هل كتبت بوست وندمت عليه وهل كتب عضو بوست تمنيت لو كنت كاتبه !!

شخصياً عندي بوست ندمان وسافي التراب على كتابته

وهذا هو البوست الذي تمنيت لو كنت كاتبه : أحلِف بالذي خلقني من تُراب ثم من نُطفة ثم سوَّاني ...هو وائل طه محي الدين
والتحية لكاتبه الاخ العزيز علاءالدين صالح فهذا البوست في المقام الأول غازل ميولي الشرطية ثم انه كان بمثابة انصاف لزميلة مظلومة بالاضافة الى اهميته كفتح جديد
في عالم الاثبات الجنائي الالكتروني .............

سلام جنابو
رمضان كريم وتصوم وتفطر علي خير
وكل سنة وإنت طيب

Quote: سلام جنابو رمضان كريم وتصوم وتفطر علي خير وكل سنة وإنت طيب

الله اكرم يا ابوحميد وربنا يتقبل منا ومنكم .....

البوست السافي عليهو التراب ياتو يا عمر ؛)

أكيد ندمان على البوستات (المنفية)!!

Quote: بالاضافة الى اهميته كفتح جديد في عالم الاثبات الجنائي الالكتروني .............

سلام يا جنابو...
الكلام دا واقع فعلا, هل مايعرف ببصمة الكتابة صار يعتمد كوسيلة إثبات - لا أظن مع ناس كان تجيبها في فلاش ديل:)

بالمناسبة طالما هاوي الموضوع تعال اتسلّى في عواليق الفيس بوك ناس سودان عجل و كينج لاير و انت ماشي :)

Quote: بالمناسبة طالما هاوي الموضوع تعال اتسلّى في عواليق الفيس بوك ناس سودان عجل و كينج لاير و انت ماشي :)

ابوحسين ما برضي

فعلاً يا جنابو بوست استاذ علاء كان مدرسه وعلامه فارقه فى تاريخ المنبر ....... شغل بتاع مباحث على اصولو
ياخى بوستك بتاع الباترا بقى لينا ملجأ كل ما ضاقت علينا الدنيا نمشى عليهو بهناك
التحيه ليك وللريس .....

سلام شيخ عمر
بوست ندمت عليه تقريبا صعب تحديده مع الصيام ده
ولكن بوست المعيار للاخ محمد اي سليمان تمنيت كتابته
وبوست البروف امين الذي اثبت فيه سرقات هشام ادم غير الالكترونية تمنين ان اقوم به
افتح الباب ياتو بوست ندمت عليه !؟

Quote: ولكن بوست المعيار للاخ محمد اي سليمان تمنيت كتابته وبوست البروف امين الذي اثبت فيه سرقات هشام ادم غير الالكترونية تمنين ان اقوم به

فعلاً بوستات مميزة ...........

Quote: افتح الباب ياتو بوست ندمت عليه !؟

ما بقدر أبوح أنا ما داير أصرح
يمكن قولي روح ويمكن قول يجرح
يمكن شي يفوح والناس ما بتريح
غايتو هو بوست كان سبب في عداوة مع اب تفة تحولت لمحبة لاحقاً

Quote: ياخى بوستك بتاع الباترا بقى لينا ملجأ كل ما ضاقت علينا الدنيا نمشى عليهو بهناك التحيه ليك وللريس .....

هو بوست سيادتو عمر علي حسن وانا لي اجر العنوان
تحياتي ياسامي والف شكر ليك

Quote: أكيد ندمان على البوستات (المنفية)!!

ياصحو الذكري (المنفية) بتعدي مواسم وتروح والفرقة بتصبح ابدية

Quote: البوست السافي عليهو التراب ياتو يا عمر ؛)

اب تفة يافقري
أنا عارف وأنت عارف والله عارف خليها مستورة او كما قال دكتور على الحاج

والله العظيم .. أنا قريت عنوان البوست ده قلت كاتبو جنابو عمر
أها ده يقولوا عليهو شنو ؟

Quote: والله العظيم .. أنا قريت عنوان البوست ده قلت كاتبو جنابو عمر أها ده يقولوا عليهو شنو ؟

هههههههههههههه
بصمة الكتابة والا سرك باتع ياشيخ صلاح

يا جنابو .. ما ندمت على بوست كتبته في هذا المنبر إلا ما ندمت على هذا البوست
حوار مع شقيق الراحل عدلان ... حقائق حول مواراة جث...الخاتم عدلان الثرى
..
حيث انني تعاملت بسماحة عالية جدا فيه .. وافترضت فرضيات متسامحة جدا عن اشخاص اعتقدت فيهم رجاحة العقـل ..
الرحمة للراحل الخاتم .
إن عاد الزمن مرة أخرى بهذا الكم الذي جمعته من وعي ومن معرفة وادراك عن بعضهم .. لقدمت هذا الحوار باحسن ما يجب وذلك تكريما لروح الراحل الخاتم عدلان .. عليه الرحمة والمغفرة

رمضان كريم يا صفوة

Quote: شخصياً عندي بوست ندمان وسافي التراب على كتابته

أول ما قريت عنوان البوست ما عارف ليه خطر ببالي
هذا البوست المباحث المركزية تقترب من فك طلاسم قضية مقتل الطالب محمد موسي

عني لم أندم على كتابة بوست .. ولكنني ندمت على معرفة البعض هنا
..
..




.

اللواط في قوم لوط وفي القانون الجنائي السوداني

هذا البوست لم اندم عليه
لان في احد القراء عجبو البوست وثم استاذن وقال لي انا بكتب في رسالة دكتورا وهذا يفيدني في البحث
قلت ليه عوجة مافي والبوست بوستك
ثم قال لي اكتب مرجع من المراجع وحقوق النشر محفوظة


دا بوست الموسم

Quote: وهذا هو البوست الذي تمنيت لو كنت كاتبه : أحلِف بالذي خلقني من تُراب ثم من نُطفة ثم سوَّاني ...هو وائل طه محي الدين والتحية لكاتبه الاخ العزيز علاءالدين صالح فهذا البوست في المقام الأول غازل ميولي الشرطية ثم انه كان بمثابة انصاف لزميلة مظلومة بالاضافة الى اهميته كفتح جديد في عالم الاثبات الجنائي الالكتروني .............

بوست جميل ورائع ومشكور يا جنابو عثمان

وعجبتني جداً عندما إخترت البوست أعلاه وتمنيت لو كنت كاتبه ..
والله أنا أيضاً أتمني لو كنت أنا كاتب هذا البوست.

لقد إهتميت كثيراً بقضية منال ضد وائل طه لأنها كانت سابقة قضائية في المحاكم السودانية ولإهتمامي كذلك بقضايا الجرائم والمباحث بصفة عامة.

المهم ..

أقول ..
مع إزدياد وإنتشار جرائم الإنترنت في كل دول العالم أتمني من كل قلبي أن تهتم الأجهزة القضائية في السودان إهتماماً كبيراً بالجرائم الإلكترونية وأن يتم تدريب شرطة التحري والمحامين والنيابة والقضاة تدريباً عالياً وبصفة مستمرة داخل السودان وخارج السودان .

رمضانك كريم يا جنابو

Quote: هل كتبت بوست وندمت عليه

بوست لا أذكر .. لكن مداخلات نعم .. كتييير

(اللهم أغفر لنا ذنوبنا و كفر عنا سيئاتنا)

تحياتى ..

Quote: الله العظيم .. أنا قريت عنوان البوست ده قلت كاتبو جنابو عمر أها ده يقولوا عليهو شنو ؟

نقول عليك انك قريت البوست وكنت مفتح عينك اليمين ومغمد اليسار

سلام ابودية وجنابو(والمرور)

Quote: عني لم أندم على كتابة بوست .. ولكنني ندمت على معرفة البعض هنا

يا أمين أفرز بالله
-------------------
يا جنابو، إنت قصة زول يتمنى حاجة غيرو دي، ما ياها الحسادة ؟!!!

سلام جنابو عمر

بوست تمنيت لو كنت صاحبه هو بوست الأخ الجميل الفاتح ميرغني

شخصيات مهمة جدا إلتقيت بها ..... توجد صور

المحترم عمر عثمان وضيوفة


تحية طيبة ورمضان كريم وتصوموا وتفطروا على خير


الاخ الامين البشاري

Quote: عني لم أندم على كتابة بوست .. ولكنني ندمت على معرفة البعض هنا

بصراحة بوست الدرويشة بت ضياء وعشان الحاجات تكون كويسة عليك الله ما ندمت عليه

ما يختص ب(الدرويشة بت ضياء) .. وعشان الحاجات تبقي كويسه!


والله يا الأمين لي هسع محتار أننت عملت معاي كدا ليييه ؟ والله راجعت نفسي عشان القى نفسي غلطت فيك غلط يخليك تحنق وتحقد علي الحقد دا وتكرهني الكراهية دي ما لقيت

والحمد لله ياهو دا نحنا في رمضان قول لي سبب ؟؟؟

اقول ليك حاجه هل أنت مقتنع أني ممكن اسب أم معاوية لي شنو

قول لي سبب عشان اقتنع واعتذر ليك ونتصافى في البوست دا والله صحي

رمضان كريم عليكم أجمعين
لم اندم أبدا على أي بوست فتحتو بل بالعكس في بوستات تمنيت أن اكتبا تاني وتاني ..
ولم اتمن أبدا أن أكون كاتبا لأي بوست في هذا المنبر إلا بوستاتي ..
لكن بصراحة ندمت على أني شلت وأديت ورديت واتداخلت في بوستات نفر هنا قبل أن أعرف من هم
وما هو مستواهم وكيف يفكرون وبعد أن عرفت مويتم أصبحوا بالنسبة لي كأنهم ما كانوا .
وعايز أضيف قريبا من موضوع البوست الآتي :
أنتظر بلهفة شديدة كتابات الملك البقت بالقطارة دي ..
وعندما ألمح إسم عبد الوهاب الحاج في أي بوست لازم أخش آخد لي جمة وأحس احساس القام من نومة حلوة وقعد يتمطي بى متعة وراحة... الخ ..
وتعجبني بصراحة حركات عمر الفاروق وطريقتو واسلوبو وأحبو جدا رغم قلاصتو واستغياظو .

وان نسيت فلن أنسي والله حيدروف النجم الملقب بحيدر الزين ..
انني أحب هذا الشخص وأحب اسلوبو والله
ودي ما مجاملة .

سلامات يا عمر ورمضان مبارك
بوست كامل ما أظن انما مداخلة يمكن ,, أحيانا الواحد بكون ما مركز وبغلط في بعض الناس.
ـ فدي ننتهزها فرصة ونطلب من الجميع أن يغفروا لنا ماعلموا منا وما لم يعلموا ودعوة لفتح صفحة بيضاء مع بعضنا البعض بمناسبة الشهر المبارك.

Quote: ابوحسين ما برضي

يا ودالبشري يعني الراجل طلع جنابو ودبلوماسي
ابعد من الصفوة ـ وخليك مع زولكن البربار ده ياقول ود الباوقة.

ود البشري ياخ رمضان مبارك.

يا عمر
هل تصدق مافي بوست انا فتحتو خططت ليهو، البوستات كان ممكن تكون مداخلة في اي بوست، انا بستمتع ببوستات الاصحاب، ما بحب افتح بوست، لانو ما بحب التقييد، اي حاجة كتبتها، بخيرها وشرها، لو جات نفس ظروفها بعيدها تاني.. لما ارجع لي كتابتي من جيت هنا بعد إنقطاع طويل من الكتابة بالعربي، من الثانوي، بلقى في أخطاء مضحكة. المكان ده انا حسنت فيهو لغتي بعض الشيء، أي زول صححوه في غلط، انا استفدت منو ؟

أمين يا سمي .. رمضان كريم

Quote: يا أمين أفرز بالله

يا سمي ياخ التبعيض دا كلو ما شايفو؟

Quote: عني لم أندم على كتابة بوست .. ولكنني ندمت على معرفة البعض هنا

يا أمين في ناس تتمنى إنك تلاقيهم وتتعرف عليهم
حتى توثق علاقتك بهم ..
وفي بعض الناس اعوذ بالله .. وخصوصاً لو كنت راسم ليهم صورة زاهية
ما علينا الحياة تجارب والاستفادة منها مهمة

Quote: حيث انني تعاملت بسماحة عالية جدا فيه .. وافترضت فرضيات متسامحة جدا عن اشخاص اعتقدت فيهم رجاحة العقـل .. الرحمة للراحل الخاتم . إن عاد الزمن مرة أخرى بهذا الكم الذي جمعته من وعي ومن معرفة وادراك عن بعضهم .. لقدمت هذا الحوار باحسن ما يجب وذلك تكريما لروح الراحل الخاتم عدلان .. عليه الرحمة والمغفرة

راسلني احد الاصدقاء المحترمين الذين يجيدون القراءة والكتابـة الممتعة ..
راسلني مستفسرا عن غموض في كتابتي اعلاه فيما يتعلق بي بوست الراحل الخاتم .. وعنفني بشي من الحميميـة عن انني كيف اتراجع عن موقف كنت فيه باحثا عن الحق ..
يبدو ان الصديق رمضان فعل معه الافاعيل بعد ان اخترق العضـم دخولا وخروجا ..
يا صديقي ..
كل ما هناك انني استنكرت على نفسي ان تعاملت بنوع من الليـن والعطف مع اصحاب المصالح وقتها .. ومع الجماعات التي تقوم بتلوين الحقيقة من انصاف المثقفاتية وارباعها .. حيث اتضح بعد فترة قصيرة انني وبالرغم مما كتبته من حقيقة ماثلة امامي وقتها لا ترتقي إلى مستوى طموحات بعض المتثاقفة حيث ان البعض لو اتيحت لهم فرصة اجراء هذا الحوار، لجيروهو لمصلحة جهات مختلفة ترضى غرورهم وتصنع لهم اسماء هلاميـة.
الجدير بالذكر ان البوست المعني كان بمثابة نقطـة تحول كبيرة تم بعده تصنيفي ورشقني بعض المناضلين بعيدان الورد الانقليزي .
يا صديقي لو الزمن رجع بي شويـة .. كان ضفرتهم ليك بالطريقة السليمـة ووفق ما جاء في النوتة الموسيقية.