إيه قوًمك يا جدنا ؟ .... مالسه بدري على القيامه

صلاح سيد أحمد الغول
إيه قوَّمَك يا جِدَّنا ؟
..................
لا الشَّمس في يوم مُضطرِب
ضهبانه مَرَقَتْ مِن غَرِب
لا الأعوَر الدَّجال طَلَع
بى جَنَّتو ونارو وغِضِب
لا الدّابه ظَهَرَتْ في الدَّرِب
لا اتفاجأ النَّاس بى كلامه
إيه قوَّمَك يا جِدَّنا ؟ّ!
ما لِسّه بدري على القِيامه
قوّمني صوتاً شَقَّ حَلْق اللّيل وفااات
ضَرَب الحَنَك
زي التَّكَنّو في حدِ مات
والنّاس مدومسه
في شَخيره وفي منامه
وكتين صَرَخ
ظَنّيتو دا الصّور اتنَفَخ
عضّيتْ أصابعين النّدامه وقُتَّ أخ
ومَسَكتَ يا اللّه السّلامه
وحسيبي ربّي
عليهو اتوَكَّلتَ فجّيت الرِّمال
ودَفَرتَ زَحزَحتَ الجبال
ولقيتو زولاً ود حلال
سوداني أغبَش وحالو حال
شايل بَلا وداقش الخَلا
فالقَا الصّلا وعاضي الفَقـُر
دَنقَر عَصَر عين الصَّبُر
سَكَبْ الأحَرَّ مِن الجَمُر
سيف الغلا .. أكل العيال
وحبْل الديّون زامِّيهو زَمّه
لافِح أساهو ودارعو شال
وفي راسو كارِب هَمّو عِمّه
كُل شيتاً أصبح طَعمو مُر
بتمنّى لو كان يومو تَمَّ
لا قادِر اطفَحو يبلَعو
لا لاقي ريقاً يبصُقو
وعارِف سؤال النّاس مَذَمّه
لمتين تلوك قَش الشَّقا
اللابِلين لا بِنقَرِض
يا وليد أخير ليك تستَجِم
وتعيش معاي تحت الأرِض
مُرتاااح ومصيون العِرِض
مستور أبوي في فَد هِدِم
لا خوته لا قولة بِغِم
لا الدَّعم للسِّلَع اترَفَع
لا ألحقوا السُّكَّر عِدِم
لا سَرقَه لا الدّولار طَلَع
لا نَفرَه لا نِقَّه ونَضِم
لا الدَّعم والقَرض اتبَلَع
لا النّور قَطَع وحِرق الفِلِم
لا حَسره لا النّاس ابتَلَتْ
بالرَّشوه لا أمن انفَلَتْ
لا النّفس رِخصَتْ وأُهمِلَتْ
لا العِفّه لا الأخلاق غِلَتْ
لا العَجَزه لا المايقوما شَت
بالعار وبالعيب اتمَلَتْ
لا الحِلم في السّودان طِرِش
لا الحِكمه في دارفور عِمَتْ
لا دَخلو هجليج الغُبُش
لا مرَقوا مِن أبياي دُغُش
لا الأرزَقي المَدّا الكَرِش
لا الفي المجاري بينكَرِش
لا شيخ موالي ومُنبّرِش
لا شاب مُعارِض ومُندَرِش
لا سُلطه لا حاكِم بِغِش
يلاك معاي ما عِيشه دي
كُل حاجه نار ما بتنهَبِش
وفجأه اختَفى وفجأه ارتَحَل
قوّام كِده وغلبو الصّبُر
ضاقَتبو فوق ووِسع القَبُر
جِدّي اللِكان للشّيل جَمَل
جِدّي اللِكان يا ناس جَبَل
معقوله بس يا جِدّنا ؟
ما لينا غير الموته حل !
خلينا عاد لى رب كريم
مَن لَجَّ في طلَبو ولَهَج
لا بِنسا لا بِرضالو ضيم
حارِنّو مِن عندو الفَرَج
وأمَلنا فيو دايماً عظيم