ول ابا بريمة..هذا ما حدث في شمال الدلنج: صفقة بين الحيكومة و الجبهة الثورية..!!!!!

في بوست مجاور كتب ول ابا بريمة:

Quote: ول أبا كبر، سلامات .. ما قادر أتصل بالمنطقة .. مناطق السنجكاية و الضليمة هى قرى وفرقان أهلنا الرعاة .. طمأنا يا أخى الحصل شنو؟ بريمة

ول ابا بريمة..حبابك
الموضوع صفقة صغيرة بين الجبهة الثورية و الحيكومة.. قامت الجبهة الثورية رفعت ايدها ايام المظاهرات بتاعت سبتمبر.. اها الحيكومة ردت ليها الحسنة و فكت ليها شوية عربات..و لأن الصورة المعلنة قدام الجماهير انو الطرفين حاتنو قرض مع بعض..فالحيكومة ما بتقدر تشيل الزوادة و تنقش تنقش تمشي تديها لناس الجبهة الثورية.. لازم يعملوا توم و شمار و بهارات كتيرة عشان الطبخة تسبك كويس.. فقام الوهم وزير الدفاع يصرح ماشين عمليات (في زول ما شي الدواس يا ول ابا بيشهد الناس؟؟؟)..اها الجبهة الثورية مشت في نفس الخط..عااك و عيييك..و ناس الحيكومة جايين يقرضونا و شنو كده ما عارف..و الشعب المسكين يا مؤمن يا مصدق يتفرج في الملهاة..اها حصل التسليم و التسلم في ناحية كرمالي..!!
الدلنج تعيش في رعب..و الهاون حمى الناس النوم..وزي ما عارف الحامية في نص البلد..يعني ناس الجيش خاطين المواطنين و السوق و الجامعة و المطار دروع بشرية..و بيفكوا الرصاص من داخل المدينة..

ناس الجبهة الثورية عسكروا في نواحي ابوعريف و الكركرة..و الإشتباك حدث في كرمالي و كبري الفرشاية..حتى الآن مافي خسائر في المواطنين..لكن براك عارف ظروف ز ي دي ممكن يستغلها البعض بما فيهم ناس الأمن و الإستخبارات.. عشان كده حدثت عمليات تفلتات و نهب..و الحيكومة ما بعيد تكون مشاركة فيها عشان الناس هناك ابت دت تخوض حروب نيابة عن الحيكومة..و فهموا الدرس من هجوم المرة الفاتتة..!!

النجيضة يا ول ابا.. الجبهة الثورية داقة جرس من الحوازمة..و قالوا ليهم لحمكم مر ما بنهبش..و عضبتونا عضاب قبورة.. محل ما نقبل نلقاكم في وشنا.. المرة الفاتتة ما قدرنا عليكم الإ بالعربات ..!!
في المرة الفاتتة حدثت عمليات اسر بواسطة ناس الجبهة الثورية..و الحوازمة مشوا عديييل لعش الدبابير و اتفاهموا مع ناس الجبهة الثورية..و الأخرين قاموا فكوا الأسرى..و كل زول مشى في حالوا..!!

الحرب يخوضها ابناء المنطقة في الجبهة الثورية (حوازمة..خزام..مسيرية..بديرية..الخ)..و ديل عارفين طبيعة المنطقة و علاقاتها المتشابكة.. عشان كده ما دايرين يفتحوا باب حروب قبائل و كده..و صدقوا فيما عاهدوا.. يعني حتى الآن الإستهداف للحيكومة فقط.. و ده كلام كويس.. لكن الأثار الجانبية مثل الرعب المستمر و التفلتات الأمنية و النهب..و ضرب الطيران.. فهذه مافي رؤية واضحة لتلافيها.. عشان كده نحن بنقول الناس تنقل الحرب للخرطوم عشان الشعب السوداني ده يعرف الرعب الحقيقي و يقوم يعمل ليهو حركة حركتين..!!
المواطنين اصبحوا في حيرة و ما عارفين يكاتلوا منو بالضبط.. زهجانين من الحيكومة..و زهجانين من الجبهة الثورية التي تثير الرعب في المنطقة..و هذا هو مصدر الإنفجار الذي ظللنا نحذر منه الناس كثيرا..الخلق الهناك دي و انت تعرفها جيدا يا ول ابا..خلاص ألمي خنق القنطور..و بعد شوية لا حيكومة ولا جبهة ثورية.. كلهم يتقشوا من غير شهواد..!!
الناس زعلانة أنو عيالهم عاملين فيها خايضين حروب ضد النظام..و انهم شغالين لصالح مصالح اهلهم.. لكن الحاصل انو المقاتلين ديل و من غير ما يشعروا..قاعدين يحموا مصالح السادة الكبار في الخرطوم..

الحيكومة بقت ما عندها موضوع كلو كلو..و عشان تخلق ليها شعبية اها بتحاول تعمل فيها مشغولة بقتال التمرد و شنو كده ما عارف..و ناس التمرد يرقصوا بمزاج على نقرشة الطبول..و الإتنين عارفين حدودهم وين.. يقوموا ناس الجبهة الثورية يمشوا اوربا..و ناس اوربا يقولوا ليهم سلام و شنو كده ما عارف..و ناس الجبهة الثورية يقولوا ليهم نحن الأهم و عاينوا لينا.. و اهو الموضوع المرة دي جايب مفاوضات في اروشا و محلات ما انزل الله بها من سلطان..!!!


الى متى يستمر هذا العبث؟..قريبا الأمور ح تتكشف..

كبر

ول أبا كبر،
ألف شكر، يلزمنى الأتصال مرة أخرى .. بالأهل .. أب عريف هو منطقة جيراننا من قبيلة التمباب .. وهى تقع جنوب فريق أهلى الذى حكيت لك العام الماضى عن المشاكل التى وقعت بين قبائل الحمر فيه .. ومنطقة الكركرة على مسير ساعة إلا ربع غربنا .. وهم أخوالى لجدتى من وناحية والدى، قبيلة أولاد أب بقار.

وهاتين القبيلتين .. أولاد أب بقار والتمباب .. لم تتأثرا بالتمرد منذ أندلاعه إلا قليلاً جداً .. وهذا تحرك سكانى أخر في خور أب حبل يضيف إلى مأسى المنطقة.

-----------------
أتمنى ول أبا عيد، من الفيس بوك يمر من هنا ..

بريمة