نصيحة للمعماريين والمهندسين السودانيين المتواجدين بالمملكة السعودية

لا يخفى عليكم بالطبع الطفرة العمرانية الهائلة التي تشهدها المملكة، والمتمثلة في مشاريع البنى التحتية الاستراتيجية الجاري تنفيذها، والمزمع تنفيذها خلال المستقبل المنظور
وهي مشاريع بالضرورة تتطلب أعداد كبيرة من المعماريين والمهندسين، الا انه ومن خلال ملاحظاتي للأسف جل المعنيين بالخيط بعيدين عنها، ويتركز تواجدهم الغالب في مؤسسات وشركات صغرى تنحصر نشاطاتها في المشاريع التقليدية الصغيرة.
هذا في الوقت الذي يلاحظ فيه ان أغلب هذه المشاريع (تعج) بحملة الجنسيات الاخرى رغم أن كفاءة ابناء السودان لا تقل عنهم بأي حال !
لذلك أدعوا كل المعماريين والمهندسين السودانيين وحتى أصحاب المؤهلات الاخرى الذين قد تحتاجهم الشركات التى تقوم بهذه الاعمال بأن يبادروا بالانضمام اليها وذلك نظراً (للرواتب)، الخبرات والمميزات الاخرى التي يمكن ان يجنوها من ذلك !

Quote: بأن يبادروا بالانضمام اليها

كيــف ؟

نورنا ...

Quote: كيــف ؟

المبادرة بتتم بـ:
1- ((ظبط)) الـ C.V والـ PORTFOLIO بتاعك.
2- أعرف ياتا الشركات الماسكة المشاريع الكبرى. (حا أحاول ترشيح بعض الشركات حسب حجمها ومستواها مع العناوين !) ... واتمنى من لديه اضافات ان يضيف !
3- أمشي قدم (بنفسك) - أتوقع اغلب الشركات ما بتحتاج لعلاقات نظراً للطلب المتزايد - وحقيقة المسألة عايزة حرك يعني الواحد ما ينتظر الوظيفة (السمحة) تجهو بالصدفة او هو ما سعى ليها !
4- أمشي تاني وتالت لو المشية الاولى ما جابت نتيجة .... ادي عزيمتك حريتها !
5- كن لقيت ليك مدخل يكون حاجة كويسة خالص !

شركة دار الهندسة للتصميم والاستشارات الفنية شاعر ومشاركوه (dargroup)
حالياً ماسكة مشاريع التوسعة في الحرم المكي والتوسعة الحرم المدني وميترو الحرمين والمحطة الرئيسية لميترو الرياض وتوسعة مطار جدة وتوسعة مطار الملك خالد ووو .. الخ
مقرهم في الرياض تقاطع الملك فهد مع شارع التحلية (عمارة الماسة) = مبنى بنك دبي الامارات - الطابق الرابع والثامن !
عندهم فرع في جدة كمان

دا الكلام المفيد جدا يا أيمن
سلمت يداك

يللا يا شباب صحصحوا وإتحركوا شوية

تحياتي ايمن

Quote: شركة دار الهندسة للتصميم والاستشارات الفنية شاعر ومشاركوه (dargroup)

دار الهندسة فعلا من اكبر الشركات التي تستحوذ على نصيب كبير من المشاريع الكبرى في المملكة ولكن عادة التصميم يتم في مكاتبهم الخارجية (القاهرة - بيروت - عمان او المكتب الجديد في بنغالور)
ومعظم الوظايف المتاحة هنا في وظائف الاشراف على التنفيذ (غايتو ده على حسب علمي في مجال الهندسة المدنية والكهربائية في المعمار مش عارف )
بالنسبة للمكاتب الكبرى والتي شروطها احسن من المكاتب المحلية هي المكاتب الاستشارية الامريكية والغربية عموما
مثل AECOM - ATTKINS -PARSONS
والتقديم يتم عن طريق مواقعهم على الانترنت

تسلم يا أيمن على المعلومات المفيدة و أتمنى التوفيق للكل.

برضو حبيت أضيف أن دولة قطر برضو بتشهد نهضة عمرانية كبيرة جدا خاصة في مجال البنية التحتية

و الشركات اللي ذكرتها أنت و أخونا محمد أبراهيم أضف عليهم KBr, Parsons Brinkahof,CH2 Hill

عندهم مشاريع هنا في الدوحة بمئات المليارات و محتاجين لعدد كبير جدا من المهندسين خاصة أصحابين الخبرة.

Sharif Nasirladeen

Quote: برضو حبيت أضيف أن دولة قطر برضو بتشهد نهضة عمرانية كبيرة جدا خاصة في مجال البنية التحتية

وبما انهم مقيمين في السعودية - الواحد ممكن ببساطة يأخد اجازة ويمشي قطر شهر كده ويفتش هناك في حالة انو ذول الكفل رافض يسمح ليهو بالعمل في شركة أخرى !
العمر قصير والواحد يستغل كل الفرص المتاحة لكسب الزمن !

محمد ابراهيم سلامات

Quote: دار الهندسة فعلا من اكبر الشركات التي تستحوذ على نصيب كبير من المشاريع الكبرى في المملكة ولكن عادة التصميم يتم في مكاتبهم الخارجية (القاهرة - بيروت - عمان او المكتب الجديد في بنغالور) ومعظم الوظايف المتاحة هنا في وظائف الاشراف على التنفيذ (غايتو ده على حسب علمي في مجال الهندسة المدنية والكهربائية في المعمار مش عارف )

دار الهندسة ترتيبها رقم (10) ضمن أكبر 225 أستشاري على مستوى العالم حسب تصنيف ENR لعامي 20012-2013 على التوالي- القاهرة وبيروت للتصميم ، عمان الادارة العليا، بنغالور الرسومات التنفيذية
و المعماريين أساسيين في معظم مشاريعهم

Quote: بالنسبة للمكاتب الكبرى والتي شروطها احسن من المكاتب المحلية هي المكاتب الاستشارية الامريكية والغربية عموما مثل AECOM - ATTKINS -PARSONS والتقديم يتم عن طريق مواقعهم على الانترنت

يخيل لي التقديم الشخصي أفضل من التقديم عن طريق الانترنت !

شكرا الاخ ايمن على هذا البوست المفيد نسال الله ان يجعله في ميزان حسناتك ....

فنحن السودانيين نمتلك مؤهلات عالية ولكن نفتقد لشي مهم وهو الثقة بالنفس وكيفية تقديم انفسنا للآخرين فانا من خلال عملي في احدى شركات المقاولات هنا في الرياض مر على عدد من السودانيين الذين يمتلكون خبرات جيدة ومؤهلات عالية ولكن عندما ياتي موعد المعاينة تجد الواحد مزعزع الافكار ومضطرب البال ولا يهتم بمظهره ولا يهتم بان يقدم نفسه بصورة جيده للاخرين ولا يملك الثقة الكافية في نفسه لإقناع الطرف الآخر بأنه هو الذي يقدر ان يدير هذه الوظيفه بنجاح عكس الجنسيات الاخرى فالواحد ياتي للمعاينة وهو واثق من نفسه بصورة كبيرة وفي بعض الاحيان يستطيع ان يقنع الطرف الاخر بانه هو الوحيد المخلوق لهذه الوظيفه فقط على الرغم من ان الجنسيات التانية عبارة عن فقاعات ولا يضاهوننا في الخبرات والمؤهلات ،، واسف اذا كان كلامي جارح بعض الناس ولكن انا لم اعمم بل قلت عدد منهم وهذا حسب تجربتي الشخصية ....
اتمنى التوفيق للجميع واها يا ايمن انا زاتي ماش اقدم ربك يهون بس ..

تحياتي : ياسر العيلفون

يا باشمهندس أيمن محمود كلامك صح لكن دار الهندسة أديتها أكتر من حقها

أما الشركات الأجنبية والتي تأخذ دور الـ PMC

هي المقصودة بكلامك هذا على الأرجح

وأفيدك بأن التقديم عبر الموقع مباشرةً هو الأفضل وحتى إن كان التقديم عن طريق شخص يعمل في الشركة

كمرجع يعني لن يفيد كثيراً لأن السي في توجه إلى مدير التوظيف وغالباً لتلك الشركات الأجنبية المكتب الرئيسي أو الإقليمي

للشرق الأوسط يكون في دبي أو أبو ظبي

وفي النهاية بعض من تلك الشركات تتطلب خبرة لا تقل عن 12 سنة وكما أنها تعتمد فقط البكلاريوس كحد أدنى للمؤهلات

يعني لا توظف حملة الدبلومات


أسأل مجرب !

Quote: وفي النهاية بعض من تلك الشركات تتطلب خبرة لا تقل عن 12 سنة وكما أنها تعتمد فقط البكلاريوس كحد أدنى للمؤهلات يعني لا توظف حملة الدبلومات أسأل مجرب !

عاصم فقيري تحياتي
انا ما بتفق معاك في الجزية دي لأني أعمل فى احدى هذه الشركات ويعمل معنا مراقبين من حملة الدبلومات، واعرف اشخاص من حملة الدبلومات يعملون في شركات أخرى !
والحقيقة الدرجة العلمية المطلوبة لدرجة كبيرة مربوطة بشروط الجهة المالكة، وحسب معرفتي وزارات: الداخلية والتعليم العالي وأمانة الرياض ماعندهم أي مانع في عمل حملة الدبلومات !

ياسر السر

Quote: نفتقد لشي مهم وهو الثقة بالنفس وكيفية تقديم انفسنا للآخرين

دي حاجة بتغيظ جداً - انا ما عارف ليه الكثير من السودانيين بكونوا مهزوزين ومترددين في المعاينات، والله بعض البشر ديل تلقاهو ما ناقش حاجة وشايف نفسو ابو العرام !
وطريقة تقديم الواحد لنفسو قصتها طويلة جدا - تبدأ من البيت - بس ده ما عذر !
طريقة كتابة ال CV وخلافو مفروض الواحد يقرأ عن الموضوع ده ويكتبها بطريقة علمية ومدروسة !
كيف تخش المعاينة دي حاجة اتكتبت فيها كتب عديل - ما مسألة هبتلي ساي !
الانطباع الاولي مهم جدأ - خلي حاجاتك تعبر عن انسان قوي الشخصية وذكي !
المقام ما مقام تواضع ،،، كب الفي راسك (وأقهر) الزول العامل ليك المعاينة !

حاجة فايته على كتير من الناس: المظهر بيدوعليهو نقاط عديل في المعاينات

كلامك 100% يا اخي انا اعلم ان فرق الراتب ما بين مهندس يشتغل في بن لادن مثلا وبنفس خبرة اخر يشتغل في مؤسسة صغيرة يساوي ثلاثة اضعاف وقس على ذلك ولكن المشكلة تكمن في ان اصحاب المؤسسات الصغيرة لا يسمحون بالاستغناء عن المهندسين تحت كفالاتهم لذلك برضو ننصح اخوانا صغار المهندسين عدم الموافقة على رواتب متدنية عند التعاقد ورفع قيمة المهندس السوداني لان فيه مميزات اخرى.
مثلا اقل راتب اساسي لمهندس خبرة ثلاثة سنوات لايكون اقل من ثمانة الاف بالاضافة لبدل سكن ثلاثة اشهر وبدل مواصلات 10% من الراتب او سيارة وتأمين طبي مع تجديد الاقامة.

عبد المنعم تحياتي

Quote: المشكلة تكمن في ان اصحاب المؤسسات الصغيرة لا يسمحون بالاستغناء عن المهندسين تحت كفالاتهم لذلك برضو ننصح اخوانا صغار المهندسين عدم الموافقة على رواتب متدنية عند التعاقد

دي معادلة صعبة جدا
قبل القرارات الاخيرة انا كنت بنصح المهندسين السودانيين البعرفهم انو قدر الامكان الواحد ما يجي بعقد من السودان
يجي بفيزا حرة وكدة - حتى لو كلفتو قروش .. يعتبرها استثمار في انو يجي هنا وبيلقي افضل كتير من البيتعرض عليهو وهو في السودان !
بعد القرارات الاخيرة الامر بقى صعب ومجازفة الى حد ما غير معروفة العواقب !
وللأسف الكثيرون بيلقوا نفسهم مضطرين للموافقة على الرواتب المتدنية - لانو مافي حل قدامهم !

الله يسلمك يا ناصر

Quote: يللا يا شباب صحصحوا وإتحركوا شوية

الحركة فيها بركة - بس تكون حركة مدروسة
الواحد مستقبلو ممكن يتغير تماماً لو ربنا وفقوا وانضم لاحدى هذه الشركات !

بوست مفيد يا أيمن
ولنضح هذا الشعار امامنا
(لو ماعزيت نفسك، مافي زول بعزك)

والله يا شباب مهندسين الديزاين هنا بياخدوا رواتب خرافية ...

والله نقلت لشركة هندسية كمحاسب ...

لقيت إنو رواتبهم حاجة عالية خالص

وليدات صغار والله رواتبهم فوق العشرين ...

ما في شك كلامك جميل وصحيح مية مية ، ولكن هناك أمور ليست بيد كل حالم بالعمل في الشركات الكبيرة المانحة للرواتب العالية والامتيازات الجذابة ومنها على سبيل المثال :-

1/ وجود الفرص المتاحة في الشركات المعنية .
2/ مدى قابلية موافقة الكفيل التنازل عن الكفالة .
3/ وجود جنسيات محددة في تلك الشركات وهي تفضل بنو جلدتها وتضيق الفرص على الأخرين .
4/ كثير من الشركات تقبل السيرة الذاتية وما إن أدرت ظهرك ستجدها قابعة في الأدراج .
5/ وجود فروق حقيقية في الرواتب بين الجنسيات وهي معروفة وممارسة في كل الشركات ، مثال وهي حقيقة أعرفها تماما غادر المدير المالي (مصري) لشركة ما حيث كان يتقاضى راتب (30) ألف ريال وجيئ بمدير مالي (سوداني) بنصف راتب المصري .
====================================================================

وهناك أمور في يدنا ونستسهلها منها حسن الهندام والمظهر العام واللباقة ، فكثير من الأخوة لا يهتمون بالهندام بالرغم من خبراتهم ومؤهلاتهم الممتازة ، وهناك اللباقة في الحديث يجب أن لا نتحدث اللهجة الدارجة في المقابلات وتجنب كلمات ( آآي) و(داير) وما شابه من الكلمات التي لا يستطيع فهمها أو يستوعبها الشخص المسؤول في التوظيف .

مع تمنياتي بالتوفيق لمن يبحث الأفضل .

Quote: المكاتب الاستشارية الامريكية والغربية

ده الكلام الصاح
الشركات الاستشارية عموماً

السلام عليكم أيمن وضيوفه الكرام
موضوع مهم جدا خصوصا في الفترة الحالية
تتميز السعودية بوفرة الوظائف الهندسية مع وجود مشاريع ضخمة وهذا يضمن الاستقرار والاستمرار
لكن يجب علينا التركيز وبذل الجهد للانضمام للشركات الكبرى كما ذكر اخي ايمن وذلك كسبا للخبرة الجيدة
والدخل المناسب الذي يوفر سنين من الغربة.
عندي سؤال للجميع هل فوز دبي باستضافة معرض اكسبو 2020 له اي تأثير على تتوفر فرص العمل في الوقت الحالي ؟

داير أضيف شوية معلومات لفائدة القراء وشبابهم بالتحديد
في الجامعات الأمريكية
(معظمها إن لم يكن كلها )
قسم لتدريب يالمتخرجين علي:
تجهيز ال س في (هنا بيقولوا ليها رسيومي)
وعلي الأداء الجيد بل والممتاز في المعاينة
وبقدموا خدمة زي القدمها راعي البوست
إنهم بيخبروا عن الشركات والجهات العندها وظائف

المهم
في درس المعاينة وكيف تكون
بيقولوا ليك أهم حاجة إنك تعرف كيف تبيع نفسك
You should be able to sell yourself
بيقولوا ليك عارفين إنه في مجتمعات كثيرة
يخجل الناس أن يتحدثوا عن أنفسهم
لكنه الواجب والضروري أن تعرف كيف تبيع نفسك
(ما تخافوا كثير من حكاية البيع دي
كان عاينته ليها من نواحي تانية كلامهم صاح
لو إنت ما "رقيق حديث" ما كنت جيت ساكي وظيفة
كنت عملت شغلك براك...
your own business)

المهم تاني
بيع نفسك
ما بالكضب
لكن كن واثق من نفسك وقدراتك
وخلي الناس تعرف قدراتك وتقدرها
ولازم تعرف إنه الناس القدامك ديل ما هم إلا بشر مثلك
كانو في محلك دا قبل كم سنة
ودايرين يعرفوا إنك ناقش الشغل
وحتشتغل بجدية
وبتعرف تتواصل مع الآخرين
وما تعمل ليهم مشاكل
وما تملاهم عقد

بالعربي
دايرين يعرفوا إنت النوع البحل المشاكل ولا البعقدها

شكرًا باشمهندس ايمن علي البوست المفيد


أودّ التأمين علي نقطة ذكرها عدد من الاخوة
وهي كتابة السيرة الذاتية ( سي ;في CV
وهي علم قائم بذاته فعلي الاخوة الذين يودون
التقديم للشركات الأجنبية البحث عن الطريقة التي
تفضلها الشركة المعنية في طريقة عرض السيرة الذاتية
أيضاً توجد نقطة مهمة تطرق لها البعض
الهندام
ياجماعة لنا في قصة الشيخ فرح ابلغ دلالة

كما ذكر الاخ ناصر فكرة
How to sell yourself
كيف تسوق نفسك فكرة مهمة وللأسف نحن السودانيون لا نجيدها
ربما للفهم السوداني الذي يقوم علي التواضع ومفهوم التواضع الخاطيء هذا
يدخل أيضاً في كتابة السيرة الذاتية فيجب علينا التنبه لهذه النقطة
بالنسبة للمقابلة لأي وظيفة اعتقد ان الشخص الذي يقوم بامتحانك
يضع في حسبانه الآتي :
الانطباع الاول يدوم الي الأبد
The first impression is lasting
و
لا توجد فرصة تانية للانطباع الاول
There's no second chance for the firsti mpression
فعلي الذي يتقدم لشغل اي وظيفة وضع ذلك في الاعتبار حتي لا يفقد فرصته

اتفق مع الذين ركزوا علي العمل مع الشركات الأجنبية
حظا أوفر للجميع
________
الحليلة
مهندس سابق في بارسونز انترناشونال
قطاع الخليج - دولة الإمارات العربية المتحدة - ابوظبي

مسألة مهمة جدا جدا
لازم تعرف (الرينج) بتاع الرواتب في الشركة قبل ما تتفق معاهم على المرتب !
حاول قدر الامكان انك ما تحدد ليهم انت عايزكم !
خليك حريف وما تطلب رقم محدد، لأنو ببساطة ممكن مثلاً يكونوا خاتين ليك عرض عالي وانت تطلب أقل !
او كمان تقوم تشطح وتضيع على نفسك الفرصة !

Quote: مسألة مهمة جدا جدا لازم تعرف (الرينج) بتاع الرواتب في الشركة قبل ما تتفق معاهم على المرتب ! حاول قدر الامكان انك ما تحدد ليهم انت عايزكم ! خليك حريف وما تطلب رقم محدد، لأنو ببساطة ممكن مثلاً يكونوا خاتين ليك عرض عالي وانت تطلب أقل ! او كمان تقوم تشطح وتضيع على نفسك الفرصة !

مصداقا لكلامك دا - فقد ذكر احد البورداب انه عنده قريبو مصمم على ما اعتقد وجاء من السودان بخبرات ممتازة في مجال التصميم - المهم وجدوا ليه وظيفة ومشى عمل المعاينة ولكنه ما كان عنده خبرة في الاتفاق ووضع الرواتب في الخليج فبعد عملوا ليه المعاينة قالوا ليه داير راتب كم ؟؟؟؟ قال ليهم داير راتب 3000 ريال ، قالوا ليه بنديك 3750 ريال :) - تاني يوم اكتشف انه المصمم السابق له وكان لبناني الجنسية بياخد راتب 8000 ريال - فكلامك عن عدم التسرع في الاتفاق على الراتب دا مهم جدا - ويكون حنكك في الحالة دي انك داير تجرب العمل لمدة أسبوع ومن ثم تقرر الراتب المناسب وخلال الاسبوع دا بتكون عرفت الرواتب من المدير إلى أصغر موظف :)

تحياتي يا أخ أيمن ومبروك المولود الجديد وربنا يحفظه ان شاء الله ............

اليومين ديل تم تعيين مهندسين مساحة (مبتدئين) - سودايين - والحمد لله في كل من:
1- دار الهندسة والراتب (شامل) 10500 ريال + تذاكر سنوية + تأمين صحي . اتوقع انهم لسا محتاجين مهندسين مساحة مبتدئين !
2- بارسونز والراتب 7500 + سكن + ترحيل + تذاكر سنوية + تأمين صحي . حسب علمي لسا عايزين مهندسين مساحة مبتدئين !