وســــــــــــــــــــــــــــــــــــــــــــخ (غازي محمد ناصر)

غازي محمد ناصر


وسـخ في كل شي ومكان!
وسـخ الوان وسـخ عم الجسد والروح!
وسـخ في كل شي مشروح!
بلد غرقانة حد القيف!
فساد عم الحضر والريف
وناس جيعانة جوع كافر!
صبح مؤمن بحد السيف!
نص الشعب محتاجين!
ونصه الباقي شحادين!
بتشحدوا مين؟!
مانحن بقينا متساوين
بفضل سياسة التمكين!
ومسؤولينا للتزييف
يكرموا مرة في الشعراء
ويكرموا مرة فنانين!
وعشان الكذبة تتمدد
وترحل من بلد لى بلد
يكرموا حتى مصريين!
وسـخ الوان!
بلد بالحاجة اصبح سوق
سوق وسـخان!
مدارسنا استوت دكان!
تبيع الكسرة والدخان!
مكاتبنا ووزاراتنا
بقت مفتوحة سوق نسوان!
من الجزمة للستيان!
واوراق الشغل تلفت!
حقوق الناس
من الاخوان بقت موروثة للفيران!
حكومتنا بتكسب من غذا الاطفال!
تتاجر حتى في العيان!
وأحزاب لاسلك لاملك!
تسمسر في حقوق الشعب
راكعة في ذلّة!
راكعة هوان!
رجال بالجبة والقفطان!
باعوا كرامة السودان
وصاروا تنابلة للسلطان!
شباب فرش الشعر بالجل!
بنات دخانا بالبنبان!
مهر غالي وعريسنا جـبان!
بلد وسـخانة من الذمة للعمة!
وفساد قلب الحرام نعمة!
نزل جوة البطون لقمة!
وربت في زول بدون رحمه!
جبايات ولنت جوه البيت!
جبايات وانت في الشارع
زيادة اسعار بدون اشعار
دي سرقة جهار بدون انذار!
ونواب جونا بالتزوير!
عشان يستكملوا التحقير!
يصفقوا للزيادات....وسـخ
ويزغردوا للجبايات....وسـخ
ويبشروا فينا بالجايات!
دهب فالصو
وجنيهن مات!
وسـخ وسـخان!!
دا شعب يتيم
بدون والدين!
وسـخ في برلمان الطين!
دا بيت وسـخان
مجير دين!
وسـخ في سائر الحاضرين!
وسـخ في الكلمة واليدين!
وأرضك ياوطن في حروب!
شرق وغرب!
شمال وجنوب!
أب مكتول!
وأخ مفقود!
وأم مأسورة!
صغير يرضع
صباع مجروح!
حكومه تباهي بي شطورها!
وسـخ في كامل الصورة!
وشعبك يابلد محروق
بيشكي في صمت
وبيبكي في ذوق!!!
دموع جفت!
وصوت مخنوق!
كل جميل صبح ذكرى!
وكل يوم احلى من بكرة!
حرام في فرحة نتلما
حرام في فرحة نتلما
وحرام الضحكة والبسمة
وبلدنا حزينا منقسمة

اللعنة

غازي محمد ناصر


لعنة الله علي
كل من خان الوطن !
من قضاة وسعاة !
من اطباء ومرضي !
كل من خان القلم !
كل من اعتاش
من بيع الذمم !
كل من سطر حرفا
من نفاق !
كل من شارك
حلما في ارتزاق !
كل من صار وزيرا
دون حق !
كل من باع الرصيد !
ومناديل الورق !
كلهم ضل الطريق !
سيكونون الثمن !
حين تنداح الرياح !
حين ينزاح الوهن !
حين تخبو كل
نيران الفتن !
ويري الجمع المغيب
ان من عبدوا وثن !
عندها نحلم
ان نبني وطن !
لعنة الله عليهم اجمعين !

سودانية حوا (امل هباني)
حسيتك عرفتك !
في وسط الزحام !
هادية جميلة راسية !
كلك احترام !
سودانية مني ...
ليك مليون سلام !
حييتي وسمعتك
صوتك ابتسام !
فيك كل الاهل
من آدم وحوا
وبيك يتباهي حام !
فيك ملكات بلادي
من كوش القديمة !
ومن مروي العظيمة !
وتاريخ المكان !
فيك كل الحنان !
فيك كل الحكاوي
والناس الزمان !
ناس من كل نوع !
اجناس فيك اهل !
اشتات من قبايل
والوان من اسر !
في شخصك تماهو
واطفالك سمر !
فيك وحدة بلادي
في اروع صور !
ضميتك عليا !
ضميت البشر !
سودانية حوا !
سودانية قوة !
يا رقة وجسارة !
يا سارية ومنارة !
مدنية وحضارة !
زغرودة بشارة !
ليك كل القبل !