطلا وحتي رحيله في ناقة"رقيت" وحمولتها فيها إلا يعادلها بي تراب او حجر لأنها "ممايلة " ولا يملك شئ قمّة الفقر...
ومن سيره راجلا "أقروب" إنتهت نعاله
أصدق القول إن قلت : لم أقرأ شعرا اصدق من هذا
يا ود أب سن والجنرال دخلتوني بطن الخُشَّة..
ودي هدية خميسكم......
محبتي

ومادام البرد والفوف جانا من تالا الخليج

هذه أجمل ما سمعت عن البرد في الشعر النبطي........

بردٍ يـــلف الأمكنة والزوايا .... برق ورعد واحساس بالصمت واللَّيل
وملا محٍ تدفي برود النوايا ......وقلوب ضخّت بالعروق التفاصيل
واحلام صارت للنفوس المرايا..... واحزان نامت في ثياب التعاليل
ليل الشّتا برد وهروب وحكايا ...... خوف ورجا رنة حجول .. ومواويل
ليل الشتا خيل وحروب وسبايا ...... نار وشعر ورجال .. صفّة معاميل
ليل الشتا ميعاد رد الهدايا ...... لا صار ما يصبر على العطر منديل
لاجا الشتا فزّت جميع الخفايا ........ يا وينكم يا جا معين المحاصيل
ليل الشتا نصرٍ لكل الصبايا........واكبر هزيمة شامله للرَّجاجيل
أحمد الناصر الأحمد

رَبْعَـهْ ، جمالها طَبْعـهْ ، فايته زمـانهْ
قالت للقمره قومي، واتحكَّرتْ في مكانهْ
يوم قلبي فـرَّ ، قُلْـت البريـدو طِرانـا
أن راكْبَ الصعب،وطاوي المسافه عشانهْ

العزيز عبيد الطيب
لك تحياتي
و لا املك غير ان اقول انه ابداع ما بعده ابداع، و انه (نحن) كما خلقنا و كما كنا نريد.

Quote: لماذ يكثر إشتياق الشعراء في فصل الشتاء؟ هل هذا مقرون مع تركيبة النفس البشرية؟ أم ماذا ! الشتاء في بعض البلدان هو قُبح وجدب ويباس لكن عندنا في السودان غير دائما مربوط بالشوق والحنين.....

الشتا جميل يا عبيد يا طيب..

والحنين فيه عجيب..ممكن يقعدك تبكي براك كده..تهبشك ذكري بعيده تبكيك بدون حتي ما تقدر تعرف البكاك شنو!
واكتر حاجة حلوه فيه لما تكون في بيتكم بين امك وابوك وأخواتك الاولاد والبنات..
والعجب لو كمان كان عنكم ضيوف قريبين ليكم شديد وبيحبوا الونسة..
لمة وقعاد قريبين لبعض وونسة كتيرة وشقاوة عيال وصحك من القلب وجر بطاطين وأغطية..
الشتا مافيه زهج الحر وأخلاق الناس الماطايقة بعضها..

إزيك يا عبيد إنت ذاتك بقيت زي فصول السنة في بلد غير السودان..
يعني حضورك مقسم..

تحياتي لك ولضيوفك الافاضل..

Quote: رَبْعَـهْ ، جمالها طَبْعـهْ ، فايته زمـانهْ قالت للقمره قومي، واتحكَّرتْ في مكانهْ يوم قلبي فـرَّ ، قُلْـت البريـدو طِرانـا أن راكْبَ الصعب،وطاوي المسافه عشانهْ

شكرا الجنرال ود المكي
فرَّة القلب دي ما بتجي عيل لي الناس السمحين نافلة وطبع
"قعدت تطوي قلبي وكلّ ساعة إتفرُّو

Quote: لا املك غير ان اقول انه ابداع ما بعده ابداع، و انه (نحن) كما خلقنا و كما كنا نريد.

أخي عبد الله محمد أحمد سلاااام ومحبة
الشتاء عندنا له طعم خاص وشخصي الضعيف
كنت أحب القنص في الشتاء لأن الصيد يسهل إستطياده في البرد
وكذلك يجتمع في أسراب في الشتاء ويلد في الشتاء و،الدواب التي نمتطيها للقنص يسهل عليها تحمل العطش في الشتاء
ولي ذكريات مع القنص ومع بعض المهاجرية يوما ما سوف أكتبها
عليك الله شوف الرائع الفنان الفرجوني قال شنو في شتاء الغرب"
صَقـَط امريكا ياعُمر ال طَلـَقْ بـ نـَـِزيلـُو

لِبْس الصُّوف ؤردّيـف البِـدَل مابْــِزيلـُو

بلِّغْ عنـِّي لي اخْواني السَّلام ؤ جَـزِيلـُو

ؤقـُول لفـْلانـَة مالِـك قـَلبي بتزاوليلو /بتـْواِزيلـُو

عليكم الله المقطع الأخير دي
قول لي فلانة مالك قلبي بتزاوليلو" لولا الشتاء لما كانت هذه الذكري

وكما اسلفت نحن أهل البادية يكون "الموطي" في الشتاء وندمر المناهل
شوف ابو صالح دي قال شنو

تبورن نزل فوق الفنايد ديسو

ذي عجوالحجازوالمنقةحالي حديثو

رقم امنو المشدَّدونجدتو وبوليسو

اناوقلبي وغناي نتجاري لا عند ميسو
الفنايد هي ما تحت الكتف ومقابل الضلوع القاصر
يعني مكمن الرّيد والديس هو الشعر أها تري الطرَّاد والحرّاس
والناس البحومو وحتي الكلاب لا تنبح في هزيع ليل الشتاء
محبتي

Quote: الشتا جميل يا عبيد يا طيب.. والحنين فيه عجيب..ممكن يقعدك تبكي براك كده..تهبشك ذكري بعيده تبكيك بدون حتي ما تقدر تعرف البكاك شنو! واكتر حاجة حلوه فيه لما تكون في بيتكم بين امك وابوك وأخواتك الاولاد والبنات.. والعجب لو كمان كان عنكم ضيوف قريبين ليكم شديد وبيحبوا الونسة.. لمة وقعاد قريبين لبعض وونسة كتيرة وشقاوة عيال وصحك من القلب وجر بطاطين وأغطية.. الشتا مافيه زهج الحر وأخلاق الناس الماطايقة بعضها..

وزينة الدِّقون ام عروض بت خوجلي
سلاااام ومعزة كبيرة
يا سلااام الشتاء ولمَّة القرايب والأحباب والبهجة
بعودة الحبيب العائد ونحنا في البادية دائما مهاجرين البادية يفضلون
العودة للديار في الشتاء لأن اهل البدو يعودون من المخارف إلي
المناهل الشهيرة مثل أضاة أم قوزين وأم بادر و...... وكذلك يفضلون
الدَّمر في داخل الرهود والوديان لأنهم يتخذونها ضراء وساتر للبهائم
الضغار"ضأن/ماعز" وكثيرا ما تلد في الشتاء فتجد نيرانهم تشبُّ في السناف وفي باطن الأودية حيث للحياة طعمٌ ونكهة والقري يكون بالذبائح
وما أجود الخنساء حين تقول
طويل العماد كثير الرَّماد إذا ما شتا
ولله در الشاعر ود إدريس الكباشي حين يقول:
حظي كان لفحت جيمي ودنيت شنحيبي
ومشيت في الباديه لحدود دولة ادريس ديبي
قضيت ايام مع ناسن عندهم هيبي
تقابت الوقود برموها قبل الغيبي
الشنحيب هو البعير الطويل الشُّوح وحدودإدريس ديبي يقصد حدود تشاد
وشوف يا ود المكي تُقابة الوقود برموهم اي يوقدوها قبل المغيب "الغيبي

ويا أم عروض بقينا مقسمين مع الغربة وحتي الوجدان يشهد الله مقسم
هل تصدقون كم تمنيت ان تكون ايَّامي دائما مع هؤلاء السمحين وانا جالس وسطهم
"قلت البدو قلت الصفاء والنقاوة.....
يا زين شوفتهم علي النَّارجُلاَّس.......
محبتي لكم ودمتم سمحين

المفردة (طامح) لها نفس المعنى عندنا
ويشار إليها بشيء من الاستنكار


تحياتي مثنى وثلاث ورباع

Quote: السَّافل أي الشمال جازا من الجزو، حيث مراعي أقصي الشمال والشمال الغربي، والسهول الممتدة تخضرُّ عندما يهب عليها البرد او رياح الشِّتاء

يازول وصفك دا من "راهب " ولا ريح وغرب مروراً بحمرا كولا ،التيس والعنز
والقلات وفيافي شاسعة تمتد حتى عمق الصحراء.
بالمناسبة "الجزو" اشبه بالملتقى الدولي تتوافد إليه قبائل من داخل السودان وخارجه
على سبيل المثال لا الحصر الكبابيش، العطوية ،والعوايدة ،والماهرية ،الزيادية ،المحاميد.....،
ومن تشاد والنيجر المحاميد،اولاد راشد ،واولا زيد وغيرهم.
يا عبيد هؤلاء الناس لا يحملون جوازات سفر ولا يعرفون حدود ،عند انتهاء الموسم
الكل يعود إلى "دامرته" على أمل العودة في العام القادم وفي نفس التوقيت.

شكراً يا ود الطيب على هذا السرد الجميل والتحية عبرك لأهلنا الطيبين الذين
يجوبون تلك الصحراء مهتدين بالنجوم وبعض المعالم التي حفظوها عن ظهر قلب .

Quote: يازول وصفك دا من "راهب " ولا ريح وغرب مروراً بحمرا كولا ،التيس والعنز والقلات وفيافي شاسعة تمتد حتى عمق الصحراء. بالمناسبة "الجزو" اشبه بالملتقى الدولي تتوافد إليه قبائل من داخل السودان وخارجه على سبيل المثال لا الحصر الكبابيش، العطوية ،والعوايدة ،والماهرية ،الزيادية ،المحاميد.....، ومن تشاد والنيجر المحاميد،اولاد راشد ،واولا زيد وغيرهم. يا عبيد هؤلاء الناس لا يحملون جوازات سفر ولا يعرفون حدود ،عند انتهاء الموسم الكل يعود إلى "دامرته" على أمل العودة في العام القادم وفي نفس التوقيت. شكراً يا ود الطيب على هذا السرد الجميل والتحية عبرك لأهلنا الطيبين الذين يجوبون تلك الصحراء مهتدين بالنجوم وبعض المعالم التي حفظوها عن ظهر قلب .

ود عبد الحميد ود جاد الله
سلاااام ومعزة كبيرة ليك
وسعيد بمسيالك ودائما توقت الرباعة وطلتهن سمحة بلحيل
نعم الجزو اشبه بالملتقي الدولي.....
بعدين هنالك ينعدم النَّاموس والذباب وينعدم المرض و........
شوف هني شاعرنا ود المر قال شنو عن حمرا كولا التي ذكرتها في مسدار القمرية
عندما توغلت النوق في اقصي الشمال وقفت القمرية ورجعت للمدامر
طلبت حمرا كولا وهرمة
ولي العاطفة دايراهو وسروح الدَّرمة
أني مابقدر بطير عكس الهبوب يا شرمة
ومعاكي سلامة واني منِّك بقيت منكرمة

سعيد بطلّتك السمحة ولك معزتي

Quote: لمفردة (طامح) لها نفس المعنى عندنا ويشار إليها بشيء من الاستنكار

بدر البوادي سلاااااام ومعزة
نعم يابدر لكن أحيانا يتم الزواج في عمر صغير حدا
يعني زول ذاتو ما بدفييييييييييك والبرد بسوٍّي الفوف.. اها تولع ليك تُقابة.....
لكن يابدر أهزوجة أم سماح
"البحور طمحَن سوا
والسلااااح شالو الهوا
دي عجيبة

من الفيس ..
والله من النحَّالة التحت....

Quote: ود المقدم يازول سلم يراعك ، إصطبحت ببوستك الطاعم ومداخلات أصدقاءك فأستمتعت أيما متعة ، فقط استقفتى رباعية بخيت عبد المولى ( يا مولاى تهوَّن حَرى) التى يقول بعدها ( سمومها تعطَّش الجذره العلوها مسرى) وهنا يقصد بالجذره العلوها مسرى الناقة كثيرة الشحم والسنام ( علوها ) والسؤال لماذا اختار هذه الناقة الممتلئة شحماً ؟ والاجابة لأنها تمتلك رصيدا ضخماً من الشحوم تستطيع اكسدته لمقاومة العطش حين يأت الحر بعكس الهزيله ، وهذا ما استوقفنى فى هذه الرباعية فقد درسونا فى حصص العلوم ان سر تحمل الجمل للعطش يكمن فى كليته النشطة /واكسدته للشحوم ، لذا ارجو تبديلها فهى مكان سجدتها يازول واليك شقيقتها بلسان البخيت عبد المولى حين حشره الفوف بنفس مطبك هذا الدرام كمل فضلن بسالى هليف ونحنا مع النكور توتالنا من الزيف يا مولاى تجيب حــرَّى وسموم الصيف ونمشى نشاهد العمل الوقيه شنيف الدرام كمل فضّل الهليف يا القردى ونحنا مع النكور توتالنا من البردى بتين يا الناقه فوق عد المحاربين تردى وانلاقى المرشم والشلوخ زيق فردى

شكرا لطلَّتك البهية شاعرنا الجميل حنفي حاج الطيب
وشكرا لمُسيالك وماعونك المُترع سمحاحة وألقا وعبقا
وشكرا لشرحك الضافي وتوضيحك القيِّم نعم ما أورده شخصكم الكريم هو الصحيح
ويا حنفي شوف "نحنا مع النكور تو تالنا من البردي .......
المربوعتين ديل الأوردهن أخونا حنفي مهداه لبدر الدين وود المكي وود جاد الله

محبتي وطلتك فيها إضافة.....

Quote: يا سلام يا عبيد والله لي يومين أزازي على بوستك دا بس المشكلة دايرلو روقة زول يقراه حرف حرف كويس إنك شرحت سدر أم عريساً طامحاه لأنك كنت حتخش معاي في حتة ضيقة جداً

بدر البوادي يشهد الله مداخلتك دي هسَّاع كان كحلتها
وإعتذاري مربوعة من شعر حنفي لأنك أوردت مفردة أزازي.........

لونك ونكهتك شلتيها من الموزه
وعليهن زدتى بسمات من بياض اللوزه
شعرك من جناح إضليم نعاماً زوزا
وبخت العندو فى قلبك غرف محجوزه

اها العندو قرف محجوزة في قليبها قطع شك ما بجيهو فوف الجفا
محبتي

محبتي

Quote: سلم يراع ود المقدم فقد احتفنا كثيرا وفتح نوافذ ادبيه كباشيه وبدويه الت على النسيان والاندثار وقديما حفظنا لجلى ودمحمد حامدابى بقول :-- بدبكن ليكا فوق جمل الهداد ما بحودن .بخلنلك قفاهم بالمصاع متسودن .... الحم اللى مخالات الحديث بتقودن يا الحدب السمان ليهن بتين بتعودن .... ا

يا سلااااام مربوعة ماكنة خلاس...
مابحودن أي لا يذهبن منه
مفردة الحُم دي جميلة خلاااس ياطه أخوي ..
والحُم تعني يقصد العذاري ومفردة تطلق للمدح
أو كما تقول مغنية الجراري
العند ناس تيقة أمسيتو
بي الكُرباج عديتو
وريد الحُم شاقيتو
ولي الما انفرز بيتو
مخالات الحديث مخالا من الخليل او الخل أو حتي الخلا
اي حديث دقااااااااق
والحُدب السمان يقصد الإبل وهنا يعني طال مكوثه برحلة الجزو

Quote: خمس شهور نحلق فى القعاد ما شبعن ... مابين السدور من غير ضرر قارعنا .. انا والربدى فى الريع والغمام بالعنا فرقت مننا الفقاش واختها قنعن

يا سلااااام تاني دي مربوعة عجيبة
أنا والربدي في الرِّيع والغمام قارعنا
الرَّبدي ناقته ويقصد الجمع اي نوقه والرِّيع رمال الصحراء
والفقَّاش وقنعنا إسم حسناءين جميلتين
بالمناسبة موسي ود جلي الحامدابي من أكرم أهل البادية
وكرمه وشهرته وصلت حتي اهل غرب إفريقيا وتشاد ومالي وتمبكتو
حيث كانوا يصلون إلي فرقانه وهم في رحلة الحج فيستبدل لهم مطاياهم ويكرمهم ويزودهم بالمؤن

شكرا صديقي طه ود السراج "شطيطة"
علي طلَّتك السمحة ومُسيالك الجميل
سعيد جدا بمرورك الأنيق
محبتي

Quote: الاساتذة الاجلاء لكم مني اطيب المني طبعا يا استاذ حنفي الزول الاسمو بخيت وصاف وصف بديع لم اري وصفة وتشبيهاته لا الفي القديم ولا في الحديث عشان كدا دايما يستوقني شعره بالله عليك الله شوف الصورة الكاملة انلاقي المرشم والشلوخ زيق فردي بس فاقدك رسام يرسم تلكم الحنساء والله كأني انظر اليها بوجها المدور واسنانها المرتصة البيضاء وشعرها المرصن بالحبائس الحريرية ولكم التحية يا غالين ود الطيب ود المقدم ود السراج

شكرا ود الدليل الخريت سالم ود أبو كاريق
الصديق أحمد سالم

بخيت ود عبد المولي عجيب وأجمل شئ صوته الشَّجي
أستمعت إلي الكثير من أهل النَّم لكن صوت بخيت لا يشبهه أحد
عليك الله شوفو هني:
الرَّيد نافلة مابجبرولو
وطربة نيَّة يا كفيل السوِّي حجولو
يارُقابة الصبَّن نحاسي تِعُولو
ني لي الليلة ما فات الجداد من طولو

أحيانايقول شامة بدل نافلة وايضايقول كبَّن كبارا

سلااام كتير لك أخي أحمد وسعيد بطلَّتك

Quote: وإذا بكي تهرول وتحمله بيدها اليسري دائما دون اليد اليمني... لا أدري لماذا.........؟

ومثلك حبلى قد طرقت ومرضع فألهيتها عن ذى تمائم محول
إذا ما بكى من خلفها انصرفت له بشق وتحتى شقها ثابت لم يحول

يديك العافيه اخى الكريم عبيد الطيب والله لقد امتعتنى حد الثمالة بهذا الوصف البديع ارجوك ان تواصل فى هذه الونسة التى لا يمل جليسها.

اخوك ودما
ود النعيم

أخى ودالمقدم وزمال النمة والمربع

دوما نتوق لمراقى الجمال تحت حروفك ياالعبيد ونشتهى السفر على مطايا جبلن على سماع نغمك ..... لا تحرمنا أخى.... وأعرف أنك كريم تطيل الغياب وتغدق عند الاياب .... فمرحى بالكباشى النجيض المجود

Quote: ومثلك حبلى قد طرقت ومرضع فألهيتها عن ذى تمائم محول إذا ما بكى من خلفها انصرفت له بشق وتحتى شقها ثابت لم يحول يديك العافيه اخى الكريم عبيد الطيب والله لقد امتعتنى حد الثمالة بهذا الوصف البديع ارجوك ان تواصل فى هذه الونسة التى لا يمل جليسها

الأخ الأديب الأريب النعيم علي احمد
سلاااام ومعزة كبيرة وسعيد بطلَّتك السمحة
"إذا ما بكي من خلفها انصرفت له بشق وتحتي شقها ثابت لم يحول"
الكتراااااااااااابل

دي زاتها القال في العربي وهي من تالا صحتو اللا يساري
افففففففف أني تاني الفوف بجيني بي وين
"صغيروني وبحس قبل الفجر ما وكَّت
وبكاي طبعو شين من يبكي ما بسكَّت"

وفي الفوف والشتاء تكثر الرّحل بدرب الأربعين ودرب الصحراء
إلي ليبيا وإلي مصر حيث تقل الحوجة لشرب الماء والمدة قد تطول أربعين يوما او يزيد ، حيث يصارع هؤلاء البدو العتامير والعقبات الكؤود
ويهدهدون النَّفس بالشوارد من الدوبيت
أوكتين السفيه حرَس البــِزند التَّيلي
انحنا خطرنا بي جزراَ وطاتو مَحيلي
كــنــَّك يا هبوب الريح ادِفني وكيلي
انحنا ان جينا وان مدينا كلو عديلي
شوف يا استاذ النعيم هذا الثبات.
"كنِّك يا هبوب الريح أدفني وكيلي
أنحنا إن جينا وإن مدينا كلُّو عديلي.......
ديل يا الحبيب ذئاب الصحراء الزهاليل
أوكتين السفيه حرس الهناق والجاعر
حزمنا مهربين دبوكة ماخِن أباعِر
سُقوه وزاد جمال نيَّاب ونحنا كزاعر
نهارنا وليلنا شاقين السَّهل والواعر
مادام هم كزاعر مافي خوف وسقوتهن ملانه إلي الوكاء
لكن سهل واعرٌ لم يكن كسهل والد الصحابي الجليل زيد رضي الله عنه
محبتي لك ودمت سمحا
ويا سماحة المستشار يحي ود عبد الكريم سلاااام
بملا عُقلتي وبجيك صاد أن مد الله في العمير

Quote: مجنون عديل واللهِ العبيد اخوي كيفك من الطوله؟ واصل يا الحبيب خلي جنابو عمر يخرج من صمته بعد عودته من الإجازة ، يبدوا انه ما زال مرهقاً من حفلات التكريم التي هو أهل لها لما قدم للكرة الهلاليه والسودانية وكذا اشتقنا لمداخلات ام عروض الخطافية , الماجدة منى خوجلي وكذلك المزنوح شيقا لابِد ليهو مُدَّه, لا يكون عرس في أم مضوي, حرَّم قالوا مجهِّزه ( الساطور والشوال). أمشي اتلاعب يا شيقا كُل المحبه

عبيد ود المقدم .. يا فارس الكلمة الوضيئة المترعة بالبداوة والطلاوة والحلاوة

اراك علي صهوة جوادك الاصهب .. وفي يمناك قلم بوص يعرف الجواد اين يجري به قفزا وغوصا ليأتي بالجمال والسحر من مكامن
ترفُّ بالنبض المؤجج من سعار الوجد والهوي .. و(الطامح) بكل ماهو جذاب وبهي ..

قضيتَ اخي علي خلوة اردت بها الانقطاع والقرب من الله وقد دعاني هاتف للكف عن الزلل والبقاء قريبا ممن يغفر ما دون الشرك
وقد ثقلت في جانبي آثام لا ادري كيف تعلقت بي في عمر لا ادري اين ضاع وكيف ضاع ..

سبعة اسابيع اتيت فيها بكل المكفرات من عبادة ونسك لا يراودني نازع عنها الا حين اري حرفك وحروف بعض آخرين احبهم ..
حتي جاءامر الجنرال المكي فلم اجد لي طاقة به .. مثلي مثل جنود طالوت لايجدون طاقة بجالوت وجنوده الا أن يفرغ الله عليهم
صبرا ويثبت اقدامهم .. فقلت لا بأس .. فالله لا يؤاخذنا بما اكننا في انفسنا .. وفي النفس عشق لبادية الكباببش ورحلاتنا المدرسية
اليها ايام الجزو .. ونحن يفاع لانملك ىمن الحنين الي دفء الصدور و(الكناتيش) الا ما يرسم الشعر من لوحات خالدة ..

اخي ..
انني جالس ليس بعيدا .. وصدري مقرور يحس بالبرد والزمهرير ويستدفيء ويردد معكم

Quote: في عينه الصقور جات بردِي من تحت سفايه ومن فوق النجوم منزردِي بتين يا ناقة فوق عِدْ الكبابيش تَرْدِي نلقاهو المرشَّم والشلوخ زيق فردِي" اليوم زيفة وصقط وفوف....... معادلة صعبة خلااااااااااس و"كتر شرفيبنا لي النشرو السراير برَّه" ومع هبوب البرد القارس او القارص وكلها بلسانٍ عربيًّ، داهمتنا الكثير من الذكريات ...! والقليل من الإحتياجات ومن الذكريات........ سأل أحد البدو صاحبه عن دواء البرد والوقاية منه البرد إن دواء....؟ البيت الوسيع بناه..... لا مو دواء...... البرد إن دواء...؟! كنتوش مريسة وفوقو شاه لا لا مو دواء البرد إن دواء.......؟ صدر أُم عريسَن طامحاه لا لا مو دوا..... البرد إن دواء...؟! الكَيخ أبو ملاحَن حداه.... ليرد صاحبه قائلا: أي والله دي دواء..أي دي دواء.....

وليت احدا منكم يرد عليّ عبادتي واستغفاري ..

لكم محبتي
عمر علي حسن

Quote: أخى ودالمقدم وزمال النمة والمربع دوما نتوق لمراقى الجمال تحت حروفك ياالعبيد ونشتهى السفر على مطايا جبلن على سماع نغمك ..... لا تحرمنا أخى.... وأعرف أنك كريم تطيل الغياب وتغدق عند الاياب .... فمرحى بالكباشى النجيض المجود

ومرحب بك يا سماحة المستشار يحي ود عبد الكريم
أعلم أن لك ذكريات بالبوادي رائعة بروعة شخصكم الكريم
وليت كل الأجيال والرواد الذين يزورون البادية يكونون علي قدر همتكم
لقد تركت وترك اصحابك ذكري خالدة بالبوادي وبعدكم أتانا قِر وفوف مقطوعين الطاري ..
وعشان طلَّتك السمحة دي يا سماحة المستشار وإنت داير النَّم
بمنرق ليك المدسوس شوف الشاعر الرائع إبراهيم توية الكباشي
بعد ما جاهو الفوف والصقط وبدأ يحاور نفسه حاله مثلنا..
وهي لعَمري أجمل ما سمعته في الحسرة والشوق والحنين
والمرابيع دي يا ود المكي ويابدر البوادي ويا ودعبدالكريم والنعيم ودأحمد
ويا بخات الحال جميعا....
مكربة خلااااس كتبتها سابق ولقد قابلت الشاعر إبراهيم "توية" وسمعت له كاسيت
ولكن جودتها من الصديق الحاج يوسف الكباشي
لقربه من الشاعر والحاج نفسه شاعر جيِّد سوف أتطرق له في مداخلة سماحة المستشار عمر
وكنت أضنُّ بها لجمالها وروعتها...
الليل كلُّو نومى خَّزاز
وفاقد العينو ساعة و فص خلقتو قزاز
أوكت يفكر علىْ نوم قرنها النزَّاز
بتطلق فيا كبريتى و صفيحتين جاز
«««»»»
يا سلاااام
جدي العزار ..الرقبة قزاز....
يا عزاز انا نومي خزاز.....
شبيهة اللَّدْغَس الما اتْمرَّنْ
ام جلدا بشبه القاش البقدُّوا سورَّنْ
عنافية ابو روف الورقها مقرَّنْ
خلت قلبى فيييي رادى و كِلاب و طورَّّنْ
«««»»»
خلت قلبي في رادي......وكلاب وطورَّن........!

وين الفمُّو حالى و سدرو مارن لبُّو
وسنونن ليها كشكوش للصغير بلعببُّوا
مهيرة التوَّر المندوب ورسل عبُّو
فيها مسالب الرَّيل بى خلايق ربُّو
«««»»»
التوَّر المندوب أي أرسل مندوبه لجمع الطُلبة ضريبة القطعان
يا سماحة المستشار........

متبور عودها مو مقطوع تباكى قرافى
وفيها مسالب الرَّيل المِصهين وغافى
بترص رصة الجزرة الخبيرها مقافى
شوفتك تنفع المرضان و تدِّى العافى
«««»»»
الإنسان إبن بيئته متبور عودها اي متناسق قوامها يعني ماها بجيبقة..
زي القرقة والقرقة ماعون من الجلد تسع جوال ونصف والقرفتين تسمي رحل......
والجزرة هي الناقة السمينة اي تمشي مشيتها ببطء....

عبلوجة الدَّليل القافا
قالب العندو نوعين منضرة وكشافة
ريقن ليها بى فلج السنون اتصافا
كان ضاقو المريض حت كان سجن بتعافى
يعني من يدنو فلا بردٌ لا فوفُ والمريض الذي سجن اي في الغرغرة
إذا أُعطي من شتيت نبتها الأشرُ أو إن باسمته سوف يشفي

المرابيع دي من شاعر فااااااااارط

محبتي

Quote: اراك علي صهوة جوادك الاصهب .. وفي يمناك قلم بوص يعرف الجواد اين يجري به قفزا وغوصا ليأتي بالجمال والسحر من مكامن ترفُّ بالنبض المؤجج من سعار الوجد والهوي .. و(الطامح) بكل ماهو جذاب وبهي .. قضيتَ اخي علي خلوة اردت بها الانقطاع والقرب من الله وقد دعاني هاتف للكف عن الزلل والبقاء قريبا ممن يغفر ما دون الشرك وقد ثقلت في جانبي آثام لا ادري كيف تعلقت بي في عمر لا ادري اين ضاع وكيف ضاع .. سبعة اسابيع اتيت فيها بكل المكفرات من عبادة ونسك لا يراودني نازع عنها الا حين اري حرفك وحروف بعض آخرين احبهم .. حتي جاءامر الجنرال المكي فلم اجد لي طاقة به .. مثلي مثل جنود طالوت لايجدون طاقة بجالوت وجنوده الا أن يفرغ الله عليهم صبرا ويثبت اقدامهم .. فقلت لا بأس .. فالله لا يؤاخذنا بما اكننا في انفسنا .. وفي النفس عشق لبادية الكباببش ورحلاتنا المدرسية اليها ايام الجزو .. ونحن يفاع لانملك ىمن الحنين الي دفء الصدور و(الكناتيش) الا ما يرسم الشعر من لوحات خالدة ..

سماحة اللواء عمر علي حسن
سلااااام ومعزة كبيرة وأهلا بقدومك الميمون
أكن صادقا إن شاشيت لقدومكم سيدي عُمر
كما شاشا سيدي الشفيف الشيخ قريب الله
لقدوم قمر طابت سيدي الشيخ عبد المحمود قُدَّس سرِّهم من قومٍ كرام
فقال سيدي قريب الله:
"إن ريح القُربي نَمْ
وانتفي عنَّا الزُّكَم
فهو أحلي ما يُشَمْ
من أُصيحابِ الكَرَمْ"
فيا سيدي ليتني أحمل قلمي الذي "بريته" من البوصِ وأحمل معه عماري
وأكن درفونا شماسيا أقسِّمُ كاسات خندريسكم الذي عتَّقت تجارب السنين الخضراء والإطلاع الدؤوب دنَّه العتيق
وليتني "أوزِّع" الكاسات إلي أُصيحابي أمثال ود المكي وبدر البوادي وانا سعيد باسم.....
البرد في حياتنا نحن أهل البادية نتنفسه لغة نضره الأخ الحاج يوسف الكباشي
بعد أن ترك إمتطاء الشوح من الجمال ، ركب سيارة ولأنه مسكونا بلغة البادية سمَّاها الشعفوفة..
والشعفوفة هي رياح المطر السريعة والقوية جدا والمصحوبة بالبرد
فكتب الحاج هذا المُسدار الرائع جدا وهو علي مقعد سيارته الشعفوفة:

يالشعفوفة سواقك حسابو مضرَّب
وليك اتْجامع البون والبعيد اتقرَّب
فرق رفَقَك علي ركَّاب حمير واقرَّب
يامحاقة الصَّي اب حجار ودررَّب
********************
*أقرَّب من أقروب اي راجلا ، محَّاقة الصَّي اي تجمع الفيافي ويدنو لها البعيد دررَّب من الدُّرَّاب.....
شاشيت لي اللخيخة ولي هواها الطرَّب
ام دمرن شِقَاق مو بيت مدينة مزرب
ام عربن تِلوب حارَّة ودخاخيل هرَّب
قباضين نجوم فوق الجريهو مجرَّب
********************
اللَّخيخة وعرة او غابةصغيرة وهي مكان دمر فرقان شيخ الحاج
وشِقاق من شُقة ويقصد بيت الشَّعر
والحسن يظهر في شيئين رونقه بيت من الشَّعر او بيت من الشِّعر
الشعفوفة قالت لي قوم اتدرَّب
وماك خابرني مصيونة وحديدي مكرَّب
اصلي مما ابرا مسرورة ودريبها الغرَّب
بخلي الفنق مقسم فوق قفايا رهرَّب
*********************
إتدرَّب اي تجهَّز أبرا اي أتجنبها ومسرورة منطقة والفنق اي المسافة
وهنا يقصد الدلج والنقع والرَّهرَّب يقصد السراب
قت ليها يالشعفوفة فوق نجم التِّريَّا الغرَّب
جريك اتدَّاعي يالعمَّر سلاحك وحرَّب
نفضتي العاقبي فوق ضيلك عجاج وتررَّب
نقدت الارض مزارعيَّن عزلُّو تورَّب
************************
دي تصوير عجيب شوفو نفضَّتي العاقبي أي من ورائها تري العجاج والغبار وتراااب وشبهها بالمزارع الذي يتيرب بطوريته...

الشعفوفة قالت لي بي حب البوادي اتشرَّب
وارح ودينا للبلد المقامُو محرَّب
اصلي مما انوي للبادية واقوم اتهرَّب
بداني الفنقة بالنفض العلالة وسرَّب
*************************
العلالة هو الغبار الكبابيش يقول ليك أدَّك العلال......
يام حدبن ضهور سيدك حديثو معرَّب
بعقر القش علي ضهر الوسارو مكرَّب
بكريك انصقر كاشح مِصاعو دررَّب
نسَّم من رشاش قرع نياقو وضرَّب
************************
بعقر القش اي يخبر المرعي لنوقه وبكريك اي فحل الإبل الذي هاج لتوِّه
وإنصقر اي ضَمُر وكاشح مصاعو دررَّب اي رشح البول علي ظهره حتي صار كتراب الدرَّاب
ونسَّم اي بدأ الهياج وقرع نياقو اي أوقف إبله وحماها من كل بعير وجمل آخر
وضرَّب من ضريبة أهل البادية إذا أعجبهم بعير وعرفوا أنه من النجائب يعزلو له نوق
في حدود العشرين للتزاوج منه ويسمونها ضريبة الجمل وضرَّب اي لقحها...
رعدك من عصير تكْ ودفرلُّو دهرَّب
دندح وانهتر لايم ضهور وجررَّب
صبحوا طرابة اسيادك تلوب الهرَّب
اولاد عطا واولاد سراج اولاد طريف ونورَّب

ثم تك اي ارعد ودفرلُّو اي أرسل ودهرَّب من دهرابة وهي مطر الليل المصحوبة بالرياح السَّواري المُدجنة
ودندح اي إتحيَّن وإحتمع وإنهتر اي أنسكب بغزارة حتي سالت التلال والأودية
واللخيخة ومسرورة هي وعر ووديان وقلع جبال وهي مراتع صبا الحياة
وهي فلاة نوقه ومخارف فرقانه
ومن نفحات اللواء عُمر أن كتبت لكم هذا المُسدار لأني كنت أدخره
محبتي ودمت سمحا ياسماحة اللواء عمر
والتحيَّات النواضر للأخ الحاج يوسف الكباشي
والمسدار إهداء خاص للجميل بلَّة البكري
محبتي

طِريت الزول اللذيذ نضْمو ؤ حالي قصيدو
طِريت الضامِر اب دِيســاً بِكَتـِّف سيـدو
وكِت ليلي انقسم, والسهراجه حَمَّت ريدو
مكتـولاً جَفَـلْ , مجنـون ؤ كاسِــر قيـدو





التعديل لحذف حرف زائد

يا ود المقدم أشكر لك الاطراء الزائد فقد ألبستنى ثوبا ضاقت عليه جتتى لكننى لبسته وطفت به فرقان البادية مفتخرا فهو عندى مثل كسوة السلطان تمنح كجائزة تقديرية

انا ومريديك عند الباب وقوف لن تبعدنا زيفة او فوف بل يتعبنا منك صروف ... هات يا صديقى فأنا أموت عشرات المرات طواف معك على ذكريات دار النوراب وجيرانها

أنت يا ود المقدم تدينا من البورد كلما ابعدتنا عنه تصاريف القدر وملاهى الدنيا .... واصل ياكريم الأصل

Quote: في عينه الصقور جات بردِي من تحت سفايه ومن فوق النجوم منزردِي بتين يا ناقة فوق عِدْ الكبابيش تَرْدِي نلقاهو المرشَّم والشلوخ زيق فردِي" اليوم زيفة وصقط وفوف.......

الحبيب عبيد ود المقدم سلم قدمك وقدمك لبيت النبي عليه الصلاة والسلام
طيبة تطيب بيها ويطيب مقامك فيها بعد حجة تنغسل فيها من كل الذنوب
هسي ديمتاوقة وسلام
لانو حديثك بدور لي فسحة ونقرأ شوية شوية مسارقا ونهضمو

ولحين ميسرة بنرجع لك يا اللخو

وتحياتي للأستاذ حنفي

تحياتي ومودتي

Quote: اوافقك القول أن المربوعة متفردة في المعني والوزن. .والديفة هي الظبية بالطبع. قال آخر: ديفة الروقلن نواشي ما لاقاهن كيف قدري انا والقي مرادي معاهن

الأخ بلَّة الشيخ البكري......
ربيعي الزَّين ورفيق النَّمة وأهزوجة العذاري ودوداب الورود
نعم الدَّيفة هي الغزال المدايفي دوبها.. شوف أخونا حنفي
كزيمة الدَّابو دايف وقرنو يادوب مارِق
رُقابة التَّري التامِن فصوصِك مارِق
لونِك زي صفا السَّوّيتي شفْ ؤمطارِق
حسابي معاك أصبح دين قيامة وفارِق
مربوعة ماكنة خلاس يا بلَّة ....شوف الزول دي كمَّل وصف البرروبة
دابو دايف ....قرنو يا دوب مارق....
ثم كمَّل وصف القصبة...قايمة في تري ثم وحتي تامِن فصوصها زرق....
وعاين يا بلَّة لي لونها شَفْ ومطارق من بريقها ولأنها تضعها وتشبلها العذاري
في أجمل جزء من المرأة الحنجُور......

Quote: وملاحظتك عن وصفنا للمرأة بالصل او الدابي جديرة بالوقوف. ومن عجب أن النساء ايضا يصفن الحبيب رقيق العود بالصُل وبسير القاش خاصة في أغاني الجراري. قالت احداهن تعاتب من غشها وهجرها بعد ان رماها في حبائل حبه: الصُل الفي العشاش ما نحسبك غشاش يارقيّق سير القاش الصُحبة معاك بلاش لاحظ وصفته بالصل لرقة عوده هنا (بدلالة قولها رقيق سير القاش). والبيت الأخير يعني الحب حبك انت ولا بلاش!.

نعم وصف المرأة بالصُّل مُدهش جدا يا ود البكري وزي ما قلت من وصفه بالصُّل لرقة عوده
وأيضا لصفاء اللون وأحيانا تصف الحسان به النجائب من الجمال...
حامِد بشِد الصُّلْ
والحاج بعيد ما بِطُلْ
البذر الفهمهُن فُلْ
عزلوها وكجَرو الضُّلْ
*******************
بخت البّتْلهَّمهُم
ضِمنتُو بضوق لحمهُم
بذري الفُل فهمهم
وحس جضَّة بهمهُم
****************
سجم الفيهُن هزَّل
وجوني رقاق مغزَّل
لقيت باهيم معزَّل
وخاف حاروكهم نزَّل

يا بلّة شعر النساء عندنا يحتاج لمجلدات

Quote: وربما يوصف الرجل ايضا بالدابي بل ويسمي به احيانا بدليل الشجاعة والبأس. انظر قولها: أزرق دابي الهبوب يا الأسد الحرس الدروب ساير فايت الجنوب وانظر قول الحردلو في وصف الرجل بالدابي كان اداك وكتّر ما بقول اديت اب رسوة الموشح سدره بالسوميت دابي الكرد حجّر شراب ستيت كاتال في الخلا وعقبان كريم في البيت

هنا يوجد فرق بين الصُّل وبين الدقر أو الثعبان الصُّل هو الدابي الرقيق ولونو جميل.....
أما الدقر فهو الثعبان الكبير والشرس لذا نصف به الرجل الشجاع
الشَّاعر الرائع الراحل، محمد فضل الله الكباشي العايدي، يمدح الشيخ بشاردة رائعة، حيث وصل لفرقاته راجلا، يطلب بعيرا أو قعودا ، ويناله في حينه، وهي لعمري أجمل ماعرفته من هذا الفن:
ابو يَاقُوب جَلِيس الكَجَّروْلْهِنْ طَاقْ
دَقَر بيلا المَرَاقْدُو الطَّينة والشَّقَّاقْ
ابو دَكَنَة البِحِلِّقْ مِنْ زِقَاقْ لى زِقَاقْ
ؤجَابْ بَالاَتْ تِقَال فِيهِنْ بِضَاعْةْ إسحق
الهَارُودْ البِّصــُبْ ليلِيهُو مُو نَقْنَاقْ
خَرِيفْ شُــرِّى البِكُــبْ فوقْ المَسَاكِينْ حَاقْ
مُو دَرْدِقْ هَدَرْ جى شَايِلْ العَرَّاقْ
وفى بَطْنُو القَعُوى سِحْلِى وعِيَالُو دِقَاقْ
يا مُرْ الحَناضْلْ الأصْلُو ما بِنْضَاقْ
سِيدْ خمسين على خمسين صِلاهِنْ بَاقْ
وسيد خمسين على خمسين قَعُود شَنَّاقْ
وسيد خمسين على خمسين بِحَلْبوهِن عَشِية فُوَاق
وسيد خمسين على خمسين عَنانِيفَن بِجَنْ لى سباقْ
وسيد خمسين على خمسين بِكُجْرَن فوق طَوِيلْ السَّاقْ
دايِر لى قَعُودن بى الرَّسَن طّبَّاق
نجِر عَجَّاكْ عَليهُو وبِلْعـَب أم زُنْبَاقْ"
"الكجرولهن طاق" يقصد العذاري حيث تُسدل عليهن السَّجف ، وهي السِّتارة بفتحتين
والدَّقر هو الثعبان او الحيّة الكبيرة ، ودائما نجد حيَّة الأرض الطينية خطرة، ,"ابو دكنة" هو القطار،و"البالات يقصد بها البضاعة التي يتم ربطها ب"بالات الحديد"والهارود هو المطر الغزير، ووادي "دردق" من أعظم وديان البادية، وهو الرَّافد الرئيسي لأضاة ومُنهل أم بادر الشهيرة، بعد ان وصفه بمظاهر القوة ، المتعارف عليها بالبادية، دلف إلي ما يملكه من نعم، وأهمها الإبل وأهل البادية يسمونها"عضم المال"، حيث وصفه بأنه يمتلك المئات من العِشار"صلاهِن باق"، والمئات من الأقعدة والقُعُد والقعدان، وهو البعير الشَّاب الذي لم يبلغ السادسة"سديس"، وكذلك يملك المئات من النُّوق اللُّقح، والتي تُحلب في العشاء بعد فواقها، وأيضا يمتلك المئات ، من الشُّوح العنايف، والتي أعدِّت للسباق،وكذلك يمتلك المئات من النوق، التي تجتمع وتلتف"بكُجرن" حول الفحل"طويل السَّاق"للتزاوج، ونجر عجاك يقصد به الكور او السرج وعجاك نجار أكوار"سروج" شهير ومفردة كور فصحي وجمعها أكوار ومازالت متداولة بالبادية و"أُم زُنباق" لعبة يلعبها البذر الصغار وهنا كناية لسرعة البعير وخببه
يا بكري وديتني بعيد خلاااااس.....
محبتي لك ودمت سمحا ود شيخ البكري وأعذرني للإطالة............

ويا حبيبنا المنسي تحية وبجيك صاد

Quote: الحبيب عبيد ود المقدم سلم قدمك وقدمك لبيت النبي عليه الصلاة والسلام طيبة تطيب بيها ويطيب مقامك فيها بعد حجة تنغسل فيها من كل الذنوب هسي ديمتاوقة وسلام لانو حديثك بدور لي فسحة ونقرأ شوية شوية مسارقا ونهضمو ولحين ميسرة بنرجع لك يا اللخو وتحياتي للأستاذ حنفي

الحبيب خالد المحبوب
سلاااام كتير
في مربوعة الشاعر إبراهيم توية دي
شبيهة اللَّدْغَس الما اتْمرَّنْ
ام جلدا بشبه القاش البقدُّوا سورَّنْ
عنافية ابو روف الورقها مقرَّنْ
خلَّت قلبى فيييي رادى و كِلاب و طورَّّنْ
في المقطع الأخير "خلَّت قلبي في رادي وكلاب وطورَّن"
الم يشبه قول الرائع جدا الراحل مصطفي سند:
فإنما وسمي هنالك عند قاسية الهوي
يرتدُّ كالنَّصلِ القديم....
يظلّ ينبحُ في دمي....
يرعي ويرضع....
وليس في البال الفطام..
وعن الشَّمال ونجم الجدي الوهَّاج يقول سند:
لاشئ..
غير تفردي نجما
يُضئ دواخل الأعماق...
يستطعُ من مرايات الشمال....
وسلااامك لحنفي يصلك يا المنسي ولك منه السلاااااام
ولدي منه كاسيتين وبعض المقاطع الصوتية
تلفونك في الخاص حتي أرسل لك منه في الواتساب
ما تدوزن به رويحتك الشفيفة والناشقة يا خالد أخوي
وأهديك من حنفي هذه المقاطع..
شرّكتيلي كيف جوز القمارى الركا
ومن ماجبتى حدق البى الضهيرات جكّا
ضفايرك فرتقا وفات الهوا الإنفكّا
ورمشتى ورشرشك قال أصلو ماينفكّا
****************************
مسالب صُل عليك والله ما يتتحكّا
ولا مطيرق نخيل فـرّاعو مال وإتكّّا
مهر قلبك عجيب فيهو الخلق منجكه
وبفوز بيهو الدفع نادر قصيد مو فكا
*********************************
ماخده قوام قنايه وخضرة السنمكه
وراحتك ونوم عيون العاشق البتبكا
فى زول فاقدك سرف عينيهو ما بتوكا
يا ام إسما مقام جبلاً قريب لى مكّــه
محبتي ودمت سمحا

Quote: أو كما تقول مغنية الجراري العند ناس تيقة أمسيتو بي الكُرباج عديتو وريد الحُم شاقيتو ولي الما انفرز بيتو

دا شبه كلام بت عجاك
سلام ياود المقدم وضيوفه الكرام

سلام يا عبيد وزوارك الكرام والشكر مرة اخري علي هذه الاستراحة الظليلة التي نهرب اليها من معافرات الحياة جميعها ومن وجائع التشظي الذي يعاني منه وطننا الجريح.

وشكرا علي وصفي ب(ربيعك) فذاك شرفٌ عظيم أرجو أن أكون قدرو. أنت خبيرٌ بشعر البادية لا شك في ذلك كما أبنت في هذا الفضاء الأسفيري. أما أنا فلا أعدو أن أكون عاشقاً له عشقُ يكاد يعميني عما سواه من ضروب الأدب. مداخلتك في الرد علي مليئة بالجواهر وربما عدت لها مرة أخري.

Quote: ماخده قوام قنايه وخُضرة السنمكه وراحتك ونوم عيون العاشق البتبكا فى زول فاقدك سرف عينيهو ما بتوكّا يا ام إسما مقام جبلاً قريب لى مكّــه

عجيب هذا الوصف يا عبيد. "
"قوام قناية" هذه علي وزن (ممتلئة ريّانة كعود قصب السُكّر) او كما قال الزول عميد الأدب العربي الطيب صالح، عليه رحمة الله، في جزئية نثرية هي عندي في مقام الشعر تماما لعلها كانت في وصف حُسنة بت محمود. أما الوصف الأعجب فيما أري فهو "خضرة السَنمَكّة" فهي الخضرة الدُقاقة والتي أشتهرنا بها أهل السودان من دون خلق الله والتي لم أر لونا أجمل منها لبشر في طول العالم وعرضه! ولمن قال أن شهادتي مجروحة فيهم (أهل السودان) فله ذلك..

والسَرَف هو الماء الينبوع والذي شبه به دمع عاشقها الذي ينهمر كالسرف ولا ينحبس حتي بالوكاء (وهنا يوجد تشبيه آخر مستتر دسه الشاعر دساً ماكراً فضح وجوده الوكاء وهو الحبل الذي يربط به خشم السِعِن أو القربة) وكأنه يقول (ينهمر دمعه كانهمار الماء من فوه القرب حتي يعجز معه الوكاء من وقفه). شفت كيف! ما قتّ ليك، يا ود المقدم، جماعتنا ديل بسبقوا كثّير عزّة ذات نفسو!