يا ملاسي علييك الله أشرح لي حمزة سليمان قال شنو؟؟

في سهرة الليلة اللي كانت عن اللحن والكلمة إتصلت قناة النيل الأزرق بي حمزة سليمان عشان يلدو بدلوه في الموضوع..
حمزة سليمان إتكلم زي جغلومية دقيقة كده .. عن نفسي ما فهمت فيها ولاااا حاجة وما عرفت حمزة داير يقول شنو ..
فقلت ما ليها إلا حسين ملاسي الرجل الذي يقرأ بين التلفونات بعد أن تجاوز قراءة ما بين السطور..
كما لا يفوتني أن يحضرنا الأخ الأكبر عاطف لأنو مرة زمااان ضحك فيني لمن ما رديت على مداخلة مكتوبة لي حمزة سليمان هنا في البورد ووقتها قلت ليو يا عاطف يعميني كان فهمت حاجة..

تخريمة :
أشفقت على الحضور ومقدم البرنامج بعد حمزة قفل الخط ..وقد كان ..حتتتى أخوهو ما قدر يعقب على كلامو ..

الحمد لله ما براي!!!
ياخ أنا والله لمن قمت على حيلي ودخّلت أيدي في جيبي،، بفتش في شنو ما عارف..
قلت يمكن أنا اتنشلت واللا حاجة..

غايتو ، بنحيي ذكري ثورة أكتوبر المجيدة..

يا أبو عمير اتا ما بتعرف تروق أصلو ياخ ؟؟؟

صلاح يا عبد الله ..

Quote: الحمد لله ما براي!!!

تخريمة :
انا غايتو بحيّ (ملحمة) ود الكندو ..ضأن - عجّالي - حاشي..

يا طلحة ..أسة لو إنت وصلاح مداخلاتكم دي ظهرت في وقت واحد كان وفرتو علي مداخلة ..
كنت طلّعت عبد الله برة القوس وختيتكم جوة القوس ورديت ..
يا طلحة والله انا رووقّت .. لكن هم الما بيروقو ..
ويا قول اللحو ..
إنتو كان روقّتو ..انا بوصف الشوفتو..شوفت الشعر نازل لي حنتو التحتو ..

والله يا أبو الشباب أكضب عليك لو قلتا ليك أنا فعلا عايزك تروق .. تروق شنو ؟ اتا الله ما ليك ؟
طيب لو رقت نقرأ ليك شنو تاني ؟؟
لكن قصدي جيبا شوية شوية ياخ .. ههههههههه

Quote: لكن قصدي جيبا شوية شوية ياخ

يعني قصدك كده:
أجرت قناة النيل الأزرق إتصال هاتفي بالدكتور حمزة سليمان ..هذا وبعد إنتهاء المكالمة قال مقدم البرنامج نطلع فاصل إعلاني ..وبعد الفاصل الإعلاني نسمع أغنية

عندي إحساس إنو المكالمة دي لو إستمرت دقيقتين تاني فكان الماحي سليمان قاال ليهو يا حمزة كدي خلينا في المهم ..جايي العيد ولا ما لقيت حجز؟؟

ههههههههه
معقولة برضو ..
الا هو حمزة قال شنو عليك الله ؟

المستفيد الأكبر من المكالمة كان عضو فرقة عقد الجلاد شمّت ..
حيث إستغل المكالمة في توفير إتصال دولي خصوصاً وإنو زين الدقيقة الدولية فيها غالية فأرسل تحاياه لي حبيب (ألبو) الدكتور حمزة سليمان وهنأه بالشهر الفضيل ..
غايتو يا شمّت للضمااان كده تلفون العيد محمّدك يا أخوي لأنو ما أظن تاني ناس النيل الأزرق يضربو ليو اللهم إلا لو ناس قناة السودان ما حضروا الحلقة دي..

للأسف ما سمعتو .. بس بيكون قاصد يقول - وأنا أوافقه على ذلك - إنو اللحن هو الأساس ويأتي قبل
الكلمات؛ ثم يأتي الاداء وأخيراً الكلمات؛ واحتمال انو كان عايز يقول انظروا لأسطورة محمد منير
ثم انظروا لتفاهة الكلمات التي يغنيها لتتأكدوا من نظريتي .. أي نظرية حمزة .. هذا والله أعلم.

Quote: هذا والله أعلم.

بالضبط كده يا ملاسي..
كلام حمزة ده من الكلام اللو سألوك منو قاصد شنو بتقول الله ورسوله أعلم ..
حمزة زاااتو ما أعلم بيهو ..

يا طلحة :

Quote: الا هو حمزة قال شنو عليك الله ؟

كنت عايز أقول ليك بما إنك في الأمارات فكدي أضرب ليهو أسألو هو كان قاصد شنو ..لكن تااني إتذكرت قلت بالتلفون مااا أظن تفهموا كان قاصد شنو ..فما عندك حل غير تختف كراعك مشوار كده وتصل الزول ده بالدرب عدييل وتسألو لينا معاك..

ههههههههههههه
طيب ملاسي الفوق دا قال شنو يا أبو عمير ؟؟؟؟؟
كان فهمت أدقر لي سفة في نهار رمضان دا .

يا عمر الفاروق
رمضان كريم
بجيك بى رواقه وبفهمك
لكن جملة واحدة احب اقوله ليك عشان يمكن تفهم يحدى ما ارجع ليك
الاصل فى الغنا اللحن
والشعر فن قائم بذاته ولا يمكن للموسيقى ان تكون فن تابع للشعر
وبجى بشرح ليك كلامى والامثلة الاهتديت بيها

بالمناسبة يا فاروق
انا ماشى اصلى الصبح
عندك راى فى سلوكى دة
ولا يمكن يكون عندك راى فى صلاتى
عموما برجع ليك بى مهل

هههههههه والله يا دكتور أنا إتخلعت من مداخلتك خليك من عمر بكون شرق عدييييل



رمضان كريم وربنا يتقبل

Quote: Azzam Hassan Farah Mohammad · الأكثر تعليقا طرح برنامِج [للود قضِية] في قناة النيل الأزرق مساء أمس 17/07/2013م تراتِبية الكلِمة اللحن الآداء في الأغنِية وكان الحضور مِن مُخْتصين وعمالقة (شعر/لحن/آداء)، أدار النِقاش الشاعِر الطبيب/ محمد طه القدال (وكان هو العُمدة حسب المنصب الممنوح مِن البرنامِج لِلضَيف المُمَيز) والدكتور الشاعِر المسرحي عِزالدين هِلالي (شاعِر أغنية قول النصيحة/زينب الحويرص) وأزهري محمد علي (شاعِر الـصباح الـباهى لونك/مُصْطفى سيد أحمد) والدكتور المُلحِن الماحي سُلَيْمان (مُلحِن أغنية قول النصيحة/زينب الحويرص) والشاعِر اسحاق الحلنقي والفنان أحمد شاويش والمُلحِن والفنان شمت محمد نور (عقد الجلاد) وآخرين. في أثناء النِقاش قطع مذيع البرنامِج الشاب محمد عُثمان حديث الضِيوف لِيتلقى إتصال مُبرمج مع الفنان حمزة سُلَيْمان (مُغترِب بِدَولة الإمارات) وقنب -أي حمزة سًلَيْمان- يِقول كلام خارِم بارِم ساي حرّم وتعتع وتلجْلج وقطع وحب يسْتشهد بالملحمة (لما الليل الظالم طول فجر النور من عينا اتحول) ما قِدِر يسْتحضر كلِمات القصيدة وتماها [المهم إنو]. وطبعًا كالعادة كان فاتِح التِلِفِزيون علشان يِسمع صوتو وهو بتكلم في البرنامِج وكالعادة -برضو- المذيع قال ليهو: [معليش يا أسْتاذ لو سمحت وطي صوت التلفِزِيون وأسمعنا مِن سماعة التلفون]. المفروض يا برنامِج إنو الإتِصالات الخارجِية دي تكون إضافة على البِنْقال والإنْقال في الحلقة، وده بِكون بس لما المُتصِلين بيهو يِكون في مقام أو أكبر مِن مُسْتوى الضِيوف (أكبر خِبرة وتخصُص)، هسِع حمزة سُلَيْمان -بالإضافة إلى إنو ما قال حاجة جديدة ولا حتى قديمة وكان فاتِح التِلِفِزْيون- مقامو شنو مع العمالِقة الكانو ضِيوف ها الحلقة؟!

يا حمزة ..
رمضانك كريم..
وتقبل الله صلاة الفجر ...
طبعاً ما عندي أييي شك في سلوكك كان ده كان الغيرو ..أهو براااك إنت قلت سلوكك يعني ما سلوكي أو سلوكنا ..
وكل شاة معلقة من عرقوبها ولا هو بيقولوا شنو..
بالمناسبة لو فكرتك اللحن أهم من الشعر فياخ بدل ما تهدر زمن البرنامج وزمنك وزمن المشاهدين أسة فييي ذمتك في أرقى من البساطة الجيت كتبت بيها الجملة الهنا دي؟؟؟
شوفتها بسيييطة وساااهلة وبتوصل فكرتك سريع كيف؟؟؟
ما كان في داعي للكلام الكتييير الما مفهوم ..ولا شنو ؟؟
حمزة المشكلة ما في إنك تشرح لي أسة .. لأنو في ناس كتااار حضرو الحلقة دي وما أظن بيقرو نت .. أها ديل ح تفهمهم كييف؟؟؟

ينقسم الهواة من حيث كونهم هواة - إلى قسمين:

قسم يحب (الرقم) المميز...

وقسم آخر يموت في (الضرب) المميز...

قطعاً لم أجد لنفسي مكاناً بين هواة (الأرقام)...

فاخترت لنفسي عكازاً غليظاً مضبباً...

وشنقت طاقيتي وحدثت نفسي أن:

يا ولد المافي شنو هسي؟؟


عمر الفاروق...

أحبك ياخ..

صلاح وطلحة وحسين وحمزة حتى عزام الظريف وجميع المشاركين والقراء..

أحبكم برضو..ورمضان كريم..

..

..

Quote: لكن جملة واحدة احب اقوله ليك عشان يمكن تفهم يحدى ما ارجع ليك الاصل فى الغنا اللحن

شكراً يا حمزة .. وشكراً يا عمر أن طلبت شرحاً من الشخص المناسب.

حسين ملاسي لا يجرؤ علي "الفصاحة" وفي علمه ان صاحب الشأن بالجوار , لذا ما ان تداخل حمزة سليمان الا وبدا حسين ملاسي يوزع الشكر يمينا ويسارا وما فاضل ليهو الا يبارك العيد للاهل باللعوتة ويزجى التحايا للعرسان بحلفا الجديدة
اما فصلة عمر الفاروغ ( التاريخية) ما ان تداخل حمزة سليمان والخلعة البانت في حروفه واذهبت التنطع والتريقة عن حروفه التي بدا بها الحديث وانتهي بمداخلة بعد حضور سيد الشي زاتا مداخلة مليئة بالتباريك المتتابعة ابتداء من رمضان ومرورا بصلاة الفجر وانتهاء بالاشادة بالسلوك القويم لحمزة سبحان الله ما فاضل ليهو ( لولا الحياء والورطة ) الا يقول ليهو قصدى حمزة تاني ما انت او بالكتير كنت بضحك معاك ياخ . فدي فصلة متسقة معاك يا فاروغ وان تفاصحت

مشكلة ناس زي عمر الفاروغ وما تعرف حميضة ومن لف لفهم انهم عاملين فيها ناس مقطعنها وانهم بيدوا اي زول حقو كاش في يده وما بيهمهم مشاعر زول ولا رد فعل زول ولا خاتين الحاجة دي في راسهم وما شغالين بيها والبهيمهم انه يستعرضوا معاجمهم اللغوية في اللداحة والفصاحة والواحد فيهم يمشى متكيف من نفسه ومبسوط بانجازه الانجزه في النيل من الشخوص والتندر بهم , مشكلة الوع دا من البشر انه ورطاتهم كتيرة ومتوالية ودايما بيشربوا من نفس الكاس دي لما يسلط عليهم الله من هو افصح والدح منهم ويبلعهم كلامهم بي جزمه

وهل من جراءة أكثر من معرفة قول حمزة دون مشاهدة الحلقة أو سماع المكالمة!

جراءة تنتهي بالشكر والاطراء دونما اسباب موضوعية وواضحة لا تسمى جراءة يا حسين , وكما يبدو ان لحمزة رايا مسبقا قاله في اكتر من محفل انت اتكيت عليهو وجيت قشرت بيهو لكن ( دونما ) فصاحتك المعهودة في هكذا مواقف بتموت فيها زي عيونك )

يبدو انه مشكلتك يا حمزة انك مفرمل ليك براي واحد ولافي بيهو الامر الما ادانا براح زاتو انه نتفسح في الجوز . ما دام بتلقي مساحات للكلام والتداخل دونما حساب للزمن في البرامج , فمافي داعي تفرمل ليك براي واحد يبقي زي الايقونة ويستدعاهو ملاسي من اول محاولة .

ايه قصة دونما اللصقت دي كمان ؟؟

أساسي ..
ياخ رمضانك كريم برضو..
بس والله أول مرة تكتب ليك مداخلة بيض تتعلق بي كونك عايز تجمجر فيني..
بالجد أوووت أوف بوينت ..تماااماً..
انا كتبت البوست وكلي علم ودراية إنو أوول المتداخلين ح يكون حمزة ومنتظرو بي فارق الصبر ..
وجاااهز ليهو موية ونور لأنو في دي تحديييداً انا مااالي يدي ..لأنو حمزة مستحييل يقدر ينكر الخرمجة العملا في التلفون ومااا فهموها الناس دي..
كونو حمزة ح يجي يشرح فكرتو فوالله ده موضوع تاني وهنا ح أقول ليهو بالضبببط ده الكان مطلوب منك إنك بدل الفلسفة كان في طريقة أقصر..
بالنسبة للتبريكات فياخ انا ما زول بفجر في الخصومة ..ده براهو وده براهو .. وما عندي شي شخصي مع حمزة ..زييو زييك كده يعني ..

حنكك دا يا عمر امشي فكو في ناس مرورك الالق , وحاجة بتفتح الروح ضلفتين , ويا رائع ..الخ

إنت سمعت كلام حمزة أمبارح ؟؟؟ ولا كنت بتحضر في مصاقيل إعادة ؟؟

النصيحة لله ما حضرتها كنت ممعوط بي ( بكوقان ) وبعد انتهت طوالي دخلنا في( المحقق كونان الجزء 8 )

Quote: ي( المحقق كونان الجزء 8 )

ألحق بيها أخوك سرييع ..شغالة في ياتو قناة والساعة كم ؟؟

بس عموووماً أشكر اولادك على المعروف العملوهو فيك كونك ما حضرت المكالمة ..

ملاسي بالجد ما شفت الحلقة خلعتني وهجمتني ..كمان جابت ليها تبصير ..





انا برضو ماشفت الحلقة ..لكن منير بغني كلمات تــــافهة .. ده ما قروا لينا .



عمر سلامات ..

Quote: ملاسي بالجد ما شفت الحلقة خلعتني وهجمتني ..كمان جابت ليها تبصير

البصيرة عندهم صارت تبصيراً .. فتامل

Quote: انا برضو ماشفت الحلقة ..لكن منير بغني كلمات تــــافهة .. ده ما قروا لينا .

فرغي أي أغنية لمحمد منير - مالئ الدنيا وشاغل الناس - من لحنها وابسطيها
ككلمات مجردة فستجديها محض غثاء .. ما يؤكد أن الأغنية لحن ثم أداء وأخيراً كلمات.

Quote: فرغي أي أغنية لمحمد منير

في أغاني صاح كلماتا بسيطة شديد ..لكن ماغثاء كمان ..ومنير من المجددين .في شكل الاغنية ومفرداتها ...ماعايزة أحرف البوست بالأمثلة ..



لكن بتفق معاك تماما في الحان صنعت أغاني من العدم وفي الغناء السوداني ده في كلمات لو ا تقرت بدون لحن ..مضحكة عديل ..و فيها جلطات كبيرة ..

يا أساسي شطتك الكشحتها في وش في أبو عمير دا ما خصاني بيها ..
لكن بصراحة كدا لو حمزة قال الكلام القالو ملاسي فوق دا بى طريقتو القالا بيها ملاسي فبصراحة
كدا عمر الفاروق ليهو حق في انو ما مفهوم .. هسع اتا فهمت فيهو شنو عليك الله ؟

في اسبيستون دي خارطة البرامج

Quote: يوزع الشكر يمينا ويسارا وما فاضل ليهو الا يبارك العيد للاهل باللعوتة ويزجى التحايا للعرسان بحلفا الجديدة

برة...والباب معاك بالله...

يو ميد ماي داي يا عمك

..

.

Quote: فرغي أي أغنية لمحمد منير - مالئ الدنيا وشاغل الناس - من لحنها وابسطيها ككلمات مجردة فستجديها محض غثاء .. ما يؤكد أن الأغنية لحن ثم أداء وأخيراً كلمات.

مثلا
"حبيبي عايزلو ترتر..من ويم أجيبلو ترتر
الواد بيّاع الترتر .. حبسوني وحبسوه"


من باب كل واحد بونّسه غرضه :)

وتااااني

هههههه عمر الفاروق طلع فهمه ثقيل..
لأنو ملاسي فهم كلام حمزة بدون مايسمعه..

ياأخوانا الحلقة دي فاتتني بعيدوها متين..
ولا لو في زول عنده تسجيل يساعدنا بيه..

من طرف يا ود البشرى .. لو مسكت أي أغنية لمنير من طرف فستجد كلماتها عبارة
عن هجص وعلى الرغم من ذلك له دراويش من المثقفين بل ويلقبونه بالملك أو نحو ذلك!

يا جماعة يبدو إنو تشابه عليكم البقر..
العنوان لو ركزتو كان بيقول أشرح لينا حمزة قال شنو مش أشرح لينا حمزة كان عايز يقول شنو ..!!!
ودي انا ما كتبتها ساااي كده ..لأنو عايز يقول شنو كانت مفهومة لأنو في النهاية حمزة زاااتو قالا وبي صورة صريحة قصة اللحن قبل الكلمة دي ..
انا قصدت تماااماً الحديث القالوا حمزة عشان يوصل الفكرة دي !!! قال ليهو كلام لا في العير ولا في النفير بالجججد كان كلام ما مفهوم ..قد يكون حمزة ةحسب كلامو أسة إنو ح يجي يشرحو لكن يا حمزة القصة ماااا في تشرحو القصة فييي وقالتو فييي عضما..
إنت إتكلمت كلام ما مرتب وما مترابط كنت بتطط من حتة لي حتة شتت ذهن المقدم وذهن المشاركين في الحلقة وزهن المتابع للحلقة ...عن نفسي أشفقت عليك كتييير وإتمنيييت اللحظة اللي تنتهي فيها المكالمة بأسرع ما يمكن ..
يا حمزة انا ما عايز أعلق على قصة لو سمحت أسمعنا من التلفون ووطي صوت التلفزيون اللي بقت مكررة وباي ديفولت لأنو دي ما فكرتي الاساسية ولو أنها شووشت كتيير على بداية المكالمة وكانت سبب فيما حصل لاحقاً..

بالمناسبة يا طلحة كلام ملاسي كان أوضح بي كتييير من كلام حمزة ..حمزة صاح قال فكرتو دي في نهاية المكالمة لكن الزول ده نضم ليهو زي تلاتة دقايق كده في حاجة ماااف زول قدر يطلع منها بي حاجة ..
الغريبة زول زي حمزة يطلع ما حافظ الملحمة وكلماتها مع إنو إستدل بيها كعضم أساااسي في مداخلته ..وبكل بساااطة لمن ما عرف كلماتها قال : المهم .. وواصل عااادي ..!!

Quote: من طرف يا ود البشرى .. لو مسكت أي أغنية لمنير من طرف فستجد كلماتها عبارة عن هجص وعلى الرغم من ذلك له دراويش من المثقفين بل ويلقبونه بالملك أو نحو ذلك!

مفروض ناس الموسيقى الاكاديميين يوقفو المدعو ملاسي ده مش كفاية بقى صحفي الخوف بكرة يبقى ناقد موسيقي، مسرحي، اكروباتي إذا بي فهمو او ذوقو الموسيقي المتطرف قال الكلام الفوق ده وهو يفترض على الاقل يكون يعرف انو الحاجات نسبية مش يطلق في سطرينو ديل بتاعين فتامل وساعتئذ بل هو كذلك. يا موصلي ياخي شوف الهرطقة الميلاسية دي او على الاقل يا ناذر ردو على الزول ده.

Quote: "حبيبي عايزلو ترتر..من ويم أجيبلو ترتر الواد بيّاع الترتر .. حبسوني وحبسوه"

ياود البشرى ما عزلت إلا اغنية "سو يا سو .."

الاغنية دي سياسية ورمزية بإمتياز ..ورغم أنو لحنها سريع وراقص إلا أنو كلمة سو حسب ما عرفت هي تقريبا مقبال سجمي او وووب عندنا وكانوا النسوان في مصر زمان ببكوا بيها على ميتهم ..

وكلمتها كلها بتعبر عن انو الحكومة كاتمة على أنفاسهم وما موفرة العيش الكريم والرفاهية ..والمرايا والسكر والتتر كلها رمزيات ..والله أعلم ..:)

موقع لكلمات أغاني منير

الموقع أعلاه به كلمات معظم أغاني منير .. وكل واحدة أظرط من التانية!

_____
عليه .. فالقول ما قلناه عن حمزة ثم قاله
ومنير ليس سوى نموذج وحالة تشريحية لما نحن بصدده.

ياعمر الفاروق (رمضان كريم) ،،

معقولة تخلي شمت محمد نور وإبداعو وروعة الاداء من الحضور

وحتى المذيع الشاب محمد والله بقى زي الفل ،

وتمسك في مكالمة حمزة ؟؟ ههههههه


اتوقعتكم تفتحو بوست تطالبو فيه شمت دا يخلي عقد الجلاد وينبري لإمتاعنا منفرداً !!!


الزول دا والله إبداااااع فات الحدود ،،

وتحياتي للجميع بدون فرز ،،

الأخ عبد اللطيف
رمضان كريم

صدقت فقد تألق شمت بالأمس ايما تألق , أداؤه لرائعة القدال كان قمة الابداع

يلا يا ملاسي بعد ده النجيكم لي فكرة الموضوع بتاع اللحن والكلمة ..وزييي ما أفرغت اغاني من الحانها تعال نفرغ الحان من كلماتها ونشوف النتيجة ..
الغرض شنو من الاغنية ؟؟ مش الإستماع؟؟؟
حلوين..
يلا تعال نشوف المثال الإستدلّ بيهو حمزة في المكالمة وهو اغنية باب السنط ..
أفرغ أغنية باب السنط من كلماتها وجيب لحن حمزة وجيب الفرقة الموسيقية واعمل ليك حفلة بي تذاكر عشان الناس تخش تسمعو...
ح تلقى الحضور حمزة والفرقة الموسيقية و7 أنفار ..واللحن ده تاني لحدددي ما يرث الله الأرض ومن عليها وما عليها ما بتلقى زول سمع بيهو ..

Quote: أفرغ أغنية باب السنط من كلماتها وجيب لحن حمزة وجيب الفرقة الموسيقية واعمل ليك حفلة بي تذاكر عشان الناس تخش تسمعو... ح تلقى الحضور حمزة والفرقة الموسيقية و7 أنفار ..واللحن ده تاني لحدددي ما يرث الله الأرض ومن عليها وما عليها ما بتلقى زول سمع بيهو ..

بالله هو دا موضوع البوست ؟؟

مثال تاني يا ملاسي واجعني بي مناسبة اللحن والكلمة دي..
قم يا طرير الشباب واحدة من أجمل الكلمات اللي سمعتها في حياتي ..ولمن قريتا إكتشفت إنو مااا عندها أي علاقة بي اللحن ..ضاعت الاغنية دي من خلال لحن لا يتناسب والكلمات ..
انا بتحدى ناس كتيرييين لو قروا الكلمات دي ح يندهشو من إنها بتتقال جوة الأغنية ديك ..

قم يا طرير الشباب
غنّ لنا غنّ
يا حلو يا مستطاب
أنشودة الجنّ
وأقطف لى الأعناب
وأملأ بها دنّى
من عبقرى الرباب
أو حرم الفنّ
صح فى الرّبى والوهاد
واسترقص البيدا
واسكب على كل ناد
ما يسحر الغيدا
وفجّر الأعواد
رجعا وترديدا
حتى ترى فى البلاد
من فرح عيدا
وأمسح على زرياب
وأطمس على معبد
وأمش على الأحقاب
وطف على المربد
وأغش كنار الغاب
فى هدأة المرقد
وحدّث الأعراب
عن روعة المشهد
صوّر على الأعصاب
وأرسم على حسّى
جمالك الهيّاب
من روعة الجرس
واستدن بابا بباب
واقعد على نفسى
حتى يجفّ الشراب
فى حافة الكأس
.........................................

Quote: صوّر على الأعصاب وأرسم على حسّى جمالك الهيّاب من روعة الجرس واستدن بابا بباب واقعد على نفسى

أسة عليييك الله في زول بيكون منتبه للحتة العجييييبة دي في ظل ذلك اللحن ؟؟؟

إن كان قد استدل بباب السنط فقد صدق؛ استبدل كلماتها بأي كلام من أي
صفحة رياضية من أي جريدة وجيب حمزة والفرقة وشوف الإمة والعالمين!

Quote: بأي كلام من أي صفحة رياضية من أي جريدة

هههههههههه
بلطجة شديدة .

لا يغرنّك الإستدلال يا سحس فهو لم يستدل بها ككلمات مفرغة تم ملأها باللحن ..لالالا يا حبيب ..ده إتكلم عنها كلام بتاع عشت الكلمات ورسمتها الرسم الفني لما يتناسب ومحجوب شريف و و و و كلام كبااار...

تخريمة :
إنت ليي مصر بعد ما تفرغ الغنية من كلماتا الشعرية تحشيها بي كلام تاني؟؟ خليها فاااضية وجيب حمزة والفرقة وخلينا نشوف..

في خضم هذا الصراع ..
شكراً أساسي لمدّي بالبرنامج كاملاً ..

عبد اللطيف يا أستاذ..

شمت غناااي شديد وخصوصا لو سمعتو بيغني لي ود اللمين ..
لكن ما حسيت معاي إنو شمت عندو مشكلة كبيييرة في عزف العود؟؟؟
أمبارح حسيت بيهو مبتدئ مبتدئ كده ..
ما عارف ليي..

يا عبد اللطيف بكري

البوست دا عندو علاقة بي مداخلتك والغريبة حمزة سليمان قاعد في نصه

بعد ان (تتفرتق) عقد الجلاد ..

اكتفى بانك رديت على نفسك وقلت بانى قلت ..... الخ
هناك فرق كبير بينى وبينك لذلك لودخلت معاك فى حوار جماليات الموسيقى ما ح تفهم ولن تفهم لانو الفارق كبير بين ذائقتك وذائقة الجمال عموما
ـــــــــــــــــــــــــــــــــــــــــــــــــــــــــ
واحتراما للمتداخلين سأحاورهم من خلال بوستك هذا ـــــــــــــــــــــــــــــــــــــــ
اولا
الاعمال الفنية يمكن دراستها وفهمها من خلال الشكل البنائى ومضامين القوالب التأليفية
ثانيا
من اى شكل أو مضمون حكمت عاى أغنية يا طرير الشباب
هل بناءها لم يصادف مكنونك الجمالى ؟
هل قالبها التأليفى لم يكون من احدى اشكالك التأليفية التى ألفت سماعها؟
ــــــــــــــــــــــــــــــــــــــــــــــــــــــــــــــــــــــ
لى عودة

ملاسي وداليا المثل الضربتو بـ الواد بيّاع الترتر تقروه مع استدراكي تحت الخط بتاع كل واحد بونّسه غرضه :)

بالنسبه لقم يا طرير الشباب :

ما فهمت فكرتك يا عمر ؟!
بعدين اللحن ده ليهو ما يقارب 50 سنه وبقى مطبوع فى الوجدان .
فكيف لى بعد 50 سنه أن أستسيغ لحن تانى لهذه الأغنيه ,, حتى لو كان اللحن ما مناسب معاها !!

Quote: اولا الاعمال الفنية يمكن دراستها وفهمها من خلال الشكل البنائى ومضامين القوالب التأليفية ثانيا من اى شكل أو مضمون حكمت عاى أغنية يا طرير الشباب هل بناءها لم يصادف مكنونك الجمالى ؟ هل قالبها التأليفى لم يكون من احدى اشكالك التأليفية التى ألفت سماعها؟

اتفضل يا عمر جاوب .. ذلك إن استطعت

_____
حمزة ليس عاصم البنا .. فانتبه.

Quote: ما ح تفهم ولن تفهم لانو الفارق كبير بين ذائقتك وذائقة الجمال عموما

يا حمزة اي نعم لما تديهو بالحتة الفيها الحديدة بتريحني جدا , بس كمان كونك تستبيضوا لدرجة انه ما حيفهم كلو كلو دي شوية لما طلعت منك ادتني احساس بالتعالي ,مع ثقتي التامة في انه عمر الفاروغ ما عنده ذائقة زاتو عشان يقارنوها بذائقة الجمال , لكن نبرة التعالي منك بتكون خصما عليك انحنا كسودانين لسع بنحب المبدع المتواضع , فشنو ... انت استبيضوا بس كمان ما تتمطى شديد .
عمر الفاروغ وقعته سودة وشلاقته عينه ودا القبيل قلناهو ليهو في اول مداخلة , مرة عامل فيها والد فقري وبينوم بدري اتشالق علي زمينا خدر الملقب بي طارق ابو عبيدة لما ليكم فيهو بي بوست اسمه الفاروغ علي ما اظن شطفه في نص البورد وكملوا ليهو تيمم

ـــــــــــــــــ
حكمة البوست
يا عمر الفاروغ ونسة اللساتك ما بتقطعك الظلط

زي ما قال ليك ( استاذك ) الاستنجدت بيهو في الشرح ( ملاسي) جاوب علي الاسئلة اعلاه وخت في بالك القال ليك عليهو

ما قلت ليك ملاسي ما بسند الضهر وبتملص منك زي ود الموية في اول ملف ( ملاسي لا يجرؤ )

بالله واحد يساعدنا بي بوست ( الفاروغ) لي زميلنا خدر , لوحدة الهدف والموضوع والاتساق مع الحاصل في كل البوستين
ضروري بوست الفاروغ بالله يا شباب

Quote: _____ حمزة ليس عاصم البنا .. فانتبه.

بس النصيحة ملاسي لما يقعد لي سماحة الوصف ما في زول زيه

بوصف ليك المطبات والمنعرجات والمنحنيات كويس جدا حاكم هو زول (وصااااااااااااااف)

Quote: حمزة ليس عاصم البنا .. فانتبه.

فليكن يا سحس !
باالرغم من أن إنتاج وجماهيرية عاصم البنا تفوق حمزه سليمان بسنين ضوئيه عديده .
قد يكون حمزه سليمان دارس للموسيقى ولكنه ليس بالضروره قد أصبح فنان .
أنا أحترمه جدا كموسيقى أكاديمى ممكن يفيد ناس كتار داخل قاعات المحاضرات .
لكن أن يكون فنان مغنى فدى ما عندو فيها حظ .
والدليل إنو حمزه موجود فى الساحه الفنيه لما يقارب العقدين من الزمان .. أين إنتاجو بل أين جمهوروا
أنا حقيقة لا أعرف له غير محاوله مشوهه لأغنيه عن أم درمان .
ملاسى بالله كفايه مجامله .

يا كمال سالم انت بعد جهد فسرت الماء بالماء
ملاسي كلامه واضح وانت جيت قلت نفس كلامه
في انه حمزة زول فاهم موسيقى بينما عاصم زول اهالي ساكت
ــــــ
باقي كلامك فيهو انة

Quote: ملاسي كلامه واضح وانت جيت قلت نفس كلامه في انه حمزة زول فاهم موسيقى بينما عاصم زول اهالي ساكت

يا أساسى أنا مافسرت الماء بالماء ...
كلامى واضح وهو إنه وبالرغم من أن عاصم البنا زول أهالى ساكت فوجوده فى الساحه الفنيه له معنى وله جمهوره
وحمزه سليمان نعم فاهم موسيقى لكنه ليس بفنان ,, لا مغنى ولا مؤدى ولا حتى مقلد .
عليه أن يبتعد عن حتة الغنا دى ومرحبا به كموسيقى فاهم .
إنشاء الله تكون فهمتنى يا أساسى .
بعدين والله مافى ( إنه ) ولا حاجه ده مجرد رأى يتفق فيه معى الكثيرين .

Quote: انحنا كسودانين لسع بنحب المبدع المتواضع

يا أساسى كمان إنت ما تبالغ !!
وينو الإيداع ؟!

هههههههههههههه
يا أستاذ حمزة سليمان كل سنة واتا طيب ..
ولماذا لا يفهمك عمر الفاروق ؟؟ المفروض بما انك مبدع وفنان توصل أفكارك ورسالتك ليفهمها عمر الفاروق وعمر بتاع الكمينة
وعمر القاعد يشرب جبنتو نواحي البطانة وكل عمر بسمع الغناء وبسلي بيهو وجدانو .. الفنان هو الذي يجري مجري الدم في العروق من دون كولسترول أو أي ترسبات
معيقة لتدفق هذا الابداع ..
اذا كنت تري أن عمر الفاروق لا يفهم ما تقوله فالعيب حتما فيك وليس في عمر الفاروق المستمع البارك في السباتة
ليتذوق ويستمتع بما تقوله أو تغنيه أنت كفنان.. أي فنان اعترض رسالته الفنية تشويش وحال دون وصولها كما ينبغي للمتلقي
عليه أن يراجع نفسه أو يلومها على الأقل ثم يحاول في المرة المقبلة .. أما عمر الفاروق فالخيارات أمامه متعددة فيمكنه مثلا
بكل بساطة أن يتحول من محراب حمزة سليمان إلى حمزة عوض الله مثلا .. ههههههه..
عايز أقول ليك ما تسمع كلام أساسي يا حمزة لأنو كما واضح جدا عندو تارات بايتة مع أبو عمير حكيم الأخير دا بكون ختاها
ليهو ذات ضلمة في زقاق أو نحو ذلك .
واتا عامل إيه يا أبو الشباب ؟

Quote: هناك فرق كبير بينى وبينك لذلك لودخلت معاك فى حوار جماليات الموسيقى ما ح تفهم ولن تفهم لانو الفارق كبير بين ذائقتك وذائقة الجمال

ده كلام زعل ساي يا دكتور خلي بالك طويل شوية كان بكل هدوء تشرح للفاروق مداخلتك عبر الهاتف
و رمضان كريم

Quote: أي فنان اعترض رسالته الفنية تشويش وحال دون وصولها كما ينبغي للمتلقي عليه أن يراجع نفسه أو يلومها على الأقل ثم يحاول في المرة المقبلة

يا طلحه يا أخوى المحاولات دى يتكون فى سنين البدايات الأولى .
الزول ده قبل عشرين سنه فارق عقد الجلاد زول سأل منو مافى ,, باقى ليك كان عندو شئ ما كان الناس فقدتو !
وبالرغم من كده هو حاول وإجتهد وجرى لحميد ومحجوب شريف وغنى ليهم لكن برضو مافى قبول . !وأخيرا لجأ
لأم درمان عله يجد عن طريقها القبول وغنى ليها أغنيه زى صحن الكمونيه , لتقها بيجاى وجاى وبرضها طلعت
أى كلام ... عشان كده قلنا ليهو يأخ والله حنحترمك كموسيقى ,, إن شاء الله يسمع الكلام .

ود الشرى :
بالله هسه الكلام ده فرقو من كلام الترتر شنو ؟!
قالدت سوق الشجره
ومن قلبى نزل مطر
عالجنى يا عابدين شرف
وسامحنى يا أستاد الهلال

وسو يا سو حبيبى حبسوه .

ود الفاروق


رمضان كريم يا ابوي


الدوري متين عشان شايفك الناس ديل سكوك شك شديد ملاسي واساسي


وود البشري وطلحه


ابقي مارق يا اخوي

مقارنة بسيطة جداً
الموصلي و حمزة سليمان
بس شوف فرق طريقة الرد كيف !
الله يحفظكـ يا يوسف يا ود أم يوسف









_
كل عام و أنتم بخير

سؤال للناس البقولوا اللحن والأداء أهم من الكلمات:

لما الناس تصنف أغنية بأنها هابطة,
التصنيف دا على أساس اللحن والأداء أم الكلمات؟

ياخى الحقيبة تقريبا معظم ألحانها زى بعض لكن سر بقائها فى قوة المفردة الشعرية.

عارف يا حمزة مشكلتك معاي شنو ؟؟؟
بتديني إحساس إنو في ناس قالوا ليك عمر ده عايز يتصعلق عليك ولو أديتو فرقة بيركب ليك في ضهرك وعمر لديه سوابق مع فلان وفرتكان وعليه فأفضل طريقة تتصعلق عليهو إنت وتمرمط بيهو التراب وكده ..
يا حبوب كلامك ده ما بيهددني بي التوقف عن توصيل فكرتي .. ويا سحس يا ملاسي انا أقبل التحدي وقريباً جداً ح أثبت ليك إنو حمزة سليمان وعاصم البنا في نفس السرج ..

Quote: هناك فرق كبير بينى وبينك لذلك لودخلت معاك فى حوار جماليات الموسيقى ما ح تفهم ولن تفهم لانو الفارق كبير

طيب تعال نسلّم بي إنو كلامك ده صاح فيما يتعلق بي شخصي السمين ..
حلقة أمبارح دي فيها كم زول عارف وفاهم ودارس ولديه من الذائقة ؟؟؟
عليييك الله أضرب لي أخوك الماحي وقول ليهو يا الماحي يا أخوي إنت أمبارح صحي انا قلت لي كلام ما مفهوم؟؟
إنت دحين يا الماحي يا أخوي امبارح فهمتني ولا ما فهمتني؟؟

سسيب الماحي أخوك ..كدي أضرب لي شمت صحبك .. اسألو وقول ليهو يا شمت يا صاحب انت أمبارح فهمتني؟؟؟

يا حمزة تلفونك الأمبارح واااضح إنو تلفون علاقات ساااي وبتاع يا حمزة نحن بالليل ح نضرب ليك ده إذا ما انا خايف تكون كنت بتتكلم مع الماحي أخوك بي الضهر قام قال ليك بعدين عندنا تسجيل في النيل الأزرق فقلت ليهو ياخ عليك الله خليهم يضربو لي ..
كلمممتك زمااان يا حمزة وقلت ليك كلامك الدرّاب بتاع ذائقة ونوتة وجماليات مااا بيخوفني من خوض النقاش معاك وتوصيل فكرتي وما حا أقول ليك تعريتك لأنو انا ما كان ده هدفي ..

وعشان ما يبقى الكلام تهكم وإستهتار ومطاعنات فيااا حمزة بيني وبينك مكالمتك ..والناس تحكم بعد داك..
جييب المكالمة بتاعتك هنا أو يا رييت لو في أييي زول سجل المكالمة دي يجيبا لينا هنا وبناء عليها تعال نسأل الناس اللي تداخلت هنا ..
بعد داك تعال أشرح شرحك الداير تقولوا..

سؤالي كان وااااضح ..هل إنت قلت كلام مفهوم ؟؟؟؟ خليني من العايز تجي تشرحو أسة لالالا عييد كلامك بالنننص القلتو أمبارح بعد داك نشوف قصة الشرح دي..

كتب (Azzam Hassan Farah Mohammad ) فى الفيسبوك

Quote: طرح برنامِج [للود قضِية] في قناة النيل الأزرق مساء أمس 17/07/2013م تراتِبية الكلِمة اللحن الآداء في الأغنِية وكان الحضور مِن مُخْتصين وعمالقة (شعر/لحن/آداء)، أدار النِقاش الشاعِر الطبيب/ محمد طه القدال (وكان هو العُمدة حسب المنصب الممنوح مِن البرنامِج لِلضَيف المُمَيز) والدكتور الشاعِر المسرحي عِزالدين هِلالي (شاعِر أغنية قول النصيحة/زينب الحويرص) وأزهري محمد علي (شاعِر الـصباح الـباهى لونك/مُصْطفى سيد أحمد) والدكتور المُلحِن الماحي سُلَيْمان (مُلحِن أغنية قول النصيحة/زينب الحويرص) والشاعِر اسحاق الحلنقي والفنان أحمد شاويش والمُلحِن والفنان شمت محمد نور (عقد الجلاد) وآخرين. في أثناء النِقاش قطع مذيع البرنامِج الشاب محمد عُثمان حديث الضِيوف لِيتلقى إتصال مُبرمج مع الفنان حمزة سُلَيْمان (مُغترِب بِدَولة الإمارات) وقنب -أي حمزة سًلَيْمان- يِقول كلام خارِم بارِم ساي حرّم وتعتع وتلجْلج وقطع وحب يسْتشهد بالملحمة (لما الليل الظالم طول فجر النور من عينا اتحول) ما قِدِر يسْتحضر كلِمات القصيدة وتماها [المهم إنو]. وطبعًا كالعادة كان فاتِح التِلِفِزيون علشان يِسمع صوتو وهو بتكلم في البرنامِج وكالعادة -برضو- المذيع قال ليهو: [معليش يا أسْتاذ لو سمحت وطي صوت التلفِزِيون وأسمعنا مِن سماعة التلفون]. المفروض يا برنامِج إنو الإتِصالات الخارجِية دي تكون إضافة على البِنْقال والإنْقال في الحلقة، وده بِكون بس لما المُتصِلين بيهو يِكون في مقام أو أكبر مِن مُسْتوى الضِيوف (أكبر خِبرة وتخصُص)، هسِع حمزة سُلَيْمان -بالإضافة إلى إنو ما قال حاجة جديدة ولا حتى قديمة وكان فاتِح التِلِفِزْيون- مقامو شنو مع العمالِقة الكانو ضِيوف ها الحلقة؟!

قلنا نحرر السوق شوية من زول شكلو حضر الحلقة

بوست ممكن يكون جميل جدا ..


أنا شايف نحول البوست دا للنقاش حول راي همزة سليمان انو اللحن هو الاساس في التراتبية مش الكلمات ..!

ويا ريت لو همزة وعمر بردو نفسم شوية ..!


ورمضان كريم للجميع .

Quote: هههههه عمر الفاروق طلع فهمه ثقيل.. لأنو ملاسي فهم كلام حمزة بدون مايسمعه..

مبالغة يا أبو مهيار هههههههه

يا عمر .. حمزة معروف - ومشهود له - كملحن ضليع وعبقري
فلا يضيره إن تلجلج أو أطال لتوصيل فكرته .. فالحديث دِربة.

لالالا يا ناذر داك موضوع براهو بنجيهو بتاع الجدادة من البيضة ولا البيضة من الجدادة .. وده أصلا موضوع إتناقش أمبارح في الحلقة ..
نحن أسة موضوعنا المكالمة ..

بالغت يا عزام فرح ..!!

Quote: هسِع حمزة سُلَيْمان -بالإضافة إلى إنو ما قال حاجة جديدة ولا حتى قديمة وكان فاتِح التِلِفِزْيون- مقامو شنو مع العمالِقة الكانو ضِيوف ها الحلقة؟!

همزة سليمان دا بالذات لو كان ما لحن وغنى غير (على كيفي) رائعة الكتيابي.. وقرط على كدة واعتزل الغنا والتلحين لكفاه !

بالله يا سحس أمسك لي في ملحّن ضليع دي لأنو ح أحتاج ليها لي قدام ...
زمان قلت ليهو كده قام زعل.. قال هو فنان وصوتو سمح برضو ..
حمزة ملحن ماااف أييي كلام ..لكن مغني دي إستفهاما كبيييير ..
بس مبدئيا موضوعنا ما ده ..

!!!!

Quote: نحن أسة موضوعنا المكالمة ..

عمر الفاروق باركا ياخ .. الدنيا رمضان !!

Quote: فالحديث دِربة.

دربه دى من دراب ؟
ربما تكون من تدريب ؟
أشرح بالله يا حسين والله أول مره تمر على .

غايتو دي الحلقة .. وأسمعو من الدقيقة 58 .. وهاك يا ملاسي أسمع..
السؤال المفروض يجاوبو الأهم الكلمة ولا اللحن ..



عليييكم النبي عاينو ردة فعل الناس المستضافين ..اللي هم يا قول سعيد صالح :
المتعلميين بتوووع المدااارس..

خلوووني انا الما بفهم ..يلا يا الفاهمييين با بتوووع الفهم ..أفهمو لينا ..

سلام يا عمر و رمضان كريم ..
ياخي ليه بتديني الاحساس انك دائما بتستهدف ناس مشهورين بغلظة شديدة عشان إنت ذاتك تشتهر ؟!

يا بروف
واضح انه عمر دا من النوع اللقي نفسه فجأة هنا واتفاجأ بانه في شخصيات اعتبارية هنا وبيحاول يستغل المسالة دي أسوأ استغلال
يعني ما اكتر من انه يمشي يقشر لي أصحابه بانه بستف ليك الموصلي قبيل وانه ردم ليك حمزة سليمان وانه انتقد ليك المعز عمر بخيت وانه عادي غير مسار الفنانة رموش أبو الناس الفني
عمر دا بتتضح فيهو اشكالية اجتماع العامة والهتيفة والرويبضة ودلوهم في شؤن العامة علي نفس الطاولة مع أصحاب الحل والعقد والفهم والخبرات

أمين محمد سليمان
.....
احترامى

والله سمعت المداخلة بس من الفيديو النزله الفاروق يا دوب للامانة
بصراحة يا حمزة عمر الفاروق عند وجهة نظر قوية في البوست دا
النصيحة لله بالغت البوليغ الواحد دا في المهاتفة دي
واضح انه عندك زخم بتاع معلومات وآراء حول المسالة وحقيقي نقصك ترتيب نفسك وأفكارك كنت زي ما قال هو بتنط من موضوع الي آخر قبل ما تقدم ليهو كويس أو تكمل شرح الفكرة فظهرت المداخلة مبهمة ومبتورة في عدة اجزاء وان كان واضح جداً المشكلة في المعلومات الكتيرة عندك عن الموضوع

لما قلت ليك يا كمال انه باقي كلامك فيهو انه ما كذبتني وجيجت براك اثبت كدا عندما بدأت تخرج ما في داخلك من أمور تجاه حمزة ما عندها علي الأقل حاليا علاقة بالحوار

عشان نكون دقيقين شوية ..أبدو أسمعوا من بعد الدقيقة 56 و 32 ثانية تقريبا

اساسي انت لاعبها هارت ولاّ شنو؟ مالك بترش في الطربيزة كلّها

أولاً شـكراً يا عمـر على الفيديو وبالذات على إنك حددت لينا الكـلام من وين لأنو حكاية أحضر فيديو ساعتين دي صعبة شديد، أنا حضرت من كـلام الشاعر أزهري محمد علي وفي نهاية كلامو قال (للزول الجنبو): دي وجهة نظرك.. ودي جملة مهمة بالمناسبة!.. بعدها استمعت لمكالمة حمزة بالنسبة لي كلامو واضح لحد كبير ببساطة لأنو أول جملة قالها : (بعد التحية والسلام) قال: الأصل في الأغنية اللحن؛ وكرر: اللحن هو االأصل في الأغنية.. ثم مثال الملحمة، وبعدين كونو نسى كلمة من النص فدا شي عادي أفتكر.. والأمثلة من الحقيبة وباب السنط وأن (النص الشعري لا يقود أبداً لكيفية النص اللحني الخ، المهـم حمزة ختم كلمو بنفس جملة البداية كخلاصة: النص اللحني هـو الأصل في الأغنية.. فما عارف المشكلة وين بالنسبة ليك، ربما تقصد الشرح الفي النص.. لكن زي ما قلت المقدمة والخلاصة بغنوك دايماً عن كل الشرح والكلام الكتير الفي النص.. دي نظرية بالمناسبة في المحاضرات.. يعني لو البروف مضجم شغلو بس أحفظ آخر جملة قالها وكدة بتضمن النجاح بإمتياز!..بعدين إنت تكلمت عن ردة فعل الموجودين في الحقيقة ردة الفعل الوحيدة الشفتها هي كلام شمت الطيب عن كلام حمزة.. أنا ما بقـول إنت (مستهدف حمزة) أو غيرو لكن بقـول مافي مبرر للكلام القاسي زي تخيلك عن سبب المكالمة من أنها موضوع مجاملات وعملت ليها سيناريوهات كمان، بينما السبب الخلى حسين ملاسي يتوقع حمزة قال شنو لأنو عارف إهتمامه بالموضوع وهو نفس موضوع الحديث القاعدين يتكلموا عنو الناس قبل مكالمة حمزة.. يعني بالنسبة لزول محايد أعتقد الأرجح إنهم إتصلوا عليه لأنو من أهل الصنعة وهم في النهاية بتكلموا كلام أكاديمي ما عندو علاقة بجمال الصوت أو الجماهيرية الخ..
اليومين ديل يا عمر رمضان سخّن ولاّ شنو.. لأنو شايفك أمبارح عدمت حلقة أغاني وأغاني نفاخ النار.. يعني كان عملوك مشرف على البرنامج يكون لسة ما خلصوا تسجيل حلقة واحدة.. يعني فرفور قام بشر طوالي ح توقف التسجيل.. مدّوا المايك لي عمك السر تقول ليهم : ستوب.. من الأول )..

"شخصيات اعتبارية" يا أساسي!!
من ذا الذي افترى عليك وذكر ذات بوست أن لك علاقة بالمحاسبة!

و الله يا جماعة فى قسوة كده شديدة من (صديقى) عمر الفاروق و كمال سالم على حمزة سليمان!!!!
ليه كده يا جماعة?
طريقة الكلام ده للبورد بس? ام اذا كان استاذ حمزة قدامكم كان برضو اتكلمتوا كده?
زمان اهلنا قالوا: الانسان بطبعوا مجامل.

غايتو يا أساسي قدر ما حاولت أقرا نفسيتك اثناء كتابة المداخلات التلاتة الاخيرة دي غلبني ..طبعاً القراية حاولتها بناء على الترتيب الزمني للمداخلات وليس الترتيب المكاني ..يا زول إنت عندك إنفصام في الشخصية ؟؟ :) :)
لكن صراااحة كده ؟ عجبتني طريقة تفكيرك وإنت بترص المداخلات كل حسب موقعه..

ــــــــــــــــــــــــــــــ
بس

إسمارت (إنتي) بتقري بي إضنينك؟؟؟
أسة انا القسوة بتاعتي وينا ؟؟؟
كدي بدوون ما تجيبي سيرتي وسيرة حمزة أمشي أقري مداخلاتي قبال ما يجي حمزة واقري مداخلتو الاخيرة .. علييك الله أنسي إنو كاتبا سيدنا حمزة سمح؟؟ إتخييليو زول ساااي كده..وبرضو شييلي من راسك فكرة إنو المكتوب ليهو الكلام ده الجلف عمر الفاروق ..اعتبريهو برضو زول ساااي كده ..
بعد داك قرري مداخلتك دي كان الأصح توجيهيها لي منو ..
حلوين؟

عيسى يا أخوي مالك الايام دي لاعب لي شواطين مع بيلية ؟؟
بستغرب في إنكم ما قريتو العنوان صاح مع إنو واااضح..
كلامي البسأل عنو ياهو الكلام الفي النص الإنت قلت مااا تركزو فيهو ده ..
انا ما سألت على اساس ما فهمت كلام حمزة الاساسي لأنو أهو زيي ما إنت قلت قالا من قولة تيت ..
بعدين يا عيسى كدي خليك حقاني وحتتتى الفكرة القالا في الأول دي بتاعت اللحن قبل الشعر كدي أمشي عييدا تاني وشوف الطريقة القالا بيها في بدايتا للمرة التانية ..
ياخ انا ما غبي للدرجة دي يا عيسى عشان اسأل حمزة قاصد شنو في حاجة انا اووولريدي سمعتها وكنت حاضرا لمن قالا مباشرة ..انا كلامي في الدغمسة الفي النص دي شن لزووما..
بعدين ياخ ازهي محمد علي وبرييمو لي شعرو ده ما أدهشك ولااا قال ليك الزول ده طششش وبقا ما فاهم حاجة؟؟ ولا عشان شمت إستدل بعد داك بي الملحمة !!!
يا عيسى ياخ والله اخوك مااا ساذج للدرجة دي ولااا كمان زي ما بدو الناس يقولوا اني مترصد ...لأ وما أي ترصد ..ترصد مشاهير...
حمزة بدا يتمسح من خارطة المشهد السوداني من فترة طوييلة وصدقوني ياهو جنس كلامي ده البيشهرو هو وبيرجعوا للاضواء وليس العكس..
انا الشهرة أسووي بيها شنو ؟؟ موظف مسكيين وعااايدي يا قول السعوديين أمشي في الأسواق وأقبل الهدايا ..والغريبة للناس البيعرفوني عن قرب عارفني أكتتتر زول بحب أعيش بعيد من الاضواء ..

إسمارت يا إنتي ..
كدي عايني صديقك قالوا ليهو شنو ..

Quote: هناك فرق كبير بينى وبينك

أسة باقي ليك كلام زي ده لو لاقيت سيدنا حمزة وجهاً لي وجه برضو ح يقولوا لي؟؟
ويارييت ما تقومي تفكري ليو وتقولي لي هو بيكون قاصد الفرق بينكم في دراسة الموسيقى أو كمان العمر ..
إسمارت مرة واااحدة خليك حلوة مع صحبك ياخ ومااا طوااالي تضغطي عليهو كده ..

Quote: "شخصيات اعتبارية" يا أساسي!! من ذا الذي افترى عليك وذكر ذات بوست أن لك علاقة بالمحاسبة!

الامانة لله يا اسئس ملاسي رشالك في دي رشة السنين ههههههههههههههههههههه

و الله يا عمر ما عارفة اقول ليك شنو!!!!
عشان ما تقول انى منحازة لحمزة سليمان...ان ما حصل سمعته خارج عقد الجلاد. ما تقصير منه, تقصير منى انا. انا ما متابعة الحاصل فى الغناء فى السودان.
رد حمزة سليمان رد زول زعلان شديد و قرر انه يصعد الموضوع معاك وذي ما قال اساسي (قرب او احتمال) دخل فى الغلط معاك.

نجى لقسوتك انت. هسي ده شنو ده:

Quote: عندي إحساس إنو المكالمة دي لو إستمرت دقيقتين تاني فكان الماحي سليمان قاال ليهو يا حمزة كدي خلينا في المهم ..جايي العيد ولا ما لقيت حجز؟؟

الكلام ده لو قلتو مع جماعة اصحابك ما فيه مشكلة. لكن لما تقوله فى البورد -اللى حمزة زميل فيه- بيبقى صعب(وقاسي) شديد. حتى لو كان صح.
اللى عاوزة اقوله -مع انى معتبرة روحى زولة جلدى تخين- لكن كلامك -و الله- بيزعل يا عمر.
انا عارفة انك ما زول حقود و ما بتترصد الناس. بالعكس, قلبك ابيض و زول ذكى ولماح وحاضر البديهة والطرفة. لكن مرات ظرافتك دى بتكون على حساب الناس.
________________________
بس ما تكون بتهظر مع اولادك كده.....ح تعقد الاولاد.

أيامك والله يا أساسي ..!

هسي عليك الله بي حجر واحد نشت كم عصفور في البوست دا !!

ناذر يا حبوب..
أساسي ده النوع البينيش الععصافير بتقوم تقع في بيت الجيران يقوم يتشالق يمشي يدق الباب ..يفتح ليهو عمك كبيير كده ويسكككو ليك الحلة كلها.. :)

لكن ما قلت لي رأييك ..سمعت المكالمة ؟؟

Quote: .سمعت المكالمة ؟؟

انا سمعتها وكلامك كلو صح
محاولة الموسيقار حمزة الانتصار للذات لن تجدي بشىء
احترام الرأي واجب جدا مهما كان الاختلاف

-
انت اساسي متين دخل المعهد

يا عمـر ياخي أنا ثقافتي الكورنجية تعبانة خالس، عشان كدة ما عرفت مثالك دا معناهو شنو بتاع بيليه وشواطين دا، لكـن شكلوا كدة ود عـم المثل : اللبس غانا، واللعب ود عشانا :) أو شي من هذا القبيل، بالإضافة لأنو الآن الساعة عندنا تسعة إلا شوية والمغرب الباقي ليه ساعة إلا ربع تاني!.. لكـن عموماً ياخي حاشاك السذاجة والغبا ودا ما قصدي ولا قصد اي واحد من الشباب.. لكـن أنا حاولت يكـون الكـلام بحسب ما قلت إنت في البداية: إنو الموضوع هو مكالمة حمزة وليس غناه ولا تلحينو ولا شعبيتو ولا تأثيرو في خارطة الغنا، ولامـن أشرت لي كلام أزهـري قصدت إنو الموضوع إختلاف وجهات نظـر أو إختلاف فهـم او عـدم فهـم ودا برضـو عادي.. للمناسبة أزهـري دا شعـرو (بفتح الشين والراء!) كدة من زمن كان أسود.. أنا في النهاية داير استفيد بالمناسبة من حواركم مع حمزة، لكن الفايدة للقارئ ما بتحصل إلا لامـن يبقى في إحترام متبادل لوجهات النظر المختلفة ..

أمين سليمان ..
سلمك الله من كل شر ..ورمضانك كريم ..
عارف ..بالجججد كنت عايز أجاوب ليك ليك بي كلام الجكس داك لأنو فععلاً بيعبر عن الإجابة ..
" أكيييد ما قاااصد " ... :)
طبعاً لأ .. ولأ شدييدة .. مع إني أترددت كمم مرة من إنو أرد ليك مباشرة ..لأنو السؤال في حد ذاتو كده الإجابة عليهو بتدي مساحة أكبر من الموضوع..
بس يا أمين إحساسك أبداً ما صاح .. ولااا أنا البتهمو الشهرة ..وما تشووف الفرفرة البعملا معاكم هنا دي..انا زول لااامي حاجاتو ولاااامي روحو ..تفتكر شهرة بعد العمر ده ممكن أسوووي بيها شنو؟؟
وأشتهر لي منو؟؟؟ ويشهرني منو؟؟ ولييي؟؟؟ وعشان ح أصل لي شنو ؟؟
بالججد بالغت معاي يا أمين ..
وصدقني ما كلام زعل بس حتتتى الناس اللي بتشوفني بستهدف فيهم ديل والله ووالله ما حصل فكرت في إنو بتعامل معاهم كمشاهير ..
يعني حمزة ده مثلا إختفى من خارطة الشهرة البتتكلم عنها دي قرابة العشرة سنوات وبقا زول أكتر من عادي وهو ما من النوعية اللي شهرتو بتمتد حتتى لو غاب عن الساحة فصدقني الاسة بيستفيد من الكلام ده حمزة زاااتو ما انا..
لو بتفتكر شروق ابو الناس من المشاهير فبرضو محتاج تراجع نفسك..
استاذنا الموصلي هرم كبيير ماف كلام وانا ما بستهدفو ورغما عن كده الموصلي برضو اختفى من الساحة لي ربع قرن فالشهرة إندثرت معاهو ..
أووعا تقول لي عاصم البنا ... أججججي ؟؟
أكيييد ما قاصد .. :)

سلام يا عمر ....

Quote: لكن ما قلت لي رأييك ..سمعت المكالمة ؟؟

يسألني الله .. لي قريب النص ساعة مشغل الفيديو والنيت تقيل يشتغل ويقطع وأنا منزل النافذة ومنتظرو ينتهي عشان أبداهو من تاني .. فجأة الفيديو عصلج وجاتني الكتابة الكريهة البتقول ذس فيديو إرور أكيور ولا شنو كدا ما عارف ...!


وهسي الواطة فللت وأنا ماشي أنوم لكن إنشاء الله بحاول بكرة ..!

لكن يا عمر من كلام الناس هنا عرفت انو همزة في النهاية قدر يوصل فكرتو واكد عليها في أول المكالمة وأخر المكالمة .. وزي ما قال ملاسي .. همزة سليمان ملحن قدير وفنان عظيم وللكلام درب ولا دربات ولا أم روابة ما عارف !!

المهم همزة قدر يوصل فهمو وادانا النجيضة ..!!




















اساسي .. أعمل ساتر ولا مداخلتي ما محتاجة ؟!!

Quote: النصيحة لله بالغت البوليغ الواحد دا في المهاتفة دي واضح انه عندك زخم بتاع معلومات وآراء حول المسالة وحقيقي نقصك ترتيب نفسك وأفكارك كنت زي ما قال هو بتنط من موضوع الي آخر قبل ما تقدم ليهو كويس أو تكمل شرح الفكرة فظهرت المداخلة مبهمة ومبتورة في عدة اجزاء وان كان واضح جداً المشكلة في المعلومات الكتيرة عندك عن الموضوع

ده الكلام يا أساسى .
يعنى لو عمر الفاروق ده كان ناداك فى عنوانو إنت بدل ملاسى كان جيت قلت
الكلام الواضح ده وكان الله كفى المتداخلين من الأربعه صفحات دى .

Quote: لما قلت ليك يا كمال انه باقي كلامك فيهو انه ما كذبتني وجيجت براك اثبت كدا عندما بدأت تخرج ما في داخلك من أمور تجاه حمزة ما عندها علي الأقل حاليا علاقة بالحوار

قسما عظما يا أساسى داخلى مافيهو أى شئ تجاه حمزه سليمان
ولا أعرفه ولا عمرى إلتقيت به ,, وحتى لحظة رؤيتى لهذا البوست
لم أكن متذكر إنو فى الدنيا دى فى زول إسمو حمزه سليمان .
ولكن عندما دخلت وقرأت الموضوع تداعت أمامى الفكره أو الرأى
التراكمى الذى كونته عن هذا ( الفنان ) منذ ظهوره قبل سنوات مع عقد الجلاد
ثم محاولاته المتكرره فى الظهور كمطرب وفنان .
ويمكن مع تداعى الذاكره ومن هو حمزه سليمان وما مدى تأثيره فى خارطة الفن السودانى
طلع منى بعفوبه شديده ما أسميته أنت ( إنه ) .
حتى إنى والله زعلت من عمر الفاروق كونو يفتح بوست ويضيع زمن الناس عشان يشرحوا
ليهو كلام زول من عامة الناس لا بودى لا بجيب .
كان ممكن يكون البوست ده مهضوم لو كان صاحب المداخله الما مفهومه فى التلفون هو ملاسى
نفسه .. أو على الأقل فنان ليهو بصمه وكنا نرجى منه وخذلنا بمداخلتو .
لكن كونو عمر الفاروق يقومنا ويقعدنا ويتور نفسنا لمدى أربعه صفحات فى كلام قالو حمزه سليمان
فوالله دى كتيره وما عافى ليهو .

أبو عمير
بى صراحة كدا شكلي كدا ح أتبرأ منك ..
الناس دي فوق تحت راشاك رش شعفوفة ..
بتعرف الشعفوفة يا أبو الشباب ؟

قصدك رش أم شعيفة يا طلحة ؟!!

ههههههههههه
لا يا نادر بتاعتك دي اتخيل لي أكلة شعبية ..
الشعفوفة في قاموس أهل العوض = المطرة الغزيرة طويلة الأمد

Quote: مثال تاني يا ملاسي واجعني بي مناسبة اللحن والكلمة دي.. قم يا طرير الشباب واحدة من أجمل الكلمات اللي سمعتها في حياتي ..ولمن قريتا إكتشفت إنو مااا عندها أي علاقة بي اللحن ..ضاعت الاغنية دي من خلال لحن لا يتناسب والكلمات .. انا بتحدى ناس كتيرييين لو قروا الكلمات دي ح يندهشو من إنها بتتقال جوة الأغنية ديك ..

ياعمر الفاروق انت ممكن تقول فلان مابعرف يغني وفلان صوتو شاخ وووووالخ
لكن كلامك الفوق ده بختك في خانة البجيبو الكوره من ورا القون
ياسيدي عمر
لحن :انشودة الجن" ارتاد مناطق لم يرتدها النص نفسه
برغم انني من عشاق استاذنا الراحل التيجاني يوسف بشير
وهو من الحان شيخ الملحنين برعي دفع الله

يعني انت عايز
تعبير
قم ياطرير الشباب "غني لنا غني" يتغنى بلحن جنائزي مثلا
واقولها لك برغم الجمال غير العادي للنص
فان اللحن قد تجاوزه تعبيرا وقفز به الى افاق
حفظته وجعلته يخلد الى الابد
مع التحية

تحياتي يا عمر، حمزة سليمان والحضور .
كما ذكر نازر الخليفة _ بإمكاننا أن نستفيد من هذا الخيط استفادة قصوى لولا حدوث هذه المخاشنات الخفيفة، وأخشى أن يستعر أوارها ويشتعل أكثر فلا تبقي ولا تذر . وقبل أن أقول رأيي وأمضي، أحب أذكّر أن من نبّهني إلى هذا الموضوع صديقة قالت لي : شفت كلامك الكتبتو في الفيس بوك عن عدم رضى السودانيين عن أيّ جهدٍ مبذول مهما اجتهد فاعله . قبل يومين كتبت (لم أقابل في حياتي شعبا لا يعجبه العجب ولا الصيام في رجب كالسودانيين، البعض يحسدك حتى على الميتة الهينة والشهادة البينة، ويتمنى أن يدهسك قطارا مسرعا يخلص عليك؛ وحاة الله وكتاب الله لو جابوا ليكم سيدنا بلال لكي يرفع الأذان من مسجد أرباب العقائد لما أرضاكم؛ عالم محبطة بشكل غريب ) . والشهادة لله عندما قرأت البوست لم أجد حسداً، لأن المختصمان لا يعملان في نفس المجال وبالتالي لن تكون بينهما منافسة على الإطلاق، فسفهت رأيها واستفدت من قراءة البوست . ولكن أيضاً تذكرت رأي الكاتب والفيلسوف ( كلايف بيل ) في كتابه ( الفن ) الذي ترجمه إلى العربية الدكتور عادل مصطفى . كلايف بيل يرى أن الفنان ليس هو الشخص المشبوب بالإنفعال ولا الثري التجارب، فكل هذه الصفات توجد في أُناسٍ بعدد الحصى دون أن تتخايل في أحدهم بارقة فن واحدة ! ( إنما الفنان هو الشخص الذي يفكّر ويحس من خلال وسيط فني معيّن ) . وبإنتهاء مزاعم بيل أعود إلى موضوع النقاش، فأنا أرى أن الفن _ موسيقى غناء _ يعتمد تذوّقه على المزاج الشخصي في الأساس . أنت يعجبك أبوعركي البخيت ويعبّر عنك، وأنا معجب بخلف الله حمد ويطربني ويجعل شعرة جِلدِي تكلِّب ! بمعنى لو لم أكن أطرب لعركي فليست المشكلة فيه، ولا في ذائقتي على الإطلاق، الموضوع اختلاف أذواق فحسب وهي ظاهرة صحّية ومفيدة . وهذا الفهم يقودنا مباشرةً إلى فهم نفسية الفنان وحالات القلق والتوتّر التي يعيشها حتى يخرج لنا بمنتج فني، لذا ينبغي علينا أن نتفهّم كيفية التعامل مع الفنان بغض النظر عن رأينا فيه أوتقييمنا لفنهِ، وألا ننسى أن الفنان أصبح فناناً لوجودِ وسيطٍ فني معيّن اصبح بفضله يرتقي قليلاً عن باقي الناس الذين لا يتمتّعون بهذا الوسيط الفني . شخصياً لا أحبّذ أن أدخل في مغالطات مع خبّاز في مقدارِ الماء أو الخميرة التي ينبغي إضافته إلى الدقيق خشية أن يخرج خبزي محروقاً، ولكني أحاور الخبازين متى وجدت الفرصة لأنني سأكون المستفيد الأول من الحوار عسى ولعل أن أخبز في مرةٍ قادمة خبزاً خالٍ من المواد المسرطنة .

الزبدة : لو كان الموضوع يتعلّق بمداخلة الفنان حمزة سليمان الهاتفية فلا شأن لي به، ولكن فلننس الأمر تماماً ودعونا نستفيد من تجارب الإختصاصيين . عموماً لو طلعت مداخلتي دي أوف بوينت كلموني :)


احترامي

يا حبيب نورة .. شدة ما مداخلتك معاطة لمن نستني الموضوع بتكلم عن شنو أساسا

ما مشكلة ملاسي بعدين بجي يشرحها ليك :)



بعيداً عن المعِط

أنا مسكت الخيط من الحتة البتهمني، وقد تهم آخرين

كعادتك يا حسين ملاسي في سطحيتك اللانهائية وعدم أعمال فكرك ، الفنان والمبدع في هذا الزمان شخصية اعتبارية ونص وخمسة اصبح الفن مدارس وطرق وقبائل فكل فنان اصبح لا يمثل نفسه بل يمثل أكثر من ذلك بكثير
ومن باب إعطاء الحق لأهله سمينا الفنانين والمبدعين شخصيات اعتبارية ليس تجاوزا ولكن الفنان والمبدع عبارة عن مؤسسة وكيان كامل
الزمن أتطور يا سحس انت من زمن الإذاعة علي الهوا الشاعر يعد مع المغني في ضل شجرة وينجروا أغنية ...اسع المسألة اكبر من كدا بكتير عشان كدا بتجوز تسميتي البتوضح مدي السطحية الانت عايشها

ثم انه انا ما محاسب وبس /انا أسطورة في المسالة دي
الم تسمع قول صلاح البندر لي وهو يخاطبني تادبا وتوقيرا بالمحاسب النحرير
بتعرف أحسن من البندر انت؟

لا بأس يا نحرير .. لا بأس.

نردها ليك في ضيقة حقيقة

كمال سالم سلامات ..

هناك تجني واضح وغير مبرر في كلامك تجاه حمزه سليمان ..
والبوست بي طبيعتو تهكمي وعمر الفاروق قاعد يمارس نسقو الخاص كزول شفت ومقطعها في اي حاجة وقادر يتصدى لاي خرمجه في مجالات الكورة والفن وبيدي الناس بالحته الفيها الحديدة وما عندو وكت ذاتو لى الكلام ده فحقو الناس تحترم وكتو الضيعو في حسم الحاجات بالنيابه عنهم ..

* ومعاهو طلحه ..

جمعة مباركة للجميع واشكر المتداخلين
ارجو من الاخ عمر ان يعرفنى بنفسه من خلال كتابة سيرة ذاتية عنه
فى مشواره مع النقد الفنى قبل وبعد سودانيز اون لاين لاعرفه
حقيقى اود ان اعرف عمر الفاروق لاكتب له رد من خلال ما يكتبه عن نفسه
بعيدا عن تقييمى له عن ما يكتبه فى الناس
وانا فى انتظار السيرة الذاتية

الاخ كمال سالم
اشكرك
اذا لم تعرفنى فهذا لن يضرنى بشى واذا كنت غير محب لى غناى فهذه وجهة نظرك
اخى اود ان اعرفك بشى
اول لحن الحنه فى حياتى كانت اغنية اسمها فارس الحوبة وهذه الاغنية غنتها مجموعة عقد الجلاد وكان هذا فى العام 1990
واخر اعمال تغنت عقد الجلاد لى بها هى اغنية وطنا واغنية كلم الزهرة فى العام 2012 والعام 2012
قدرى ان اكون محب لعقد الجلاد وما زلت جماعى فى فكرتى وحقيقى ما قدمته من اغنيات انا راضى عنها واتمنى ان تسمع الرجعة للبيت القديم كمثال.
انا لا اعتقد بانى منقطع عن الغنا ما زلت اغنى لكنى اغنى فى غربه بعيدا عن مساحات الاضواء ، ولابد ان تعرف ما قدمته من خلال تجربتى فى عقد الجلاد
احساسى به كبيرا لذلك لم اكون متلهفا للاضواء او الاطلاله الكثيرة من خلال الاضواء
واعتقد بانه اجمل الاغنيات لم تاتى بعد
اتمنى ان ترد لى باسلوب يليق مخاطبتى لك
واتمنى ما اكون تأخرت عليك فى الرد لانو حقيقى ما صليت فى بيت المقدس كما كتبت ومسحت

ههههههههههه
المشرف تحياتي وكل سنة واتا طيب ..
أود أن أؤكد لك انو عمر الفاروق هو المعاي ما أنا المعاهو ..
من ناحية أخري أو في نفس السياق برغم انك يا مشرف قبل كدا أكدت لي انك ما بتكرهني لكن صدقني كل يوم احساسي بانك بتكرهني بزيد ..
لا لا اتا بتكرهني أكيد ..
أعيش وأعرف اتا بتكرهني ليه يا أبو الشباب ياخ؟ مع اني بحبك وحاة اللخوة ؟
..............
يا أستاذ حمزة سليمان تيك ات ايزي أو كما يقول العارفون .

الاستاذ الموصلي
رمضان كريم...
علاقتك بالكورة كيف يا موصلي؟؟
بتعرف صامويل إيتو؟؟
ح اديك حاجة صغييرة عنو.. هو صاحب اعلى راتب شهري في العالم..
المهم في الموضوع انو كان بيجيب الكورة من ورا القوون...
سلمت يا حبوب

حبيب ألبي ... حبيب نورا..
كان عندنا جارنا لطيييف جدا اسمو حسن جردل وهو عازف طبلة مع فنانين كبار
اها بيحكي مرة قام اتشوبر في عرس في قاعة الصداقة وعزف مع ود اللمين
اها الفاصل الاول كلللو شابك ليك ظررررك كرررر كرررك كوكوكو
اها قال اووول ما الفاصل انتهي ونحن قاعدين قام ابو اللمين كورك
يااا الفاتح حسيين .. حسن جردل ده اتعشى؟؟؟
الفاتح قال ليهو. ايووة يا استاذ
ابو اللمين قال. لي للفاتح :حاااسبووو حاسبووو:-):-)
اها يا حبيب ألبي انت اتعشيت؟؟ :) :):):)

شكرا يا مان وكدي بجييك في رواااق لي كلامك ده..

تخريمة
غايتو قول لي صديقتك عمر قال ليكي اكيييد ما قاصدة :):)

حمزة سليمان
تحياتي..

الشعب حبيبي وشرياني اهداني بطاقة شخصية.. الاسم الكامل انسان الشعب الطيب والديا.. المهنة بناضل بتعلم تلميذ في مدرسة شعبية.. المدرسة فاتحة على الشارع والشارع فاتح في قلبي.. وانا قلبي مساكن شعبية..

غايتو يا حمد. مداخلتك دي. فسر الماء بالماء
انا ويين قلت حمزة ما موسيقي بارع؟؟ ايه رايك انا. بحب جدا الحان حمزة.. وكل شبكتي معاهو الزمان انو هو مغني غير بارع..

المرة دي موضوعي بسيييط جدا والحمد لله انت وافقتني فيو.. الموضوع مكالمة غير مفهومة ااز سيمبل ااز ذات.. اييي حاجة تانية فسروها المتداخلين ما بتهمني .. ايي زول وفهمو.

استاذ الموصلي..
متابع. كلامك عن لعب الكورة وزمان بتذكر كنت حكيت قصة جمييلة عن حياتك. من ضمنها الكورة. وليالي وذكريات المقرن ونهارات الرعي:) كان حكي لطيف
سؤالي ما كان عن عرفة الكورة في عضما سؤالي كان عن معلوماتك الدقيقة وزول بيجيب الكورة ده يوم ما ح يبقا زول عااالمي..
انتو خلوني اجيب الكورة اسة وما تضايقو من القصة دي ولي قداام بخش الميدان..

Quote: استاذ الموصلي.. متابع. كلامك عن لعب الكورة وزمان بتذكر كنت حكيت قصة جمييلة عن حياتك. من ضمنها الكورة. وليالي وذكريات المقرن ونهارات الرعي:) كان حكي لطيف سؤالي ما كان عن عرفة الكورة في عضما سؤالي كان عن معلوماتك الدقيقة وزول بيجيب الكورة ده يوم ما ح يبقا زول عااالمي.. انتو خلوني اجيب الكورة اسة وما تضايقو من القصة دي ولي قداام بخش الميدان..

عمر نسيت ابارك ليك رمضان
اها انت ممكن تكون عالمي في النقد لو عايز
بس لازم تدرس التكوين اللحني والقالب اللحني والتاليف الموسيقي
ولازم تفرق بين الجملة الموسيقية والعبارة الموسيقية والفكره الموسيقية
ولازم تعرف اين يكمنا كل من النماء والتفاعل في العمل الموسيقي
ولازم تعرف التمييز بالداينميكية وعدمها في اللحن
عشان تقذر تحكم على لحن مثل انشودة الجن ومدى تعبيره عن محتوى النص
يارجل كن بخير انت والفنان الكبير حمزه سليمان
كل الود

Quote: الاستاذ الموصلي رمضان كريم... علاقتك بالكورة كيف يا موصلي؟؟ بتعرف صامويل إيتو؟؟ ح اديك حاجة صغييرة عنو.. هو صاحب اعلى راتب شهري في العالم.. المهم في الموضوع انو كان بيجيب الكورة من ورا القوون... سلمت يا حبوب

طيب ياعمر اوريك علاقتي بالكوره عمليا
1- لعبت في فريق العزيمة الرياضي بالخرطوم غرب "وكنت ضمن منتخب الرابطة"
2- لعبت في فريق المقرن " النجوم"
3. لعبت في فريق النيران رابطة بالسجانة
4. لعبت في منتخب رابطة الديم غرب
5. لعبت في فريق الطليعة ليق الخرطوم
خانتي التخصصية "ديب سنتر فور ورد"
ولما بديت ممارسة الفن تغلب الكفر على الوتر
-------------------------
انا ذاتي كنت بجيب الكوره من ورا القون
بس قبل ما ادخل الميدان والبجيب الكوره من ورا القون مابجيب قون الا لمن يخش الميدان
اها كده كيف

بمناسبة الاحساس الفوق دا فعندي احساس عاتي وعالي جدا انو عمر الفاروق وصحبو أساسي كانو متعشيين أمس مع بعض في مطعم مفتوح
في ريف الرياض واحتمال كبير يكونو شدو سلك لتامبا الذي خرج ليفرق المويات في المنطقة المحيطة ( تماما كما كان يحدث في الزمن الجميل )
وعندما لم يصلا إليه واصلا سهرتهما حتي السحور بالبوست دا ..
عشان كدا يا أستاذ حمزة سليمان ويا كل الأعزاء فوق وتحت تيك ات ايزي *















*تيك ات ايزي عبارة موسيقية سهلة الاستعمال خفيفة على اللسان أقصد الكيبورد كما أكتشفت أخيرا

مداخلة الموسيقار حمزة سليمان في البرنامج، ومداخلة الموسيقار يوسف الموصلي تذهبان إلى تعضيد فِكرة "اللحن هو صاحب النصيب الأوفّر من خلود الأغنية"، ضد الفكرة الأخرى التي تقول: الكلمة هي صاحبة القدح المعلى، وهو في ظني، كمتلقي من عامة الناس، صراع لا يقود لفن أجود، بل يقود لفرقة، إن تأزّم، كما في حالة اسماعيل حسن ووردي. وهذا الصراع إن تمدّد، سيخسر فيه الملحِن والفنان قبل الكاتب، الكاتب سيتضرر من قلة الإنتشار، الملحن/ والفنان لن يجد ما يلحنه/ يغنيه. الأغنية الخالدة هي بناء متكامل من كلمة ولحن وأداء، فالحوار إن لم يفض إلى الدور التكاملي بين الكاتب والملحن والفنان، يكون حوار غير عاقل. ما لفت نظري مقدم البرنامج/مدير الحوار، ولد صغير جداً في العمر والفكرة، وظل يقدم في الأدوار بطريقة الأستاذ والطالب، أنظرو للموسيقار الماحي سليمان رافع يده لكي يأخذ الفرصة، وأتعجّب كيف لهؤلاء الأساتذة الكبار في الكلمة واللحن والغناء أن يقبلوا بهذا الشاب لإدارة الحوار.

Quote: مداخلة الموسيقار حمزة سليمان في البرنامج، ومداخلة الموسيقار يوسف الموصلي تذهبان إلى تعضيد فِكرة "اللحن هو صاحب النصيب الأوفّر من خلود الأغنية"، ضد الفكرة الأخرى التي تقول: الكلمة هي صاحبة القدح المعلى، وهو في ظني، كمتلقي من عامة الناس، صراع لا يقود لفن أجود، بل يقود لفرقة، إن تأزّم، كما في حالة اسماعيل حسن ووردي. وهذا الصراع إن تمدّد، سيخسر فيه الملحِن والفنان قبل الكاتب، الكاتب سيتضرر من قلة الإنتشار، الملحن/ والفنان لن يجد ما يلحنه/ يغنيه. الأغنية الخالدة هي بناء متكامل من كلمة ولحن وأداء، فالحوار إن لم يفض إلى الدور التكاملي بين الكاتب والملحن والفنان، يكون حوار غير عاقل. ما لفت نظري مقدم البرنامج/مدير الحوار، ولد صغير جداً في العمر والفكرة، وظل يقدم في الأدوار بطريقة الأستاذ والطالب، أنظرو للموسيقار الماحي سليمان رافع يده لكي يأخذ الفرصة، وأتعجّب كيف لهؤلاء الأساتذة الكبار في الكلمة واللحن والغناء أن يقبلوا بهذا الشاب لإدارة الحوار.

الحبيب ياسر
ساناقشك بسؤال
كيف تعرفت الى نصوص انشودة الجن ووااسفاي وفي الليله ديك؟؟؟
كل الود

رمضان كريم

اعتقد اللحن هو سيد الموقف

اجمل قصيدة سودانية في الشعر العاطفي


لادريس جماع

شاء الهوي ام شئت للاسف سيد خليفة وضع لها لحنا ضعيفا

اغنية الود كلماتها عادية جدا

لكن اليوناني عمل ليها لحن خرافي

وهكذا دواليك

رمضان كريم يا فاروق والشباب

مشكلتك المرة دي يا فاروق - ومع سخانة رمضان دي- وقعت ليك في زول شفت شديد أوي وبتاع كلو

شفتنة حمزة ظهرت في تحييدو لملاسي من دغشا بدري أول إطلالة ليهو في البوست أمن على كلام ملاسي تماما وطبعا ملاسي يعجبك بحب الإطراء موت

قعد ينقز وقبل عليك نيران صديقة عمياء لا تعرف الرحمة دا غير حرب العصابات بتاعة أساسي دي

الشيء التاني حمزة زول موسيقى جد ودي ما فيها غلاط أصلو وكونوا يقول ليك القاب بيني وبينك كبير ما اعتقد إنو دي فيها غرور أو حاجة زي دي لأنو قال كلام حقيقة وثابت

أما موضوع إنو ما قدر يوصل فهمو في المكالمة التلفزيونية ف دي ممكن تدخل فيها حاجات كتيرة لأنو ممكن تصور حمزة عن الحلقة تغير بسبب النقاش الداير في الحلقة أو مداخلتو جات بعد كلام كتير اتقال وهو حاول يرد عليهو كلو

في زمن قليل لذلك ظهر عدم الترتيب في كلامو

نتمنى إنو النقاش يمشي سموث

Quote: حرب العصابات بتاعة أساسي

ههههههه
حسدتك عليها يا حمد .. والله من أمس أفتش لي لوصف يركب على حركات أساسي في البوست دا ..
لكن بامانة كان ح أقول حرب شوارع بدل عصابات .
كل سنة واتا طيب يا خوي .

للضمان كده في ناس كتار متداخلين هنا أعفو لي ما رديت عليكم ..ما فووكا حاجة سمح ؟ مافي زول غريب وكل الناااس أهل .. ليلة هوووي يا ليييل ليييلة هوووي ..

ياسر يا طيفور..
غايتو لمن تبرز في ثياب الواعظينا .. مااا بتتلحق :):):)
ده كلام جميييل جداً وعشان كده انا قلت لي ناذر سيبن ا من قصة لبيضة من الجدادة والجدادة من البيضة دي..
أغاني كتيييرة خلدت بي سبب كلماتها .. وأغاني كتيييرة خلدت بي سبب ألحانها ..
أغاني أكتر فشلت بي سبب ألحانها .. وأغاني مقدرة فشلت بي سبب كلماتها ..
الأمثلة كتييييرة في كل الحاجات القلتها فوق دي وأي مثال كااافي لنسف فكرة أي زول لأيهما الأحق بالبقاء اللحن أم الكلمة ..
حمزة ده زاااتو واللي قال اللحن أبقى من الكلمة أو أهم .. جا قال لسة في أغنيات ما لقت النور والقادم أجمل..
ما تتعب نفسك يا حمزة وما تغيب وتنقطع من المشاهد بالغناء ..أنتج ألحانك دي ووزعا في كاسيت وسي دي.. ولمن تظهر في التلفزيون ما تجي تغني ..تعال بي كمية الحانك دي اعزفا وأبقا مارق..
وين المشكلة ..
كتييير من الشعراء نجحوا في تقديم أشعارهم دون الحوجة للغناء ..إسمساعيل حسن ذات نفسو كان بيخشوا ليهو الناس يسمعو شعرو .. القدال بتسمعو .. أزهري محمد علي بتسمعو.. عاطف خيري بتسمعو ..روضة الحاج بتسمعا..حميد عليه الرحمة بتسمعو ..
كمييية من الشعراء عندهم جمهور واااسع وعريييض ولياليهم الشعرية تمتلء بيها المدرجات لسماع نصوص شعرية فقط..
السؤال :
كم عدد من تقدموا بي تجربة الموسيقى البحتة ولاقت تجربتهم القبول في السودان؟ حافظ ؟ السمندل؟ وتاني؟

أبدا يا عمر أنا عارف إنك ما بتغالط في موسيقية حمزة

موش كدا وبس انت ممكن تكون مؤمن على إنو حمزة متمكن

سمعك نظيف وحمزة موسيقتو نضيفة

كدي شوفو لينا حكاية اللحن والكلمة والأداء دي نقضي بيها رمضان دا مع الأمثلة




يا طلحة رمضان كريم وكل سنة وانت طيب

ياخي نحن حاجات أساسي دي بنزقها وسط الكلام عشان ما يشوفا

تجي تختها ليهو في كوت عينك عينك

لأنو بصراحة لو لقيتو فاضي شغل ممكن يبرمج بيك لحدي عيد الضحية

انتبه !

أممممممك أستاذ الموصلي بقي يقول الكلام الكبار كبار ..
يا عمر الفاروق أطلع من هنا أحسن ليك ..
.........................................
يا حمد أنا أزعم انو أساسي دا صحبي عشان كدا ما تخاف علي .

Quote: كم عدد من تقدموا بي تجربة الموسيقى البحتة ولاقت تجربتهم القبول في السودان؟ حافظ ؟ السمندل؟ وتاني؟

أخخخخخخ
يا أبو عمير .. بقيت رأسك قوي وما بتسمع الكلام ..
قلتا ليك الموصلي بقي جادي فأحسن حاجة تعملا انك تعمل أية حركة كدا تزوغ بيها من الزقاق دا عشان احتمال كبير
بعد شوية يضيق عليك وما تلقي البخارجك ..
زوغ يا أبو عمير .. زوغ بأية حركة اكروباتية .. ان شاء الله ترد على أساسي البكتح فيك بالشطة دا .. أو تحاول
تحلل للقراء وتفسر ليهم لماذا ملاسي فكاك عكس الهواء بعد مداخلة حمزة سليمان ..
اتا حريف وما بتعدم الحيلة .. المهم زوغ يا حبيب .. زووووووووووغ .

أستاذنا الموصلي..
زي ما قال طلحة الكلام ده كبار كبااار علي :) :)
بس النصييحة يا طحة مااا ببقا مارق ..جعولية ساااي كده :)
عارف يا موصلي انا القالب اللحني في عضمو بتاع الأغنية مااا عندي فيهو كلام ..بل وأزيدك من الشعر بيت بطرب جداً لي لحن قم يا طرير الشباب ..وهو من الألحان الكنت بقصر بيها مشوار الفرن لمن اكون عايز أجيب العيش زمان ..والاعجب انو انا عندي غرام مع صوت سيد خليفة ده ما عادي لأنو فيي حتت كده فيهو حنييية بتخليني بدون ما أشعر أدممع والله ..ليي ما عارف حتتى لو اغنية سيد خليفة خفيفة ..
المهم القصدتو إنو انا شايف اللحن هنا طغى على الكلمات ..إمكن إنت قررربت تفهمني وزي خشيت باطن عقلي لمن إستخدمت تعبير إني بفتش لي لحن جنائزي ديك ..أها عرفتتتك وقتها انت زي فهمت قصدي لكن لأنك علمياً كده فاااهم التركيبة اللحنية دي فزي زعلت مني .. هو ما جنااائزي بي الضبط البفتش عن لكن بفتش عن لحن يخليني ما أسرح من الكلام الجمييل ده وأركز أكتر مع الجملة اللحنية سواء بي إيقاع راقص أز بي إيقاع فرايحي في أغنية انا بحس إنها من عيووون الاغاني السودانية في توصيف كلامها ..خصوصا وإنو جماع كل أغانيهو بالفصحى ويقال والله أعلم أغنية وااحدة هي اللي كتبها بالدارجي وغناها خضر بشير وأظنها أغنية قوم يا ملاك والدنيا ليل ..والله أعلم ..

يا طلحة ..ياخ إنت صحفي رياضي وعااارف مصطلح باب النسوان ..
وهو الباب البيمرقو بيهو الحكم لمن يتزنق في هلال مريخ أو في كورة في الجموعية ..:):)
اها أخوك شفت ومجههز روحو لمن تحصل الكعة بمرق بي باب النسوان

هل هي من كلمات التيجاني كما قال الموصلي أم جماع كما قال عمر .. والمخطئ يتطلب الله!

يا سحس..
في الحالة دي انا اللي أتطلب الله..


ما عارف دخلت جماع دي من وين .. يكون عشان معشعش معاي غنا سيد خليفة ..

المسالة اتحولت وبقت اكتر من نيران صديقة كما يبدو يا حمد
ملاسي بقي يرش في الفاروغ الرش الواحد دا ، بقي يريسه بعبارة الكرة الطائرة ويقشره بعبارة الدافوري

يا طلحة اساسي لا صليح له بعدين انا وكت أصاحب امرقها في الشكينبة أو اين ما تسمي حلتكم

أستاذنا الكبير الموسيقار الموصلي ..
كل سنة واتا طيب والجميع طرفك بخير وصحة وعافية ..
عارف يا أستاذ واتا سيد العارفين انو من أقوي أسباب نفور المعجبين وابتعادهم في لحظة عن المبدع والفنان هو
الاحساس بالفوقية الظاهرة على آخر لسانه أو تصرفاته .. الابداع حلقة متكاملة من الاحساس والسمو والبساطة والأناقة في الأسلوب
والقول والتصرفات وكذلك المظهر العام .. أية واحدة من المكونات دي نقصت فحتما سيكون لها تأثيرها على اعتبارية المبدع أو الفنان ..
لما قبل كدا المرحوم وردي رفض يسلم على واحد من المبدعين حتما خرج من قائمة معجبية عدد مقدر من البسطاء ..
خليك من وردي .. هنا في المنبر دا أخوك العبد الفقير لله وبعد ما كان يحب طارق اللمين لابداعه أصبح لا يحبه ولا يكرهه لكن احساسو
بان طارق دا مبدع أصبح في حكم العدم تقريبا ( حالة نفسية كدا ) لأنو طارق تعامل معاي بفوقية مستغربة جدا من دون أي سبب ذات مناسبة ما..
بالنسبة لي حاليا طارق اللمين ليس مبدع ولا يمكن أن تعجبني أبدا اعماله مهما تفنن فيها ..
قس على ذلك الكثيرين غيري ممن لديهم نفس ردة الفعل الباطنة على هكذا كيس ..
عايز أقول ليك اتا عارف انو عمر الفاروق الهنا دا هو مجرد مستمع أو متلقي عادي لديه اهتمام بالفن والموسيقي وما إلى ذلك ويطرح وجهة نظرو
وفق ذائقته واحساسه الخاص ولكنه ليس متخصصا ولم يدرس النقد لا عالمي ولا محلي ولا أقليمي وعليه عندما تخرج عليه
لتخاطبه من بلكونة المتخصص بمصطلحات مثل

Quote: التكوين اللحني والقالب اللحني

فدي فيها ريحة فوقية وتعالي وإرهاب فكري عديل كدا بما يمكن أن يحسب عليك وربما قاد لردود فعل لا تتمناها بالتأكيد ..
الشاهد أن عمر الفاروق قال وجهة نظرو القابلة للصاح أو الخطأ ولكنها كانت واضحة وبسيطة ومفهومة للجميع فلماذا تمارس عليه
( الإسقاط المعرفي) بوصفك متخصص وخبير ..
الفوقية سفح الابداع والتواضع قمته وسموه .. سلك التنجستن يزداد توهجا بازدياد كمية التيار فيه والمبدع يزداد تواضعا بازدياد إبداعه وانتاجه وليس العكس..
قاعات الدراسة والأكاديميات ليس شرطا ملزما لممارسة النقد والتنوير .. محمود عباس العقاد الذي شغل الناس وأصبح قبلة العلماء وهو خريج
إبتدائي .
واتا عامل إيه يا أستاذ موصلي ياخ ؟

رشّة من ملاسي ولا تشكيرة من أساسي..

حكمة دارفورية قديمة ..

تعرف يا طلحة ..
كلامك القلتو ده كلام مهم شددييييد .. و ربما ما يعجب الموصلي لأنو قد لا يكون لمن كتب الكلام ده كان في بالو إستعلاء أو فوقية ..لكن الملاحظ بي صورة عامة إنو لمن انا أتكلم عن ايي عمل موسيقي غنائي طوااالي بينطوا لي ناس الموسيقى في حلقي ويجو بي عبارات مغلفة من شاكلة خلونا نسمع ذوي الإختصاص ..ورأيك سمعناهو يلا خلينا ننتظر رأي الموصلي -مثلا- .
الغريبة أسة جا حمزة وقالا عديييل بدون دسدسة وغتغتة وبيفتكر إنو ممارسة الإستعلاء دي ح تخووفني..طبعاً هن في نوعين في ناس المديدة حرقتني ودي والله حاجة ممتعة وانا زاااتي بكون مبسوط للأجواء بتاعت الجمجرة لكن في نوع تاني ماخد الموضوع تشفي وإنو أحححييينا جاااهو السم القدر غداهو ولا هي عشاهو ما عارف ولا بيقولوا شنو ..وبيفتكروا مجرد أن يخاطبني واحد من ذوي الاختصاص بي مصطلحاتهم فمفروض انا متسلبط وانا متهجم على الشغلانة وبالتالي لا يحق لي الادلاء بي الرأي لأني ما فهمت يعني شنو نوتة ويعني شنو نقد عالمي ونقد محلي ونقد بالجبنة ..

المشكلة يا طلحة الكيبورد اللوحي دا ما مريح والا كان اسرفت في الرد علي ترهاتك اعلاه

عمر الفاروغ لو اكتفي بابداء رايه في ان الاغنية الفلانية لامست وجدانه او لم تلامس لما اشتغل بيهو زول الشغلة ، لكن الفاروغ بقي يقابض ويحلل في الالحان ويحاكمها بطريقته الخاصة مع العلم انه الحكاية كدا ما بتجوز ولما الموصلي اداهو راسه وراهو درب النقد كيف جيت انت كهتيف وواحد من اصحاب عمر جاري تولول قباله
ماهو شنو يا طلحة ممكن تقول برنامج الوندوز اكس بي بطي وفيهو ملاحظات لكن ما ممكن تقعد تفتي في الداتا بيز المستخدمة في الوندوز وانت حي الله مجرد مستخدم عادي خبرتك كلها في الكمبيوتر ما بتتجاوز طبظك طبظك في الكيبورد
عشان كدا احتجينا قبيل في امر الرويبضة والشخصيات العامة

Quote: تقول برنامج الوندوز اكس بي بطي وفيهو ملاحظات لكن ما ممكن تقعد تفتي في الداتا بيز المستخدمة في الوندوز

كمتخصص في الكمبيوتر ..جملتك دي فيها تلاتة أخطاء بتوري إنك متهجم ..ورويبضة ودهماء وشنو وشنو ديلك ..
هااااك الأوراكل ده ...

أساسي إنت النوع اللمن جهاز الكمبيوتر يبووظ كنت بتشيل الشاشة توديها الصلّاح تقول ليهو الكمبيوتر ده فيهو مشكلة مش؟؟

يا عمر عادل من ناس السلك تحت بتكلم عن غرودة عيونك
يا عادل صوم الله يرضي عليك

يا أساسي عادل ده بيكون عايين لي الصورة مستصحباً معه بوست أوسم فنان سوداني..

Quote: الاخ كمال سالم اشكرك اذا لم تعرفنى فهذا لن يضرنى بشى واذا كنت غير محب لى غناى فهذه وجهة نظرك اخى اود ان اعرفك بشى اول لحن الحنه فى حياتى كانت اغنية اسمها فارس الحوبة وهذه الاغنية غنتها مجموعة عقد الجلاد وكان هذا فى العام 1990 واخر اعمال تغنت عقد الجلاد لى بها هى اغنية وطنا واغنية كلم الزهرة فى العام 2012 والعام 2012 قدرى ان اكون محب لعقد الجلاد وما زلت جماعى فى فكرتى وحقيقى ما قدمته من اغنيات انا راضى عنها واتمنى ان تسمع الرجعة للبيت القديم كمثال. انا لا اعتقد بانى منقطع عن الغنا ما زلت اغنى لكنى اغنى فى غربه بعيدا عن مساحات الاضواء ، ولابد ان تعرف ما قدمته من خلال تجربتى فى عقد الجلاد احساسى به كبيرا لذلك لم اكون متلهفا للاضواء او الاطلاله الكثيرة من خلال الاضواء واعتقد بانه اجمل الاغنيات لم تاتى بعد اتمنى ان ترد لى باسلوب يليق مخاطبتى لك واتمنى ما اكون تأخرت عليك فى الرد لانو حقيقى ما صليت فى بيت المقدس كما كتبت ومسحت

الأخ حمزه سليمان ,, تحياتى .
طبعا أنا عندما قلت لا أعرفك فإننى أقصد بأننى لا أعرفك معرفه شخصيه ولكنى بالطبع أعرفك كعضو سابق
فى فرقة عقد الجلاد الحبيبه إلى نفسى كما وإننى أعرفك كموسيقى وملحن لا يشق له غبار , ولكنى قد حاولت
أن أعرفك كمطرب أو فنان فلم أجد لك شئ يستحق أن أصنفك به فى خانة من خانات الإبداع الغنائى .
وليس بالضروره أن تكوم الخبره فى الغناء الجماعى مؤهلا ليكون الشخص مطربا بعد أن يتقاعد من الفرقه الغنائيه
التى كان يعمل بها .
والأمثله كثيره .. ففى عقد الجلاد فقط هنالك الكثيرين ممن تركوا الفرقه وحاولوا الغناء منفردين ولكنهم لم يجدوا القبول .
وعندك مثلا زميلتكم الصيدلانبه ( نسيت إسمها ) لقد حاولت عبثا أن تعمل المستحيل لتكون مطربه ولكنها فشلت فى
ذلك . وغيرها وغيرها .
المطرب الفنان لا يصنع نقسه , فالجمهور هو من يصنعه ,, أنظر كم من الفنانين الذين ظهروا قبل عشرات السنين
و لا يذكرهم أحد الآن بالرغم من أنهم أحياء ,, وفى نفس الوقت أنظر كم من الفانين قد ماتوا منذ عشرات السنين
ومازال صوتهم يجلجل وأغنياتهم ترفرف فى مسامعنا .
يا عزيزى حمزه ما قصدت أن أقوله هو إن الروح والعقل والوجدان الإنسانى هم كالمغنطيس يجذبهم الفنان بعقويه وبساطه
دون أى تعقيدات أو معرفه أكاديميه .
عطاءك مع عقد الجلاد مقدر وإسهاماتك الموسيقسه واللحنيه ممتازه فليكن جهدك فى هذا الإتجاه .
وتأكد تماما أن لا شئ شخصى ولك منى كل التقدير والإحترام .

والله يا أساسي من ناحية عمر صاحبي وبحبو فدي حقيقة لكن عليك الطلاق بالتلاتة أنا ما هتيف ..
الكلام دا كان قلتو للأستاذ الموصلي لو كان موجه لأي زول تاني غير عمر .. من باب كلمة الحق بس .
وأزيدك علم انو اذا في زول واحد في المنبر دا يتمني انو أبو عمير دا يترش فهو أنا دا والله على ما أقول شهيد .. ودا
لسبب بسيط جدا وهو في تقديري انو عمر كلما اترش كلما ازداد حلاوة وطراوة كيبورد وأصبح ممتعا جدا في كلامو وردودو .
بعدين أنا ما من الشكينيبة .. من البشاقرة يا متعلم .

Quote: من البشاقرة يا متعلم .

انا من زمااان عندي سؤال محرقني يا طلحة..
إنت البشاقرة دي ياها الشبارقة ؟ ولا ده إختلاف في وجهات النظر ساي؟ :):):)

Quote: جمعة مباركة للجميع واشكر المتداخلين ارجو من الاخ عمر ان يعرفنى بنفسه من خلال كتابة سيرة ذاتية عنه فى مشواره مع النقد الفنى قبل وبعد سودانيز اون لاين لاعرفه حقيقى اود ان اعرف عمر الفاروق لاكتب له رد من خلال ما يكتبه عن نفسه بعيدا عن تقييمى له عن ما يكتبه فى الناس وانا فى انتظار السيرة الذاتية

لالا يا حمزة كده بتخصم من روحك شديد .. وحا تكون عدا مع طائفة كبيرة من الجمهور

انا حا اديك سيرة اولية لعمر الفاروق مع اني عارفو ما برضى

عمر الفاروق خريج جامعة السودان كلية علوم الحاسوب بمرتبة شرف
اتعين استاذ في نفس الجامعة
والغريبة كان اول زول انتدبوه من الحاسوب كاستاذ عشان يكون لبنة اولى لعلاقة ربط بين كلية الفنون الجميلة ومعهد المسيقى والتقناية الحديثة في ايطار الوسائط المتعدد المستحدثة حينها
طبعا لاسباب كتيره
عمر ساب التدريس الجامعي وهاجر الى السعودية

الخلاصة .. عمر زول شاطر .. وبفهم كويس .. ونحن في عصر المعرفة ..

والمعرف تغيرت على مر السنين
زمان كان العارف الحفييظ
بعده اصبح العارف هو الفهيم
ثم اصبح العارف صاحب المكتبة الكبيرة او من يستطيع الوصول اليها الذي يستطيع ان يرجع الى اكبر عدد من مصادر الاحالة المثوق فيها ليعضد فكرته
الان اصبح العارف من يستطيع البحث عن المعلومة والوصول اليها في ظل الاتاحة الكبيرة للمعلومات .. ودي مرقو ليها علم كبير اسمو الداتا ماينيق

وعمر بعرف الشغلانة دي ...
بمعنى تاني
مواضيعك الفتحتها يا حمزة لو عمر عاوز يحرجك .. ممكن يغتس ساعنين في قوقل او اي سيرش انجن تانية ويجيب مراجعها ومراجع انت ما بتكون قريتها .. ويشيل الزبده ويرشك هنا

فما تشربك الامور يا حمزة انت زول محبوب .. رش عمر من حيث اتاك وما تخرم

مودتي

لكن يا وليد عليييك الله كزول متخصص في الكمبيوتر وكده .. رايك شنو في برنامج الويندوز إكس بي دي القالا أساسي دي ؟؟؟ :):):)

أساسي وبما إنك جبت سيرة الداتا بيز مع الويندوز دي ..زماان في داتابيز بيصمموها بي حاجة إسمها الفوكس برو Fox Pro
أها في كتاب كان إسمو Fox Pro Under Windows بيشرح كيف البرنامج ده بيشتغل في اليوندوز ..
أها الكتاب ده إتعملت منو نسخة عربية الكتاب كان مترجم كالتالي :
الثعالب تحت النوافذ ..

ما عااارف لييي إتذكرتك اللحظة دي...
اساسي الله يرضى عليك خليك في نحرير وجرير يا ثعلب إنت..

تخريمة :
ما أن تذكر الثعالب إلا ويخطر على البال طارق جبريل :):)

Quote: تخريمة : ما أن تذكر الثعالب إلا ويخطر على البال طارق جبريل :):)

الاخ وليد
رمضان كريم
السيرة الذاتية القصدتها سيرة ذاتية فى مجال النقد الفنى فقط وبيست سيرة ذاتية علمية
وكان طلبى واضح
مسيرة عمر الفاروق فى النقد الفنى قبل وبعد سودانيزاون لاين دوت كوم

نفسي اعرف الفنانين ديل بغنو للجمهور والناس العامة ولأ للمثقفين والنقاد فقط ؟؟؟ لانو من حق اي مستمع اقول رايه في كل مايراه .. ويعني يا استاذ حمزة الا اكتب السي في حقتي هنا عشان اقول وجهة نظري في لحن ولا اغنية الخخخخخ ... لو كده الفنانين ديل كلهم اقوموا اوجهوا اعمالهم دي لاصحاب السيفيهات .. كلام غريب ...
بعدين انا رايي زمان مافي وسائط متاحة بموجبها تستطيع معرفة بعد الاراء من اصحاب الشئ زاتو ...

خليك انت يا طلحة اهو وليد جا برضو وباسلوب اولاد الحلة الفرد عشان ينصر عمر ظالما ومتعديا وشليقا
انتو دايرين حمزة والموصلي يسمعوا كلام عمر المبني علي مزاجه الخاص ويسلموا ليهو بيهو ولا يردوا عليهو بطريقته هو ما بطريقتهم ؟
ياخ ديل الموضوع بالنسبة ليهم ما ونسة منابر تنتهي بارشفة البوست
الناس دي انتو بتتكلموا مصادر رزقها واكل عيشها واهتمام حياتها بالاضافة لتخصصها الاكاديمي
وليد وطلحة دايرين الموصلي وحمزة يدردقوا في التراب ويناقشوا عمر بطريقته هو
لما يحاولوا ينفضوهو من التراب ويحتوهو عشان يقدروا يتكلموا معاهو يجوك اصحاب عمر يشبكوك فوقية ودرية !!
لا وغير كدا يطلعوا ليك عمر الفاروغ وليم تيل بتاع الكمبيوتر
بالنسبة لموضوع الكمبيوتر دا احسن تخلوني ساكت لانه عمر عارف وانا عارف والباكستاني عارف

بما إنك عاااارف ..فياخ رأيك شنو في الداتبيز بتاعت اللينكس؟؟ :):):)
ولا أقول ليك إنت لأنو شكلك متخصص مايكروسوفت فرأيك شنو في الداتابيز حقت الويندوز ملينيوم :):):):)

يا اساسي
ياخ والله زي ما قال عمر

انت اوت اف بوينت


هو عمر قال لشنو ؟

عمر قال انو الكلام القالو حمزة ما مفهوم ..
هو ما قال كلامو صاح او غلط

مع انو الحلقة الانت ما حضرته الراي الغالب فيها من ناس برضو الشغلانة دي اكل عيشهم .. اقرب زول لي حمزة في الحلقة شمت
قالو كلام مختلف عن كلام حمزة


شخصيا انا الحلقة عجبتني جدا .. وشخصيا برضو ميال لي راي ناس حمزة وعز الدين هلالي
عز الدين قال الغنية ما بتبقى غنية الا بعد ما تتلحن


الناس التانين حجتهم برضو قوية
شمت قال
اساسا الشعر مولود بمسيقتو .. والا لو ما فيه موسيقى كان بكون كلام زي اي كلام


فياخ بالله ركز وافهم الموضوع .. بعدين تعال شاتر


كدي النسالك
الموضوع شنو اساسا ؟

Quote: البشاقرة دي ياها الشبارقة

شوف المتعلم التاني دا كمان ؟؟؟؟؟
لا يا بتاع العلام اتا
في اختلاف جغرافي ولغوي
الشباقرة ديك بى هناك لى مدني .. أما البشاقرة بتاعتنا دي فهي هنا دا قريب مسافة ساعة إلا ربع من الخرتوم
العملا أساسي بتاعتو وهي ( أي الخرتوم ) براءة منه ..
من ناحية لغوية البشاقرة والشبارقة فيها جناس ناقص .. ( نوع من الاسقاط المعرفي عليك )

يا وليد
بخلاف عنوان عمر الفاروغ المستفز العنوان المتندر علي حمزة ، لما لم يقل تعال يا حمزة اشرح لينا داير تقول شنو وهو يعلم انه عضوا اقدم منه في البورد دا ولكن عنون البوست لملاسي باستفزازية صارخة وتندر وتعالي علي حمزة
بالاضافة للعنوان عمر بقي يجيب اغاني ويقعد يشرح فيها ويفتي بطريقته السوقية الهمجية لو انت ما متابع ارجع شوف طرير الشباب الجا شرحها عمر بي موس ميته

لا بالجد كده يا أساسي انا جهاز الكمبيوتر بتاعي بطئ..أها أسة ده بيكون من الداتا بيز ولا لمن برنامج الويندوز؟؟

احكي ليك دي يا عمر

اليوم داك مشيت الجوازات امدد تاشيرة زيارة اها انا طالع من الجوازات اسمع ليك زول بيقول السماني السماني بصوت عادي ما كوراك يعني اها اتلفت اشوف دا منو البنادي دا القي ليك علي بعد عشرة امتار زول زميلنا في الجامعة تقريبا لي 16 سنة من اتخرجت ما لاقيتو ولا لاقاني اها طبعا اخوك بلهفة المعرفة والعشرة والزمالة والسنوات الطوال ابتسمت ابتسامة واسعة ومرحبة وعلي اساس احضان وسلام واشواق وحالك اها زولي بعد ما اتلفت وابتسمت رفع لي يده وواصل في طريقه لا يلوي علي شئ ضاربا عرض الحائط بكل الحاجات اعلاه ومشي عادي كانه امس كان معاي في المحاضرة
طبعا انا وقفت وبقيت بعاين ليهو وكل شوية ابتسامتي تزداد اتساعا وارسلت علي قفاهو كم لايك سريعات ومشيت عربيتي وانا زيه لا الوي علي شئ

الحركة دي ما حصلت لي الا اليوم داك قبل سنتين كدا مع حمزة دا زاتو في بيت الفنون ، طبعا حمزة دا زمينا هنا من زمن شختو البورد وتقاطعات كتيرة ومداخلات ومعرفة يعني برضو شفته في بيت الفنون مشيت عليهو اسلم بحكم البورد والفعالية زاتا كانت بتخص البورد كان ماشي اها مديت يدي سلمت عليهو وعرفته علي نفسي قام وهو مواصل في مشيهو قال لي اووو اساسي وخلاص انتهي الموضوع لا حق الله ولا بق الله
المهم كم لايك باثر رجعي لحمزة
دا غير القصة التالتة العارفها ملاسي الله لا كسبو ولا غزا فيهو بركة

اها بعد القصص دي الواحد فكر جادي انه يسمي روحه انفزبل مان ويعيش حياته طبيعي
فما تتشالق الله يرضي عليك

يا اساسي
انا متفق مع عمر في فهم لي قم يا طرير الشباب
شايف انو كلماتها اعلى من لحنها ..

وميال لراي حمزة في انو الغنية ما بتقى غنية الا بعد ما يلحنوها .. قبليها بتكون قصيده

المهم انت كلامك مداخلاتك قبل ما عمر يجيب قصاد وشرحها

ليه ؟

حمزه يا فنان

Quote: الاخ وليد رمضان كريم السيرة الذاتية القصدتها سيرة ذاتية فى مجال النقد الفنى فقط وبيست سيرة ذاتية علمية وكان طلبى واضح مسيرة عمر الفاروق فى النقد الفنى قبل وبعد سودانيزاون لاين دوت كوم

وده القاصده بانك حا تخت روحك في عدا مع الجمهور

كلامك ده مفاده ... يا جمهور اسمعوا سااااااااااااااااااااااااااااااااااااااااااااااااي
زول ما قاري نقد ما يفتح لينا خشمو هنا

كلام خلاصته يا حمزه ... اسمعوا البنديكم ليه واشكروا ربكم

لو الكلام كده
هل انت عندك علاقة بالحاسوب
يعني قاري وب تكنولوجي؟!
لو ما قاري وب تكنلوجي ما تكتب لينا في منبر بكري ده

بالمناسبة انا معجب بيك جدا وبي الحانك
يعني من جمهورك كملحن

Quote: ابتسمت ابتسامة واسعة وكل شوية ابتسامتي تزداد اتساعا

هههههههههههه
اها وابتسامتك الماشة متسعة دي كانت عن أسنان صفراء واللا يشوبها شىء من الغموض واللا
ممزوجة بنوع من السخرية ..؟؟؟؟
يا أخوانا نادوا لينا حيدر الزين شوفوهو وين ؟؟
حكمتو بالغة.

يا طلحة ما تاخد المسائل شخصة
انا هدفي كله العمود الاخر في الصفحة الاخيرة العامود المناوي لعمود عمر

هيي لكن يا أساسي لما تعملا لينا رجل المستحيل ما بتكون عوقتنا في الأنكل ياخ .

لالا كان كده يا أساسي ما بتعرفني ..
انا في خضم جوطتي مع طارق اللمين زمان وفيييي المنبر ده ..بعدها بي شهرين انا كنت في السودان ومشيييت بيت الفنون ده لأنو سمعت محمود قالوا ح يجي يغني بعد إفطار رمضاني ..جلست في ركن قصيّ وطلبت كباية شاي أحمر بي جغلومية الف كده ولاحظ قبلها برضو دفعت زي جغلومية ألف عشان أخش بيت الفنون (هيييه دي أيام طارق اللمين كان طارح نفسو مستنكح ورمضانك كريم يا طارق ياخ :):) ...) المهم انا مننن ما خشيت لحددددي ما قمت من بيت الفنون ده مع ختت محمود للمايك انا ما مشيت إتشوبرت اسالم طارق ده ولّا أقول ليهو يا طارق انا عمر بتاع سودانيز ..
جاني إحساس إنك حكيت القصة دي لأنك بتفترض إني لو مشيت الامارات ممكن الاقي حمزة ده في شارع الرقة وأقوم اقول ليهو حمزة حمزة انا عمر بتاع سودانيز ...:):):)
أسااااسي انا ود قلبا ياخ ...حركات البعامات دي ما عندي..

يا حمد للدقة وكدا, ملاسي ما حيّدو حمزة بتثنيته على كلامو
ملاسي جا محايد من قولة تيت, راجع مداخلتو الأولى :)

يا ود البشرى ..
ولو حمد شغّل مخو شوووية كده كان مفروض يسأل لييي انا من دووون الناس إخترت ملاسي عشان يجي يشرح كلام حمزة ؟؟
ملاسي ماااا محيييد الليلة ولا أمبارح :):):)

Quote: أسااااسي انا ود قلبا ياخ ...حركات البعامات دي ما عندي..

اها الجنونة هسع حا تقوم على كم نفر كده

في داعي يا عمر

اتخيّل يا فاروق لو كنت اخترت كمال سالم مثلا ههههههههههه
البوست كان مشى الخور

يا وليد امدرمان شنو تاني بعد بوستكم عن محمود الله يرحمه :)

يا ود البشرى

ده ما ياهو البميز امدرمان .. ناسها بعرفوا يحبو .. وبعرفوا يفهمو .. وما بخجلوا يدسو ريدتهم لي زول .. حتى لو كان من بحر او الخرطوم مثلا

خوووووود يا وليييد ..
أهو ود البشرى أووول زول جنّ .. :)

وحمزة ما ود قلبا يعني منكم وفيكم ؟

يا وليد سلام
انا مازلت على ان يكتب الاخ عمر سيرة ذاتية
اذا سألتنى ليه ؟
الجواب
اى نقد فنى لى اغنية ، لى فنان ، لى فنانه ، لى مقدم برامج ، لى برنامج ،
كان وراه عمر الفاروق
وحقيقى انا دايرو يعرفنى بى نفسو ربما كان موهوب فى النقد الفنى دة من زمان
وعشان ارد ليه من منطلق معرفته لا من منطلق انطاعيته تجاه الغنا ما ح اقول الثقافة،
وبعدين ما صادفنا نقد كتير جدا ايجابى وسلبى حصل قلنا لزول انتقدنا ورينا سيرتك الذاتية فى النقد شنو؟
لان عمر الفاروق طارح نفسو ناقد فنى وله رأى مكتوب فى سودانيز اون لاين من زمن.
اهتمامه بالنقد دة كان بعد او قبل سودانيز اون لاين ... سؤال؟

غايتو يا حمزة انا قلت ليك وجهة نظري

وكلامك ده ما اقنعي ولا برر لي جدوى سؤالك

مودتي

الاخ وليد

لابد من الحوار

Quote: الاخ وليد لابد من الحوار

صدقت

أهااااا قمنا يا وليد للغلاط
انت في البوست الفات رصيت لي لستة جغلمية اسم من امدرمان فنان وشاعر وملحن
خلييييييتم كلهم و فنانك الأول من بحري, نفس الكلام ينطبق على عمر

فناني الاول من مدني
محمود فناني المدهش

صحح معلومتك

كنت اتمنى انو الاخ عمر قدم من خلال صياغه نقدية للحلقه كلها نقد فنى كامل ومن ضمن الحلقة مداخلتى
لكن ان ينتقد فقط مداخلتى فى حلقة كامله فيها خلاصة وفيها حوار كامل
ماذا يعنى هذا ؟
ولو تلاحظو لى رددوه كلها لم يكتب فيها جملة ما وصلت اليه الحلقة
.
.
.

يا عمر الفاروق

كلم لاعرفك

بالمناسبة دي نخلي الناس تستفيد

وبما انو الحصة مزيكا


هاكم

https://www.coursera.org/berklee

Berklee College of Music
Berklee College of Music was founded on the revolutionary principle that the best way to prepare students for careers in music is through the study and practice of contemporary music. For more than half a century, the college has evolved to reflect the state of the art of music and the music business. Berklee serves distance learners worldwide through its award-winning online extension school, Berklee Online.

الكلية دي فاتح ليها كورسات مجانية اون لاين في coursera.org
في :

Jazz Improvisation1
Jul 19th 2013

Introduction to Guitar
Jul 19th 2013

Songwriting
Jul 19th 2013

Introduction to Music Production
Jul 19th 2013


الاستاذة الشغالين فيها

1- Gary Burton



2- Thaddeus Hogarth1
Associate Professor
Guitar


3- Pat Pattison
Professor


4- Loudon Stearns
Assistant Professor
Contemporary Writing and Production



_________

وبالمناسبة انا دخلت الكورس حق الجتار
وغلبني اتمو

Quote: عايز أقول ليك اتا عارف انو عمر الفاروق الهنا دا هو مجرد مستمع أو متلقي عادي لديه اهتمام بالفن والموسيقي وما إلى ذلك ويطرح وجهة نظرو وفق ذائقته واحساسه الخاص ولكنه ليس متخصصا ولم يدرس النقد لا عالمي ولا محلي ولا أقليمي وعليه عندما تخرج عليه لتخاطبه من بلكونة المتخصص بمصطلحات مثل Quote: التكوين اللحني والقالب اللحني فدي فيها ريحة فوقية وتعالي وإرهاب فكري عديل كدا بما يمكن أن يحسب عليك وربما قاد لردود فعل لا تتمناها بالتأكيد .. الشاهد أن عمر الفاروق قال وجهة نظرو القابلة للصاح أو الخطأ ولكنها كانت واضحة وبسيطة ومفهومة للجميع فلماذا تمارس عليه ( الإسقاط المعرفي) بوصفك متخصص وخبير .. الفوقية سفح الابداع والتواضع قمته وسموه .. سلك التنجستن يزداد توهجا بازدياد كمية التيار فيه والمبدع يزداد تواضعا بازدياد إبداعه وانتاجه وليس العكس.. قاعات الدراسة والأكاديميات ليس شرطا ملزما لممارسة النقد والتنوير .. محمود عباس العقاد الذي شغل الناس وأصبح قبلة العلماء وهو خريج إبتدائي . واتا عامل إيه يا أستاذ موصلي ياخ ؟

الحبيب طلحة كدي استهدى بالله
فهل
التكوين اللحني والقالب اللحني
تعابير صعبة وتعالي
كدي انت شوف لي بدائل بلدية للتعبيرين ديل ينوبك خير
غايتو الا اكتبهم بالانجليزي
Formation + form
أو أقول بالعربي مكونات + قولبة
وكده أكون صعبت الموضوع بالرغم من أن عمر ما قادي عربي هههه
يا صديقي طلحة انت عارف انو انا ما بتعالى ولا بتكبر
وعمر ده بتجربته معاي عارف انو بالي سلبة واطول من نهر النيل
وانتو عارفين شجاعتي في مناقشة العامة على مراي ومسمع
والا لكنت هربت مثل كثير من زملائي الصغار والكبار من هذا النت الذي
قد ياتي اليك منه في اي لحظة شيطان رجيم يلعنك باسم الله
أخيرا عمر في كلامه عن انشودة الجن قال "يتحدى" ألم تقرأ هذا الكلام؟؟؟
وصدقني التعابير هذه// ما لغة الموسيقى ونظرياتها لاننا ان تحدثنا بها في هذا الحشد
لما قبلتموها من الاساس
تحياتي

Quote: صوصا وإنو جماع كل أغانيهو بالفصحى ويقال والله أعلم أغنية وااحدة هي اللي كتبها بالدارجي وغناها خضر بشير وأظنها أغنية قوم يا ملاك والدنيا ليل ..والله أعلم ..

التجاني يوسف بشير ياعمر "ما جماع"

السلااااام عليكم


بعيد عن الضفر الحاصل ده .. والمريحني شديد .. ومن عير ايه


عاوز اغتنم الفرصة دي واشكر اخونا وليد المبارك
على اللنك بتاع coursera والله مفكر افتح ليك بوست
شكر عديل لكن انا خيبان جدا في المتابعة .. فعذرا
انت جبت اللنك ده قبل فترة وافادني جدا جدا
واوصي اي زول عندو باقي قراية ما تماها او عاوز يعمل ابديت
لحاجات قراها زمان يمشي هناك ... ومن ثم يدعو لوليد.


-----
بالمناسبة الكورس بتاع الجيتار انا كملتو كلو
لكن مع بنتي كمترجم هههههههه .. وحسع بعزف احسن منها ...
وعندي كل الفديوهات والدوكس ... فلو محتاجا يسرني جدا ايصالها ليك
العيد في السودان ان شاء الله بس انت قول.

معقولة بس يا عمر ?
نفس الحركة اللى زعلتك من الموصلى و حمزة سليمان جاى تعملها لاساسي? ذى ما انت علمون الجضمون فى الكومبيوتر(و ممكن تندم اساسي على تعليق عن الوندوز) هم برضوا خطرين فى الموسيقى.
______________________________
انا و انت يا عمر ممكن نكون دفعة او فرقنا سنة او اثنين.
لما كنت انا بشتغل ب FoxPro (فى الثانوى) كنتا بتعمل فى شنو انت?. ما تقشر لينا ب الFoxPro يا اخى.اساسي ذاتو ممكن يجى يبرمج بيك بمجاله

ناخد break مع شعبان


http://www.youtube.com/watch?feature=player_e...beddedandv=jJH_4FeCNzY




الدقيقة 4.41 إلى الدقيقة 6 متعة عجيبة

Quote: أمين سليمان .. سلمك الله من كل شر ..ورمضانك كريم .. عارف ..بالجججد كنت عايز أجاوب ليك ليك بي كلام الجكس داك لأنو فععلاً بيعبر عن الإجابة .. " أكيييد ما قاااصد " ... :) طبعاً لأ .. ولأ شدييدة .. مع إني أترددت كمم مرة من إنو أرد ليك مباشرة ..لأنو السؤال في حد ذاتو كده الإجابة عليهو بتدي مساحة أكبر من الموضوع.. بس يا أمين إحساسك أبداً ما صاح .. ولااا أنا البتهمو الشهرة ..وما تشووف الفرفرة البعملا معاكم هنا دي..انا زول لااامي حاجاتو ولاااامي روحو ..تفتكر شهرة بعد العمر ده ممكن أسوووي بيها شنو؟؟ وأشتهر لي منو؟؟؟ ويشهرني منو؟؟ ولييي؟؟؟ وعشان ح أصل لي شنو ؟؟ بالججد بالغت معاي يا أمين .. وصدقني ما كلام زعل بس حتتتى الناس اللي بتشوفني بستهدف فيهم ديل والله ووالله ما حصل فكرت في إنو بتعامل معاهم كمشاهير .. يعني حمزة ده مثلا إختفى من خارطة الشهرة البتتكلم عنها دي قرابة العشرة سنوات وبقا زول أكتر من عادي وهو ما من النوعية اللي شهرتو بتمتد حتتى لو غاب عن الساحة فصدقني الاسة بيستفيد من الكلام ده حمزة زاااتو ما انا.. لو بتفتكر شروق ابو الناس من المشاهير فبرضو محتاج تراجع نفسك.. استاذنا الموصلي هرم كبيير ماف كلام وانا ما بستهدفو ورغما عن كده الموصلي برضو اختفى من الساحة لي ربع قرن فالشهرة إندثرت معاهو .. أووعا تقول لي عاصم البنا ... أججججي ؟؟ أكيييد ما قاصد .. :)

شكرا يا عمر على الرد الهادي، و اسمح لي - من وجهة نظري طبعا - اوريك المشكلة وين :
واضح انك زول بتفهم في قصة الغناء دي و عندك وجهات نظر الناس بتتفق و تختلف معاها، الاشكالية في طريقة نقدك و قسوتك الما مبررة مع البتختلف معاهم من ((الشخصيات الاعتبارية)) بحسب حبيبنا أساسي، خاصة و انك بالسليقة كدا زول ساخر جدا، المسألة دي ما بتخلي فرقة لاي نقاش صحي و بتخت ((الشخصيات الاعتبارية)) الأعضاء معانا هنا في حته ضيقة جدا : يردو ليك تواصل في سخريتك ... ما يردو ليك ولا ردهم ما يعجبك توصموهم بالفوقية و التعالي !!
بالنسبة للبوست ده، فموضوعو ذاتو عدم موضوع !!
شنو يعني زول إتصلو بيه و تلعثم ولا تمتم و كان معلي التلفزيون و باقي كلامك ده ؟!! ياخي ده بحصل في أرقى العائلات و بصورة يومية !
لو عندك كلام عن مداخلة الأستاذ حمزة سليمان، كان تنتقد قصة (( اللحن قبل الكلمات )) اللي هي ال bottom line بتاع رأيو لكن جنوحك للشخصي و السطحي في الموضوع ما بخلي الزول يحسن الظن في جدوي نقاشاتك ...
--------------
طلحة يا حبنا، سلام يا رجل و لعلك بخير

Quote: عايز أقول ليك اتا عارف انو عمر الفاروق الهنا دا هو مجرد مستمع أو متلقي عادي لديه اهتمام بالفن والموسيقي وما إلى ذلك ويطرح وجهة نظرو وفق ذائقته واحساسه الخاص ولكنه ليس متخصصا ولم يدرس النقد لا عالمي ولا محلي ولا أقليمي وعليه عندما تخرج عليه لتخاطبه من بلكونة المتخصص بمصطلحات مثل Quote: التكوين اللحني والقالب اللحني فدي فيها ريحة فوقية وتعالي وإرهاب فكري عديل كدا بما يمكن أن يحسب عليك وربما قاد لردود فعل لا تتمناها بالتأكيد ..

اتفق معاك إنو ((عمر الفاروق الهنا دا هو مجرد مستمع أو متلقي عادي لديه اهتمام بالفن والموسيقي وما إلى ذلك )) لكن اختلف معاك في إنو رد الموصلي فيهو (( ريحة فوقية وتعالي وإرهاب فكري )) ... و كلامي الجاي ده ممكن تعممو على معظم بوستات عمر الفتحها ((للشخصيات الاعتبارية)) دي ...عمر هو البمارس الأرهاب الفكري لانو بجي ببل و بسخر من الناس دي و لمن يقولو ليه إنت بتعرف شنو في الموسيقى ولا يجيبو مصطلحات علمية لشرح وجهة نظرهم، تقولو دي (( فوقية وتعالي وإرهاب فكري)) !!
فيا طلحة ياخي عمر ده شكلو زول موهوب بالجد في حتة الغناء دي، من حقو ينتقد الفنانين و غناهم و أي شئ طالما كان النقاش في عضم شغلهم، لكن قصة فلان تلعثم و تمتم و كان رافع صوت التلفزيون دي - في تقديري - ما صاح ...و قسوتو و سخريتو الزايدة على من ينتقدهم برضو ما صاح ... و نقدو ده مفروض يتم بصورة تخلي في أرضية صالحة للنقاش عشان كلنا نستفيد !!

لم يشفع لك يا بروف في تندرك علي المصطلح الا انك اعدت انتاج حديثي كله ملحنا

Quote: لم يشفع لك يا بروف في تندرك علي المصطلح الا انك اعدت انتاج حديثي كله ملحنا

مش قالو ليك اللحن أهم من الكلمات !!

وانا اردتها في تعليقي وعنيت بها ذلك يا بروف

أستاذنا حمزة سليمان ، السلام عليكم ورمضان كريم..
أول مداخلة في هذا البوست كانت مني، لأنني فعلاً لم أفهم الكثير مما جاء في كلامك، إنت كنت عايز تقول كلام
كتير في زمن قصير وقد كفاني أساسي مؤنة التفكير فيما تريد أن تقول وتوّصل، حينما ذكر إنو عندك آراء كتيرة
عن الموضوع وخزلك الزمن في إنك تقولها كلها فظهرت مداخلتك مبهمة..
مداخلتي لم تكن تريقة أو إقلال من شأنك ( حاشا لله ) ولكنها كانت استفهامية ، أو ممكن تكون إستغرابية،
فأنا كغيري أعرف من هو حمزة سليمان ، لذلك استغربت من مداخلتك غير المفهومة دي..
وعمر كذلك ، وهذا ليس دفاعاً عن ما قاله، فهو ما محتاج يدافعو عنو ولا يتكلموا نيابة عنو، ولو رجعت
لكلامو بتلقاه إنو محصور في عدم فهمو لمداخلتك، كشأننا جميعاً..
وممكن جداً تزعلك الطريقة الإتناول بيها عمر الموضوع، ممكن تكون مستفزة، مستهترة .... الخ ، وده حقك..
يا حمزة من حق أي مستمع أن يكون عندو رأي فيما يسمع، وما شرط أبداً إنو يكون متخصص !! معظم الغنا
الخالد والسمح ، وصل للمرحلة دي من خلال ملاحظات وآراء المستمعين العاديين ( الجربندية ) الزيّنا ديل..
طلبك للسيرة الذاتية بتاعت عمر كانت ممكن تكون مقبولة الى حد ما إذا كان عمر اتناول تجربتك الفنية..
وحتى لو حدث ذلك، فده معناهو يا عمر لو ما دارس نقد ما تجي تتكلم !!! وده غلط .. ومعناها برضو إنو نسمع ونسكت..
معقولة بس!! المفروض الفنان يأخذ بكل الآراء البتتقال ، سلبية أو ايجابية ويستفيد منها..
يا أستاذ حمزة إنت أصبحت شخصية عامة منذ أن أصبحت عضو في مجوعة عقد الجلاد ، وبالتالي أصبحت عرضة للنقد،
هسي لو المكالمة دي كانت من (المستمع أو المواطن) صلاح عبدالله ، هل كان عمر ح يفكر مجرد تفكير إنو يسأل
الزول المتصل ده قاصد شنو؟؟
طبعاً لا ، لأنو صلاح ده زول من عامة الناس، وما في زول عارفو ، ولا يهم ما يقول، بعكس حمزة سليمان الشخصية
الموسيقية الفنية المعروفة ..
قول لي واحد في السودان من محبي عقد الجلاد من بيحب وحافظ فارس الحوبة ، أو ما بينتظر دورك في أولاد المدارس !!
وعشان كده اتوقعنا إنو مداخلتك تكون أحسن مما كانت...
المهم إنو رأيك الكنا عايزين نعرفو في موضوع الحلقة عرفناه، وهو أن اللحن هو الأساس ، ودي متفقين معاك فيها،
مهما حاول الشعراء ومشايعيهم القول..
كتير جداً من الغنا السوداني ( الخالد) كلماتو ركيكة ، لكن الخلود جاهو من اللحن الجميل، لكن ما سمعنا أغنية
كلماتها جميلة وقوية ، ولحنها ضعيف عاشت أو خلُدت..
نعم هناك بعض الآراء المشاترة التي وردت في البوست ده، كانت ما صحيحة وخارج الموضوع، وأخدت منحى قد يكون شخصي،
وهي يمكن تجاوزها وعدم الرد علبها، وبعضها مكاواة وونسة بين الأخوان، ودي ( ملح ) البوست، ولا بد منها، ولو مافيشة ،
أنا شخصياً ما كنت عتبّت البوست ده..
وزي ما شايف الموضوع كلو محصور في عدم فهمنا لمداخلتك والتي كنا نتوقع أن تكون أفضل مما كانت ، ولا شئ غير ذلك،
عشان كده أرجو أن تأخذ الموضوع من ناحيتو الإيجابية ، وتترك الزبد، وصدقني (الونسة) دي ممكن كلنا نستفيد منها معاك ..

Quote: كان عندنا جارنا لطيييف جدا اسمو حسن جردل وهو عازف طبلة مع فنانين كبار اها بيحكي مرة قام اتشوبر في عرس في قاعة الصداقة وعزف مع ود اللمين اها الفاصل الاول كلللو شابك ليك ظررررك كرررر كرررك كوكوكو اها قال اووول ما الفاصل انتهي ونحن قاعدين قام ابو اللمين كورك يااا الفاتح حسيين .. حسن جردل ده اتعشى؟؟؟ الفاتح قال ليهو. ايووة يا استاذ ابو اللمين قال. لي للفاتح :حاااسبووو حاسبووو:-):-) اها يا حبيب ألبي انت اتعشيت؟؟ :) :):):)

ماشي يا عم الحاج

أنا بعتبرك بستفتني وطقطقتني وما طالبك حساب
مداخلتي كانت لله والوطن
المهم إني وصلت الحاجة العايز أقولها بالضبط .

تهكمك على حبيب نورة يا أساسي غير مبرر .. فالرجل أراد فقط أن يجد وسيطاً يقحم من خلاله
(كلايف بيل) بالإضافة لاستشهاد الصديقة بكتاباته في الفيسبوك .. فلم يجد أنسب من هذا البوست!0

Quote: تهكمك على حبيب نورة يا أساسي غير مبرر .. فالرجل أراد فقط أن يجد وسيطاً يقحم من خلاله (كلايف بيل) بالإضافة لاستشهاد الصديقة بكتاباته في الفيسبوك .. فلم يجد أنسب من هذا البوست!0

أيوااااااااااااا بالضبط، إنت راجل زي العسل وابن ستين تفتيحة



تصرّف غير مبرّر على الإطلاق

لاتحزن ياحبيب نورة

الشلة دي اصلا نظامهم كده, يمسكو الزول يبستفوهو ويطقطقوهو ويغلبوهو عشرة صفر!!
شفاتة ومفتحين من امدرمان، اولاد قلبا


يناقشوك في الموسيقى, لو جبت ليهم سيرة المصطلحات الموسيقية يقولو ليك ماتطنقع علينا!!

طيب يناقشوكم في الموسيقى كيف من غير مصطلحات موسيقية يا اولاد قلبا ؟!

Quote: يناقشوك في الموسيقى, لو جبت ليهم سيرة المصطلحات الموسيقية يقولو ليك ماتطنقع علينا!! طيب يناقشوكم في الموسيقى كيف من غير مصطلحات موسيقية يا اولاد قلبا ؟!

شكرا خالد و سؤالك
وضع الحصان أمام العربة بعد أن كانت أمام الحصان

اعتراض وتايم آوت ..

Quote: شفاتة ومفتحين من امدرمان، اولاد قلبا

Quote: اعتراض وتايم آوت ..

د. المُشرّف، رمضان كريم..
الإعتراض بتاعك أكسيبتيد، وأديناك التايم، يلا ورينا إعتراضك على شنو!!





التعديل عشان تنداح يا حبيبنا، ونشوفك في إفطار بورداب الدوحة..

Quote: لاتحزن ياحبيب نورة الشلة دي اصلا نظامهم كده, يمسكو الزول يبستفوهو ويطقطقوهو ويغلبوهو عشرة صفر!! شفاتة ومفتحين من امدرمان، اولاد قلبا يناقشوك في الموسيقى, لو جبت ليهم سيرة المصطلحات الموسيقية يقولو ليك ماتطنقع علينا!! طيب يناقشوكم في الموسيقى كيف من غير مصطلحات موسيقية يا اولاد قلبا ؟!

إقحام المصطلحات الموسيقية في نقاش مع أولا قلبا أمر غير مبرر
يا صديقي تاني الواحد يشتغل بي تكتيك الجناح ودّيهو الجير ويسوق الكورة لغاية خط ستة ويعمل كسرة يا أبو علي

حمزة..
سيرتي الذاتية في النقد الفني. هي نفس سيرتك الذاتية الغنائية قبل وبعد عقد الجلاد...

بطبيعة الحال اعني سيرتي الذاتية في النقد الفني قبل وبعد سودانيز

والله يا صلاح ياخي خليني اقول كلام ..
لو جينا لي نموذج ممكن يتقدم في هذا المنبر لى اولاد قلبا ..
ممكن اديك "تمبس" ..

طيب ..

حصل يوم شفت تمبس ده قام كابس ليهو زول سااااي وقال الا يعمل ليهو فرش متاع هنا ..

الشاهد في الموضوع ده انو شفتنة اولاد امدرمان ليست متعدية ولا هجومية الا في السياقات المناسبه لذلك .. وفيها الكثير من اللطف الانساني والانتباه الشديد للآخر والمراعاة .. ممكن الكلام ده ناتج عن بيوتها الملصقه وزقاقاتها المتداخلة وبيوتها المفتوحه داخل حيشان منفتحه علي الآخر .. وفي بيئه زي دي تسود الحميمية أكثر .. إحتمال !!!!

قريت رايك في الموضوع ده .. وهو راي وجيه جدا يا وجيه .. الا النبره التهكمية عالية جدا .. - نبرة البوست أعني - فاتتك كيف ما عارف ؟!! .. مكالمة تلفونية لم تكن كما ينبغي .. خلاص تبقى مكالمة تلفونية - ففلنقول - غير موفقه في برنامج تلفزيوني .. دي محتاجه ملاسي في شنو بالتحديد ؟! (تعال شوف لينا الزول ده داير يقول شنو ؟) ..

طيب ..
الناس مهتمه جدا بي راي حمزه سليمان ؟!!.
ما هندا حمزه .. يا حمزه ياخ تعال ورينا رأيك هنا .. وبوست لطيف ونقاش هادي لن يتعدي قراءه الالف قاريء نعم .. الا انو لا يتسبب في حالة بتاعت غضب وانفعال .. المشكله شنو في الكلام ده ؟!!

هسع اوع الجماعه يزعلو مني واكون اتسببت في غضب او انفعال زول ..
لاشيء يسوى ذلك ..

فتكم بعافية ..
وبالمناسبة مداخلتي الفاتت دي عن اولاد قلبا كانت مشاغله للشباب .. واستل مشاغلة .. وانت عارف كده كويس ورطتي في المداخله الطويله دي ساااااي ..
تسلم يا صديق ..

Quote: شنو يعني زول إتصلو بيه و تلعثم ولا تمتم و كان معلي التلفزيون و باقي كلامك ده

يا امين مالك عايز تزعلني منك واشيل منك حسن النوايا؟؟
ويين انا قلت تمتم ؟؟
انا قلت حمزة قال كلام جايط ..كلام ما مفهوم...عاس الابري بي الحلو مر..
تلعثم ما قلتها ..قلت غلط في أغنية وقالا غلط ولمن ما تماها قال في ما معناه المهههم ..
باقي كلامي اللي ما تميتها دي هي كلامي الاساسي..فما تتجنى علي ساي يا امين ..
التمتمة ما انا البسخر منها ..عيب تقول في حقي كده ..صاح في نظرك بتاع مشاكل لكن ما للدرجة دي يا امين ياخ ..

من الزوق يا فاروغ ترد علي ناس السلك التحت ديل
الناس ديل شمشوا عديل وانت مجليهم



دخول المشرف للبوست ينذر بالرتابة والملل والمعط
اتمني انها تكون اخر مداخلة ليهو في البوست

Quote: دخول المشرف للبوست ينذر بالرتابة والملل والمعط اتمني انها تكون اخر مداخلة ليهو في البوست

ويتساءل الناس عن هجرة الاقلام الجيدة عن هذا المنبر ؟!!
سيأتي اليوم الذي لا يكون في هذا المنبر الا أساسي والشله و ملاسي وهذه النوعية من البوستات ..
لا حبيب نوره لا حمزه سليمان ولا الموصلي ولا أميننا ولا أنا
والله صحي ؟!!

فتناكم بعافية ..

ولا كان مصنف رقبتك اقلام جيدة ما عارف
طيب منو الاقلام الرتيبة البتقطر ملاا؟
بعدين انت قايل شنو!! الموصلي وحمزة اصلا ما كتاب عشان يكونوا جيدين ولا رتيبين ديل فنانين والعاوزهم شرايطهم مد الافاق
حبيب نورة دخل جابتر تو من حياته وبقت الكتابة ليهو مهنة تقريبا فالبشتاق ليهو بيلقي معروضاته في المكتبات دا غير انه متوفر في الفيس اكتر من روزنبيرغ او اين كان
يبقي ما فاضل الا انت وليك علينا نلحقك سفنجاتك في خشم الباب بس انت اتنفض واتفكفك
البقية الذكرتهم ديل هم العمود الفقري للبورد وهم كتابه المجودين والمجيدين
بورد بدون ملاسي والفاروغ واسئس والشفت وابتفة ووهبة ... الخ ما بورد زاتو
امين نوتة دا حقنا ما تتسلبط فيهو ساكت

الاخ صلاح عبد الله
رمضان كريم
اعادة لما كتبه سابقا فى هذه الصفحة
ـــــــــــــــــــــــــــــــــــــــــــ
انا مازلت على ان يكتب الاخ عمر سيرة ذاتية
اذا سألتنى ليه ؟
الجواب
اى نقد فنى لى اغنية ، لى فنان ، لى فنانه ، لى مقدم برامج ، لى برنامج ،
كان وراه عمر الفاروق
وحقيقى انا دايرو يعرفنى بى نفسو ربما كان موهوب فى النقد الفنى دة من زمان
وعشان ارد ليه من منطلق معرفته لا من منطلق انطاعيته تجاه الغنا ما ح اقول الثقافة،
وبعدين ما صادفنا نقد كتير جدا ايجابى وسلبى حصل قلنا لزول انتقدنا ورينا سيرتك الذاتية فى النقد شنو؟
لان عمر الفاروق طارح نفسو ناقد فنى وله رأى مكتوب فى سودانيز اون لاين من زمن.
اهتمامه بالنقد دة كان بعد او قبل سودانيز اون لاين ... سؤال؟

معقول وصلنا الدرجه دى من عدم قبول الاخر ، اى زول بقول راى مخالف لينا نتهكم ونسخر منو .... قليلاً من التأدب فى الحوار لا يضر

كل عام و انتم بخير يا شباب
تحية خاصة للاستاذين الموصلي و حمزة
في وجهة نظري المتواضعة جدا انو حمزة لو ما قدم للوسط الفني غير لحن اغنية (كلم الزهرة) لكفاه
لو اخذنا كلمات اغنية سيرة الحب مثلا لأم كلثوم :

طول عمري بخاف من الحب وسيرة الحب وظلم الحب لكل أصحابه
وأعرف حكايات مليانة أهات ودموع وأنين
والعاشقين دابوا ما تابوا
طول عمري بقول لا أنا قد الشوق وليالي الشوق ولا قلبي قد عذابه عذابه
وقابلتك إنت لقيتك بتغير كل حياتي
معرفش ازاي حبيتك معرفش ازاي يا حياتي
من همسة حب لقيتني بحب لقتني بحب وأدوب في الحب أدوب في الحب وصبح وليل علي بابه

ماذا كانت ستعني هذه الكلمات بدون لحنها الخالد؟

و لو اخذنا موسيقي فلم الكاوبوي القديم The Good, The Bad and The Ugly
موسيقي فقط بدون كلمات نجدها قد اصبحت شعار لمعاني التحدي و ارتبطت بكل دلائل افلام الغرب الامريكي و ما زالت تستخدم حتي الان للتعبير عن تلك المعاني


و من وجهة اخري و عودة لام كلثوم فقد كانت حريصة ايضا علي اختيار كلمات تعبر عن مواقف و اراء معينة تاريخية و سياسية و قومية. و لكن حرصها الاكبر كان في اختيار ملحن قدير
يمكنة توصيل التعبير الحرفي عبر الموسيقي لاسباغ صيغة الخلود، فان الناس تدندن و الدندنه هي لحن.

الموضوع بالفعل كبير جدا و يحتاج لمساحة نقاش و لن يستطيع اي انسان ان يلخص راية في دقايق عبر برنامج علي الهواء. كل العذر لحمزة و لكن مداخلتة كانت موفقة جدا.

لكم جميعا كل الود

اساسي..
طمني السفنجات لقيتا؟؟

زولك طلع جاي بي شِدة

ود الفاروق ... كل سنه وانت طيب ورمضان كريم ..

Quote: سلام يا عمر و رمضان كريم .. ياخي ليه بتديني الاحساس انك دائما بتستهدف ناس مشهورين بغلظة شديدة عشان إنت ذاتك تشتهر ؟!

إحساس سليم ياأمين محمد سليمان ....
بس استهدافو للمشاهير بيصب فى مصلحة القارئ وكمان بخلى المشاهير يعكسوا دواخلهم من خلال ردود الفعل المتباينه
سلباً أم إيجاباً

Quote: أمين سليمان .. سلمك الله من كل شر ..ورمضانك كريم .. عارف ..بالجججد كنت عايز أجاوب ليك ليك بي كلام الجكس داك لأنو فععلاً بيعبر عن الإجابة .. " أكيييد ما قاااصد " ... :) طبعاً لأ .. ولأ شدييدة .. مع إني أترددت كمم مرة من إنو أرد ليك مباشرة ..لأنو السؤال في حد ذاتو كده الإجابة عليهو بتدي مساحة أكبر من الموضوع.. بس يا أمين إحساسك أبداً ما صاح .. ولااا أنا البتهمو الشهرة ..وما تشووف الفرفرة البعملا معاكم هنا دي..انا زول لااامي حاجاتو ولاااامي روحو ..تفتكر شهرة بعد العمر ده ممكن أسوووي بيها شنو؟؟ وأشتهر لي منو؟؟؟ ويشهرني منو؟؟ ولييي؟؟؟ وعشان ح أصل لي شنو ؟؟ بالججد بالغت معاي يا أمين .. وصدقني ما كلام زعل بس حتتتى الناس اللي بتشوفني بستهدف فيهم ديل والله ووالله ما حصل فكرت في إنو بتعامل معاهم كمشاهير .. يعني حمزة ده مثلا إختفى من خارطة الشهرة البتتكلم عنها دي قرابة العشرة سنوات وبقا زول أكتر من عادي وهو ما من النوعية اللي شهرتو بتمتد حتتى لو غاب عن الساحة فصدقني الاسة بيستفيد من الكلام ده حمزة زاااتو ما انا.. لو بتفتكر شروق ابو الناس من المشاهير فبرضو محتاج تراجع نفسك.. استاذنا الموصلي هرم كبيير ماف كلام وانا ما بستهدفو ورغما عن كده الموصلي برضو اختفى من الساحة لي ربع قرن فالشهرة إندثرت معاهو .. أووعا تقول لي عاصم البنا ... أججججي ؟؟ أكيييد ما قاصد .. :)

احترامى

من كتاب التفاحة الصادر في اذار 2012 ...

Quote: بورد بدون ملاسي والفاروغ واسئس والشفت وابتفة ووهبة ... الخ ما بورد زاتو امين نوتة دا حقنا ما تتسلبط فيهو ساكت

الشفت وابتفه ووهبه بيكتبو بي مسؤوليه شديده جدا ..
واضح جدا انك ما فاهم الفكره هنا شنو ..
الفكره استرخاص الناس ..

وامسك عندك انت .. بتسترخص
عمر الفاروق .. بيسترخص
ملاسي .. بيسترخص ..

الفكره إعتبار السخف ميزة ايجابية وتواجد وجمهور .. وعلى فكره السخف بالفعل ممكن يكون تواجد وجمهور .. واهو يا عزيزي انتو موجودين وبكامل السخف الممكن مع الناس .. الا انو بيظل قيمة سالبة

الفكره الاساسية جدا انو الكلام ده كلو يتم ودونما امكانيات فكرية او أدبية من أي نوع بالقدر الممكن تتيح لصاحبها هذا القدر من استرخاص الناس .. إن كان ذلك ممكنا على الاطلاق ..

عشان كده انا تفهمت تماما كلام حمزة سليمان عن السي في بتاعت عمر ..
وأعتقد مثلا انو الخواض وغيره ممن تعديت انت عليهم وطفشوا من البورد ده .. اعتقد لو سألك من السي في بتاعتك .. لكانوا وكان الآن متواجدا معانا في هذا المنبر يكتب الشعر ويجادل فيه باريحية تامة ..

هذا لا يعني ان يكتب الناس على خلفياتهم الاكاديمية والابداعية حصرا ولكن وعلى الاقل يسائلوا عنها لمن يمارسو السخف والاستهتار واسترخاص الناس ..

لذلك كلو .. أمين ووهبه والشفت وابتفه .. خارج هذه الدائرة .. دائرة السخف واسترخاص الناس وتسخين الدلوكه لذلك متى ما كان ذلك ممكنا وتماما كما تفعل انت في هذا البوست ..

كن بخير يا عزيزي ..
وحافظ على السفنجه دي كويس .. وممكن تضمها لمجموعة سفنجات المبدعين خاصتك..

شكرا جزيلا وحميما لكل المتداخلين
اعجبنى الحوار جدا
الاخ عمر
لا اعتقد انو الشفتنة هى المؤهل الحقيقى لكتاباتك ربما انت كتبتها إصطلاحا
ياخى انا طلبت انك تكتب عن نفسك ... ايعقل انك تستطيع تكتب عن الناس ولا تستطيع الكتابة عن نفسك
ياخى تكلم لا عرفك
وحتى الان فى انتظار كتاباتك عن نفسك ... بس اذا كنت بتكتب عن الناس بى شفتنه
رجاء اكتب عن نفسك ما بى شفتنه

الاخ اسامه فضل الله والله اسعدتني جدا ..

ياخ انا كنت مستا من حكاية انو السودانيين ما شغالين بالعلم المبذول مجاني في النت ده
انا ذاتي دخلت الكورس بتاع الجتار

لكن غلبني اتمو لاسباب تتعلق بالعمل
المهم شوف معاك ده

https://www.edx.org/

ده كمان فيه المعلمين .. ناس هارفرد و MIT واكسفورد وباقي الافيال

لكن الصراحة لي الله .. الناس ديل قرايتهم عضم عديييييييييييييييل كده
لو ما فضيت روحك ما بتقدر
انا لي هسع غلبني اتم ليهم كورس واحد مع اني في كورسيرا وبالتوازي خلصت كورسات كتيرة


بعدين ماف داعي للشكر يا حبيبنا
ماف شكر بين الاخوان
الجيب واحد

يا عمر هسع في داعي

ما قلنا ليك ما تجيب سيرة امدرمان .. الجنونة بتقوم على الناس

هسع الناس سابو حمزة وعمر وبقوا في امدرمان


الغريبة انت وحمزة والمشرف وحبيب نورة ناس امدرمان

يعني ناس امدرمان اتشربكوا في ناس امدرمان .. الناس زعلانه مالها

غير صحيح .. فالخواض ترك الكتابة هنا لأن بوستاته تغوص سريعاً إذ لا أحد يعبأ به وبما
يكتب؛ بدليل استمراره في سودان فور أوول على الرغم من إنو اكتر واحد اتمسح بيهو البلاط
هناك؛ فبقاء كتاباته في الصفحة الأولى لعدة أيام/أسابيع نتيجة لسلحفائية ذلك المنتدى هو الذي يبقيه.

اسمع يا ملاسي
اسامه الخواض من امدرمان برضو ؟

نموذجي يا ملاسي .. ولا تخيب توقعاتنا ابدا ..
رمضان كريم يا عزيزي وكل عام وانت بخير و ..
دوما نموذجي في استرخاصك الناس .. دونما مؤهلات .. دونما اسهام حقيقي .. دونما شيء على الاطلاق ..
وعلى فكره انا قريت قصه قصيره لك ..
الرجاء اعادة نشرها للناس هنا عشان تقارن بين محاولاتك الابداعية وبين انتاج الخواض الابداعي ..
ولانو ده المجال الانت بتسترخص فيهو الزول ده ..

Quote: غير صحيح .. فالخواض ترك الكتابة هنا لأن بوستاته تغوص سريعاً إذ لا أحد يعبأ به وبما يكتب

ده تحديدا البتكلم عنو يا شباب ..
والخواض مثال طرا على بالي ليس الا ..

اساسي ..
قوووم أصحى ياااخ ..السفنجات دي معاك وانا ما عارفك ختييتا وين ..انا خلااااص ما عدت قااادر أنتظر ..
انا شااايف لي سفنجتين واحدة سييورا خدرا والتانية سيورا ظهرية ..ياتا فيهم طييب؟؟

حسين ملاسي..
<فالخواض ترك الكتابة هنا لأن بوستاته تغوص سريعاً إذ لا أحد يعبأ به>
يالبؤس المعيار...
وهل السخف وطولة اللسان واسترخاص الآخرين..(وِفقاً ل د. المشرف)...سبب في جماهيرية الكاتب؟..
سؤال بالجمبة..عثمان محمد صالح ..كان من الأقلام المقرؤة...ألم يكن لك يد ..(مع آخرين)..في تركه للبورد..؟

ياحمزة ياخ عمر جاب ليك شذرات من سيرتو العطرة
قول خير وحايرش ليك الباقي شوية شوية
هسع يمكن تطلع من الديوان الفخيم ده بقصيدة وتقوووم تلحنها وتضرب بشهرتها الآفاق
بعدين لو اتشاكلتو في منو سبب الشهرة دي ما ماشكلة طالما الناس طربانة

ههههههههههههه ..
صحو ليهم بريش ده يا اخوانا .. !!
ولموهم لي كلهم هنا و.. اقعدو فراجه

Quote: وعلى فكره انا قريت قصه قصيره لك .. الرجاء اعادة نشرها للناس هنا عشان تقارن بين محاولاتك الابداعية وبين انتاج الخواض الابداعي ..

واساسي برضو يا دكتور المشرف لديه محاولات في القصة القصيرة ونتمنى عرضهما معا ...

شكرا يا ناذر الوحيد العجبتك النكتة..
إن شاء الله صاحبك عمر الفاروق ما يكون زعل فيها.. يقوم ينشبك فيني كمان..
هههه .

شكرا يا عمر الفاروق لإنزال الفيديو..ولإتاحة الفرصة لنا للإستمتاع بهذه الحلقة
على الأقل سمعت أغنية رائعة لشمت..

بعدين ملاسي ده لو قعد يعكلت ويعمل في حركاته دي يا مشرف نادوا ليه أحمد المرضي..

هههه.(الوشوش راحت وين إنتو؟)

تحياتي للعزيز يوسف الموصلي..

كل سنة وإنتو طيبين جميعا..

Quote: يا حمد للدقة وكدا, ملاسي ما حيّدو حمزة بتثنيته على كلامو ملاسي جا محايد من قولة تيت

رمضان كريم يا محمد البشرى تقبل الله

حسين ملاسي ما جا محيد وعمر الفاروق ما ليه علم بحيادية ملاسي


طيب بعيدا عن لب الموضوع ومن ناحية تكتيك فقط

عمر الفاروق خشا المغامرة معتمد على سرعة حسين ملاسي وحبه لبوستات خد وهات دي يعني معتمد عليه كسلاح جو لحسم المعركة وبيني وبينك حسين ملاسي لو سخى لعمر الفاروق كان بجهجو حمزة شوية

لكن حسين ملاسي عارف خطورة حمزة ( لأنو نبه عمر وقال ليهو حمزة ما عاصم البنا) وما حب يدخل نفسوا في حتة ضيقة وقال سيبك بلا فاروق، مية نطة ولا بعبوص واحد وأهو حصل ما حصل من ملاسي من خذلان مبين


يا عمر الفاروق

شايف البوست دا فيهو قسم كمبيوتر

في كلام واقف لي في حلقي وبناقش فيهو كتير مع ناس تانيين وهو

إنو السودانيين ما ممكن تلقى فيهم زول بجضم الكمبيوتر دا للآخر (زي الهنود مثلا)

يعني عادي ممكن تجيب سوداني كمهندس كمبيوتر وتخت ليهو أمريكان وهنود وصينيين يحاضر فيهم نظريا لحدي ما يآمنوا

لكن لو مشى التطبيقات والشبكات تلقاهو احيانا بيض ساي وكلامي دا لأنو في اعتقادي الكمبيوتر عايز زول صبور جدا ومبدع جدا ودرجة توقعاته وخيالو عالية جدا
ودي نحن السودانيين ما عندنا متوفرة

الكلام دا ثبتو لي واحد سوداني جيبناه قبل كم يوم لأجهزة المكتب توصيلها في شبكة مع الطابعات والاسكانرز ومراجعة عمل الأجهزة ياخ دا لخاها لينا لخة خليها في سرك

انا طبعا بقول ليك كلامي وأنا زول دركسون ساي في الكمبيوتر دا ما بفهم فيهو أي شيء

جدّي لأمي الشيخ صديق أحمد العجب إمام وخطيب جامع الخليفة ومصحح راتب الإمام المهدي مع والده الشيخ أحمد عليهما الرحمة رأى رؤية مفادها أن جاءه في المنام رجل صبوح الوجه بهي الطلعة يلبس ثوب أبيض وعمامة بيضاء فقال له ستضع إبنتك مولوداً ذكراً ..هذا المولود عليكم أن تسموهو عمر بن الخطاب..
والدي شيخ الدين محمد أحمد الهادي حكى لوالدتي ليلة المخاض أن جاءه في المنام رجل بهي الطلعة صبوح الوجه يلبس جلباب أبيض ةذكر له بأنه سيستقبل مولوداً ذكراً عليه أن يسميه عمر الفاروق..
حسب روايات أمي كانت صرخة ميلادي يوم الخميس مع صلاة الفجر تماااماً ويومها كانت السماء تمطر (حكمة الله نسوان السودان كلللهن يقولن ليك بيلدن بالليل والمطرة صااابة..أصصصلو ما شوفت لي مرا بتلد بالنهار)....تحكي لي الوالدة متعها الله بالصحة والعافية ما أن أطلقت الصرخة الأولى وخرجت للدنيا إلا وأن ذهبت خالتي لتبشر جدّي بالخبر ووقتها كانت قد لفحت الكلام فقالت لجدي أن قد أنجبت أمي مولودة ..
كانت أوول كلمة قالها جدي (حسب رواية خالتي) أن قال أسموووها عمرية بت الخطاب ( هي لكن مااا بالغت يا جدي؟؟ أسة كان أكون بكتب في البورد بي إسم عمرية؟؟) جاءت الأخبار وتصححت المعلومة لجدي بأنّ المولود ذكر فقال هو عمر بن الخطاب.. وقتها كان والدي متعه الله بالصحة والعافية قد قرر تسميتي عمر الفاروق وعندما تعارضت التسميات حاول والدي أن يبرر التسمية بأن حكي ل جدي سر التسمية وقصة الرجل الذي جاءه في المنام ..وهنا كانت المفاجأة عندما تطابقت الروايات ووصف الشخصية بين والدي وجدي..
وهنا قال جدي أن الأولوية في التسمية لوالدي فكان أن سمّيت عمر الفاروق..

هذا فيما يختص بالميلاد والتسمية .. والرواية حقيقية بدون شفتنة

Quote: أسة كان أكون بكتب في البورد بي إسم عمرية؟؟

الاسم ما مشكلة
بس لو كنتي بالرشاقة العليك دي .. كان لحقت تراجي

حمد يا حبوب..
تربطني علاقة حقيقية وإسفيرية بحسين ملاسي من زمن طويييل ويكفي إنو هذا الحسين كان أوووول بني ادم مهنئاً بزواجي قبااال ناس البيت والناس القاعدين في الحفلة ..تخييل زول يلاقيك في الاشارة يدق ليك باب القزاز يبارك ليك إنت وزوجتك ويادوووب ماشين على الحفلة :):)
بالرغم من الععرفة طويلة الأمد دي إلا إنو ما حصل انا وملاسي جاملنا بعض وعااادي حسين ممكن يرشك في أي ملف طالما شاف إنو دي وجهة نظرو ..يعني مااا عندو لخبطة الكيمان دي ..
نفس الشي بيتمتع بيهو حبيبنا أساسي ..ونفففس الهو زاااتو عند وليد الشفت فعشان كده يا حبوب ما يصفوهو الجماعة إياهم من إنو تكتل شلليات ما هو إلا في الحقيقة تشابه سلوكيات بتاعت ناس ما بتحب الغتغتة وما بتلخبط الحاجات وما بتجامل .. (أساسي ما تجي ترشني انا في اللحظة دي جادي )..
أها يا حبوب إختياري لي ملاسي تحديييداً لأنو ملاسي من أكتر المعجبين بل المعتقدين في حمزة سليمان ويكفي ملاسي إنو ذات بوست وصف حمزة بأنه أفضل مغني أنجبته حواء السودانية وإستدل بشريط كاسيت وكم أغنية كده ..يومها انا لمممن شكيت في إنو ملاسي ده يا ربي يكون تعاطى فعقر؟؟؟
لملاسي اراء إيجابية جدا جدا في حمزة سليمان فيما يتعلق بفنه وحديثه والحانه و و .. أها إختياري لي ملاسي وعنونة البوست بهذه الصيغة مفادها تعال يا ملاسي شوف زووولك عاس الابري بي الحلو مر..
وكنت متوقع و مليون في المية ملاسي ح يجي يرشني والغريبة أسة ملاسي حنييين علي حالتو :) فملاسي رجل يقاتل من أجل قناعاته حتى لو كان المواجهة ضد عمك ملاسي الكبيير ابو شنبات داك زاااتو .
فااا شنو يا حبوب ..قصة الحيادة دي اطمممن اخوك واقعة ليهو ...

نرجع لي موضوع الكمبيوتر .. طبعاً وما قصص فكّة وخارفية ووهمات سودانيين لكن انا زاملت لي ناس من جامعة السودان كانوا عبااااقرة كمبيوتر وشوااااذ بي صورة مخيييفة .. في زول إسمو معتز عبد العظيم الشهير بي عزوز ..ده واحد من أفضل مبرمجين العالم وبشهادة مبرمجين عامليين من خلال مواقع عالمية وانا بعرفو كوووويييس الزول ده وربما أيي زول في مجال الكمبيوتر بيكون بيعرفو .. عزوز ده وشوف عييين محّن اليابنيين والكوريين يوم ما كان بيشتغل في سوداتل ..ودي قصص بحكيها ليك ذات لقاء..

في زول إسمو أنس مدني وممكن أي زول من العيلفون في البورد ده يكون بيعرف الإسم ده .. أنس مدني ده حيير الألمان وانا حضور وشهود على حلّه لي مشكلة متعلقة بي كبانيات في سوداتل بكتابة برنامج بلغة الدلفي كانت قد وضعت لها ميزانية من الشركة الألمانية مبلغ وقدره ما بين ال500 الف دولار لي مليون .. حلّاها أنس ده بي مرتب شهري لا يتجاوز ال 500 دولار وقتها اااي خمسمية دولار سااااي كده..

في زول إسمو بكري خالد من أولاد أمدوم وياريت برررضو اولاد امدوم الهنا يحضرونا.. هذ البكري خالد أشفت شفوووت الكمبييوتر ...اذا ده زمااااان كان عامل ليهو لغة برمجة حقتو براااو ..لغة برمجة عديييل كده زيها زي الفيجوال بيسك والباسكال والجافا ..
الاسامي دي كلللها حقيقية يا حمد وأمشي سوداتل اسأل منها ومن مجهوداتها ..لاحظ ديل الانا بعرفهم بس..تعال شوف في كم زول قاري في جامعة تانية بيكون بيعرف ليهو زول زي الجماعة ديل..
يلا لكن أديك الميزة الميزت الناس ديل وفشلنا فيها نحن وغيرنا ..
الشباب ديل عملوا زيييي ما بيعملوا الهنود القلتهم إنت ديل..حددوا هدفهم..وركزوا في شغلة وااااحدة بس ..مااا اتشععبو واتشتتتحو في اييي شي في الكمبيوتر..
مسكوا لغة برمجة واااحدة وجهجهووووها ليك ..
نحن يا حمد هباشيين ..عايزين نعرف شبكات وبرمجة ودلفي وبيسك وجافا ولينيكس وويندوز و و و و و و ..وده بيشتت جهودنا..
الهنود الزول بيمسك فيهم شغلة واااحدة وبيركز فيها..
ياخ انا أديك مبالغة ؟؟ كان معانا واحد هندي في الشغل خبييير في سيستم بنكي ضخم.. الزول ده فاجأني ليك بي سؤال غريب جداً ..تصدق كان عايز يكبر الخط في الوورد ؟؟؟؟؟؟

Quote: الزول ده فاجأني ليك بي سؤال غريب جداً ..تصدق كان عايز يكبر الخط في الوورد ؟؟

هههههههههههههههههههههههههههههه
بصدقك ، واحكي ليك حاجة قريبة من الموضوع
انا في ابوظبي في قسم الشئون القانونية بشرطة ابوظبي
معانا لواء شرطة معاش مصري الجنسية وانا نقيب شرطة معاش
شوف الفرق في الرتب كيف ؟ هل تصدق انو الزول ده من ملازم لحدي لواء في ادارة شرطة واااحدة
وانا من ملازم لحدي نقيب اشتغلت في تلاتة او اربعة ادارات شرطة مختلفة !!!!!!!!

( جدّي لأمي الشيخ صديق أحمد العجب إمام وخطيب جامع الخليفة ومصحح راتب الإمام المهدي مع والده الشيخ أحمد عليهما الرحمة رأى رؤية مفادها أن جاءه في المنام رجل صبوح الوجه بهي الطلعة يلبس ثوب أبيض وعمامة بيضاء فقال له ستضع إبنتك مولوداً ذكراً ..هذا المولود عليكم أن تسموهو عمر بن الخطاب..
والدي شيخ الدين محمد أحمد الهادي حكى لوالدتي ليلة المخاض أن جاءه في المنام رجل بهي الطلعة صبوح الوجه يلبس جلباب أبيض ةذكر له بأنه سيستقبل مولوداً ذكراً عليه أن يسميه عمر الفاروق..
حسب روايات أمي كانت صرخة ميلادي يوم الخميس مع صلاة الفجر تماااماً ويومها كانت السماء تمطر (حكمة الله نسوان السودان كلللهن يقولن ليك بيلدن بالليل والمطرة صااابة..أصصصلو ما شوفت لي مرا بتلد بالنهار)....تحكي لي الوالدة متعها الله بالصحة والعافية ما أن أطلقت الصرخة الأولى وخرجت للدنيا إلا وأن ذهبت خالتي لتبشر جدّي بالخبر ووقتها كانت قد لفحت الكلام فقالت لجدي أن قد أنجبت أمي مولودة ..
كانت أوول كلمة قالها جدي (حسب رواية خالتي) أن قال أسموووها عمرية بت الخطاب ( هي لكن مااا بالغت يا جدي؟؟ أسة كان أكون بكتب في البورد بي إسم عمرية؟؟) جاءت الأخبار وتصححت المعلومة لجدي بأنّ المولود ذكر فقال هو عمر بن الخطاب.. وقتها كان والدي متعه الله بالصحة والعافية قد قرر تسميتي عمر الفاروق وعندما تعارضت التسميات حاول والدي أن يبرر التسمية بأن حكي ل جدي سر التسمية وقصة الرجل الذي جاءه في المنام ..وهنا كانت المفاجأة عندما تطابقت الروايات ووصف الشخصية بين والدي وجدي..
وهنا قال جدي أن الأولوية في التسمية لوالدي فكان أن سمّيت عمر الفاروق..

هذا فيما يختص بالميلاد والتسمية .. والرواية حقيقية بدون شفتنة )
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

وهـــــــــــــــــــــــــــــــــــــــــــــــــذا لا يهمـــــــــــــــــنى

ما أقصده هو مسيرتك فى النقد الفنى ما قبل وبعد سودانيز اون لاين فقط .

Quote: الزول ده فاجأني ليك بي سؤال غريب جداً ..تصدق كان عايز يكبر الخط في الوورد ؟؟

اها و كبرت ليه ؟
اتنين من لعيبة الموردة مرة بحكو عن المواقف الطريفة
واحد قال يوم عايز يوري زميله صورة في الموبايل, و التاني زول اربعة في موضوع التلفونات ده
اها سيد التلفون فتح الصورة و قال ليه عاين, التاني الصورة كانت ما واضحة ليه, سأل سيد التلفون : ما واضحة ياخ !!
سيد التلفون رد ليه: كبر كبر بس
التاني رد عليه بصورة جاده: الله اكبر الله اكبر
فهسي يا ابوعمير اوعى تكون كبرت :)

Quote: بس لو كنتي بالرشاقة العليك دي

والعجب غرودة العيون الفي صورة البروفايل دي...!!

ياخ انا كن جهجهت ليك باكات عجايز البورد ديل جهجهة؟؟ أسة كان مسنجري يتطاقش بي يا رائعة ويا صاحبة الحروف الأنيقة بدل ما هو أسة يشكو قلة الفئران :)

Quote: ما أقصده هو مسيرتك فى النقد الفنى ما قبل وبعد سودانيز اون لاين فقط .

مش إتفقنا لمن تحكي لي إنت مسيرتك الغنائية ما قبل وبعد عقد الجلاد؟؟؟

يا حسبو انا هللّت عديييل ..
ياخ ما صدقت جاتني فرصة أثبت للزول ده إني بتاع كمبيوتر زيي زييو وطبعاً عملت ليك من تكبيرة الخط دي قصة ..تمشي لي المين مينيو وتفتح وين وتقفل وتاني تديها جرة نفففس طويييلة كده وترجع لي ورا تعاااين للشاشة كده وتجي تاني تمسك الماوس و و و
يا زووول انت قايل تكبير الخط ده سااااي كده ؟؟ :)

والله يا جنابو القصة دي معيارها صعب خلاص.. لا تقدر تقول تراكم الخبرات لا تقدر تسميها خبرة سنة مكررة .. وما بتعرف الأحسن ياتو ..مرات التنقل الكتييير ده بيوسع المدارك ومرات بيجهجه ..
باقي لي في تجربتكم إنو والله أعلم إنو إنت أستفدت أكتر من اللواء ده .. ولا شنو ؟؟
يا ريت تشرح..

الرائع عمر ..
.

بصراحة شكلك جبــــان وانت بتلف وتدور ..يجوك بهنا تنط بجاي ..يقولوا ليك اهبش راسك تقول أنا ودقلبا ..يقولوا ليك ما تقلب الهويا تقول جدي حلم بي ..أجي

هسة أنت سبت حلقة كاملة ومسكت في دقائق بعد مرور 58 دقيقة .. ؟..كلام حمزة سليمان ما كان مفهوم ..ما قدر يعبر عن نفسه، ما عجبك كلامو .مافهمتو ـفرضاـ أها وبعدين ..هل بتفتكر والبوست ده وصل ال8 صفحات ..عبرت عن نفسك ..ولا الناس فهموك عايز تقول شنو ؟ ..وفي الأخر قلبت سفنجاتك وقعدتا فوقهم ..وعاملة فيها بتتجاهل في حمزة سليمان ..وقت أنت ما شغال بيهو ..مالك مركككككز مع مداخلة صغيرونة ومقوم نفسنا ..


كورتك فكت يا كابتن كابو ..


"بت قلبا "

والله يا بت قلبا انا زااااتي مهجوم في ال 8 صفحات دي .. والكلام ده قلتو لي زول معاااي ومعاكم هنا ونحن بنلعب في الباي إستيشن ..
قلت ليهو انا كتبت لي كلام مفروض ما ياخد أكتر من 9 مداخلات فيهم أربعة مني وواحدة من ملاسي والأربعة التانيات اراء مختلفة ..
بالنسبة لي موضوع النطيط ( يا قول زميلة زوجتي) ..فانا مااا نططت ..كلامي واضح ومفهوووم .. مكالمة مخرمجة من زول ضربو ليهو يعين في الموضوع فبقت عليهو جيتك يا عبد المعين تعيين لقيتك يا عبد المعين عايز تتعان ..
ما إتجاهلت حمزة وأهو شايفاني برد عليهو يعني عااادي زيو زي باقي الناس ..ولا إنتي في مخيلتك إنو قصة ما قبل وما بعد سودانيز دي فرض عيين لو ما رديتا أكون إتجاهلتو ..؟؟
موضوعي ما كانت الحلقة وما أظن مش؟؟ موضوع الحلقة ده جابوهو الناس بعد داك .. انا همتني النقطة دي ولفتت نظري ..باقي الحاجات الفي الحلقة ما كانت ملفتة ..كلام مكرر ونقاش أزلي قديم .. مع إنو لفتت نظري مداخلة وإن كانت أقل مشاترة من الفنان جاويش وبرضو ومع إحترامي ليهو لكن هرطق ليهو بي كلام كده برررضو ما مرتب وجاااط الحاجات والغريبة كنت ح أشير للحتة دي بعد ننتهي من موضوع حمزة ده ..
يا داليا انا من الساعتين ديل همتني المكالمة دي وين المشكلة ؟؟ في ناس فييي البوست ده من الساعتين ديل همتهم اغنيتين لي شمت ويين المشكلة ؟؟ في ناس من الحلقة كلللها طلعو بي قصيدة أزهري محمد علي ..وييين المشكلة ؟؟

..

Quote: هسة أنت سبت حلقة كاملة ومسكت في دقائق بعد مرور 58 دقيقة .. ؟.

الإجابة نعم.. والصحيح بعد الدقيقة 56 و 32 ثانية تقريباً..

Quote: كلام حمزة سليمان ما كان مفهوم ..ما قدر يعبر عن نفسه، ما عجبك كلامو .مافهمتو ـفرضاـ أها وبعدين .

ولا قبلين .. بس..
زييها زي تحضر ليك برنامج كااامل مع زول يقوم في نص الكلام يذل لسانو بي كلمة يا عـــب أو يا خادم مثلاً وتقوم الناس كلللها تسيب البرنامج وتكنكش في الكلمة دي..
أو زي ما إنتو كنكشتو قبل كده في كلام برلماني قال كلام كتيييير من ضمنه عدم ختان البت شي مقرف ..
عاد يا داليا يا بت قلبا كمان عايزاني أكتب بي مزاجك ..؟؟ ولا بي مزاج الناس؟؟؟ إتلووومتي يا اختي ..أنا أشوف الحتة اللي لفتت نظري وأجي أكتب عنها ..بعد داك تصنفوني سطحي ما سطحي اي دونت كييير بي رايكم والله ..

Quote: هل بتفتكر والبوست ده وصل ال8 صفحات ..عبرت عن نفسك ..ولا الناس فهموك عايز تقول شنو ؟

Yeeeep يا قول المتخوجنين ..
وبالعربي نعععم فهموني ومن أوووول مداخلة ..لأنو كلامي كان واااضح ..بعد داك البوست أخد منحى تاني فو الله دي أبداً ما مشكلتي وهي ما جديدة على سودانيز ..الفكرة بتتضح وبعد داك بتخش مواضيع جانبية وفي بعض الاحيان بعد الموضوع الاساسي يتحسم الناس بتنساهو وتتونس في حاجة تانية فوين المشكلة انا ما فاهم؟؟
عموما لو فكرتي ما وضحت ليك مع إنو إنتي فوق براااك وضحتيها في أول إقتباس ختيتو ليك فوق لكن ما مشكلة أعيدو ليك تحت

Quote: كلام حمزة سليمان ما كان مفهوم ..ما قدر يعبر عن نفسه، ما عجبك كلامو .مافهمتو ـفرضاـ .

فرضاً دي عجبتني ..طيب ما أهو إنتي فاااهمة ...فرضا ماف ليها داعي..وصدقيني كل المتداخلين اذكياء زييك وفهموها كده وبدون فرضاً دي..
ما تغرك ال 8 صفحات دي ..الباقي ده ونسة وبنضييع بيهو باقي الوقت في نهار وليل رمضان فلو ما عايزة تضييعي زمنك فما بنصحك تواصلي هنا فالموضوع اصبح بالنسبة لي محض تسلية من بعد الصفحة التانية ..خصوصا وانو فكرتي وضحت..
اها انتي برضو عايزة سيرتي الذاتية ما قبل وبعد سودانيز يا بت قلبا؟؟

حمزة..

Quote: ياخى انا طلبت انك تكتب عن نفسك ... ايعقل انك تستطيع تكتب عن الناس ولا تستطيع الكتابة عن نفسك ياخى تكلم لا عرفك وحتى الان فى انتظار كتاباتك عن نفسك ... بس اذا كنت بتكتب عن الناس بى شفتنه رجاء اكتب عن نفسك ما بى شفتنه

Quote: وهـــــــــــــــــــــــــــــــــــــــــــــــــذا لا يهمـــــــــــــــــنى ما أقصده هو مسيرتك فى النقد الفنى ما قبل وبعد سودانيز اون لاين فقط .

كدي أديني مثال عني مثلا أكتب كيف..عفيتك من تكتب لينا بي مثال عنك قبل وبعد عقد الجلاد ..لأنو عارفك ما لقيت شي تكتبو فربما يبدو أن تجربة نمارق للفنون ليست ذات أثر ومن بعدها تجربة الغناء المنفرد في حفل سودانير ليس ذا فائدة ..
وسامحني يا عابدين شرف..وأعفي لي يا محطة سنادة ..

Quote: لساعتين ديل همتني المكالمة دي وين المشكلة ؟؟ في ناس فييي البوست ده من الساعتين ديل همتهم اغنيتين لي شمت ويين المشكلة ؟؟ في ناس من الحلقة كلللها طلعو بي قصيدة أزهري محمد علي ..وييين المشكلة ؟؟

مافي مشكلة, انا مثلا من التمانية صفحات دي طلعت باني عرفت اخيرا معنى "غرودة" العيون ههههههههههه

غير صحيح .. فالخواض ترك الكتابة هنا لأن بوستاته تغوص سريعاً إذ لا أحد يعبأ به وبما
يكتب (بدليل استمراره في سودان فور أوول على الرغم من إنو اكتر واحد اتمسح بيهو البلاط
هناك) فبقاء كتاباته في الصفحة الأولى لعدة أيام/أسابيع نتيجة لسلحفائية ذلك المنتدى هي التي تبقيه!

يا ملاسي الحلقة دي معادة, خشّيناها أمس :)

أها يا ود البشرى ولقيتني كيف عليك الله ؟؟
غروووواااادن ؟؟!!! :) :) :)
..

تخريمة :
أوريك الح يحصل شنو بعد مادخلة حسين دي؟؟ انا زاااتي حضرتو :)

كتب الموصلي :

Quote: طيب ياعمر اوريك علاقتي بالكوره عمليا 1- لعبت في فريق العزيمة الرياضي بالخرطوم غرب "وكنت ضمن منتخب الرابطة" 2- لعبت في فريق المقرن " النجوم" 3. لعبت في فريق النيران رابطة بالسجانة 4. لعبت في منتخب رابطة الديم غرب 5. لعبت في فريق الطليعة ليق الخرطوم خانتي التخصصية "ديب سنتر فور ورد"

سلام يا استاذ رمضان كريم

زكرتني ايام .. كنا بنتفرج على رابطة السجانة
فريق حلتنا كان الوادي
الكلام ده 1979/1980/1981 تقريبا ....
النيران والوادى كانت بينهم منافسه شديده على ما اذكر

هههههههههههههههههههه
انا غايتو بسمع بيها زمني دا كلو وكنت خاتي ليها تصوّر تاني غير دا:)

حظظظك يا ود البشرى طلعت ليك بي معلومة وعرفت معنى كلمة ..
عارف انا من زماااان في كلمة بستخدما وما عارف معناها ..أييي زول اسألوا منها يقعد يقول لي هي يعني معناها اقووول ليك كيف..شايف يعني زي ال شنو كده وال يعني حاااجة كده ووو ..اللهم زيي مكالمة حمزة دي مااا بتفهم ليها شي..

الكلمة هي مضمحل ..
مضمحل يعني شنو ؟؟

Quote: ويكفي ملاسي إنو ذات بوست وصف حمزة بأنه أفضل مغني أنجبته حواء السودانية وإستدل بشريط كاسيت وكم أغنية كده ..

بالله ملاسي قال كدا؟ والله كان كدا احترمك كتير وكان حنين فعلا معاك

لا أنا كنت عارض بره الدلوكة كان كدا



بالنسبة لموضوع الكمبيوتر

يا عمر معقول السودان دا كلو فيهو 3 أو 4 القلت عليهم ديل؟ أنا تاني بخت عليهم قول 20

معقول مع الأهمية الكبيرة للكمبيوتر يكون عندنا بس العدد القليل دا من الناس المهرة؟

انا ما قلت ليك؟ نحن بتاعين مرايس ساي

ده بوست ممتع متعة جد
آي صاح لامن اقلب الصفحة بنسي الفيها ,, لكن جد استمتعت بالردود والحك البجيب الدم عديل كده
اكلتو لي قريب نص ساعه قبل الفطور
طلعت بي شنو ? اتكيفت بس

حقيقى ما شفت اشتراطك اى بان اكتب مساهاماتى قبل عقد الجلاد حقيقى ما شفت الجملة دى
لكن عموما
باختصار
قبل عقد الجلاد
ايام الثانوى كنت بقيم حفلات اعراس واقمت حفلات كثيرة جدا وهذا فى الفترة من 1985
فى الفترة من 1985 وحت عام 1986 تم قبولنا فى معهد الموسيقى والمسرح لكن امتدد قبولنا للعام البعدة
نسبة لمشاكل كانت فى المعهد تخص المقر وفى هذه الفترة قمت بغناء فردى مثلا
المقدمة الغنائية لمسلسل بيوت من نار
المقدمة الغنائية لمسلسل ضحايا المدينة
غنيت فى برامج تلفزيونية مثل برنامج حمدى بولاد ( لا اذكر إسم البرنامج)
اجازة الصوت كانت فى 1987
برنامج غنائى اذاعى مع د. عوض ابراهيم عوض ووقتها لم يكن دكتور.
وفى العام 1987، كانت هناك فرقة إسمها الشروق فى معهد الموسيقى غنت بعض اعمال الملحن بابكر سليمان
المؤلف الموسيقى لنمارق ( وهناك تاريخ طويل سأذكرة لك لاحقا).
فى نفس العام عضو فى منظمة نمارق للاداب والفنون وكان اول تسجيل للتلفزيون.
من العام 1988 ، مغنى بمفردى وحتى عام 1989
(وهنا مشاركات كثيرة سأذكرها لاحقا)
انضمامى لمجموعة عقد الجلاد فى العام 1989 - 1990
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
ولا أمانع من ان اكتب لك اى شى يطرأ بخاطرك تجاهى

حقيقى ما شفت اشتراطك اى بان اكتب مساهاماتى قبل عقد الجلاد حقيقى ما شفت الجملة دى
لكن عموما
باختصار
قبل عقد الجلاد
ايام الثانوى كنت بقيم حفلات اعراس واقمت حفلات كثيرة جدا وهذا فى الفترة من 1985
فى الفترة من 1985 وحت عام 1986 تم قبولنا فى معهد الموسيقى والمسرح لكن امتدد قبولنا للعام البعدة
نسبة لمشاكل كانت فى المعهد تخص المقر وفى هذه الفترة قمت بغناء فردى مثلا
المقدمة الغنائية لمسلسل بيوت من نار
المقدمة الغنائية لمسلسل ضحايا المدينة
غنيت فى برامج تلفزيونية مثل برنامج حمدى بولاد ( لا اذكر إسم البرنامج)
اجازة الصوت كانت فى 1987
برنامج غنائى اذاعى مع د. عوض ابراهيم عوض ووقتها لم يكن دكتور.
وفى العام 1987، كانت هناك فرقة إسمها الشروق فى معهد الموسيقى غنت بعض اعمال الملحن بابكر سليمان
المؤلف الموسيقى لنمارق ( وهناك تاريخ طويل سأذكرة لك لاحقا).
فى نفس العام عضو فى منظمة نمارق للاداب والفنون وكان اول تسجيل للتلفزيون.
من العام 1988 ، مغنى بمفردى وحتى عام 1989
(وهنا مشاركات كثيرة سأذكرها لاحقا)
انضمامى لمجموعة عقد الجلاد فى العام 1989 - 1990
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
ولا أمانع من ان اكتب لك اى شى يطرأ بخاطرك تجاهى

حلقة أمبارح كانت بدون أقواس يا ود البشرى؛ ما دعى
المشرف - وواحد من الناس الجداد - لتجاهل خلاصتها!

النقاش في الموسيقى تاني يكون كده

- شروق دي مابتعرف تغني
= لا والله بالعكس غناية
- لا والله مابتعرف
= حرم غناية
- علي الطلاق مابتعرف

وهكذا

والبيسكت اول ( ولابد انك الحاتسكت اول ) هو المطقطق ومغلوب عشرة صفر !

يا خالد الحوار ده طوولتو شديييد...

شروق ما بتعرف تغني.

إنتهى الحوار...