Post: #1
Title: الباوقة وأبناءها ، لهم الحب
Author: ودقاسم
Date: 08-07-2013, 01:55 PM
سنة 1977 وأنا خريج جديد سكنت في منزل صديقي الفاضل عباس محمد علي ، برفقة شقيقه محمد، وكان الفاضل يستأجر منزلا بامتداد ناصر لسكنى أسرته لكنه اضطر لظروف أكاديمية أن يعيد أسرته مؤقتا إلى مسقط رأسه ويترك لنا البيت مفروشا مؤثثا لنعيش فيه ، وكان يزورنا من وقت لآخر خاصة في نهاية الاسبوع ... لا أدري كم من الزمن مكثنا على هذا الحال لكنه كان أمرا طيبا ممتعا وكان المنزل ملتقى للمثقفين والأدباء والفنانين من الذين كنا نعرف في تلك الفترة .. وفي يوم من أيام سنة 1978 علمنا من الأخ الفاضل أن أسرته ستعود إلى دارها ...
تحركت يمفردي إلى أم درمان ، وفي حي البوستة لي صديق وزميل دراسة ( يوسف شمام ) ، قلت أزوره لعلي أجد لي بينهم مكانا يسعني .. قضيت ليل الخميس ونهار الجمعة مع هذاالصديق وعلمت أن بيتهم يتحمل أكثر من طاقته ... وبينما نحن نمارس لعب الكوتشينة قإذا بأحد الأصدقاء يدخل علينا ... رحبنا بقدومه ، وقد فاجأه وجودي هنا ..لكنه كان سعيدا جدا بهذا اللقاء الذي جمعنا ... كان هذا الصديق هو محمد عبد المنعم الشهير ب فوكس ، وهو رجل غاية في اللطف والرقة ، يتمتع بصفات اجتماعية استثنائية تؤطرها قيم إنسانية رفيعة ... وكان فوكس غاية في االتهذيب ، مثقف لا يشق له غبار ...
تآنسنا وجمعت جلستنا كل من بالبيت من العزاب ، إذ أن فوكس يجذبك للاستماع والاستمتاع .. وعرف فوكس حكايتي مع موضوع السكن وحاجتي الماسة لمأوى ... ولم يتردد في طرح الفكرة فورا :
يا أستاذ أقول ليك حاجة ، أنا ما أحل ليك الموضوع ده حل جذري ..
والله يا فوكس تكون قدمت لي خدمة العمر لأني الليلة أنا ما عارف أبيت وين ، وهدومي في امتداد ناصر في بيت الفاضل
بالله قلت لي الفاضل تاني رحّع الأولاد ؟
آي والله
طيب ومحمد عباس وين بيمشي ؟
والله طبعا محمد مشكلتو أخف من مشكلتي لأنو ده بيت أخوه
والله تعرف بس البيت ضيق ، لكن يازول خلينا نحل ليك مشكلتك وبعدين نشوف موضوع محمد ..
أها عندك لي سكن وين ؟
أبدا معاي في البيت الأنا ساكن فيهو سنتشارك نفس الغرفة ...
وين البيت ده ؟
بحري حلة حمد
ياراجل انت جاد
آي والله ، وأقول قولة يلا من دربك دا على البيت
كدي يافوكس خلينا نشوف موضوع السرير والهدوم الفي امتداد ناصر
يا ود قاسم نمشي سوق بحري نشتري ليك سرير ومرتبة ومخدة وملايتين، وهدومك اللابسه دي بكرة بتوديك الشغل...
وبين الحين والآخر كان يتدخل الصديق شمام ليشجعنا في اتجاه السكنى المشتركة.. ياخ ما معقول ، ياخ اصلو ما ممكن .. لا حولا ياخ دي جاتك من السما ..
طيب يا فوكس انت معاك منو في البيت ؟
والله ياودقاسم معاي جماعة من أهلي ، كلهم من ناس الباوقة ، وانت الوحيد الحا تكون معانا وما ليك علاقة بالباوقة ..
طيب وناس الباوقة ديل يا ربي بيوافقوا على سكني معاهم ؟
يا ودقاسم سيب الأمور دي علي أنا ، انت ماليك علاقة .. ديل أهلي وأنا عارفهم كويس ..
|
Post: #2
Title: Re: الباوقة وأبناءها ، لهم الحب
Author: وليد شريف
Date: 08-07-2013, 02:04 PM
Parent: #1
حبابك ود قاسم ومرحب بيك دائماً وسط اهلك ناس الباوقة وعبرك التحايا للاخ الاستاذ محمد عبد المنعم
|
Post: #3
Title: Re: الباوقة وأبناءها ، لهم الحب
Author: معاوية المدير
Date: 08-08-2013, 05:29 AM
Parent: #2
كـــل عـــامـ وأنـــتـــمـ بـــخـــيـــر .
ألف تحية لك يا ود قاسم...
|
|