لو كنت الزول الواقف ورا المعتمد

علاء
صباحك زين ياهندسة


ما تبعته المعتمد قال شنو بالضبط لكين قريت البقول فيهوا على وجه الزول الواقف
وارهوا ......... بتخيل لى ده تعبير عدد مقدر مننا لما يكونوا قاعدين بشوفوا في نشرة 10 مساء
من تلفزيون السودان


-----------

تحياتي

الراجل دا الحقوه بليمونة ... هو لو كان ماكل حاجة وشبعان كان بدلتةالمعتمد دي الجبر زاتو ما يغسلها تاني ..




_________________________________

سلام تمبس وكل عام وانتم بخير

Quote: هو لو كان ماكل حاجة وشبعان كان بدلتةالمعتمد دي الجبر زاتو ما يغسلها تاني

فعلا والله يا درديري .. المعتمد حظو كويس .. لقا الزول دا جعان بس ..
..

وانت بالف خير يا درديري .. والقابله على امانيك

يا عبد الناصر .. يا دفعـة ..
صباحاتك بخير ..
انا زيك ما تابعت الزول دا قال شنـو .. من يوم عبد الرحمــن الخضر في برنامج طاهر توم .. استفز الشعب السوداني كلو بالبونط العريض .. وانا بقيت ما قاعد اتابع اي حاجة ليها علاقة بمسؤول حكومي ..
لكــن .. عجبني الزول الواقف وراء المعتمد دا .. لانو جسد الشعب السوداني كلو في ملامحـو .. خاصة الشعب المغلوب على امرو ..
البيتو واقع .. والغرقـان مويـة لي اضنينو .. والاهلو ماتو .. والحسع دي جعــــان وصاقع الجرة ..

كل عام وانتم وبخير يا تامبا

وانت بالف خير يا تنظير .. ينعاد عليك بالصحة والعافيـة والسلامة ..

لو كنت الزول الواقف ورا المعتمد ...!!

لتصديت لوحدي وفرتقت .. لهكذا مسيرة وهكذا تشنج مسيرة يهتف فيها المغيبيــن .. المنفوخيــن من منابر مساجد السلطـة التي تغض الطرف عن السيول والموت الجماعي .. لتحشد لعودة مرسي وترسل كوادرها للتدخل في شؤون العير وهم شأنهم عاملين منو رايحين ..

ولو كنت ذلك الرجــل .. لتسلقت احدى اشجار النيم .. التي على الطريق .. وجمعت اكبر عدد من سيطان النيم الطريـة .. واوسعت امثال هؤلاء المتشنجين حملة اللافتات المضحكة محطا بالسياط علهم يعودوا إلى رشدهم .. او يصحوا من الغيبوبـة والتنويم المغنطيسي الذي طال امده .. حيث انهم لا اتجاه اسلامي .. ولا اخوان .. لكنهم مجرد بسطاء يهتفون لهيثم مصطفى والعجب ويحسن البعض تعبيئتهم بالخطب الحماسية والجعجعة الفارغـة

اصحو يا بشر ..انتو نايمين لي متين ..؟

مظاهرات الأسلاميين في الخرطوم اليوم احتجاجا على احداث مصر (صور)
الشكر للصحفي الصديق واصل علي ..

Quote: لتصديت لوحدي وفرتقت .. لهكذا مسيرة وهكذا تشنج مسيرة يهتف فيها المغيبيــن .. المنفوخيــن من منابر مساجد السلطـة التي تغض الطرف عن السيول والموت الجماعي .. لتحشد لعودة مرسي وترسل كوادرها للتدخل في شؤون العير وهم شأنهم عاملين منو رايحين ..

يا علاء عيدكم مبارك

يا علاء من أدرانا بعمل هؤلاء

أحتمال هم يومياً في برك السيول والأمطار الآسنة يخوضون الوحل يقدمون الطعام ويسقون الشراب وييبنوا الخيام

لكن كل ذلك لم يلههم عن سطر موقف

سطر الموقف هذا لا يستمر لأيام

هي بضع ساعات ويعود كل واحد منهم لمشاغله

أنا دائماً بقيف ضد التهويل في الأمور واعتماد إما هذا أو ذاك

مع أنّ من الممكن جداً تعدد الأفعال وتوازيها حتى في نفس الحيّّز الزمني

يعني الواحد منّا يكتب في المنبر عن السيول وعن انتخابات هوندراس وعن ملكة جمال العالم وعن صوت أحد نجوم أغاني وأغاني ويدين فلان ويشجب فلان ويشرب شاي ويدخن شيشة ويحضر في التلفزيون وقد يعمل كم شغلة كدا في المكتب

كل هذا في نفس الوقت وبالتوازي

لمذا نحاول انّ نصور موقف صورة التقطت في وقت ما على أنّه عمل دائم متواصل ولا يتوازى معه أي عمل أخر؟؟


شكراً لك أخي علاء

سلامات يا فرانكلي ..

Quote: هي بضع ساعات ويعود كل واحد منهم لمشاغله

..

Quote: لمذا نحاول انّ نصور موقف صورة التقطت في وقت ما على أنّه عمل دائم متواصل ولا يتوازى معه أي عمل أخر؟؟

بضع ثواني .. هناك من يحتاجها لمزيد من السواعد التي تعمل ف ينشل الجثث من مصارف السيول ..
بضع ثواني كفيلة بأن تبني جدار منهار على اطقال يفترشون الأرض .. تداهمهم العقارب والثعابين من كل الجهات .. بضع ثواني كان يحتاجها من جيشوا هؤلاء من أجل مصر .. كان يحتاجها ائمة المساجد الذين امروا هؤلاء بالخروج من أجل مصر .. ومن اجل مرسي في الحين الذي تحتاجهم الجماعات التي تعمل بهمـة من اجل الكل داخل الوطـــن .. ثواني كان يتحدث فيها ائمة المساجد عن الذبح والقتل الذي تزامـن في الضعين بين المعاليا والرزيقات مع شرعيـة مرسي ومشكلة مصر الداخلية ..التي ليس لنا ناقة ولا بعير ولا تخصنا ولا تهمنا في شي
..
عفوا يا فرانكلي .. حتى لو انهم هموا مجرد همـة من أجل مصر في ظل هذه الظروف .. فهو عمل مرفوض .. فما بالك بأنهم وجهت لهم دعوة في المساجد للخروج بينما الناس تنهد عليهم الحيطان المبلولـة الثواني التي ضاعت من اجل مرسي ومن اجل كيزان مصر .. اولى بهـا متابعة الاغاثـة التي نهبت من مطار الخرطوم لتباع في سوق ليبيا ..
طول عمرنـا خرجنا نهتف من اجل فلسطين .. هتفنا من اجل العراق .. سوريا ليبيـا .. ومصر ... ماذا انابنـا .. وماذا يعرفون عنـا ..
وفي خاتمة المطاف نركل بالسنتهم قبل احذيتهم ..

لو كنت الزول الواقف ورا المعتمد ..
لتحركت من مكاني فورا ودبرت مبلغ مليون ريـال ..
ومشيت لضعاف النفوس .. ف السوق واشتريت عدد واحد خيمـــة اغاثـة قطريـة مجهزة .. ولتوجهت فورا من مكاني لأقرب قسم شرطــــة .. وفتحت بلاغ واصريت على ان يكون البند استلام مال مسروق ...
ولصعدت القضيـة حتى اوصلتها الوالي .. ولو كان الوالي على قدر اسمو .. وما مشارك مع ضعاف النفوس السرقو الاغاثـة .. اكيد ح يدق سردو .. ويتابع كيف اتسربت مواد الاغاثة عن طريق ضعاف النفوس عشان تتباع في السوق ..

ما لو بضع ثوان لمن هو موجود بجانب الجثة

تحاشد هؤلاء لا يمنع ابداً أن يكون هناك في نفس الوقت من ينتشل الجثة

وتحاشد هؤلاء لا يعني أبداً عدم ذهبابهم بعد ساعة لنتشلوا جثة في بضع ثوان

كما أنّ تحاشد هؤلاء لا يعني أنّهم ينتشلون جثة كل ثانية ولا ينامون ولا ياكلون ولا يشربون ولا يتونسون

Quote: مع شرعيـة مرسي ومشكلة مصر الداخلية ..التي ليس لنا ناقة ولا بعير ولا تخصنا ولا تهمنا في شي

يا علاء ليس من حدث في حدود السودان المباشرة يمكن أن لا يعنينا

هذا غير ممكن واقعياً ومنطقياً

وبالذات مصر "الشقيقة" أمنها وسلامتها واستقرارها يعنينا ويعنينا جداً بل من أهم ما يعنينا

أهم من "الصديقة" بتاعة "جنوبسودان"

الحكاية ما غلاط ولا مناكفة دي حقيقة لا يمكن تجاهلها

حكاية ماذا يعرفون عنّا هذه من المسؤول عنها؟؟؟

من يكل من هذه الدول سوداني بلسانه او حذائه الغلط على السوداني على الأقل أنّه جعل نفسه في موقف الضعيف وثانياً لانّه لم يرد الصاع صاع

هذه تنميط من السودانيين للسودانيين أنفسهم أنّهم يركلون بالألسن والأحذية من العرب وهم ساكتون ليس ذلك فحسب بل وينادون بطول عمرهم ورغادة عيشهم.


السوداني عزيز والسوداني شهم والسوداني كريم والسوداني أخو أخوان والسوداني لا يقبل الحقارة والسوداني شاطر

هذا ما يعرفه العرب عنّا

لكن أمثال هذه التنميطات أنّ السوداني يركل بالألسن وبالأحذية ويسكت ويضحك ويقول شكراً يا بيه وكمان جنو نوم وكسل

هذا ما لا يعرفه العرب عنّا إلا في مخيلة البعض المريض

وأهلنا قالوا العارف عزو مستريح

ومن يهن يسهل الهوان عليه وما لجرح بميت إيلام

Quote: تحاشد هؤلاء لا يمنع ابداً أن يكون هناك في نفس الوقت من ينتشل الجثة وتحاشد هؤلاء لا يعني أبداً عدم ذهبابهم بعد ساعة لنتشلوا جثة في بضع ثوان كما أنّ تحاشد هؤلاء لا يعني أنّهم ينتشلون جثة كل ثانية ولا ينامون ولا ياكلون ولا يشربون ولا يتونسون

تحاشد هؤلاء وحشدهم .. امر دابت عليه منابر السلطــة لتلهي الناس عن السخط عليها .. لو كان فيهم راشد لهتف من نفس المنبر ان اتركوا ما بي ايديكم ووفروا حناجركم من أجل اهلكم لا من أجل الغير ، من اجل اخيك وابن عمك .. لا من أجل مصري او ليبي او فلسطيني .. او سوري لا يعنينا بشي ويقلل من جهدنا .. بالأمس القريب نفس المنابر حملت اطنان من اللحوم لمصر والماشية الحيـة كهدية .. بينما كانت نفس اللحوم تعرض في فترينات اسواق اللحوم منيكانات يصعب حتى لمسهـا ..

Quote: وبالذات مصر "الشقيقة" أمنها وسلامتها واستقرارها يعنينا ويعنينا جداً بل من أهم ما يعنينا

.. لا انوي الدخول في حجوة ام ضبيبينـة وحلايب وشلاتين .. لكن هي نفس مصر التي سلبتك عنوة .. ولا تعنينا امن مصر قبل امننا .. فهل انتهينا من امننا واقمنا اركان العدل والأمن حتى نذهب لننشد امن مصر ..؟؟

Quote: كما أنّ تحاشد هؤلاء لا يعني أنّهم ينتشلون جثة كل ثانية ولا ينامون ولا ياكلون ولا يشربون ولا يتونسون

.. من واقع قرأتي لقرائن الأحوال .. لا اعتقد ذلك .. ما قضاه هؤلاء من ساعات من هتاف ثم للتوجه صوب السفارة المصرية ثم الهتاف لا اعتقد ان فيهم ما تبقى او انهم مشغولين بأمر آخر .. دع عنك امر اعدادهم للافتات ومكبرات الصوت .. وامراء المواكب الذين تعتبر هذه شغلتهم الوحيدة .. الحلاقيم العالية وارتفاع العقيرة بالصياح ابان الخطب الحماسية ..

Quote: يا علاء ليس من حدث في حدود السودان المباشرة يمكن أن لا يعنينا هذا غير ممكن واقعياً ومنطقياً

اوافقك في حال واحد .. الدليل على ذلك ما حملته الأخبار عن (القنصـة) السوداني الذي اعتلى المسجد وامطرهم بوابل رصاصــه .. حقا يعنينا التدخل .. كما احتضنت من قبل جماعات الخليفي وبن لادن .. والعديد من المطاريد الذين فضلهم الترابي على عامة الشعب .. ثم عاد لنـا بالمشكلات الكبيرة على الوطـن وما نعانيه حتى الآن من تدخل في امور بلدان ليس لنا فيها اي مصلحـة سوى خرابها وتدميرها وتصدير فكر ضار بانسانها وشعوبها .

Quote: حكاية ماذا يعرفون عنّا هذه من المسؤول عنها؟؟؟ من يكل من هذه الدول سوداني بلسانه او حذائه الغلط على السوداني على الأقل أنّه جعل نفسه في موقف الضعيف وثانياً لانّه لم يرد الصاع صاع هذه تنميط من السودانيين للسودانيين أنفسهم أنّهم يركلون بالألسن والأحذية من العرب وهم ساكتون ليس ذلك فحسب بل وينادون بطول عمرهم ورغادة عيشهم.

مسؤوله عنها حكومتنا الرشيدة .. هي نفس الحكومة المسؤولة عن الحفاظ على كرامتنا ووجهنا المشرق وصون حقوقنا وكرامتنا داخل وخارج الوطـــن .. انا اتحدث من خارج الوطـن .. ما اتعرض له من سلب لحقوقي وعدم الحفاظ عليها من جانب حكومتي يجعلني في المكان الذي اجاهر باعلى صوتي .. وانا الذي ادفع الضريبـة والذكاة وإلخ إلخ من الاتاوات الحكوميـة التي ما عادت ولن تعود لي .. كمغترب وهذا مجرد مثال .. ناهيك عن الافعال الأخرى ..
لن يتطاول احد بمد يده علينـا .. واحسب انه ما تبقى فينا من مروة .. لكن ما يحاك ضدنا من مؤامرات بالالســنة من كوننا ضعاف .. انت لا تعرفـه .. لطالما هنا نحن وسلبت حقوقنـا من بنو جلدتنا فقمي بالبقية ان يمارسوا فينا ما تبقى من كيد .. ومن دسائس .. وسننتظر مقبل الايام لنرى

Quote: لكن أمثال هذه التنميطات أنّ السوداني يركل بالألسن وبالأحذية ويسكت ويضحك ويقول شكراً يا بيه وكمان جنو نوم وكسل

.. بل يعرف .. وليس في المخيلة اصبح من الواقع هذا التدحرج المرير اذا كان رئيس دولتنا يتم التندر عليه في الاسواق .. وفي المكاتب .. فماذا تنتظر . على عامة الشعب
نحن كل يوم نقاوم من اجل ان نحسن وجه السودان .. بمعزل عن حكومتـه .. وعن سياساتها .. لكن نجد انفسنا كل يوم ننفخ في قربــة مقدودة ، من سياسات حكومتنا .. ومن توابعها

Quote: نحن كل يوم نقاوم من اجل ان نحسن وجه السودان .. بمعزل عن حكومتـه .. وعن سياساتها .. لكن نجد انفسنا كل يوم ننفخ في قربــة مقدودة ، من سياسات حكومتنا .. ومن توابعها

أها هنــا عوقتني يا تمبس :(
لامن يتفاصح النجدي وبتعالي يكرر اسطوانات قديمة ومعفنة بتاعة السوداني والسودان ولب لب لب لب بنتكربن ونلوي بوزنــا ونثرثر بالفي والمافي .
ده كان زمان يا علاء
بس بعد جماعة الكيزان ( ورونــا ) صدقني عملنا " أضان جلد " البقولوها شماسة بلدي الحلوين فهي معبرة في هذه الحالة
ناس تلاتة وعشرين سنة من سيئ لأسوا تاني راجي من وراهم خير ؟؟

Quote: ده كان زمان يا علاء بس بعد جماعة الكيزان ( ورونــا ) صدقني عملنا " أضان جلد " البقولوها شماسة بلدي الحلوين فهي معبرة في هذه الحالة ناس تلاتة وعشرين سنة من سيئ لأسوا تاني راجي من وراهم خير ؟؟

والله دي المشكلة التبواجهني انا القدامك دا ..
المشكلة انو لحدت الآن .. فينا النخوة السودانية دي والهوشـة يا عمران .. ولحدت الآن بنعافر ما بين السودان الوطــن وما بين السودان المتنازع ما بين الحكومة والمعارضــة ..
ربما يكون هذا البوست هو نتاج لأحدى تلك الهوشات .. التي بالرغم من انزعاجي التام لما تقوم به الحكومـة هذه الايام من تصرفات صبيانية تجاه مشكلة مصر .. إلا انني استفزاني ذلك المصري الذي تطاول كما تطاول غيره من قبل .. وهو يقول للبشير . كدى آررب من حلايب .. جرب وآآرب ..
امثال هذا الرقاص .. ما كان له ان يقول كلمته لو لا انه من خلف حجاب حاجز لانه بعباراته هذه استفز دولة باكملها .. واجد ان له حق الرد لطالما هناك قناصــة سودانية تعتلي احد المساجد .. لكن ما ذنبنا نحن لنكون بين استفزاز حكومتنا وما بين استفزاز هذا الرقاص الذي لا يستطع ان يفعل سوى ان يرسل تصريحاته وهو مختبي من خلف الشاشـة

Quote: حمزاوي حمزاوي لو كنت مكانة كنت عضيتو في قفاه الغليض دا رد · · منذ ‏5‏ دقائق

.. يا خال ..
والله يستاهل العضـة فعلا .. لكن المشكلة النوعية دي لو عضيته .. بتسممك

والله يا الاسمك عبد الله حســن دا .. كنت عايز ارد ليك .. لكن اعفيني .. لما اصل للمستوى البرد فيهو على نوعيتك دي .. صدقني يا امـا كتلوني يا اما ضربوني رصاص ..
او كما جاء في النكتـه اياها ..
..
مبالغـة .. لكن .. حتى نوعيتك دي يا ود امي عادي بقت تفتي وتصنف ؟؟

غايتو حظك سمح .. لقيتنا عقلنـا وكبرنـا ..

Quote: مع أنّ من الممكن جداً تعدد الأفعال وتوازيها حتى في نفس الحيّز الزمني

لا يمكن مطلقــا يا فرانكلي .. لا يمكـن ..
ففي نفس الوقـت الذي هم فيه بعض المبدعيــن لقيام حفل من اجل الدعم .. تم الالغاء .. وذلك تحت بند الخروج لمسيرة التأئيد لمرسي ..
وفي نفس الوقت الذي تنتظم فيه حملـة نفير بسواعد بنينه وبناته .. كان والي الخرطوم في قناة النيل الأزرق يسخر ويتسمخر الوقت الذي هو مطالب فيه ان يكون مشمر لساعده .. او على اقل تقدير يعلن استقالته على الهواء مباشرة نتاج ضعفـه .. وضعف بنيته التحتية ..
ونتاج استفزازه لشعب صابر جدا ..

.


الزول ده ما واقف ورا المعتمد،
المعتمد هو الجا وقف قدامو!



كل عام وانتم بخير يا علاء


.

Quote: الزول ده ما واقف ورا المعتمد، المعتمد هو الجا وقف قدامو!

كل سنـة وانت طيب يا يزل ..
بعدين عليك الله مش بركـة زاتو المعتمد جا ووقف ..؟

.

وجـه مـعـبـر حـيـرة ،
ثــم دهـــشـــة ،
ســــلام تـمـبـس ،
بـــلادي ســـلام ،
،،،

...







عزالدين عباس الفحل
ابوظبي
...

Quote: وجـه مـعـبـر حـيـرة ، ثــم دهـــشـــة ، ســــلام تـمـبـس ، بـــلادي ســـلام ،

وجه معبر شديد يا الفحل ,, اختذل المشكلة كلها في النظرة دي

أنا غايتو لو محل بكري ... كنت منحته عضوية مباشرة ..

بس يخت صورته مع المعتمد .... ويمشى

بكدا يكون جسد معاناة الشعب ... وموت ضمير المسؤلين


كل عام وانت بخير







الشغيل

Quote: Koria Tree · Unv أجي يا تمبس انت قلبت ولاشنه ؟؟ رد · · ‏18 أغسطس‏، الساعة ‏11:41 صباحاً‏

لالا طبعا لسة كوز ولسـة ما قلبته .. لما اجي اقلب .. ح اديك خبر انته والاسمو عبد الله الحسن دا .. عشان تدوني الفاتحــة . هو انا بعرف احسن منكم ..؟

الله عليك يا علاء
you made my day زي ما بقولوا
بالأخص ردودك على Frankly
قال مصر قال...بالله فكونا منها السيرة العاضة دي و خلونا في كوارثنا و مآسينا
الله يكون في عون اهلنا بس
...

Quote: قال مصر قال...بالله فكونا منها السيرة العاضة دي و خلونا في كوارثنا و مآسينا الله يكون في عون اهلنا بس

اخونا زمان زياد .. إن شاء الهل دائما مبسوط يا زول وايامك كلها زي الورد ..
والله اعتقد انو سبب الحاصل علينا دا كلو هو انشغالنا بي غيرنا والواحد فينا مالي دماغو بي حاجات دماغو ما بقدر يستوعبـه ..
ياخ ان ايه دخلي برابعة العدوية واللا خامســة العدوية .. والمويـة شاره في راس اهلي وحيطم بتقع والشفع راجياهم الملاريا والتايفويد ..؟
ماف سبب واحد بخليني اهتف واتشنج وارفع يديني علشان اسال الله بالدعاء .. غير انو يفرج كربتي انا ذاتي .. ويلطف بي اهلي ..
لو انفجرت انبوبـة غاز في ليبيا لخرجنا في مسيرة ضخمة .. لو تناطح اتنين في ميدان رمسيس لخرجنا في مسيرة .. لو لم تنزل الأمطار في جنيف .. لخرجنا لصلاة الاستسغاء من أجل زراعـة زهور جنيف ..وإلخ إلخ ..
سوف لن اضيع اي ثانية يا زياد في التفكير والكتابة في شؤون مصر ، وانا اهلي بموتو .. مصر ليها ناسا وبي طريقتم .. يحلحلو مشاكلم بعيد عننا .. ونحن لينا مآسينا ومشاكلنا ربنا يعينا عليها لانو لو زعناها على العالم اجمع ماف زول بحلها لينا

Quote: كنت منحته عضوية مباشرة .. بس يخت صورته مع المعتمد .... ويمشى

هههههههه ..
والله يا الشغيل .. مفروض بكري يعمل ليهو صفحـة راسه عديل .. والناس المصصماتية حقو ينتبهو للزول دا .. ويعمل مقارنة صوريـة بين قرفتو دي .. وبين المسؤولين الجلوده تخينه ديل ..
..

كل سنة وانت طيب يا الشغيل ..

علاء ازيك
ياخي دا مشروع واعد بتاع شخصية كرتونية زي (أساحبي)
تتفتشب وتتكرتن وتتلصق على اي موضوع او اي زول جاعوتو عالية ساي
كل سنة وانت طيب

Quote: علاء ازيك ياخي دا مشروع واعد بتاع شخصية كرتونية زي (أساحبي) تتفتشب وتتكرتن وتتلصق على اي موضوع او اي زول جاعوتو عالية ساي كل سنة وانت طيب

طاهر كيفنك ..؟ وكل سنة وانت بالف خير ..
والله كلامك صاح يا طاهر وانا تحديدا جبتها عشان الحركة دي .. حسع اخوانـا ( الفتشابـه ) (والكاركتيرسكيــة ) مفروض يصرو على الشخصية دي شديد .. ويعملو منها شربات .. الناس دي ح تنتبه متين للحاجات الممكن تحرك الشعب ..؟
ياخ دا شعار ولوقو عالمي عديل كدا .. يتلصق على اكياس العيش .. على قمصان الشفع للمدرسـة على تياب ندى القلعـة البي الشي الفلاني دي .. على برنامج اغاني واغاني ..
واهممممممممم حاجة على صندوق شاي الغزالتين عشان ما تقولو حرمتكم من ايتها حاجة ..
شخصية اساحبي لاقت رواج لانها شخصية شعبية ومعبرة وبسيطـة وقدرنا نتعامل معاها ونلبسه عمه واحساس بالرغم من انها ما تبعنا ..
لكن عاين دي مقشرة كيفنها ..؟
بتشتغل في اي مكان ..
في قرفنـا بتشتغل ..
في لا لقهر النساء بتشتغل ..
في اطلعو من نفسياتنا بتشتغل ..
في شعار المنتخب القومي برضو بتشتغل وشغل نضيف جدا كمان ..

انا اقترح انها تبقى بدل صقر الجديان في شعار الجمهورية اصلو قاعد ليها مليون سنـة بقى طيران ما بقدر يطير ..

الاخ علاء
كل عام وانت وأسرتك بالف خير
بالله يا علاء أقرأ تصريحات علي كرتي، واتفرج...وخد "وجه الزول الواقف ورا المعتمد) ....أيقونة جديدة (ولك حق الملكية الفكرية)....

Quote: قال وزير الخارجية السوداني على كرتي إن موقف بلاده "واضح، وهو أن ما تشهده مصر شأن داخلي ولا زلنا نصر على أن الحل لا بد أن يكون مصريا". جاء ذلك في تصريحات لكرتي خلال مؤتمر صحفي مشترك، عقب مباحثات مع نظيره المصري نبيل فهمي، الذي وصل الخرطوم صباح اليوم في أول زيارة خارجية له. وعن العلاقة التي تربط بين الحزب الحاكم في السودان وجماعة الإخوان المسلمين في مصر، قال كرتي إن "القضية أعقد من علاقتنا بحزب كان يتولى السلطة، فالعلاقة بين البلدين كانت محل اهتمام من كل الحكومات المتعاقبة في البلدين وسنحافظ عليها كما ورثناها". وتابع: "موقفنا هو أن تعالج مصر قضاياها دون تدخل خارجي وأنا ناقشت مع الوزير المصري كيفية أن تخرج مصر عاجلا من هذه الأزمة بالحوار". وقال كرتي إن "على مصر الصبر على الحوار مع الاتحاد الإفريقي لتجاوز آثار قراره بتجميد العضوية".

Quote: Mohamed Jamal · الأكثر تعليقا · ENSA Oujda تاني خلي واحد يجي يقول لي تمبس دا انقاذي ولا أمنجي ولا شنو كدا ما عارف. بل انها المعارضة الواعية المتبصرة فحين الصواب تقول صواباً وحين الخطأ تقول خطأ

يا جمال .. الله يديك العافية ياخ ..
لكن انت قايل الوهم القاعدين يقولو ديل زي الاشباح ناس كوريا دا والاسمو مين دا .. وبقية المواهيم الحايمين في منبر سودانيزاونلاين ديل قايلنا بنشتغل بيهم ..؟
والله يا جمال لو الواحد بشتغل بيهم كان من زمان لبس ليهو حزام ناسف وجا فجر ليهم موقع بكري دا عشان تاني يكتبو في حيطان صوالينم ..
المشكلة يا محمد وبي نظرة بسيطة بس عليك الله عاين ليهم واقرا كتاباتم بي تمعن .. ح تلقى انو البعملو فوقو دا .. هو البخلينا نفرز عيشتنا منهم .. ونطلع فوقم ونحن ماشين ..
الحمد لله عند عقل بنميز بيهو ونفهم بيهو .. ما جاريين لينا من خلف قطيع يجيد الصراخ والتطبيل

ولو كان لديك نقد للمعارضة ... إذهب به إلى "الدانقا" .... فهم قوم لا يحبون النقد والمنتقدين ...

يسقط يسقط حكم العسكر ...



... المهم ....

Quote: تاني خلي واحد يجي يقول لي تمبس دا انقاذي ولا أمنجي ولا شنو كدا ما عارف.

هههههههه
يا محمد جمال ما يغرك بنطلون الجينز والفنلة الكت والساعة الملبوسة في اليد اليمين دي
تامبا دا كوز وأمنجي وما عارف شنو .
زول هلالابي مسكين تتوقع منو شنو أكتر من أن يكون الحاجات الفوق دي ؟
............
تامبا يا كوز الاغاثة كيف ؟؟ هههههههه

Quote: سوف لن اضيع اي ثانية يا زياد في التفكير والكتابة في شؤون مصر ، وانا اهلي بموتو .. مصر ليها ناسا وبي طريقتم .. يحلحلو مشاكلم بعيد عننا .. ونحن لينا مآسينا ومشاكلنا ربنا يعينا عليها لانو لو زعناها على العالم اجمع ماف زول بحلها لينا

و تاني صفقة ليك يا تمبس يا واعي
ليت ناس Naser و سيف اليزل البرعي و من لف لفهم يسمعون..طرشونا في المنبر مصر مصر مصر

Quote: و تاني صفقة ليك يا تمبس يا واعي

غايتو الليلة يا زياد جيهتني جيهه جد .. لكن والله بالجد حسع دي في اسماء بقيت لما اللقاها ظاهرة في اي بوست .. قاعد اخليهو مهما يكون شكل العنوان ..
ياريت بس لو بي نفس الهمة والجهد الناس دي اترصت مع بعض .. اضعف الايامان لي يوم واحد بس .. ما نتفق ولا اي حاجة .. لكن اقلاهو ننسى سيرة مصر دي ونقفل بابه شويتين ..

كل عام وأنت بخير يا تمبس
مبسوط جدا من كتابتك
رغم إنه الواحد بقى على طول مبوز من البحصل في البلد
ومن كلام المبرراتية الما بخلص دا
ياخ الزول دا لو فكوا ليه المعتمد دا بدون حراسة
كان عدموا ليك الريشة

هههههههه ..
شكرا يا منتصر عبد الباسط .. شغلك نضيف ومعبر زي اخونا الواقف ورا الزول دا

Quote: ومن كلام المبرراتية الما بخلص دا ياخ الزول دا لو فكوا ليه المعتمد دا بدون حراسة كان عدموا ليك الريشة

وانت طيب يا استاذ جعفر وربنا يديم الانبساطـة ..
بالمناسبة .. الزول دا وصل آخر مرحلة تحمل المصروف منها للشعب السوداني .. وبعد كدا طبعا اي كلام ما بيمشي فيهو ..
يللا دي النوعية المنها خوف .. منها خوف من كل النواحي .. زول زي دا ربنا زاتو ما بيرد ليهو دعوة .. لانو مظلوم .. وكان دخل في الحتة بتاعت يقلع حقو بي ايدو .. صدقني الزعمطة بتحصل
استغرب معاك انا لحال المبرراتية ديل .. وبسال نفسي طوالي .. الناس دي ساكنه في برج عالي واللا ما عندها حيطان قاعدة تقع .. واللا ما عندهم اهل عنجهم شفع صغار ؟؟