هام , خطير , محيّر ويحرق الدم .....!!!!!

تعالوا نقدر قروش البترول من ما بدأ و ديون السودان كم؟
اولا نبدا بالبترول
عشان نحسب قروش البترول لازم نعرف المعطيات دي:
1 -سعر البترول في كل سنة
2- انتاج السودان في كل سنة
3-كلفة انتاج برميل البترول ، بالرغم من انو ممكن يكون داخل في نصيب الشركات بس برضو حنخصم التكلفة "نقطة في صالح الكيزان"
4-نصيب الشركات العاملة في البترول
5-نصيب جنوب السودان يبداء من العام 2005
بالطريقة دي بنقدر نعرف بصورة تقريبية كم هي قروش البترول
1و2-سعر البترول العالمي لكل سنة "بالدولار" وانتاج البترول لكل سنة"الف برميل في اليوم" كانت على النحو الاتي "ارقام معلنة"

منقول من صفحة النذير صالح عبدالله من الفيسبوك ...

السنة السعر الانتاج
2000 27 180
2001 23 230
2002 22 245
2003 27 280
2004 37 300
2005 50 400
2006 58 400
2007 74 500
2008 91 500
2009 53 500
2010 71 500
2011 87 500

حتطلع النتيجة كالاتي:

السنة السعر الانتاج الدخل
2000 27 180 0.65
2001 23 230 0.65
2002 22 245 0.64
2003 27 280 1
2004 37 300 1.68
2005 50 400 1.9
2006 58 400 2.28
2007 74 500 3.8
2008 91 500 4.79
2009 53 500 2.57
2010 71 500 3.62
2011 87 500 4.55

المجموع 28.13 مليار دولار

لاحظ معاي انو تقرير قناة الجزيرة قال انو نصيب حكومة الشمال 4.4 مليار وحساباتنا طلعت نصيب حكومة الشمال 4.55 مليار ودا بسبب الفرق بين سعر البترول خام برنت وبين سعر الخام السوداني .حنقسم 4.4 على 4.55 ونضربها في 28.13
عشان نعرف دخل السودان من البترول بعد حساب فرق السعر

النتيجة=27 مليار دولار!!!!!!

طيب
مش المفروض قروش البترول دي نعمل بها التنمية في السودان؟؟ دا ما حصل!!!
عارفين الحصل شنو؟؟؟شوفوا..

1-سد مروي قرض مشترك من عدة دول
2-مطار مروي تابع لقرض سد مروي
3-خطوط نقل الكهرباء من سد مروي تابع لقرض سد مروي
4-مشروع امري الزراعي تابع لقرض سد مروي
5-طريق مروي الملتقى قرض تابع لقرض سد مروي
6-مشروع مياه القضارف قرض البنك الاسلامي للتنمية+قرض صيني
7-مشروع تعلية خزان الرصيرص قرض مشترك من عدة ممولين
8-مشروع سكر النيل الابيض قرض مشترك من عدة ممولين
9-مشروع مجمع سدي اعالي عطبرة و استيت قرض مشترك من عدة ممولين
10-كوبري الصداقة "كريمة" منحة صينية
11-طريق عطبرة بورتسودان هيا قرض "الصندوق العربي للإنماء الاقتصادي"
12-مشروع مطار الخرطوم الجديد قرض مشترك من عدة ممولين
13-طريق القضارف دوكة القلابات قرض "الصندوق العربي للإنماء الاقتصادي"
14-مشروع كهرباء الخط الدائري(الخرطوم) قرض هندي
15-خط الكهرباء الناقل سنجة القضارف قرض هندي
16-مشروع كهرباء كوستي قرض هندي
17- خط الكهرباء الناقل القضارف القلابات قرض هندي
18-مياه عطبرة والدامر قرض ايراني
19-مشروع سندس الزراعي قرض صيني
20-كهرباء الجيلي قرض صيني
21-كهرباء الجيلي شندي عطبرة قرض صيني
22- محطة كهرباء قري 2 قرض صيني
23-مياه نيالا قرض صيني
24-مياه الدالي والمزموم قرض صيني
25-مشروع صومعة ربك قرض صيني
26-كوبري رفاعة قرض صيني
27-كوبري الدويم قرض صيني
28-توسعة كهرباء الخرطوم بحري الحرارية قرض صيني
29-مياه الفاشر قرض صيني
30-مياه بورتسودان قرض صيني
31-مياه دنقلا قرض صيني
32-مياه المتمة قرض صيني
33-مياه مدني قرض صيني
34-مياه كوستي قرض صيني
35-كهرباء دنقلا قرض صيني
36-كهرباء وادي حلفا قرض صيني
37-مشروع كهرباء الفولة قرض صيني
38-مشروع طريق النهود ام كدادة قرض صيني
39- مشروع طريق زالنجي الجنينة قرض صيني
40-طريق الدبيبات ابو زبد الفاولة قرض صيني
41-مشروع كوبري سنار قرض صيني
42-مشروع كوبري توتي بحري قرض ايراني
43-مشروع محطة مياه ابو سعد قرض ايراني
44-طريق طوكر قرورة قرض"الصندوق العربي للانماء الاقتصادي"
45-طريق سمسم القضارف ام الخير قرض"الصندوق العربي للانماء الاقتصادي"
46-طريق كسلا كركون مامان قرض"الصندوق العربي للانماء الاقتصادي"
47- مشروع كهرباء الشرق قرض"الصندوق الكويتي"
48-عدد 4 محطات تحلية مياه "ولاية البحر الاحمر" قرض"الصندوق العربي للانماء الاقتصادي"
49-جسر سيدون على نهر عطبرة قرض"الصندوق العربي للانماء الاقتصادي"
وغيرها الكثير الكثير من المشاريع المعمولة بالدين!!!بالديييييييين !!!!
الكلام دا انا ماجبتو من راسي امشو ارجعوا لموقع وزارة التعاون الدولي وموقع وحدة تنفيذ السدود"سد مروي" معظم الارقام السابقة من الموقعين ديل وباقي الارقام من المواقع الاخبارية المختلفة

-نجي للديون
ديون السودان الخارجية سنة 89 كانت 13 مليار دولار
و سنة 2005 كانت 27 مليار دولار "التقرير السنوي لبنك السودان 2005"
انتو عارفين ديون السودان الخارجية الان كم؟؟؟
40 مليار دولار !!!!!
(المصدرد. محمد خير الزبير محافظ البنك المركزي .جريدة اخبار اليوم )
يعني الديون زادت في 7 سنين 13 مليار دولار!!!!!!
منها 9 مليار قروض من الصين والهند لوحدهم (تقرير قناة الجزيرة السابق)


السؤال يطرح نفسه اذا كانت 90% من انجازات البشير زي ما شفنا ديون .قروش البترول مشت وين؟؟؟؟؟؟؟

Quote: قرض هندي قرض هندي 16- قرض هندي 17- قرض هندي 18-ر قرض ايراني 19-م قرض صيني 20- قرض صيني 21ة قرض صيني 22- قرض صيني 23- قرض صيني 24-قرض صيني 25- قرض صيني 26-قرض صيني 27-قرض صيني 28- قرض صيني 29- قرض صيني 30- قرض صيني 31- قرض صيني 32- قرض صيني 33- قرض صيني 34- قرض صيني 35- قرض صيني 36ا قرض صيني 37- قرض صيني 38- قرض صيني 39- قرض صيني 40- قرض صيني

معقوله دي كلها قروض.

قرضتنا قرض يا مولانا هههههههه.

تحياتي

هههههههههههههههههههههه

كل هذه المشاريع المقترضة بشمال السودان، وحكومة الكيزان تريد من حكومة الجنوب أن تقتسم معها تلك الديون.

أحمد موسى.

نسيت أقول لك.

مشيت عزيت نافع؟

دينق ات مش عندك جنسية ولا جوا ماعارف امريكي ؟؟
مالك ومال السودان وجنوب السودان ؟؟؟؟

سلام يا احمد وسلامات لضيوفك

Quote: قروش البترول مشت وين؟؟؟؟؟؟؟

ترقد بسلام في حساباتهم بالخارج ودي دايرة سؤآل يا احمد ياخوي؟
تعرف المشكلة ليست فقط قروش البترول
القروض دي ذااااااااااتها بتكون اتقرضت ولا مشاريع ولا يحزنون
و حتى المشاريع التي تمت بتكون تمت من غير ذمة و غير خاضعة لمواصفات العالمية المعروفة و اهمها
مواصفات السلامة، وده بيظهر بصورة اكبر في مشاريع الطرق البتتشقق و يجرفها السيل بعد ستة شهور
و الكباري البتقع مع اول هبوب زي كبري ام دوم، و ده كلو كوم والعمولات البتدفعها الشركات عشان تكسب
عطاءآت تنفيذ هذه المشاريع دي كوم تاني، ياخوي الكيزان ديل مافي حاجة فيها مأكلة بخلوها، ياخي ديل البطاطين
الجات للناس المساكين الإضرروا من السيول و الأمطار ضربوها وباعوها في سوق الله اكبر ما يضربوا قروش البترول،
و الله انا يخيل لي انه الكيزان ديل الواحد قبال ما ينضم ليهم بيعملوا ليهو امتحان فساد كان ما نجح فيهو ما بخلوهو يدخل

فعلاً حاجة تحرق الدم

مرحباً أحمد

سؤال للنذير صالح عبدالله

1- كم كانت ديون السودان عندما جاءت الإنقاذ؟

2- كم هو نصيب السودان من تصدير البترول حتى 2005؟

3- كم هو صافي الناتج المحلي حتى 2005؟

4- كم بلغت وردات السودان في 2005 بما فيها الحبوب والسكر والقمح؟

5- كم كانت نسبة الدعم الحكومي للسلع حتى عام 2005؟

6- ما هي المشاريع التي قامت بالسودان إلى عام 2005 وهل هناك مشاريع قامت بتمويل وطني في هذه الحقبة؟

7- كم كان إجمالي القروض حتى العام 2005؟

8- كم كانت نسبة القرض إلى تكلفة المشروع موضوع القرض؟

9- كم هي كلفة الحرب في الجنوب وتأمين قرى ومدن الجنوب حتى عام 2005؟

10- ماهو متوسط الفوائد على الديون الخارجية قبل 1989؟ وبعد 1989 حتى العام 2005؟

وبعدها نفس هذه الاسئلة للفترة ما بعد 2005 حتى انفصال الجنوب

وبعدها نفس هذه الاسئلة من بعد انفصال الجنوب وحتى اليوم

Quote: وبعدها نفس هذه الاسئلة من بعد انفصال الجنوب وحتى اليوم

اها, الكلام اللا بقول احمد دى يا هى خصائص دولة الموز .
و كتبنا فى مكان اخر ردا اسهالك من السباب الاتى:

الولد فرانكى بنانا,
ات حالتك بقت صعبة و لم يجدى غير ان تسب مثل الخائب الذى لا حول له و لا قوة. فى الحقيقة, انت لا تستحق الرد, لان هذه لغة لا تصدر الا من مهزوم معنويا و فكريا. انت منهار تماما و لغتك و سلوكك تثبت ذلك. انت لا تفهم لا فى السياسة و لا فى الدين الذى تعتنقه و ورثته.
لا احد عاقل, يفهم فى السياسة او الاقتصاد وصف زيارة البشير و الانبطاح فى جوبا حينه على ان البشير ذهب الى هناك ليقبل ايادى الجنوبين و يشكرهم على اتفاقية النفط و التى بموجبها يستطيع السودان الحصول ملياات من الدولارات. المصلحة تقتضى وجود دولتين ناجحتين جارتين, دى اول شئ. ثانيا, للسودان الحق ان يقفل انابيب النفط التى تمر من اراضيه وفق بنود الاتفاقيات الدولية الموقعة بين دولتين ان وجد ان التعاون الاقتصادى فى النفط لا يخدم مصالحة السودان السياسية و الاقتصادية و الامنية و ابلاغ المتضررين "الصين, ماليزيا, الهند" الى جانب الجنوب بذلك دون اللجؤ ة للابتزاز, فهذه اللعبة لن تحل مشاكل السودان الداخلية و الجنوب لن يقاتل نيابة عنكم فى حروبكم الداخلية لاننا بكل بساطة دولة ذات سيادة.
ان كنتم تريدون جوار امن, فاهلا و سهلا. اما الاستفزاز بقفل البلف, فافعلوا ان كنتم جادون. اما التهديد بالحرب, فالعسكر, لا واحد يزن اربعمائة رطل و شبعان فى بلاد الكفر ايها الصبى, هم اجدر باطلاق تلك التهديدات و هم يعرفون الجنوبيون و لا نخاف شئ غير الخوف.
اما حكاية الموز, فسوف ارد عليك لكى يفهم الناس بانك زول الله و لا تستطيع قراءة شئ و فهمه. المصطلح فى العلوم السياسية تطلق على الدول التى تعتمد فى اقتصادياتها على الموارد الطبيعية و الزراعة,او ما يسمى Primary Sector فى لغة اهل الاقتصاد, يعنى العالم الثالث. و حكومات نخب "عسكرية فى المقام الاول" تخضع لسيطرة منظومات شركات و كيانات تجارية تهمها الارباح و نظام ضريبى غير فعال بحيث يدفع المسكين و لا يدفع الشركات الضخمة, فينتج عن ذلك التضخم و الحكومة غير قادرة على دفع الديون و تفشل فى الخدمات الاساسية "فى دى اميركا و يونان و اسبانيا و برتقال و كثير من دول اوروبا داخلة فى التصنيف."
و لييه سموها بنانا?
لان واحد سكرجى و بتاع قمار و لص اسمه وليم سيدنى بورتر, و الذى كان قصاص و يكتب باسم او هنرى قام هرب من السلطات الاميركية الى هندوراس فى اواخر القران التاسع عشر و بعدما عاد الى اميركا, قام الف كتاب Cabbage and Kings و تحدث فيها عن دولة اسمها انتشوريا "هندوراس" و وصفها ب جمهورية الموز نسبة لاعتمادها على منتوج الموز كمورد الوحيد للدولة. و من هنا اتى المطلح يا بنانى بوى.
اصبح المصطلح يستخدم لوصف دول اميركا الوسطى المنتجة للموز و لم يكن للسب حتى ظهرت يونتيد فرت الاميركية و ظهرت الامبريالية الاميركية و التى وجدت مقاومة شرسة من اليسار فى هذه الدول. هذه الدول اصبحت تعتمد على الولايات المتحدة بعد ان سيطرت الشركات الميركية على مواردها و عبر شراكة مع نخبة محلية, عسكرية فى الغالب. انهيار اقتصادى, الاعتمادى على الخارج, عدم القدرة على سداد الديون, العملة الوطنية شبه منهارة, الهجرات الاقتصادية لكواردر البلاد, انحطاط و الفساد ...الخ
هذه هى الخصائص العامة للمصطلح علميا يا جهلول.
ازيك احمد.

إذا جاز لنا أن نفتي ظناً، فإن مال البترول قد أُكل! من أكله وكيف أكله هذا ما يعلمه الله وحده والآكلين أو الآكِل إن كان فرداً.
لكن ندلف إلى معلومات القروض التي ورد ذكرها في البوست وعددها 49 مشروعاً، ألا ترون أن تقسيمها تمّ بطريقة القسمة الضيزى؟ كيف؟
1- عدد سكان ولايتي نهر النيل والشمالية: 1,810,000 نسمة. = نسبة 5.41% من سكان السودان.
2- عدد سكان ولايتي كردفان ودار فور: 9,207,859 نسمة. = نسبة 27.5% من سكان السودان.
3- نسبة سكان ولايتي نهر النيل والشمالية لسكان غرب السودان تساوي 19,66%
4- عدد المشاريع الواردة في البوست : 49 مشروعاً.
5- عدد المشاريع المنفذة في الشمال (نهر النيل والشمالية) 15 مشروعاً
6- عدد المشاريع المنفذة في الغرب 6 مشاريع.
7- نسبة المشاريع في الشمال تعادل 30.62% من جملة المشاريع.
8- نسبة المشاريع في الغرب تعادل 12.25% من جملة المشاريع.

هذا يعني أن 5.41% من سكان البلاد حازوا أو نالوا نسبة 31% من مشاريع التنمية بالبلاد. بينما نالت المجموعة التي نسبتها 27.5% من تعداد السودان على نسبة 12% من المشاريع الإستثمارية في البلاد.
وعند النظر لمساهمة كل إقليم في الثروة السودانية أو العائد الكلي نجد أن من نالوا نسبة ال30% لا يساهمون إلا بالقليل إن لم نقل العدم.
صادارت السودان المعروفة للجميع هي: المحاصيل الزراعية: سمسم، فول سوداني، كركدي، صمغ عربي، محاصيل غابية أخرى، فواكه، ثروة حيوانية، جمال، أغنام وماشية.
كم هي نسبة مساهمة ولايتي الشمالية مقارنة بمساهمة ولايات غرب السودان في الصادرات السودانية؟ بل السؤال بالأحرى أن يكون كم هي مساهمة ولايتي الشمالية في الدخل القومي مما جميعه؟؟
قديماً عندما يتحدث المظلمون عن ظلمهم ينبري البعض ويقولون أن كل ما تمّ في بعض المناطق بعينها تمّ بواسطة العون الذاتي من أبناء المنطقة والآن ظهرت الحقيقة في مشاريع تمولها الدولة بالكامل من قروض على كل الشعب السوداني سدادها وإن لم ينل منها فتات موائد اللئام.

كبـّاشي الصـّـافي

(العوج راي والعديل راي)

ولع ولعت واهلنا المساكين فى الشرق ادقو دق العيش دمرت منازلهم واستولى ايلا على منازلهم لماذا لاتفتح بوست بهذه الجريمة النكراء ؟؟؟؟؟؟؟؟؟؟؟

Quote: ولع ولعت واهلنا المساكين فى الشرق ادقو دق العيش دمرت منازلهم واستولى ايلا على منازلهم لماذا لاتفتح بوست بهذه الجريمة النكراء ؟؟؟؟؟؟؟؟؟؟؟

ولماذا لا تفتحه أنت ؟؟
موقوف من فتح البوستات ؟؟
ولا الشرق ما بعنيك ؟؟

يا فرانكلي سلام ..
تصدق انو لو كانت الحكومة دي اتصالحت مع نفسها في الاول وما حاولت تعادي كل الدول الحولها كانت يمكن تنجح في ادارة البلد ..
لكن من اول يوم وهي بتحارب في الدنيا كلها ، ابتداء من برنامج ديك الصباح يونس محمود النبذ فيهو السعودية وأمريكا وغيرا ..
المشكلة انو الناس ديل ماسكين في الحكم دا وكنكشين فيهو وما عايزين يفكوهو لي اي حزب ولا زول يقدر يدير البلد ..
وهم مقتنعين انهم نهبوا خيرات البلد وباعوا الاخضر واليابس وسرقوا قروش البترول ..

الاقتصاد السوداني ما حيتعافا الا اذا رفعت العقوبات الاقتصادية من على البلد ..

بعدين عندي سؤال ..
اخونا احمد دا بيحسب ليك دخل البترول البلد دي ما عندها اي عوائد تانية غير البترول يعني !!
الضرائب والجبايات والجمارك والمخالفات والرسوم الما معروفة البندفعا هنا وهناك دي وغيرا وغيرا ..
طيب ما حسبتوها ليه مع عائدات النفط ..

سلام يا احمد يا صديقي
نبدا من وين ؟
حصر الفساد ساااااهل اصلا ما صعب
اقترح ان نبدا بي قصور الكيزان واولادهم
واحسن واقرب مثال قصور نافع واولادو الجنب بيتنا !!
يلا ايديكم معانا

الاستاذ احمد موسي ......أخي هشام كمال عبادي

التحية

كدي الحكومة في الاول تتصالح مع شعبها البتحكمه

البترول ده اتباع في سوق الله اكبر ورغم ذلك كل الانجازات البيتباهو بيها ناس الأنقاذ

بي قروض ....مقاطعة شنو يا هشام دي فزاعة ساكت ....هذه الحكومة لها مقدرة عجيبة في ان تخلق من اي شئ

ازمة وكارثة احيانا.

المقاطعة نتيجة طبيعية لسوء ادارة علاقاتنا الخارجية

*

الاخ احمد موسي وضيوفه

تشكر علي الطرح و مستصحبا ارقام واحصاءات مما يضع النقاش في اطار علمي ممنهج وليت كل المواضيع المهمه تناقش بنفس الكيفيه بعيد عن التشنجات التي تؤدي الي ضياع المعلومه المفيده.

اما عن رأئي في مبلغ دخل البترول وخلال سنوات يعتبر قليل (بسيط) ويكاد لا يذكر ناهيك عن الاشاره الي سرقته.
لذلك مزيد من النقاش من اجل توضيح الصوره.

.