ناس السعودية...فى طريقة امشي السعودية ضهب ساى?

عاوزة امشي السعودية...لكن ما حج او عمرة (ما فى زول يقول لى ليه ما عاوزة تحجى او تعمرى. عندى اسبابى خاصة جدا و اللى ربنا اعلم بيها).
ما عندى فيها اقارب درجة اولى. عندى اختى حبيبتى مريم بت الحسين لكن ما عندنا ورق رسمى يثبت الاخوة دى :)
اها يا جماعة ممكن امشي السعودية ???

رمضان كريم

ممكن نشوف ليك شركة تعمل ليك تأشيرة زيارة عمل

بس حكاية تشيلي جوازك وتمشي المطار دي ما بتقسم معانا

لو عندك جواز امريكي - امشي السفارة السعودية - واطلبي زيارة
بيدوكي زيارة لمدة خمس سنين بكل سهولة

نسيت اقول ان عندى جوازين شغالات (الاخضر القيافة, وجواز اخر)
ايهم افضل لدخول المملكة?

شكرا يا حمد على الرد....
لكن بالجد كده, ما فى طريقة زول يجى السعودية يزور اصحابه ?
ضهب مافى كلو كلو ???!!!!!

سلامات يا ايمن....
5 سنوات زيارة عديل كده ? بالجد الكلام ده ?
شكرا جزيلا على الخبر الحلو
_______________________
مريم ...اتجهزي...جاينك زيارة سنة واحدة كده :)

رمضان كريم سمارت أنا

شوفي الرابط دا فقد يفيد- أعتقد أن الزيارة للسعودية بشروط :

http://www.a1ye.com/show_articles.php?id=130

أعتقد الفقرة دي هي التي تتعلق بحالتك :

الزيارة لغرض السياحة ( التأشيرات السياحية ) :
وتمنح وفقا للتالي :ـ
ـ تمنح لمواطني الدول التالية: ( الأوروبية ـ الأمريكيتين ـ اليابان ـ الصين الشعبية ـ الصين الوطنية ـ سنغافورة ـ ماليزيا ـ بر وناي ـ استراليا ـ كوريا الجنوبية ـ جنوب أفريقيا ) عن طريق التقدم لأحد الشركات المعتمدة التي بدورها تقدم الجوازات للممثلية المعنية بعد حصولها على أرقام التأشيرات .
ـ يكون قدوم السائحين وإقامتهم تحت رعاية واستضافة جهات معينة ومرخص لها بمزاولة خدمة واستقبال ونقل السائحين القادمين من خارج المملكة والإشراف على إقامتهم ومغادرتهم
ـ يتم قدوم السائحين ضمن مجموعات بحيث لا تقل كل مجموعة عن أربعة أشخاص .
ـ أن لا يقل عمر المرأة المطلوب التأشير لها عن ثلاثين عاما وما دون ذلك يكون قدومها مع محرم .
ـ ألا تشتمل البرامج السياحية والزيارات المناطق المحظورة على غير المسلمين (مكة المكرمة ـ المدينة المنورة)
ـ أن تعامل طلبات السائحين من الدول المشار إليها أعلاه المتواجدين في غير بلدانهم وفق ما يعامل به غيرهم بأن يكون قدومهم ضمن مجموعات وان تتولى تقديم التأشيرات لهم جهات مختصة مرخص لها من الهيئة العليا للسياحة.
ـ يستطيع من يرغب في القدوم للمملكة لغرض السياحة الحصول على معلومات عن الشركات السعودية المرخص لها عن طريق موقع المملكة السياحي www.sauditourism.com.sa . كما يمكن للراغب في الحصول على تأشيرات سياحية الاتصال

بأحد مكاتب الخطوط السعودية أو وكلائها المعتمدين في الخارج للحصول على التأشيرة عن طريق برنامج "اكتشف المملكة"

و الله إضهبي غادي غادي ..
أرض الله واسعة ..

نصيحة لله ..

شنو يا اخونا عبداللطيف خليل ???
ماذا به الضهب فى السعودية?
صحباتى كلهم (فجاءة) بقوا فى السعودية. بقت لازمانى مشية. :)

سماراات ..

جواز امريكي بلص كلامك العربي واصلك السوداني =تاشيره زياره ملتي انتري
بس اتضهبي بالحجاب لانو ناس الهيئه صعبين هناك .. ما تنسي يوم تلبسي بنطلون وتدخلي نفسك في حيص بيص
والامركان ما بيحلوك من ناس الهيئه ..انا بحب السعوديين جدا (ناس) لكن عندهم ناس الهيئه وصعبين ..لهذا لا اتضهب في اراضيهم البته ..

وربنا معاك ..

الزمي الجابرة يا مريم :) اسمارت مش حتقدر تجي ضهب ساي
لانو السعودية لغت نظام الزيارة المفتوحة لمدة خمس سنوات للامريكان الضهب
اشترطوا ان يكون لديك عمل محدد هنا ومع شركة سعودية
عليك بحمد كان ما يطلعك بخوجلي :)

والدليل هنا :
السفارة السعودية بواشنطن

إنتي بالذات محتاجة لمحرمين

ياخ إنتي بكري حاقربيك زي الماحاجة
....بريمة العبار الهولنا دا عندو مكتبة
تجي تقولي لينا أنا ماشة السعودية عشان تشتري الدهب
لأنو سعرو وقع في الواطة.

أسمعي إستعملي الجواز السوداني

سلامات يا مجاهد. كتر خيرك و بارك الله فيك.
بنقدر نتم اربعة لو جبتا الاولاد معاى. لكن من الكلام ده الموضوع شكله ما مستحيل. حاول اضرب تلفون للسفارة و اشوف بيقولوا شنو

سلامات يا اخونا محب....من ناحية الحجاب دى ما تخاف على اختك. انا فى امريكا حايمة بالحجاب. بس موضوع النقاب و غطى الوش ده ح يكون شوية صعب.
يا جماعة ...الضيوف برضوا يغطوا وشهم بالاسود ??

اخونا محمد ابراهيم ....رمضان كريم
Commercial Visa دى لرجال الاعمال بس. انا جاية ما عندى اى اعمال غير عمل الخير و زيارة الاصحاب :)
مريم استنى شوية...لسه فى امل اجى


كوستاوى...رمضان كريم. دهب شنو يا اخى? الدهب بقى راقد فى امريكا. تمشي المحل تفتتش فى الكتلوج , تعزل , بعد شوية بيجيبوه ليك.
تعرف بريمة ح يسيب كل البوست ويمسك لى فى موضوع الحج والعمرة ده. انا ما ح ارد عليه. عليك رد انت يا كوستاوى.

اخونا محمد جمال من الفيسبوك....

Quote: الجواز الأخضر لو الليلنا تبليهو وما تشربي مويتو عشان ما تتسممي دا دارفور ما يدخلك

رمضان كريم....بالغتا فيها دى. ما ح ابله فى موية من هيئة مياه المدن فى الخرطوم....

Quote: عندى اختى حبيبتى مريم بت الحسين لكن ما عندنا ورق رسمى يثبت الاخوة دى

والله السودانيين حكايتم حكاية،الجوه دايرين المرقة،الفي امريكا مشي السعودية ،والفي السعودية داير يمرق علي امريكا بعد بلغ سن المعاش،اها يا جماعة الخير نسعلكم،نحن تطير عيشتنا مافي اصلو امل الصحاب اتلمو في البلد تاني.

اسمارت

سلام .. ورمضان كريم وتشرفينا ياخ
في اعتقادي اسلم طريقة هي انك تعمل تأشيرة عمرة
وما تعمري ولا تحجي :)
بواسطة هذه التأشيرة يمكنك التنقل داخل المملكة بحرية تامة

الا زول يعمل ليك فيزا من السعوديه او عُمرة ..والعُمرة البروسيسر بتاعا طويل جدا (الا عن طريق مكاتب وحجز فندقي و.... نقة كتيرة )

انتي ما تلمي حق التذاكر -على قدر الجماعة- ونجيبم ليك هناك قبلك في بلاد اونكل سام دي
واني بنجو معالعفش


















--------

المافي شنو!؟

خدماتنا دي ما بنقدما لي اي زول .. دا عرض خاص

إتلاقوا في البحرين إنتي ومريم حبيبتك ..
مريم مفروض في المنطقة الشرقية والبحرين منهم بيمشوها بي الدفار في نص ساعة وبي الهايس في تلتين دقيقة ..
والبحرين هاااملة بتخوشيها بي جوازك اللآخر ..
وأي زول من أصحابك الأخرين يبقا مارق على البحرين سااااي ..
لكن للضمااان كده ما تلاقي دكتور معز .. بيديك غنية طواااالي :):):):)

علي عبد الله حسن. رمضان كريم.

عبد الغزيز عثمان، رمضان كريم. انا ماشة السعودية إجازة بس. لو بالغتا أسبوع أو عشرة يوم. أمريكا دي أصلي ما طالعة منها ( بإذن الله طبعا)

الأمين بشاري. رمضان كريم. و كتر خيرك. الوحيد من بداية البوست اللي قال لي اتفضلي.
اعمل تأشيرة عمرة و ما اعمل عمرة؟ الناس ح تشيل حسي يا أخي.
بعدين ما شفتا معاوية قال موضوع العمرة ده برنااااامج.

معاوية، كيف يعني زول يرسل لي فيزا؟ شغل يعني ؟


وينك يا قيقا؟ رمضان كريم يا رجل.
يا أخي عاوزة أشوف السعودية دي للزمن و الدنيا.
تشرفونا في بلاد العم سام. بس التذاكر عليكم. انت شكلك ما مصدق أني أهلي قاعدة اعمل منهم ميتة و بخليهم يشتروا تذاكرهم براهم من السودان. هسي انا قلتا ناس السعودية يشتروا لي تذكرة؟ أي زول عاوز يحوم يستحمل نتيجة حوامته.

عمر الفاروق. مشتاقين يا أخي. :)
أقول للناس نتلاقي في البحرين؟ انا عاوزة اعمل الحركات اللي بيعملولها لي أصحابي هنا. امشي استقبل في المطار، افسح في الولاية و الولايات المجاورة، اعمل كم عزومة لأي زول بيعرفهم ( و بيعرف جيران حبوبة جيرانهم) في بلدنا دي.
لو مشينا البحرين بنبقي كلنا سياح في البحرين:(
هسي انت ما تعزمنا يا أخي. ان شاء الله عزومة مراكبية.
اسمها قصيدة!

حبابكـ يا سمارط!
تمشي ع السفارة السعودية محل ما قاعدة وتخلصي أموركـ!


بالمناسبة حتى الزيارة لمدة 5 سنوات بحسب المزاج
عادي ممكن تاخديها حتى الآن .. وعادي ممكن يعملو ليكـ لايكـ بس!!

قبل اتم باقي البوست، you just made my day... بابا نبّهني للبوست ده ما شفته لاني اساساً سودانيزاونلاين بدخلها سرقة

النمشي اتم البوست واجي، اوضتكم جاهزة... ومحمود ولولو جاهزين مما اتولدوا.. بحبوا الناس مووووووت، والعجب كان اختي ... اختي لزم يا اخوانا..

Quote: بابا نبّهني للبوست ده

خووووود...
يا إسمارت يا أختي مريم دي طلعت ناس بابا وماما ..
وإنتي ناس يا حاج (عليه الرحمة ) ويا حاجة ويمة الفندك في التكل ؟؟
ما بنصحك تكملي في مشروع الزيارة ده وأقترح عليك تمشي لي ناس راوية العباسي .. ::):)
طبعا عااارفك بي قوة راسك ومساااختك ديييك ح تجي تقولي لي يا عمر انا بقوول مااامي وبااابي ..

Quote: خووووود... يا إسمارت يا أختي مريم دي طلعت ناس بابا وماما ..

انا حالتي جايه اشكّر ليك فكرة البحرين باعتباره تفكير خارج الصندوق... سمارت دي ما تشوف الشلاليت البتديكم ليها هنا دي، زولة رقيقة خلاص... انا بحس بالنشفان لما اتكلم معاها والعلع... زولة هااااادئة وراسية...


سمارت... اتصلي بالسفارة السعودية، ووريني الببقى شنو... انا من هنا بشوف الواسطة الماخمج...


ناس العمرة ما بخلّوهم يلفّوا ساي في البلد يا جماعة... عشان كده احنا نشوف خيار الزيارة احسن... انا بسعى من جوّة البلد وانت من هناك...


سمارت، مافي نقاب ولا شي.. انا لي تمانية سنين في البلد دي، في بيتي ما دخل إلا لابساه مره .. وطرحتي ما قاعده اربطها لاني ما محجّبة اساساً... لابسه الuniform بس .. قصدي العباية...

Quote: لكن للضمااان كده ما تلاقي دكتور معز .. بيديك غنية طواااالي :):):):)

Quote: ما بنصحك تكملي في مشروع الزيارة ده وأقترح عليك تمشي لي ناس راوية العباسي .. ::):)

أخير البحرين على الرغم من معزها وأغانيه الطويلة.

أولاً مرحب بيك كتير جداً

تعرفي لو كنتي ما متزوجة كنتي لقيتي ردود إيجابية كتيرة

وفي واحدين لو ما أخاف الكضب كان بيعملوا ليك إستقدام عديل (إقامة)

لكن عشان انتي متزوجة قعدوا يفتشوا في التعقيدات

Quote: ناس السعودية...فى طريقة امشي السعودية ضهب ساى?

اسـمارت ,,,,,

ســلام

1 / لا مافي طريقة
2 / زيارتك دي تشـبه ما قالو فرح ود تكتوك( لو رضت بي خيت العنكبوت تنقاد
و كان ابت تقطـع سـلسل الحـداد) , أها لو ربنا اراد الزيارة تجيك و انت في بيتك
وكمان لو مرات بي كســر الرقبة ما بتجي
3 / غايتو حاولي كل ما كتبه الوملاء ديل حتى اقتراح قيقراوي ( بالقديم )

اها رايـك شــنو تمشــي تتضهببي في المســعودية بدل السـعودية و برضو هناك عندك اصحاب
و ح يقومو بالواجب و يفسـحوك فســحة حبيبك في القرية و القرى المجاورة




ياختي بتهضربي مالك , انتي صايمه و العطش حصل ( قالو بلدكم ســخنه خالص ) ولا شـنو؟
ما في اي تضيهب , عندنا , حج , عمـرة , عـلاج , عمـل و بالعكس

أهلا بيك يا سمارت في السعودية
مريم في الشرقية
ونحن في جدة باقي السودانيين البيجو السعودية لازم يزوروا باب شريف
أما فيما يخص الجوازات فالآخر هو الأنسب

Quote: أولاً مرحب بيك كتير جداً تعرفي لو كنتي ما متزوجة كنتي لقيتي ردود إيجابية كتيرة وفي واحدين لو ما أخاف الكضب كان بيعملوا ليك إستقدام عديل (إقامة) لكن عشان انتي متزوجة قعدوا يفتشوا في التعقيدات

مريومة يا بت الحسين..
علييك الله ما تشكري لي الراكوبة في الخريف...
اصصصلو ماف بت قرت هندسة رقيقة وحساسة اللهم الا بنات معمار..
الباقيات ديل الواحدة فيهن بتكون بتجي الجامعة بالكدارة. وبتشيل منكم الشيرينق حق البوش وهي ما تدفع وتشيل الباقي للمواصلات ...

Quote: الباقيات ديل الواحدة فيهن بتكون بتجي الجامعة بالكدارة. وبتشيل منكم الشيرينق حق البوش وهي ما تدفع وتشيل الباقي للمواصلات ...

أها دي اولاد معمار ما يعملوها

أسهل طريقة برايي هي تاشيرة عمرة بس في حدود علمي ان التنقل بهذه التأشيرة يقتصر على المدن : مكة والمدينة وجدة
معارفك يتجمعوا في واحدة من المدن دي
في طريقة تانية للحصول على تأشيرة تخول البقاء لك لفترة أطول في السعودية ممكن ان تمتد لتلاتة شهور وتتيح التنقل بحرية في كل المناطق وهي تاشيرة عمل
بس يكون في واحد واصل ويكون (قرن) في الجهة التي يعمل بها ... مش قرن كبير ... كتيرين ممكن يسووها ، يقدّم الطلب من موقع وزارة الخارجية ويدخل بياناتك ويكتب في خانة مبررات الزيارة مناقشة علاقات تجارية أو إستشارة او اي حاجة
لكن الطلب المقدم بهذه الطريقة يخضع للمراجعة من الجهات المختصة ولازم تجي عليها موافقة



المشاركة دي بعد ما طارت لميت فيها عملت back كم مرة لحدي ما لميت فيها ، غايتو مطكتوب لي ادلو بدلوي وياريت يكون (إقتراحي في الأضية) به بعض الافادة

يا ايمن ياخ انا بعرف واحدة بتقرا ميكانيكا بتسف..

يا الفاروق

زمان بقولوا بنات كومبيوتر جكس بارد... لاننا بنشتغل في معامل فيها مكيّفات...
سمارت صاحبتي دي الاستثناء ياخ، لسانها طويل ساي... انت بس شفته عينات كعبة... انت متأكد مشيت كلية الهندسة ولا سوق ليبيا!


سمارت، حل الزيارة وارد، صحي مافي تطابق اسماء لكن بنحاولها...
في عمره سمعته بيها اسمها عمره سياحية، كدي اسألي منها هنا لو في خيار زي ده.. البعرفه انها بتخلي الزول يتحرك عادي في البلد، ما زي العمرة العادية

Quote: لكن للضمااان كده ما تلاقي دكتور معز .. بيديك غنية طواااالي :):):):)

بدءآ البوست دا نال اعجابي والله ( لغرابة الموضوع ، وحلاوة روح ستو ما شاء الله )
يمكن طالعت كل التعليقات ، واستفدت منو جد ،،، بس الإقتباس أعلاه ريحي مساااااااااااااااااااااااحه ^_^
واعتقد انو الضهب في السعوديه بيحتاج فتوى تستند لي فقه الضروره ، فصل الحاجات المُلِحه كااااك

في كل الاحوال وقت ماتصلي الف مرحب بيك اختنا اسمارت

سمارات كل سنه وانتي طيبه وبي الف خير لو لقيتي طريقه كلميني

و الله يا جماعة انا اااسفة جدا على الغيبة و عدم الرد. لكن كنت مزنوقة فى البيت وفى الشغل. وحجات العيد. و لحدى الان ما خبزتا. والعيد جاى و محتاجين عفش للبيت و حالة صعبة. بس الحمد لله


مريوم اختى شقيقتى....كيفك? كتر خيرك و الله على الكلمات الظريفة و المجاملة الرقيقة. عمر الفاروق ده عندى تار بايت عاوز ياخده.
انا -ان شاء الله- ناوية على الزيارة فى شهر يانير القادم. لكن انتى عارفة اختك...لازم اخطط لكل شيء من بدرى. بشوف موضوع العمرة السياحية دى ان شاء الله.
من ناحية لبستا كدارة...ما بنكر- يا مريم- 5 سنوات لابسه كدارة فى الجامعة. جنى وجن غبير الرجلين. اكتر حاجة عا########ى فى امريكا دى انى بقدر البس داك يا الكعب العالى كل يوم للشغل.

ود الصايم....يعملوا لى like بس دى بالغتا فيها.
ديل بشه ( اللى عاوز يضهب فوق... فوق) طردوه...انا احتمال يعملول لى بلوك.


عمر الفاروق...مشتاقين. وينك يا رجل?
الكضب خيبة. النصيحة ل الله كنت بقول لامى و ابوى باسماءهم (ايوه, قلة ادب). المهم... لما وصلتا 15 سنة كده و يوم بدون مناسبة ابوى (عليه رحمة الله) قال لى : يا بنت, تانى ما تقولى لى "يا برعى, يا اخى" انا ما اخوك. قلت ليه: كنت وين الزمن ده كلو? بعدين دى غلطتكم ما علمتونى.
قام سكت وما فتح الموضوع تانى. بعد عرستا و بقى عندى اولاد. اولادى بقةا يمارسوا الاندهاش لما يسمعونى بقول لامى باسمها. قمتا بقيت اقول ليها (لامى) باسم الدلع بتاعها عشان اعفى اولادى ( ونسابتى) من الخلعة كل مرة.
و الله يا عمر....ما حصل اكلتا بوش فى الجامعة. صحى انا بعتبر روحى من جكس هندسة الصعب جدا. ما بتحنك و لابسة كدارتى و شايلة my backpack و جنى دك محاضرات ....لكن ما كنتا باكل برة البيت كلو كلو. لو نسيت ساندوتشاتى فى البيت امى بتجيبهم لى فى الجامعة (ايوه امى كانت بتجينى فى الجامعة). لحدى قريب اتعلمتا الجغمسة وبقيت اكل فى استلا و ابو جابرة وامواج و بعدها الساحة و ما بعرف شنو.

ملاسي...مالكم على انت وعمر عاوزين تفتتونى مع د.معز ومع راوية ??
الاثنين اتمنى ملاقتهم...ان شاء الله


سلامات عصام فقيرى...لا يا اخى. الناس كلها ما قصرت تب.
بعدين الناس اريح ليها انى متزوجة. عشان زوجاتهم ما يهرشوهم وكده....صح يا شباب???

سلامات عبد الله احيمر....عندى اصحاب ذى الاهل فى المسعودية. و اتشرف بزيارتها. لكن ضهب السعودية ده بقى لازمنى شديد .
بلدنا دى قارة كاملة. وانا فى حتة جوها سممممح. جلدنا ذاتو بقى حلو و ما بنقدر نمشي السودان غير فى الشتاء


سلامات جعفر محي الدين...رمضان كريم. مختفى ليك زمن. ان شاء الله المانع خير.
باب شريف ده شكله كده سوق!!! صح?
انا -ذي اى سودانية محترمة- 70 % من اجازاتى فى اى مكان بقضيها فى الاسواق.

سلامات خضر الطيب...رمضان كريم


ايمن محمود..كيف يا هندسة ?
عمر الفاروق ده شكله فى واحدة مكنيكية ادته شاكوش


سلامات مهدي صلاح,,,انا ذاتى عندى رد طويييل فى البوست ده راح. دبرس بس لدرجة انى كم يوم ما قدرتا اكتبه تانى.
المشكلة انو انا عاوزين نجى كلنا كاسرة. فيزة عمل دى ما اظن تكون مناسبة. لكن لة بقى ما فى طريقة غيرها بفتح للشباب و ابوهم و اجى براى


ايمن الصادق ...كيفك? شكرا يا اخى. فقه الضرورة عديل كده?
عاد السعوديين بالغوا مع الناس الضهب الذينا ديل. احنا ناس ضهب كم يوم بس...ما عاوزين نكسر ركبة فى بلدهم


وليد عبد اللطيف....كتر خيرك يا وليد يا اخوى. يديك العافية.



هويدا شرف الدين....ح ارسل ليك بالمسنجر و نتفاهم..ان شاء الله

غايتو يا إسمارت يا إنتي لمن تكوني رايقة وتقومي لي اللذاذة مااا بتتحصلي ..:):)
ياخ الردود الكتبتيها مجتمعة دي ولو إنها كلللها في صحن واااحد لكن مكتوبة بي مزاااج عااالي رغم إنك قلتي مضغوطة ..
تكون دي بوادر ليلة القدر ؟؟؟ يا ربي؟؟ :):)

تخريمة :
للدنيا والعالمين تقاس المرأة الفالحة ونجيضة في تقييمتنا اثناء لفة العيد وإنها زولة خبازة فقط وفقط بالكعك ..فياختي لو خبيزك ناس بيتيفور وغريبة وبسكويت ويانسون ولانكشير (ولا هو إسمو شنو؟ )فطواااالي أرخينا منك..

هي ليلة القدر يا عمر. هي ليلة القدر.
تعرف أنا كل يوم بعد ما اخلص من الروتين اليومي بتكون الساعة 11 باليل و الله ما بيكون عندي حيل احك راسي. غايتو لو ربنا ما جازاني خير علي شغلي( اكل العيش) و صبري علي أولادي و أبوهم و تعاملي بروح حلوة حتي في ظل الأوضاع الراهنة، لو ربنا ما جازاني خير علي ده يكون رمضاني راح ساي. حدي الصلاة و سمع حبة قران كريم في العربية. لا تهجد و لا حتي تراويح. ربنا كريم.
عن الخبيز، قلنا الكذب شنو؟ ايوه، الكذب خيبة. أنا جربتا الكعك قبل كده، و نجح خالص خالص. لان ما عدتها. لعدة أسباب، اهمها انه ما في زول في البيت بياكله غيري. و احمد الله بقيت دفاااااار. ما محتاجة كعك. ده غير أنها احتمال تكون صدفة و ما يظبط تاني. لما أقول خبيز قصدي حبة بتوفور بعملها مع الأولاد عشان يزينوه هم و يساعدوني بس عشان يحسوا بموضوع العيد و انه في شيء فوق العادة حاصل. زينة للبيت و خبيز و هدوم جديدة حتي لي أنا و أبوهم. حاكم إحنا هنا بنتنافس مع الكرسماس. و ما إدراك ما الكرسماس في بلاد العم سام.

ســمارت
كل ســنة وانتي طيبة و يخلي ليك عيالك و أبـوهم و يخليك ليهم
وعيد مبارك ألينا أليكم و كل ســنة تيبين تيبين
ويتـم ليك ضهبك ,
يناير جو كويس في السـعودية , بس ما تنسينا من عيدية ( اول يناير , عيد اسـتقلال )

وما دمتي مصــرة أهـا خليها تكون إجازة طويييلة
عشــان تلفي من الشـمال للجنوب و من الشـرق للغرب و تكسري ركبة في الوسـط
باقي البورداب مالين المملكة ولازم تأتري ( تتفقدي ) كل واحد فيهم

ومرحب بيك و بي اســرتك في حنـوب المملكة