رسالة لكل مغترب ومجدع خارج السودان وقاعد ينظر فى ثورة الشعب ضد حكومة البشير!!!!!!

خليك فى حالك ومالك ومال حرق الدم . اولادك متعلمين وعلاجهم مضمون
واجع قلبك مالك بالكيبورد والاسافير وتشجيع الثورة فى السودان؟؟؟
يعني بس همك اولاد المساكين الفي السودان ديل يتكتلوا وخلاص ؟؟؟
ياخ خلي الجياع ديل يدبروا حالهم مع الانقاذ دي براهم وبمزاجهم يطلعوا وقت ما يطلعوا
اتركهم هم وربهم يتكاتلو او يتفقوا وانت خليك مجدع فى البلاد الصالحة لحياة البشر!!! ياخ ما بتعرف تكون اناني وبتحب نفسك
وحتى مامحتاج تبرر لنفسك او لغيرك عن انانيتك تخيل البسألك انت كده ليه ببساطة خائف على الدم السوداني خائف على كل ام
واب يفقدوا اولادهم يعني عندك مراااقه جاهزة فى احسن واريح من كده؟؟؟؟ صدق الواقع ده زي ما بقول ملاسي ، انت مغترب بيض كده مالك؟؟؟
في الصيفية تعال شوف البلد وسلم على اهلك واتخارج عادي جدا؟؟؟ الحمدلله البلد فيها تضخم زي الورد
اقل مبلغ تجيبو معاك بعمل ليك ملايين فى احسن من كده؟

خليك فى ضلك البارد ده عشان ما تبقى سبب فى موت اولاد الناس.بلا ثورة بلا قضية بلا شعب يحكمها البشير يخرب ابو اهلها انت ساكن فيها؟؟؟؟

بالله وفى ذمتك فى احسن من كده!!!!!!!!


السنجــك

ياخي كلامك دا حرقني شديد ...

Quote: في الصيفية تعال شوف البلد وسلم على اهلك واتخارج عادي جدا؟؟؟ الحمدلله البلد فيها تضخم زي الورد اقل مبلغ تجيبو معاك بعمل ليك ملايين فى احسن من كده؟

بعضهم وليس كلهم يسألون عن أسعار العُملة بشكل يومي .. ومن صيغ السؤال:-

أها يا عمّك الليلة سعرو كم .. ما زاد شوية ؟

Quote: خليك فى ضلك البارد ده عشان ما تبقى سبب فى موت اولاد الناس.بلا ثورة بلا قضية بلا شعب يحكمها البشير يخرب ابو اهلها انت ساكن فيها؟؟؟؟

اولا نحن ما طلعنا باختيارنا
اجبرنا من قبل هذه الحكومة انو نطلع
وربنا يسر لينا فرصة طلوع عشان على الاقل نساعد اهلنا الجوة
وغير كدة
نحن ما مقطوعين من شجرة
عندنا اخوانا وابناء عمومة وابناء خال
وابناء اخوان
وبنشجعهم يطلعو
والموت حق

كلامك شين يازول
السودان خلاص قسمتوهو الجوة سودانيين والبرة منبوذين؟

Quote: اولا نحن ما طلعنا باختيارنا اجبرنا من قبل هذه الحكومة انو نطلع وربنا يسر لينا فرصة طلوع عشان على الاقل نساعد اهلنا الجوة وغير كدة نحن ما مقطوعين من شجرة عندنا اخوانا وابناء عمومة وابناء خال وابناء اخوان وبنشجعهم يطلعو والموت حق كلامك شين يازول السودان خلاص قسمتوهو الجوة سودانيين والبرة منبوذين؟

وفات عليه .. لولا تحويلات المغتربين (ناس برّة) لما استطاع أن يصف الحالة التي سيصل لها ناس جوّة ...

أُمّاتِي القِبيلْ
بي حِنّهنْ لجّـنّي
كَرفة وقَلدة
كيف شوق اللّبن رَجّني
حُزناً جاني في مَيْع الصِّبا يلَجِّني
أطلعْ مِنِّي يا جلدي المِنمِّل جِنيِّ
واطلعْ مِنِّي يا حُزناً بِقى مكَجِّني
خَلّني أبدا مُسداري
وأودي قفايا لي داراً بِقَتْ مِي دَاري
جِيتَا ..
وجِلْدِي بينو وبين عضايا الشّحَمَة
إلا النّار بِقَتْ قِدّامي
جِلْدِي اللّيلة بينو وبين عَضَايَا المافي
إلاّ تراني شَوّالْ الكِبِسْ
نِفّيخْ جَراريب الوَرَمْ هَدّامِي
في جِلدي الورم قُولَنْلي
واللاّ صَحِي الورم عَضّامِي
سفريتك مِي في النيّة
ماها الكانت محريّة
خابراكْ عِرِّيفْ ..
ذم العُربانْ واللاّ قِيام الوردية
مالكْ ؟؟؟
تَرْيَانْ ومندِّي
كاسي الكِتّان والهندي
قولَكْ كِكّيفْ ترجى البيشان
واللاّ الغُربة البي الزِّنْدي
برقاً عِبْدِلِّي الوَزْنِ
يا طاشْ .. يا جاب المُزْنِ
فَرِّقْ يا الضّيفْ
فِعْل الغَضْبان ..
أم فِرْفيرات الحُزْنِ
وشِنْ القَعدة
يا أبو السُّرة
شِنْ القَعدة في ضُل العمارات أم كمرةً برّة
ضُقْنا الحَنْضَل اليانكي
وبَلَعْنا المُرّة
كِمْلَتْ كوتة التُّمبَاك
صَقَعْنا الجِّـرّة
ووكت إتقفّلَتْ شِقّيشْ
قَبَلْ بي المرّة
نَرْمي أمُرنا في بلد المعاني الحُـرّة
الشّمْ خَوّخَتْ
بَرَدَنْ ليالي الحّـرّة
والبرّاق بَرَقْ ..
مِنْ مِنّا جاب القِرّة
شوف عيني الصِّقير بجناحو كَفَتْ الفِرّة
تلقاها ام خدود الليلة مَرَقَتْ بَرّة
مَرَقَتْ بَرّة ..
مَرَقَتْ بَرّة تغلي مديدة الحِلْبة التَسَمِّن رِدْفَها
السَمِنْ المبَسْتَرْ يانْكي
والويقود بعيرات الدُّخان في العين
وفي الفَشْفَاشْ يسوِّي عمايلو
شِنْ فايدة مديدة الحلبة والويقود بشيلو اليانكي ؟؟
يا ابو السُّرة
قامت من دخاخين العمى تلمِّع وشِيها
اليانكي مِسْتَنِّيهَا
كان اليانكي مستنيها في مراية السَجَم في اللّيل
لقيتها مِتِلْ فريخ الطّير
مَرَقْ ود عينها من ود عينها
رجّافة المزمّلْ حُمّى
جَفَلَتْ مِنّو
وَقَعَتْ عندي
صدرها بغلي
يا ابوالسُّرة
شُفْتَ اليانكي في ود عينها
سُقْتَها للبحر
يمكن يغسِّل عينها من اليانكي
فُتْنَا الحَجْرة بالكَتّة وغطسنا مسافة
تبقى قَدُر مسالك الرّيدة
وما لاقانا من يغبانا في البحر الفَدَرْ تحتاني
ناس عارفاها
ناس عارفاكا
ناس عارفاني
نادينا القعوي والبُلْطي
قرقور السّمَك ودّانا لي دابي الخُشَشْ
نادينا عُمّال الطّمِي
عُمّال الطّمِي الصّارقيلا
والقَرْمُوط
وود الموية
وفُتْنَا عليها
كانت نايمة
عَجّال البحر حارساها
كانت نايمة بين حجرين وضُل ساسوية
وعُمّال الطّمِي الصّحونا لّمُو حصى البحر
قسموهو ياتْ من كان سبع جمراتْ
دابي الخُشّة قال :
أدُّوها في الجمرات تلات سبعاتْ
قُلْنا :
أدُّوها في الجمرات تلات سبعاتْ
مَسَكْنَا دَرِبْنَا
وعُمّال الطّمِي الصّحوها
خابرين الدّروبْ
مَرَقوبنا في مُشْرَعْ مسارب الضّيْ
لقينا الدُّنيا تترجّانَا
قُوقَا القِمْري
خَوّى صِقيرْ
وعَوّى حِديْ
وعُمّال الطّمِي الصّحونَا
لَمُّو على البعرفو الصّيْ
حَصَى القيزان
دوابي الدّارْقَة
والسِّحْليّة
والنّاسْ التِّحِتْ
النّاسْ التِّحِتْ خابرين عَمايْل اليَانْكي
مَرّة معونة لي اللّغّاف
ومَرّة دَوانْكِي
شِنْ معناهو جيبها إن كان ملوهو بوانكي
وصوتها مكتِّمو القَرَبين سيوف وسَوانْكِي
قولَنْ لي الأَخْلو ديارو
دمّكْ فَرْهَدْ في نارو
غَوّرْ في الأرض
طارو صَقْرين
أولاد الأرض ما طارو
لحمي غَطّى بِنْ عَمِّي
شو صار حالو يا إمِّي
منديل العِرْضْ في بيت الدِّينْ
دمِّي ما يخلِّي دمِّي
إنّا من دير ياسينْ
صِرْنا في جِزْر التّين
عَمْ نسقى بعضْ
حُبّ الزّيتونْ بدّو يرجع للطينْ
صابرا تحت الدورية
صابرا فوق الدورية
صابرا فوق الدورية
يا حال الضِّدْ
لحم الطِّفلين نابت غُصنْ الحريّة
جِذْري مو في شاتيلا
ما قال حالي يا ويلا
حِنّا في الأرضْ
أرضِ فلسطين
يا إمِّي هيلا هيلا
يا إمِّي هيلا هيلا
يا أُمِّى هيلا هيلا
هيلا


شن نقولك وفي شان ريحة كلامك بجيب طمام عديل يبقن أماتك القبيل مش رجنك مو علمنك كيفن نظام قاتل وفاسد كيفن شردنا كيفن في بيوت أشباحه هرد دم قلبنا كيفن ما ينسرق يطلع وفي تحت يده عشرين خشم بسأل والبلد حاله فقر الا من بقى عديل سادن وحارس بيت أشباح أو ناقز فوق صفيح أو مطبل عنيد أو بحلف بالله ويسب الدين يمشي شايل شالوا رافع فاتحته في دم قتيل يديهو صحي ساقط الفهم البساسك ماعونه وهو مقدود من النت والصداء حوفه مرض وقلة عقل يا الاخو ما كنت محرية في زمن دم اخوك المقتول ببندقية عسكرية .. خشيمك محتاج سواك كان إراك ما بجيب تب الفرقه النيه وكلامه عوج زي عوض الناس المدرين البلد كضب الدين ونصب .. ياتو رئيس مره علي الوطن شيد عمايره فوق مزارع كافوري ... شن الما بخلي الناس تطلع ... وشن السمح في البلد هسع ... وينو الخير البتق اسع ... ما هو داك عمار عشره مليون مليون ينطح مليون في دبي متحكر وباسم الدوله والدين ببقى سجناً للشرفاء تف علي كل من يحتكر السلطة ويتفه شعبه بعفن النضم ... أنت قلبك ماهو داري وجع الناس مرض الناس غبن الناس دم الناس السقه الوطه بتق .. احسنلك تسوك بهتاف الناس والزمن بمشي مو راجع مو ماسح نتن الكلام

اخوي عادل يارب تصل كلماتك

Quote: ما هو داك عمار عشره مليون مليون ينطح مليون في دبي متحكر وباسم الدوله والدين ببقى سجناً للشرفاء تف علي كل من يحتكر السلطة ويتفه شعبه بعفن النضم ... أنت قلبك ماهو داري وجع الناس مرض الناس غبن الناس دم الناس السقه الوطه بتق .. احسنلك تسوك بهتاف الناس والزمن بمشي مو راجع مو ماسح نتن الكلام

لانو كمان الموت شرف ضد البحصل فى السودان ده والموت ده ما جابو معارض الاسافير ومغترب زمن المحنة
الموت البحصل ده جابو عمر البشير واعوانه!!!!!!!!!

السنجك

المغترب لم يغادر موطنه حباً فى الابتعاد عنه بل هنالك ظرفا اجتماعيا و اقتصاديا و سياسيا اجبره على ذلك الاغتراب و السفر الى خارج موطن جدوده , ومهما منح ذلك المغترب الهوية الاجنبية التى تتبع للبلد الذى هاجر اليه او مهما تحصل على المال الوفير الذى يجعله و ابنائه يعيشون فى ذلك الوطن البديل فى رغد من العيش الا انه لن يهدأ له بال واسرته الممتده داخل الوطن تعانى الامرين و ترزح تحت وطاة الجلادين الطغاة , لا بديل للوطن الا الوطن , و ترتفع نسبة الوطنية عند الانسان عندما يعيش مغتربا فى اوطان الاخرين وخاصة اذا كانت هذه الاوطان تمتاز بكفالتها لحقوق الانسان و الحريات الشخصية و العدالة االاجتماعية , حينها يستشعر هذا المغترب بدوره الحقيقى الواجب عليه لعبه فى سبيل الارتقاء بموطنه الى درجات عليا فى سلم رقى و تحضر الشعوب.
الانسان السودانى عندما يكون خارج وطنه تجده من اكثر الناس هماً و انشغالا بما يدور فى داخل بلده و يصرف من دخله نسبة معتبره فى الاتصال الهاتفى اليومى و الشهرى بالاهل و العشيرة , ان الوطن هو جزء من دم ولحم ووجدان الانسان , لا ينسى الوطن الا من هو كفيف الانسانية , الموت الذى يداهم الناس فى دارفور و جبال النوبة و النيل الازرق لهو دلالة قوية على ان هنالك من ينتمى الى الارض روحاً وجسداً ولن يستطيع ان يفارقها ولو فارقت روحه الجسد , ان الوطنية ليست حديثاً يفترى و لا كلاماً منمقاً يباع ويشترى , انها احساس عميق بالانتماء الى التراب , انها العيش من اجل تاريخ الاجداد التليد و ليست تملص و تفسخ و تنازل عن الموروث , ان كل من يتخازل و يدّعى الفهلوة لتجدنه اكثر الناس بعداً عن الجذور الضاربة فى العراقة و القدم , الذين ينادون بتقسيم السودان و ببيع اراضيه اما انهم لم يتم تلقينهم منذ الصغر بما قدم اجدادهم الاوئل من اعمال خالدة فى سفر الحضارة البشرية او انهم لا تاريخ لهم ولا لاجدادهم وجود فى هذه الارض الطيبة.
لقد التقيت احد السودانيين المعتزين بسودانيتهم فى احدى دول الخليج العربى , وجدته مرتدياً للجلابية السودانية و العمامة و الشال و الملفح و المركوب وكانت له اقامة تجاوزت العشرين عاماً فى ذلك البلد, قلت له ممازحاً لماذا لم تفعل كما يفعل بعض من المغتربين من ارتداء لزى هذا البلد الذى انت فيه , ضحك ضحكة ساخرة و قال لى يا بنى هنالك ثلاثة اشياء لن افعلها فى حياتى ولو اشرقت الشمس من مغربها , قال لى اولاً: لن ابدل لهجتى السودانية ارضاء لذوى اللهجات الاخرى, ثانياً: لن ابدل زيى السودانى , ثالثاً: لن اقبل بحمل جواز غير الجواز السودانى , قلت له ياعم اتفق معك فى المبدأ الاول و الثانى لكن لا اتفق معك فى رفضك لحمل الجواز الاجنبى لانه ضرورة و له امتيازاته و يعتبر حماية لك فى اوضاع بلادنا المتقلبة , كان رد هذا الشيخ الجليل قمة فى الحكمة و العظة , قال لى : يا بنى ان أى دولة تمنحك جوازها باعتبارك مهاجر تأكد انها وضعت معلومة فى شفرة الجواز الغير مرئية بأنك مواطن من الدرجة الرابعة وان ادعت تلك الدولة رعايتها للحقوق المدنية للجميع دونما تمييز .
سوف يتعاون كل سودانى شريف و اصيل سواء كان فى بلاد الاغتراب او كان فى وطن الجدود لكى ينقذوا الوطن من براثن هذا الغول القاهر و الممسك بمصير الناس , الحياة بها اناس و اناس , بها اولئك المخزلون و المنبطحون و المكسرون للثلج والحارقون للابخرة فى بهو صالون السلطان كما فيها ايضاً الاشاوس والعصاميون و المتخيرون للقمة عيشهم من خلال الطرق الشريفة و المحافظون على مبادئهم و اخلاقهم و لا يتنازلون عن حقهم و لاينكسرون مهما تكالب عليهم الجبناء و المأفونون.

صدقت اخي اسماعيل واسمح لي ان اضيف:

Quote: لا ينسى الوطن الا من هو كفيف الانسانية

فى اي مكان حتى اذا كان سودانيزاون لاين

اخي الدكتور محمد
انت شكلك برضو ما شفت الايقونة!!
@تحياتي

يا صبري اخوي ده ما كلامي!!!

ركز معاي شوية بليييز.

Quote: يا صبري اخوي ده ما كلامي!!! ركز معاي شوية بليييز.

طيّب كلام منو ؟ عشان أركّز معاك ...

كنت في السودان ..

معليش يا سنجك لم ألاحظ لأيقونة البوست

ولايهمك يا صبري بسيطة كونك ما شفت الايقونة

المشلكة لمن ما نشووف البحصل في السودان!!!!

تُشكر ياخ ...

Quote: المشلكة لمن ما نشووف البحصل في السودان!!!!

ثمّ كااااااااااااااااااااك ...

سلام يا السنجك,

المغترب مطلوب منه يأخذ اجازة ويجي يشارك والآ تسحب منه وطنيته؟؟

هل جاء طلب لكل العاملين والموجودين في الخارج الحضور للمشاركة الشخصية في الثورة ولكنهم رفضوا ؟
وهل هذا يعقل؟؟؟
أم أن المشاركة في الثورة بكل أشكالها في الخارج والداخل تؤدي القرض الذي من اجله هب المظلومون؟
ولماذا العتب الشديد علي المغترب لأنه في بلاد ليس بها تهديد علي أمنه زأمن أسرته وأطفاله ؟
(يعني لازم يطلعوا من بيوتهم ويقعدوا في شمس الله الموقدة في الخليج ويتحرقوا بيها تضامنا مع الذين خرجوا في السودان حتى تتعادل الكفة )؟
أليس المغتربين هم من يسد العجز الموجود في ميزانية الطغمة الجائرة , وهم في لهيب تغربهم يسددون بعضا من واجبهم تجاه أسرهم ؟
وهل نجا المغتربون من ذل وظلم وملاحقة نظام الكيزان الغاشم في عرقهم رغم ما يلاقونه من صلف من إخوتنا في دول البترول ,
حتى صاروا كثيران الحرث يعملون ليل نهار بأجور بح صوت منظمات حقوق العاملين لرفعها حتى تتناسب وجهدهم المبذول؟
ألم يسمع الشرفاء من المغتربين صوتهم وتضامنهم مع كل هبة يهبها شعبنا لرفض الذل والهوان وضيق العيش ورفضا لقبضة جبابرة البطش في السودان؟
ماذا تريد من المغتربين أن يفعلوا اكثر مما يفعلون ؟
ألم يهبوا لنجدة أهلنا حين فيضانات 88 وفيضانات 2013 وقت أن عجزت حكومات الصلف والاستبداد عن مد يد العون؟
المجد لكل الشرفاء في بلادنا ممن يؤثرون علي أنفسهم ساعات الشدة ,

والحرية لشعبنا الأبي الذي لم تخمد أصالته رغم المحن والإحن ,
عاش نضال الشعب السوداني وإنصافه في تأريخ المواقف المشرفة ,

وثورة ثورة حتى النصر بإذن الله.
ست البنات.

احييك يا سنجك وهذا ما يسعى اليه المحبطون .
معارضي معارضة الكيبورد.
يريدون أن يفصلوننا عن واقعنا المرير وكأننا من كوكب اخر.
يصورون المغتربين وكأنهم اله لجمع المال فقط .

يموت الغريب ألف مرة في اليوم
ويموت القريب مرة واحدة في العمر
ويبقى القاسم المشترك بينهما
أنهما في الحياة يسعيان إلى
.......

تحية طيبة



الحاجة البتحير

ناس جوة فاكرة ناس برة مرطبة وامورها ظابطة (للطيش)


وناس برة فاكرة ناس جوة ديل شايلين كلاش ومبطلين حياتهم
وقاعدين في باب القصر راجين البشير يجي عشان يختوه ليه


.....
الناس البرة جات وبدت من الصفر والغالبية حالتهم (تحنن الكافر)
جارين ليل نهار عشان يقدروا ياكلوا ويشربوا ولو خشت قراية الاولاد
ده فلم براه ونقول كتر خيرهم انو لسة بدوا البلد الشردوا منها حقها
وبحزنوا لحزنها وبفرحوا لفرحها وفي دواخل كل منهم
جملة الحكومة دي تمش والله ارجع هسي ..

............
الناس الجوة مجهجها العدو ما خلفها العدو من كل الجهات والبحر هي في نصو
مجابدة في المعايش الجبارة يقسم من حق البيت عشان يقدر يحضر ندوة او حفلة
اي مشاور في مواصلات بعني اضطراب في الميزانية لفترة طويلة
الحاجة الكويسة انهم متصالحين وصابرين على حال البلد وعندهم امل انو بكرة احسن
واي زول فيهم لو لقى السكة فاتحة بلحق البرة لكن البرة ما برجعوا في دي
ماعارف نقول شنو هل الاتنين انانيين يعني
ورغم الحاصل برضو نشكر ناس جوة انهم بقسموا وقتهم عشان يسدوا
فرقة اخوانهم المرقوا واتحملوا الكتير ومازال بتحملوا

الجميع الجوة والبرة ضحايا لنظام لا يتوانى في قتل كل من يقف ضده
صحيح هناك بعض اللامبالين جوة وبرة ولكن الغالبية تحمل هم الوطن
وعلينا تقديم ماهو واجب كل بما يستطيع

وبعد الخلاص من البشير

نقول

الله يرجع البرة

ويمرق الجوة ماغربة (سياحة بس)


تحياتي

و

الثورة مستمرة

التحيه لك يا السنجك ولكل مهموم وموجع بالوطن.

المغتربين و المهاجرين

اكثر ناس مهمومين بالوطن طبعا ليس جميعهم ولكن اغلبهم

الا يكفي انهم هم احد احم اسباب تحمل هذا التضخم بدعمهم المالي لاهلهم؟!

السنجكـ
ختها طاخ وانتهى الموضوع
نقطنـــا بسكاتكـ .

عمران بعد كلام الاخ بدرالدين ده ما اظن محتاجة اختها طاااخ

Quote: وهذا ما يسعى اليه المحبطون . معارضي معارضة الكيبورد. يريدون أن يفصلوننا عن واقعنا المرير وكأننا من كوكب اخر. يصورون المغتربين وكأنهم اله لجمع المال فقط .

الاخ السنجك

تحياتى

هذا الكلام المهاتر و السخيف لا يستحق مننا ان نقف عنده.

هم يريدون ان يفصلونا عن وطننا باهكذا ادعاءات . يريدون ان يوقفوا مشاركة المهاجر او المغترب الفعالة فى معارضة هذا النظام الاستبدادى الفاسد.

لا لن نتوقف عن الكتابة و لن نسكت ابدا بسبب هكذا ترهات.

كان الاجدر بهم لو الكلام كده أن يقولو للحكومة ان توقف القتل . ابناء المتنفذين هم المربطين و هم من يعيش فى بذخ و ليس ابناء المهاجرين او المغتربين

إجلسْ .. جلوسكً
فالبلادُ غدت نعيم
من بعد ما غادرتها ..
شبّت شوارعها
السدود ... الكهرباء ..
من بعد ما غادرتها .. يا أيها النحسُ السقيم
صارت بلادك جنةَ
ما مثلها إلا الحبور
...
...
فلا تفكر في .. الحضور


.......
تحياتي للجميع

السنجك يقصد العكس ويعرف تماما ان هم المغترب
لاينفصل عن هم من هم بالداخل
لذا هو يحث الذين فى الخارج كى يبذلوا المزيد من العطاء بالأرواح وبالأبناء وبالمال
من أجل السودان وأبشر ياسنجك انا عندى سته من الأسره ماتوا فطيس فى الجنوب زى ماقال (تربرب) ...
وانا ذاتى بايعا وجاى أموت جوه ...

احترامى

ملهم اخوي الله يديك العافية ولقدام

الجنيدالله يديك العافية. كلامك جميل فعلا الجوه تعبان والبره تعبان والثورة حق للجوه والبره
والموت حق للجوه والبره. ما ممكن يجيني واحد ويقول .......يا المغترب ده يطلع يظاهر او يعيش تحت
تحت فساد هذا النظام الى ان يقدر الله أمرا كان مفعولا. !!!!!!!!!!! ده موقف سلبي وبدعم للنظام ده
وبشكل مباشر.

ست البنات سلام

Quote: المغترب مطلوب منه يأخذ اجازة ويجي يشارك والآ تسحب منه وطنيته؟؟

مش تسحب وطنيته وبس.لا كمان يسحب عن حتى حق الكتابه عن الوطن فى الانترنت !!!!!

لا وفي منطق فصل سودانيز اون لاين عن الانترنت !!!

او من يتحدث عن تدهور دور سودانيز اون لاين مش الانترنت !!!!

وعشان سودانيز اون لاين تكون بتعمل فى دورها صاح زي ما تفضلتي:

Quote: (لازم يطلعوا من بيوتهم ويقعدوا في شمس الله الموقدة في الخليج ويتحرقوا بيها تضامنا مع الذين خرجوا في السودان حتى تتعادل الكفة )؟

لسنا هنا للترطيب ، إنما لتحسين الحال والغالبية العظمى تحمل هموم أهلها ، تتخيل أنني أتنظر آخر الشهر بتشوق لا لكي أمتع أبنائي بل لكي أرسل مصروف شهري لوالدتي وأخواتي وإبني الذي هناك وبنتي التي تدرس بالجامعة ، وما بين هذا وذااك ، يمكن لي أن أمشي حال ابنائي بقراصة وويكا ناشفة ( ويين توربي ) كما يقول أهلي .

كثير منا يحمل جبال الهموم ، هم الوطن ، هم الناس الغلابا ، هم الأهل وهموم شخصية ولكل حسب ظروفه ، نسأل الله أن يسترنا ويحفظ الوطن والشباب من الشرور .

المغتربون والمهاجرون
جعلوا حياة كثير من اهل الداخل ممكنة وهذه حقيقة لا مراء فيها
وكما قال محجوب
الاغتراب يا ابونا ما طول الغياب
اهل الخارج
رسلو الدوا وشنطة العريس وهدوم المدرسة
وبنو الحيطة الواقعة
ودفعوا رسوم العملية
ورسلو مساهمتهم في عرس ود الجيران
ورسلو للمرة الوالدة هدوم المولود والبدره والصابون
و
و
كانوا خير سند لأهلهم ومعارفهم
تحية صاحب البوست وضيوفه

تحية...

يا السنجك يا خوي اختزالك للموضوع في نظرة المغترب الذاتية فيه اجحاف في حق طائفة تقتات الان احزان الواقع في الوطن العليل لا احزان البعد عن الديار والاهل والاحباب...تتفق معنا ان الانقاذ من بين خططها الماكرة ساهمت بل خططت لتفرغ السودان من كفاءاته واهل الراي فيه بل من يمثلون الطبقة الوسطي صاحبة الدور في الحراك والتغيير...هذا من ناحية

من ناحية اخري ظلت تحويلات المغتربين تمثل رافدا معينا للميزانية العامة حيث كان متوسط التحويلات تصل الي 400 مليون دولار تضاءلت الان الي 90 مليونا بفعل عشوئية النظام في التعامل مع هذه الفئة...زد علي ذلك تكلفة التعليم لابناءنا وما يرتبط بذلك من تهيئة للظروف انت ادري بها...

وبعد ذلك تضعنا في خانة السؤال عن العملة واسعارها كاننا لا نكتوي من نيران ارتفاعها والغلاء الطاحن في كل الانحاء...


كده برضو يا السنجك......لك الحب والاحترام....

وفي ناس حملة الجوازات الاجنبية ديل تنظيرهم اكتر

ربنا يحمي بلدنا من كله

تحية


هل حصول السوداني علي جواز اخر يعني انسلاخه من جلده وعدم احقيته في التعاطي مع هموم بلده او المشاركة في الراي نحو بنائه وتطوره ورفعته؟


اين التنظير وما هو كنهه؟


ليت التنظير يفيد في مواجهة واقعنا الشائك


لك الاحترام

الاخ هشام المجمر سلام

مثل هذه المواقف واجب فضحها ولابد من الوقوف عندها لانو نظام الانقاذ
عمل عليها باحترافية كبيرة جعل من المواطن همه فى نفسه ويمشي جنب
الحيط ويربي عياله وبس ويخلي ليهم البلد.


الاخوان

تراجي
ولياب
عبدالحفيظ
محمد الكامل

البوست ده بوست استنكاري لعبارات واراء فى بوست كنت فى السودان
بتطالب اي مغترب او سوداني حامل جواز آخر انو يا يطلع الشارع فى السودان
ويواجه الموت ولا يسكت ويقعد يربي فى اولاده وما يكون سبب فى قتل اولاد
الناس فى السودان بسبب كتابانه هنا او فى الاسفير عموما. ده كلام مؤسف
وكلام بدعم لنظام الانقاذ وللاسف دي سياسة الانقاذ عايزة المواطن السوداني
ينشغل بنفسه بس .

كنت في السودان ..