في بعض ما يحكيه حسين خوجلي من قصص كثير من الحكم والفوائد

خلال برنامجو المحضور "مع حسين خوجلي" يحكي حسين خوجلي كثير من القصص والحكاوي المحلية والتراثية والمعاصرة وبعض الطرائف ويربطها ربط مثير بواقعنا السوداني

وشكلو كدا بقعد كتير مع الناس الكبار...ودايما حكاوي الكبار مفعمة بالحكمة...وصراحة بعض ما يحكيه حسين خوجلي جدير بالتوثيق والا ذهب ادراج الرياح وضاعت الحكمة بدون ان تنقل الى اجيال قادمة

فالعلم صيد والكتابة قيده
قيد صيودك بالحبال الواثقة
فمن الحماقة ان تصيد غزالة
وتتركها بين الخلائق طالقة

فــ بللله اي زول عجبتو قصة من قصص حسين خوجلي وظلت عالقة بذهنو يجي ينزلها لينا هنا

وانا ببدا ببعض ما لفت انتباهي من قصصه وان كنت لا احفظها كاملة كما حكاها لكن يمكن نلخص فحواها ونختصرها

مثلا حكى عن مدير استثمار في احد البنوك زول شاطر في قرايتو لكن جاي من اسرة فقيرة وجابوهو ادارة الاستثمار في البنك دا بدل واحد من اسرة غنية...المهم مدير البنك لاحظ تدني مستوى الاستثمار بعد تعيين هذا المدير الجديد ..على عكس ايام المدير السابق الذى كان يدير هذا القسم بحنكة ويدخل ارباح وفوائد كبيرة للبنك...حاول مدير البنك يتحقق من سبب التدني ولقى انو الزول دا على حسب خلفيتو الاسرية البسيطة لمن يجوهو مستثمرين بيخاف وبيشوف انو المبالغ دي كبيرة وبيرفض الصفقة وبالتالي خسر البنك استثمارات كان يمكن ان تزيد ارباحه...وطوالي مدير البنك رجع مدير الاستثمار القديم وزولنا دا ودهو ادارة البحوث