كنت في السودان ..

الأيام الفاتت كنت في زيارة سريعة للسودان من يوم الأربعاء ورجعت الليلة


من الشفتو بي عيني وسمعتو وصلت لي حقيقة واحدة:



العالم كلو منفعل بما يحدث داخل السودان
وغاضب للدماء التي سفكت والأرواح التي أزهقت
وناس الخرطوم في عالم آخر


كلامي محبط؟


أنا الإحباط والخلعة قربوا يكتلوني

حمد الله على السلامة.

تسلم وتعيش يا دينق
إزيك إنت ..

تسلم وتعيش يا دينق
إزيك إنت ..

بسبب ضيق الزمن وكثرة المشاوير صادف إنو معظم الوقت أنا في الشارع

يوم الجمعة الصلاة شغالة أنا طلعت
تحركت في منطقة جغرافية كبيرة نسبياً شملت جبرة والصحافات أركويت لغاية بري وإمتداد ناصر
هدوء مريب
بإستثناء الديم لأنو كان تقريباً محاصر بالعسكر

بحري الحاج يوسف والدروشاب هدوء مريب
قلب الخرطوم هدوء مريب


المدهش مش إنو ما في مواطنين

المدهش إنو مافي عساكر زاتو !!

حمد الله ع السلامة
جندوك ناس البتاع الالكتروني
جيتي تقولي هسي كنت هناك ومافي حاجة
بهزر يا تيسير والله بهظر

هههههههههه يا فقير


للأسف الشديد هسي كنت هناك وما في أي حاجة
قتل العشرات وإعتقال المئات شباب وشابات زي الورد وبرضو ما في حاجة


قدر ما حاولت أمسك خشمي دا عشان ما أخذَل الثورة غلبني


الإحباط يكتلني أنا براي؟


يا جماعة منتظرين شنو أكتر من الحصل وقاعد يحصل دا ؟؟؟

أول سؤال سألتو لي أخوي مرقت المظاهرات؟

قال لي طبعاً مرقت وكل البعرفهم مرقوا
عاينت ليهو بإستغراب


فهمني وقال لي طبعاً إنتي إلا يكتلوني حتى تصدقي إني مرقت !

سألت خالاتي مرقتوا المظاهرات

قالوا لي مرقنا
وناس الحلة كلهم مرقوا




طيب الحصل شنو ياخوانا؟




قربت أصدق إفتراض تراجي !

Quote: قدر ما حاولت أمسك خشمي دا عشان ما أخذَل الثورة غلبني

هي نان هو التخذيل دا كيفن
الشهداء ديل يا ربي من رابعة العدوية او كما
قال احمد محمود ابراهيم وزير الداخلية او اى كان
اسمه

يا تيسير حمدالله ع السلامة أولا و كيف لقيتي الحجاج إن شاء الله بخير

كيف ما حاصلة حاجة, الحاصل كبير وكتير يا أبو التا
الناس في الخرطوم شافو الوجه الحقيقي الكانوا بسمعوا بيه سمع للحكومة أول مرة وضاقوا الوجع في أولادهم وأقاربهم وجيرانهم
الموت السمبلا بقى قريب هنا في طرف الحلة ما هناك في آخر الدنيا
يا ابو التا اكيد لاحظتي لثورة الواتس أب و تبادل صور الشهداء و الجرحى و انتشارها و اهتمام حتى الحبوبات بيها
دي كلها عوامل سخط وزيادة غبن و تراكم حتما سيقود للغنفجار العظيم
الأهم من كدا, إنو الحكومة قتلت من أول يوم ووصلت رسالتها ورغم كدا الناس طلعت تاني وتالت ورابع وعارفين انو الحكومة ما عندها ليهن غير الرصاص ورغم كدا طلعوا و ح يطلعوا عارفة دا معناه شنو؟ قيسيه بس بمظاهرات يونيو الفات ويناير القبالو و قدّري المسارات و شكل الجاي ح يكون كيف

سلامات يا ود البشرى وكيف الوليدات

يا ود البشرى مشيتي الفاتت دي خلتني أقتنع إنو في ناس لسة صوتنا ما واصل ليهم


ما بتكلم عن الناس البتتداول فظائع وقذارات الإنقاذ عبر الملتيميديا


لا
بتكلم عن أكتر شريحة متضررة فعلياً من وجود الإنقاذ وما شاعرة بالخطر دا ودا الأنا بقولو

أنا قعدت مع ست شاي وإتكلمت مع أصحاب الركشات والأمجاد
وإتكلمت مع مرة بتغسل الهدوم
المحصلة أشعرتني بالذهول !!!!


ديل المحتاجين نوصل ليهم صوتنا
ودي حتكون مهمتي أنا وكل من يريد التغيير من هنا ولي قدام ..

يا جميعابي ..

إنتو دايرين الحق ولا ود عمو؟


الحقيقة الناصعة إنو الإنقاذ بقتل في شباب وشابات السودان بدم بارد


والحقيقة الأنصع إنو في ناس شايفة إنو (هم الغلطانين قالوا دايرين يقلبوا الحكومة)

أو كما قال لي سيد الركشة ..

حمدلله علي سلامتك






*بس كان مفروض تزور قبر المرحوم تعملوا الواجب .... علي الاقل......
لكين نقول شنو الحي أبقي من الميت برضو
أنشالله ما تشوفوا شرا
متعك ربي بالعافية

زهير العزيز ..

والله مشيتي كانت مفاجئة وغير مرتب لها نهائياً


مشيت لظرف وفاة عمي شقيق والدي
توفي يوم الأربعاء وأنا سافرت في نفس اليوم ..



لكن خيرها في غيرها ولكن العتبى ..

Quote: بتكلم عن أكتر شريحة متضررة فعلياً من وجود الإنقاذ وما شاعرة بالخطر دا ودا الأنا بقولو أنا قعدت مع ست شاي وإتكلمت مع أصحاب الركشات والأمجاد وإتكلمت مع مرة بتغسل الهدوم المحصلة أشعرتني بالذهول !!!! ديل المحتاجين نوصل ليهم صوتنا ودي حتكون مهمتي أنا وكل من يريد التغيير من هنا ولي قدام ..

ياتيسير

الثورة بتتحرك بالجد وبتنجح لما يتحرك ويموت من أجلها العندهم أملاك وبياكلوا الاسناك
الحناكيش واولاد المصارين البيض
والماجيعانين لكن علا عندهم الحس بالقهر والجوع حتى وكأنهم قهروا وجوعوا..

وعنك الثورة فى مصر
تحرك فيها شباب بعضهم أبناء وبنات آباؤهم نافذون فى الحزب الوطني.

سلام تيسير

حمداً لله على السلامة, وشكرا على عكس بعض الحقائق وهي مهمة في مسيرة أي ثورة أن يعي المستفيدون منها أبعاد ما تتعرض له الثورة وأهدافها واستحقاقات نجاحها,

طبيعي يا تيسير طبيعي أن تجدي الكثير مما لا يعي أن الأرض كروية وان الشمس تشرق من جهة الشرق وتغيب في جهة الغرب. هؤلاء الناس يتعرضون لحملات تجهيل وتغييب وتهميش مصروف عليها المليارات من أموالهم التي كان ينبغي أن تصرف على صحتهم وتعليمهم ومشاريعهم الزراعية والصناعية .. ورفاهيتهم ولكنها تصرف على تجهيلهم بالإعلام المرتشي هذا الإعلام الكاذب الضليل الذي أفاق من تصديقه وأثاره حتى بعض المؤسسين لتيار الإسلام السياسي الحاكم بالقوة

هذه الافادات مهمة لأنها تشرح حجم مسئوليتنا جميعاً في نشر الوعي ومساندة الوعي وتعميق الوعي ونظراً لإمكانياتنا المتواضعة ومحدودية انتشار المتاح لنا منها فالمسئولية أعظم .. هذا إذا أردنا لوطننا الانعتاق من أجندة المشروع التضليلي الذي بقي في السلطة 25 عاماً

أحمد الشايقي

بـدايـة أشـيد بمداخلة الأخ/ أحمـد الشايقي .. لأنه كلامه منطقي وموضوعي..


الأخـت تيســير أحسن الله عزاءكم ..
وحمد لله على سلامة العـودة..
الثوار لم يخرجوا لأن أحـداً حرضهم .. ولو كان الناس يخرجوا بالتحريض لكانوا خرجوا من أول سنين حكم الانقاذ.. خرجوا لأن المؤتمر الوطني لم يترك إساءة إلا وجهها لهم .. .. وجـميع من هم في الخارج الآن كانوا يوماً في الداخل ومعظمهم ذاق الاعتقال ومن لم يعتقل لحقه ما لحقه من أصناف العذاب النفسي والمادي بفضل التمييز والظلم والتعالي والفشل والقسوة والبطش .. سوف يخرج الناس شئنا أم أبينا.. بل سوف يخرج الناس شاءوا أم أبوا ... لسبب بسيط وهو أن المؤتمر الوطني لا يترك لهم أي فرصــة أخــرى غير الخروج في وجهه ومقاومته واقتلاعه من جذوره ..

Quote: طبيعي يا تيسير طبيعي أن تجدي الكثير مما لا يعي أن الأرض كروية وان الشمس تشرق من جهة الشرق وتغيب في جهة الغرب. هؤلاء الناس يتعرضون لحملات تجهيل وتغييب وتهميش مصروف عليها المليارات من أموالهم التي كان ينبغي أن تصرف على صحتهم وتعليمهم ومشاريعهم الزراعية والصناعية .. ورفاهيتهم ولكنها تصرف على تجهيلهم بالإعلام المرتشي هذا الإعلام الكاذب الضليل الذي أفاق من تصديقه وأثاره حتى بعض المؤسسين لتيار الإسلام السياسي الحاكم بالقوة هذه الافادات مهمة لأنها تشرح حجم مسئوليتنا جميعاً في نشر الوعي ومساندة الوعي وتعميق الوعي ونظراً لإمكانياتنا المتواضعة ومحدودية انتشار المتاح لنا منها فالمسئولية أعظم .. هذا إذا أردنا لوطننا الانعتاق من أجندة المشروع التضليلي الذي بقي في السلطة 25 عاماً

كلام موزون وعقلاني جداً يا مولانا الشايقي ..
والتجهيل وتغييب الوعي دا المعرضة برضو أسهمت فيهو بدون قصد

ما يحدث الآن أن هؤلاء المقهورين قد إهتزت ثقتهم في حاجة اسمها تغيير
عملاً بمبدأ الريس اللي تعرفو ولو كان قاتل وسارق !!

المعارضة في نظرهم هي الأحزاب الكبيرة اللي هي في الأساس شريكة في الحكومة و"مساعدة" لرئيسها
محتاجين نوصل ليهم
نقرب منهم
نوريهم إنو نحن برضو زاهدين فيما تسمى إفتراضاً أحزاب معارضة
وإنو يدينا برضو في الموية الحارة زيهم ..

تسلم كتير وكتر خيرك ..

Quote: يا جميعابي .. إنتو دايرين الحق ولا ود عمو؟ الحقيقة الناصعة إنو الإنقاذ بقتل في شباب وشابات السودان بدم بارد والحقيقة الأنصع إنو في ناس شايفة إنو (هم الغلطانين قالوا دايرين يقلبوا الحكومة) أو كما قال لي سيد الركشة ..

الله ينور عليك يا تيسير انت جيتي قلت انو كل الشوارع و البلد هادئة الا شوية
لكلكة في الديم انا سألتك قلتلك ال 200 و شوية شهيد ديل ماتوا وين.
نعم انا داير الحقيقة و متابعا ليك جنس متابعة لكن خلي بالك بوستك دا لا يخلو من غرض
انا متابع الثوار في الخرطوم و برا الخرطوم و لا داعي لايراد الاسماء كما فعل احدهم بالشيخ
احمد الطيب زين العابدين و وداهو في ستين داهية و الحمد لله اليوم فك اسره.
انا لا الومك دا رأيك لكن برضو نحن متابعين من جوة و من برا و حكاية انتو دايرين الحق و لا ود عمو
بتدي احساس انك مالكة ناصية الحق و لا مو كدي.
هذا مع تحياتي لسيد الركشة الحومك الخرطوم و امدرمان و بحري و تحياتي لك

تحية الاخت تيسير
من زمان وانا بحاول ادخل اقول زى كلامك دا لكن افكر الف مرة واقول يكون مخذل للناس
او اتهم بأنى من الجداد الالكترونى!!!

وانا اتصل بأهلى واصحابى فى السودان يقولوا لى مافى حاجة !!! شوية مظاهرات كدا وفرقوهم!!

طيب ياجماعة فى ناس ماتوا وحتات اتحرقت !! يقولوا الوضع هادى
والكلام البتقولوهو دا ما سمعنا بيهو !! والعاصمة فاضية والشوارع

ما فيها عربات حتى !

ياناس انتوا عايشين وين ؟؟ فى الخرطوم دى ولا بره؟

يردوا : نحن عايشين فى الخرطوم دى وبنمشى شغلنا وبنرجع عادى !!

حقيقية انا حتى الان ما قادر استوعب الحاصل . هل هو تضخيم للاحداث

ام لامبالاة الناس هناك .. ام تعتيم اعلامى فى الداخل.. ولااصلا الناس هناك مابتقرا

ولا بتسمع وتشاهد قنوات غبر السودانية ..

مش عارف ..

ربنا يرحمه و يغفر ليه ويتقبله في من عنده
أحسن الله عزاءكم يا تيسير وجبر كسركم
معليش ما سمعنا والله

احسن الله عزاؤكم و جبر الله كسركم
اختي تيسير

Quote: مشيت لظرف وفاة عمي شقيق والدي توفي يوم الأربعاء وأنا سافرت في نفس اليوم ..

البركه فيكم يا تيسير ...

و اكرم الله مثواه ... وانزله منزل الصديقين و الشهداء

انا لله و انا اليه راجعون ...

Quote: الثورة بتتحرك بالجد وبتنجح لما يتحرك ويموت من أجلها العندهم أملاك وبياكلوا الاسناك الحناكيش واولاد المصارين البيض والماجيعانين لكن علا عندهم الحس بالقهر والجوع حتى وكأنهم قهروا وجوعوا.. وعنك الثورة فى مصر تحرك فيها شباب بعضهم أبناء وبنات آباؤهم نافذون فى الحزب الوطني.

يا د. بلة ..

التظاهرات الأخيرة دي إتحرك فيها ومات من أجلها منو؟ مش أولاد المصارين البيض؟
والماجيعانين لكن علا عندهم الحس بالقهر والجوع حتى وكأنهم قهروا وجوعوا؟

الشهيد صلاح سنهوري وبقية الشهداء الأبرار
وكافة المعتقلات والمعتقلين الأبطال
أنا متأكدة إنو ظروف أغلبهم أفضل بكتير من ظروف كثير من الصامتين
مرقوا لإبمانهم بقضية ومبدأ وماتوا واعتقلوا في سبيل كدا

طيب وين المشكلة؟

المشكلة يا دكتور إنو لغاية الآن في بعض الناس (من الجياع والمقهورين ديل زاتم)
شايفين إنو مروق الشباب ديل عبارة عن صراع بينهم وبين الحكومة لا يعنيهم هم - أي الجياع - في شيء
الحكومة ضربتهم بالرصاص عشان مرقوا ضد زيادة الأسعار مش عشان مرقوا ضد الإبادة والحروب الحاصلة في باقي السودان

المشكلة إنو الناس قايلة السودان دا ياهو خرتوم بس


أو كما قالت !

Quote: مشيت لظرف وفاة عمي شقيق والدي توفي يوم الأربعاء وأنا سافرت في نفس اليوم ..

غفرالله له وادخله فسيح جناته خالص العزاء

الحبيبه تايسا

الف حمد علي سلامتك

Quote: مشيت لظرف وفاة عمي شقيق والدي توفي يوم الأربعاء وأنا سافرت في نفس اليوم ..

والبركه فيكم يا غاليه وتعازيه لوالدك الحبيب عووووضه في اخيه ربنا يصبرك يا اخوي.

Quote: قربت أصدق إفتراض تراجي !

هههههههه افتراض تراجي ما شايفه نتيجته في عمك الميرغني بالله جروا ليه بخرتين بس عمك عمل حمد لبد.

تايسا مشوارنا طويل

الا ما يدعوا للبشاره انه مافي (فكي) بيقدر يخلي الام تنسي ابنها ولا الخطيبه خطيبها ولا الشقيقه شقيقها ولا الابنه ابيها ولا الزوجه زوجها.....
لقد فعلوا الافاعيل بساساتنا ولكن شعبنا المحروق الحشي ده حيدور ومافي سحر بيسكته.


اجيك لحاجه مهمه جدا
الناس الغبش المفروض يكونوا في الصفوف الاماميه وغايبين
اها في دي انا معاك وعارفه كيف نصلهم بس ايدي في ايديك وحنشتغل معا.

وما تحزني

في مصر فعلا بدأت بابناء الذوات ناس الجامعه الامريكيه
بس الغبش لما دخلوا المولد الثوري ثاني ما في زول قدر عليهم.

ويا امريكا لمي جدلدك حنقولها نحن قريب للغربين البيتفرجوا فينا.

Quote: والحقيقة الأنصع إنو في ناس شايفة إنو (هم الغلطانين قالوا دايرين يقلبوا الحكومة) أو كما قال لي سيد الركشة ..

حمد الله على السلامة

سيد الرقشة ما مقتنع بي كلامه ياتيسير خايفك تكوني من اياهم ايمانا منه بحقيقة اترسخت في ذهن كل البسطاء انه تحت اي حجر يوجد ###### امن مصاص دماء قابع............

المعارضة نايمة ليه الناس الغلابة ما تنوم

لكن بصراحة المرة دي الإحتجاجات كانت قوية والفقد كبير وبشوية قيادة وريادة وتنظيم ممكن تحدث التغيير

قادة الأحزاب عايزنها وجبة جاهزة ما عايزين يساعدوا في الطبيخ منتظرين الأكلة في الصالون ليأكلوا ما لذ وطاب من اللحم الغلاد ويتركوا للطباخين الفتات

يا ولد أمشي الشارع جيب ثورة

يا ولد جيب الإبريق لعمّك الصادق دا يغسل يدو وعمّك الترابي عايز صحن "سلطة" تاني

.............

الولد يجيب ثورة من الشارع

يا ولد هات الثورة دي هنا إنتا قايلها لعب

يلا أمشي شوف لعبك!!!

يمشي الولد يلعب ويخلي الكبار يتصارعوا

ولدك دا ما جاب الثورة دي براه ولدنا برضو كان معاه

الصادق: أنا عندي ليكم حل من عشر نقاط النقطة فيها خمستاشر بند كل بند فيه 20 محور .....

الترابي: أنا عايز صحن "سلطة" تاني

يا الترابي قلنا ليك مية مرّة أسمها سلطة بالفتحات

حمد الله على السلامة يا تيسير...
دا كللام شنو دا؟
طيب وصور المظآهرآت دى بجيبوها من وين؟

شكراً.

اولا تيسير البركة فيكم واحسن الله عزائكم .

كتب صلاح حبيب

Quote: تحية الاخت تيسير من زمان وانا بحاول ادخل اقول زى كلامك دا لكن افكر الف مرة واقول يكون مخذل للناس او اتهم بأنى من الجداد الالكترونى!!! وانا اتصل بأهلى واصحابى فى السودان يقولوا لى مافى حاجة !!! شوية مظاهرات كدا وفرقوهم!! طيب ياجماعة فى ناس ماتوا وحتات اتحرقت !! يقولوا الوضع هادى والكلام البتقولوهو دا ما سمعنا بيهو !! والعاصمة فاضية والشوارع ما فيها عربات حتى ! ياناس انتوا عايشين وين ؟؟ فى الخرطوم دى ولا بره؟ يردوا : نحن عايشين فى الخرطوم دى وبنمشى شغلنا وبنرجع عادى !! حقيقية انا حتى الان ما قادر استوعب الحاصل . هل هو تضخيم للاحداث ام لامبالاة الناس هناك .. ام تعتيم اعلامى فى الداخل.. ولااصلا الناس هناك مابتقرا ولا بتسمع وتشاهد قنوات غبر السودانية .. مش عارف ..

في هذه الحالة مفروض كل اسرتي تمشي تتعالج في مصحة نفسية لانو بن خالي وهو طالب في الصف الثامن من مرحلة الاساس اصيب بطلق ناري في الصدر
ودخل في غيبوبة عشرة ايام ويا دوب طلع من الغيبوبة امس . ده الكلام القالتو لي امي امس مع اتصال بيها ومع اتصال بخالي وزوجته . يا ربي يكون الضربو منو ؟
ولا زي ما قلته في البداية مفروض يمشو يتعالجو من ( الوهم ) الهم فيهو ده ويبطلو كضب علينا كلهم .
يا هم مجانين يا انا مجنون والمكشلة الولد الفي المستشفى ده يكون ما مضروب زاتو ويكونو ناس بيتنا ديل بمثلو علينا يا رب ولا شنو ؟؟
غايتو الشئ العارفو في زول (مجنون ) في النص بس هو منو ما عارف؟؟؟؟
شككتونا في اهلنا زاتو .

يجب تثبيت هذا البوست؛ فتغيير الواقع يبدأ بتصديق الواقع!

ياتيسير البركة فيكم واحسن الله عزاءكم والعزاء موصول للاستاذ عثمان عووضة






__________________


يابكري
البوست دا مخالف لاخر مادة في لوائح البورد


ارجو خذفة تطبيقا للائحة الثورية

الذي حدث ان القهر للمظاهرات من جانب الحكومة كان صادما ومذهلا،عسكرت الحكومة المدينة وحولتها لساحة حرب ضروس،شباب عزل اول تماس لهم مع الموت،واين سالت الدماء،ايعقل ان تكون سالت في الخيال،الوطن باغلبه انتفض،ولو جمعت هذه المظاهرات المفرقة في ساحة واحدة كما حدث في ميادين اخري في الدنيا لبان العجب.
خرج الناس ،في اغلبهم،مسالمين،فقمعوا بوحشية،وتصيدوا الالاف بالاعتقال،هم لم يستاذنو احدا،وليس لاحد سلطة عليهم،والان في كل بيت وكل حي وكل سوق غضب خرافي وقهر مكتوم،.
حسنا ما يحدث الان ،اليقين الكامل،بان هذا النظام،شقيق الفشل،ولا محالة زائل,,

ياخ ده أسهل سؤال وأسهل إجابة ..
إنتي طلعتي مظاهرات لمن كنتي هناك؟ ولا إكتفيتي بالفرجة والإستمتاع والإندهاش بالشوارع الفاضية والإنتظار حتى العودة لفتح بوست !!!؟؟؟

Quote: يا ود البشرى مشيتي الفاتت دي خلتني أقتنع إنو في ناس لسة صوتنا ما واصل ليهم

الحتة دي وجعتني شدييييييد والله ..
شديييييد ..
وأكدت نظريتي في إنو أييي أم مكلومة وموجوعة مفروض ترفع يدينا فوووق لي رب السما وتدعي على أيييي زول بيكتب في الإنترنت وما بينزل الشارع إنو ربنا يوريهو في جناهو أو أخوهو أو أبوهو
فقط فقط تستثني في دعاها ده أييي زول بيكتب في الإنترنت وبينزل الشارع زيو زي أخوانو ..أو الزول الما بيكتب وماشي جمب الحيط ..
ما عارف الناس دي قلبها من شنو وبتقدر تنوم كيف بالليل لمن تعرف إنو بي سبب الكتبتو ده في شباب زي الورد مات ..وهم عايشين يصحو بكرة عااادي زي الما حصل شي يختو كباية الشاي ويولعو السيجارة ويجرو الكرسي ويرجعو يكتبوا ويهموا روحهم إنو هم دورهم التعبئة وقايمين بي دور خفي ..
زمان لمن كنا في الجامعة وفي قمة الحماس لحضور أركان النقاش كان بيجو الكبارات من المتحدثين ويحمسو الأولاد البرالمة بي الهتافات والكولينق ..ومااا أن تحصل الكعة ويجو ناس الإحتياطي المركزي يختفي جميييع الكبارات ديل ويتقبضو الأولاد والبنات المساكين ديل والخراطيش تقطع ضهرهم وتتعاود الكرة بعد كم يوم تااني ويظهروا الجبناء من جديد تحت غطاء ده دورنا ..التعبئة التعبئة التعبئة ..
ياخ ربنا يرحم أيييي زول مات في المظاهرات دي ..ربنا يرحمكم ياخ ..وربنا يجعل الجنة مثواكم ..إنتو ما بتستاهلونا ولااا نحن بنستاهلكم ..وأي زول غيركم ######## ######## جبااان ..

عليييكم الله الخلقكم وقفو التحريض وخلّو الأسر تستمتع بي أولاد التعبت فيهم وربتهم ..
عليييكم الله وقفوا كتابة عن المظاهرات لو ما فيكم راجل أو مرا قاعد أو قاعدة تطلع في المظاهرات وتكون في الصفوف القدامية ..
خلّوهم يعيشو عيشة الذل والهوان بس الواحد فيهم أمو تشمو الصباح وتسالموا وتقالدو بدل ما يموت ليها وقلبها يتحرق وإنتو تكتفوا بي الإحتفاء بالتصاوير والشعارات والكلام السمح في سيرته هو يموت وأمو تتعذب وإنتو بعد تكتبو السطرين ديل تمشو تتونسو وتضحكو عااادي..
عليييكم الله كان ما بتطلعو مع الناس ديل عليييكم الله ما تكتبو حاجة ولا تحرضو زول ..
ياخ ربنا يرحمكم يا الناس الما بتستاهلوا الموت ..

يا ود الفاروق الناس الطلعت يوم تلاتة وعشرين ديل حرضهم عمر البشير بخطابه المستفز اليوم القبله و قتل الامل في تاجيل او الغاء موضوع رفع الدعم وزاد الطين بلة بحديثه الورى انو الاقتصاد منهار وما في اي حلول عنده غير الزيادات
الناس ديل مرقو مرقة تلقاءية نتيجة غضب و غبن متراكم وزاد عليه احباط وفقدان امل في اصلاح الحال، الثورة دي ما كانت - او ما بدت- ثورة اسافير ولا ليها علاقة بتحريض انترنت ودا الخلى الجكومة تقابلها بعنف مبالغ فيه ودا التحريض التاني يا عمر الناس المرقت تاني وتالت يوم ولا زالت بتمرق وح تمرق موضعها بقى التار
يعني المحرض الحقيقي للاحداث دي هو الحكومة بفشلها ورعونتها و طغيانها
من ناحية تانية حتى لو كان لكتابة الانترنت ذلك التأثير الفعال الذي يقود لخروج الشباب للمطالبة بحقوقهم ويؤدي هذا الخروج لموتهم فمن باب أولى توجيه اللوم للقاتل في المقام الأول حتى يجي دور الكيبورداب ديل

Quote: عليييكم الله الخلقكم وقفو التحريض وخلّو الأسر تستمتع بي أولاد التعبت فيهم وربتهم .. عليييكم الله وقفوا كتابة عن المظاهرات لو ما فيكم راجل أو مرا قاعد أو قاعدة تطلع في المظاهرات وتكون في الصفوف القدامية .. خلّوهم يعيشو عيشة الذل والهوان بس الواحد فيهم أمو تشمو الصباح وتسالموا وتقالدو بدل ما يموت ليها وقلبها يتحرق وإنتو تكتفوا بي الإحتفاء بالتصاوير والشعارات والكلام السمح في سيرته هو يموت وأمو تتعذب وإنتو بعد تكتبو السطرين ديل تمشو تتونسو وتضحكو عااادي.. عليييكم الله كان ما بتطلعو مع الناس ديل عليييكم الله ما تكتبو حاجة ولا تحرضو زول ..

This is just bullsh*t

Sorry for your loss Tayseer

حمدا لله علي السلامة
والبركة فيكم ...
بالجد الخرطوم حيرتنا وحيرت الحيرة زاتا

البركة فيكم يا تيسير واحسن الله عزاكم وصبركم على الفقد..


كون انك كنتي في السودان وبتحكي واقع مشاهدتك فالاحتمالات حسب قرايتي ستكون في :

1/ انك مُحبِطة للثورة في دنيا الاسافيـر ممن لا يريد كلمة انا هسسسع هناك..
2/ شاهد عدل من قلب المعارضة يفرح له الكيزان بعد يختفوا سطح الكلام دون قراءة الشهادة باستيعاب..
3/ فرحة قد تواسي قلوب المرهفين المتأثرين بقتل الشباب ومن يتصايحو بانه في تخريب وهدر لدماء الشباب دون مساهمة مجدية ممن يتصايحون باسم التعبيئة..
4/ ياتي احد المتحمسين عشان يتحاتت معاك في انه " كانت " في مظاهرات وثورة وناس قُتلوا ..ولايقتنع بانك عارفة وفاهمة لكنك بتقولي حسب مشاهدتك في يوم محدد مافي..
5/ قد ياتي احدهم ليقول لك ولماذا تحدثين الناس بما تريه وتشاهديه تكلمي بالتسمعيهو وتقريهو بس..

اهم شئ انك ما تمرقي غواصة ضد النضال الاسفيري ويبقي خيــر وبركة وفرحة شديدة ليك تكرمي ليها

تايسا

البركة فيكم ان شاء الله ربنا يرحمه ويحسن اليه ان شاء الله

اما فيما يخص الموضوع ذكرني المثل البيقول

اضان الحامل طرشة او الهدؤ الذي يسبق العاصفة

تحياتي

زاتوووو

_____________________

حقو البداية بتاعتك تعرفي الناس انك ميل ولا فيميل والتغيير قادم

يا تيسير أولاً البركة فيكم

وربنا يرحم عمك ويجعل الجنة مثواه

نجي للموضوع:

يا تيسير المظاهرات دي ما حتكون شغالة 24 ساعة طبعاً

لكن من ناحية كان في مظاهرات دي أخبار مؤكدة

بل كانت هبة جماهيرية شرسة وكبيرة

وجوبهت تلك الهبة برصاص قوات النظام وقتل من قتل وجرح من جرح

والمستشفيات تحكي ما حصل

والصور الحية المنقولة عبر كثير من القنوات الفضائية

وهلع أنصار النظام البائن بينونة كبرى وفي بعض الأحيان كان بالثكلي و ووب حي

كل هذا واقع

وإلى يوم البارح القريب دا كانت مظاهرات في جامعة الخرطوم

والمظاهرات ما جتنتهي لو خمدت يوم أو يومين

لأنها حتجي بوهج جديد وروح جديدة

__________________

غايتو يا تيسير بوستيك دا ما كان في داعي ليهو كان تخلي مكمود في قلبك !

Quote: سلام تيسير حمداً لله على السلامة, وشكرا على عكس بعض الحقائق وهي مهمة في مسيرة أي ثورة أن يعي المستفيدون منها أبعاد ما تتعرض له الثورة وأهدافها واستحقاقات نجاحها, طبيعي يا تيسير طبيعي أن تجدي الكثير مما لا يعي أن الأرض كروية وان الشمس تشرق من جهة الشرق وتغيب في جهة الغرب. هؤلاء الناس يتعرضون لحملات تجهيل وتغييب وتهميش مصروف عليها المليارات من أموالهم التي كان ينبغي أن تصرف على صحتهم وتعليمهم ومشاريعهم الزراعية والصناعية .. ورفاهيتهم ولكنها تصرف على تجهيلهم بالإعلام المرتشي هذا الإعلام الكاذب الضليل الذي أفاق من تصديقه وأثاره حتى بعض المؤسسين لتيار الإسلام السياسي الحاكم بالقوة هذه الافادات مهمة لأنها تشرح حجم مسئوليتنا جميعاً في نشر الوعي ومساندة الوعي وتعميق الوعي ونظراً لإمكانياتنا المتواضعة ومحدودية انتشار المتاح لنا منها فالمسئولية أعظم .. هذا إذا أردنا لوطننا الانعتاق من أجندة المشروع التضليلي الذي بقي في السلطة 25 عاماً

شكرا أستاذ الشايقي
لا أرى في كلام تيسير أي نوع من التخذيل بالعكس فيه تنبيهات مهمة لضمان نجاح الثورة
وتغبيش الوعي شغال ليه ربع قرن أكيد حقق نتائج على الأرض
التخذيل الحقيقي أتى من قيادات البلد وكباراتها ومنظماتها المدنية وتنصلهم عن دورهم
في قيادة هذه الاحتجاجات ذي ما يوحي كلام الأستاذ / عمر الفاروق
هناك نجاحات كثيرة حققها المتظاهرون وستزيد هذه النجاحات وستكبر
لتقودنا للتغيير المنشود إذا تضافرت كل الجهود

تيسير البركة فيكم
وربنا يتقبله قبول حسن

يا جماعة الشغلانة فرق زمن ... تيسير مشت بعد اسبوع تمام من اندلاع الثورة

الثورة دي في حقيقتها استمرت 4 يوم ... ويومين تاني في ميدان بري

الباقي ده كله ونسة بتاعة اعلام ولواكة لتقارير قديمة او تصوير مظاهرات صغيرة على انها كبيرة


والكلام ده كان متوقع بسبب القمع الحصل ،
الناس الجوه سوت قدرتها
بعد ما تجوع تاني ، حا تمرق تاني مجبورة

في ملاحظة مهمة المظاهرات دي اشعلتها الثانويات .. وديل تم تحيدهم من اول يوم باغلاق المدارس حتى 20 اكتوبر
متوقع انو وكت ينزلوا يحصل شي .. لكن ما حا يكون كبير

الحا يكون كبير بعد ما العيد يمكل القروش المع الناس ويغلبهم يتموا الشهر .. بمرقوا براااااهم
لو ما قطر لحقت النظام بكم مليار .. اطال المدة


البركة فيكم تاني

يا عمر اتديت الاسافير اكثر من الذي تستحقه

والله السافير دي ما عندها في الثورة دي مليم احمر .. هي ذاتها اتفاجاءت بيها ...

لكن طبعا ركيبي الثورات عاوز يعملوا انو للاسافير دور في هذا

الناس دي مرقها الجوع يا عمرا اولا
ثم استفزاز الحكومة وخطابها الحقار


تحية كبيرة لاهل الداخل اصحاب الوجعة الحقيقية
ثوروا وكت ما تهف ليكم واقيفوا وكت ما تهف ليكم .. في زول طالبكم قروش

أحسن الله عزاكم يا تيسير .. وحمد لله على السلامة

يا وليد والعوض تيسير عرفناها مشت السودان وجات قالت كلامها دا بدون خوف من ردود الأفعال

أنتو القاعدين جوا السودان كلامكم دا ما قلتوه من زمان مالكم؟

خايفين؟

ولا منتظرين لما يجوكم ناس برا ويدوكم الإذن؟؟

حاجة تحير

احسن الله عزاكم ياتيسير
وتاني ما تمشى السودان في مثل تلك الايام .

الاخت العزيزه \ تيسير

حمد الله علي السلامة , والبركة فيكم في عمك .

في البداية اقدم ليك اعتذاراتي الخجولة والله يا تيسير حصل خطأ كتبت لي عنوان موضوع وفي نفس اللحظة رديت عليك

والله ما قاصدة فوجئيت باعنواني في البوست معذرة معذرة يا حبيبة .

تايسا ياخ البركة فيكم وأحسن الله عزاءكم وربنا يصبركم في فقدكم الأليم.
وحمداً لله على السلامة.



_____________________
على فكرة بتاع الركشة داك جداد ترانسبورتي

احسن الله عزاكم ياتيسير
وتاني ما تمشى السودان في مثل تلك الايام .

أحسن الله عزاءكم يا تيسير ..

تحية طيبة


الواقع هناك ليس كما نأمل

فنحن نكثر من الاحلام احياناً


اشياء كثيرة تحدث وتحدد حركة البعض

فالناس هناك لا ينتظرون ثورة فقط

فلديهم صغار في المدارس واسر في المنازل بحاجة الى كيسين عيش يومياً
(اذا ما جاء ضيف جهجه ميزانية الشهر)

وعليهم الايفاء بهذه الالتزامات ومن ثم المساهمة في انجاز ثورة طالما احبطها لهم

السياسين وباعوهم في منصات الاتفاقيات بثمن بخس مناصب وهمية....

ورغم ذلك يقومون بعمل كبير يشكرون عليه


كنت متحمس وفي حالة صدمة في بداية دخولي الخرطوم (زائراً وليس غازياً)


ولكن

ايقنت أن الثورة تنمو داخل كل مواطن

في حافلة ركاب والجميع ينظر الى اللا شئ والحافلة امام الساحة الخضراء

قلت لجاري (منافقاً نفسي ) وقاصداً أن يسمعني الجميع (ربنا يخلي البشير اهو جيه البلد كويس )

هذه الجملة جعلت من الحافلة مركز للهجمات على شخصي

ديل حرامية انعل ابو الحكومة ديل فقرونا ياخ ديل جوعونا

الجميع يصب غضبه فقط لمجرد سماعهم جملة تستحسن الحكومة

انت لو ما مرتاح ومستفيد من الحكومة ما بتقول كده ...

المهم رغم السب واللعان الذي وصلني الا انني كنت فرحاً بأن هذا الشعب مازال بخير

ومازال الكثيرون يرفضون الظلم (تكرر المشهد وكنت انال حظي من اللعان ومن ثم العن مع اللاعنين)

وعند مغادرتي الخرطوم تحديداً في صالة السلامة اتصل صديقي

ليخبرني مازحاً (والله انت عارض مرقت بي هنا الثورة قامت)

وما يحدث الان لن يتوقف اقول هذا من خلال ما شاهدته وعشته لمدة خمسة واربعون يوماً
متجولاً بين عدة ولايات

مايحدث لن يتوقف مالم يجلس البشير خلف القضبان ليحاسب على كل جرم ارتكبه




العزيزة / تيسير تحياتي ..وعوداً حميداً




و


الثورة مستمرة

تقبلي صادق العزاء أختي تيسير ،

تتسم المرحلة الأولى ( المبكرة ) للثورة بحقيقتين

- اتساع الشعور بضرورة زوال هذا النظام، و تحوله إلى ( رغبة ) أكيدة، رغبة أكيدة تمثل المدخل لأبسط درجات الوعي السياسي

- بالضرورة و على مدى المرحلة الأولى للثورة : تتعايش هذه الرغبة الأكيدة في زوال النظام الحاكم، تتعايش جنبا إلى جنب، مع حالة واسعة للسلبية و عدم القدرة على
الفعل المنظم ( هكذا كانت الثورة في فرنسا، و روسيا، و مصر )

الأغلبية الساحقة مع ضرورة زوال هذا النظام : هذا هو المهم، هذا هو الأساس الذي يقوم عليه العمل الثوري المنظم

شعوري : ان الثورة السودانية عندما تبدآ بالفعل، ستنطلق سريعا، و ستقطع مراحلها بأسرع مما نتصور ..

هنالك أسئلة، و قضايا نظرية و عملية كشفت عنها هبة سبتمبر و بسالات شباب السودان
لن تتوقف المقاومة و الاحتجاجات : لانها امتداد لتراكم، و لانها ناتجة من أزمة لا فكاك منها، و لان الخبرة السياسية
و الحركة السياسية في السودان تختلف عن زمبابوي

المجرم / اللص / الإقطاعي - الرأسمالي موجابي، أوصل شعبه لازمة اقتصادية أسواء من السودان، و مع ذلك لم يتحرك ضده الشارع
لان زمبابوي هي مسرح ال One man show

البركة فيكم يا تيسير في وفاة عمك يرحمه الله. بلغي تعازينا لوالدك عثمان شيخ عوض .(عووضة)ووافيني لو أمكن بهاتفه عبر الايميل، على أيام دراستنا بحنتوب
والجامعة كان والدك يحدثنا عن شقيقه الأكبر عبدالقادر الذي لم نره أتمنى ألا يكون هو المتوفي .

نعم موجة التظاهرات همدت منذ أيام .القمع كان شديداً.
لكن هذا لا ينفي صعودها من جديد.الثورات لايمكن التنبؤ بها بمسطرة.لكن مسبباتها كامنة ويمكن أن تنفجر من جديد لأي باعث.
المهم أنها ضعضعت النظام. وأكسبت الشعب المزيد من الثقة والشجاعة.يمكنك أن تحديثنا عن مشاعر الناس من ذوي النشاط السياسي.الثورات لايقوم بها من ذكرت ست الشاي
،عاملة الغسيل المنزلية ،صاحب الركشة.اغلب هؤلاء في بيات سياسي لغياب الوعيأو بسبب تغليب هم القوت اليومي على الهم العام .

Quote: خايفين؟ ولا منتظرين لما يجوكم ناس برا ويدوكم الإذن؟؟

القال ليك منو انا قاعد جوه السودان ؟

ده نمرة واحد
نمرة اتنين انت ما نزيه يا فرانكلي

قبل ما يسقط شهدا او بوست كتبته قلت فيه نفس الكلام الكتبته في مداخلة تيسر ده بالنص ( اجمل ما فيها ايقاعها السودان .. وان ليس لها سيد )
تاني بوست عن فتحتو كان الموضوع ده تحديدا الشفقة ... علا هسع ولا سيبك

لكن نقول شنو .. الغرض مرض يا فرانكلي

ود البشرى ..
تنظير ما عايزين ..
إجازتك بتين يا حبوب؟؟
أول ما تنزل أطلع مظاهرات وفش غبينتك من إستفزاز الحكومة وخطابها ليك..
إتظاهر وكورك وعبر عن سخطك من الجوع اللحق بي أهلك ..
ح تكبر في نظري وفي نظر روحك دي..
لو ح تقعد تملانا فقر وتملا روحك بي عبارات رنانة فإنت مثلهم ومن الليلة ما زولي ..
انا كرهت الناس ديل كره ما عادي ..
وربنا ينتقم من أييي زول حرّض الناس تمرق وقعد في بيتهم ..
وأعظم به من زول سكت ساي ومسك خشمو عليهو حتى وإن وصف بال######## ..
والفخر كل الفخر والمجد كل المجد للزول الراجل وللبت المرا البت أبوها المرقت وهي مقتنعة وواجهت الموت أو واجه الموت عشان هو فعلاً حاسي بالظلم ..

معقولة تيسير عايزة الناس يتظاهروا ويطلعو الشوارع وهي تقوم تأدي فروضها الإجتماعية سواء فرح أو كره ؟؟
معقولة نحن شعب أناني للدرجة دي؟؟
تيسير لو قالت نزلت الشارع وأحبطت لأني لقيت روحي براااي فقمت جيت راجعة كنت ح أضمها للناس العايزة فعلاً تعمل حاجة ..
لكن تكون راكبة في الأمجاد وماشة مشاويرها الخاااصة وبعد داك تجي تقول محبطة ؟؟؟
ياخ دي أنانية ما بعدها أنانية ..
وده ظلم أكعب من ظلم الكيزان ديل..
عايزين تستمتعوا على أكتاف الناس التانيين ؟؟
انا واحد من الناس والزيي كتااار أوول ما سمعت بي الاحداث دي ضربت البيت ومنعتهم يطلعوا مشاوريهم عشان ما يتأذوا لأني خايف عليهم ..مش منعتهم ما يطلعوا مظاهرات لالالا منعتهم يطلعو مشاوريهم الخاااصة فييي روحا ..مظاهرات دي أمر مفروغ منو ما بخليهم يطلعوها لأني ما مستعد أضحي بي فرد من أفراد أسرتي عشان حضرة سيادة ناس الانترنت يجو يبرمجو بينا وينظروا فينا ..
وكلللكم الهنا ديل انا متأكد 90% منكم كانوا بيعملوا كده ..
عارف انا محترم ومحترم جدددا بت هنا فييي منبرنا ده بي الف راجل مننا إسمها ريهان الريح ..
البت دي قول وفعل ..
مرتاااحة ومرطططبة ومااا ظنيتا محتاجة ولااا القرارات دي جووعتا لكن في أييي تظاهرة بتمرق ..
بتتقبض ..
بتتدق وتمرق تاااني تتظاهر..
ريهان دي المفروض تجي تكتب هنا براااها ما أيييي زول تاني غيرا ..
ريهان دي وأخوانها وأخواتها من الناس البيطلعو بيان بالعمل هم اللي يجو يتحسروا ويكتبوا محبطين ..
أييي زول غيرهم يساعدنا بالسكات والموية الباردة ..

تغمّده الله بواسع رحمته .. وألهمكم الصبر وحسن العزاء ...





ـــــــــ
ولماذا لم يستشهد تيسير عووضة ؟

الطريقة سهلة جداً وهي:-
الخروج إلى الشارع والهتاف بسقوط النظام ...


ـــــــــ

اجازتي كان ربنا هون في اخر عشرة الفينا دا ياعمر وما اكذب عليك كان ما لقيت مظاهرات ما بمرق براي لكن لو في ما بقصر :)
المهم، انت يا عمر المشكلة انك شايف النت و الفيس بوك هم المحركين المظاهرات و محرضين عليها وبتلوم الناس على كدا في حين الكلام دا غلط بالحيل
تفتكر اغلب الناس المرقوا و اللسة بمرقوا فاضين يخشوا انت يقروا بوستات وكلام زي دا، في حين اي حلة تقريبا فيها صيوان او اتنين، و غلاء المواصلات و قفة الملاح بمس اي زول يوميا خليك من العلاج و اللبس واسي جاي خروف العيد تفتكر تحريض تاني اكتر من كدا شنو
وتاني بقول ليك عدم احترامك للناس البتحرش و تنظر وعايزة تتاجر بالموت لاجل كليكات او مارب اخرى وهي امنة على نفسها واولادها، في محله ما قلنا شيء لكن ستيل هناك قاتل ومجرم حقيقي هو الاتاح فرصة المتاجرة دي ليهم و القاتل دا اولى باضعاف عدم احترامك ولومك الوجهته للاخرين

كانت فى مظاهرات متفرقة فى احياء محدده ..

يعنى عادى الواحد ممكن يلف فى عشرة احياء يلقى الناس نايمة قايمة ماكله متونسه
وممكن يمشى احياء تانية يلقى صيوانات العزاء والخطب والناس مغبونه ومقتول منها اولادها


ليه لانها مظاهرات متفرقه ...

امكن الاخت تيسير كانت متوقعه انها ثورة زى ما شافت فى التلفزيونات فى مصر وتونس وغيرها وزى ما اعلامنا الافتراضى اظن انه كمان اداها كوزين مويه
ونفس الامر ده حصل قبل كده

تبدأ مظاهرات متفرقة فى احياء او مدن متفرقة
يسيطر عليها الامن والشرطه
نتمنى نحنا انها تكون ثورة
ومن خلال امانينا نفترضها ونكتبها ونغنيها
ونصدقها
نتفاجأ تماما كما تفاجات تيسير .. انو الحصل اقل من الاتمنيناهو
انتهت المظاهرات فى الخرطوم وبعض المدن
وتحمس السودانيون فى الخارج قبل انتهائها
لتنتهى فى الداخل وتتحول الى تظاهرات فى الخارج
ثم تنتهى التظاهرات فى الخارج
ونعود نسألأ انفسنا .. هو الحصل شنو ؟
والشعب مالو ما استمر فى الثورة


وما هو حجم الصدمة او الفاجعة .. التى من الممكن ان تبقي الشعب السوداني فى الشارع ؟

.

Quote: انا واحد من الناس والزيي كتااار أوول ما سمعت بي الاحداث دي ضربت البيت ومنعتهم يطلعوا مشاوريهم عشان ما يتأذوا لأني خايف عليهم ..مش منعتهم ما يطلعوا مظاهرات لالالا منعتهم يطلعو مشاوريهم الخاااصة فييي روحا ..مظاهرات دي أمر مفروغ منو ما بخليهم يطلعوها لأني ما مستعد أضحي بي فرد من أفراد أسرتي عشان حضرة سيادة ناس الانترنت يجو يبرمجو بينا وينظروا فينا ..

يعني إنت موقفك ده، عشان حضرة ناس الانترنت؟!!
ياخ الحق أولى ان يتبع، إذا كان في خروج أهلك خير لهم ولكرامتهم وحقوقهم وحقوق وطنهم فلماذا تمنعهم من هذه المشاركة،
والحق يقول: (يَا أَيُّهَا الَّذِينَ آمَنُواْ كُونُواْ قَوَّامِينَ لِلّهِ شُهَدَاء بِالْقِسْطِ وَلاَ يَجْرِمَنَّكُمْ شَنَآنُ قَوْمٍ عَلَى أَلاَّ تَعْدِلُواْ اعْدِلُواْ هُوَ أَقْرَبُ لِلتَّقْوَى وَاتَّقُواْ اللّهَ إِنَّ اللّهَ خَبِيرٌ بِمَا تَعْمَلُونَ ) المائدة آية(8)
أما إذا كنت ترى أنه لاداعي لمناهضة هذا النظام، فقلها!


.

ود البشرى :
انا على قناعة تااامة إنو الإنترنت خصووصا سودانيز ده أضعف بي كتيير مما يتصور أي بني ادم في إنو يعمل حاجة ذات فايدة وقيمة وما هو إلا محل بنجي نتونس فيهو ونتضاحك وبنمرق ..وياريت الناس التانيين يعرفو كده ..
انا ما كنت وما عايز أتكلم عن المظاهرات دي لأني مغبون وموجوووع والله يعلم يا ود البشرى من حاجات كتييرة صاحبت التظاهر ده ..
لكن صدقني الناس الإتفرزو كيمان كيمان في الموت وربنا يرحم جميع الاموات هم الناس الكتلوهم نشطاء الانترنت ..
الناس الخلدناهم كثوار شهداء هم من رواد صفحات الفيس بوك..لكن الناس الماتو ساااي كده ما جبنا خبرهم ..وده موضوع تاااني عليييك الله الخلقك وخلقني خلينا نزح منو ..
المهم عشان تعرف إني ليي جيت هيجت وتعرف إنو كييف إنتو مأملين ومتعاملين مع إنها مفروض تكون ثورات مبعثها ومصدرها الإنترنت أقرا معاي العبارة الكتبتها أختنا تيسير دي :

Quote: يا ود البشرى مشيتي الفاتت دي خلتني أقتنع إنو في ناس لسة صوتنا ما واصل ليهم ما بتكلم عن الناس البتتداول فظائع وقذارات الإنقاذ عبر الملتيميديا لا بتكلم عن أكتر شريحة متضررة فعلياً من وجود الإنقاذ وما شاعرة بالخطر دا ودا الأنا بقولو أنا قعدت مع ست شاي وإتكلمت مع أصحاب الركشات والأمجاد وإتكلمت مع مرة بتغسل الهدوم المحصلة أشعرتني بالذهول !!!! ديل المحتاجين نوصل ليهم صوتنا ودي حتكون مهمتي أنا وكل من يريد التغيير من هنا ولي قدام ..

أجدني في أتم الاتفاق مع وجهة نظر عمر الفاروق.

يا ود الفاروق احنا كدا ما مختلفين بالمناسبة ومتفقين على ضعف او عدم تأثير النت على الثورة يبقى ما في خلاف
ونعم في حاجات سخيفة لكن زي ما قلت دا ما وقت الكلام عنها ما نحنا سودانيين برضك حاجاتنا كلها بالطريقة السودانية, بس الكويس انو دا كلو حدو النت البخشها اقل من عشرة في المية من الشعب وتأثيرها لن يعدو ذلك
بعدين يا ود الفاروق انت من متين بقيت تقطع أول حتى تحسب بعدين :) داك كلام تيسير أنا ما علّقت عليه ولا ابديت وجهة نظري فما ممكن تقول لي انتو مأملين ومتعاملين وكدا, أنا يا خوي من اول يوم كتبت رايي أنو هذه ليست ثورة أسافير يا هداكم الله ...
ثم لو رجعت وقريت كلام تيسير ح تلقى انها بتتكلم عن توعية الناس الماجايبين خبر للحاصل وتوصل ليها صوتهم وما قالت عن طريق النت ولا الشرائح دي يمكن الوصول ليها بالنت ست الشاي و الغسّالة و سواق الركشة (لو ما كان استاذ جامعة)
كدي روق و اهدى واستنى ابو التا تشرح كيف ح توصّل صوتها للناس ديل

ويا عمر منو الما موجوع ومغبون من الحصل و اللسة ح يحصل, بس المفروض تطلع بحاجة ايجابية من الوجع و الغبن دا وتوجه توجيه سليم نحو من يستحقه فعلا

البركة فيكم يا تيسير ورحم الله عمكم واحسن اليه وجعل الجنة متقلبه ومثواه

Quote: القال ليك منو انا قاعد جوه السودان ؟ ده نمرة واحد

كان كدا معليش وبالجد بعتذر

أنا ممكن أكون أخطأت لكن خطئ لا يمكن وصفه بعدم نزاهة

ما كنت عارف حالتك زينا واحد مناضل كيبورد

بعدين ما في أي حاجة بيني وبينك عشان يكون هناك غرض او مرض بالجد افتكرتك في السودان.

خاصة بعد مشاهدة صورك أيام السيول والأمطار

المهم حصل خير وبعتذر

اعتذاري العميق اخت تيسير
مداخلة نزلت عن طريق الخطاء

Quote: انا على قناعة تااامة إنو الإنترنت خصووصا سودانيز ده أضعف بي كتيير مما يتصور أي بني ادم

للانترنت تأثير .. الذي ضعف في الفترة الأخيرة هو دور سودانيزأونلاين.

أحسن الله عزاءكم أختي تيسير
وجعل مثوى الفقيد الجنة
وجملكم بالصبر الجزيل
....





لا شك أن الدور الذي لعبته هذه السلطة الغاشمة
منذ بدايتها وإلى اللحظة
سيظل أثره السالب في النفوس محبطاً للهمم
لكنما تظل الروح باقية تقاوم
وستبلغ مرامها وإن طال الزمن (ولن يطول بإذن الله)
وهل يخرج الناس إلا من اضطرار
والسلطة الحالية هي الاضطرار في أوضح صوره



الثورة لا تموت لكنها تهدأ قليلاً ريثما تتقد

.

Quote: أجدني في أتم الاتفاق مع وجهة نظر عمر الفاروق.

ياتو وجهة نظر أنت في أتم الإتفاق فيها مع عمر الفاروق؟


.

أحسن الله عزاءكم يا تيسير وتقبل الله عمك بين الصديقين والأبرار

ود الفاروق يا عمر
رفع الظلم الحاصل في السودان ده مسؤولية الجميع، مسؤولية أي بالغ وراشد، طالما يرى البالغ والراشد أن هناك ظلم، مناهضة هذا الظلم أقرته القوانين السماوية قبل قوانين الأرض؛ أنا لا أتخيّل أن يمر عمر الفاروق بحالة ظلم في الشارع، مثلاً، رجل ضخم يعتدي على الضعفاء من المارة، دون أن يحدِث عمر الفاروق نفسه بدفع هذا الظلم، بيده أو بلسانه أو بقلبه، على حسب مقدرته، وإذا صاح أحد المارة حاثاً المظلوم بأن لا يترك حقه، فمات المظلوم، يترك عمر الفاروق القاتل جانباً، ويدعوا الله بأن يذيق هذا الصائح طعم الموت.

رؤية الناس للنظام لا تخرج من ثلاثة، ضده، أو معه أو غير مهتم، وعلى ضوء ذلك أي زول يختار ما يناسبه من أدوات، الداير يمرق الشارع يمرق، الداير يكتب في الصحف يكتب، الداير يكتب في الأسافير يكتب، الما داير ما داير، والما قادر ما قادر، أي زول مسئول من موقفو، وأي زول يتحمل مسئولية موقفو.

مـا كُــل مـا يُــغــزل ،
عـبـر الإسـفـيـر ،
عـيـن الـيـقـيـن ،
الـفـطـن مـن يـقــرع بـذكــائــه ،
مـع خـالـص الـود ،
،،،
***
ســلام تيسير ،
أحسن الله عزاءكم ،
...


.








عزالدين عباس الفحل
ابوظبي
...

الاخت تيسير البركة فيكم إن شاء الله وللمتوفي الرحمة
يا ريس معقول البوست دا يصل صفحتين ولسع ما يتعلق فوق
علي الاقل لحفظ التوزان
:
:
:
:
:مع التحيات لله الزاكيات

محمد حمزه الحسين سلام ..
ولقد بالغت مع تيسير يا أخا الوطن :)

Quote: علي الاقل لحفظ التوزان

اتفق مع طراوة وعدد من الأراء التي تناقش من منظور مختلف شوية عن عمر وملاسي ..

..

تيسير سلامات واحسن الله عزائكم في هذا الفقد الكبير ..

ود البشرى يا حبوب..
صوت شنو العايزين توصلوهو لي ستات الشاي؟؟
صوت شنو الما واصل لي الكمساري وبتاع الأورنيش؟؟
عايزين تقولوا ليهم شنو؟؟
إنت وانا وكللل الناس البتتكلم هنا دي عارفة وعااارفة تماااماً إنو ديل أكتر ناس واصلاهم الحاجات .. وما كلام ساي نوووو واصلاهم فعل ..فعععل يا ود البشرى..
الما واصلكم الصوت إنتو..
المفروض تقعدوا عشان تعرفو إنتو ..
جور وظلم الحكومة عارفنو ستات الشاي أكتر منكم لمن يجو يكشوها بي الشاي بتاعا ويرفعوها في كومر..
عارفاهو ست الشاي وشووف عيين في شارع النيل وهي بتبكي بي دموعا لأنو اخر الليل جاها واحد من ناس النفايات ومفروض تدفع ليهو 25 ألف رسوم وهي باعت بي 30 ألف بس وحلفتو عشان يخليها لي بكرة عشان أسة ح تشيل ديل تديهم لي أولادا مصاريف ..
عارفو الكمساري الكل يوم في شكلة مع مواطن في وينو الباقي و انتو حرامية زدتو المواصلات ودي خمسمية مشرطة ما بشيلا منك..
عارفو العتالي اللي اليومية حقتو 20 ألف وبيشتري حاجات بي خمسين ألف ..
إنتو الما عارفنو يا حبوب ..
إنتو اللسة بترسلو 1000 ريال تتحول لي 2 مليون ويادوووبك تسمعو الشكية من ناس بيتكم في رفاهيات وليس ضروريات ..لأنو ناس بيتكم ح يشتكو من إنو الطماطم بقت نااار والكهربا ما بتقعد أكتر من إسبوع عشان المكيفات بتصرف ..
إنتو اللسة ما عارفين إنو الجوع ضرب في منتصف العاصمة وقايلنو لسة في الاطراف ..انا برضو شاهد عيان على مرا قاعدة في مسطبة الساعة 8 صباحا وبتبكي والكلام ده في حي من أعرق أحياء الخرطوم وأنضفها و طلعت ساكنة جارة للناس الانا كنت عندهم ديل وطلعت ما شحادة وما عارفا الجابا هنا شنو فقط لقت روحا هنا لأنو ليها تلاتة يوم بتتصرف تأكل أولادا وجبة واحدة والليلة إكتشفت إنو ما عندها حاجة في البيت تأكلهم ليها وخلتهم بيبكو وهم عايزين يتعشو وصحوا الصباح أكيد عايزين فطور..
حكى لي صديق من ناس البورد ديل وهو كمغترب في إجازة مع الأهل قرر يمشي يشتري كهرباء بي مليون عشان ( كلها 500 ريال) وإذا به يتفاجأ بي إنو الزول القدامو إشترى كهربا بي عشرة جنيه فقط لا غير!!! فما كان منو إلا وإنسحب من الصف لأنو يادووب الصوت وصلوا وعرف كمية المعاناة والإحباط اللي بيعانيهو ابو عشرة جنيه ده..
يا ود البشرى الصوت واصل للناس ديل وفاااايت اضانهم ..خلوهم عليكم الله وما تزيدو وجعهم وجع وتخلوهم يفقدو كمان وليداتهم بي سبب نفشة ريش ومجرد خوف وجبن منكم لأنكم ما قدرتو تقلبوا الحكم فأستخدمتم المساكين ديل دروع بشرية ..
المظاهرات دي وبي فهمك ده الأولى في الخروج فيها الأبهات ما الوليدات مش؟؟ الأولى يمرقو الموظفين ما الطلاب مش؟؟
الجمرة بتحرق الواطيها .. والطلاب ما واطين جمرة ولااا طالب الأساس فاهم يعني شنو رفعد الدعم عن المحروقات بيصحى الصباح بيلقا المصاريف بيمشي المدرسة وبيجي راجع ..
لو في إحتجاج يحتج أبوهو ..أبوهو سكت علييكم الله ما تحرشو ليهو ولدو يطلع..ويجيبوهو ليهو غرقان في الدم ونجي نحن بكل غباء ولا إنسانية ننشر صورتو في الانترنت ندّعي التباكي والتأثر ولو قالوا للواحد فينا ساااي رسل ليهم حق شوال السكر نبقا في أولى بيها أولادي وكدي انتظروا اخر الشهر لمن نصرف و و و ..

بصراحة يا عمر انا ما فهمتك مالك, قلت ليك راينا تقريبا واحد في مسألة تأثير النت على الثورة, لكن في نفس الوقت أنت تراه تحريش وتكاد تساوي بينه وبين القتل الذي تقوم به مليشات الحكومة في حق المتظاهرين
مسالة توصيل الصوت للمغيبين قلت ليك دي فكرة تيسير الما استرسلت و فسّرتها لسة
عموما عشان نقصر الحجة, قصة انك تعتبر خروج الشباب ديل للشارع نتيجة تحريش دي جريمة في حقهم والله و استهتار بيهم و بغضبهم النبيل
يا ود الفاروق الناس مرقت صبيحة خطاب الرئيس طوالي الوقت داك ما في حد لحق يعمل لايك ولا شير لسة خليك من بوستات تحريض
الكلام الكتبته فوق و المعاناة الحكيتها دي تفتكر بتحتاج ليها تحريش تاني بعد دا
سيدنا علي قال عجبت لمن لا يجد قوت يومه كيف لا يخرج على الناس شاهرا سيفه, اها الناس خرجوا شاهرين صدورهم العارية و ممتشقين حناجرهم
الحكومة هي المحرّض يا عمر, هي القاتل و هي المجرم, كان عندك لوم وجهه ليها

Quote: الأيام الفاتت كنت في زيارة سريعة للسودان من يوم الأربعاء ورجعت الليلة من الشفتو بي عيني وسمعتو وصلت لي حقيقة واحدة: العالم كلو منفعل بما يحدث داخل السودان وغاضب للدماء التي سفكت والأرواح التي أزهقت وناس الخرطوم في عالم آخر كلامي محبط؟ أنا الإحباط والخلعة قربوا يكتلوني

حمداً لله على السلامة.
والبركة فيكم وأحسن الله عزاؤكم.

في رأيي أن التغيير الذي حصل هو ثورة حقيقية، فاقت ثورة أكتوبر (22 شهيد)، وفاقت ثورة أبريل (8 شهيداً)،
فقد قدم الناس في ستة أيام (222 شهيداً)
وامتلأت المعتقلات وبيوت الأشباح والأمن بالمعتقلات والمعتقلين
وحجم التغيير الذي حدث يعتبر ثورة حقيقية وعلامة فارقة في تاريخ الوطن.
والجيش الذي انحاز في أكتوبر وابريل واقف يتفرج إلاّ من ململات هنا وهناك، ذلك لأن جل القياديات ولاءها للنظام وليس للسودان.
وتم ضرب الناس بالرصاص والهراوات في الشارع العام
12 من قنوات النظام الفضائية لم يفتح الله عليها وتقول كلمة حق
عدد من الصحف لا يستهان بها هي مجرد بوق إرهابي للنظام إلا من رحم ربي
قادة النظام وعسكرييه يتوعدون المتظاهرين بالموت علناً في شاشات النظام الرئيسية
المحاكم والقضاء أعدت للمتظاهرين
أجبرت العديد من الأسرة على التصريح بأن أبناءها ما خرجوا للتظاهر
دعك من موقف الإعلام العربي والأفريقي الهزيل عدا قنوات معدودة هي إيه إن إن، والعربية واسكاي نيوز والحرة ...
وما تنسي كوادر الأمن الإعلامي والجداد الإلكتروني والميزانيات الضخمة وساعات من العمل المدفوع الأجر من أجل محاربة الثوار وإطلاق الشائعات.
والموقف الضعيف للحزبين الرئيسيين التقليديين وللأحزاب الصديقة للنظام والأحزاب برعاية النظام


هذه حرب وليس ثورة

يكفينا فيها فخراً أننا كسرنا حاجز الخوف
وتحول الخوف من ملازمة الناس إلى ملازمة الحكام، وزاد الهاجس الأمني للنظام وليست هناك ميزانيات تسعفهم للأبد

ويكفينا فخراً أن الشباب الذي جند النظام الميزانيات والمنظمات من أجل غسل أدمغتهم طول 22 عاماً هم من قادوا التظاهرات

وفي الختام أقول أن هذه الدماء الذكية التي غسلت الأرض لن تضيع هدراً.

فهي قد كتبت صفحة جديدة في تاريخ السودان يعرفها من يعرفها ويجهلها من يجهلها.

وحق للكيزان أن يرتجفوا ويلجأوا للعنف حيلة العاجز،
فما هم إلاّ عاجزين. نهايتهم الحتمية هي نهاية كل ظالم.

.



الاخت تيسير البركة فيكم، نسأل الله تمام المغفرة والرحمة لفقيدكم الكبير.



.

سلام يا عمر الفاروق


كلامك جميل ومنطقى وواقعى وبحكى الم المعاناة

لكن ..

انت بتوصف فى الحاصل .. اوكى

والناس بتكلمو عن تغيييير الحاصل .. شفت الفرق

يعنى المعاناة الانت حكيتها دى وبى عضمة لسانك قلت وصلت للغالبية والجوع عم

طيب - الدبارة شنو ؟

الناس تعمل شنو ؟

ما ياهم اسياد الوجعه هم المفروض يتحركوا

احنا شردنا وطلعنا من البلد .. وبقينا بالبنقدر نعملو .... مساهمة .. تحريش ... تشجيع
وخلافها من الوسائل المتاحه ...



انا ما بتمنى الموت لى زول ... لكن الواقع مفروض يتغير

.

Quote: مظاهرات دي أمر مفروغ منو ما بخليهم يطلعوها لأني ما مستعد أضحي بي فرد من أفراد أسرتي عشان حضرة سيادة ناس الانترنت

إنت ياعمر الفاروق، خاتي نفسك وصي علي ناس بيتكم في السودان من باب إنك الكبير البتعرف مصلحتهم؟ ولا عشان إنك فاهم خالص خالص؟ ولا لأنك مغترب وبتصرف عليهم من حر مالك؟
وبعديها طوالي نازل إحتقار في مشروعية خروج الناس بما فيهم الشباب على الحاكم المستبد! حين تنسبها لدعاوي مناضلي الانترنت المرتاحين!



.

Quote: بتكلم عن أكتر شريحة متضررة فعلياً من وجود الإنقاذ وما شاعرة بالخطر دا ودا الأنا بقولو أنا قعدت مع ست شاي وإتكلمت مع أصحاب الركشات والأمجاد وإتكلمت مع مرة بتغسل الهدوم المحصلة أشعرتني بالذهول !!!! ديل المحتاجين نوصل ليهم صوتنا ودي حتكون مهمتي أنا وكل من يريد التغيير من هنا ولي قدام ..

احسن الله عزاؤكم يا الاخت تيسير ....
... حسب ما فهمت .. من البوست دا ...
انو الثوره لو مافيها ستات شاي .. وسواقين ركشات وامجاد ... ما حتنجح ..
(بعدين هم حيتظاهروا ليييه ؟؟؟ .. ما هم حيرفعوا سعر كباية الشاي والقهوة .. وسعر التوصيلة .. وخلاص ... وما عاوزه ليها ثوره )
فشلت الثوره لانو منضالي الكي بورد القاعدين بره السودان .. كترو المحلبيه شويه .....
فشلت الثوره .. لانو كل الشعب الفضل قعد ينظر ( من النظريه ) .. ونسوا العمل الحقيقي لانجاح الثورات ..
فشلت الثوره ... لان طلاب الاساس لما طلعوا مظاهرات .. لم يجدوا من يساندونهم من الكبار ....
انا زاتي .. كنتا في السودان في الفتره الفاتت .. وما شفت اي مظاهر ثوره حقيقيه كما توقعنا ..
وفي شارع الديم حاولت اصور المتظاهرين بجوالي ... على قلتهم ... الا ان الضابط نهرني وقرب يصادر الموبايل حقي ...
وعندما وصلت قرب بيتنا.. كانت هناك ايضا مظاهره محدوده من بعض الصبيه ... يرمون الشرطة بالحجاره
فما كان من الشرطة الا ان اطلقوا البنان داخل حوش بيتنا .. واتبهدلنا اخر بهدله .....
اها .. الان بعد ما الامور هدأت ....كل التجاار .. رفعوا اسعارم ..
حتى ستات الشاي .. والحبشية التي تعمل في المنازل .. وكل من له حرفه او تجاره رفع اسعارو ...
الموضوع ببساطه شديده .... نسبة وتناسب ...
الحكومه ترفع سعرها علي .. انا ارفع سعري على المواطن ...
والمواطن الغلبان الكادح هو المظلوم .. وهو وحده المكتوي بنار غلاء الاسعار ..
وهو الوحيد .. المفروض يطلع مظاهره .. بدون دعم من اي محرضات خارجيه ...
ودا ممكن يحصل قريبا .... لو ما الحكومه تراجعت في قرارتها ..
ووقفت مع محمد احمد .. الذي وقف مع الحكومه 24 سنة .....
او ممكن الحكومه ان تتبني سياسات جديده من شانها ان ترفع المعاناة عن كاهل المواطن ....
ودي ما صعبه ... بس دايرين اقتصادين عقلاء يفكروا لينا صااح ....
والله المستعان ....

ألف ألف شكر للجميع على التعزية والمشاركة وسأعود للرد عليكم فردياً في مداخلاتكم كتير من النقاط المحتاجة نقاش ..

ــــــــــــ
الله يسامحك يا عمر الفروق على كمية البهتان والقطع من الراس الجيت رميتو في طرفي ومشيت ..


أولاً أنا ما حصل لا الآن ولا غيرو طلبت من زول يطلع مظاهرات لأني قلتها عشرات المرات لو ما هنا في مكان تاني إني ما بجيني قلب أدعو لي مظاهرات أنا ما فيها وولدي ما فيها لكن لو طلعوا من أنفسهم فسأكون من الداعمين وبقوة ..

الحاجة التانية أنا لمن مرقت فعلاً مرقت للمظاهرات وإخترت توقيت الصلاة تحديداً لأني عارفة إنو الناس حتطلع بعد الصلاة وإتصلت ونسقت مع الأصدقاء البمشوا المظاهرات (أحدهم هنا في هذا البورد وله أن يؤكد أو ينفي كلامي إن أراد) وما في زول مرق ورجع صديق منهم وأكد لي حكاية ما في مظاهرات وبالمناسبة ما مشيت بي أمجاد كنت راكبة ركشة مفتحة من كل الإتجاهات من جبرة لغاية بري مالاقاني متظاهر ولا عسكري بالغلط وكنت حالفة لو لاقتني مظاهرة في أي ملف بنزل من الركشة وأمشي معاهم ..
قربت أعمل زي ما عمل أستاذ نقد الله يرحمو وأكتب في يافطة حضرنا ولم نجدكم ..

ثالثاً البوست دا لا يخلو من غرض زي ما قال أخونا الجميعابي وغرضي منو إني أقول للمعارضة غيروا أدواتكم لأنو الطريقة المتبعة حالياً ما بتسقط نظام .. الواقع هناك غير الداير تغيير ينزل أرض الواقع أو على الأقل يكون قريب للناس الفي أرض الواقع ..

رابعاً قوم لف لأنك طلعت زول ملفقاتي لا أكثر ..

بالنسبة للناس السألوا لماذا لم يستشهد تيسير عووضة


أنا ما كتيرة على بلدي
ولا روحي أغلى من أرواح الشباب الماتوا وما شافوا للدنيا حاجة



لكن أعمل شنو ما لاقتني ولا رصاصة واحدة عشان تكتلني وتريحني وتريحكم
حوامة زي دي زي ما قال أخونا فوق كان مفروض تجيب أجلي في أيام زي دي لكن عمر الشقي بقي !

دا رأيي الثابت حول الدعوة للمظاهرات عن بعد
كتبتو قبل ما يزيد عن سنة من الآن في مظاهرات يونيو 2012

Quote: ما قاعد يجيني قلب أدعو لي مظاهرات وأعرض فيها حياة الناس للخطر وأنا ما وسطهم وقاعدة في أمن وأمان لكن دا ما بيمنع إني دعمت وأدعم بقوة المظاهرات الشعبية والعفوية القامت في الديوم والعباسية وباقي مدن السودان

عدل الطبيعة جعل جور الحبيب مسموح !

وللجميع ألف شكر مرة أخرى وسأعود
كلامكم مهم شديد ..



بعد أفرغ من المعزيين ولا أراكم الله مكروهاً في عزيز لديكم ..





ـــــــــ
سلامات دكتور بشرى ..

المتوفي هو عمي عبد الله وليس عبد القادر
راجع إيميلك ..

Quote: يا ود البشرى الصوت واصل للناس ديل وفاااايت اضانهم ..خلوهم عليكم الله وما تزيدو وجعهم وجع وتخلوهم يفقدو كمان وليداتهم بي سبب نفشة ريش ومجرد خوف وجبن منكم لأنكم ما قدرتو تقلبوا الحكم فأستخدمتم المساكين ديل دروع بشرية .. المظاهرات دي وبي فهمك ده الأولى في الخروج فيها الأبهات ما الوليدات مش؟؟ الأولى يمرقو الموظفين ما الطلاب مش؟؟ الجمرة بتحرق الواطيها .. والطلاب ما واطين جمرة ولااا طالب الأساس فاهم يعني شنو رفعد الدعم عن المحروقات بيصحى الصباح بيلقا المصاريف بيمشي المدرسة وبيجي راجع ..

أمرك عجيب يا ودالفاروق .
وكأننا لا كنا طلاب و لا طلعنا مظاهرات .
وكأننا لم نردد هتاف الطلاب وقود الثورة .
شريحة كبيرة ومؤثرة وتلعب دور طليعى فى تحريك وإدارة الثورات جردتها من الوعي والمسئؤلية بى ضغطتة كيبورد.

والاعجب والادهى والامر حديثك عن خصوصية الثورة وتفصليها على فئة معينة من الناس فئة المطحونيين الكادحين بتاعين الاورنيش وستات الشاي والعتالة الخ الخ.
طيب يا عمر ورينا شنو اسباب ودوافع الشهيد الدكتور صلاح السنهورى ورفاقة من أبناء الجاه والعز شنو سبب خروجهم شنو البخليهم يطلعوا ويتظاهروا ويقدموا انفسهم فداء للوطن وهم راس الصوط ما واصلم.
الرحمة والمغفرة لكل شهداء الوطن.

بالنسبة للاسئلة بتاعت الماحي..
واحد:
انا اصغر افراد اسرتي..
اتنين:
اقلهم فهما بدليل اني مرقت خليتم..
تلاتة:
امبارح القريييبة دي اتصل علي اخوي القاعد في السودان يقول لي يا مغترب يا مقطع اشتريت ليك عدد اتنين مكييف اسبليت وتلاجة 23 قدم من ناس سامسونج في مول الواحة عشان عاملين تخفيضات قبل ما يرفعوا الاسعار بعد الدولار الجمركي زاد..
وخايفك تقول لي ببالغ لو عرفت انو حوول لي ريالات ..
شوفت البوبار ده كيف؟؟قال اصرف عليهم قال..بالله انت من النوع ده؟؟؟؟؟؟؟؟؟

Quote: بسبب ضيق الزمن وكثرة المشاوير صادف إنو معظم الوقت أنا في الشارع

تيسير الله يعلم لا عايز اكاجرك لا عايز ابهتك..كلامي جبتو من نضمك الفوق ده..عاد بعد ده انتي البهتي نفسك او كمان عايزاني افهم غير المكتوب فده شي تاني..
تيسير انتي حددتي المساحة الجغرافية مننن جبرة لحدددي الدروشاب عشان كده استبعدت قصة ركشة دي..
بالنسبة لي طلوعك فياخ احييك علي انك قررتي الطلعة بس كان تكملي جميلك..انتي قايلة المظاهرات بتبدا كيف؟؟؟ما واحد بيجيب اتنين والاتنين بيبقو اربعة والاربعة يبقو مية وده كللللو والناس ماشة بي كرعينا وتهتف لكن يا تيسير تظاهر بي ركشة ده معليش ما جاية لانوممكن عااادي الركشة الراكباها دي ممكن يكون مشغل نجاة غرزة بتغني حنااانة النسا اهلو ما نسااانا..
عارفة ذكرتيني الزول الحكمو عليهو اعدام ولمن جرررو الحبل قال ليهم ما برااااحة ياخ خنقتنا..
تيسير النار بتبدا بي شرارة وانتي كان ممكن تبقي الشرارة دي ..
اتخيلي معاي السيناريو ده
تنزلي من الركشة تهتفي ضد النظام يجي عسكري امنجي ما يسوا يضربك طلقة تموتي ..بكري يسوود المنبر تلاتة ايام..نكتب نحن ونحتفي بيك شهر كرمز بطولي..ويتيتم طفلك الحبوووب داك ياخ ربنا يخليك ليهو ويخليهو ليك ياااا رب..
تيسير ولدي وولدك واولادنا كلللهم محتاجين لينا اكتتتر من انو نضحي عشان ناس تانيين يعيشو علي دمنا..
ربنا يطوول عمرك ويخلي ليك ولدك ويصبر اي ام فقدت جناها وربنا ينتقم من اييييي زول هرد كبدة الامهات علي جنياتهم..

قريبي أفارمسست محمد حيدر المشرف
يأا أخي البوست يستحق يتعلق من عدة نواحي :-
من ناحية جندر وهن قليلات الانتاج بهذا المنبر
ومن ناحية تانية وجهة نظر مختلفة عن البوستات المعلقه من زول شاف كل حاجة
ولقد ظلتت اكرر واذكر فى كثير من البوستات بزجاجة السمن
ومن ناحية تالته ودا عضم الموضوع المنبر دا منبر حُر ومفروض يكون في توازن فى العناوين
بالذات لمن يجي من تسير التى لن يشك احد فى سلامة غرضها والله شنو ليك
:
:
:
:
:
تيسير البركة فيكم والدوام لله وكل شئ عنده بمقدار
مع التحيات لله الزاكيات

سلامات للجميع

نعزي الاخت تيسير في وفاة عمها

الاخ عمر....فكرة إنو الانترنت... أو ما يكتب هنا في سودانيز أونلاين هو سبب خروج الناس في السودان حاليا أو سبب رئيسي لوفاة الاطفال في المظاهرات...دا كلام مجافي للحقيقة...ويمكن عدد كبير من الناس الطلعت دي ما شافت نت قريب ....لأنوحق سعر شريحة النت أو الاسكراتش يمكن يكون ماعندو....فما تحملوا روحكم مسئولية ما حقتكم...إتونسوا ونستكم ساكت إنت وود البشري صاحبي دا وطفي الجهاز ونوم..المستفيد الحقيقي لما يكتب هنا هو من وظف من الاعضاء ليلعب باك ل....( س ) أو (ص) من المعارضة و يراقبه كظله ...كان قال ألف يقول ليهو لا ( ب).. يعني نظام دوام مدفوع الاجر.....ودا من حقو يكبر الكوم عشان ما يفقد وظيفتو.


طلوع الناس في السودان لاسباب إقتصادية وبكرة لو الحكومة تراجعت عن القرارات الموضوع بينتهي...ولوما إتراجعت الجكومة بتكون إعتمدت علي إنو الشعب عندو زهايمر و ممكن ينسي مع أول حفلة لود الامين في نادي الضباط أو هلال مريخ الجاية مابعيدة (يتفقو مع الحكم يفوز الهلال والموضوع ينتهي)....

دكتور ياسر ..
ياخ بالغت ..
سودانيز شنو البتطلع ليها ناس الشارع وتظاهر ؟؟؟سودانيز أون لاين دي حدها ضحكنا وقرقرتنا وجمجرتنا دي وتاني ما منها أييي فايدة ..
ما عايز أشرح لكن بعتقد إنو انا فكرتي الاساسية العايز أقولا في الأول متعلقة بي أي زول بيجي يقول محبط عشان الناس ما طلعت مظاهرات بينما هو قاااعد في حتتو يتفرج وربنا ما فتح عليهو بي رمية حجر أو وقفة صفوف أمامية ..
بالنسبة للموت فصدقني الأطفال الماتوا والشباب الماتوا في أول يوم مظاهرات فعلاً هم الضحايا المرقو ردة فعل للقرار .. أييي شاب مات من تاني يوم كان ضحية للتعبئة الإنترنتية خصوصاً الجامعيين منهم والدليل إنو معظم من إحتفينا بموتهم الحقناها باخر قصاصات كتبت للشهيد في الفيس بوك..
يا ياسر ليلة المظاهرات وهي في أوجها الهلال كان لاعب كورة والاستاد ملياااان ..
وبكريتو المريخ كان لاعب مع الاهلي شندي والاستاد ملياااان ..
وانت سيد العارفين ماف زول اتعب وأجوع من رواد المساطب الشعبية ..فلو في شي بيمرقهم كانوا مرقو بعد الكورة ..
الناس عارفة وحاسة لكن خايفة عشان عايزة تربي عيالا ..فخلوهم يربوهم عليكم الله بدون هتافات وشعارات الثورة انطلقت هبت أشم رائحتها سننتصر س س س ..
اي زول مفروض فكّر يكتب حرف قبل ما يكتبو مفروض يخلي قراره الأول إنو يمشي الشارع هو بييي عضمو وفييي روحو دي..
كل النماذج البقيتو تقتدوا بيها كمثال يحتزى عملوا كده ..
مش بقيتو تهتفوا الشعب يريد إسقاط النظام؟؟ مش بقيتو توصفوا بي إنو ثورة السودان إمتداد لي ثورات عربية لدول مجاورة؟؟يلا أعملوا زييهم
ديلك رجعوا من بلاد الاغتراب لمن احتاجوا ليهم الشباب معاهم ..وقفوا الكتابة ونزلو الشارع واتصدروا المسؤولية بغض النظر عن الدعومات من عدمه..
دي ما مرحلة التعبئة والتحريض ..دي مرحلة يا فيها يا تسكت ..
تسكت معناها ارتضيت تعيش تحت الوضع ده عشان تربي عيالك وتحافظ عليهم قدر المستطاع لأنو بقا ماف يمة ارحميني وماف زول ح يعول ليك أولادك ديل من بعد موتك..
ما عاجبك الوضع دااااك الشارع واااسع وكبيير وديييلك ناس الأمن قدااامك ما بعيدين انزل معاهم راس بي راس ..
اي زول نزل الشارع ده رااااجل رااااجل رسسسسمي ..أييي زول قاعد يكتب من ورا كيبورد ده محرررش ليس أكتر وأخير منو مليون مرة الزول الساكت ومقر بأنو من زمرة الخواف ربّا عيالو ..

احسن الله عزاكم يا تيسير .. للفقيد الرحمة والمغفرة
اسال الله ان يدخله الجنة مع الصديقين والشهداء .. العزاء للعم عووضة ولكل الأسرة
انا لله وانا اليه راجعون ..

Quote: سودانيز شنو البتطلع ليها ناس الشارع وتظاهر ؟؟؟سودانيز أون لاين دي حدها ضحكنا وقرقرتنا وجمجرتنا دي وتاني ما منها أييي فايدة ..

Quote: أييي شاب مات من تاني يوم كان ضحية للتعبئة الإنترنتية خصوصاً الجامعيين منهم

يا عمر أنا ما قادر أفهم النقطين ديل

كيف تكون سودانيزأونلاين ما ليها أي فايدة وأي تأثير في الشارع وفي نفس الوقت تحمل من يكتب في الإنترنت مسؤولية موت الشباب وخصوصاً الجامعيين؟؟

ما ح تفهما يا فرانكلي في حالة واحدة فقط ..إذا إنت معتبر الإنترنت هي سودانيز بس ..

.

Quote: شوفت البوبار ده كيف؟؟قال اصرف عليهم قال..بالله انت من النوع ده؟؟؟؟؟؟؟؟؟

ياعمر الفاروق أنا سألتك سؤال محدد مفاده .. هل إنت وصي على ناس بيتكم "لتمنعهم" الخروج للشارع او للتظاهر؟

بعدين شنو قصة أخوي أشترى لي 2 اسبليت وتلاجة 23 قدم، هل يمنع ذلك أن يكون لأخوك الختري ده وجهة نظر تختلف عن وجهة نظرك؟

أنا قلت ليك إنت بتحتقر المتظاهرين الخروجو في سبتمبر، موش لأنك خايف عليهم، لأنك بتختلف معاهم وليس لديك قناعة بالخروج للتظاهر ضد هذا النظام!


.

رسالة لكل مغترب ومجدع خارج السودان وقاعد ينظر فى ثورة الشعب...د حكومة البشير!!!!!!

ده العايز يقوله عمر من الآخر والبتفق معه فيهو حسين ملاسي. انتهى

انتو يا جماعة حكاية (انتهى) دي شنو ؟

دي ذي اند حقت البوستات ؟!

Quote: احسن الله عزاكم يا تيسير .. للفقيد الرحمة والمغفرة

Quote: إنت ياعمر الفاروق، خاتي نفسك وصي علي ناس بيتكم في السودان من باب إنك الكبير البتعرف مصلحتهم؟

ده كان سؤالك الأول مش؟

Quote: ولا عشان إنك فاهم خالص خالص؟

ده كان سؤالك التاني صاح؟

Quote: ولا لأنك مغترب وبتصرف عليهم من حر مالك؟

ده كان سؤالك التالت ولا انا غلطان؟

إنتو شنو الحركة الجديدة الطالعة في سودانيز دي؟؟؟ الزول يكتب كلامو تجي ترد عليهو يقول ليك جبت الكلام ده من وين!!!
انا وريتك إنو اهلي البيصرفو علي ما انا البصرف عليهم ..لكن يبدو إنك إنت من النوع اللي بتذل أهلك وتسمعهم فارغة لمجرد إنك بتدفع ليهم أو ترسل ليهم مصاريف عشان كده دي عقليتك اللي بتفتكر إنو الناس ماشة بيها وإنو الزول ما ينصح إلا اذا كان بيدفع !!!

انتهى يا وليد لتعليقي القلتو بس.
البوست يبدا ولا ينتهى بحددها صاحب البوست.

دي الحكاية البعرفها اذا في حكايات تانيه ياريت اعرفها برضو مالو.

Quote: يا عمر أنا ما قادر أفهم النقطين ديل كيف تكون سودانيزأونلاين ما ليها أي فايدة وأي تأثير في الشارع وفي نفس الوقت تحمل من يكتب في الإنترنت مسؤولية موت الشباب وخصوصاً الجامعيين؟؟

يا فرانكلي
سودانيز اون لاين ما الانترنت

يشارك سودانيز اون لاين في الانترنت كثير جدا من المواقع والمنتديات
والاهم من ده يشاركها فيه الفيس بوك والواتس اب وديل الكان عندهم تاثير حقيقي واثر كبير في قيام الثورة ومتابعتها والترتيب ليها


بقيت تجليها واقفة

احسن الله عزاؤكم يا تيسر وربنا يرحم الفقيد ويسكنه الجنة


،ــــــــــــــــــــــــــــــــــــــــــــــــــــــــــ



هسة يا عمر الفاروق تيسير دي لو قالت ليك انا بعد رجعت من مشواري قلبت الركشة دي وولعت فيها نار وبعد داك ظاهرتا قدام بيتنا كان بيكون مقنع ليك؟

يا عمر ووليد كون سودانييزأونلاين ليست هي الإنترنت يعرفه كل من طق كيبورد

لكن المداخلة بتاعة الإدانة كانت في سودانييزأونلاين وتحميل المسؤولية لمن يكتب في سودانيزأونلاين في موت الشباب في الشارع

لو عمر جرّم كل مرتادي الإنترنت وبرأ سودانيزأونلاين لقلنا كلامه متناسق

لكن كلامه واضح في إدانة ما يكتب في سودانيزأونلاين ويعتبره تحريض

يعدين ما هي آليات القياس والإحصاء بأنّ كل مواقع الأنترنت لها تاثير بينما لا يوجد أي تأثير من سودانييز أونلاين

هذا كلام يفتقد للعلمية

.

Quote: وإنو الزول ما ينصح إلا اذا كان بيدفع !!!

إنت لكن ما قلت أنا نصحتهم، إنت كتبت منعتهم من الخروج!

قادر الله، البخليك أنت بار بأهلك وبتحترمهم وبتعرف الواجب، ويخلينا نحنا من النوع البذل أهلوا شنو؟


.

Quote: كان كدا معليش وبالجد بعتذر أنا ممكن أكون أخطأت لكن خطئ لا يمكن وصفه بعدم نزاهة ما كنت عارف حالتك زينا واحد مناضل كيبورد بعدين ما في أي حاجة بيني وبينك عشان يكون هناك غرض او مرض بالجد افتكرتك في السودان. خاصة بعد مشاهدة صورك أيام السيول والأمطار المهم حصل خير وبعتذر

اعتذارك مقبول وحصل خير


عدم النزاهة ما مقصود بيها قصادي انا تحديدا
انت وبصراحة في البوستات البتخص الحكومة بتتطرطش عديل كده وبتفقد البوصلة .. وبتكون في صفها غالبا .. وما بتكون منطقي
وغرضك انو الحكومة تستمر وبتبرر ليها طواااااااااالي .. لمن بقت ليك مرضة

بالنسبة للنضال بالكيبورت .. فالامر ده مؤقت ان شاء الله

تحياتي

Quote: قادر الله، البخليك أنت بار بأهلك وبتحترمهم وبتعرف الواجب، ويخلينا نحنا من النوع البذل أهلوا شنو؟

طريقة تفكيرك ..

فرانكلي ..

أقرا كلامي التحت ده في أول مداخلة .. وأقرا انا كاتب الإننرنت كم مرة ..ووريني فيها انا جبت سيرة سودانيز وين ؟؟؟
ياخ إنتو فظيعييين ..موباااالغة عديييل كده ..
بتقروا بي نخرينكم ولا بي كرعينكم ما عارف..
دي أووول مداخلة انا حددت بيها فكرتي ..
اي كلام بعدها عبارة عن ردود ..

Quote: الحتة دي وجعتني شدييييييد والله .. شديييييد .. وأكدت نظريتي في إنو أييي أم مكلومة وموجوعة مفروض ترفع يدينا فوووق لي رب السما وتدعي على أيييي زول بيكتب في الإنترنت وما بينزل الشارع إنو ربنا يوريهو في جناهو أو أخوهو أو أبوهو فقط فقط تستثني في دعاها ده أييي زول بيكتب في الإنترنت وبينزل الشارع زيو زي أخوانو ..أو الزول الما بيكتب وماشي جمب الحيط .. ما عارف الناس دي قلبها من شنو وبتقدر تنوم كيف بالليل لمن تعرف إنو بي سبب الكتبتو ده في شباب زي الورد مات ..وهم عايشين يصحو بكرة عااادي زي الما حصل شي يختو كباية الشاي ويولعو السيجارة ويجرو الكرسي ويرجعو يكتبوا ويهموا روحهم إنو هم دورهم التعبئة وقايمين بي دور خفي .. زمان لمن كنا في الجامعة وفي قمة الحماس لحضور أركان النقاش كان بيجو الكبارات من المتحدثين ويحمسو الأولاد البرالمة بي الهتافات والكولينق ..ومااا أن تحصل الكعة ويجو ناس الإحتياطي المركزي يختفي جميييع الكبارات ديل ويتقبضو الأولاد والبنات المساكين ديل والخراطيش تقطع ضهرهم وتتعاود الكرة بعد كم يوم تااني ويظهروا الجبناء من جديد تحت غطاء ده دورنا ..التعبئة التعبئة التعبئة .. ياخ ربنا يرحم أيييي زول مات في المظاهرات دي ..ربنا يرحمكم ياخ ..وربنا يجعل الجنة مثواكم ..إنتو ما بتستاهلونا ولااا نحن بنستاهلكم ..وأي زول غيركم ######## ######## جبااان ..

يا عمر الموضوع بقى حكاية يا غالب يا مغلوب

خلاص أنتا غلبتني وأنا أقر بالهزيمة

أنا كلامي واضح وما قادر أزيد عليه , سودانيز أونلاين جزء من الإنترنت واي تأثير للأنترنت على الشارع, لسودانيزأونلاين نصيب منه إلا إذا ثبت بآليات قياس وأحصاء موثوقة عكس ذلك

Quote: انت وبصراحة في البوستات البتخص الحكومة بتتطرطش عديل كده وبتفقد البوصلة .. وبتكون في صفها غالبا .. وما بتكون منطقي وغرضك انو الحكومة تستمر وبتبرر ليها طواااااااااالي .. لمن بقت ليك مرضة

دا شعورك وأنا غير مسؤول عنه
لكن أنا لا ببرر لحكومة لا ببرر لمعارضة أنا بقول رأيي الصريح البعجبو يعجبو والما بعجبو يضرب راسه في حيطة

أنا حكاية أكون في صف حكومة أو معارضة دا تجاوزته من زمن سودان.نت يعني قبل يجي 15 سنة كدا

بكتبت قناعاتي بكل صراحة وبدافع عنها ما استطعت

بعيدن شعور المتلقي دا ما بهمني في كثير أو قليل وحكاية ألقاب كوز ومناضل دي لا تعنيني ولا تؤثر في طريقة كتاباتي ولا ترهبني او ترغبني في أن أغيرها

تحياتي

البركـه فيكـم يا تيسير ,
وأحسن الله عزائكم , وتقبل الفقيد بواسع رحمته ,
والهم أهله وذويه الصبر والسلوان ..
وانا لله وانا اليه راجعون ..

البوست حق عمر ده ذكرني

نكتة

لسان حال عمر بقول

جني وجن الزول المعزوم .... وبقلب السمكة


مع تححيات وهبة المستنير والمحظور

Quote: بعيدن شعور المتلقي دا ما بهمني في كثير أو قليل وحكاية ألقاب كوز ومناضل دي لا تعنيني ولا تؤثر في طريقة كتاباتي ولا ترهبني او ترغبني في أن أغيرها

يا سيدنا لو قلت الحكومة دي حكومة عمر بن عبد العزيز ... ما شغلتي
شغلتي انو طرطشتك ومحاولة التبرير للحكومة اذيتني بيها في عضم روحي دي بحديث موجه مباشرة لي انا ده

واضح انو اذيت الناس في مشاعرهم في سبيل التبرير للحكومة لا تهمك .. الكلام ده واضح وانا فهمتو

لكن ما تتوقع انو الناس ما حترد ليك الاذي ..

فرانكلي ..
ما غالب ومغلوب ..لأ يا حبوب ..
القصة ما تتبلوا على الناس وتبهتوهم في حضرتهم وتقوولوهم كلام ما قالوهو ..
ياخ عليك الله عاين انت قلت شنو ؟

Quote: لو عمر جرّم كل مرتادي الإنترنت وبرأ سودانيزأونلاين لقلنا كلامه متناسق لكن كلامه واضح في إدانة ما يكتب في سودانيزأونلاين ويعتبره تحريض

أها انا جيت وريتك إنو انا جرّمت كل مرتادي الانترنت..
وعليه طالب منك فقط تجي تقول إنو كلامي متناسق ..دي كل الفكرة ..
بسيطة مش؟

Quote: أها انا جيت وريتك إنو انا جرّمت كل مرتادي الانترنت..

بما فيه مرتادي سودانييزأونلاين

لا كدا عداك العيب وكلامك متناسق جداً

فكرتك وصلت يا عمر

واعتقد نقطتي برضو وضحت

تحياتي يا تيسير ...

Quote: الأيام الفاتت كنت في زيارة سريعة للسودان من يوم الأربعاء ورجعت الليلة

من يوم الأربعاء 2 أكتوبر 2013م وحتى 6 أكتوبر 2013م
وانطلاقة الثورة في 23 سبتمبر 2013م واستمرت في شدّتها في الأيام الأولى .. ولنأخذ منها الثلاثة أيام الأولى .. ثمّ انخفض صوتها لعدّة أسباب منها تعطيل الدراسة والقمع الوحشي للمتظاهرين والاعتقالات الواسعة ...

Quote: من الشفتو بي عيني وسمعتو وصلت لي حقيقة واحدة:

يعني حتشوفي شنو وإنتي مشيتي الحفلة بعد رقيص العروس ؟
للأسف زيارتك جاءت بعد انخفاض صوت الثورة .. لذا العنوان المُناسب لبوستك هذا هو:-
شاهد ما شافش حاجة هنا

Quote: من الشفتو بي عيني وسمعتو وصلت لي حقيقة واحدة: العالم كلو منفعل بما يحدث داخل السودان وغاضب للدماء التي سفكت والأرواح التي أزهقت وناس الخرطوم في عالم آخر

العالم منفعل عبر وسائط الاتصال .. فضائيات وإنترنت .. بما فيهم ناس الخرطوم .. فما عارف في الحتّة دي يعني عاوزة أيّ واحد في الشارع يكون ماشي وشايل معاهو تلفزيونو ويشاهد ويقعد ينفعل ولاّ الفهم شنو ؟
وبنظرة سريعة على تناول الأحداث عبر الفيسبوك ستجدي أنّ من هم بالداخل أكثر تفاعلاً مع الأحداث ممّن هم بالخارج .. والدليل الصور والفيديوهات والتقارير المرافقة للأحداث يتم إرسالها عبر وسائط الاتصال ممّن هم بالداخل ..
يعني مثلاً واحد قاعد في نيويورك حيصوّر أحداث برّي كيف ؟

Quote: كلامي محبط؟

بالنسبة لكِ .. وربما يعود ذلك لوضعك تصوّر معيّن لناس الخرطوم تشاهدين وجوههم كهذه الأيقونات التعبيرية التي تذكرك بسودانيز أونلاين ومنها أيضاً يجي واحد ماشي بي جنبك وفي جبهتو هذه الأيقونة وبعدها تسمعي دوي انفجار هائل وهكذا تنحرف على إثره سيارتك يمينك ويساراً مع تعالي صيحاتك سجمي وووب علي كتلو ضربو ... إلخ

Quote: أنا الإحباط والخلعة قربوا يكتلوني

وأنا الاستغراب قرّب يكتلني وأنا أقرأ مثل هذا البوست لتيسير عووضة




ـــــــــ
ماذا تركتِ لإعلام الكيزان وناس أنا كُنت هسي هناك .. بالمناسبة في صفحة في الفيسبوك اسمها "الخرطوم الآن" ممكن تلايكيها .. أهو كلو عند العرب ويكة
صاحب الركشة الذي قال لكِ (هم الغلطانين قالوا دايرين يقلبوا الحكومة) في افتراضو وافتراض ركشتو إن جاز لي إنّو الحكومة على حق بل صاحبة حق .. فماذا إذا قرأ مثل هذا البوست وفي نفس الوقت تابع كلام إعلام الكيزان النافي لوجود ثورة والواصف للمتظاهرين بالمُخرّبين ...


ـــــــــ

يا ولي البتسميه طرطشة وتبرير دا لو كاتبوا أنا فهو يعبر عني تماماً واتحمل مسؤوليتها أنا شخصياً

كونه أذاك أو أذى غيرك هذا ليس مقصود في حد ذاته ولكن ذلك لا يعني أن أغير كلماتي لأرضي ما يطلبه المستمعون

أنا ما مسؤول أبداً من مشاعر الناس ولا رغبات الناس, كلامي بقولوا بكل صراحة ويبقى على المتلقى تقييمه بخلفياته الفكرية والمذهبية وهذا التقييم قابل للنقاش والحوار إذا جاء بما يرضيني أنا من طريقة تعليق على كلماتي وإلا تجاوزتها وتجاهلتها غير عابيء بها

دا خطي في المنبر دا وساظل عليه

يا فرانكلي يا صديقي ده كلام ما كويس
كونو انك ما تراعي مشاعر الناس ( مطلقا ) دي كلام ما كويس

عموما انت بالتاكيد حر ... وستاتيك ردود الناس من جنس البتسوي


سلام

يا وليد يا صديقي
ما كويس لمنو؟

أنا مسؤول مما أكتب وليس مسؤول من مشاعر الناس البتختلف في أفكارها وطريقة فهمها وقراءتها

يعني أنا عندما أكتب رايي لا أكتبه وفي مخيلتي شعور أحد بل أكتبه لأنّه يعبر عني وفقط وفق ضوابط شرعية وأخلاقية مبدئية بالنسبة لي

يحترمه من يحترمه ويختلف معه من يختلف ويشعر بالضيق منه من يريد قراءة غيره

هذه هي طبيعة الأشياء

من يكتب ليرضي الناس ليس حراً ولا محترم لعقله وكينونته

سلام

يا فرانكي

انت قلت لي انا والعوض يا خوافين
وبنيت كلامك ده على اعتقاد خاطئ مرتين

الاول وجودنا داخل السودان وده طلع غلط
اتنين عدم كتابتنا في الموضوع ده وده طلع برضو غلط


انت معلوماتك ناقصة ... لا عارفنا قاعدين وين .. ولا عارفنا كتبنا شنو

طوالي هاجمت ... وقلت كلام مؤذي

اها يا حبيبنا الكلام ده المسئول منه منو ؟

اسع انا كان اشتكيت عند الله ما بلقى عليك حق ؟

يا ود الفاروق انت ذاتك وقعت في فخ الكلام دا

Quote: القصة ما تتبلوا على الناس وتبهتوهم في حضرتهم وتقوولوهم كلام ما قالوهو ..

:)

البركةفيكم الابنة تيسير وصادق العزاء للاخ والدكم رينا يجعلها آخر الاحزان

وانالله وانااليه راجعون..

عمر سلام مرة تانية

أولا أتفق معاك إنو في صعوبة حاليا إنو البوستات تمشي في نفس مجراها لكثرة الاعتراضات و الخيران التي تجرف محتوي البوست.....سواء صدفة أو عمدا....

Quote: دي ما مرحلة التعبئة والتحريض ..دي مرحلة يا فيها يا تسكت .. تسكت معناها ارتضيت تعيش تحت الوضع ده عشان تربي عيالك وتحافظ عليهم قدر المستطاع لأنو بقا ماف يمة ارحميني وماف زول ح يعول ليك أولادك ديل من بعد موتك

..

بالضبط دي الرسالة التي أراد النظام إيصالها

Quote: ما عاجبك الوضع دااااك الشارع واااسع وكبيير وديييلك ناس الأمن قدااامك ما بعيدين انزل معاهم راس بي راس .. اي زول نزل الشارع ده رااااجل رااااجل رسسسسمي ..

والقصة ما طلعت رأس بي راس.....القصة طلعت راس (أو راسة ) فاضي قصاد ألف راس (مدججة)......وفي النهاية إنت الخسران


أما قصة الناس خارج السودان....مثالك دا حالة نادرة....لأنو لولا الله ثم المغتربين...لبدأ السيناريو دا من أول أيام الانقاذ....وفي غير هذا الوضع لو سأل أي مغترب أهله في السودان إنو لو ممكن يرجع ...سيرفض أهله فكرة الرجوع رفضا باتا ...حرصا علي مصالحهم الخاصة....حتي ولو كان النتيجة جزاء سنمار للمغترب كما يحدث الان...


تحياتي

لا تأثير لسودانيزأونلاين على الحراك الدائر ولا يأبه به أحد من
المسئولين؛ ولكن الواتساب وصفحات الفيسبوك هي التي تقلق منامهم.


_____
عن متابعة واستقصاء.

Quote: لا تأثير لسودانيزأونلاين على الحراك الدائر ولا يأبه به أحد من المسئولين؛ ولكن الواتساب وصفحات الفيسبوك هي التي تقلق منامهم.

أتفق معك جُملةً وقطاعي وبالتقسيط ذاتو .. والسبب لأنّ أغلب زوار الإنترنت وفي السودان بشكل خاص أصبحوا يرتادوا الإنترنت عبر أجهزة الموبايل .. وتطبيقات مواقع التواصل الاجتماعي خفيفة جداً وسريعة في التصفّح مع إمكانياتها العالية في النشر .. أضف إلى ذلك سهولة التواصل مع الغير (يعني بتلقى الواحد عندو قريب خمسة آلاف صديق وإن كانت منشوراته مُتاحة للعامة فستجد الملايين يتابعونها ومثال لما هو مُتاح للعامة: الزميل خالد عويس هنا) ...


ــــــــ
ومع مواقع التواصل الاجتماعي ستجد أنّ أكاذيب إعلام الكيزان عبر الفضائيات والصحف لن تنطلي على من يتواصل مع هذه المواقع ...

البركة فيكم اختنا تيسير وربنا يتقبل عمك فى الصالحين ويجعله من اصحاب اليمين

كثير جداً من الرسائل التي تحتوي على خبر او صورة او مقطع فيديو على الواتساب تكون
منقولة عن سودانيزاونلاين.

------------------
البركة فيكم يا تيسير و أحسن الله عزاءكم و رحم ميتكم.

أحسن الله عزاءكم
حمدا لله على السلامة

تيسير..
أزيك...

بصرآحة يا تيسير البوست دا غير موفق..
أو على الآقل التوقيت غير سليم...
لآنه الكلام الكتبتيه هنا محبط للغآية..
وبيدى أنطبآع سآلب عن الثورة لى زول أيمانه ضعيف...
لكين أحنا عشان عآرفين الحآصل..
وعآرفين الشعب السودانى لما يقوم..
متمسكين بالثورة مهما أتكتب فيها..
والثورآت عآدة بتآخد وكت ما بيقدروا الثوآر يحددوه...
وخآصة أنه الثورة السودانية الحآصلة هسى دى...
محكومة بى نظام ألأم منه ما حصل...
ومستعد يعمل أى حاجة عشان يقعد...
يعنى مشوآرنا لسه طويل...
بس الآمل بالله وبالشباب وبالشعب موجود..
ودعم الثورة أهم من أى أنتقاد يوّجه ليها فى الوكت الحآلى..

اللهم أرحمه و أغفر له
اللهم نقه من الذنوب كما ينقى الثوب الأبيض من الدنس
اللهم تقبل صالح أعماله و تجاوز عن سيئاته و أبدلها له حسنات
اللهم أجعل قبره روضة من رياض الجنة و لا تجعله حفرة من حفر النار
اللهم أنزله منزلة الصديقين و الشهداء و حسن أولئك رفيقا

لم أر هذا البوست إلا الآن ...

رحم الله الفقيد وأسكنه فسيح جناته وصبّر أهله وأحبابه وأصحابه.

رحمه الله وغفر له وأسكنه فسيح جناته

رحمه الله وغفر له وأسكنه فسيح جناته.


.
.
.
.
بالنسبة لباقي حديثك سأعلق عليه بعد حين :)

ياتيسير
صادق العزاء في عمك

والجاتك في بوستك سامحتك..

ياعمر الفاروق
انت الجيت من السودان ول تيسير؟

.

Quote: ياعمر الفاروق انت الجيت من السودان ول تيسير؟

شكرا أخي بله موسى


.