الشعب السوداني أحلى شعب!

تقولي شنو وتقولي منو؟
نحن الشعب السوداني أوّل من استخدم:
• السفنجة كأداة للقتال.
• علبة الكريم كحقة للتمباك.
• كرت الإسكراتش كقرقريبة للعواسة.
• رأس البيت كمخزن.
• لستك العربية كحامل للطست.
• علبة الصلصة ككوز للمزيرة.
• أغطية الحلل كدركسون للعربات عند الأطفال.
• ترس البسكليت لكسير الثلج.
• موس الحلاقة ليبري قلم الرصاص.
• صناديق البيبسي كولا ككراسي للجلوس عليها جنب الدكان.
• قزاز البيبسي لهرس الفول.
• الفول المصري كغذاء للإنسان قبل المصريين.
• الشُّرَّابات لصنع كرة الشُّرّاب المعروفة.
• الزبالة لطلاء منازل الجالوص من الخارج.
• القنا كعراضات لمرمى كرة القدم.
• أنبوبة اللستك ######ادات.
• أول شعب يأكل الكسترد بالأرز.

نحن أول شعب:
• ينشِّف اللحمة.(الشرموط).
• ينشِّف السمك. (الكجيك).
• ينشِّف البامية. (الويكة).
• ينشِّف البصل. (اللوص).
• ينشِّف الطماطم. (الصلصة الناشفة).
• ينشِّف الرغيف. (القرقوش).
• حكومته تنشِّف خزينة الدولة من كل الموارد.
• الواحد مننا عاوز الحافلة تنزله أمام بيته.
• يقول للزول ما تتكلم ساكت! كيف يتكلم الزول وهو ساكت؟
• الشعب الوحيد الذي يرفع الفاتحة عند العزاء.

حاجات سودانية خالصة:
• الشهيد القرشي إستشهد ضد حكومة عبود. الإثنان لديهما حدائق في الخرطوم باسميهما.
• شارع الحرية عندنا يودي السجانة.
• رئيس إتحاد العمال ما عامل.
• رئيس إتحاد الطلاب ليس بطالب.
• عندنا منطقة أبو آدم والمعروف أن آدم لا أب له.
تحياتي.

كبـّاشي الصـّـافي
(العوج راي والعديل راي)

كباشى الصافى

وكيف نكون سودانيين لو ما كنا كدا يا زول

تحياتى

كلامك صاح يا سيف سعد عمر ... ارجل ناس وأشجع ناس وأكرم ناس وألعب ناس وأفصح ناس وأنضم ناس وأنحف ناس وأسمن ناس
تحياتي.

كبـّاشي الصـّـافي
(العوج راي والعديل راي)