ذهب الظمأ ... تاج السر الملك

في ذكرياتي الغابرة جلست أقلب، فرأيت الساعة الثالثة ظهراً، في أي رمضان سوداني تختاره، تتأبى عقارب الساعة فيها عن المضي قدماً، ثانية ولو جزء من الثانية، وبينك وبين الآذان فراسخ تتسع للدهر، والمؤذنين خروج بلا عودة بعضهم إلى جزر الكاريبي، وبعض مناحٍ قصية، ولا أحد يعلم من سيؤذن للمغرب حين يحين موعد الإفطار حتى يذهب الظمأ وتبتل العروق، الساعة الثالثة في نهار رمضان السودان، تتوقف الأرض فيها عن الدوران، حول الشمس، فالصيف أبدي، أو حول نفسها، فالنهار سرمدي.
هنالك في أقصى أركان المنطقة الصناعية في (مدني)، يقوم على عمدٍ بائسة، مصنع أو أنه يعرف بالمصنع، بلا لافتة حتى، ولا أثر يدل عليه، ولا من يعرف من أوجده، أو من اكتشف وجوده واهتدى وهدى الناس إليه، ولكنه هناك، يعبأ فيه سائل إسمه عصير البرتكان، في زجاجات خضر، رقابها رهيفة ممتدة كسحاحة، سائل له نكهة متواضعة من خليط (زيت التربانتين) و(الشيري)، ولمحة من روح البرتكان، ولون أصفر معتكر، والرحلة إلى هذا المكان، تقطع في غير نهار رمضان، ساعة ونصف في الذهاب والإياب، تعود منها في نهار رمضان، بعد اداء مناورات ما يعرف (بتكسير الوكِت)، وقد بلغ منك الإنهاك مبلغ ما يصيب عداء ماراثون، لتجد أن (الوكِت) غيره في رمضان، لا يتكسر أبداً، وأن الساعة التي حلمت بأنها ستكون حسب منطق الرياضيات والفيزياء النووية والكوانتمية، الرابعة والنصف، تقدمت مسافة خمس دقائق فقط، فهي الثالثة وخمس دقائق بالضبط، وكل ثانية لها وقعها في القلب.
لابأس، ساعة ستقضيها في تمديد (الخرطوش) الساخن الذائب المتهالك على نفسه، في ركن البيت، زاوية باب الحوش ذو المظلة الأسمنتية والحمام، ستتهيأ لطقس رش الحوش، لساعة تعادل في نهار رمضان دقيقتين، وهذا أقرب ما يكون إلى الوصف المذكور في أغنية (الحب والظروف)، الساعة أقصر من دقيقة، لتكن دقيقتين لافرق ولا غرابة، سترش الحوش وترابه ذرة ذرة، ركناً ركناً، الريحان والحنة، والجيران والحِله، وفي عمق هذه الأثناء، وجهك وقدميك المغبرتين، الحوائط حتى تنفث صهدها، ويتساقط عنها الطِلاء، والمعزتين وقفص الدجاج، وكل نبت طفيلي، وكل من تسول له نفسه العبث بمقدرات الشعب، تعبئ باطن الأزيار وتغسل ظاهرها، تتملكك الرغبة في اختلاس النظر إلى (السيكو) التي تشنق معصمك، أداة زينة في غيرما نهار رمضان، ولا جدوى، وبعينين كابيتين، إنطفأ فيهما البريق، تنظر (البرتكان) داخل الزجاجات الخضر الشفافة، وقد أختلط لونها ولون السائل، فأنتجا ما يمكنك تسميته بلون العطش. تدق الرابعة، والأرض في مكانها تسير، العسكريون يسمون ذلك خطوات تنظيم.
أدركت الجمعة (صلاح)، وهو في مكان يبعد كثيرأً عن جامع الهجرة، الذي اعتاد أداء الصلاة فيه، وفي تجواله في الطرف النائي، رأى مئذنة متوسطة الطول، موزيك وزخارف عربية ونوافذ بأقواس إسلامية، أوقف سيارته في عجل ليلحق بالخطبة، توضأ، بسمل حوقل، دخل الجامع والجمع شاخصون بأبصارهم نحو المنبر، جلس فوقف الإمام متكئاً على عصاه، قال والقوم خشوع (بسم الله والحمد لله، والصلاة والسلام على نبيه الأمين سيدنا محمد "صلعم" وعلى آله وصحبه أجمعين، أما بعد)، ثم انبرى
(إز طريق مسلماان عزيز وسبس ممكن است شما همجنين روزة در دين توسط شما نوشت .....)
فأدرك أنه في غير ما مكانه، و الناس يهزون رؤوسهم إعجابا وتعجباً، حتى إذا أتي لنهاية الخطبة، وجاء وقت الدعاء، رفع صلاح يديه مع القوم، حتى لا يحسب في زمرة الكفار
(اللهم نوشت صدام حسين، ودجاج أربيل نسيان قادسية ابدا)
فصاح صلاح بصوت جهير: آمين.
كنا نعود من غزوة جلب قناني العصير والذي ليس هو بعصير، جوعى، عطشى، حتى يتراءى لنا البرسيم، الذي يبيعه رجال على حواف الطريق، شهياً، أشهي والذ طعماً من سلطة (فتوش)،
قال لي صديقي الحنكوش (و الله أحلى حاجة في رمضان ده ياعمو، عصير القنقلوز، ماما بتعملو) ..إنتهى.
في الساعة الخامسة، تبدأ افواج (الطافيات) في غزو ناظريك، تسبح في غزارة على مرمى بوصة من وجهك، تهرش عينيك هرشاً، وهاهي ذي تعود أشد باساً، برسومها المفصلية في دقتها الهندسية، ما أن تتبعها بعينيك، حتى تفر منك، تعود حين تصرفه عنها، أميبية لا تعلم إن هي حقيقة أم وهم، وفي الخامسة وخمس دقائق، حاورني جارنا الشيوعي فقال (الرسول صام تسعة رمضانات، دي مش مفروض تكون سُنّة؟)، و حينما سأله القوم، لماذا تصوم أنت أصلاً، أجاب (رجالة سااااي). وأفطر صديقنا ابو الجاز تلك السنة، متعللاً بدعوى أن طبيب العيون اوصاه بلبوس النظارة الطبية، وضعف النظر مرض قال بأنه يبيح الإفطار.
ليلة القدر:
حدثني (بيجو)، وهذا اسمه، مسرع، يكسر (الوكِت) إيما تكسير، ومتى ما أراد، في مقتبل صباه، ومنتهى عنفوانه، عاطل عن اي موهبة او صنعة، سوى المروءة في دفع العربات، وحيوية زائدة بلا جهة تبذل فيها، حدثني بعد الإفطار، والسجارة الاولى تفعل سحرها، بعيداً عن أعين الأعمام الغلاظ، دوخة لا تدانيها (دوخة العرب)، "ياخي في مرا عجوز خواجية في الانترنت، قالت لي أنا معجبة بيك، ولو عايز بتعمل لي فيزا وتيكيت، تجي تسكن معاي هنا في ألمانيا قالت، عليك الله دي ما ليلة القدر؟"
أجبته "شوف لي لو عندها اخت".

Quote: "ياخي في مرا عجوز خواجية في الانترنت

والان يا تاج بعد ستمية سنه فى بلاد الخواجات ...
وفى ذمتك ...
ليلة القدر دى
ولا ليلة القدر نهارات رمضان فى السودان ؟؟










ـــــــــــــــــــــــــ

Quote: (إز طريق مسلماان عزيز وسبس ممكن است شما همجنين روزة در دين توسط شما نوشت .....)

والله مدنى ما ساهلة ....
دى يا بكرى تستحق تتعلق لو سمحت نزل الافطارات
قوام ,,, او خليها فوق خالص .. جد جد حلوة ما هزار يا بكرى ..

ما تغيب يااااخ

يديك العافيه يا تاج الكتابه الجميله .....

الحبيب رمضانك كريم
رفعتوا لأني عارفو ح يمشي وين!
المنبر فيه تيار أسميه لعدم الرغبة في الاستعداء
"تيار اللامبالين بالأدب"
المقصود الأدب بنوعيه!

شكرا يا مصطفي مدثر
ورمضان كريم
حمانا الله من تيار اللامبالينديل دحين جماعة هربرت ماركوز الزمان ديلك؟؟ ههههه
شكرا لك مرة تانية

ويديك الف عافية يا سامي
وكل عام وانت ومن تحب بخير

عمر عثمان سلام وتحية ورمضان كريم

كلما تسنح الفرص

دينا خالد

ليلة القدر نهارات رمضان السودان أكيد
خاصة عندما يقترب العيد

الجامع الماساهل ده مافي مدني الماساهلة بالمناسبة
في فيرفاكس كاونتي، مدني مصنع عصير البرتكان الما برتكان :)
شكري على المتابعة والمداخلة
تحية و رمضان كريم

الصديق تاج
متعك ربي بالعافية كتابة فنانة ولا غبار عليها وكل عام وأنت بخير
مع صادق ودي

**وكما قيل لا تغيب علينا كتير

كتابة تذهب الظمأ

شكرا لك أخي عبد المجيد ورمضان كريم

زهير العزيز
كل سنة وانت بالف خير وشكرا على المتابعة والتعليق.
لن أحيد ولن أغيب

كما العادة تجيد التصنت بما يجوش الحس ..

تهادن ثم تطلق محتواك لتتبين دهشتنا قبل الإحتراس .. رغم ذاك لاينفع ولا يجدي نفعا

ها قد تخدرت المســـام .. ورويت عرق النبض بما رويت علي السطور

كما العادة نغيب وتجبرنا علي الإنتباه .. فيا سلام يا ملك ..

نفسى اعرف مدنى دى بتكون بمثل هذة السخونة الوحشية فى ايى فصول العام
وصفك يا الملك فى اتبرااااا اسعلنى اناااا داااا يدييييك العافية يا راجل يا مبدع
بالله مدتى فيها مصنع ليمونادة غايتو البعرفوا عندهم بيبسى قصااار كدا
رمضان كريم وتصوموا وتفطروا على خير
:
:
:
:
مع التحيات لله الزاكيات

محمد حمزة سلام

والله انا من مدني لي اربعة وعشرين سنة متوااااااصلة لكن ادكر شهر مايو
وهو الدرت، لكن مافي شهر في مدني بشبه حر عطبرة، بالمناسبة مدني بتعتبر من المناظق
المكندشة طبيعيا في السودان اكون بكتب وفي بالي عطبرة ههههه
دكرتني الببسي القصار (ميني ببسي)، ولا اظنو كوكاكولا، وسجاير البحاري والرغيفة المخرومة من النص
وود الفتلي واشياء اخري او اخر
لك تحيتي ورمضان كريم

تاج السر سلام

ودالفتلي دي قطعتها من وين ياخ

رمضان كريم ومتعة بجد

الفاتح سليمان
رمضان كريم

إنت أظنك معاصر ههههههه
ود الفتلي اساسي ياخ هههه

عبد الله داش المبدع
سعيد بلقاك في رحاب الشهر الكريم وقد ابتلت العروق وصفا العقل
هده يشبه هديان الثالثة الحمقاء
لك مودتي

شكرا يا تاج

كتابه طاعمه ومرتبه ورايقه

Quote: ودجاج أربيل نسيان قادسية ابدا)

ما جاب سيرة لحم الحصين ؟

رمضان كريم يا ملك
كل عام وانتم بخير وصحة وألق ..
........................
الأستاذ زهير قال ليك كتابة ( لاغبار عليها ) .. تكون تمرتها ولمعتها قبل تجيبا لينا هنا واللا شنو ؟ ههههههه

....

والله أنتابتنى روح شريرة جداً وقربت اكت انو تاج السر سرق منى النص ده على الرغم من أنو لم يعرف عنى كاتب نصوص وقصص..هنا فهمت مشاعر الذين يدعون ان الأخرين سطوا على كتاباتهم ماهى الا حالة جذب قام بها النص لروحهم واسرها فى مداره فالتبس عليهم الأمر..

عجيب ياخ..

Quote: فهمت مشاعر الذين يدعون ان الأخرين سطوا على كتاباتهم ماهى الا حالة جذب قام بها النص لروحهم واسرها فى مداره فالتبس عليهم الأمر..

هههههههههه
يا حاتم عايز تعمل ليك مراقة لحرامية النصوص وناهبي الأفكار ؟؟
رمضان كريم عليك ومن يليك .

حاتم الياس

Quote: والله أنتابتنى روح شريرة جداً وقربت اكت انو تاج السر سرق منى النص ده على الرغم من أنو لم يعرف عنى كاتب نصوص وقصص..هنا فهمت مشاعر الذين يدعون ان الأخرين سطوا على كتاباتهم ماهى الا حالة جذب قام بها النص لروحهم واسرها فى مداره فالتبس عليهم الأمر.. عجيب ياخ..

الخير و البركة يا ايها الكاتب النحرير، النصوص تخرج من وعينا الجمعي فهي
منا جميعا واليناتعود
اتوبيوغرافيا سودانية تخصنا كلنا (كسودانيين)، ناكل نفس الطعام ونمشي في نفس الاسواق.
تحياتي ورمضان كريم

Quote: والله أنتابتنى روح شريرة جداً وقربت اكت انو تاج السر سرق منى النص ده على الرغم من أنو لم يعرف عنى كاتب نصوص وقصص..هنا فهمت مشاعر الذين يدعون ان الأخرين سطوا على كتاباتهم ماهى الا حالة جذب قام بها النص لروحهم واسرها فى مداره فالتبس عليهم الأمر..

يا حاتم تم باقي الكلام

طلحة الصديق وقت الضيق

Quote: الأستاذ زهير قال ليك كتابة ( لاغبار عليها ) .. تكون تمرتها ولمعتها قبل تجيبا لينا هنا واللا شنو ؟ ههههههه

النسأل زهير والله لكن عن نفسي فهمتها face value@
وحاراجع الكتابات الفاتت نتأكد برضو
لك وله التحية ورمضان كريم



إنت ألق دي برضو زي شفت ليك لمعة في النص؟؟ ههههه

خضر الطيب

Quote: ما جاب سيرة لحم الحصين ؟

هههههههه دحين ده مش في ريطانيا؟؟

دجاج العرب ما غداك، جملة عراقية بروباقانداية وردت في قصيدة ضد الخميني
ضحية الحرب، قصد بها المن على خميني لأنه كان لاجئاً في النجف لربع قرن
(تاكل جدادانا وتقوم تحاربنا)، المعنى.
نقلناها بتصرف
لك المنى برمضان أقل حرارة.

يا سلام عليك يا تاجنا ياخ

دوختنا والله

كتابة أطعم من سفرة رمضان في البلد

شكرا كثيراً على هذا الجمال الذي أنعش فينا طعم رمضان .. الذي أطبح لا طعم ولا رائحة له في هذه الخرطوم


ك التحية يا عزيز .. وإنشاء الله ببركة الشهر العظيم تعتريك شهوة كتابة تملا لينا الصفحة الأولى ذي هشام هباني :)) كماً لا نوعاً

شكرا لك أخي انقابو على المداخلة الكيبة العميقة
و تمنياتي لك بصيام معافى و أن يحقق الله أمانيك ببركة هذا الشهر
ههههه أما بخصوص شهوة الكتابة فالصيام كفيل باشعال جذزتها
لك ولهباني السلام

يا للمتعه!!! يشهد الله اني استمتعت حتي حسدت نفسي..... ياخي ربنا اديك الفي مرادك،،ورمضان كريم

الامين محمد علي

Quote: ا للمتعه!!! يشهد الله اني استمتعت حتي حسدت نفسي..... ياخي ربنا اديك الفي مرادك،،ورمضان كريم

أنا كمان حسدتك على متعتك... ههههه
رمضان كريم وكل سنة وانت طيب

رمضان مبارك...
تقبل مروري وبإعجاب ...
أيها المك المتوج بالإسرار |...

Quote: النسأل زهير والله لكن عن نفسي فهمتها face value@ وحاراجع الكتابات الفاتت نتأكد برضو

هههههههههه
غايتو يا ملك أنا متأكد مليون في المية أنو كتاباتك قاعدة تأخد شاور يوميا دا غير حمام الزيت و الكريمات والبودرة وخلافو
لكن كان مصر تراجع عشان كلام زهير دا فمعني كدا نحن ذاتنا محتاجين نراجع أذواقنا وتقييمنا للأدب والأدباء ..
.............
بالله بالمرة كدا يا تاج ما ترمي وصية أنقابو بتاع (الكم لا الكيف) دي الواطة .. هههههههه الله غالب غايتو .

..
سلامات عوافي
تاج السر الملك

رمضان كريم وتصوم وتفطر علي خير ان شاءالله
تداعي جميل وسرد اجمل .. وليتك لم تتوقف عن الكتابة


مع ودي
واحترامي

محمد عوض السيد أخي العزيز

Quote: رمضان كريم وتصوم وتفطر علي خير ان شاءالله تداعي جميل وسرد اجمل .. وليتك لم تتوقف عن الكتابة

لم اتوقف عن الكتابة ولا للحظة وشكرا على سؤالك، ولكن لها اخوات واحدة
التشكيل والتصوير واكل العيش، ادعي لينا الكتاب الجديد يمرق ويتدشن في القريب العاجل.

تصوم وتفطر على خير

والله يا طلحة وكت جبت الكلام وجاب الكلام الكلام هههههه أنا عاجبني (الحيرقان) ده
وكفي


:)

رمضان كريم يا سر الجمال
شفت كيف هههه

Quote: (إز طريق مسلماان عزيز وسبس ممكن است شما همجنين روزة در دين توسط شما نوشت .....)

لطيف يا تاج دائما ... موووبالغة ... ذكرتني بـ:
(يا مسلمي العالم وشعوبه المضطهدة، صلوا على النبي)
و
(لملم عموم حريم أفغان) وترجمتها عند عمك غوغل (اتحاد عام نساء أفغانستان) والله تعالى أعلم
وحاجاتك الغميسة ديم من إذاعة مقديشو الحرة لغاية ود الفتّلي وحيدر قطامة
ما تطوّل

عبد الله عثمان الصديق الشقيق


ولا ننسي (آية الله خميني إستثمار حقيقت) ههههه
يا ليتك معنا عند زيارة النور فقد قضينا وقتاً سمحاً
تحياتي ليك و للمعاك وإن شاء الله نلتقي
تاج السر

رمضان كريم يا الملك....

آها عاد النفتو ليك زي فتتك الفوووق ديك...
أولاً:
أنا غايتو وقوف نهارات رمضان في السودان العلي حيله دي والنطار النطار ده... وإنها بتحرن من المشي بعد الساعة تلاتة..
وبرنامج الرش وملي الأزيار ورش الحوش والشجر دي ..... والكركاره الكركاره الصعبة ديك...ياها بي ظاطا وصفاتا يا الملك... عندي...
وما عندكم جهنمية كده فقدت الرغبة في الإزهار والخضرة بسبب الحر..وبقت عود...بس عندها صفقتين وزهرتين كدي متكولات في حيطة طوب مشققة ومضروبة بي جير هوكس (أخضر 66) والسكينة بي لون أبيض حزين (منقرف) من الحر والطين..؟؟

إحتفلت كثيراً (بالبرتكان والوكت) بشكل خرافي.... عليك الله... هسي كان كتبناهن كدي زي ما قاعدين نقولن يعني المعنى... الكعب شنو في طريقة الكتابة دي (ما كتابتنا وبت حارتنا وبنريده ....؟؟!!)

ياخي ما خليك كاتب طوالي في البتاع ده..... عشان أنحنا نجي نقرا وكده... ولا رأيك شنو بالله في الموضوع ده....؟؟

غايتو التصاوير دي بتعرف ليها كان بالكاميرا ولا بالفرشاة ولا بالقلم يا ولدي.... الله يديك العافية يا ملك.

ههههيع جاكم أزهري البعرف النضم و غنا بادي و اللاكورديون الجد وقيل الكلارنيت

Quote: أنا غايتو وقوف نهارات رمضان في السودان العلي حيله دي والنطار النطار ده... وإنها بتحرن من المشي بعد الساعة تلاتة.. وبرنامج الرش وملي الأزيار ورش الحوش والشجر دي ..... والكركاره الكركاره الصعبة ديك...ياها بي ظاطا وصفاتا يا الملك... عندي... وما عندكم جهنمية كده فقدت الرغبة في الإزهار والخضرة بسبب الحر..وبقت عود...بس عندها صفقتين وزهرتين كدي متكولات في حيطة طوب مشققة ومضروبة بي جير هوكس (أخضر 66) والسكينة بي لون أبيض حزين (منقرف) من الحر والطين..؟؟

والله نحنا كان عندنا جهنمية من شدة ما تعيسة، الغنم الجعانات بشفقن عليها، يمرو فيها ساااكت و يهزهزن رويساتن
والعنب بالله ناكلو قبال مواعيدو، حاااامض يا دوووووب خرج من مرحلة الشرنقة، أما جوافة جيرانا الشايلة حبة واحدة بس
تجي تلقى أولاد الحلة من قشو عيونن من النوم، قاعدين يحدرو ليها للمسا لا كلل ولا ملل، بعدين جاييك في الحلقة القادمة في حب رمضان
تلقا حبيبتك ممصرنة و يابسة عوود وجنس طرحة وجنس تقوى
جاي كلو في السكة
وسعيد بحضورك البهي المشرق
رمضان كريم يا ازهري

بالله يا ملك عجل لينا بالكتاب الجديد
بعيد عنك معدتنا قلبت بسبب اللبن (المطنبج موية) القاعدين يبيعوا لينا بعض الذين أرجو أن يهديهم الله ويشفيهم ..
ولو كمان لسة شوية عليك فبالله ما تطول الغيبة زي آخر مرة دي .

Quote: بالله يا ملك عجل لينا بالكتاب الجديد بعيد عنك معدتنا قلبت بسبب اللبن (المطنبج موية) القاعدين يبيعوا لينا بعض الذين أرجو أن يهديهم الله ويشفيهم .. ولو كمان لسة شوية عليك فبالله ما تطول الغيبة زي آخر مرة دي .

اديني دقيقتين بس وبكون حاضر يا ابو عبد الله
عليك بالبنسلين هههه