الشاعر كمال حسيب عيدية من طرف الشهيد

عيدية من طرف الشهيد

انا حبي ليكم ما بحيد
داير ازوركم .. بس بعيد
ليكم مبارك و عيد سعيد
اطفالنا كيف ؟ لبسوا الجديد ؟
جبتو الخروف ؟ ما الدنيا عيد
وانا امي ضحت بي شهيد

يا امي يا ام الصحاب
اتحنني و فكي التياب
يا بوي قابل الناس حباب
بلغ سلامي على الشباب
انا عندي بس كلمة عتاب
للقال علينا : رعاع .. كلاب

كنت اخونا ومننا فينا
ما بتذكر يومنا الجينا
من الحفلة وما اتعشينا
نص الليل زبطنا سخينة
نضحك نمنا واتغطينا
ولا خلاص .. صجيتا عجينة !

يوم ذاعوك في الرادي فرحت
ويوم تخريجك كم هللت
شديت بدلة و اتجنصصت
جبت الكاميرا وليك صورت
كأني عريس هايج بشرت
ناس قايلني انا اتخرجت

انا حفرت حفر صيوانك
وكنت البخدم في ضيفانك
وزي اولادي بحب ولدانك
ولما تغيب تلقاني مكانك
بحفظ عرضك و برفع شانك
خايف والله يخف ميزانك

طلعت عشانك ما عاديتك
كان سالمت – لو لاقيتك –
شارع واحد بيتنا و بيتك
كم في فرحا جيتني و جيتك
وكم عزيتني و كم عزيتك
هسا نسيتني ؟ وتب ما نسيتك

اتمنيتك توقف جنبي
واتوقعتك تمشي في دربي
ربنا واحد .. ربك وربي
ولو فرقنا اللبس الحربي
لسه رصاصتك ساكنة في قلبي
وفيهو بضمك ريدي و حبي
هنا من بعيد شايف لهب
ناس قالوا وووب ضجة وصخب
نار السعير ما نار قصب
نار لل بيظلم و اغتصب
لل بالحرام مالو اكتسب
نار للمنافق والكذب

صدقني ما اتمنيتا ليك
انما اصلي ما حاقد عليك
استغفر الله .. وكف يديك
لأني خايف يوم يجيك
ويبيعك الكان مشتريك
وريني وين ح تدس وشيك